5. அசேலகவக்³கோ³

1. அசேலகஸிக்கா²பத³வண்ணனா

அசேலகஸ்ஸாதி யஸ்ஸ கஸ்ஸசி பப்³ப³ஜ்ஜாஸமாபன்னஸ்ஸ நக்³க³ஸ்ஸ. பரிப்³பா³ஜகஸ்ஸாதி ட²பேத்வா பி⁴க்கு²ஞ்ச ஸாமணேரஞ்ச அவஸேஸஸ்ஸ யஸ்ஸ கஸ்ஸசி பப்³ப³ஜ்ஜாஸமாபன்னஸ்ஸ. பரிப்³பா³ஜிகாயாதி ட²பேத்வா பி⁴க்கு²னிம், ஸிக்க²மானம், ஸாமணேரிஞ்ச அவஸேஸாய யாய காயசி பப்³ப³ஜ்ஜாஸமாபன்னாய. ஏதே ச ஸப்³பே³ அஞ்ஞதித்தி²யா வேதி³தப்³பா³. தேனாஹ ‘‘ஏதேஸம் அசேலகாதீ³னம் அஞ்ஞதித்தி²யான’’ந்தி.

தேஸந்தி அஞ்ஞதித்தி²யானம். பா⁴ஜனம் நிக்கி²பித்வாதி ஆமிஸப⁴ரிதம் பா⁴ஜனம் நிக்கி²பித்வா. பா³ஹிராலேபந்தி தேலாதி³ம்.

அசேலகாத³யோ யஸ்மா, தித்தி²யாவ மதா இத⁴;

தஸ்மா தித்தி²யனாமேன, திகச்சே²தோ³ கதோ தயோ.

அதித்தி²யஸ்ஸ நக்³க³ஸ்ஸ, ததா² தித்தி²யலிங்கி³னோ;

க³ஹட்ட²ஸ்ஸாபி பி⁴க்கு²ஸ்ஸ, கப்பதீதி வினிச்ச²யோ.

அதித்தி²யஸ்ஸ சித்தேன, தித்தி²யஸ்ஸ ச லிங்கி³னோ;

ஸோதாபன்னாதி³னோ தா³தும், கப்பதீதீத⁴ நோ மதி.

அசேலகஸிக்கா²பத³வண்ணனா நிட்டி²தா.

2. உய்யோஜனஸிக்கா²பத³வண்ணனா

கா³மம் வா நிக³மம் வாதி ஏத்த² நக³ரம்பி கா³மக்³க³ஹணேனேவ க³ஹிதந்தி த³ட்ட²ப்³ப³ம். பவிஸிஸ்ஸாமாதி ஏத்த² க³ஹேத்வா ‘‘க³ந்த்வா’’தி பாட²ஸேஸோ, அஸமன்னாஹாரோ வா தஸ்ஸா இத்தி²யா தஸ்மிம் கா³மே ஸன்னிஹிதபா⁴வம் அஜானந்தோ வா ‘‘ஏஹாவுஸோ, கா³மம் வா நிக³மம் வா பிண்டா³ய பவிஸிஸ்ஸாமா’’தி பி⁴க்கு²ம் க³ஹேத்வா க³ந்த்வாதி அத்தோ². யம் கிஞ்சி ஆமிஸந்தி யாகு³ஆதி³கம் யம் கிஞ்சி ஆமிஸம். உய்யோஜேய்யாதி அத்தனோ கீளானுரூபம் இத்தி²ம் தி³ஸ்வா உய்யோஜேய்ய பஹிணேய்ய. தேனாஹ ‘‘மாதுகா³மேன ஸத்³தி⁴’’ந்திஆதி³. ஆதி³ஸத்³தே³ன வுத்தாவஸேஸம் காயவசீத்³வாரவீதிக்கமம் ஸங்க³ண்ஹாதி. ‘‘க³ச்சா²’’திஆதீ³னி வத்வாதி ‘‘க³ச்சா²வுஸோ, ந மே தயா ஸத்³தி⁴ம் கதா² வா நிஸஜ்ஜா வா பா²ஸு ஹோதி, ஏககஸ்ஸ மே கதா² வா நிஸஜ்ஜா வா பா²ஸு ஹோதீ’’தி (பாசி. 275) வத்வா. ஏதம் அனாசாரமேவாதி ஏதம் யதா²வுத்தம் ஹஸனாதி³அனாசாரமேவ. ந அஞ்ஞம் பதிரூபம் காரணந்தி ட²பேத்வா வுத்தப்பகாரம் அனாசாரம் உபி⁴ன்னம் ஏகதோ ந யாபனாதி³ம் அஞ்ஞம் பதிரூபகாரணம் பச்சயம் கரித்வா ந ஹோதீதி அத்தோ². அஸ்ஸாதி உய்யோஜகஸ்ஸ. ஸோதி யோ உய்யோஜிதோ, ஸோ.

அனுபஸம்பன்னேதி ஸாமணேரே. ஸோவ இத⁴ அனுபஸம்பன்னோதி அதி⁴ப்பேதோதி வத³ந்தி. உபி⁴ன்னம்பீதி உபஸம்பன்னஸ்ஸ வா அனுபஸம்பன்னஸ்ஸ வாதி த்³வின்னம்பி. கலிஸாஸனாரோபனேதி (பாசி. அட்ட². 277) கலீதி கோதோ⁴, தஸ்ஸ ஸாஸனம் ஆணம் கலிஸாஸனம், தஸ்ஸாரோபனேதி அத்தோ², ‘‘அப்பேவ நாம இமினாபி உப்³பா³ள்ஹோ பக்கமேய்யா’’தி கோத⁴வஸேன டா²னனிஸஜ்ஜாதீ³ஸு தோ³ஸம் த³ஸ்ஸேத்வா ‘‘பஸ்ஸத² போ⁴ இமஸ்ஸ டா²னம் நிஸஜ்ஜம் ஆலோகிதம் விலோகிதம், கா²ணு விய திட்ட²தி, ஸுனகோ² விய நிஸீத³தி, மக்கடோ விய இதோ சிதோ ச விலோகேதீ’’தி ஏவம் அமனாபவசனஸ்ஸ ப⁴ணனேதி வுத்தம் ஹோதி. ஸுத்³த⁴சித்தேன பனேவம் ப⁴ணனே தோ³ஸோ நத்தி². ஏவமாதீ³ஹீதி ஏத்த² ஆதி³ஸத்³தே³ன ‘‘மஹக்³க⁴ம் ப⁴ண்ட³ம் பஸ்ஸித்வா லோப⁴த⁴ம்மம் உப்பாதே³ஸ்ஸதீ’’தி உய்யோஜேதி, ‘‘மாதுகா³மம் பஸ்ஸித்வா அனபி⁴ரதிம் உப்பாதே³ஸ்ஸதீ’’தி உய்யோஜேதி, ‘‘கி³லானஸ்ஸ வா ஓஹிய்யகஸ்ஸ வா விஹாரபாலஸ்ஸ வா யாகு³ம் வா ப⁴த்தம் வா கா²த³னீயம் வா நீஹரா’’தி உய்யோஜேதி, ‘‘ந அனாசாரம் ஆசரிதுகாமோ ஸதி கரணீயே உய்யோஜேதீ’’தி (பாசி. 278) ஏதேஸம் க³ஹணம்.

உய்யோஜனஸிக்கா²பத³வண்ணனா நிட்டி²தா.

3. ஸபோ⁴ஜனஸிக்கா²பத³வண்ணனா

‘‘ஸபோ⁴ஜனே’’தி பா³ஹிரத்த²ஸமாஸோயம், உப⁴ஸத்³தே³ உகாரஸ்ஸ ச லோபோதி ஆஹ ‘‘ஸஹ உபோ⁴ஹி ஜனேஹீ’’திஆதி³. தத்த² உபோ⁴ஹி ஜனேஹீதி ஜாயா ச பதி சாதி உபோ⁴ஹி ஜனேஹி. பு⁴ஞ்ஜிதப்³ப³ந்தி வா போ⁴ஜனம், இத்தீ² ச புரிஸோ ச, தேன ஸஹ வத்ததீதி ஸபோ⁴ஜனந்தி ஆஹ ‘‘அத² வா’’திஆதி³. ராக³பரியுட்டி²தஸ்ஸாதி மேது²னாதி⁴ப்பாயஸ்ஸ. ஸயனிக⁴ரந்தி ஸயனீயக⁴ரம், வாஸகே³ஹந்தி அத்தோ². மஹல்லகஸ்ஸாதி மஹல்லகஸ்ஸ ஸயனிக⁴ரஸ்ஸ. பிட்ட²ஸங்கா⁴டதோதி த்³வாரபா³ஹதோ கு²த்³த³கஸ்ஸ வாதி யதா² ததா² வா கதஸ்ஸ கு²த்³த³கஸ்ஸ ஸயனிக⁴ரஸ்ஸ. வேமஜ்ஜ²ம் அதிக்கமித்வா நிஸீதே³ய்யாதி பிட்டி²வம்ஸம் அதிக்கமித்வா நிஸீதே³ய்ய. கு²த்³த³கம் (ஸாரத்த². டீ. பாசித்திய 3.280) நாம ஸயனிக⁴ரம் வித்தா²ரதோ பஞ்சஹத்த²ப்பமாணம் ஹோதி, தஸ்ஸ ச மஜ்ஜி²மட்டா²னம் பிட்ட²ஸங்கா⁴டதோ அட்³ட⁴தேய்யஹத்த²ப்பமாணமேவ ஹோதி, தஸ்மா தாதி³ஸே ஸயனிக⁴ரே பிட்ட²ஸங்கா⁴டதோ ஹத்த²பாஸம் விஜஹித்வா நிஸின்னோ பிட்டி²வம்ஸம் அதிக்கமித்வா நிஸின்னோ நாம ஹோதி. ஏவம் நிஸின்னோ ச வேமஜ்ஜ²ம் அதிக்கமித்வா நிஸின்னோ நாம ஹோதி. தேன வுத்தம் பாளியம் ‘‘பிட்டி²வம்ஸம் அதிக்கமித்வா நிஸீத³தீ’’தி (பாசி. 281). ஸசித்தகஞ்சேத்த² அனுபவிஸித்வா நிஸீத³னசித்தேன த³ட்ட²ப்³ப³ம்.

ஸபோ⁴ஜனஸிக்கா²பத³வண்ணனா நிட்டி²தா.

4-5. ரஹோபடிச்ச²ன்னரஹோனிஸஜ்ஜஸிக்கா²பத³வண்ணனா

சதுத்த²பஞ்சமஸிக்கா²பதே³ யம் வத்தப்³ப³ம் ஸியா, தம் ஸப்³ப³ம் அனியதத்³வயே வுத்தமேவாதி ஆஹ ‘‘ஸேஸோ கதா²னயோ அனியதத்³வயே வுத்தனயேனேவ வேதி³தப்³போ³’’தி.

ரஹோபடிச்ச²ன்னரஹோனிஸஜ்ஜஸிக்கா²பத³வண்ணனா நிட்டி²தா.

6. சாரித்தஸிக்கா²பத³வண்ணனா

அந்தோஉபசாரஸீமாய த³ஸ்ஸனூபசாரே பி⁴க்கு²ம் தி³ஸ்வாதி யத்த² டி²தஸ்ஸ குலானி பயிருபாஸனசித்தம் உப்பன்னம், ததோ பட்டா²ய க³ச்ச²ந்தோ அந்தோஉபசாரஸீமாய த³ஸ்ஸனூபசாரே பி⁴க்கு²ம் பஸ்ஸே வா அபி⁴முகே² வா தி³ஸ்வா. பகதிவசனேனாதி யம் த்³வாத³ஸஹத்த²ப்³ப⁴ந்தரே டி²தேன ஸோதும் ஸக்கா, தாதி³ஸேன வசனேன, இதோ சிதோ ச பரியேஸித்வா ஆரோசனகிச்சம் பன நத்தி². யோ ஹி ஏவம் பரியேஸிதப்³போ³, ஸோ அஸந்தோயேவ. தேனாஹ ‘‘தாதி³ஸ’’ந்திஆதி³. அனாபுச்சி²த்வாதி அனாரோசேத்வா.

அந்தராராமபி⁴க்கு²னுபஸ்ஸயதித்தி²யஸேய்யபடிக்கமனப⁴த்தியக⁴ரானீதி ஏத்த² அந்தராராமந்தி அந்தோகா³மே விஹாரோ. படிக்கமனந்தி ஆஸனஸாலா. ப⁴த்தியக⁴ரந்தி நிமந்திதக⁴ரம் வா ஸலாகப⁴த்தாதி³தா³யகானம் வா க⁴ரம். ஆபதா³ஸூதி ஜீவிதப்³ரஹ்மசரியந்தராயேஸு. கிரியாகிரியந்தி ஏத்த² குலேஸு சாரித்தாபஜ்ஜனம் கிரியம், அனாபுச்ச²னம் அகிரியந்தி வேதி³தப்³ப³ம்.

சாரித்தஸிக்கா²பத³வண்ணனா நிட்டி²தா.

7. மஹானாமஸிக்கா²பத³வண்ணனா

ஸப்³ப³ஞ்சேதம் வத்து²வஸேன வுத்தந்தி ‘‘அகி³லானேன பி⁴க்கு²னா சதுமாஸபச்சயபவாரணா ஸாதி³தப்³பா³ அஞ்ஞத்ர புனபவாரணாய அஞ்ஞத்ர நிச்சபவாரணாயா’’தி (பாசி. 306) ஏதம் ஸப்³ப³ம் ஸிக்கா²பத³னிதா³னஸங்கா²தஸ்ஸ வத்து²னோ வஸேன வுத்தம். தத்த² ஹி மஹானாமேன ஸக்கேன ‘‘இச்சா²மஹம், ப⁴ந்தே, ஸங்க⁴ம் சதுமாஸம் பே⁴ஸஜ்ஜேன பவாரேது’’ந்திஆதி³னா (பாசி. 303) உஸ்ஸன்னுஸ்ஸன்னேன ச பே⁴ஸஜ்ஜேன சதுமாஸம் புன நிச்சம் பவாரணா கதா, தஸ்மா ப⁴க³வதா தஸ்ஸ வஸேன ஏவம் வுத்தந்தி வுத்தம் ஹோதி. அஞ்ஞத்ர புனபவாரணாயாதி யதி³ புனபவாரணா அத்தி², தம் ட²பேத்வா. அஞ்ஞத்ர நிச்சபவாரணாயாதி ஏத்தா²பி ஏஸேவ நயோ. யதி³ பன தாபி அத்தி², ஸாதி³தப்³பா³வாதி அதி⁴ப்பாயோ. தேனாஹ ‘‘அயம் பனேத்த² அத்தோ²’’திஆதி³. தத்தா²தி திஸ்ஸம் பவாரணாயம். பே⁴ஸஜ்ஜேஹி வா பரிச்சே²தோ³ கதோ ஹோதீதி ‘‘ஸப்பி தேல’’ந்தி ஏவமாதி³னா நாமவஸேன வா ‘‘பத்தே²ன நாளியா ஆள்ஹகேனா’’திஆதி³னா பரிமாணவஸேன வா ‘‘ஏத்தகானி வா பே⁴ஸஜ்ஜானி விஞ்ஞாபேதப்³பா³னீ’’தி பே⁴ஸஜ்ஜேஹி பரிச்சே²தோ³ கதோ ஹோதி. நபே⁴ஸஜ்ஜகரணீயேதி மிஸ்ஸகப⁴த்தேனாபி சே யாபேதும் ஸக்கோதி, நபே⁴ஸஜ்ஜகரணீயம் நாம ஹோதி. அஞ்ஞம் பே⁴ஸஜ்ஜந்தி ஸப்பினா பவாரிதோ தேலம், ஆள்ஹகேன பவாரிதோ தோ³ணம்.

யதா²பூ⁴தம் ஆசிக்கி²த்வாதி ‘‘இமேஹி தயா பே⁴ஸஜ்ஜேஹி பவாரிதம்ஹா, அம்ஹாகஞ்ச இமினா ச இமினா ச பே⁴ஸஜ்ஜேன அத்தோ², யாஸு தயா ரத்தீஸு பவாரிதம்ஹா, தா ரத்தியோ வீதிவத்தா, அம்ஹாகஞ்ச பே⁴ஸஜ்ஜேன அத்தோ²’’தி யதா²பூ⁴தம் ஆரோசேத்வா. ஏவஞ்ச விஞ்ஞாபேதும் கி³லானோவ லப⁴தி, ந இதரோ.

மஹானாமஸிக்கா²பத³வண்ணனா நிட்டி²தா.

8. உய்யுத்தஸேனாஸிக்கா²பத³வண்ணனா

சதுரங்கி³னிந்தி ஹத்தி²அஸ்ஸரத²பத்தீதி சத்தாரி அங்கா³னி ஏதிஸ்ஸாதி சதுரங்கி³னீ, தம் சதுரங்கி³னிம். ‘‘த்³வாத³ஸபுரிஸோ ஹத்தீ², திபுரிஸோ அஸ்ஸோ, சதுபுரிஸோ ரதோ², சத்தாரோ புரிஸா ஸரஹத்தா² பத்தீ’’தி (பாசி. 314) அயம் பச்சி²மகோடியா சதுரங்க³ஸமன்னாக³தா ஸேனா நாம, ஈதி³ஸம் ஸேனந்தி அத்தோ². தம் பன விஜஹித்வாதி கேனசி அந்தரிதா வா நின்னம் ஓருள்ஹா வா ந தி³ஸ்ஸதி, இத⁴ ட²த்வான ஸக்கா த³ட்டு²ந்தி தம் த³ஸ்ஸனூபசாரம் விஜஹித்வா அஞ்ஞம் டா²னம் க³ந்த்வா.

ஸேனாத³ஸ்ஸனவத்து²ஸ்மிந்தி ஸேனம் த³ஸ்ஸனாய க³மனவத்து²ஸ்மிம். அயமேவ வா பாடோ². ஹத்தி²ஆதீ³ஸு ஏகமேகந்தி ஹத்தி²ஆதீ³ஸு சதூஸு அங்கே³ஸு ஏகமேகம், அந்தமஸோ ஏகபுரிஸாருள்ஹஹத்தி²ம்பி ஏகம்பி ஸரஹத்த²ம் புரிஸந்தி அத்தோ². அனுய்யுத்தா நாம ராஜா உய்யானம் வா நதி³ம் வா க³ச்ச²தி, ஏவம் அனுய்யுத்தா ஹோதி. ததா²ரூபப்பச்சயேதி ‘‘மாதுலோ ஸேனாய கி³லானோ ஹோதீ’’திஆதி³கே (பாசி. 312) அனுரூபகாரணே ஸதி. ஆபதா³ஸூதி ஜீவிதப்³ரஹ்மசரியந்தராயேஸு ‘‘ஏத்த² க³தோ முச்சிஸ்ஸாமீ’’தி க³ச்ச²தோ அனாபத்தி.

உய்யுத்தஸேனாஸிக்கா²பத³வண்ணனா நிட்டி²தா.

9. ஸேனாவாஸஸிக்கா²பத³வண்ணனா

படிஸேனாருத்³தா⁴யாதி யதா² ஸஞ்சாரோ சி²ஜ்ஜதி, ஏவம் படிஸேனாய ருத்³தா⁴ய ஸேனாய. கேனசி பலிபு³த்³த⁴ஸ்ஸாதி வேரிகேன வா இஸ்ஸரேன வா கேனசி ருத்³த⁴ஸ்ஸ.

ஸேனாவாஸஸிக்கா²பத³வண்ணனா நிட்டி²தா.

10. உய்யோதி⁴கஸிக்கா²பத³வண்ணனா

ஸம்பஹாரட்டா²னஸ்ஸாதி யுத்³த⁴பூ⁴மியா. ப³லஸ்ஸ அக்³க³ம் ஜானந்தீதி ‘‘ஏத்தகா ஹத்தீ², ஏத்தகா அஸ்ஸா, ஏத்தகா ரதா², ஏத்தகா பத்தீ’’தி (பாசி. 324) ப³லஸ்ஸ கோட்டா²ஸம் ஜானந்தி. ‘‘அனுஜானாமி, பி⁴க்க²வே, விஹாரக்³கே³னா’’திஆதீ³ஸு (சூளவ. 318) விய கோட்டா²ஸத்தோ² ஹேத்த² அக்³க³ஸத்³தோ³. தேனாஹ ‘‘ப³லக³ணனட்டா²னந்தி அத்தோ²’’தி. ஸேனாய வியூஹந்தி ‘‘இதோ ஹத்தீ² ஹோந்து, இதோ அஸ்ஸா ஹோந்து, இதோ ரதா² ஹோந்து, இதோ பத்தீ ஹோந்தூ’’தி (பாசி. 324) ஸேனாய ட²பனம், ராஸிம் கத்வா ட²பனந்தி அத்தோ². தேனாஹ ‘‘ஸேனாஸன்னிவேஸஸ்ஸேதம் நாம’’ந்தி. த்³வாத³ஸபுரிஸோ ஹத்தீ²தி சத்தாரோ ஆரோஹகா, ஏகேகபாத³ரக்க²கா த்³வே த்³வேதி ஏவம் த்³வாத³ஸபுரிஸோ ஹத்தீ². திபுரிஸோ அஸ்ஸோதி ஏகோ ஆரோஹகோ, த்³வே பாத³ரக்க²காதி ஏவம் திபுரிஸோ அஸ்ஸோ. சதுபுரிஸோ ரதோ²தி ஏகோ ஸாரதி², ஏகோ யோதோ⁴, த்³வே ஆணிரக்க²காதி ஏவம் சதுபுரிஸோ ரதோ²தி.

உய்யோதி⁴கஸிக்கா²பத³வண்ணனா நிட்டி²தா.

அசேலகவக்³கோ³ பஞ்சமோ.