பாடிதே³ஸனீயகண்ட³ம்

1. பட²மபாடிதே³ஸனீயஸிக்கா²பத³வண்ணனா

அந்தரக⁴ரம் பவிட்டா²யாதி ரதி²கம் ப்³யூஹம் ஸிங்கா⁴டகம் க⁴ரம் பவிட்டா²ய. அஸப்பாயந்தி ஸக்³க³மோக்கா²னம் அஹிதம் அனனுகூலம். பி⁴க்கு²னியா அந்தரக⁴ரே ட²த்வா த³த³மானாய வஸேனேத்த² ஆபத்தி வேதி³தப்³பா³, பி⁴க்கு²ஸ்ஸ டி²தட்டா²னம் பன அப்பமாணம். தேனாஹ ‘‘அந்தரக⁴ரம் பவிட்டா²யாதி வசனதோ’’திஆதி³. அந்தராராமாதீ³ஸூதி அந்தராராமபி⁴க்கு²னுபஸ்ஸயதித்தி²யஸேய்யாபடிக்கமனேஸு. ரதி²யாப்³யூஹஸிங்கா⁴டகக⁴ரானந்தி ஏத்த² ரதி²யாதி ரச்சா². ப்³யூஹந்தி அனிப்³பி³ஜ்ஜி²த்வா டி²தா க³தபச்சாக³தரச்சா². ஸிங்கா⁴டகந்தி சதுக்கோணம் வா திகோணம் வா மக்³க³ஸமோதா⁴னட்டா²னம். க⁴ரந்தி குலக⁴ரம். யதா² ச ரதி²யாதீ³ஸு ட²த்வா த³த³மானாய க³ண்ஹதோ ஆபத்தி, ஏவம் ஹத்தி²ஸாலாதீ³ஸுபி த³ட்ட²ப்³ப³ம்.

‘‘யாமகாலிகாதீ³ஸு படிக்³க³ஹணேபி அஜ்ஜோ²ஹரணேபி து³க்கட’’ந்தி இத³ம் ஆமிஸேன அஸம்பி⁴ன்னம் ஸந்தா⁴ய வுத்தம், ஸம்பி⁴ன்னே பன ஏகரஸே பாடிதே³ஸனீயமேவ. ஏகதோ உபஸம்பன்னாயாதி பி⁴க்கு²னீனம் ஸந்திகே உபஸம்பன்னாய, பி⁴க்கூ²னம் ஸந்திகே உபஸம்பன்னாய பன யதா²வத்து²கமேவ.

ஞாதிகாய வா தா³பேந்தியாதி ஸயம் அத³த்வா யாய காயசி ஞாதிகாய தா³பேந்தியா, அஞ்ஞாதிகாயாதி அத்தோ². உபனிக்கி²பித்வா வா த³த³மானாயாதி பூ⁴மியம் ட²பேத்வா ‘‘இத³ம், அய்ய, தும்ஹாகம் த³ம்மீ’’தி த³த³மானாய. ஏவம் தி³ன்னம் ‘‘ஸாது⁴, ப⁴கி³னீ’’தி ஸம்படிச்சி²த்வா தாய ஏவ வா பி⁴க்கு²னியா, அஞ்ஞேன வா கேனசி படிக்³க³ஹாபேத்வா இத³ம் பு⁴ஞ்ஜிதும் வட்டதி.

பட²மபாடிதே³ஸனீயஸிக்கா²பத³வண்ணனா நிட்டி²தா.

2. து³தியபாடிதே³ஸனீயஸிக்கா²பத³வண்ணனா

யோ ச படிக்³க³ஹேத்வா பு⁴ஞ்ஜதீதி ஸம்ப³ந்தோ⁴. அத்தனோ வா ப⁴த்தம் தா³பேந்தியாதி ஏத்த² ஸசேபி அத்தனோ ப⁴த்தம் தே³தி, இமினா ஸிக்கா²பதே³ன அனாபத்தியேவ, புரிமஸிக்கா²பதே³ன ஆபத்தி. அஞ்ஞேஸம் வா ப⁴த்தம் தே³ந்தியாதி ஏத்த² பன ஸசே தா³பேய்ய, இமினா ஸிக்கா²பதே³ன ஆபத்தி ப⁴வேய்ய, தே³ந்தியா பன நேவ இமினா, ந புரிமேன ஆபத்தி.

து³தியபாடிதே³ஸனீயஸிக்கா²பத³வண்ணனா நிட்டி²தா.

3. ததியபாடிதே³ஸனீயஸிக்கா²பத³வண்ணனா

லத்³த⁴ஸேக்க²ஸம்முதிகானீதி ஞத்திது³தியேன கம்மேன லத்³த⁴ஸேக்க²ஸம்முதிகானி. யஞ்ஹி குலம் ஸத்³தா⁴ய வட்³ட⁴தி, போ⁴கே³ன ஹாயதி, ஏவரூபஸ்ஸ குலஸ்ஸ ஞத்திது³தியேன கம்மேன ஸேக்க²ஸம்முதிம் தே³ந்தி, தம் ஸந்தா⁴யேதம் வுத்தம்.

க⁴ரதோ நீஹரித்வாதி க⁴ரதோ ஆஸனஸாலம் வா விஹாரம் வா ஆனேத்வா. தேனாஹ ‘‘ஆஸனஸாலாதீ³ஸு வா’’தி. இமஸ்ஸ ‘‘தே³ந்தீ’’தி இமினா ஸம்ப³ந்தோ⁴. த்³வாரமூலே வா ட²பிதம் தே³ந்தீதி த்³வாரமூலே ட²பிதம் பச்சா² ஸம்பத்தஸ்ஸ தே³ந்தி. பி⁴க்கு²ம் பன தி³ஸ்வா அந்தோகே³ஹதோ நீஹரித்வா தி³ய்யமானம் ந வட்டதி. நிச்சப⁴த்தகேதி நிச்சம் தா³தப்³ப³ப⁴த்தகே. ஸலாகப⁴த்தேதி ருக்க²ஸாரமயாய ஸலாகாய வா வேளுவிலீவதாலபண்ணாதி³மயாய பட்டிகாய வா ‘‘அஸுகஸ்ஸ நாம ஸலாகப⁴த்த’’ந்தி ஏவம் அக்க²ரானி உபனிப³ந்தி⁴த்வா கா³ஹாபேத்வா தா³தப்³ப³ப⁴த்தே. பக்கி²கேதி ஏகஸ்மிம் பக்கே² ஏகதி³வஸே தா³தப்³ப³ப⁴த்தே. உபோஸதி²கேதி உபோஸதே² தா³தப்³ப³ப⁴த்தே. பாடிபதி³கேதி பாடிபத³தி³வஸே தா³தப்³ப³ப⁴த்தே.

ததியபாடிதே³ஸனீயஸிக்கா²பத³வண்ணனா நிட்டி²தா.

4. சதுத்த²பாடிதே³ஸனீயஸிக்கா²பத³வண்ணனா

தஸ்ஸ பரிவாரம் கத்வா, அஞ்ஞம் வா தேன ஸத்³தி⁴ம் ப³ஹுகம்பீதி யாகு³யா படிஸம்விதி³தம் கத்வா ‘‘கிம் ஸுத்³தா⁴ய யாகு³யா தி³ன்னாய, பூவப⁴த்தாதீ³னிபி ஏதிஸ்ஸா யாகு³யா பரிவாரம் கத்வா, த³ஸ்ஸாமா’’திஆதி³னா தஸ்ஸ கா²த³னீயஸ்ஸ வா போ⁴ஜனீயஸ்ஸ வா பரிவாரம் கத்வா, அஞ்ஞம் வா யம் கிஞ்சி தேன ஸத்³தி⁴ம் ப³ஹுகம்பி ஆஹரீயது. கா²த³னீயந்தி நித³ஸ்ஸனமத்தம் ‘‘போ⁴ஜனீயம் வா’’திபி இச்சி²தப்³ப³த்தா. தேன ஸத்³தி⁴ம் ஆஹரந்தூதி தேன ஸத்³தி⁴ம் அத்தனோ தே³ய்யத⁴ம்மம் ஆஹரந்து. ‘‘யாகு³யா படிஸம்விதி³தம் கத்வா பூவம் வா ப⁴த்தம் வா ஆஹரந்தி, ஏதம்பி வட்டதீ’’தி (பாசி. அட்ட². 573) குருந்தி³யம் வுத்தம்.

படிஸம்விதி³தகி³லானாவஸேஸகம் வாதி படிஸம்விதி³தஞ்ச கி³லானோ ச படிஸம்விதி³தகி³லானா, தேஸம் அவஸேஸகம், படிஸம்விதி³தஸ்ஸ ச கி³லானஸ்ஸ ச ஸேஸகந்தி அத்தோ². ஏகஸ்ஸத்தா²ய படிஸம்விதி³தம் கத்வா ஆஹடம், தஸ்ஸ ஸேஸகம் அஞ்ஞஸ்ஸாபி பரிபு⁴ஞ்ஜிதும் வட்டதி. சதுன்னம் வா பஞ்சன்னம் வா படிஸம்விதி³தம் கத்வா ப³ஹூனம் ஆஹடம் ஹோதி, அஞ்ஞேஸம்பி தா³தும் இச்ச²ந்தி, ஏதம்பி படிஸம்விதி³தஸேஸகமேவ, ஸப்³பே³ஸம்பி வட்டதி. அத² அதி⁴கமேவ ஹோதி, ஸன்னிதி⁴ம் மோசேத்வா ட²பிதம் து³தியதி³வஸேபி வட்டதி. கி³லானஸ்ஸாஹடாவஸேஸேபி ஏஸேவ நயோ. யம் பன அப்படிஸம்விதி³தமேவ கத்வா ஆப⁴தம், தம் ப³ஹிஆராமம் பேஸேத்வா படிஸம்விதி³தம் காரேத்வா ஆஹராபேதப்³ப³ம், பி⁴க்கூ²ஹி வா க³ந்த்வா அந்தராமக்³கே³ க³ஹேதப்³ப³ம். யம்பி விஹாரமஜ்ஜே²ன க³ச்ச²ந்தோ வா வனசரகாத³யோ வா வனதோ ஆஹரித்வா தே³ந்தி, புரிமனயேனேவ படிஸம்விதி³தம் காரேதப்³ப³ம். கத்த²சி பன போத்த²கேஸு ‘‘படிஸம்விதி³தம் கத்வா ஆஹடம் வா கி³லானாவஸேஸகம் வா’’தி பாடோ² தி³ஸ்ஸதி, ஸோ ந க³ஹேதப்³போ³. தத்த²ஜாதகமேவ வாதி ஆராமே ஜாதகமேவ. மூலப²லாதி³ந்தி மூலப²லதசபத்தாதி³ம் அஞ்ஞேன கப்பியம் கத்வா தி³ன்னம் பரிபு⁴ஞ்ஜதோ அனாபத்தி. ஸசே பன தம் கா³மம் ஹரித்வா பசித்வா ஆஹரந்தி, ந வட்டதி. படிஸம்விதி³தம் காரேதப்³ப³ம்.

சதுத்த²பாடிதே³ஸனீயஸிக்கா²பத³வண்ணனா நிட்டி²தா.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

பாடிதே³ஸனீயவண்ணனா நிட்டி²தா.