6. ஸுராபானவக்³கோ³

1. ஸுராபானஸிக்கா²பத³வண்ணனா

பிட்டா²தீ³ஹி கதம் மஜ்ஜம் ஸுராதி பிட்ட²பூவஓத³னகிண்ணஸம்பா⁴ரேஹி கதம் மஜ்ஜம் ஸுராதி அத்தோ². இத³ம் வுத்தம் ஹோதி – பிட்ட²ஸுரா, பூவஸுரா, ஓத³னஸுரா, கிண்ணபக்கி²த்தா, ஸம்பா⁴ரஸம்யுத்தாதி (பாசி. 328) இமானி பஞ்ச ஸுரா நாமாதி. தத்த² பிட்ட²ம் பா⁴ஜனே பக்கி²பித்வா தஜ்ஜம் உத³கம் த³த்வா மத்³தி³த்வா கதா பிட்ட²ஸுரா (ஸாரத்த². டீ. பாசித்திய 3.326-328). ஏவம் ஸேஸாஸுபி. கிண்ணாதி பன தஸ்ஸா ஸுராய பீ³ஜம் வுச்சதி. யே ‘‘ஸுராமோத³கா’’திபி வுச்சந்தி, தே பக்கி²பித்வா கதா கிண்ணபக்கி²த்தா. ஹரீதகிஸாஸபாதி³னானாஸம்பா⁴ரேஹி ஸம்யோஜிதா ஸம்பா⁴ரஸம்யுத்தா.

புப்பா²தீ³ஹி கதோ ஆஸவோ மேரயந்தி புப்ப²ப²லமது⁴கு³ளஸம்பா⁴ரேஹி கதோ சிரபரிவாஸிதோ மேரயந்தி அத்தோ². இத³ம் வுத்தம் ஹோதி – புப்பா²ஸவோ, ப²லாஸவோ, மத்⁴வாஸவோ, கு³ளாஸவோ, ஸம்பா⁴ரஸம்யுத்தோதி பஞ்சமேரயம் நாமாதி. தத்த² மது⁴கதாலனாளிகேராதி³ புப்ப²ரஸோ சிரபரிவாஸிதோ புப்பா²ஸவோ. பனஸாதி³ப²லரஸோ ப²லாஸவோ. முத்³தி³காரஸோ மத்⁴வாஸவோ. ஸமந்தபாஸாதி³காயம் பன ‘‘ப²லாஸவோ நாம முத்³தி³காப²லாதீ³னி மத்³தி³த்வா தேஸம் ரஸேன கதோ. மத்⁴வாஸவோ நாம முத்³தி³கானம் ஜாதிரஸேன கதோ, மக்கி²காமது⁴னாபி கரீயதீதி வத³ந்தீ’’தி (பாசி. அட்ட². 328) வுத்தம். உச்சு²ரஸோ கு³ளாஸவோ. ஹரீதகாமலககடுகப⁴ண்டா³தி³னானாஸம்பா⁴ரானம் ரஸோ சிரபரிவாஸிதோ ஸம்பா⁴ரஸம்யுத்தோ. ஏத்த² ச ஸுராய, மேரயஸ்ஸ ச ஸமானேபி ஸம்பா⁴ரஸம்யோகே³ மத்³தி³த்வா கதா ஸுரா, சிரபரிவாஸிதமத்தேன மேரயந்தி ஏவமிமேஸம் நானாகரணம் த³ட்ட²ப்³ப³ம். பீ³ஜதோ பட்டா²யாதி ஸம்பா⁴ரே படியாதே³த்வா சாடியம் பக்கி²த்தகாலதோ சேவ தாலனாளிகேராதீ³னம் புப்ப²ரஸஸ்ஸ அபி⁴னவகாலதோ ச பட்டா²ய.

லோணஸோவீரகம் வா ஸுத்தம் வாதி இமே த்³வே அனேகேஹி பே⁴ஸஜ்ஜேஹி அபி⁴ஸங்க²தா ஆஸவவிஸேஸா. வாஸக்³கா³ஹாபனத்த²ந்தி ஸுக³ந்த⁴பா⁴வகா³ஹாபனத்த²ம். வத்து²ம் அஜானனதாய சேத்த² அசித்தகதா வேதி³தப்³பா³. அகுஸலேனேவ பாதப்³ப³தாய லோகவஜ்ஜம். யம் பனேத்த² வத்தப்³ப³ம் ஸியா, தம் ஸப்³ப³ம் பட²மபாராஜிகவண்ணனாய வுத்தனயமேவ.

ஸுராபானஸிக்கா²பத³வண்ணனா நிட்டி²தா.

2. அங்கு³லிபதோத³கஸிக்கா²பத³வண்ணனா

ஹஸாதி⁴ப்பாயஸ்ஸாதி கி²ட்³டா³தி⁴ப்பாயஸ்ஸ, இமினா காயஸம்ஸக்³கா³தி⁴ப்பாயம் படிக்கி²பதி.

ஏத்த² ச பி⁴க்கு²னிம்பி ஹஸாதி⁴ப்பாயேன பு²ஸதோ பி⁴க்கு²ஸ்ஸ து³க்கடம். ததா² பி⁴க்கு²ம்பி பு²ஸந்தியா பி⁴க்கு²னியாதி ஆஹ ‘‘இத⁴ பன பி⁴க்கு²னீபி பி⁴க்கு²ஸ்ஸ, பி⁴க்கு² ச பி⁴க்கு²னியா அனுபஸம்பன்னோ ஏவா’’தி. காயப்படிப³த்³தா⁴தீ³ஸு ஸப்³ப³த்தா²தி ‘‘காயேன காயப்படிப³த்³தே⁴, காயப்படிப³த்³தே⁴ன காயே, காயப்படிப³த்³தே⁴ன காயப்படிப³த்³தே⁴, நிஸ்ஸக்³கி³யேன காயே, நிஸ்ஸக்³கி³யேன காயப்படிப³த்³தே⁴, நிஸ்ஸக்³கி³யேன நிஸ்ஸக்³கி³யே’’தி (பாசி. 332) ஸப்³ப³த்த². ஸதி கரணீயே ஆமஸதோதி ஸதி கரணீயே புரிஸம் ஆமஸதோ அனாபத்தி. இத்தீ² பன ஸதி கரணீயேபி ஆமஸிதும் ந வட்டதி.

அங்கு³லிபதோத³கஸிக்கா²பத³வண்ணனா நிட்டி²தா.

3. ஹஸத⁴ம்மஸிக்கா²பத³வண்ணனா

உபரிகோ³ப்ப²கேதி கோ³ப்ப²கானம் உபரிபா⁴க³ப்பமாணே. ஹஸாதி⁴ப்பாயோதி கீளாதி⁴ப்பாயோ. யேன யேன அங்கே³னாதி ஹத்த²பாதா³தீ³ஸு யேன யேன அங்கே³ன. ததா² நாவாய கீளதோதி பி²யாரித்தாதீ³ஹி நாவம் பாஜேந்தஸ்ஸ வா தீரே உஸ்ஸாரேந்தஸ்ஸ வா து³க்கடந்தி அத்தோ².

ஹஸத⁴ம்மஸிக்கா²பத³வண்ணனா நிட்டி²தா.

4. அனாத³ரியஸிக்கா²பத³வண்ணனா

து³வித⁴ஞ்ஹேத்த² அனாத³ரியம் புக்³க³லானாத³ரியஞ்ச த⁴ம்மானாத³ரியஞ்சாதி ஆஹ ‘‘புக்³க³லஸ்ஸ வா’’திஆதி³. தத்த² யோ பி⁴க்கு² உபஸம்பன்னேன பஞ்ஞத்தேன வுச்சமானோ ‘‘அயம் உக்கி²த்தகோ வா வம்பி⁴தோ வா க³ரஹிதோ வா, இமஸ்ஸ வசனம் அகதம் ப⁴விஸ்ஸதீ’’தி (பாசி. 342) அனாத³ரியம் கரோதி, அயம் புக்³க³லே அனாத³ரியம் கரோதி நாம. யோ பன பஞ்ஞத்தேன வுச்சமானோ ‘‘கதா²யம் நஸ்ஸேய்ய வா வினஸ்ஸேய்ய வா அந்தரதா⁴யேய்ய வா’’தி, தம் வா நஸிக்கி²துகாமோ அனாத³ரியம் கரோதி, அயம் த⁴ம்மே அனாத³ரியம் கரோதி நாம. தேனாஹ ‘‘தஸ்மா’’திஆதி³.

இத³ம் ந ஸல்லேகா²ய ஸம்வத்ததீதி ஸம்மா கிலேஸே லிக²தீதி ஸல்லேகோ², அப்பிச்ச²தா, தத³த்த²ம் நயித³ம் ஸம்வத்ததி. ஆதி³ஸத்³தே³ன ‘‘இத³ம் ந து⁴தத்தா²ய ஸம்வத்ததி, ந பாஸாதி³கதாய, ந அபசயாய, ந வீரியாரம்பா⁴ய ஸம்வத்ததீ’’தி (பாசி. 343) இத³ம் ஸங்க³ண்ஹாதி. அபஞ்ஞத்தேனாதி ஸுத்தே வா அபி⁴த⁴ம்மே வா ஆக³தேன. பவேணிஆக³தந்தி ஸங்கீ³திகாலதோ பட்டா²ய மஹாகஸ்ஸபாதி³ஆசரியபரம்பராய ஆக³தம். ஸசே பன யஸ்மா உச்சு²ரஸோ ஸத்தாஹகாலிகோ, தஸ்ஸ கஸடோ யாவஜீவிகோ, த்³வின்னம்யேவ ஸமவாயோ உச்சு²யட்டி², தஸ்மா விகாலே உச்சு²யட்டி²ம் கா²தி³தும் வட்டதி கு³ளஹரீதகம் வியாதி ஏவமாதி³கம் கா³ரய்ஹாசரியுக்³க³ஹம் க³ஹேத்வா ‘‘ஏவம் அம்ஹாகம் ஆசரியானம் உக்³க³ஹோ பரிபுச்சா²’’தி ப⁴ணதி, ஆபத்தியேவ.

அனாத³ரியஸிக்கா²பத³வண்ணனா நிட்டி²தா.

5. பி⁴ம்ஸாபனஸிக்கா²பத³வண்ணனா

ரூபாதீ³னீதி ப⁴யானகானி ரூபஸத்³த³க³ந்த⁴ரஸபோ²ட்ட²ப்³பா³னி. ப⁴யானககத²ந்தி சோரகந்தாரவாளகந்தாரபிஸாசகந்தாரப்படிஸம்யுத்தகத²ம்.

பி⁴ம்ஸாபனஸிக்கா²பத³வண்ணனா நிட்டி²தா.

6. ஜோதிஸிக்கா²பத³வண்ணனா

அகி³லானோதி யஸ்ஸ வினா அக்³கி³னா பா²ஸு ஹோதி, ஸோ இத⁴ அகி³லானோ நாம. ஜோதிந்தி அக்³கி³ம்.

ப⁴க்³கே³ஸூதி ஏவம்னாமகே ஜனபதே³. ப⁴க்³கா³நாம ஜானபதி³னோ ராஜகுமாரா, தேஸம் நிவாஸோ ஏகோபி ஜனபதோ³ ருள்ஹிஸத்³தே³ன ‘‘ப⁴க்³கா³’’தி வுச்சதி. தேன வுத்தம் ‘‘ப⁴க்³கே³ஸூதி ஏவம்னாமகே ஜனபதே³’’தி. ததா² பதிலாதம் உக்கி²பந்தஸ்ஸாதி ட³ய்ஹமானம் அலாதம் பதிதம் உக்கி²பந்தஸ்ஸ ததா² து³க்கடந்தி அத்தோ². தஞ்சாதி து³க்கடம் பராமஸதி. அவிஜ்ஜா²தந்தி அனிப்³பு³தாலாதம். பதீ³பஜோதிகஜந்தாக⁴ரேதி பதீ³புஜ்ஜலனபத்தபசனஸேத³கம்மாதீ³ஸு ஜோதிகரணே அக்³கி³ஸாலாயஞ்ச ஸமாத³ஹந்தஸ்ஸ அனாபத்தீதி அத்தோ². ததா²ரூபப்பச்சயேதி ட²பேத்வா பதீ³பாதீ³னி அஞ்ஞஸ்மிம்பி ததா²ரூபபச்சயே. ஆபதா³ஸூதி து³ட்ட²வாளமிக³அமனுஸ்ஸேஹி உபத்³த³வேஸு.

ஜோதிஸிக்கா²பத³வண்ணனா நிட்டி²தா.

7. நஹானஸிக்கா²பத³வண்ணனா

‘‘தி³யட்³டோ⁴ மாஸோ ஸேஸோ கி³ம்ஹான’’ந்தி ‘‘வஸ்ஸானஸ்ஸ பட²மோ மாஸோ’’இச்சேதே அட்³ட⁴தேய்யமாஸா உண்ஹஸமயோ, பரிளாஹஸமயோதி கி³ம்ஹானம் ஸேஸோ தி³யட்³டோ⁴ மாஸோ உண்ஹஸமயோ, வஸ்ஸானஸ்ஸ பட²மோ மாஸோ பரிளாஹஸமயோதி ஏவம் ஏதே அட்³ட⁴தேய்யமாஸா கமேன உண்ஹஸமயோ, பரிளாஹஸமயோ நாம ஹோதீதி அத்தோ² தேனேவ பத³பா⁴ஜனியம் ‘‘உண்ஹஸமயோ நாம தி³யட்³டோ⁴ மாஸோ ஸேஸோ கி³ம்ஹான’’ந்தி, ‘‘பரிளாஹஸமயோ நாம வஸ்ஸானஸ்ஸ பட²மோ மாஸோ’’தி வுத்தம். யதா³ வினா நஹானேன ந பா²ஸு ஹோதி, அயம் கி³லானஸமயோ. பத³பா⁴ஜனியம் (பாசி. 364) பன கி³லானே நிச்சி²தே கி³லானகாலோ நிச்சி²தோவ ஹோதீதி ‘‘யஸ்ஸ வினா நஹானேன ந பா²ஸு ஹோதி, ‘கி³லானஸமயோ’தி நஹாயிதப்³ப³’’ந்தி வுத்தம். பரிவேணஸம்மஜ்ஜனமத்தம்பீதி அந்தமஸோ பரிவேணஸம்மஜ்ஜனமத்தம்பி.

வாலுகம் உக்கிரித்வாதி ஸுக்கா²ய நதி³யா வாலிகம் உத்திரித்வா. ஆவாடேஸுபீதி பி-ஸத்³தே³ன நதி³யம் வத்தப்³ப³மேவ நத்தீ²தி த³ஸ்ஸேதி. ஆபதா³ஸூதி ப⁴மராதீ³ஹி அனுப³ந்தே⁴ஸு.

நஹானஸிக்கா²பத³வண்ணனா நிட்டி²தா.

8. து³ப்³ப³ண்ணகரணஸிக்கா²பத³வண்ணனா

லாப⁴ஸத்³தோ³யம் கம்மஸாத⁴னோ ‘‘கோ ப⁴வதா லாபோ⁴ லத்³தோ⁴’’திஆதீ³ஸு விய, ஸோ சேத்த² அதீதகாலிகோதி ஆஹ ‘‘அலப்³பீ⁴தி லபோ⁴’’தி, லத்³த⁴ந்தி அத்தோ². ‘‘லபோ⁴ ஏவ லாபோ⁴’’தி இமினா ஸகத்தே² ணபச்சயோதி த³ஸ்ஸேதி. கிம் அலப்³பீ⁴தி கிம் லத்³த⁴ம். நவந்தி அபி⁴னவம். ஏத்தாவதா ச நவஞ்ச தம் சீவரஞ்சாதி நவசீவரம், நவசீவரம் லாபோ⁴ ஏதேனாதி நவசீவரலாபோ⁴தி ஏவமேத்த² ஸமாஸோ த³ட்ட²ப்³போ³தி. யதி³ ஏவம் கத²ம் ‘‘நவம் சீவரலாபே⁴னா’’தி வுத்தந்தி ஆஹ ‘‘இதி நவசீவரலாபே⁴னா’’திஆதி³. ஏத்த² ச ‘‘விகப்பனுபக³ம் பச்சி²ம’’ந்தி ந வுத்தத்தா சீவரந்தி யம் நிவாஸேதும் வா பாருபிதும் வா ஸக்கா ஹோதி, ததே³வ வேதி³தப்³ப³ந்தி ஆஹ ‘‘நிவாஸனபாருபனுபக³ம் சீவர’’ந்தி. ‘‘து³ப்³ப³ண்ணகரணம் ஆதா³தப்³ப³’’ந்தி ஏதம் கப்பபி³ந்து³ம் ஸந்தா⁴ய வுத்தம், ந நீலாதீ³ஹி ஸகலசீவரம் து³ப்³ப³ண்ணகரணம், தஞ்ச பன கப்பம் ஆதி³யந்தேன சீவரம் ரஜித்வா சதூஸு வா கோணேஸு, தீஸு வா த்³வீஸு வா ஏகஸ்மிம் வா கோணே மோரஸ்ஸ அக்கி²மண்ட³லமத்தம் வா மங்கு³லபிட்டி²மத்தம் வா ஆதா³தப்³ப³ந்தி ஆஹ ‘‘தஸ்ஸா’’திஆதி³. கம்ஸனீலேனாதி சம்மகாரனீலேன. மஹாபச்சரியம் பன ‘‘அயோமலம் லோஹமலம், ஏதம் கம்ஸனீலம் நாமா’’தி (பாசி. அட்ட². 368) வுத்தம். பத்தனீலேனாதி யேன கேனசி நீலவண்ணேன பண்ணரஸேன. கப்பபி³ந்து³ம் ஆதி³யித்வாதி வட்டம் ஏகம் கப்பபி³ந்து³ம் ஆதி³யித்வா.

பாளிகப்பகண்ணிககப்பாத³யோ பன ஸப்³ப³ட்ட²கதா²ஸு படிஸித்³தா⁴. அக்³க³ளாதீ³னி கப்பகதசீவரே பன பச்சா² ஆரோபேத்வா கப்பகரணகிச்சம் நத்தீ²தி ஆஹ ‘‘பச்சா² ஆரோபிதேஸூ’’திஆதி³. அக்³க³ளஅனுவாதபரிப⁴ண்டே³ஸூதி உத்³த⁴ரித்வா அல்லியாபனகக²ண்ட³பிட்டி²அனுவாதகுச்சி²அனுவாதேஸு. கிரியாகிரியந்தி நிவாஸனபாருபனதோ, கப்பஸ்ஸ அனாதா³னதோ கிரியாகிரியம்.

து³ப்³ப³ண்ணகரணஸிக்கா²பத³வண்ணனா நிட்டி²தா.

9. விகப்பனஸிக்கா²பத³வண்ணனா

ஸம்முகே²ன விகப்பனா ஸம்முக²விகப்பனா. பரம்முகே²ன விகப்பனா பரம்முக²விகப்பனா. ஸன்னிஹிதாஸன்னிஹிதபா⁴வந்தி ஆஸன்னதூ³ரபா⁴வம். ஆஸன்னதூ³ரபா⁴வோ ச அதி⁴ட்டா²னே வுத்தனயேனேவ வேதி³தப்³போ³.

மித்தோதி த³ள்ஹமித்தோ. ஸந்தி³ட்டோ²தி தி³ட்ட²மத்தோ நாதித³ள்ஹமித்தோ. அகதபச்சுத்³தா⁴ரந்தி ‘‘மய்ஹம் ஸந்தகம் பரிபு⁴ஞ்ஜ வா விஸ்ஸஜ்ஜேஹி வா’’திஆதி³னா அகதபச்சுத்³தா⁴ரம். யேன வினயகம்மம் கதந்தி யேன ஸத்³தி⁴ம் வினயகம்மம் கதம்.

பரிபோ⁴கே³ன காயகம்மம், அபச்சுத்³தா⁴ராபனேன வசீகம்மந்தி ஆஹ ‘‘ஸமுட்டா²னாதீ³னி பட²மகதி²னஸதி³ஸானேவா’’தி. கிரியாகிரியந்தி ஏத்த² பரிபு⁴ஞ்ஜனம் கிரியம். அபச்சுத்³தா⁴ராபனம் அகிரியம்.

விகப்பனஸிக்கா²பத³வண்ணனா நிட்டி²தா.

10. அபனிதா⁴னஸிக்கா²பத³வண்ணனா

அதி⁴ட்டா²னுபக³ந்தி அதி⁴ட்டா²னயோக்³க³ம் அயோபத்தஞ்சேவ மத்திகாபத்தஞ்ச. ஸூகரந்தகம் நாம குஞ்சிகாகோஸோ விய அந்தோ ஸுஸிரம் கத்வா கோட்டிதம்.

அஞ்ஞம் பரிக்கா²ரந்தி பாளியா அனாக³தபத்தத்த²விகாதி³ம். த⁴ம்மகத²ம் கத்வாதி ‘‘ஸமணேன நாம அனிஹிதபரிக்கா²ரேன ப⁴விதும் ந வட்டதீ’’தி ஏவம் ‘‘த⁴ம்மகத²ம் கதே²த்வா த³ஸ்ஸாமீ’’தி நிக்கி²பதோ அனாபத்தி.

அபனிதா⁴னஸிக்கா²பத³வண்ணனா நிட்டி²தா.

ஸுராபானவக்³கோ³ ச²ட்டோ².