9. ரதனவக்³கோ³

1. அந்தேபுரஸிக்கா²பத³வண்ணனா

அனிக்க²ந்தராஜகே அனிக்³க³தரதனகேதி ஏத்த² ‘‘ஸயனிக⁴ரே’’தி பாட²ஸேஸோ த³ட்ட²ப்³போ³தி ஆஹ ‘‘அனிக்க²ந்தோ ராஜா இதோ’’திஆதி³. தத்த² இதோதி ஸயனிக⁴ரதோ. ஸயனிக⁴ரேதி ஸயனீயக⁴ரே. யத்த² ரஞ்ஞோ ஸயனம் பஞ்ஞத்தம் ஹோதி, அந்தமஸோ ஸாணிபாகாரபரிக்கி²த்தம்பி, தஸ்மிந்தி வுத்தம் ஹோதி. ரதிஜனனட்டே²ன ரதனம், ஹத்தி²ஆதி³. இத⁴ பன இத்தி²ரதனம் அதி⁴ப்பேதந்தி ஆஹ ‘‘ரதனம் வுச்சதி மஹேஸீ’’தி.

உபோ⁴ஸூதி ராஜமஹேஸீஸு. கிரியாகிரியந்தி ஏத்த² இந்த³கீ²லாதிக்கமோ கிரியம், அப்படிஸம்விதி³தம் அகிரியந்தி த³ட்ட²ப்³ப³ம்.

அந்தேபுரஸிக்கா²பத³வண்ணனா நிட்டி²தா.

2. ரதனஸிக்கா²பத³வண்ணனா

முத்தாதி³த³ஸவித⁴ந்தி ‘‘முத்தா மணி வேளுரியோ ஸங்கோ² ஸிலா பவாளம் ரஜதம் ஜாதரூபம் லோஹிதங்கோ மஸாரக³ல்ல’’ந்தி (பாசி. 506) த³ஸவித⁴ம் ரதனம். அஜ்ஜா²வஸதே²தி கே³ஹே. தேனாஹ ‘‘பரிக்கி²த்தஸ்ஸா’’திஆதி³, பரிக்கி²த்தஸ்ஸ ஆவஸத²ஸ்ஸாதி அத்தோ². ஆவஸதோ²தி சேத்த² அந்தோகா³மே நிவிட்ட²கே³ஹம் அதி⁴ப்பேதம். ஆராமே நிவிட்ட²கே³ஹம் பன அஜ்ஜா²ராமக்³க³ஹணேனேவ க³ஹிதம். ‘‘ஆவஸதோ²தி சேத்த² அந்தோஆராமே வா ஹோது, அஞ்ஞத்த² வா, அத்தனோ வஸனட்டா²னம் வுச்சதீ’’தி (ஸாரத்த². டீ. பாசித்திய 3.506) கேசி. ஸப்³பே³ஸம்பி அத்தா²ய து³க்கடமேவாதி அத்தனோ வா தேஸம் ஸங்கா⁴தீ³னம் வா அத்தா²ய உக்³க³ண்ஹந்தஸ்ஸ வா உக்³க³ண்ஹாபேந்தஸ்ஸ வா து³க்கடமேவ. ஸசே பன மாதாபிதூனம் ஸந்தகம் அவஸ்ஸம் படிஸாமேதப்³ப³ம் கப்பியப⁴ண்ட³ம் ஹோதி, அத்தனோ அத்தா²ய க³ஹேத்வா படிஸாமேதப்³ப³ந்தி ஆஹ ‘‘தாதி³ஸம் பனா’’திஆதி³. தாதி³ஸந்தி யம் மாதாபிதூனம் ஸந்தகம் அவஸ்ஸம் படிஸாமேதப்³ப³ம் கப்பியப⁴ண்ட³ம், தாதி³ஸம். ச²ந்தே³னபி ப⁴யேனபீதி வட்³ட⁴கிஆதீ³ஸு ச²ந்தே³னபி, ராஜவல்லபே⁴ஸு ப⁴யேனபி.

தாதி³ஸே டா²னேதி மஹாவிஹாரஸதி³ஸஸ்ஸ மஹாராமஸ்ஸ பாகாரபரிக்கி²த்தே பரிவேணே. ஸஞ்ஞாணம் கத்வாதி ‘‘ஏத்தகா கஹாபணா’’திஆதி³னா ரூபேன வா லஞ்ச²னாதி³னிமித்தேன வா ஸஞ்ஞாணம் கத்வா, ஸல்லக்கே²த்வாதி அத்தோ². பதிரூபானம் பி⁴க்கூ²னம் ஹத்தே²தி லஜ்ஜீனம் குக்குச்சகானம் பி⁴க்கூ²னம் ஹத்தே². லோலஜாதிகானஞ்ஹி ஹத்தே² ட²பேதும் ந லப்³ப⁴தி. நேவ பக்கமதீதி நேவ தம்ஹா ஆவாஸா பக்கமதி. ‘‘தா²வரம் ஸேனாஸனம் வா’’திஆதி³னா அத்தனோ சீவராதி³மூலம் ந காதப்³ப³ந்தி (பாசி. அட்ட². 506) த³ஸ்ஸேதி. தம் த³ஸ்ஸேத்வாதி யம் தா²வரஸேனாஸனாதி³ கதம், தம் உபாஸக தவ ஸந்தகேன இத³ம் நாம கதந்தி ஏவம் த³ஸ்ஸேத்வா. ஸமாத³பேத்வாதி அஞ்ஞம் ஸமாத³பேத்வா, ‘‘உத்³தி³ஸ்ஸ அரியா திட்ட²ந்தி, ஏஸா அரியான யாசனா’’தி வுத்தனயேன யாசித்வாதி அத்தோ².

அனுஞ்ஞாதட்டா²னேதி அஜ்ஜா²ராமஅஜ்ஜா²வஸதே². ஆமாஸந்தி ஆமஸிதப்³ப³ஞ்சேவ படிஸாமேதப்³ப³ஞ்ச வத்தா²தி³.

ரதனஸிக்கா²பத³வண்ணனா நிட்டி²தா.

3. விகாலகா³மப்பவேஸனஸிக்கா²பத³வண்ணனா

சாரித்தேதி சாரித்தஸிக்கா²பதே³. உபசாரந்தி து³தியலேட்³டு³பாதம். அஞ்ஞம் கா³மம் க³ச்ச²ந்தானம் புன ஆபுச்ச²னகிச்சம் நத்தீ²தி உஸ்ஸாஹம் அப்படிப்பஸ்ஸம்பே⁴த்வா அஞ்ஞம் கா³மம் க³ச்ச²ந்தானம் கா³மஸதம்பி ஹோது, புன ஆபுச்ச²னகிச்சம் நத்தீ²தி அத்தோ². தேனாஹ ‘‘ஸசே பனா’’திஆதி³. உஸ்ஸாஹந்தி கா³மப்பவிஸனுஸ்ஸாஹம். அந்தராராமாதீ³ஸு (பாசி. அட்ட². 515) ந கேவலம் அனாபுச்சா² க³ச்ச²ந்தஸ்ஸேவ, காயப³ந்த⁴னம் அப³ந்தி⁴த்வா ஸங்கா⁴டிம் அபாருபித்வா க³ச்ச²ந்தஸ்ஸாபி அனாபத்தி. ஆபதா³ஸூதி ஸீஹோ வா ப்³யக்³கோ⁴ வா ஆக³ச்ச²தி, மேகோ⁴ வா உட்டே²தி, அஞ்ஞோ வா கோசி உபத்³த³வோ உப்பஜ்ஜதி, அனாபத்தி. ஏவரூபாஸு ஆபதா³ஸு ப³ஹிகா³மதோ அந்தோகா³மம் பவிஸிதும் வட்டதி.

விகாலகா³மப்பவேஸனஸிக்கா²பத³வண்ணனா நிட்டி²தா.

4. ஸூசிக⁴ரஸிக்கா²பத³வண்ணனா

தம் அஸ்ஸ அத்தீ²தி (ஸாரத்த². டீ. பாசித்திய 3.517) பட²மம் பி⁴ந்தி³த்வா பச்சா² தே³ஸேதப்³ப³த்தா தம் பே⁴த³னகம் அஸ்ஸ பாசித்தியஸ்ஸ அத்தீ²தி.

அரணிகேதி அரணித⁴னுகே. விதே⁴தி வேத⁴கே. வாஸிஜடேதி வாஸித³ண்ட³கே ச.

ஸூசிக⁴ரஸிக்கா²பத³வண்ணனா நிட்டி²தா.

5. மஞ்சபீட²ஸிக்கா²பத³வண்ணனா

அட்ட²ங்கு³லபாத³கந்தி பா⁴வனபும்ஸகனித்³தே³ஸோ. ‘‘சே²த³னகம் பே⁴த³னகஸதி³ஸமேவா’’தி இமினா ‘‘சே²த³னமேவ சே²த³னகம், தம் அஸ்ஸ அத்தீ²தி சே²த³னக’’ந்தி இமமத்த²ம் அதிதி³ஸதி.

யதா² பமாணமேவ உபரி தி³ஸ்ஸதி, ஏவம் நிக²ணித்வா வாதி ஸசே பன ந சி²ந்தி³துகாமோ ஹோதி, யதா² பமாணமேவ உபரி தி³ஸ்ஸதி, ஏவம் பூ⁴மியம் நிக²ணித்வா வா. அட்டகம் வா ப³ந்தி⁴த்வாதி உக்கி²பித்வா துலாஸங்கா⁴தே ட²பேத்வா அட்டம் கத்வா.

மஞ்சபீட²ஸிக்கா²பத³வண்ணனா நிட்டி²தா.

6. தூலோனத்³த⁴ஸிக்கா²பத³வண்ணனா

சிமிலிகம் பத்த²ரித்வா தூலம் பக்கி²பித்வாதி மஞ்சபீடா²னம் உபரி சிமிலிகம் பத்த²ரித்வா தஸ்ஸ உபரி தூலம் பக்கி²பித்வாதி அத்தோ². உபரி சிமிலிகாயாதி உபரிமபா⁴கே³ சிமிலிகாய.

ஸீஸப்பமாணந்தி (சூளவ. அட்ட². 297; ஸாரத்த². டீ. சூளவக்³க³ 3.297) யத்த² க³லவாடகதோ பட்டா²ய ஸப்³ப³ஸீஸம் உபத³ஹந்தி, தம் ஸீஸப்பமாணம். தஞ்ச உக்கட்ட²பரிச்சே²த³தோ திரியம் முட்டி²ரதனம் ஹோதி, தீ³க⁴தோ த்³விரதனந்தி த³ஸ்ஸேதும் ‘‘யஸ்ஸ வித்தா²ரதோ தீஸு கோணேஸூ’’திஆதி³மாஹ. த்³வின்னம் அந்தரம் வித³த்தி² சதுரங்கு³லம் ஹோதீதி த்³வின்னம் கோணானம் அந்தரம் மினியமானம் வித³த்தி² சேவ சதுரங்கு³லஞ்ச ஹோதி. மஜ்ஜே² முட்டி²ரதனந்தி பி³ப்³போ³ஹனஸ்ஸ மஜ்ஜ²ம் திரியதோ முட்டி²ரதனப்பமாணம் ஹோதி. அயஞ்ஹி ஸீஸப்பமாணஸ்ஸ உக்கட்ட²பரிச்சே²தோ³. ததோ உத்³த⁴ம் ந வட்டதி, ஹேட்டா² வட்டதி. அகி³லானஸ்ஸ ஸீஸூபதா⁴னஞ்ச பாதூ³பதா⁴னஞ்சாதி த்³வயமேவ வட்டதி. கி³லானஸ்ஸ பி³ப்³போ³ஹனானி ஸந்த²ரித்வா உபரி பச்சத்த²ரணம் த³த்வா நிபஜ்ஜிதும்பி வட்டதி.

தூலோனத்³த⁴ஸிக்கா²பத³வண்ணனா நிட்டி²தா.

7. நிஸீத³னஸிக்கா²பத³வண்ணனா

ஸத்தமம் உத்தானமேவ.

நிஸீத³னஸிக்கா²பத³வண்ணனா நிட்டி²தா.

8. கண்டு³ப்படிச்சா²தி³ஸிக்கா²பத³வண்ணனா

அதோ⁴னாபி⁴உப்³ப⁴ஜாணுமண்ட³லந்தி நாபி⁴யா ஹேட்டா² ஜாணுமண்ட³லானம் உபரி. கண்டு³பீளகஅஸ்ஸாவது²ல்லகச்சா²பா³தா⁴னந்தி ஏத்த² கண்டூ³தி கச்சு². பீளகாதி லோஹிததுண்டி³கா ஸுகு²மபீளகா. அஸ்ஸாவோதி அரிஸப⁴க³ந்த³லமது⁴மேஹானம் வஸேன அஸுசிபக்³க⁴ரணம். து²ல்லகச்சா²பா³தோ⁴தி மஹாபீளகாபா³தோ⁴ வுச்சதி.

கண்டு³ப்படிச்சா²தி³ஸிக்கா²பத³வண்ணனா நிட்டி²தா.

9-10. வஸ்ஸிகஸாடிகனந்த³ஸிக்கா²பத³வண்ணனா

நவமம் த³ஸமஞ்ச உத்தானமேவ.

வஸ்ஸிகஸாடிகனந்த³ஸிக்கா²பத³வண்ணனா நிட்டி²தா.

ரதனவக்³கோ³ நவமோ.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

பாசித்தியவண்ணனா நிட்டி²தா.