7. ஸப்பாணகவக்³கோ³

1. ஸஞ்சிச்சஸிக்கா²பத³வண்ணனா

பாசித்தியந்தி அந்தமஸோ மஞ்சபீட²ம் ஸோதே⁴ந்தோ மங்கு³லபீ³ஜகேபி பாணஸஞ்ஞீ நிக்காருணிகதாய தம் பி⁴ந்த³ந்தோ அபனேதி (பாசி. அட்ட². 382), பாசித்தியம். தேனாஹ ‘‘தம் கு²த்³த³கம்பீ’’திஆதி³. உபக்கமமஹந்ததாய அகுஸலம் மஹந்தம் ஹோதீதி ப³ஹுக்க²த்தும் பவத்தஜவனேஹி லத்³தா⁴ஸேவனாய ஸன்னிட்டா²பகசேதனாய வஸேன பயோக³ஸ்ஸ மஹந்தத்தா அகுஸலம் மஹந்தம் ஹோதி, மஹாஸாவஜ்ஜம் ஹோதீதி அதி⁴ப்பாயோ.

ஸஞ்சிச்சஸிக்கா²பத³வண்ணனா நிட்டி²தா.

2. ஸப்பாணகஸிக்கா²பத³வண்ணனா

ஏத்த² ச படங்க³பாணகானம் பதனம் ஞத்வாபி ஸுத்³த⁴சித்ததாய பதீ³புஜ்ஜலனே விய ஸப்பாணகபா⁴வம் ஞத்வாபி உத³கஸஞ்ஞாய பரிபு⁴ஞ்ஜிதப்³ப³தோ பண்ணத்திவஜ்ஜதா வேதி³தப்³பா³.

ஸப்பாணகஸிக்கா²பத³வண்ணனா நிட்டி²தா.

3. உக்கோடனஸிக்கா²பத³வண்ணனா

தஸ்ஸ தஸ்ஸ பி⁴க்கு²னோதி யேன யேன வூபஸமிதம், தஸ்ஸ தஸ்ஸ பி⁴க்கு²னோ. ‘‘அகதம் கம்ம’’ந்திஆதீ³னி வத³ந்தோதி ‘‘அகதம் கம்மம், து³க்கடம் கம்மம், புன காதப்³ப³ம் கம்மம், அனிஹதம் து³ன்னிஹதம் புன நிஹனிதப்³ப³’’ந்தி (பாசி. 394) வத³ந்தோ. யதா²டி²தபா⁴வேன பதிட்டா²தும் ந த³தே³ய்யாதி தேஸம் பவத்தி ஆகாரத³ஸ்ஸனத்த²ம் வுத்தம். தேனாஹ ‘‘யம் பன த⁴ம்மேன அதி⁴கரணம் நிஹதம், தம் ஸுனிஹதமேவா’’தி.

உக்கோடனஸிக்கா²பத³வண்ணனா நிட்டி²தா.

4. து³ட்டு²ல்லஸிக்கா²பத³வண்ணனா

சத்தாரி பாராஜிகானி அத்து²த்³தா⁴ரவஸேன பத³பா⁴ஜனியம் த³ஸ்ஸிதானீதி ஆஹ ‘‘து³ட்டு²ல்லந்தி ஸங்கா⁴தி³ஸேஸம் அதி⁴ப்பேத’’ந்தி. யேன கேனசி உபாயேனாதி ‘‘ஸாமம் வா ஜானாதி, அஞ்ஞே வா தஸ்ஸ ஆரோசேந்தி, ஸோ வா ஆரோசேதீ’’தி (பாசி. 399) வுத்தேஸு யேன கேனசி உபாயேன. பாசித்தியம் து⁴ரம் நிக்கி²த்தமத்தேயேவாதி அதி⁴ப்பாயோ. ஸசே பச்சா²பி ஆரோசேதி, து⁴ரனிக்கே²பனே ஆபத்திதோ ந முச்சதி. தேனாஹ ‘‘ஸசேபீ’’திஆதி³. ஸமணஸதம்பி ஆபஜ்ஜதியேவாதி ஸமணஸதம்பி ஸுத்வா யதி³ சா²தே³தி, பாசித்தியம் ஆபஜ்ஜதியேவாதி அத்தோ². யேனஸ்ஸ ஆரோசிதந்தி யேன து³தியேன அஸ்ஸ ததியஸ்ஸ ஆரோசிதம். தஸ்ஸேவாதி தஸ்ஸ து³தியஸ்ஸேவ. ஆரோசேதீதி படிச்சா²த³னத்த²மேவ ‘‘மா கஸ்ஸசி ஆரோசேஸீ’’தி வத³தி. கோடிசி²ன்னா ஹோதீதி (ஸாரத்த². டீ. பாசித்திய 3.399) யஸ்மா படிச்சா²த³னபச்சயா ஆபத்திம் ஆபஜ்ஜித்வாவ து³தியேன ததியஸ்ஸ ஆரோசிதம், தஸ்மா தப்பச்சயா புன தேன ஆபஜ்ஜிதப்³பா³பத்தியா அபா⁴வதோ ஆபத்தியா கோடி சி²ன்னா நாம ஹோதி.

ஆதி³பதே³தி து³ட்டு²ல்லாபத்திஸஞ்ஞீ, வேமதிகோ, அது³ட்டு²ல்லாபத்திஸஞ்ஞீதி இமேஸு தீஸு ‘‘து³ட்டு²ல்லாபத்திஸஞ்ஞீ படிச்சா²தே³தீ’’தி (பாசி. 400) இமஸ்மிம் பட²மபதே³. இதரேஸு த்³வீஸூதி ‘‘வேமதிகோ படிச்சா²தே³தி, அது³ட்டு²ல்லாபத்திஸஞ்ஞீ படிச்சா²தே³தீ’’தி இமேஸு பதே³ஸு. அது³ட்டு²ல்லாயாதி அவஸேஸபஞ்சாபத்திக்க²ந்தே⁴. அனுபஸம்பன்னஸ்ஸ து³ட்டு²ல்லே வா அது³ட்டு²ல்லே வா அஜ்ஜா²சாரேதி அனுபஸம்பன்னஸ்ஸ புரிமபஞ்சஸிக்கா²பத³வீதிக்கமஸங்கா²தே து³ட்டு²ல்லே வா இதரஸ்மிம் அது³ட்டு²ல்லே வா அஜ்ஜா²சாரே. யம் பன ஸமந்தபாஸாதி³காயம் ‘‘அனுபஸம்பன்னஸ்ஸ ஸுக்கவிஸட்டி² ச காயஸம்ஸக்³கோ³ சாதி அயம் து³ட்டு²ல்லஅஜ்ஜா²சாரோ நாமா’’தி (பாசி. அட்ட². 400) வுத்தம், தம் து³ட்டு²ல்லாரோசனஸிக்கா²பத³ட்ட²கதா²ய (பாசி. அட்ட². 78 ஆத³யோ) ந ஸமேதி, ந சாபி ஏவம் வத்தும் யுஜ்ஜதி ‘‘ஆரோசனே அனுபஸம்பன்னஸ்ஸ து³ட்டு²ல்லம் அஞ்ஞதா² அதி⁴ப்பேதம், படிச்சா²த³னே அஞ்ஞதா²’’தி (ஸாரத்த². டீ. பாசித்திய 400) விஸேஸகாரணஸ்ஸானுபலப்³ப⁴னதோ, தஸ்மா தம் உபபரிக்கி²தப்³ப³ம்.

து³ட்டு²ல்லஸிக்கா²பத³வண்ணனா நிட்டி²தா.

5. ஊனவீஸதிவஸ்ஸஸிக்கா²பத³வண்ணனா

க³ப்³ப⁴வீஸோபி ஹி ‘‘பரிபுண்ணவீஸோ’’ த்வேவ ஸங்க²ம் க³ச்ச²தீதி ஆஹ ‘‘படிஸந்தி⁴க்³க³ஹணதோ பட்டா²யா’’திஆதி³. தத்த² படிஸந்தி⁴க்³க³ஹணதோ பட்டா²யாதி யம் மாதுகுச்சி²ஸ்மிம் பட²மம் சித்தம் உப்பன்னம் பட²மம் விஞ்ஞாணம் பாதுபூ⁴தம், தம் ஆதி³ம் கத்வா. ஸோதி யோ புக்³க³லோ ஊனவீஸதிவஸ்ஸோ உபஸம்பாதி³தோ, ஸோ புக்³க³லோ. அஞ்ஞம் உபஸம்பாதே³தீதி உபஜ்ஜா²யோ வா கம்மவாசாசரியோ வா ஹுத்வா அஞ்ஞம் புக்³க³லம் உபஸம்பாதே³தி. தந்தி ஊனவீஸதிவஸ்ஸம் புக்³க³லம். ஸீமம் வா ஸம்மன்னதீதி நவம் ஸீமம் ப³ந்த⁴தி.

ஊனவீஸதிவஸ்ஸஸிக்கா²பத³வண்ணனா நிட்டி²தா.

6. தே²ய்யஸத்த²ஸிக்கா²பத³வண்ணனா

ராஜானம் வா வஞ்சேத்வாதி ராஜானம் தே²னேத்வா ரஞ்ஞோ ஸந்தகம் கிஞ்சி க³ஹேத்வா, ‘‘இதா³னி தஸ்ஸ ந த³ஸ்ஸாமா’’தி மக்³க³ப்படிபன்னா அகதகம்மா சேவ கதகம்மா ச சோராதி வுத்தம் ஹோதி. ஏஸ நயோ ஸுங்கம் பரிஹரிதுகாமாதி ஏத்தா²பி.

காலவிஸங்கேதேனாதி காலஸ்ஸ விஸங்கேதேன, தி³வஸவிஸங்கேதேனாதி வுத்தம் ஹோதி. மக்³க³விஸங்கேதேன, பன அடவிவிஸங்கேதேன வா க³ச்ச²தோ ஆபத்தியேவ.

தே²ய்யஸத்த²ஸிக்கா²பத³வண்ணனா நிட்டி²தா.

7. ஸம்விதா⁴னஸிக்கா²பத³வண்ணனா

மாதுகா³மேனாதி இத்தி²யா. ஏகதோஉபஸம்பன்னா, பன ஸிக்க²மானா, ஸாமணேரீ சாதி இமா திஸ்ஸோபி இத⁴ ஸங்க³ஹம் க³ச்ச²ந்தி. இமாஸம் பன திஸ்ஸன்னம் ஸமயோ ரக்க²தி. அயமேதாஸம், மாதுகா³மஸ்ஸ ச விஸேஸோதி வேதி³தப்³ப³ம்.

ஸம்விதா⁴னஸிக்கா²பத³வண்ணனா நிட்டி²தா.

8. அரிட்ட²ஸிக்கா²பத³வண்ணனா

தம்தம்ஸம்பத்தியா (ஸாரத்த². டீ. பாசித்திய 3.417) விப³ந்த⁴னவஸேன ஸத்தஸந்தானஸ்ஸ அந்தரே வேமஜ்ஜே² ஏதி ஆக³ச்ச²தீதி அந்தராயோ, தி³ட்ட²த⁴ம்மிகாதி³அனத்தோ², அனதிக்கமனத்தே²ன தஸ்மிம் அந்தராயே நியுத்தா, அந்தராயம் வா ப²லம் அரஹந்தி, அந்தராயஸ்ஸ வா கரணஸீலாதி அந்தராயிகா. தேனாஹ ‘‘ஸக்³க³மோக்கா²னம் அந்தராயம் கரோந்தீதி அந்தராயிகா’’தி (ம. நி. அட்ட². 1.234). தே கம்மகிலேஸவிபாகஉபவாத³பஞ்ஞத்திவீதிக்கமவஸேன பஞ்சவிதா⁴தி ஏத்த² ச பஞ்சானந்தரியகம்மம் கம்மந்தராயிகம் நாம, ததா² பி⁴க்கு²னிதூ³ஸககம்மம். தம் பன மோக்க²ஸ்ஸேவ அந்தராயம் கரோதி, ந ஸக்³க³ஸ்ஸ. நியதமிச்சா²தி³ட்டி²த⁴ம்மா கிலேஸந்தராயிகா நாம. பண்ட³கதிரச்சா²னக³தஉப⁴தோப்³யஞ்ஜனகானம் படிஸந்தி⁴த⁴ம்மா விபாகந்தராயிகா நாம. அரியூபவாதா³ உபவாத³ந்தராயிகா நாம. தே பன யாவ அரியே ந க²மாபேந்தி, தாவதே³வ, ந ததோ பரம். ஸஞ்சிச்ச ஆபன்னா ஆபத்தியோ பஞ்ஞத்திவீதிக்கமந்தராயிகா நாம. தாபி யாவ பி⁴க்கு²பா⁴வம் வா படிஜானாதி, ந வுட்டா²தி வா ந தே³ஸேதி வா, தாவதே³வ, ந ததோ பரம்.

தத்ராயம் (ம. நி. அட்ட². 1.234; பாசி. அட்ட². 417) அரிட்டோ² பி⁴க்கு² ப³ஹுஸ்ஸுதோ த⁴ம்மகதி²கோ ஸேஸந்தராயிகே ஜானாதி, வினயே பன அகோவித³த்தா பண்ணத்திவீதிக்கமந்தராயிகே ந ஜானாதி, தஸ்மா ரஹோக³தோ ஏவம் சிந்தேஸி ‘‘இமே ஆகா³ரிகா பஞ்ச காமகு³ணே பரிபு⁴ஞ்ஜந்தா ஸோதாபன்னாபி ஸகதா³கா³மினோபி அனாகா³மினோபி ஹோந்தி, பி⁴க்கூ²பி மனாபிகானி சக்கு²விஞ்ஞேய்யானி ரூபானி பஸ்ஸந்தி…பே… காயவிஞ்ஞேய்யே போ²ட்ட²ப்³பே³ பு²ஸந்தி, முது³கானி அத்த²ரணபாவுரணாதீ³னி பரிபு⁴ஞ்ஜந்தி, ஏதம் ஸப்³ப³ம் வட்டதி. கஸ்மா? இத்தி²ரூபா…பே… இத்தி²போ²ட்ட²ப்³பா³ ஏவ ந வட்டந்தி, ஏதேபி வட்டந்தீ’’தி ஏவம் ரஸேன ரஸம் ஸம்ஸந்தி³த்வா ஸச்ச²ந்த³ராக³பரிபோ⁴க³ஞ்ச நிச்ச²ந்த³ராக³பரிபோ⁴க³ஞ்ச ஏகம் கத்வா தூ²லவாகேஹி ஸத்³தி⁴ம் அதிஸுகு²மஸுத்தம் க⁴டேந்தோ விய, ஸாஸபேன ஸத்³தி⁴ம் ஸினேரும் உபஸம்ஹரந்தோ விய ச பாபகம் தி³ட்டி²க³தம் உப்பாதே³த்வா ‘‘கிம் ப⁴க³வதா மஹாஸமுத்³த³ம் ப³ந்த⁴ந்தேன விய மஹதா உஸ்ஸாஹேன பட²மபாராஜிகம் பஞ்ஞத்தம், நத்தி² ஏத்த² தோ³ஸோ’’தி ஸப்³ப³ஞ்ஞுதஞ்ஞாணேன ஸத்³தி⁴ம் படிவிருஜ்ஜ²ந்தோ ப⁴ப்³ப³புக்³க³லானம் ஆஸம் சி²ந்த³ந்தோ ஜினஸ்ஸ ஆணாசக்கே பஹாரமதா³ஸி. தேனாஹ ‘‘தேஸூ’’திஆதி³.

தத்த² தேஸூதி யதா²வுத்தேஸு அந்தராயேஸு. அட்டி²கங்கலூபமா காமாதி ஏத்த² அட்டி²கங்கலம் (ஸாரத்த². டீ. பாசித்திய 3.417) நாம உரட்டி² வா பிட்டி²கண்டகம் வா ஸீஸட்டி² வா. தஞ்ஹி நிம்மம்ஸத்தா ‘‘கங்கல’’ந்தி வுச்சதி. விக³தமம்ஸாய ஹி அட்டி²ஸங்க²லிகாய ஏகட்டி²ம்ஹி வா கங்கலஸத்³தோ³ நிருள்ஹோ, தம்ஸதி³ஸா காமா அப்பஸ்ஸாத³ட்டே²னாதி அத்தோ². ஆதி³ஸத்³தே³ன ‘‘மம்ஸபேஸூபமா காமா, திணுக்கூபமா காமா, அங்கா³ரகாஸூபமா காமா, ஸுபினகூபமா காமா, யாசிதகூபமா காமா, ருக்க²ப²லூபமா காமா, அஸிஸூனூபமா காமா, ஸத்திஸூலூபமா காமா, ஸப்பஸிரூபமா காமா’’தி (ம. நி. 1.234, 236; 2.43-48; பாசி. 417; சூளவ. 65) ஏதேஸம் க³ஹணம்.

தத்த² மம்ஸபேஸூபமா காமா (பாசி. அட்ட². 417) ப³ஹுஸாதா⁴ரணட்டே²ன. திணுக்கூபமா காமா அனுத³ஹனட்டே²ன. அங்கா³ரகாஸூபமா காமா மஹாபி⁴தாபனட்டே²ன. ஸுபினகூபமா காமா இத்தரபச்சுபட்டா²னட்டே²ன. யாசிதகூபமா காமா தாவகாலிகட்டே²ன. ருக்க²ப²லூபமா காமா ஸப்³ப³ங்க³பச்சங்க³பலிப⁴ஞ்ஜனட்டே²ன. அஸிஸூனூபமா அதி⁴குட்டனட்டே²ன. ஸத்திஸூலூபமா வினிவிஜ்ஜ²னட்டே²ன. ஸப்பஸிரூபமா ஸாஸங்கஸப்படிப⁴யட்டே²ன.

ததே²வாதி ‘‘மா ஆயஸ்மா’’திஆதீ³ஹி. இதரேஸந்தி ஸோ ஸங்க⁴மஜ்ஜ²ம் ஆகட்³டி⁴த்வா யேஹி ‘‘மா ஆயஸ்மா’’திஆதி³னா வுத்தோ, தத்த² தேஹி அஞ்ஞேஸம் ஸுதானம் பி⁴க்கூ²னம். ஞத்திசதுத்தே²ன கம்மேனாதி ‘‘ஸுணாது மே, ப⁴ந்தே, ஸங்கோ⁴, இத்த²ன்னாமஸ்ஸ பி⁴க்கு²னோ ஏவரூபம் பாபகம் தி³ட்டி²க³தம் உப்பன்ன’’ந்திஆதி³னா (பாசி. 420) பத³பா⁴ஜனியம் வுத்தேன ஞத்திசதுத்தே²ன கம்மேன.

அரிட்ட²ஸிக்கா²பத³வண்ணனா நிட்டி²தா.

9. உக்கி²த்தஸம்போ⁴க³ஸிக்கா²பத³வண்ணனா

அகதானுத⁴ம்மேனாதி உக்கி²பித்வா அனோஸாரிதேன. தேனாஹ ‘‘அனுத⁴ம்மோ வுச்சதீ’’திஆதி³. ஏத்த² அனுத⁴ம்மோதி ஓஸாரணா வுச்சதீதி ஸம்ப³ந்தோ⁴. உக்கே²பனீயகம்மஸ்ஸானுரூபோ, பச்சா² கத்தப்³போ³ வா த⁴ம்மோதி அனுத⁴ம்மோ. அனுலோமவத்தம் தி³ஸ்வாதி ‘‘ந உபஸம்பாதே³தப்³ப³ம், ந நிஸ்ஸயோ தா³தப்³போ³’’திஆதி³கம் (சூளவ. 70) அட்டா²ரஸவித⁴ம் வத்தம் தி³ஸ்வா, ஏதேஸு அட்டா²ரஸஸு அனுலோமவத்தேஸு வத்தந்தம் தி³ஸ்வாதி அதி⁴ப்பாயோ. ஆமிஸஸம்போ⁴க³ம் வா த⁴ம்மஸம்போ⁴க³ம் வாதி ஏத்த² யம் கிஞ்சி ஆமிஸஸ்ஸ தா³னம், படிக்³க³ஹணஞ்ச ஆமிஸஸம்போ⁴கோ³. த⁴ம்மஸ்ஸ உத்³தி³ஸனம், உத்³தி³ஸாபனஞ்ச த⁴ம்மஸம்போ⁴கோ³. ஸம்வஸேய்யாதி ‘‘உபோஸத²ம் வா பவாரணம் வா ஸங்க⁴கம்மம் வா’’தி (பாசி. 425) ஏவம் பத³பா⁴ஜனியம் வுத்தம் திவித⁴ம் ஸம்வாஸம் கரேய்ய. யஸ்மா பனேத்த² உபோஸத²பவாரணாபி ஸங்கே⁴ஹியேவ காதப்³ப³த்தா ஸங்க⁴கம்மானியேவ ஹோந்தி, தஸ்மா ‘‘உபோஸதா²தி³கம் ஸங்க⁴கம்மம் கரேய்யா’’தி வுத்தம். பயோகே³ பயோகே³தி தா³னே தா³னே, க³ஹணே க³ஹணே சாதி அத்தோ².

பண்ணத்திம் அஜானந்தேன அரஹதாபி கிரியாப்³யாகதசித்தேன ஆபஜ்ஜிதப்³ப³த்தா ‘‘திசித்த’’ந்தி வுத்தம்.

உக்கி²த்தஸம்போ⁴க³ஸிக்கா²பத³வண்ணனா நிட்டி²தா.

10. கண்டகஸிக்கா²பத³வண்ணனா

பிரேதி (ஸாரத்த². டீ. பாசித்திய 3.428) நிபாதபத³ம் ஸம்போ³த⁴னே வத்தமானம் பரஸத்³தே³ன ஸமானத்த²ம் வத³ந்தீதி ஆஹ ‘‘பர அமாமகா’’தி, அம்ஹாகம் அனஜ்ஜ²த்திகபூ⁴தாதி அத்தோ². பிரேதி வா ‘‘பரதோ’’தி இமினா ஸமானத்த²ம் நிபாதபத³ம், தஸ்மா சர பிரேதி பரதோ க³ச்ச², மா இத⁴ திட்டா²தி ஏவமேத்த² அத்தோ² த³ட்ட²ப்³போ³.

கண்டகஸிக்கா²பத³வண்ணனா நிட்டி²தா.

ஸப்பாணகவக்³கோ³ ஸத்தமோ.