2. ரதனஸிக்கா²பத³வண்ணனா

முத்தாதி³த³ஸவித⁴ந்தி ‘‘முத்தா மணி வேளுரியோ ஸங்கோ² ஸிலா பவாளம் ரஜதம் ஜாதரூபம் லோஹிதங்கோ மஸாரக³ல்ல’’ந்தி (பாசி. 506) த³ஸவித⁴ம் ரதனம். அஜ்ஜா²வஸதே²தி கே³ஹே. தேனாஹ ‘‘பரிக்கி²த்தஸ்ஸா’’திஆதி³, பரிக்கி²த்தஸ்ஸ ஆவஸத²ஸ்ஸாதி அத்தோ². ஆவஸதோ²தி சேத்த² அந்தோகா³மே நிவிட்ட²கே³ஹம் அதி⁴ப்பேதம். ஆராமே நிவிட்ட²கே³ஹம் பன அஜ்ஜா²ராமக்³க³ஹணேனேவ க³ஹிதம். ‘‘ஆவஸதோ²தி சேத்த² அந்தோஆராமே வா ஹோது, அஞ்ஞத்த² வா, அத்தனோ வஸனட்டா²னம் வுச்சதீ’’தி (ஸாரத்த². டீ. பாசித்திய 3.506) கேசி. ஸப்³பே³ஸம்பி அத்தா²ய து³க்கடமேவாதி அத்தனோ வா தேஸம் ஸங்கா⁴தீ³னம் வா அத்தா²ய உக்³க³ண்ஹந்தஸ்ஸ வா உக்³க³ண்ஹாபேந்தஸ்ஸ வா து³க்கடமேவ. ஸசே பன மாதாபிதூனம் ஸந்தகம் அவஸ்ஸம் படிஸாமேதப்³ப³ம் கப்பியப⁴ண்ட³ம் ஹோதி, அத்தனோ அத்தா²ய க³ஹேத்வா படிஸாமேதப்³ப³ந்தி ஆஹ ‘‘தாதி³ஸம் பனா’’திஆதி³. தாதி³ஸந்தி யம் மாதாபிதூனம் ஸந்தகம் அவஸ்ஸம் படிஸாமேதப்³ப³ம் கப்பியப⁴ண்ட³ம், தாதி³ஸம். ச²ந்தே³னபி ப⁴யேனபீதி வட்³ட⁴கிஆதீ³ஸு ச²ந்தே³னபி, ராஜவல்லபே⁴ஸு ப⁴யேனபி.

தாதி³ஸே டா²னேதி மஹாவிஹாரஸதி³ஸஸ்ஸ மஹாராமஸ்ஸ பாகாரபரிக்கி²த்தே பரிவேணே. ஸஞ்ஞாணம் கத்வாதி ‘‘ஏத்தகா கஹாபணா’’திஆதி³னா ரூபேன வா லஞ்ச²னாதி³னிமித்தேன வா ஸஞ்ஞாணம் கத்வா, ஸல்லக்கே²த்வாதி அத்தோ². பதிரூபானம் பி⁴க்கூ²னம் ஹத்தே²தி லஜ்ஜீனம் குக்குச்சகானம் பி⁴க்கூ²னம் ஹத்தே². லோலஜாதிகானஞ்ஹி ஹத்தே² ட²பேதும் ந லப்³ப⁴தி. நேவ பக்கமதீதி நேவ தம்ஹா ஆவாஸா பக்கமதி. ‘‘தா²வரம் ஸேனாஸனம் வா’’திஆதி³னா அத்தனோ சீவராதி³மூலம் ந காதப்³ப³ந்தி (பாசி. அட்ட². 506) த³ஸ்ஸேதி. தம் த³ஸ்ஸேத்வாதி யம் தா²வரஸேனாஸனாதி³ கதம், தம் உபாஸக தவ ஸந்தகேன இத³ம் நாம கதந்தி ஏவம் த³ஸ்ஸேத்வா. ஸமாத³பேத்வாதி அஞ்ஞம் ஸமாத³பேத்வா, ‘‘உத்³தி³ஸ்ஸ அரியா திட்ட²ந்தி, ஏஸா அரியான யாசனா’’தி வுத்தனயேன யாசித்வாதி அத்தோ².

அனுஞ்ஞாதட்டா²னேதி அஜ்ஜா²ராமஅஜ்ஜா²வஸதே². ஆமாஸந்தி ஆமஸிதப்³ப³ஞ்சேவ படிஸாமேதப்³ப³ஞ்ச வத்தா²தி³.

ரதனஸிக்கா²பத³வண்ணனா நிட்டி²தா.