5. பட²மபவாரணாஸிக்கா²பத³வண்ணனா

பு⁴த்தவாதி கதப⁴த்தகிச்சோ. ஸாஸபமத்தம்பி அஜ்ஜோ²ஹரிதந்தி ஏவம் பரித்தம்பி போ⁴ஜனம் ஸங்கா²தி³த்வா வா அஸங்கா²தி³த்வா வா கி³லிதம். பவாரிதோதி படிக்கே²பிதோ. யோ ஹி பு⁴ஞ்ஜந்தோ பரிவேஸகேன உபனீதம் போ⁴ஜனம் அனிச்ச²ந்தோ படிக்கி²பதி, ஸோ தேன பவாரிதோ படிக்கி²பிதோ நாம ஹோதி. ப்³யஞ்ஜனம் பன அனாதி³யித்வா அத்த²மத்தமேவ த³ஸ்ஸேதும் ‘‘கதப்பவாரணோ கதப்படிக்கே²போதி அத்தோ²’’தி வுத்தம். ஸோபி ச படிக்கே²போ யஸ்மா ந படிக்கே²பமத்தேன, அத² கோ² பஞ்சங்க³வஸேன. தேனஸ்ஸ பத³பா⁴ஜனே ‘‘அஸனம் பஞ்ஞாயதீ’’திஆதி³ (பாசி. 239) வுத்தம்.

போ⁴ஜனம் பஞ்ஞாயதீதி பஞ்சன்னம் போ⁴ஜனானம் அஞ்ஞதரம் பத்தாதீ³ஸு தி³ஸ்ஸதி. தேனாஹ ‘‘பவாரணப்பஹோனகம் சே போ⁴ஜன’’ந்திஆதி³. ஸாலீதி (பாசி. அட்ட². 238-239) அந்தமஸோ நீவாரம் உபாதா³ய ஸப்³பா³பி ஸாலிஜாதி. வீஹீதி ஸப்³பா³பி வீஹிஜாதி. யவகோ³து⁴மேஸு பே⁴தோ³ நத்தி². கங்கூ³தி ஸேதரத்தகாளபே⁴தா³ ஸப்³பா³பி கங்கு³ஜாதி. வரகோதி அந்தமஸோ வரகசோரகம் உபாதா³ய ஸப்³பா³பி ஸேதவண்ணா வரகஜாதி. குத்³ரூஸகோதி காளகோத்³ரவோ சேவ ஸாமாகாதி³பே⁴தா³ ச ஸப்³பா³பி திணத⁴ஞ்ஞஜாதி.

நீவாரவரகசோரகா சேத்த² ‘‘த⁴ஞ்ஞானுலோமா’’தி வத³ந்தி. யாகு³ந்தி அம்பி³லயாகு³கீ²ரயாகு³ஆதி³பே⁴த³ம் யம் கிஞ்சி யாகு³ம். இமினாவ பாயாஸஸ்ஸாபி க³ஹிதத்தா ‘‘அம்பி³லபாயாஸாதீ³ஸு அஞ்ஞதரம் பசாமாதி வா’’தி ந வுத்தம். பவாரணம் ஜனேதீதி அனதிரித்தபோ⁴ஜனாபத்தினிப³ந்த⁴னம் படிக்கே²பம் ஸாதே⁴தி. ஸசே பன ஓதி⁴ ந பஞ்ஞாயதி, யாகு³ஸங்க³ஹம் க³ச்ச²தி, பவாரணம் ந ஜனேதி. புன பவாரணம் ஜனேதி க⁴னபா⁴வக³மனதோ பட்டா²ய போ⁴ஜனஸங்க³ஹிதத்தாதி அதி⁴ப்பாயோ.

உத³ககஞ்ஜிககீ²ராதீ³னி ஆகிரித்வாதி உத³கஞ்சேவ கஞ்ஜிகஞ்ச கீ²ராதீ³னி ச ஆகிரித்வா தேஹி ஸத்³தி⁴ம் அமத்³தி³த்வா ப⁴த்தமிஸ்ஸகே கத்வா. தேனாஹ ‘‘யாகு³ம் க³ண்ஹதா²’’திஆதி³. ஸசே பன ப⁴த்தே உத³ககஞ்ஜிககீ²ராதீ³னி ஆகிரித்வா மத்³தி³த்வா ‘‘யாகு³ம் க³ண்ஹதா²’’தி தே³ந்தி, பவாரணா ந ஹோதி. யாகு³யாபீதி ஏவம் யாகு³ஸங்க³ஹம் க³தாய வா அஞ்ஞாய வா யாகு³யாபி. ஸுத்³த⁴ரஸகோ, பன ரஸகயாகு³ வா ந ஜனேதி.

பஞ்சன்னம் போ⁴ஜனானம் அஞ்ஞதரவஸேன விப்பகதபோ⁴ஜனபா⁴வஸ்ஸ உபச்சி²ன்னத்தா ‘‘த்³வேபி கா²தி³தானி ஹோந்தி…பே… ந பவாரேதீ’’தி வுத்தம். அகப்பியமம்ஸம் (பாசி. அட்ட². 238-239), அகப்பியபோ⁴ஜனஞ்ச பு³த்³த⁴படிகுட்ட²ம் படிக்கி²பதோ பவாரணாய அவத்து²தாய ந பவாரணா ஹோதீதி ஆஹ ‘‘யோ பனா’’திஆதி³. யஞ்ஹி பி⁴க்கு²னோ கா²தி³தும் வட்டதி, தம் ஏவ படிக்கி²பதோ பவாரணா ஹோதி. இத³ம் பன ஜானந்தோ அகப்பியத்தா படிக்கி²பதி. அஜானந்தோபி படிக்கி²பிதப்³ப³ட்டா²னே டி²தமேவ படிக்கி²பதி நாம, தஸ்மா ந பவாரேதி. ஸசே பன அகப்பியமம்ஸம் கா²த³ந்தோ கப்பியமம்ஸம் வா போ⁴ஜனம் வா படிக்கி²பதி, பவாரேதி. கஸ்மா? வத்து²தாய. யஞ்ஹி தேன படிக்கி²த்தம், தம் பவாரணாய வத்து². யம் பன கா²த³தி, தம் கிஞ்சாபி படிக்கி²பிதப்³ப³ட்டா²னே டி²தம், கா²தி³யமானம் பன மம்ஸபா⁴வம் ந ஜஹதி, தஸ்மா பவாரேதி. கோ பன வாதோ³ கப்பியமம்ஸம் கா²த³தோ கப்பியமம்ஸபோ⁴ஜனப்படிக்கே²பே. ஏஸ நயோ அகப்பியபோ⁴ஜனம் கா²த³தோ கப்பியபோ⁴ஜனப்படிக்கே²பே.

போ⁴ஜனே ஸதீதி பஞ்சஸு போ⁴ஜனேஸு ஏகஸ்மிம்பி போ⁴ஜனே ஸதி. அஞ்ஞம் வுத்தலக்க²ணம் போ⁴ஜனந்தி பத்தாதி³க³ததோ அஞ்ஞம் வுத்தலக்க²ணம் பஞ்சஸு போ⁴ஜனேஸு ஏகம்பி போ⁴ஜனம். ‘‘நிரபேக்கோ² ஹோதீ’’தி ஏதஸ்ஸேவ விவரணம் ‘‘யம் பத்தாதீ³ஸூ’’திஆதி³. ந கேவலம் நிரபேக்கோ² வாதி ஆஹ ‘‘அஞ்ஞத்ர வா’’திஆதி³. ஸோ படிக்கி²பந்தோபி ந பவாரேதீதி தஸ்மிம் சே அந்தரே அஞ்ஞம் போ⁴ஜனம் அபி⁴ஹடம், தம் ஸோ படிக்கி²பந்தோபி ந பவாரேதி. கஸ்மா? விப்பகதபோ⁴ஜனபா⁴வஸ்ஸ உபச்சி²ன்னத்தா.

‘‘உபனாமேதீ’’தி (பாசி. அட்ட². 238-239) இமினா காயாபி⁴ஹாரம் த³ஸ்ஸேதி. ஹத்தே² வா ஆதா⁴ரகே வாதி ஏத்த² வா-ஸத்³தோ³ அவுத்தவிகப்பத்தோ², தேன ‘‘ஊரூஸு வா’’தி விகப்பேதி. தூ³ரே நிஸின்னஸ்ஸ த³ஹரபி⁴க்கு²ஸ்ஸ பத்தம் பேஸேத்வா ‘‘இதோ ஓத³னம் க³ண்ஹாஹீ’’தி வத³தி, க³ண்ஹித்வா பன க³தோ துண்ஹீ திட்ட²தி, தம்பி படிக்கி²பதோ ஏஸேவ நயோ. கஸ்மா? பி⁴க்கு²ஸ்ஸ தூ³ரபா⁴வதோ, தூ³தஸ்ஸ ச அனபி⁴ஹரணதோ. ஸசே பன க³ஹேத்வா ஆக³தோ பி⁴க்கு² ‘‘இமம் ப⁴த்தம் க³ண்ஹா’’தி வத³தி, தம் படிக்கி²பதோ பவாரணா ஹோதி. ஏவம் வுத்தேபீதி ‘‘ப⁴த்தம் க³ண்ஹா’’தி வுத்தேபி.

ப⁴த்தபச்சி²ம் க³ஹேத்வா பரிவிஸந்தஸ்ஸாதி ஏகேன ஹத்தே²ன ப⁴த்தபச்சி²ம் க³ஹேத்வா ஏகேன ஹத்தே²ன கடச்சு²ம் க³ஹேத்வா பரிவிஸந்தஸ்ஸ. அஞ்ஞோ ‘‘அஹம் தா⁴ரேஸ்ஸாமீ’’தி க³ஹிதமத்தகமேவ கரோதீதி அஞ்ஞோ ஆக³ந்த்வா ‘‘அஹம் பச்சி²ம் தா⁴ரேஸ்ஸாமி, த்வம் ஓத³னம் தே³ஹீ’’தி வத்வா க³ஹிதமத்தகமேவ கரோதி. அபி⁴ஹடாவ ஹோதீதி பரிவேஸகேனேவ அபி⁴ஹடாவ ஹோதி. இதா³னி அஸதி தஸ்ஸ தா³துகாமாபி⁴ஹாரே க³ஹணஸமயேபி படிக்கி²பதோ ந ஹோதீதி த³ஸ்ஸேதும் ‘‘ஸசே பனா’’திஆதி³ வுத்தம். உத்³த⁴டேதி உத்³த⁴டே ப⁴த்தே. கடச்சு²அபி⁴ஹாரோயேவ ஹி தஸ்ஸ அபி⁴ஹாரோதி அதி⁴ப்பாயோ. அனந்தரஸ்ஸ தி³ய்யமானேதி அனந்தரஸ்ஸ பி⁴க்கு²னோ ப⁴த்தே தி³ய்யமானே. காயவிகாரேனாதி ‘‘அங்கு³லிம் வா ஹத்த²ம் வா மச்சி²கபீ³ஜனிம் வா சீவரகண்ணம் வா சாலேதி, ப⁴முகாய வா ஆகாரம் கரோதி, குத்³தோ⁴ வா ஓலோகேதீ’’தி (பாசி. அட்ட². 238-239) ஏவம் வுத்தேன அங்கு³லிசலனாதி³னா காயவிகாரேன. ‘‘அலம் மா தே³ஹீ’’திஆதி³னா வசீவிகாரேனாதி ‘‘அல’’ந்தி வா ‘‘ந க³ண்ஹாமீ’’தி வா ‘‘மா ஆகிரா’’தி வா ‘‘அபக³ச்சா²’’தி வா ஏவம் யேன கேனசி வசீவிகாரேன.

அபி⁴ஹடே பன ப⁴த்தே பவாரணாய பீ⁴தோ ஹத்தே² அபனேத்வா புனப்புனம் பத்தே ஓத³னம் ஆகிரந்தம் ‘‘ஆகிர ஆகிர, கோட்டேத்வா பூரேஹீ’’தி வத³தோ பவாரணா ந ஹோதி. ஏஸ நயோ ப⁴த்தம் அபி⁴ஹரந்தம் பி⁴க்கு²ம் ஸல்லக்கே²த்வா ‘‘கிம், ஆவுஸோ, இதோபி கிஞ்சி க³ண்ஹிஸ்ஸஸி, த³ம்மி தே கிஞ்சீ’’தி வத³தோபி.

‘‘ரஸம் படிக்³க³ண்ஹதா²’’தி அப்பவாரணாஜனகஸ்ஸ நாமம் க³ஹேத்வா வுத்தத்தா ‘‘தம் ஸுத்வா படிக்கி²பதோ பவாரணா நத்தீ²’’தி வுத்தம். மம்ஸரஸந்தி ஏத்த² பன ந கேவலம் மம்ஸஸ்ஸ ரஸம் ‘‘மம்ஸரஸ’’மிச்சேவ விஞ்ஞாயதி, அத² கோ² மம்ஸஞ்ச ரஸஞ்ச மம்ஸரஸந்தி ஏவம் பவாரணாஜனகனாமவஸேனாபி. தஸ்மா தம் படிக்கி²பதோ பவாரணாவ ஹோதீதி ஆஹ ‘‘மம்ஸரஸந்தி வுத்தே பன படிக்கி²பதோ பவாரணா ஹோதீ’’தி. பரதோ மச்ச²மம்ஸம் ப்³யஞ்ஜனந்தி ஏத்தா²பி ஏஸேவ நயோ. யஸ்மிம் இரியாபதே² பவாரேதி, தம் அவிகோபேந்தேனேவ பு⁴ஞ்ஜிதப்³ப³ந்தி யோ க³ச்ச²ந்தோ (பாசி. அட்ட². 238-239) பவாரேதி, தேன க³ச்ச²ந்தேனேவ பு⁴ஞ்ஜிதப்³ப³ம். கத்³த³மம் வா உத³கம் வா பத்வா டி²தேன அதிரித்தம் காரேதப்³ப³ம். ஸசே அந்தரா நதீ³ பூரா ஹோதி, நதி³தீரே கு³ம்ப³ம் அனுபரியாயந்தேன பு⁴ஞ்ஜிதப்³ப³ம். அத² நாவா வா ஸேது வா அத்தி², தம் அபி⁴ருஹித்வாபி சங்கமந்தேனேவ பு⁴ஞ்ஜிதப்³ப³ம், க³மனம் ந உபச்சி²ந்தி³தப்³ப³ம். ஏஸ நயோ இதரஇரியாபதே²ஸுபி. தம் தம் இரியாபத²ம் கோபேந்தேன அதிரித்தம் காரேதப்³ப³ம். யோ உக்குடிகோவ நிஸீதி³த்வா பவாரேதி, தேன உக்குடிகேனேவ பு⁴ஞ்ஜிதப்³ப³ம். தஸ்ஸ பன ஹேட்டா² பலாலபீட²ம் வா கிஞ்சி வா நிஸீத³னம் தா³தப்³ப³ம். பீட²கே நிஸீதி³த்வா பவாரிதேன பன ஆஸனம் அசாலேத்வாவ சதஸ்ஸோ தி³ஸா பரிவத்தந்தேன பு⁴ஞ்ஜிதும் லப்³ப⁴தி. மஞ்சே நிஸீதி³த்வா பவாரிதேன இதோ வா ஏத்தோ வா ஸம்ஸரிதும் ந லப்³ப⁴தி. ஸசே பன ஸஹ மஞ்சேன உக்கி²பித்வா அஞ்ஞத்ர நேந்தி, வட்டதி. நிபஜ்ஜித்வா பவாரிதேனாபி நிபன்னேனேவ பு⁴ஞ்ஜிதப்³ப³ம். பரிவத்தந்தேன யேன பஸ்ஸேன நிபன்னோ, தஸ்ஸ டா²னம் நாதிக்கமேதப்³ப³ம்.

அலமேதம் ஸப்³ப³ந்தி ஏதம் ஸப்³ப³ம் அலம் பரியத்தம், இத³ம்பி தே அதி⁴கம், இதோ அஞ்ஞம் ந லச்ச²ஸீதி அதி⁴ப்பாயோ. யோ அதிரித்தம் கரோதீதி யோ ‘‘அலமேதம் ஸப்³ப³’’ந்தி அதிரித்தம் கரோதி. படிபக்க²னயேனாதி ‘‘கப்பியகதம், படிக்³க³ஹிதகதம், உச்சாரிதகதம், ஹத்த²பாஸே கதம், பு⁴த்தாவினா கதம், பு⁴த்தாவினா பவாரிதேன ஆஸனா அவுட்டி²தேன கதம் ‘அலமேதம் ஸப்³ப³’ந்தி வுத்த’’ந்தி (பாசி. 239) இமேஹி ஸத்தஹி வினயகம்மாகாரேஹி யம் அதிரித்தம் கப்பியம் கதம், யஞ்ச கி³லானாதிரித்தம், தது³ப⁴யம்பி அதிரித்தந்தி ஏவம் தஸ்ஸேவ படிபக்க²னயேன. ஏத்த² ச ‘‘அலமேதம் ஸப்³ப³’’ந்தி திக்க²த்தும் வத்தப்³ப³ம், அயம் கிர ஆசிண்ணோ. வினயத⁴ரா பன ‘‘ஸகிம் ஏவ வத்தப்³ப³’’ந்தி வத³ந்தி.

கஸ்மா தம் ஸோ புன காதும் ந லப⁴தீதி ஆஹ ‘‘யஞ்ஹீ’’திஆதி³. தத்த² யஞ்ஹி அகதந்தி யேன பட²மம் கப்பியம் கதம், தேன யம் அகதம், தம் காதப்³ப³ம். பட²மபா⁴ஜனே பன காதும் ந லப்³ப⁴தி. யேன ச அகதந்தி அஞ்ஞேன பி⁴க்கு²னா யேன பட²மம் ந கதம், தேன ச காதப்³ப³ந்தி அத்தோ². வுத்தந்தி ஸீஹளட்ட²கதா²ஸு வுத்தம். அஞ்ஞஸ்மிம் பன பா⁴ஜனேதி யஸ்மிம் பன பா⁴ஜனே பட²மம் கதம், ததோ அஞ்ஞஸ்மிம் பத்தே வா குண்டே³ வா பச்சி²யம் வா யத்த² கத்த²சி புரதோ ட²பேத்வா ஓனாமிதபா⁴ஜனே.

அஞ்ஞத்ர பு⁴ஞ்ஜனவத்து²ஸ்மிந்தி பு⁴த்தாவினா பவாரிதேன ஹுத்வா அஞ்ஞத்ர பு⁴ஞ்ஜனவத்து²ஸ்மிம். திகபாசித்தியந்தி அனதிரித்தே அனதிரித்தஸஞ்ஞிவேமதிகஅதிரித்தஸஞ்ஞீனம் வஸேன தீணி பாசித்தியானி. அஜ்ஜோ²ஹரதோ ச து³க்கடந்தி அஜ்ஜோ²ஹரதோ அஜ்ஜோ²ஹாரே அஜ்ஜோ²ஹாரே து³க்கடம். ஸசே பன ஆமிஸஸம்ஸட்டா²னி ஹோந்தி, ஆஹாரத்தா²யபி அனாஹாரத்தா²யபி படிக்³க³ஹேத்வா அஜ்ஜோ²ஹரந்தஸ்ஸ பாசித்தியமேவ. தேஸம் அனுஞ்ஞாதபரிபோ⁴க³வஸேனாதி யாமகாலிகாதீ³னம் அனுஞ்ஞாதபரிபோ⁴க³வஸேன, யாமகாலிகம் பிபாஸாய ஸதி பிபாஸச்சே²த³னத்த²ம், ஸத்தாஹகாலிகம் யாவஜீவிகஞ்ச தேன தேன உபஸமேதப்³ப³கே ஆபா³தே⁴ ஸதி தஸ்ஸ உபஸமனத்த²ந்தி வுத்தம் ஹோதி. இத³ம்பி அஜ்ஜோ²ஹரணதோ காயகம்மம், வாசாய ‘‘அதிரித்தம் கரோத² ப⁴ந்தே’’தி அகாராபனேன வசீகம்மந்தி ஆஹ ‘‘ஸமுட்டா²னாதீ³னி பட²மகதி²னஸதி³ஸானேவா’’தி. கிரியாகிரியந்தி ஏத்த² படிக்கி²பித்வா பு⁴ஞ்ஜனம் கிரியம். அதிரித்தஸ்ஸ அகரணம் அகிரியந்தி வேதி³தப்³ப³ம்.

பட²மபவாரணாஸிக்கா²பத³வண்ணனா நிட்டி²தா.