ஸேகி²யகண்ட³ம்

1. பரிமண்ட³லஸிக்கா²பத³வண்ணனா

‘‘அந்தரக⁴ரே’’தி விஸேஸேத்வா ந வுத்தத்தா ‘‘ஆராமேபி அந்தரக⁴ரேபி ஸப்³ப³த்தா²’’தி வுத்தம். ஆராமேபீதி பு³த்³தூ⁴பட்டா²னாதி³காலம் ஸந்தா⁴ய வுத்தம். யதா² ‘‘தத்ரிமே சத்தாரோ பாராஜிகா த⁴ம்மா உத்³தே³ஸம் ஆக³ச்ச²ந்தீ’’திஆதி³னா தத்த² தத்த² பரிச்சே²தோ³ கதோ, ஏவமேத்தா²பி ‘‘தத்ரிமே பஞ்சஸத்ததி ஸேகி²யா த⁴ம்மா உத்³தே³ஸம் ஆக³ச்ச²ந்தீ’’தி கஸ்மா பரிச்சே²தோ³ ந கதோதி ஆஹ ‘‘ஏத்த² சா’’திஆதி³. வத்தக்க²ந்த⁴கே வுத்தவத்தானிபீதி ஆக³ந்துகாவாஸிகக³மிகானுமோத³னப⁴த்தக்³க³பிண்ட³சாரிகாரஞ்ஞஸேனாஸனஜந்தாக⁴ரவச்சகுடிஉபஜ்ஜா²சரியஸத்³தி⁴விஹாரிகஅந்தேவாஸிகவத்தானி. இத³ஞ்ச நித³ஸ்ஸனமத்தம் அஞ்ஞேஸம்பி க²ந்த⁴கவத்தானம் ஏத்தே²வ ஸங்க³ஹஸ்ஸ இச்சி²தப்³ப³த்தா. அயஞ்ஹேத்த² அதி⁴ப்பாயோ – ஸேகி²யக்³க³ஹணேன சேத்த² வத்தக்க²ந்த⁴காதீ³ஸு (சூளவ. 356 ஆத³யோ) ஆக³தவத்தாதீ³னம்பி க³ஹணம். தேபி ஹி ஸிக்கி²தப்³ப³ட்டே²ன ‘‘ஸேகி²யா’’தி இச்சி²தா. தஸ்மா மாதிகாயம் பாராஜிகாதீ³னம் விய ஸேகி²யானம் பரிச்சே²தோ³ ந கதோதி. ந கேவலம் வத்தக்க²ந்த⁴காதீ³ஸு (சூளவ. 356 ஆத³யோ) ஆக³தவத்தாதீ³னம் க³ஹணத்த²மேவாதி ஆஹ ‘‘சாரித்தவினயத³ஸ்ஸனத்த²ஞ்சா’’தி. ஏத்தா²பி பரிச்சே²தோ³ ந கதோதி ஆனேத்வா யோஜேதப்³ப³ம். மாதிகாய ‘‘து³க்கட’’ந்தி அவுத்தே கத²ம் பனேத்த² து³க்கடந்தி வேதி³தப்³ப³ந்தி ஆஹ ‘‘யோ பனா’’திஆதி³.

அட்ட²ங்கு³லமத்தந்தி பகதங்கு³லேன அட்ட²ங்கு³லமத்தம். யோ பன ஸுக்க²ஜங்கோ⁴ வா மஹாபிண்டி³கமம்ஸோ வா ஹோதி, தஸ்ஸ ஸாருப்பத்தா²ய அட்ட²ங்கு³லாதி⁴கம்பி ஓதாரேத்வா நிவாஸேதும் வட்டதி.

பாஸந்தந்தி பாஸஸ்ஸ அந்தம், த³ஸாமூலந்தி அத்தோ².

அபரிமண்ட³லம் நிவாஸேஸ்ஸாமீதி ‘‘புரதோ வா பச்ச²தோ வா ஓலம்பே³த்வா நிவாஸேஸ்ஸாமீ’’தி ஏவம் அஸஞ்சிச்ச. கிஞ்சாபி பரிமண்ட³லம் நிவாஸேதும் அஜானந்தஸ்ஸ அனாபத்தி, ததா²பி நிவாஸனவத்தம் ஸாது⁴கம் உக்³க³ஹேதப்³ப³மேவ. ஸஞ்சிச்ச அனுக்³க³ஹணஞ்ஹி அனாத³ரியம் ஸியாதி ஆஹ ‘‘அபிச நிவாஸனவத்தம் உக்³க³ஹேதப்³ப³’’ந்தி.

பரிமண்ட³லஸிக்கா²பத³வண்ணனா நிட்டி²தா.

2. து³தியபரிமண்ட³லஸிக்கா²பத³வண்ணனா

படிக்கி²த்தம் கி³ஹிபாருதந்தி கு²த்³த³கவத்து²க²ந்த⁴கே படிக்கி²த்தம் கி³ஹிபாருதம். இதா³னி ‘‘ந, பி⁴க்க²வே’’திஆதி³னா (சூளவ. 280-281) ஸங்கே²பேன வுத்தமத்த²மேவ வித்தா²ரேத்வா த³ஸ்ஸேதும் ‘‘தத்தா²’’திஆதி³மாஹ. யம் கிஞ்சி அஞ்ஞதா² பாருதந்தி ஸம்ப³ந்தோ⁴. தஸ்மாதி யஸ்மா ஸேதபடபாருதாதி³ கி³ஹிபாருதம் நாம, தஸ்மா. ஸேதபடாதி ஏதஸ்ஸேவ விவரணம். அட்³ட⁴பாலகனிக³ண்டா²தி அட்³ட⁴ம் பாலேந்தீதி அட்³ட⁴பாலகா, அட்³ட⁴பாலகா ச தே நிக³ண்டா² சாதி அட்³ட⁴பாலகனிக³ண்டா². தே ஹி உபரி ஏகமேவ ஸேதவத்த²ம் உபகச்ச²கே பவேஸேத்வா பரித³ஹந்தி, ஹேட்டா² நக்³கா³பி அட்³ட⁴மேவ பாலேந்தி. பரிப்³பா³ஜகாதி கி³ஹிப³ந்த⁴னம் பஹாய பப்³ப³ஜ்ஜூபக³தா. உரம் விவரித்வாதி ஹத³யமஜ்ஜ²ம் விவரித்வா. அக்கி²தாரகாமத்தந்தி அக்கி²மத்தம். ஆராமே வாதி பு³த்³தூ⁴பட்டா²னாதி³காலம் ஸந்தா⁴ய வுத்தம். அந்தரக⁴ரே வாதி அந்தரே க⁴ரானி ஏத்த², ஏதஸ்ஸாதி வா ‘‘அந்தரக⁴ர’’ந்தி லத்³த⁴னாமே கா³மே.

து³தியபரிமண்ட³லஸிக்கா²பத³வண்ணனா நிட்டி²தா.

3-4. ஸுப்படிச்ச²ன்னஸிக்கா²பத³வண்ணனா

ஸுட்டு² படிச்ச²ன்னோதி ஜத்தும்பி உரம்பி அவிவரித்வா படிச்சா²தே³தப்³ப³ட்டா²னே படிச்சா²த³னேன படிச்ச²ன்னோ, ந ஸீஸபாருதோ. தேனாஹ ‘‘க³ண்டி²கம் படிமுஞ்சித்வா’’திஆதி³. தத்த² க³ண்டி²கம் படிமுஞ்சித்வாதி க³ண்டி²கம் பாஸகே படிமுஞ்சித்வா. அந்தரக⁴ரே வாதி கோ³சரகா³மே. ஏகதி³வஸம்பி வாஸூபக³தஸ்ஸ ஸந்திகம் யதா²ஸுக²ம் க³ந்தும் வட்டதி, கோ பன வாதோ³ சதுப்பஞ்சாஹம் வாஸமதி⁴ட்டா²ய வஸிதபி⁴க்கூ²னம் ஸந்திகந்தி க³ண்டி²பதே³ லிகி²தம்.

வாஸூபக³தஸ்ஸாதி ரத்திவாஸத்தா²ய உபக³தஸ்ஸ ரத்திபா⁴கே³ வா தி³வஸபா⁴கே³ வா காயம் விவரித்வா நிஸீத³தோ அனாபத்தி.

ஸுப்படிச்ச²ன்னஸிக்கா²பத³வண்ணனா நிட்டி²தா.

5-6. ஸுஸம்வுதஸிக்கா²பத³வண்ணனா

ஸுஸம்வுதோதி ஸுஸம்யதோ. யதா² பனேத்த² ஸுஸம்வுதோ நாம ஹோதி, தம் த³ஸ்ஸேதும் ‘‘ஹத்த²ம் வா’’திஆதி³ வுத்தம்.

ஸுஸம்வுதஸிக்கா²பத³வண்ணனா நிட்டி²தா.

7-8. ஓக்கி²த்தசக்கு²ஸிக்கா²பத³வண்ணனா

கித்தகேன பன ஓக்கி²த்தசக்கு² ஹோதீதி ஆஹ ‘‘யுக³மத்தம் பூ⁴மிபா⁴க³ம் பேக்க²மானோ’’தி. யுக³யுத்தகோ ஹி த³ந்தோ ஆஜானேய்யோ யுக³மத்தம் பேக்க²தி, புரதோ சதுஹத்த²ப்பமாணம் பூ⁴மிபா⁴க³ம், இமினாபி ஏத்தகம் பேக்க²ந்தேன க³ந்தப்³ப³ம். யோ அனாத³ரியம் படிச்ச தம் தம் தி³ஸாபா⁴க³ம் பாஸாத³ம் கூடாகா³ரம் வீதி²ம் ஓலோகேந்தோ க³ச்ச²தி, ஆபத்தி து³க்கடஸ்ஸ. ஹத்தி²அஸ்ஸாதி³பரிஸ்ஸயாபா⁴வந்தி பரிஸ்ஸயனட்டே²ன, அபி⁴ப⁴வனட்டே²ன, விஹேட²னட்டே²ன வா பரிஸ்ஸயோ, ஹத்தி²அஸ்ஸாதி³யேவ பரிஸ்ஸயோ ஹத்தி²அஸ்ஸாதி³பரிஸ்ஸயோ, தஸ்ஸாபா⁴வம், ஹத்தி²அஸ்ஸாதி³ உபத்³த³வாபா⁴வந்தி அத்தோ². ‘‘யதா² ச ஏகஸ்மிம் டா²னே ட²த்வா, ஏவம் க³ச்ச²ந்தோபி பரிஸ்ஸயாபா⁴வம் ஓலோகேதும் லப⁴தியேவ, ததா² கா³மே பூஜ’’ந்தி (ஸாரத்த². டீ. பாசித்திய 3.582) வத³ந்தி.

ஓக்கி²த்தசக்கு²ஸிக்கா²பத³வண்ணனா நிட்டி²தா.

9-10. உக்கி²த்தகாயஸிக்கா²பத³வண்ணனா

அந்தோஇந்த³கீ²லதோ பட்டா²யாதி பரிக்கி²த்தஸ்ஸ கா³மஸ்ஸ அந்தோஉம்மாரதோ பட்டா²ய, அபரிக்கி²த்தஸ்ஸ பன து³தியலேட்³டு³பாததோ பட்டா²ய ந ஏவம் க³ந்தப்³ப³ம்.

உக்கி²த்தகாயஸிக்கா²பத³வண்ணனா நிட்டி²தா.

11-12. உஜ்ஜக்³கி⁴கஸிக்கா²பத³வண்ணனா

ஹஸனீயஸ்மிம் வத்து²ஸ்மிந்தி நிமித்தத்தே² பு⁴ம்மம், ஹஸிதப்³ப³வத்து²காரணாதி அத்தோ².

உஜ்ஜக்³கி⁴கஸிக்கா²பத³வண்ணனா நிட்டி²தா.

13-14. உச்சஸத்³த³ஸிக்கா²பத³வண்ணனா

கித்தாவதா அப்பஸத்³தோ³ ஹோதீதி ஆஹ ‘‘அயம் பனேத்தா²’’திஆதி³. ஸத்³த³மேவ ஸுணாதீதி அபரிப்³யத்தக்க²ரம் ஸத்³த³மத்தமேவ ஸுணாதி. தேனாஹ ‘‘கத²ம் ந வவத்த²பேதீ’’தி.

உச்சஸத்³த³ஸிக்கா²பத³வண்ணனா நிட்டி²தா.

15-20. காயப்பசாலகாதி³ஸிக்கா²பத³வண்ணனா

‘‘காயாதீ³னி பக்³க³ஹேத்வா’’தி ஏதஸ்ஸேவ விவரணம் ‘‘நிச்சலானி உஜுகானி ட²பேத்வா’’தி க³ந்தப்³ப³ஞ்சேவ நிஸீதி³தப்³ப³ஞ்சாதி ஸமேன இரியாபதே²ன க³ந்தப்³ப³ஞ்சேவ நிஸீதி³தப்³ப³ஞ்ச. காயப்பசாலகாதி³யுத்தம் ச²க்கம்.

காயப்பசாலகாதி³ஸிக்கா²பத³வண்ணனா நிட்டி²தா.

26. பல்லத்தி²கஸிக்கா²பத³வண்ணனா

து³ஸ்ஸபல்லத்தி²காயாதி ஏத்த² ஆயோக³பல்லத்தி²காபி து³ஸ்ஸபல்லத்தி²காயேவ.

பல்லத்தி²கஸிக்கா²பத³வண்ணனா நிட்டி²தா.

ச²ப்³பீ³ஸதிஸாருப்பஸிக்கா²பத³வண்ணனா நிட்டி²தா.

27. ஸக்கச்சபடிக்³க³ஹணஸிக்கா²பத³வண்ணனா

ஸதிம் உபட்டா²பேத்வாதி ச²ட்³டே³துகாமோ விய அஹுத்வா பிண்ட³பாதே ஸதிம் உபட்டா²பேத்வா, ‘‘பிண்ட³பாதம் க³ண்ஹிஸ்ஸாமீ’’தி ஸதிம் உபட்டா²பேத்வா.

ஸக்கச்சபடிக்³க³ஹணஸிக்கா²பத³வண்ணனா நிட்டி²தா.

28. பத்தஸஞ்ஞீபடிக்³க³ஹணஸிக்கா²பத³வண்ணனா

உபனிப³த்³த⁴ஸஞ்ஞீ ஹுத்வாதி பிண்ட³பாதம் தே³ந்தே அனாத³ரியம் படிச்ச தஹம் தஹம் அனோலோகேத்வா பத்தே ஆபோ⁴க³ஸஞ்ஞீ ஹுத்வா.

பத்தஸஞ்ஞீபடிக்³க³ஹணஸிக்கா²பத³வண்ணனா நிட்டி²தா.

29. ஸமஸூபகபடிக்³க³ஹணஸிக்கா²பத³வண்ணனா

ஸமஸூபகந்தி பமாணயுத்தம் ஸூபவந்தம் கத்வா, பா⁴வனபும்ஸகனித்³தே³ஸோ சாயம். ப்³யஞ்ஜனம் பன அனாதி³யித்வா அத்த²மத்தமேவ த³ஸ்ஸேதும் ‘‘ஸமஸூபகோ நாமா’’திஆதி³ வுத்தம். ஸப்³பா³பி ஸூபேய்யப்³யஞ்ஜனவிகதீதி ஓலோணிஸாகஸூபேய்யமச்ச²மம்ஸரஸாதி³கா ஸப்³பா³பி ஸூபேய்யப்³யஞ்ஜனவிகதி.

ஸமஸூபகபடிக்³க³ஹணஸிக்கா²பத³வண்ணனா நிட்டி²தா.

30-32. ஸமதித்திகாதி³ஸிக்கா²பத³வண்ணனா

ஸமதித்திகந்தி பா⁴வனபும்ஸகனித்³தே³ஸோ, ஸமதித்திகம் கத்வாதி அத்தோ². ஏவமஞ்ஞேஸுபி ஈதி³ஸேஸு டா²னேஸு அத்தோ² த³ட்ட²ப்³போ³. ஸமபுண்ணந்தி (ஸாரத்த². டீ. பாசித்திய 3.605) பத்தஸ்ஸ அந்தோமுக²வட்டிலேகா²ஸமபுண்ணம். ஸமப⁴ரிதந்தி ஏத்தா²பி ஏஸேவ நயோ. தஞ்ச கோ² அதி⁴ட்டா²னுபக³பத்தஸ்ஸேவ, நேதரஸ்ஸ. தேனாஹ ‘‘அதி⁴ட்டா²னுபக³பத்தஸ்ஸா’’திஆதி³. ரசிதந்தி கதம், பக்கி²த்தம் பூரிதந்தி அத்தோ². யம் கிஞ்சி யாவகாலிகந்தி யாகு³ப⁴த்தப²லாப²லாதி³ம் யம் கிஞ்சி ஆமிஸஜாதிகம். யத்த² கத்த²சீதி அதி⁴ட்டா²னுபகோ³ வா ஹோது, அனதி⁴ட்டா²னுபகோ³ வா யத்த² கத்த²சி பத்தே. தூ²பீகதானீதி தூ²பம் விய கதானி, அதி⁴ட்டா²னுபக³ஸ்ஸ பத்தஸ்ஸ அந்தோமுக²வட்டிலேக²ம் அதிக்கமித்வா கதானீதி அத்தோ². இத³ஞ்ச ‘‘யாமகாலிகாதீ³னீ’’தி இமஸ்ஸ வஸேன வுத்தம், ‘‘யாவகாலிக’’ந்தி இமஸ்ஸ பன வஸேன வசனப்³யத்தயம் கத்வா ‘‘தூ²பீகதம்பி வட்டதீ’’தி யோஜேதப்³ப³ம். பி-ஸத்³தே³ன அதூ²பீகதானி வட்டந்தீதி ஏத்த² கதா²வ நத்தீ²தி த³ஸ்ஸேதி. ஹேட்டா² ஓரோஹதீதி ஸமந்தா ஓகாஸஸப்³பா⁴வதோ சாலியமானம் ஹேட்டா² ப⁴ஸ்ஸதி. தக்கோலவடம்ஸகாத³யோதி ஏத்த² மத்த²கே ட²பிததக்கோலமேவ வடம்ஸகஸதி³ஸத்தா தக்கோலவடம்ஸகம். ஆதி³ஸத்³தே³ன புப்ப²வடம்ஸககடுகப²லாதி³வடம்ஸகானம் (பாசி. அட்ட². 605) க³ஹணம், ந தம் தூ²பீகதம் நாம ஹோதி பாடேக்கம் பா⁴ஜனத்தா பண்ணாதீ³னம்.

ஸமதித்திகாதி³ஸிக்கா²பத³வண்ணனா நிட்டி²தா.

33-34. ஸபதா³னஸிக்கா²பத³வண்ணனா

ஸபதா³னந்தி (ஸாரத்த². டீ. பாசித்திய 3.608) ஏத்த² தா³னம் வுச்சதி அவக²ண்ட³னம், அபேதம் தா³னதோ அபதா³னம், அனவக²ண்ட³ந்தி அத்தோ², ஸஹ அபதா³னேன ஸபதா³னம், அவக²ண்ட³னவிரஹிதம், அனுபடிபாடியாதி வுத்தம் ஹோதி. தேனாஹ ‘‘தத்த² தத்த² ஓதி⁴ம் அகத்வா அனுபடிபாடியா’’தி.

ஸபதா³னஸிக்கா²பத³வண்ணனா நிட்டி²தா.

36. ஓத³னப்படிச்சா²த³னஸிக்கா²பத³வண்ணனா

மாகா⁴தஸமயாதீ³ஸூதி ஏத்த² யஸ்மிம் ஸமயே ‘‘பாணோ ந ஹந்தப்³போ³’’தி ராஜானோ பே⁴ரிம் சராபேந்தி, அயம் மாகா⁴தஸமயோ நாம. ப்³யஞ்ஜனம் படிச்சா²தே³த்வா தே³ந்தீதி ப்³யஞ்ஜனம் ச²ன்னம் கத்வா தே³ந்தி.

ஓத³னப்படிச்சா²த³னஸிக்கா²பத³வண்ணனா நிட்டி²தா.

37. ஸூபோத³னவிஞ்ஞத்திஸிக்கா²பத³வண்ணனா

ஏகாத³ஸமேதி ஸூபோத³னவிஞ்ஞத்தியம். ஏத்த² பன யஸ்ஸ முகே² பக்கி²பித்வா விப்படிஸாரே உப்பன்னே புன உக்³கி³ரிதுகாமஸ்ஸாபி ஸசே ஸஹஸா பவிஸதி, அயம் அஸஞ்சிச்ச பரிபு⁴ஞ்ஜதி நாம. யோ பன விஞ்ஞத்தம்பி அவிஞ்ஞத்தம்பி ஏகஸ்மிம் டா²னே டி²தம் ஸஹஸா அனுபதா⁴ரேத்வா க³ஹேத்வா பு⁴ஞ்ஜதி, அயம் அஸதியா பு⁴ஞ்ஜதி நாம.

ஸூபோத³னவிஞ்ஞத்திஸிக்கா²பத³வண்ணனா நிட்டி²தா.

38. உஜ்ஜா²னஸஞ்ஞீஸிக்கா²பத³வண்ணனா

உஜ்ஜா²யதி ஏதேனாதி உஜ்ஜா²னம், சித்தம், தஸ்மிம் ஸஞ்ஞா உஜ்ஜா²னஸஞ்ஞாதி ஆஹ ‘‘உஜ்ஜா²னஸஞ்ஞீ’’திஆதி³. ஓலோகேந்தஸ்ஸாதி பரேஸம் பத்தம் ஓலோகேந்தஸ்ஸ.

உஜ்ஜா²னஸஞ்ஞீஸிக்கா²பத³வண்ணனா நிட்டி²தா.

39. கப³ளஸிக்கா²பத³வண்ணனா

‘‘மயூரண்ட³ம் அதிமஹந்த’’ந்தி வசனதோ மயூரண்ட³ப்பமாணோபி கப³ளோ ந வட்டதி. கேசி பன ‘‘மயூரண்ட³தோ மஹந்தோவ ந வட்டதி, ந மயூரண்ட³ப்பமாணோ’’திபி வத³ந்தி, தம் ந க³ஹேதப்³ப³ம். குக்குடண்ட³ம் அதிகு²த்³த³கந்தி ஏத்தா²பி ஏஸேவ நயோ, கி³லானஸ்ஸ பன அதிகு²த்³த³கம் கப³ளம் கரோதோபி அனாபத்தி.

கப³ளஸிக்கா²பத³வண்ணனா நிட்டி²தா.

41-42. அனாஹடஸிக்கா²பத³வண்ணனா

ஸகலம் ஹத்த²ந்தி ஸகலா அங்கு³லியோ. ஹத்த²ஸத்³தோ³ சேத்த² ததே³கதே³ஸேஸு அங்கு³லீஸு த³ட்ட²ப்³போ³ ‘‘ஹத்த²முத்³தா³’’திஆதீ³ஸு விய. ஏவஞ்ச கத்வா ஸப்³ப³க்³க³ஹணம் ஸமத்தி²தம் ஹோதி. அஞ்ஞதா² ஸகலம் ஹத்த²ம் முகே² பவேஸேதுமஸக்குணேய்யத்தா ஸப்³ப³க்³க³ஹணமஸமத்தி²தமேவ ஸியா. ஸமுதா³யே பவத்தஸ்ஸ ச வோஹாரஸ்ஸ அவயவேபி பவத்தனதோ ஏகங்கு³லிம்பி ததோ ஏகதே³ஸம்பி முகே² பக்கி²பிதும் ந வட்டதி.

அனாஹடஸிக்கா²பத³வண்ணனா நிட்டி²தா.

43. ஸகப³ளஸிக்கா²பத³வண்ணனா

தத்தகே ஸதி வட்டதீதி தத்தகே முக²ம்ஹி ஸதி கதே²தும் வட்டதி.

ஸகப³ளஸிக்கா²பத³வண்ணனா நிட்டி²தா.

50-51. சபுசபுகாரகஸிக்கா²பத³வண்ணனா

‘‘சபு சபூ’’தி ஏவம் ஸத்³த³ம் கத்வாதி ‘‘சபு சபூ’’தி ஏவம் அனுகரணஸத்³த³ம் கத்வா. ‘‘பஞ்சவீஸதிமேபி ஏஸேவ நயோ’’தி இமினா ‘‘ஸுருஸுருகாரகந்தி ‘ஸுரூ ஸுரூ’தி ஏவம் ஸத்³த³ம் கத்வா’’தி இமமத்த²மதிதி³ஸதி.

சபுசபுகாரகஸிக்கா²பத³வண்ணனா நிட்டி²தா.

திம்ஸபோ⁴ஜனப்படிஸம்யுத்தஸிக்கா²பத³வண்ணனா நிட்டி²தா.

57. ச²த்தபாணிஸிக்கா²பத³வண்ணனா

யம் கிஞ்சி ச²த்தந்தி ஸேதச்ச²த்தகிலஞ்ஜச்ச²த்தபண்ணச்ச²த்தேஸு யம் கிஞ்சி ச²த்தம். யம்பி தத்த²ஜாதகத³ண்ட³கேன கதம் ஏகபண்ணச்ச²த்தம் ஹோதி, தம்பி ச²த்தமேவ. யத்த² கத்த²சி ஸரீராவயவேதி அம்ஸஊருஆதி³கே யத்த² கத்த²சி ஸரீராவயவேதி.

ச²த்தபாணிஸிக்கா²பத³வண்ணனா நிட்டி²தா.

60. ஆவுத⁴பாணிஸிக்கா²பத³வண்ணனா

ஸப்³பா³பி த⁴னுவிகதீதி சாபகோத³ண்டா³தி³பே⁴தா³ ஸப்³பா³பி த⁴னுவிகதி. சாபோதி (ஸாரத்த². டீ. பாசித்திய 3.637) மஜ்ஜே² வங்கா காஜத³ண்ட³ஸதி³ஸா த⁴னுவிகதி. கோத³ண்டோ³தி வட்டலத³ண்டா³ த⁴னுவிகதி. படிமுக்கந்தி பவேஸிதம் லக்³கி³தம். யாவ ந க³ண்ஹாதீதி யாவ ஹத்தே²ன ந க³ண்ஹாதி, அயமேவ வா பாடோ². தாவ வட்டதீதி தாவ த⁴ம்மம் தே³ஸேதும் வட்டதி.

ஆவுத⁴பாணிஸிக்கா²பத³வண்ணனா நிட்டி²தா.

61-62. பாது³கஸிக்கா²பத³வண்ணனா

கேவலம் அக்கந்தஸ்ஸாதி கேவலம் பாது³கம் அக்கமித்வா டி²தஸ்ஸ. படிமுக்கஸ்ஸாதி படிமுஞ்சித்வா டி²தஸ்ஸ. தேனாஹ ‘‘பவேஸேத்வா டா²னவஸேனா’’தி.

பாது³கஸிக்கா²பத³வண்ணனா நிட்டி²தா.

63. யானஸிக்கா²பத³வண்ணனா

யானக³தஸ்ஸாதி ‘‘யானம் நாம வய்ஹம், ரதோ², ஸகடம், ஸந்த⁴மானிகா, ஸிவிகா, பாடங்கீ’’தி (பாசி. 640, 1187) வுத்தம் யானம் உபாதா³ய அந்தமஸோ ஹத்த²ஸங்கா⁴டம்ஹி க³தஸ்ஸ. தேனாஹ ‘‘ஸசேபி த்³வீஹி ஜனேஹீ’’திஆதி³. வய்ஹாதி³கேதி ஏத்த² வய்ஹந்தி உபரி மண்ட³பஸதி³ஸம் பத³ரச்ச²த³னம், ஸப்³ப³பாலிகு³ண்டி²மம் வா சா²தே³த்வா கதம் ஸகடவிஸேஸம் ‘‘வய்ஹ’’ந்தி வத³ந்தி. ஆதி³ஸத்³தே³ன ரதா²தீ³னம் க³ஹணம்.

யானஸிக்கா²பத³வண்ணனா நிட்டி²தா.

75. உத³கேஉச்சாரஸிக்கா²பத³வண்ணனா

பகிண்ணகந்தி வோமிஸ்ஸகனயம். ஸசித்தகந்தி (ஸாரத்த². டீ. பாசித்திய 3.576) வத்து²விஜானனசித்தேன, பண்ணத்திவிஜானனசித்தேன ச ஸசித்தகம். ‘‘அனாத³ரியம் படிச்சா’’தி (பாசி. 654) வுத்தத்தா யஸ்மா அனாத³ரியவஸேனேவ ஆபஜ்ஜிதப்³ப³தோ இத³ம் ஸப்³ப³ம் கேவலம் அகுஸலமேவ, தஞ்ச பகதியா வஜ்ஜம், ஸஞ்சிச்ச வீதிக்கமனஞ்ச தோ³மனஸ்ஸிகஸ்ஸேவ ஹோதி, தஸ்மா ‘‘லோகவஜ்ஜம் அகுஸலசித்தம் து³க்க²வேத³ன’’ந்தி வுத்தம். ஸேஸேஸுபி ஏஸேவ நயோ.

ஏகூனவீஸதித⁴ம்மதே³ஸனாபடிஸம்யுத்தஸிக்கா²பத³வண்ணனா நிட்டி²தா.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

ஸேகி²யவண்ணனா நிட்டி²தா.

அதி⁴கரணஸமத²வண்ணனா

க³ணனபரிச்சே²தோ³தி ஸங்க்²யாபரிச்சே²தோ³. அதி⁴கரீயந்தி ஏத்தா²தி அதி⁴கரணானி. கே அதி⁴கரீயந்தி? ஸமதா². கத²ம் அதி⁴கரீயந்தி? ஸமனவஸேன. தஸ்மா தே தேஸம் ஸமனவஸேன பவத்தந்தீதி ஆஹ ‘‘அதி⁴கரணானி ஸமேந்தீ’’திஆதி³. உப்பன்னானம் உப்பன்னானந்தி உட்டி²தானம் உட்டி²தானம். கிஞ்சாபி அதி⁴கரணட்டே²ன ஏகவித⁴ம், ததா²பி வத்து²வஸேன நானா ஹோதீதி ‘‘அதி⁴கரணான’’ந்தி ப³ஹுவசனம் கதம். இதா³னி தஸ்ஸ நானாத்தம் த³ஸ்ஸேத்வா விவரிதும் ‘‘விவாதா³தி⁴கரண’’ந்திஆதி³மாஹ. விவாதோ³யேவ அதி⁴கரணம் விவாதா³தி⁴கரணம். ஏஸ நயோ ஸேஸேஸுபி. ஸமத²த்த²ந்தி ஸமனத்த²ம்.

அதி⁴கரணஸ்ஸ ஸம்முகா² வினயனதோ ஸம்முகா²வினயோ. த³ப்³ப³மல்லபுத்தத்தே²ரஸதி³ஸஸ்ஸ ஸதிவேபுல்லப்பத்தஸ்ஸ கீ²ணாஸவஸ்ஸேவ தா³தப்³போ³ வினயோ ஸதிவினயோ. ஸம்மூள்ஹஸ்ஸ க³க்³க³பி⁴க்கு²ஸதி³ஸஸ்ஸ உம்மத்தகஸ்ஸ தா³தப்³போ³ வினயோ அமூள்ஹவினயோ. படிஞ்ஞாதேன கரணபூ⁴தேன கரணம் படிஞ்ஞாதகரணம். அத² வா படிஞ்ஞாதே ஆபன்னபா⁴வாதி³கே கரணம் கிரியா, ‘‘ஆயதிம் ஸம்வரேய்யாஸீ’’தி பரிவாஸதா³னாதி³வஸேன ச பவத்தம் வசீகம்மம் படிஞ்ஞாதகரணம். யஸ்ஸா கிரியாய த⁴ம்மவாதி³னோ ப³ஹுதரா, ஏஸா யேபு⁴ய்யஸிகா நாம. யோ பாபுஸ்ஸன்னதாய பாபியோ, புக்³க³லோ, தஸ்ஸ உபவாளபி⁴க்கு²ஸதி³ஸஸ்ஸ கத்தப்³ப³தோ தஸ்ஸபாபியஸிகா, அலுத்தஸமாஸோயம். திணவத்தா²ரகஸதி³ஸத்தா திணவத்தா²ரகோ. யதா² (சூளவ. அட்ட². 212) ஹி கூ³த²ம் வா முத்தம் வா க⁴ட்டியமானம் து³க்³க³ந்த⁴தாய பா³த⁴தி, திணேஹி அவத்த²ரித்வா ஸுப்படிச்சா²தி³தஸ்ஸ பனஸ்ஸ க³ந்தோ⁴ ந பா³த⁴தி, ஏவமேவ யம் அதி⁴கரணம் மூலானுமூலம் க³ந்த்வா வூபஸமியமானம் கக்க²ளத்தாய வாளத்தாய பே⁴தா³ய ஸம்வத்ததி, தம் இமினா கம்மேன வூபஸந்தம் கூ³த²ம் விய திணவத்தா²ரகேன படிச்ச²ன்னம் ஸுவூபஸந்தம் ஹோதி. தேன வுத்தம் ‘‘திணவத்தா²ரகஸதி³ஸத்தா திணவத்தா²ரகோ’’தி.

தத்ராதி தேஸு ஸத்தஸு அதி⁴கரணஸமதே²ஸு. ‘‘அட்டா²ரஸஹி வத்தூ²ஹீ’’தி லக்க²ணவசனமேதம் ‘‘யதி³ மே ப்³யாதி⁴கா ப⁴வேய்யும், தா³தப்³ப³மித³மோஸத⁴’’ந்திஆதி³னா (ஸம். நி. டீ. 2.3.39-42) விய. தஸ்மா தேஸு அஞ்ஞதரேன விவத³ந்தா அட்டா²ரஸஹி வத்தூ²ஹி விவத³ந்தீதி வுச்சதி. விவாதோ³தி விபச்சனீகவாதோ³. உபவத³னாதி அக்கோஸோ. சோத³னாதி அனுயோகோ³. த்³வேதி து²ல்லச்சயது³ப்³பா⁴ஸிதாபத்தியோ த்³வே. சதுன்னம் கம்மானம் கரணந்தி சதுன்னம் கம்மானம் அந்தரே யஸ்ஸ கஸ்ஸசி கம்மஸ்ஸ கரணம்.

ஏவம் அதி⁴கரணானி த³ஸ்ஸேத்வா இதா³னி தேஸு இத³ம் அதி⁴கரணம் ஏத்தகேஹி ஸமதே²ஹி ஸம்மதீதி த³ஸ்ஸேதும் ‘‘தத்தா²’’திஆதி³ வுத்தம். யஸ்மிம் விஹாரே உப்பன்னம், தஸ்மிம்யேவ வா ஸம்மதீதி ஸம்ப³ந்தோ⁴. ஏவம் ஸேஸேஸுபி. தத்த² யஸ்மிம் விஹாரே உப்பன்னந்தி ‘‘யஸ்மிம் விஹாரே மய்ஹம் இமினா பத்தோ க³ஹிதோ, சீவரம் க³ஹித’’ந்திஆதி³னா (பரி. அட்ட². 341) நயேன பத்தசீவராதீ³னம் அத்தா²ய விவாதா³தி⁴கரணம் உப்பன்னம் ஹோதி. தஸ்மிம்யேவ வா ஸம்மதீதி தஸ்மிம் விஹாரேயேவ ஆவாஸிகேஹி ஸன்னிபதித்வா ‘‘அலம், ஆவுஸோ’’தி அத்த²பச்சத்தி²கே ஸஞ்ஞாபேத்வா பாளிமுத்தகவினிச்ச²யேனேவ வூபஸமேந்தேஹி ஸம்மதி. ஸசே பன தம் அதி⁴கரணம் நேவாஸிகா வூபஸமேதும் ந ஸக்கோந்தி, அத²ஞ்ஞோ வினயத⁴ரோ ஆக³ந்த்வா ‘‘கிம், ஆவுஸோ, இமஸ்மிம் விஹாரே உபோஸதோ² வா பவாரணா வா டி²தா’’தி புச்ச²தி, தேஹி ச தஸ்மிம் காரணே கதி²தே தம் அதி⁴கரணம் க²ந்த⁴கதோ ச பரிவாரதோ ச ஸுத்தேன வினிச்சி²னித்வா வூபஸமேதி. ஏவம்பி ஏதஸ்மிம்யேவ ஸம்மதீதி த³ட்ட²ப்³ப³ம்.

அஞ்ஞத்த² வூபஸமேதும் க³ச்ச²ந்தானம் அந்தராமக்³கே³ வா ஸம்மதீதி ‘‘ந மயம் ஏதஸ்ஸ வினிச்ச²யே திட்டா²ம, நாயம் வினயே குஸலோ, அமுகஸ்மிம் நாம கா³மே வினயத⁴ரா தே²ரா வஸந்தி, தத்த² க³ந்த்வா வினிச்சி²னிஸ்ஸாமா’’தி க³ச்ச²ந்தானம் அந்தராமக்³கே³ வா காரணம் ஸல்லக்கே²த்வா அஞ்ஞமஞ்ஞம் ஸஞ்ஞாபேந்தேஹி, அஞ்ஞேஹி வா தே பி⁴க்கூ² நிஜ்ஜா²பேந்தேஹி ஸம்மதி. ந ஹேவ கோ² பன அஞ்ஞமஞ்ஞஸஞ்ஞத்தியா வா ஸபா⁴க³பி⁴க்கு²னிஜ்ஜா²பனேன வா வூபஸந்தம் ஹோதி, அபிச கோ² படிபத²ம் ஆக³ச்ச²ந்தோ ஏகோ வினயத⁴ரோ தி³ஸ்வா ‘‘கத்தா²வுஸோ, க³ச்ச²தா²’’தி புச்சி²த்வா ‘‘அமுகம் நாம கா³மம் இமினா நாம கரணேனா’’தி வுத்தே ‘‘அலம், ஆவுஸோ, கிம் தத்த² க³தேனா’’தி தத்தே²வ த⁴ம்மேன வினயேன தம் அதி⁴கரணம் வூபஸமேதி. ஏவம்பி அந்தராமக்³கே³ வூபஸம்மதி நாம.

யத்த² க³ந்த்வா ஸங்க⁴ஸ்ஸ நிய்யாதிதம், தத்த² ஸங்கே⁴ன வாதி ஸசே பன ‘‘அலம், ஆவுஸோ, கிம் தத்த² க³தேனா’’தி வுச்சமானாபி ‘‘மயம் தத்தே²வ க³ந்த்வா வினிச்ச²யம் பாபேஸ்ஸாமா’’தி (பரி. அட்ட². 341) வினயத⁴ரஸ்ஸ வசனம் அனாதி³யித்வா யத்த² க³ந்த்வா ஸபா⁴க³பி⁴க்கு²ஸங்க⁴ஸ்ஸ அதி⁴கரணம் நிய்யாதிதம், தத்த² ஸங்கே⁴ன ‘‘அலம், ஆவுஸோ, ஸங்க⁴ஸன்னிபாதம் நாம க³ருக’’ந்தி தத்தே²வ நிஸீதி³த்வா வினிச்சி²தம் ஸம்மதி. ந ஹேவ கோ² பன ஸபா⁴க³பி⁴க்கூ²னம் ஸஞ்ஞத்தியா வூபஸந்தம் ஹோதி, அபிச கோ² ஸங்க⁴ம் ஸன்னிபாதேத்வா ஆரோசிதம் ஸங்க⁴மஜ்ஜே² வினயத⁴ரா வூபஸமேந்தி. ஏவம்பி தத்த² ஸங்கே⁴ன வினிச்சி²தம் ஸம்மதி நாம.

உப்³பா³ஹிகாய ஸம்மதபுக்³க³லேஹி வா வினிச்சி²தந்தி அபலோகேத்வா வா க²ந்த⁴கே வுத்தாய வா ஞத்திது³தியகம்மவாசாய ஸம்மதேஹி புக்³க³லேஹி விஸும் வா நிஸீதி³த்வா, தஸ்ஸாயேவ வா பரிஸாய ‘‘அஞ்ஞேன ந கிஞ்சி கதே²தப்³ப³’’ந்தி (சூளவ. அட்ட². 231) ஸாவேத்வா வினிச்சி²தம். அயந்தி அயம் யதா²வுத்தா சதுப்³பி³தா⁴ ஸம்முக²தா.

காரகஸங்க⁴ஸ்ஸாதி வூபஸமேதும் ஸன்னிபதிதஸ்ஸ காரகஸங்க⁴ஸ்ஸ. ஸங்க⁴ஸாமக்³கி³வஸேன ஸம்முகீ²பா⁴வோதி ‘‘யாவதிகா பி⁴க்கூ² கம்மப்பத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி, ஸம்முகீ²பூ⁴தா ந படிக்கோஸந்தீ’’தி (சூளவ. 228) ஏவம் வுத்தஸங்க⁴ஸாமக்³கி³வஸேன ஸம்முகீ²பா⁴வோ, ஏதேன யதா² ததா² பதா⁴னகாரகபுக்³க³லானம் ஸம்முக²தாமத்தம் ஸங்க⁴ஸம்முக²தா நாம ந ஹோதீதி த³ஸ்ஸேதி. பூ⁴ததாதி தச்ச²தா. ஸச்சபரியாயோ ஹி இத⁴ த⁴ம்மஸத்³தோ³ ‘‘த⁴ம்மவாதீ³’’திஆதீ³ஸு (தீ³. நி. 1.9, 194) விய. வினேதி ஏதேனாதி வினயோ, தஸ்ஸ தஸ்ஸ அதி⁴கரணஸ்ஸ வூபஸமனாய ப⁴க³வதா வுத்தவிதி⁴, தஸ்ஸ வினயஸ்ஸ ஸம்முக²தா வினயஸம்முக²தா. தேனாஹ ‘‘யதா² தம்…பே… வினயஸம்முக²தா’’தி. யேனாதி யேன புக்³க³லேன. அத்த²பச்சத்தி²கானந்தி (ஸாரத்த². டீ. சூளவக்³க³ 3.228) விவாத³வத்து²ஸங்கா²தே அத்தே² பச்சத்தி²கானம். ஸங்க⁴ஸம்முக²தா பரிஹாயதி ஸம்மதபுக்³க³லேஹேவ வூபஸமனதோ.

நந்தி விவாதா³தி⁴கரணம். பஞ்சங்க³ஸமன்னாக³தந்தி (சூளவ. 234) ‘‘ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, க³ஹிதாக³ஹிதம் ஜானாதீ’’தி வுத்தேஹி பஞ்சஹங்கே³ஹி ஸமன்னாக³தம். கூ³ள்ஹகவிவடகஸகண்ணஜப்பகேஸு தீஸு ஸலாகக்³கா³ஹேஸூதி ‘‘அனுஜானாமி, பி⁴க்க²வே, தேஸம் பி⁴க்கூ²னம் ஸஞ்ஞத்தியா தயோ ஸலாகக்³கா³ஹகே கூ³ள்ஹகம், விவடகம், ஸகண்ணஜப்பக’’ந்தி (சூளவ. 235) ஸமத²க்க²ந்த⁴கே வுத்தேஸு தீஸு ஸலாகக்³கா³ஹேஸு. ஸலாகம் கா³ஹேத்வாதி த⁴ம்மவாதீ³னஞ்ச அத⁴ம்மவாதீ³னஞ்ச ஸலாகாயோ நிமித்தஸஞ்ஞம் ஆரோபேத்வா சீவரபோ⁴கே³ கத்வா ஸமத²க்க²ந்த⁴கே வுத்தனயேன கா³ஹாபேத்வா. ஏவஞ்ஹி தத்த² வுத்தம் –

‘‘கத²ஞ்ச, பி⁴க்க²வே, கூ³ள்ஹகோ ஸலாகக்³கா³ஹோ ஹோதி? தேன ஸலாகக்³கா³ஹாபகேன பி⁴க்கு²னா ஸலாகாயோ வண்ணாவண்ணாயோ கத்வா ஏகமேகோ பி⁴க்கு² உபஸங்கமித்வா ஏவமஸ்ஸ வசனீயோ ‘அயம் ஏவம்வாதி³ஸ்ஸ ஸலாகா, அயம் ஏவம்வாதி³ஸ்ஸ ஸலாகா, யம் இச்ச²ஸி, தம் க³ண்ஹாஹீ’தி. க³ஹிதே வத்தப்³போ³ ‘மா ச கஸ்ஸசி த³ஸ்ஸேஹீ’தி. ஸசே ஜானாதி ‘அத⁴ம்மவாதீ³ ப³ஹுதரா’தி, ‘து³க்³க³ஹோ’தி பச்சுக்கட்³டி⁴தப்³ப³ம். ஸசே ஜானாதி ‘த⁴ம்மவாதீ³ ப³ஹுதரா’தி, ‘ஸுக்³க³ஹோ’தி ஸாவேதப்³ப³ம். ஏவம் கோ², பி⁴க்க²வே, கூ³ள்ஹகோ ஸலாகக்³கா³ஹோ ஹோதி.

‘‘கத²ஞ்ச, பி⁴க்க²வே, விவடகோ ஸலாகக்³கா³ஹோ ஹோதி? ஸசே ஜானாதி ‘த⁴ம்மவாதீ³ ப³ஹுதரா’தி, விஸ்ஸட்டே²னேவ விவடேன கா³ஹேதப்³போ³. ஏவம் கோ², பி⁴க்க²வே, விவடகோ ஸலாகக்³கா³ஹோ ஹோதி.

‘‘கத²ஞ்ச, பி⁴க்க²வே, ஸகண்ணஜப்பகோ ஸலாகக்³கா³ஹோ ஹோதி? தேன ஸலாகக்³கா³ஹாபகேன பி⁴க்கு²னா ஏகமேகஸ்ஸ பி⁴க்கு²னோ உபகண்ணகே ஆரோசேதப்³ப³ம் ‘அயம் ஏவம்வாதி³ஸ்ஸ ஸலாகா, அயம் ஏவவாதி³ஸ்ஸ ஸலாகா, யம் இச்ச²ஸி, தம் க³ண்ஹாஹீ’தி. க³ஹிதே வத்தப்³போ³ ‘மா ச கஸ்ஸசி ஆரோசேஹீ’தி. ஸசே ஜானாதி ‘அத⁴ம்மவாதீ³ ப³ஹுதரா’தி, ‘து³க்³க³ஹோ’தி பச்சுக்கட்³டி⁴தப்³ப³ம். ஸசே ஜானாதி ‘த⁴ம்மவாதீ³ ப³ஹுதரா’தி, ‘ஸுக்³க³ஹோ’தி ஸாவேதப்³ப³ம். ஏவம் கோ², பி⁴க்க²வே, ஸகண்ணஜப்பகோ ஸலாகக்³கா³ஹோ ஹோதீ’’தி.

ஏத்த² ச அலஜ்ஜுஸ்ஸன்னாய (சூளவ. அட்ட². 235) பரிஸாய கூ³ள்ஹகோ ஸலாகக்³கா³ஹோ காதப்³போ³, லஜ்ஜுஸ்ஸன்னாய விவடகோ, பா³லுஸ்ஸன்னாய ஸகண்ணஜப்பகோதி வேதி³தப்³போ³. த⁴ம்மவாதீ³னம் யேபு⁴ய்யதாயாதி த⁴ம்மவாதீ³னம் ஏகேனபி அதி⁴கதாய, கோ பன வாதோ³ த்³வீஹி தீஹி.

‘‘சதூஹி ஸமதே²ஹி ஸம்மதீ’’தி இத³ம் ஸப்³ப³ஸங்கா³ஹகவஸேன வுத்தம், தத்த² பன த்³வீஹி ஏவ வூபஸமனம் த³ட்ட²ப்³ப³ம். ஏவம் வினிச்சி²தந்தி ஸசே ஆபத்தி நத்தி², உபோ⁴ க²மாபேத்வா, அத² அத்தி², ஆபத்திம் த³ஸ்ஸேத்வா ரோபனவஸேன வினிச்சி²தம். படிகம்மம் பன ஆபத்தாதி⁴கரணஸமதே² பரதோ ஆக³மிஸ்ஸதீதி. ந ஸமணஸாருப்பம் அஸ்ஸாமணகம், ஸமணேஹி அகத்தப்³ப³ம், தஸ்மிம். அஜ்ஜா²சாரே வீதிக்கமே ஸதி.

பாராஜிகஸாமந்தேன வாதி து³க்கடேன வா து²ல்லச்சயேன வா. மேது²னத⁴ம்மே ஹி பாராஜிகஸாமந்தா நாம து³க்கடம் ஹோதி, அதி³ன்னாதா³னாதீ³ஸு து²ல்லச்சயம். படிசரதோதி படிச்சா²தே³ந்தஸ்ஸ. அச்சி²ன்னமூலோ ப⁴விஸ்ஸதீதி பாராஜிகம் அனாபன்னோ ப⁴விஸ்ஸதி, ஸீலவா ப⁴விஸ்ஸதீதி வுத்தம் ஹோதி. ஸம்மா வத்தித்வாதி வத்தம் பூரேத்வா. ஓஸாரணம் லபி⁴ஸ்ஸதீதி கம்மப்படிப்பஸ்ஸத்³தி⁴ம் லபி⁴ஸ்ஸதி.

தஸ்ஸாதி ஆபத்தாதி⁴கரணஸ்ஸ. ஸம்முகா²வினயேனேவ வூபஸமோ நத்தி² படிஞ்ஞாய, ததா²ரூபாய க²ந்தியா வா வினா அவூபஸமனதோ. யா பன படிஞ்ஞாதி ஸம்ப³ந்தோ⁴.

ஏத்தா²தி ஆபத்திதே³ஸனாயம். ஸியாதி அவஸ்ஸம். கக்க²ளத்தாய வாளத்தாயாதி கக்க²ளபா⁴வாய சேவ வாளபா⁴வாய ச. து²ல்லவஜ்ஜந்தி பாராஜிகஞ்சேவ ஸங்கா⁴தி³ஸேஸஞ்ச. கி³ஹிப்படிஸம்யுத்தந்தி கி³ஹீனம் ஹீனேன கு²ம்ஸனவம்ப⁴னத⁴ம்மிகப்படிஸ்ஸவேஸு ஆபன்னம் ஆபத்திம்.

யதா²னுரூபந்தி ‘‘த்³வீஹி ஸமதே²ஹி, தீஹி, சதூஹி, ஏகேனா’’தி ஏவம் வுத்தனயேனேவ யதா²னுரூபம். ஏத்தா²தி இமஸ்மிம் ஸமதா²தி⁴காரே. வினிச்ச²யனயோதி வினிச்ச²யனயமத்தம். தேனாஹ ‘‘வித்தா²ரோ பனா’’திஆதி³. அஸ்ஸாதி வித்தா²ரஸ்ஸ. ஸமந்தபாஸாதி³காயம் வுத்தோதி ஸமந்தபாஸாதி³காய நாம வினயட்ட²கதா²யம் வுத்தோ. தஸ்மா தத்த² வுத்தனயேனேவ வேதி³தப்³போ³தி அதி⁴ப்பாயோ.

ஏத்தகந்தி ஏதம்பரமம், ந இதோ பி⁴ய்யோ.

அதி⁴கரணஸமத²வண்ணனா நிட்டி²தா.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

பி⁴க்கு²பாதிமோக்க²வண்ணனா நிட்டி²தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ