7. நஹானஸிக்கா²பத³வண்ணனா

‘‘தி³யட்³டோ⁴ மாஸோ ஸேஸோ கி³ம்ஹான’’ந்தி ‘‘வஸ்ஸானஸ்ஸ பட²மோ மாஸோ’’இச்சேதே அட்³ட⁴தேய்யமாஸா உண்ஹஸமயோ, பரிளாஹஸமயோதி கி³ம்ஹானம் ஸேஸோ தி³யட்³டோ⁴ மாஸோ உண்ஹஸமயோ, வஸ்ஸானஸ்ஸ பட²மோ மாஸோ பரிளாஹஸமயோதி ஏவம் ஏதே அட்³ட⁴தேய்யமாஸா கமேன உண்ஹஸமயோ, பரிளாஹஸமயோ நாம ஹோதீதி அத்தோ² தேனேவ பத³பா⁴ஜனியம் ‘‘உண்ஹஸமயோ நாம தி³யட்³டோ⁴ மாஸோ ஸேஸோ கி³ம்ஹான’’ந்தி, ‘‘பரிளாஹஸமயோ நாம வஸ்ஸானஸ்ஸ பட²மோ மாஸோ’’தி வுத்தம். யதா³ வினா நஹானேன ந பா²ஸு ஹோதி, அயம் கி³லானஸமயோ. பத³பா⁴ஜனியம் (பாசி. 364) பன கி³லானே நிச்சி²தே கி³லானகாலோ நிச்சி²தோவ ஹோதீதி ‘‘யஸ்ஸ வினா நஹானேன ந பா²ஸு ஹோதி, ‘கி³லானஸமயோ’தி நஹாயிதப்³ப³’’ந்தி வுத்தம். பரிவேணஸம்மஜ்ஜனமத்தம்பீதி அந்தமஸோ பரிவேணஸம்மஜ்ஜனமத்தம்பி.

வாலுகம் உக்கிரித்வாதி ஸுக்கா²ய நதி³யா வாலிகம் உத்திரித்வா. ஆவாடேஸுபீதி பி-ஸத்³தே³ன நதி³யம் வத்தப்³ப³மேவ நத்தீ²தி த³ஸ்ஸேதி. ஆபதா³ஸூதி ப⁴மராதீ³ஹி அனுப³ந்தே⁴ஸு.

நஹானஸிக்கா²பத³வண்ணனா நிட்டி²தா.