4. போ⁴ஜனவக்³கோ³

1. ஆவஸத²ஸிக்கா²பத³வண்ணனா

‘‘அகி³லானோ’’தி ஏத்த² அந்தமஸோ த்³விகா³வுதம் க³ந்தும் ஸமத்தோ² அதி⁴ப்பேதோதி ஆஹ ‘‘அத்³த⁴யோஜனம்பி க³ந்தும் ஸமத்தே²னா’’தி. ஆவஸத²பிண்டோ³தி ஆவஸதே² பிண்டோ³, ஸாலாதீ³ஸு அனோதி³ஸ்ஸ யாவத³த்த²ம் பஞ்ஞத்தம் பஞ்சன்னம் போ⁴ஜனானம் அஞ்ஞதரம் போ⁴ஜனந்தி அத்தோ². தேனாஹ ‘‘இமேஸம் வா’’திஆதி³. தத்த² இமேஸம் வாதி இமேஸம் பாஸண்டா³னம் வா. ஏத்தகானம் வாதி இமஸ்மிம் பாஸண்டே³ ஏத்தகானம் பாஸண்டா³னம் வா. பாஸண்ட³ந்தி ச²ன்னவுதிவித⁴ம் ஸமணபரிப்³பா³ஜகாதி³ம். தே ஹி தண்ஹாபாஸஞ்சேவ தி³ட்டி²பாஸஞ்ச டே³ந்தி ஓட்³டே³ந்தீதி பாஸண்டா³தி வுச்சந்தி. அனோதி³ஸ்ஸாதி அனுத்³தி³ஸித்வா, அபரிச்சி²ந்தி³த்வாதி அத்தோ². ஸாலாதீ³ஸு யத்த² கத்த²சீதி ஸாலாருக்க²மூலஅப்³போ⁴காஸாதீ³ஸு யத்த² கத்த²சி டா²னேஸு. ஏகதி³வஸமேவ பு⁴ஞ்ஜிதப்³போ³தி ஏகதி³வஸம் ஸகிம்யேவ பு⁴ஞ்ஜிதப்³போ³, ஏகஸ்மிம் தி³வஸே புனப்புனம் பு⁴ஞ்ஜிதும் ந வட்டதி. து³தியதி³வஸதோ பட்டா²யாதி பு⁴த்ததி³வஸஸ்ஸ து³தியதி³வஸதோ பட்டா²ய. அஜ்ஜோ²ஹாரே அஜ்ஜோ²ஹாரே பாசித்தியந்தி ஆலோபே ஆலோபே கப³ளே கப³ளே பாசித்தியம். நானாகுலேஹி (பாசி. அட்ட². 206) பன நானாட்டா²னேஸு பஞ்ஞத்தம், ஏகஸ்மிம் டா²னே ஏகதி³வஸம் பு⁴ஞ்ஜித்வா து³தியதி³வஸே அஞ்ஞத்த² பு⁴ஞ்ஜிதும் வட்டதி, படிபாடிம் பன கே²பேத்வா புன ஆதி³தோ பட்டா²ய பு⁴ஞ்ஜிதும் ந வட்டதி. ஏகபூக³னானாபூக³ஏககா³மனானாகா³மேஸுபி ஏஸேவ நயோ. யோபி ஏககுலஸ்ஸ வா நானாகுலானம் வா ஏகதோ பஞ்ஞத்தோ தண்டு³லாதீ³னம் அபா⁴வேன அந்தரந்தரா சி²ஜ்ஜதி, ஸோபி ந பு⁴ஞ்ஜிதப்³போ³. ஸசே பன ‘‘ந ஸக்கோம தா³து’’ந்தி உபச்சி²ந்தி³த்வா புன கல்யாணசித்தே உப்பன்னே தா³தும் ஆரப⁴ந்தி, ஏதம் புன ஏகதி³வஸம் பு⁴ஞ்ஜிதும் வட்டதி.

திகபாசித்தியந்தி அகி³லானே அகி³லானஸஞ்ஞிவேமதிககி³லானஸஞ்ஞீனம் வஸேன தீணி பாசித்தியானி. கி³லானஸ்ஸ கி³லானஸஞ்ஞினோதி கி³லானஸ்ஸ பன ‘‘கி³லானோ அஹ’’ந்தி ஸஞ்ஞினோ அனுவஸித்வா பு⁴ஞ்ஜந்தஸ்ஸ அனாபத்தி. ஸகிம் பு⁴ஞ்ஜதீதி ஏகதி³வஸம் பு⁴ஞ்ஜதி. ‘‘க³ச்ச²ந்தோ வா’’தி இத³ம் அத்³த⁴யோஜனவஸேன க³ஹேதப்³ப³ம், ததா² ‘‘பச்சாக³ச்ச²ந்தோ’’தி (ஸாரத்த². டீ. பாசித்திய 3.208) இத³ம்பீதி வத³ந்தி. கேனசி உபத்³த³வேனாதி நதி³பூரசோரப⁴யாதி³னா கேனசி உபத்³த³வேன. அஞ்ஞந்தி யாகு³க²ஜ்ஜகப²லாப²லாதி³பே⁴த³ம் யம் கிஞ்சி அஞ்ஞம். அனுவஸித்வாதி புன வஸித்வா.

ஆவஸத²ஸிக்கா²பத³வண்ணனா நிட்டி²தா.

2. க³ணபோ⁴ஜனஸிக்கா²பத³வண்ணனா

க³ணபோ⁴ஜனேதி க³ணேன லத்³த⁴த்தா க³ணஸ்ஸ ஸந்தகே போ⁴ஜனே. தேனாஹ ‘‘க³ணஸ்ஸ போ⁴ஜனே’’தி. நனு சேத்த² ‘‘க³ணஸ்ஸ போ⁴ஜனே’’தி வுச்சதி, ஸோ ச கோ² க³ணோ ‘‘கத்த²சி த்³வீஹி, கத்த²சி தீஹீ’’திஆதி³னா அனேகதா⁴ அதி⁴ப்பேதோ, இத⁴ கதிஹீதி ஆஹ ‘‘இத⁴ சா’’திஆதி³. தம் பனேதம் க³ணபோ⁴ஜனம் த்³வீஹி பகாரேஹி பஸவதி நிமந்தனதோ வா விஞ்ஞத்திதோ வாதி ஆஹ ‘‘தேஸம் நிமந்தனதோ வா’’திஆதி³. தத்த² நிமந்தனதோ வாதி அகப்பியனிமந்தனதோ வா. ஓத³னாதீ³னம் பஞ்சன்னந்தி ஓத³னஸத்துகும்மாஸமச்ச²மம்ஸானம் பஞ்சன்னம்.

‘‘ஓத³னேன நிமந்தேமி, ஓத³னம் மே க³ண்ஹதா²’’திஆதி³னா நயேன யேன கேனசி வேவசனேன வா பா⁴ஸந்தரேன வா பஞ்சன்னம் போ⁴ஜனானம் நாமம் க³ஹேத்வா நிமந்தேதீதி ஸம்ப³ந்தோ⁴. சத்தாரோதி ஏகட்டா²னே வா நானாட்டா²னேஸு வா டி²தே சத்தாரோ பி⁴க்கூ². லக்க²ணவசனஞ்சேதம், தஸ்மா சத்தாரோ வா ததோ வா அதி⁴கே பி⁴க்கூ²தி அத்தோ². வேவசனேன வாதி ப⁴த்தஅன்னாதி³பரியாயஸத்³தே³ன வா. பா⁴ஸந்தரேன வாதி அந்த⁴த³மிளாதி³பா⁴ஸந்தரேன வா. பஞ்சன்னம் போ⁴ஜனானம் நாமம் க³ஹேத்வாதி பஞ்சன்னம் போ⁴ஜனானம் அஞ்ஞதரஸ்ஸ நாமம் க³ஹேத்வா. ஓத³னேன நிமந்தேமீதி தும்ஹே ப⁴ந்தே ஓத³னேன நிமந்தேமி. ஆதி³ஸத்³தே³ன ‘‘ஆகங்க²த² ஓலோகேத² அதி⁴வாஸேத² படிமானேத², ஸத்துனா நிமந்தேமி, ஸத்தும் மே க³ண்ஹத² ஆகங்க²த² ஓலோகேத² அதி⁴வாஸேத² படிமானேதா²’’திஆதீ³னம் (பாசி. அட்ட². 217-218) க³ஹணம். ஏகதோ வாதி ஏகத்த² டி²தே வா நிஸின்னே வா பி⁴க்கூ² தி³ஸ்வா ‘‘தும்ஹே, ப⁴ந்தே, ஓத³னேன நிமந்தேமீ’’திஆதி³னா ஏவம் ஏகதோ நிமந்திதா. நானாதோ வா நிமந்திதாதி சத்தாரி பரிவேணானி வா விஹாரே வா க³ந்த்வா நானாதோ வா நிமந்திதா. ஏகட்டா²னே டி²தேஸுயேவ வா ஏகோ புத்தேன, ஏகோ பிதராதி ஏவம்பி நிமந்திதா நானாதோயேவ நிமந்திதா நாம ஹோந்தி. ஏகதோ க³ண்ஹந்திதி அஞ்ஞமஞ்ஞஸ்ஸ த்³வாத³ஸஹத்தூ²பசாரே டி²தா க³ண்ஹந்தி.

கஸ்மா பன நானாதோ பு⁴த்தேபி க³ணபோ⁴ஜனம் ஹோதீதி ஆஹ ‘‘படிக்³க³ஹணமேவ ஹேத்த² பமாண’’ந்தி. யதி³ ஏவம் அத² கஸ்மா பாளியம் ‘‘க³ணபோ⁴ஜனம் நாம யத்த² சத்தாரோ பி⁴க்கூ² பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதா பு⁴ஞ்ஜந்தி, ஏதம் க³ணபோ⁴ஜனம் நாமா’’தி (பாசி. 218) வுத்தம்? தம் படிக்³க³ஹணனியமனத்த²மேவ. ந ஹி அப்படிக்³க³ஹிதகம் பி⁴க்கூ² பு⁴ஞ்ஜந்தீதி ‘‘பு⁴ஞ்ஜந்தீ’’தி பத³ம் படிக்³க³ஹணனியமவசனம் ஹோதி. ஏகதோ வா நானாதோ வா விஞ்ஞாபேத்வாதி சத்தாரோ பி⁴க்கூ² ஏகதோ டி²தா வா நிஸின்னா வா உபாஸகம் தி³ஸ்வா ‘‘அம்ஹாகம் சதுன்னம்பி ப⁴த்தம் தே³ஹீ’’தி வா பாடேக்கம் பவிஸித்வா ‘‘மய்ஹம் ப⁴த்தம் தே³ஹி, மய்ஹம் ப⁴த்தம் தே³ஹீ’’தி வா ஏகதோ வா நானாதோ வா விஞ்ஞாபேத்வா. தஸ்ஸ து³வித⁴ஸ்ஸாபீதி யஞ்ச நிமந்தனதோ லத்³த⁴ம் க³ணபோ⁴ஜனம், யஞ்ச விஞ்ஞத்திதோ லத்³த⁴ம், தஸ்ஸ து³வித⁴ஸ்ஸாபி க³ணபோ⁴ஜனஸ்ஸ. ஏவம் படிக்³க³ஹணேதி ஏகதோ படிக்³க³ஹணே.

பாதா³னம்பி ப²லிதத்தாதி (பாசி. அட்ட². 217-218) அந்தமஸோ பாதா³னம்பி யதா² மஹாசம்மஸ்ஸ பரதோ மம்ஸம் தி³ஸ்ஸதி, ஏவம் ப²லிதத்தா. ந ஸக்கா பிண்டா³ய சரிதுந்தி வாலிகாய வா ஸக்க²ராய வா பு²ட்ட²மத்தே து³க்கு²ப்பத்திதோ அந்தோகா³மே பிண்டா³ய சரிதும் ந ஸக்கோதி. சீவரே கரியமானேதி ஸாடகஞ்ச ஸுத்தஞ்ச லபி⁴த்வா சீவரே கரியமானே. யம் கிஞ்சி சீவரே கத்தப்³ப³கம்மந்தி சீவரவிசாரணசி²ந்த³னமோக⁴ஸுத்தாரோபனாதி³ யம் கிஞ்சி சீவரே கத்தப்³ப³ம் கம்மம், அந்தமஸோ ஸூசிவேத⁴னம்பீதி அதி⁴ப்பாயோ. ‘‘அத்³த⁴யோஜனம்பீ’’திஆதி³ அவகம்ஸதோ வுத்தம். யோ பன தூ³ரம் க³ந்துகாமோ, தத்த² வத்தப்³ப³மேவ நத்தி², க³ச்ச²ந்தோ அத்³த⁴யோஜனப்³ப⁴ந்தரே கா³வுதேபி பு⁴ஞ்ஜிதும் லப⁴தி, க³தோ பன ஏகதி³வஸம். யதா³ நாவம் அபி⁴ருஹிதுகாமோ வா ஹோதி ஆருள்ஹோ வா ஓருள்ஹோ வா, அயம் நாவாபி⁴ருஹனஸமயோ நாமாதி ஆஹ ‘‘நாவாபி⁴ருஹனஸமயேபி ஏஸேவ நயோ’’தி. அயம் பன விஸேஸோ – அபி⁴ருள்ஹேன இச்சி²தட்டா²னம் க³ந்த்வாபி யாவ ந ஓரோஹதி, தாவ பு⁴ஞ்ஜிதப்³ப³ம். சத்தாரோ பி⁴க்கூ²தி அந்திமபரிச்சே²தோ³. யத்த² பன ஸதம் வா ஸஹஸ்ஸம் வா ஸன்னிபதிதம், தத்த² வத்தப்³ப³மேவ நத்தி². தஸ்மா தாதி³ஸே காலே ‘‘மஹாஸமயோ’’தி அதி⁴ட்ட²ஹித்வா பு⁴ஞ்ஜிதப்³ப³ம். யோ கோசி பப்³ப³ஜிதோதி ஸஹத⁴ம்மிகேஸு வா தித்தி²யேஸு வா அஞ்ஞதரோ.

யே ச த்³வே தயோ ஏகதோ க³ண்ஹந்தீதி யேபி அகப்பியனிமந்தனம் ஸாதி³யித்வா த்³வே வா தயோ வா ஏகதோ க³ண்ஹந்தி, தேஸம்பி அனாபத்தி. பணீதபோ⁴ஜனஸூபோத³னவிஞ்ஞத்தீஹி பன ஆபத்தியேவாதி வத³ந்தி, உபபரிக்கி²தப்³ப³ம். நிச்சப⁴த்தாதீ³ஸூதி நிச்சப⁴த்தே ஸலாகப⁴த்தே பக்கி²கே உபோஸதி²கே பாடிபதி³கே. தத்த² நிச்சப⁴த்தந்தி து⁴வப⁴த்தம் வுச்சதி. ‘‘நிச்சப⁴த்தம் க³ண்ஹதா²’’தி வத³ந்தி, ப³ஹூனம்பி ஏகதோ க³ண்ஹிதும் வட்டதி. ஸலாகப⁴த்தாதீ³ஸுபி ஏஸேவ நயோ.

க³ணபோ⁴ஜனஸிக்கா²பத³வண்ணனா நிட்டி²தா.

3. பரம்பரபோ⁴ஜனஸிக்கா²பத³வண்ணனா

க³ணபோ⁴ஜனே வுத்தனயேனேவாதி பி⁴க்கு²ம் உபஸங்கமித்வா ‘‘தும்ஹே, ப⁴ந்தே, ஓத³னேன நிமந்தேமி, ஓத³னம் மே க³ண்ஹதா²’’திஆதி³னா (பாசி. அட்ட². 217-218) நயேன யேன கேனசி வேவசனேன வா பா⁴ஸந்தரேன வா பஞ்சன்னம் போ⁴ஜனானம் அஞ்ஞதரஸ்ஸ நாமம் க³ஹேத்வா நிமந்தேதீதி வுத்தேனேவ நயேன. நிமந்திதஸ்ஸாதி அகப்பியனிமந்தனேன நிமந்திதஸ்ஸ. அவிகப்பேத்வாதி ஸம்முகா²ஸம்முக²வஸேன அவிகப்பேத்வா, அபரிச்சஜித்வாதி அத்தோ². அயஞ்ஹி ப⁴த்தவிகப்பனா நாம ஸம்முகா²பரம்முகா²பி வட்டதி. தேனாஹ ‘‘யோ பி⁴க்கு² பஞ்சஸு ஸஹத⁴ம்மிகேஸூ’’திஆதி³.

அஞ்ஞத்ர நிமந்தனபோ⁴ஜனவத்து²ஸ்மிந்தி அஞ்ஞத்ர பட²மம் நிமந்திதா ஹுத்வா அஞ்ஞஸ்மிம் நிமந்தனே பு⁴ஞ்ஜனவத்து²ஸ்மிம். யதி³ திவிதா⁴ அனுபஞ்ஞத்தி, அத² கஸ்மா பரிவாரே ‘‘சதஸ்ஸோ அனுபஞ்ஞத்தியோ’’தி வுத்தந்தி ஆஹ ‘‘பரிவாரே பனா’’திஆதி³. விகப்பனம்பி க³ஹேத்வாதி விகப்பனானுஜானனம்பி அனுபஞ்ஞத்திஸமானந்தி அனுபஞ்ஞத்திபா⁴வேன க³ஹேத்வா. ஏகஸம்ஸட்டா²னீதி ஏகஸ்மிம் மிஸ்ஸிதானி. இத³ம் வுத்தம் ஹோதி (பாசி. அட்ட². 229) – த்³வே தீணி குலானி நிமந்தேத்வா ஏகஸ்மிம் டா²னே நிஸீதா³பேத்வா இதோ சிதோ ச ஆஹரித்வா ப⁴த்தம் ஆகிரந்தி, ஸூபப்³யஞ்ஜனம் ஆகிரந்தி, ஏகமிஸ்ஸகம் ஹோதி, ஏத்த² அனாபத்தீதி. ஸசே பன மூலனிமந்தனம் ஹேட்டா² ஹோதி, பச்சி²மம் பச்சி²மம் உபரி, தம் உபரிதோ பட்டா²ய பு⁴ஞ்ஜந்தஸ்ஸ ஆபத்தி. ஹத்த²ம் பன அந்தோ பவேஸேத்வா பட²மனிமந்தனதோ ஏகம்பி கப³ளம் உத்³த⁴ரித்வா பு⁴த்தகாலதோ பட்டா²ய யதா² ததா² வா பு⁴ஞ்ஜந்தஸ்ஸ அனாபத்தி. த்³வே தீணி நிமந்தனானி ஏகதோ வா கத்வா பு⁴ஞ்ஜதீதி த்³வே தீணி நிமந்தனானி ஏகதோ பக்கி²பித்வா மிஸ்ஸேத்வா ஏகம் கத்வா பு⁴ஞ்ஜதீதி அத்தோ². ‘‘ஸகலேன கா³மேன வா’’திஆதீ³ஸு ஸகலேன கா³மேன ஏகதோ ஹுத்வா நிமந்திதஸ்ஸேவ யத்த² கத்த²சி பு⁴ஞ்ஜதோ அனாபத்தி. பூகே³பி ஏஸேவ நயோ. நிமந்தியமானோ வா ‘‘பி⁴க்க²ம் க³ஹேஸ்ஸாமீ’’தி வத³தீதி ‘‘ப⁴த்தம் க³ண்ஹா’’தி நிமந்தியமானோ ‘‘ந மய்ஹம் தவ ப⁴த்தேன அத்தோ², பி⁴க்க²ம் க³ஹேஸ்ஸாமீ’’தி ப⁴ணதி. கிரியாகிரியந்தி ஏத்த² போ⁴ஜனம் கிரியம், அவிகப்பனம் அகிரியம்.

பரம்பரபோ⁴ஜனஸிக்கா²பத³வண்ணனா நிட்டி²தா.

4. காணமாதாஸிக்கா²பத³வண்ணனா

பஹேணகத்தா²யாதி பண்ணாகாரத்தா²ய. பாதே²ய்யத்தா²யாதி மக்³க³ம் க³ச்ச²ந்தானம் அந்தராமக்³க³த்தா²ய. ஸத்தூதி ப³த்³த⁴ஸத்து, அப³த்³த⁴ஸத்து ச. த்³வத்திபத்தபூரே படிக்³க³ஹேத்வாதி முக²வட்டியா ஹேட்டி²மலேகா²ய ஸமம் பூரே த்³வத்திபத்தபூரே க³ஹேத்வாதி அத்தோ². இமஸ்ஸ சத்த²ஸ்ஸ ஹேட்டா² வுத்தனயேனேவ பாகடத்தா தத்த² கத்தப்³ப³ப்பகாரமேவ த³ஸ்ஸேதும் ‘‘ஏத்தா²’’திஆதி³மாஹ. ஸேஸந்தி ததோ ஏகபத்ததோ அஞ்ஞம் பத்தம். ஸசே தயோ பத்தபூரா க³ஹிதா த்³வே, ஸசே த்³வே க³ஹிதா, ஏகந்தி வுத்தம் ஹோதி.

க³மனே வா படிப்பஸ்ஸத்³தே⁴தி அந்தராமக்³கே³ உபத்³த³வம் தி³ஸ்வா, அனத்தி²கதாய வா ‘‘மயம் இதா³னி ந பேஸிஸ்ஸாம ந க³மிஸ்ஸாமா’’தி ஏவம் க³மனே உபச்சி²ன்னே தே³ந்தானந்தி அத்தோ².

காணமாதாஸிக்கா²பத³வண்ணனா நிட்டி²தா.

5. பட²மபவாரணாஸிக்கா²பத³வண்ணனா

பு⁴த்தவாதி கதப⁴த்தகிச்சோ. ஸாஸபமத்தம்பி அஜ்ஜோ²ஹரிதந்தி ஏவம் பரித்தம்பி போ⁴ஜனம் ஸங்கா²தி³த்வா வா அஸங்கா²தி³த்வா வா கி³லிதம். பவாரிதோதி படிக்கே²பிதோ. யோ ஹி பு⁴ஞ்ஜந்தோ பரிவேஸகேன உபனீதம் போ⁴ஜனம் அனிச்ச²ந்தோ படிக்கி²பதி, ஸோ தேன பவாரிதோ படிக்கி²பிதோ நாம ஹோதி. ப்³யஞ்ஜனம் பன அனாதி³யித்வா அத்த²மத்தமேவ த³ஸ்ஸேதும் ‘‘கதப்பவாரணோ கதப்படிக்கே²போதி அத்தோ²’’தி வுத்தம். ஸோபி ச படிக்கே²போ யஸ்மா ந படிக்கே²பமத்தேன, அத² கோ² பஞ்சங்க³வஸேன. தேனஸ்ஸ பத³பா⁴ஜனே ‘‘அஸனம் பஞ்ஞாயதீ’’திஆதி³ (பாசி. 239) வுத்தம்.

போ⁴ஜனம் பஞ்ஞாயதீதி பஞ்சன்னம் போ⁴ஜனானம் அஞ்ஞதரம் பத்தாதீ³ஸு தி³ஸ்ஸதி. தேனாஹ ‘‘பவாரணப்பஹோனகம் சே போ⁴ஜன’’ந்திஆதி³. ஸாலீதி (பாசி. அட்ட². 238-239) அந்தமஸோ நீவாரம் உபாதா³ய ஸப்³பா³பி ஸாலிஜாதி. வீஹீதி ஸப்³பா³பி வீஹிஜாதி. யவகோ³து⁴மேஸு பே⁴தோ³ நத்தி². கங்கூ³தி ஸேதரத்தகாளபே⁴தா³ ஸப்³பா³பி கங்கு³ஜாதி. வரகோதி அந்தமஸோ வரகசோரகம் உபாதா³ய ஸப்³பா³பி ஸேதவண்ணா வரகஜாதி. குத்³ரூஸகோதி காளகோத்³ரவோ சேவ ஸாமாகாதி³பே⁴தா³ ச ஸப்³பா³பி திணத⁴ஞ்ஞஜாதி.

நீவாரவரகசோரகா சேத்த² ‘‘த⁴ஞ்ஞானுலோமா’’தி வத³ந்தி. யாகு³ந்தி அம்பி³லயாகு³கீ²ரயாகு³ஆதி³பே⁴த³ம் யம் கிஞ்சி யாகு³ம். இமினாவ பாயாஸஸ்ஸாபி க³ஹிதத்தா ‘‘அம்பி³லபாயாஸாதீ³ஸு அஞ்ஞதரம் பசாமாதி வா’’தி ந வுத்தம். பவாரணம் ஜனேதீதி அனதிரித்தபோ⁴ஜனாபத்தினிப³ந்த⁴னம் படிக்கே²பம் ஸாதே⁴தி. ஸசே பன ஓதி⁴ ந பஞ்ஞாயதி, யாகு³ஸங்க³ஹம் க³ச்ச²தி, பவாரணம் ந ஜனேதி. புன பவாரணம் ஜனேதி க⁴னபா⁴வக³மனதோ பட்டா²ய போ⁴ஜனஸங்க³ஹிதத்தாதி அதி⁴ப்பாயோ.

உத³ககஞ்ஜிககீ²ராதீ³னி ஆகிரித்வாதி உத³கஞ்சேவ கஞ்ஜிகஞ்ச கீ²ராதீ³னி ச ஆகிரித்வா தேஹி ஸத்³தி⁴ம் அமத்³தி³த்வா ப⁴த்தமிஸ்ஸகே கத்வா. தேனாஹ ‘‘யாகு³ம் க³ண்ஹதா²’’திஆதி³. ஸசே பன ப⁴த்தே உத³ககஞ்ஜிககீ²ராதீ³னி ஆகிரித்வா மத்³தி³த்வா ‘‘யாகு³ம் க³ண்ஹதா²’’தி தே³ந்தி, பவாரணா ந ஹோதி. யாகு³யாபீதி ஏவம் யாகு³ஸங்க³ஹம் க³தாய வா அஞ்ஞாய வா யாகு³யாபி. ஸுத்³த⁴ரஸகோ, பன ரஸகயாகு³ வா ந ஜனேதி.

பஞ்சன்னம் போ⁴ஜனானம் அஞ்ஞதரவஸேன விப்பகதபோ⁴ஜனபா⁴வஸ்ஸ உபச்சி²ன்னத்தா ‘‘த்³வேபி கா²தி³தானி ஹோந்தி…பே… ந பவாரேதீ’’தி வுத்தம். அகப்பியமம்ஸம் (பாசி. அட்ட². 238-239), அகப்பியபோ⁴ஜனஞ்ச பு³த்³த⁴படிகுட்ட²ம் படிக்கி²பதோ பவாரணாய அவத்து²தாய ந பவாரணா ஹோதீதி ஆஹ ‘‘யோ பனா’’திஆதி³. யஞ்ஹி பி⁴க்கு²னோ கா²தி³தும் வட்டதி, தம் ஏவ படிக்கி²பதோ பவாரணா ஹோதி. இத³ம் பன ஜானந்தோ அகப்பியத்தா படிக்கி²பதி. அஜானந்தோபி படிக்கி²பிதப்³ப³ட்டா²னே டி²தமேவ படிக்கி²பதி நாம, தஸ்மா ந பவாரேதி. ஸசே பன அகப்பியமம்ஸம் கா²த³ந்தோ கப்பியமம்ஸம் வா போ⁴ஜனம் வா படிக்கி²பதி, பவாரேதி. கஸ்மா? வத்து²தாய. யஞ்ஹி தேன படிக்கி²த்தம், தம் பவாரணாய வத்து². யம் பன கா²த³தி, தம் கிஞ்சாபி படிக்கி²பிதப்³ப³ட்டா²னே டி²தம், கா²தி³யமானம் பன மம்ஸபா⁴வம் ந ஜஹதி, தஸ்மா பவாரேதி. கோ பன வாதோ³ கப்பியமம்ஸம் கா²த³தோ கப்பியமம்ஸபோ⁴ஜனப்படிக்கே²பே. ஏஸ நயோ அகப்பியபோ⁴ஜனம் கா²த³தோ கப்பியபோ⁴ஜனப்படிக்கே²பே.

போ⁴ஜனே ஸதீதி பஞ்சஸு போ⁴ஜனேஸு ஏகஸ்மிம்பி போ⁴ஜனே ஸதி. அஞ்ஞம் வுத்தலக்க²ணம் போ⁴ஜனந்தி பத்தாதி³க³ததோ அஞ்ஞம் வுத்தலக்க²ணம் பஞ்சஸு போ⁴ஜனேஸு ஏகம்பி போ⁴ஜனம். ‘‘நிரபேக்கோ² ஹோதீ’’தி ஏதஸ்ஸேவ விவரணம் ‘‘யம் பத்தாதீ³ஸூ’’திஆதி³. ந கேவலம் நிரபேக்கோ² வாதி ஆஹ ‘‘அஞ்ஞத்ர வா’’திஆதி³. ஸோ படிக்கி²பந்தோபி ந பவாரேதீதி தஸ்மிம் சே அந்தரே அஞ்ஞம் போ⁴ஜனம் அபி⁴ஹடம், தம் ஸோ படிக்கி²பந்தோபி ந பவாரேதி. கஸ்மா? விப்பகதபோ⁴ஜனபா⁴வஸ்ஸ உபச்சி²ன்னத்தா.

‘‘உபனாமேதீ’’தி (பாசி. அட்ட². 238-239) இமினா காயாபி⁴ஹாரம் த³ஸ்ஸேதி. ஹத்தே² வா ஆதா⁴ரகே வாதி ஏத்த² வா-ஸத்³தோ³ அவுத்தவிகப்பத்தோ², தேன ‘‘ஊரூஸு வா’’தி விகப்பேதி. தூ³ரே நிஸின்னஸ்ஸ த³ஹரபி⁴க்கு²ஸ்ஸ பத்தம் பேஸேத்வா ‘‘இதோ ஓத³னம் க³ண்ஹாஹீ’’தி வத³தி, க³ண்ஹித்வா பன க³தோ துண்ஹீ திட்ட²தி, தம்பி படிக்கி²பதோ ஏஸேவ நயோ. கஸ்மா? பி⁴க்கு²ஸ்ஸ தூ³ரபா⁴வதோ, தூ³தஸ்ஸ ச அனபி⁴ஹரணதோ. ஸசே பன க³ஹேத்வா ஆக³தோ பி⁴க்கு² ‘‘இமம் ப⁴த்தம் க³ண்ஹா’’தி வத³தி, தம் படிக்கி²பதோ பவாரணா ஹோதி. ஏவம் வுத்தேபீதி ‘‘ப⁴த்தம் க³ண்ஹா’’தி வுத்தேபி.

ப⁴த்தபச்சி²ம் க³ஹேத்வா பரிவிஸந்தஸ்ஸாதி ஏகேன ஹத்தே²ன ப⁴த்தபச்சி²ம் க³ஹேத்வா ஏகேன ஹத்தே²ன கடச்சு²ம் க³ஹேத்வா பரிவிஸந்தஸ்ஸ. அஞ்ஞோ ‘‘அஹம் தா⁴ரேஸ்ஸாமீ’’தி க³ஹிதமத்தகமேவ கரோதீதி அஞ்ஞோ ஆக³ந்த்வா ‘‘அஹம் பச்சி²ம் தா⁴ரேஸ்ஸாமி, த்வம் ஓத³னம் தே³ஹீ’’தி வத்வா க³ஹிதமத்தகமேவ கரோதி. அபி⁴ஹடாவ ஹோதீதி பரிவேஸகேனேவ அபி⁴ஹடாவ ஹோதி. இதா³னி அஸதி தஸ்ஸ தா³துகாமாபி⁴ஹாரே க³ஹணஸமயேபி படிக்கி²பதோ ந ஹோதீதி த³ஸ்ஸேதும் ‘‘ஸசே பனா’’திஆதி³ வுத்தம். உத்³த⁴டேதி உத்³த⁴டே ப⁴த்தே. கடச்சு²அபி⁴ஹாரோயேவ ஹி தஸ்ஸ அபி⁴ஹாரோதி அதி⁴ப்பாயோ. அனந்தரஸ்ஸ தி³ய்யமானேதி அனந்தரஸ்ஸ பி⁴க்கு²னோ ப⁴த்தே தி³ய்யமானே. காயவிகாரேனாதி ‘‘அங்கு³லிம் வா ஹத்த²ம் வா மச்சி²கபீ³ஜனிம் வா சீவரகண்ணம் வா சாலேதி, ப⁴முகாய வா ஆகாரம் கரோதி, குத்³தோ⁴ வா ஓலோகேதீ’’தி (பாசி. அட்ட². 238-239) ஏவம் வுத்தேன அங்கு³லிசலனாதி³னா காயவிகாரேன. ‘‘அலம் மா தே³ஹீ’’திஆதி³னா வசீவிகாரேனாதி ‘‘அல’’ந்தி வா ‘‘ந க³ண்ஹாமீ’’தி வா ‘‘மா ஆகிரா’’தி வா ‘‘அபக³ச்சா²’’தி வா ஏவம் யேன கேனசி வசீவிகாரேன.

அபி⁴ஹடே பன ப⁴த்தே பவாரணாய பீ⁴தோ ஹத்தே² அபனேத்வா புனப்புனம் பத்தே ஓத³னம் ஆகிரந்தம் ‘‘ஆகிர ஆகிர, கோட்டேத்வா பூரேஹீ’’தி வத³தோ பவாரணா ந ஹோதி. ஏஸ நயோ ப⁴த்தம் அபி⁴ஹரந்தம் பி⁴க்கு²ம் ஸல்லக்கே²த்வா ‘‘கிம், ஆவுஸோ, இதோபி கிஞ்சி க³ண்ஹிஸ்ஸஸி, த³ம்மி தே கிஞ்சீ’’தி வத³தோபி.

‘‘ரஸம் படிக்³க³ண்ஹதா²’’தி அப்பவாரணாஜனகஸ்ஸ நாமம் க³ஹேத்வா வுத்தத்தா ‘‘தம் ஸுத்வா படிக்கி²பதோ பவாரணா நத்தீ²’’தி வுத்தம். மம்ஸரஸந்தி ஏத்த² பன ந கேவலம் மம்ஸஸ்ஸ ரஸம் ‘‘மம்ஸரஸ’’மிச்சேவ விஞ்ஞாயதி, அத² கோ² மம்ஸஞ்ச ரஸஞ்ச மம்ஸரஸந்தி ஏவம் பவாரணாஜனகனாமவஸேனாபி. தஸ்மா தம் படிக்கி²பதோ பவாரணாவ ஹோதீதி ஆஹ ‘‘மம்ஸரஸந்தி வுத்தே பன படிக்கி²பதோ பவாரணா ஹோதீ’’தி. பரதோ மச்ச²மம்ஸம் ப்³யஞ்ஜனந்தி ஏத்தா²பி ஏஸேவ நயோ. யஸ்மிம் இரியாபதே² பவாரேதி, தம் அவிகோபேந்தேனேவ பு⁴ஞ்ஜிதப்³ப³ந்தி யோ க³ச்ச²ந்தோ (பாசி. அட்ட². 238-239) பவாரேதி, தேன க³ச்ச²ந்தேனேவ பு⁴ஞ்ஜிதப்³ப³ம். கத்³த³மம் வா உத³கம் வா பத்வா டி²தேன அதிரித்தம் காரேதப்³ப³ம். ஸசே அந்தரா நதீ³ பூரா ஹோதி, நதி³தீரே கு³ம்ப³ம் அனுபரியாயந்தேன பு⁴ஞ்ஜிதப்³ப³ம். அத² நாவா வா ஸேது வா அத்தி², தம் அபி⁴ருஹித்வாபி சங்கமந்தேனேவ பு⁴ஞ்ஜிதப்³ப³ம், க³மனம் ந உபச்சி²ந்தி³தப்³ப³ம். ஏஸ நயோ இதரஇரியாபதே²ஸுபி. தம் தம் இரியாபத²ம் கோபேந்தேன அதிரித்தம் காரேதப்³ப³ம். யோ உக்குடிகோவ நிஸீதி³த்வா பவாரேதி, தேன உக்குடிகேனேவ பு⁴ஞ்ஜிதப்³ப³ம். தஸ்ஸ பன ஹேட்டா² பலாலபீட²ம் வா கிஞ்சி வா நிஸீத³னம் தா³தப்³ப³ம். பீட²கே நிஸீதி³த்வா பவாரிதேன பன ஆஸனம் அசாலேத்வாவ சதஸ்ஸோ தி³ஸா பரிவத்தந்தேன பு⁴ஞ்ஜிதும் லப்³ப⁴தி. மஞ்சே நிஸீதி³த்வா பவாரிதேன இதோ வா ஏத்தோ வா ஸம்ஸரிதும் ந லப்³ப⁴தி. ஸசே பன ஸஹ மஞ்சேன உக்கி²பித்வா அஞ்ஞத்ர நேந்தி, வட்டதி. நிபஜ்ஜித்வா பவாரிதேனாபி நிபன்னேனேவ பு⁴ஞ்ஜிதப்³ப³ம். பரிவத்தந்தேன யேன பஸ்ஸேன நிபன்னோ, தஸ்ஸ டா²னம் நாதிக்கமேதப்³ப³ம்.

அலமேதம் ஸப்³ப³ந்தி ஏதம் ஸப்³ப³ம் அலம் பரியத்தம், இத³ம்பி தே அதி⁴கம், இதோ அஞ்ஞம் ந லச்ச²ஸீதி அதி⁴ப்பாயோ. யோ அதிரித்தம் கரோதீதி யோ ‘‘அலமேதம் ஸப்³ப³’’ந்தி அதிரித்தம் கரோதி. படிபக்க²னயேனாதி ‘‘கப்பியகதம், படிக்³க³ஹிதகதம், உச்சாரிதகதம், ஹத்த²பாஸே கதம், பு⁴த்தாவினா கதம், பு⁴த்தாவினா பவாரிதேன ஆஸனா அவுட்டி²தேன கதம் ‘அலமேதம் ஸப்³ப³’ந்தி வுத்த’’ந்தி (பாசி. 239) இமேஹி ஸத்தஹி வினயகம்மாகாரேஹி யம் அதிரித்தம் கப்பியம் கதம், யஞ்ச கி³லானாதிரித்தம், தது³ப⁴யம்பி அதிரித்தந்தி ஏவம் தஸ்ஸேவ படிபக்க²னயேன. ஏத்த² ச ‘‘அலமேதம் ஸப்³ப³’’ந்தி திக்க²த்தும் வத்தப்³ப³ம், அயம் கிர ஆசிண்ணோ. வினயத⁴ரா பன ‘‘ஸகிம் ஏவ வத்தப்³ப³’’ந்தி வத³ந்தி.

கஸ்மா தம் ஸோ புன காதும் ந லப⁴தீதி ஆஹ ‘‘யஞ்ஹீ’’திஆதி³. தத்த² யஞ்ஹி அகதந்தி யேன பட²மம் கப்பியம் கதம், தேன யம் அகதம், தம் காதப்³ப³ம். பட²மபா⁴ஜனே பன காதும் ந லப்³ப⁴தி. யேன ச அகதந்தி அஞ்ஞேன பி⁴க்கு²னா யேன பட²மம் ந கதம், தேன ச காதப்³ப³ந்தி அத்தோ². வுத்தந்தி ஸீஹளட்ட²கதா²ஸு வுத்தம். அஞ்ஞஸ்மிம் பன பா⁴ஜனேதி யஸ்மிம் பன பா⁴ஜனே பட²மம் கதம், ததோ அஞ்ஞஸ்மிம் பத்தே வா குண்டே³ வா பச்சி²யம் வா யத்த² கத்த²சி புரதோ ட²பேத்வா ஓனாமிதபா⁴ஜனே.

அஞ்ஞத்ர பு⁴ஞ்ஜனவத்து²ஸ்மிந்தி பு⁴த்தாவினா பவாரிதேன ஹுத்வா அஞ்ஞத்ர பு⁴ஞ்ஜனவத்து²ஸ்மிம். திகபாசித்தியந்தி அனதிரித்தே அனதிரித்தஸஞ்ஞிவேமதிகஅதிரித்தஸஞ்ஞீனம் வஸேன தீணி பாசித்தியானி. அஜ்ஜோ²ஹரதோ ச து³க்கடந்தி அஜ்ஜோ²ஹரதோ அஜ்ஜோ²ஹாரே அஜ்ஜோ²ஹாரே து³க்கடம். ஸசே பன ஆமிஸஸம்ஸட்டா²னி ஹோந்தி, ஆஹாரத்தா²யபி அனாஹாரத்தா²யபி படிக்³க³ஹேத்வா அஜ்ஜோ²ஹரந்தஸ்ஸ பாசித்தியமேவ. தேஸம் அனுஞ்ஞாதபரிபோ⁴க³வஸேனாதி யாமகாலிகாதீ³னம் அனுஞ்ஞாதபரிபோ⁴க³வஸேன, யாமகாலிகம் பிபாஸாய ஸதி பிபாஸச்சே²த³னத்த²ம், ஸத்தாஹகாலிகம் யாவஜீவிகஞ்ச தேன தேன உபஸமேதப்³ப³கே ஆபா³தே⁴ ஸதி தஸ்ஸ உபஸமனத்த²ந்தி வுத்தம் ஹோதி. இத³ம்பி அஜ்ஜோ²ஹரணதோ காயகம்மம், வாசாய ‘‘அதிரித்தம் கரோத² ப⁴ந்தே’’தி அகாராபனேன வசீகம்மந்தி ஆஹ ‘‘ஸமுட்டா²னாதீ³னி பட²மகதி²னஸதி³ஸானேவா’’தி. கிரியாகிரியந்தி ஏத்த² படிக்கி²பித்வா பு⁴ஞ்ஜனம் கிரியம். அதிரித்தஸ்ஸ அகரணம் அகிரியந்தி வேதி³தப்³ப³ம்.

பட²மபவாரணாஸிக்கா²பத³வண்ணனா நிட்டி²தா.

6. து³தியபவாரணாஸிக்கா²பத³வண்ணனா

ஸுத்வா வாதி அஞ்ஞேன வா தேனேவ வா ஆரோசிதம் ஸுத்வா. ‘‘பு⁴த்தஸ்மிம் பாசித்திய’’ந்தி (பாசி. 243) வுத்தத்தா போ⁴ஜனபரியோஸானே பாசித்திய’’ந்தி வுத்தம்.

து³தியபவாரணாஸிக்கா²பத³வண்ணனா நிட்டி²தா.

7. விகாலபோ⁴ஜனஸிக்கா²பத³வண்ணனா

விகாலேதி ஏத்த² அருணுக்³க³மனதோ பட்டா²ய யாவ மஜ்ஜ²ன்ஹிகோ, அயம் பு³த்³தா⁴தீ³னம் அரியானம் ஆசிண்ணஸமாசிண்ணோ போ⁴ஜனஸ்ஸ காலோ நாம. தத³ஞ்ஞோ விகாலோ ‘‘விக³தோ காலோ’’தி கத்வா. தேனாஹ ‘‘விக³தே காலே’’திஆதி³. டி²தமஜ்ஜ²ன்ஹிகோபி (பாசி. அட்ட². 248-249) காலஸங்க³ஹம் க³ச்ச²தி. ததோ பட்டா²ய பன கா²தி³தும் வா பு⁴ஞ்ஜிதும் வா ந ஸக்கா. ஸஹஸா பிவிதும் ஸக்கா ப⁴வேய்ய, குக்குச்சகேன பன ந காதப்³ப³ம். காலபரிச்சே²த³ஜானனத்த²ஞ்ச காலத்த²ம்போ⁴ யோஜேதப்³போ³. காலப்³ப⁴ந்தரேவ ப⁴த்தகிச்சம் காதப்³ப³ம். ‘‘யம் கிஞ்சி…பே… கா²த³னீயம் வா’’தி இமினா யம் தாவ ஸக்க²லிமோத³காதி³ புப்³ப³ண்ணாபரண்ணமயம், தத்த² வத்தப்³ப³மேவ நத்தீ²தி த³ஸ்ஸேதி. போ⁴ஜனீயம் நாம பஞ்ச போ⁴ஜனானி.

ஸதி பச்சயேதி பிபாஸாதி³காரணே விஜ்ஜமானே. ரோமட்ட²கஸ்ஸாதி ரோமட்ட²கஸ்ஸ பி⁴க்கு²னோ அஜ்ஜோ²ஹரித்வா உக்³கி³ரித்வா முகே²வ ட²பிதோ ப³ஹி முக²த்³வாரா வினிக்³க³தோ போ⁴ஜனஸ்ஸ மக்³கா³ ப³ஹி நிக்³க³தோ ‘‘ரோமட்டோ²’’தி பவுச்சதி. இத⁴ பன அஜ்ஜோ²ஹரித்வா உக்³கி³ரித்வா முகே²வ ட²பிதோதி அதி⁴ப்பேதோ. தேனாஹ ‘‘ந ச, பி⁴க்க²வே’’திஆதி³. ட²பேத்வா ரோமட்ட²கம் ஸேஸானம் ஆக³தம் உக்³கா³ரம் முகே² ஸந்தா⁴ரேத்வா கி³லந்தானம் ஆபத்தி. ஸசே பன அஸந்தா⁴ரேந்தமேவ பரக³லம் க³ச்ச²தி, வட்டதி.

விகாலபோ⁴ஜனஸிக்கா²பத³வண்ணனா நிட்டி²தா.

8. ஸன்னிதி⁴காரகஸிக்கா²பத³வண்ணனா

‘‘காரோ கரணம் கிரியாதி அத்த²தோ ஏக’’ந்தி ஏதேன காரஸத்³த³ஸ்ஸ பா⁴வத்த²தம் த³ஸ்ஸேதி. ஸம்மா நிதா⁴னம் ட²பனம் ஸன்னிதி⁴. ‘‘படிக்³க³ஹேத்வா ஏகரத்தம் வீதினாமிதஸ்ஸேதம் நாம’’ந்தி இமினா படிக்³க³ஹேத்வா ஏகரத்தம் வீதினாமிதே இமஸ்ஸ து³த்³தோ⁴தபா⁴வம் த³ஸ்ஸேதி. கிஞ்சாபி யாமகாலிகம் கா²த³னீயம், போ⁴ஜனீயம் வா ந ஹோதி, ‘‘அனாபத்தி யாமகாலிகம் யாமே நித³ஹித்வா பு⁴ஞ்ஜதீ’’திஆதி³ வசனதோ பன தத்தா²பி யாமாதிக்கமே ஸன்னிதி⁴பச்சயா பாசித்தியேன ப⁴விதப்³ப³ந்தி ‘‘யம் கிஞ்சி யாவகாலிகம் வா யாமகாலிகம் வா’’தி வுத்தம். இதா³னி து³த்³தோ⁴தபா⁴வமேவ விபா⁴வேதும் ‘‘யம் அங்கு³லியா’’திஆதி³ வுத்தம். தத்த² யம் அங்கு³லியா க⁴ம்ஸந்தஸ்ஸ லேகா² பஞ்ஞாயதீதி யம் பத்தம் தோ⁴தம் அங்கு³லியா க⁴ம்ஸந்தஸ்ஸ பத்தே அங்கு³லிலேகா² பஞ்ஞாயதி, ஸோ பத்தோ து³த்³தோ⁴தோ ஹோதீதி அத்தோ². தேலவண்ணபத்தே பன அங்கு³லிலேகா² பஞ்ஞாயதி, ஸா அப்³போ³ஹாரிகா. ஸ்னேஹோதி தேலம். ஸந்தி³ஸ்ஸதீதி யாகு³யா உபரி ஸந்தி³ஸ்ஸதி. தாதி³ஸே பத்தேபீதி படிக்³க³ஹணம் அவிஸ்ஸஜ்ஜித்வா ஸயம் வா அஞ்ஞேன வா போ⁴ஜனம் நீஹரித்வா ந ஸம்மா தோ⁴தே பத்தேபி. புனதி³வஸே பு⁴ஞ்ஜந்தஸ்ஸ பாசித்தியந்தி பத்தே லக்³க³ம் அவிஜஹிதப்படிக்³க³ஹணம் ஹோதீதி து³தியதி³வஸே பு⁴ஞ்ஜந்தஸ்ஸ பாசித்தியம். பரிச்சத்தே பன பத்தே புனதி³வஸே பு⁴ஞ்ஜந்தஸ்ஸ அனாபத்தி.

யம் பனாதி யம் போ⁴ஜனம் பன. அபரிச்சத்தமேவ ஹீதி அனபேக்க²விஸ்ஸஜ்ஜனேன வா அனுபஸம்பன்னஸ்ஸ நிரபேக்க²தா³னேன வா அபரிச்சத்தமேவ. கப்பிய போ⁴ஜனந்தி அந்தமஸோ ஏகஸித்த²மத்தம்பி கப்பியபோ⁴ஜனம். அகப்பியேஸூதி அகப்பியமம்ஸேஸு. ஸேஸேஸூதி மனுஸ்ஸமம்ஸதோ அவஸேஸேஸு ஹத்தி²அஸ்ஸஸுனக²அஹிஸீஹப்³யக்³க⁴தீ³பிஅச்ச²தரச்ச²மம்ஸேஸு சேவ அப்படிவேக்கி²தே உத்³தி³ஸ்ஸகதமம்ஸே ச. பாளியம் ‘‘ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸா’’திஆதி³னா (பாசி. 255) ஸன்னிஹிதேஸு ஸத்தாஹகாலிகயாவஜீவிகேஸு புரேப⁴த்தம்பி ஆஹாரத்தா²ய அஜ்ஜோ²ஹரணேபி து³க்கடஸ்ஸ வுத்தத்தா யாமகாலிகேபி ஆஹாரத்தா²ய அஜ்ஜோ²ஹரணேபி விஸும் து³க்கடேனாபி ப⁴விதப்³ப³ந்தி ஆஹ ‘‘ஆஹாரத்தா²ய அஜ்ஜோ²ஹரதோ து³க்கடேன ஸத்³தி⁴ம் பாசித்திய’’ந்தி. ஸப்³ப³விகப்பேஸூதி ‘‘கப்பியபோ⁴ஜனம் பு⁴ஞ்ஜந்தஸ்ஸா’’திஆதி³னா வுத்தேஸு ஸப்³பே³ஸு விகப்பேஸு அபரம்பி பாசித்தியம் வட்³ட⁴தி. இத³ம் வுத்தம் ஹோதி (பாசி. அட்ட². 253) – கப்பியபோ⁴ஜனே த்³வே பாசித்தியானி, மனுஸ்ஸமம்ஸே து²ல்லச்சயேன ஸத்³தி⁴ம் த்³வே பாசித்தியானி, அவஸேஸேஸு பன அகப்பியமம்ஸேஸு து³க்கடேன ஸத்³தி⁴ம் த்³வே பாசித்தியானி. யாமகாலிகம் ஸதி பச்சயே ஸாமிஸேன முகே²ன அஜ்ஜோ²ஹரதோ த்³வே பாசித்தியானி, நிராமிஸேன ஏகமேவ. ஆஹாரத்தா²ய அஜ்ஜோ²ஹரதோ விகப்பத்³வயேபி து³க்கடேன ஸத்³தி⁴ந்தி.

அவஸேஸேஸூதி யாமகாலிகாதி³தோ அவஸேஸேஸு. பாசித்தியம் வட்³ட⁴தியேவாதி அபரம்பி பாசித்தியம் வட்³ட⁴தியேவ. இத³ம் வுத்தம் ஹோதி – ஸசே விகாலே அஜ்ஜோ²ஹரதி, பகதிபோ⁴ஜனே ஸன்னிதி⁴பச்சயா ச விகாலபோ⁴ஜனபச்சயா ச த்³வே பாசித்தியானி, அகப்பியமம்ஸேஸு மனுஸ்ஸமம்ஸே து²ல்லச்சயேன ஸத்³தி⁴ம் த்³வே பாசித்தியானி, அவஸேஸேஸு து³க்கடேன ஸத்³தி⁴ம் த்³வேதி.

பே³லட்ட²ஸீஸோ நாம ஜடிலஸஹஸ்ஸஸ்ஸ அப்³ப⁴ந்தரே ஏகோ மஹாதே²ரோ. திகபாசித்தியந்தி ஸன்னிதி⁴காரகே ஸன்னிதி⁴காரகஸஞ்ஞிவேமதிகஅஸன்னிதி⁴காரகஸஞ்ஞீனம் வஸேன தீணி பாசித்தியானி. ஸம்ஸட்டா²னீதி ஸம்ஸட்ட²ரஸானி. ஸம்பி⁴ன்னரஸம் ஸந்தா⁴யேவ ஹி ‘‘தத³ஹுபடிக்³க³ஹிதம் காலே கப்பதீ’’திஆதி³ வுத்தம். தேனாஹ ‘‘தஸ்மா’’திஆதி³. ஏத்த² ச அஸம்பி⁴ன்னரஸந்தி அமிஸ்ஸிதரஸம். இத³ஞ்ச ஸீதலபாயாஸாதி³னா ஸஹ லத்³த⁴ம் ஸப்பிபிண்டா³தி³கம் ஸந்தா⁴ய வுத்தம். ‘‘ஸுதோ⁴தம் வா’’தி இத³ம் பன பிண்ட³பாதேன ஸத்³தி⁴ம் லத்³த⁴ம் தக்கோலஜாதிப²லாதி³ம், யாகு³ஆதீ³ஸு பக்கி²பித்வா தி³ன்னஸிங்கீ³வேராதி³கஞ்ச ஸந்தா⁴ய வுத்தம்.

தேனாதி ஸத்தாஹகாலிகேன. தத³ஹு படிக்³க³ஹிதம் அஸ்ஸாதி தத³ஹுபடிக்³க³ஹிதம், தேன தத³ஹுபடிக்³க³ஹிதேன. ஏஸ நயோ ‘‘த்³வீஹபடிக்³க³ஹிதேனா’’திஆதீ³ஸுபி. தஸ்மாதி யஸ்மா புரேப⁴த்தம் படிக்³க³ஹிதம்பி வட்டதி, தஸ்மா. படிக்³க³ஹிதம் ஸத்தாஹம் கப்பதீதி வுத்தந்தி ‘‘ஸத்தாஹகாலிகேன, பி⁴க்க²வே, யாவஜீவிகம் படிக்³க³ஹிதம் ஸத்தாஹம் கப்பதி, ஸத்தாஹாதிக்கந்தே ந கப்பதீ’’தி (மஹாவ. 305) பே⁴ஸஜ்ஜக்க²ந்த⁴கே வுத்தம். கிஞ்சாபி முகே² ஏகரத்தம் ந வுத்தம், ததா²பி முகே² பக்கி²த்தமேவ யஸ்மா ஸன்னிதி⁴ நாம ஹோதி, தஸ்மா ‘‘முக²ஸன்னிதீ⁴’’தி வுத்தம்.

சதஸ்ஸோ கப்பியபூ⁴மியோதி உஸ்ஸாவனந்திகா, கோ³னிஸாதி³கா, க³ஹபதி, ஸம்முதீதி சதஸ்ஸோ கப்பியகுடியோ. தத்த² உஸ்ஸாவனந்திகா (மஹாவ. அட்ட². 295) நாம கே³ஹே கரியமானே ஸம்பரிவாரேத்வா டி²தேஹி ‘‘கப்பியகுடிம் கரோம, கப்பியகுடிம் கரோமா’’தி வா ‘‘கப்பியகுடி கப்பியகுடீ’’தி வா வத³ந்தேஹி ட²பிதபட²மிட்ட²கத²ம்பா⁴தி³கா ஸங்க⁴ஸ்ஸ வா ஏகஸ்ஸ பி⁴க்கு²னோ வா குடி. யோ பன ஆராமோ யேபு⁴ய்யேன வா அபரிக்கி²த்தோ ஹோதி, ஸகலோபி வா, ஸோ ‘‘கோ³னிஸாதீ³’’தி வுச்சதி. க³ஹபதீதி யா ட²பேத்வா பி⁴க்கு²ம் ஸேஸேஹி ‘‘கப்பியகுடிம் தே³மா’’தி தி³ன்னா, தேஸம் வா ஸந்தகா. ஸம்முதி நாம கம்மவாசாய ஸாவேத்வா கதா. கத²ம் பனேதாஸம் வினிச்ச²யோ ஜானிதப்³போ³தி ஆஹ ‘‘தாஸம் வினிச்ச²யோ ஸமந்தபாஸாதி³காயம் வுத்தோ’’தி.

ஸன்னிதி⁴காரகஸிக்கா²பத³வண்ணனா நிட்டி²தா.

9. பணீதபோ⁴ஜனஸிக்கா²பத³வண்ணனா

‘‘பணீதபோ⁴ஜனானீ’’தி இத³ம் மஜ்ஜே² பத³லோபம் கத்வா நித்³தி³ட்ட²ந்தி ஆஹ ‘‘பணீதஸம்ஸட்டா²னீ’’திஆதி³. ஸப்³போ³பி ‘‘ஓத³கோ’’தி வுத்தலக்க²ணோ மச்சோ²தி ‘‘மச்சோ² நாம ஓத³கோ வுச்சதீ’’தி (பாசி. 260) ஏவம் விப⁴ங்கே³ வுத்தலக்க²ணோ, ஸப்³போ³பி மச்சோ² ஏவ. யோ கோசி உத³கே ஜாதோ மச்சோ² நாமாதி வுத்தம் ஹோதி. மஹானாமஸிக்கா²பதே³னாதி –

‘‘அகி³லானேன பி⁴க்கு²னா சதுமாஸபச்சயபவாரணா ஸாதி³தப்³பா³ அஞ்ஞத்ர புனபவாரணாய அஞ்ஞத்ர நிச்சபவாரணாய. ததோ சே உத்தரி ஸாதி³யேய்ய, பாசித்திய’’ந்தி –

இமினா ஸிக்கா²பதே³ன (பாசி. 306). ஏத்த² ஹி ஸங்க⁴வஸேன கி³லானபச்சயபவாரணாய பவாரிதட்டா²னே ஸசே தத்த² ரத்தீஹி வா பே⁴ஸஜ்ஜேஹி வா பரிச்சே²தோ³ கதோ ஹோதி ‘‘ஏத்திகாயேவ ரத்தியோ, ஏத்தகானி வா பே⁴ஸஜ்ஜானி விஞ்ஞாபேதப்³பா³னீ’’தி, ததோ ரத்திபரியந்ததோ வா பே⁴ஸஜ்ஜபரியந்ததோ வா உத்தரி நபே⁴ஸஜ்ஜகரணீயேன வா பே⁴ஸஜ்ஜம், அஞ்ஞபே⁴ஸஜ்ஜகரணீயேன வா அஞ்ஞம் பே⁴ஸஜ்ஜம் விஞ்ஞாபேந்தஸ்ஸ பாசித்தியம் வுத்தம். தஸ்மா அகி³லானோ கி³லானஸஞ்ஞீபி ஹுத்வா பஞ்ச பே⁴ஸஜ்ஜானி விஞ்ஞாபேந்தோ நபே⁴ஸஜ்ஜகரணீயேன பே⁴ஸஜ்ஜம் விஞ்ஞாபேந்தோ நாம ஹோதீதி ‘‘மஹானாமஸிக்கா²பதே³ன காரேதப்³போ³’’தி வுத்தம்.

யோ பன நபே⁴ஸஜ்ஜத்தா²ய விஞ்ஞாபேதி, அத² கோ² கேவலம் அத்தனோ பு⁴ஞ்ஜனத்தா²ய, ஸோ ஸூபோத³னவிஞ்ஞத்தியாயேவ காரேதப்³போ³. வுத்தஞ்ஹேதம் ஸமந்தபாஸாதி³காயம் ‘‘ஸுத்³தா⁴னி ஸப்பிஆதீ³னி விஞ்ஞாபேத்வா பு⁴ஞ்ஜந்தோ பாசித்தியம் நாபஜ்ஜதி, ஸேகி²யேஸு ஸூபோத³னவிஞ்ஞத்திது³க்கடம் ஆபஜ்ஜதீ’’தி (பாசி. அட்ட². 259). ஸூபோத³னவிஞ்ஞத்தியா காரேதப்³போ³தி ‘‘ந ஸூபம் வா ஓத³னம் வா அகி³லானோ’’திஆதி³னா (பாசி. 613) ஸிக்கா²பதே³ன காரேதப்³போ³, து³க்கடேன காரேதப்³போ³தி வுத்தம் ஹோதி. இமினாதி இமினா பணீதபோ⁴ஜனஸிக்கா²பதே³ன.

‘‘ஸப்பிப⁴த்தம் தே³ஹீ’’தி வுத்தே கிம் ஹோதீதி ஆஹ ‘‘ஸப்பிப⁴த்தம் ‘தே³ஹீ’தி வுத்தே பனா’’திஆதி³. ஸூபோத³னவிஞ்ஞத்தியா து³க்கடமேவ ஹோதீதி ஸம்ப³ந்தோ⁴. கஸ்மாதி ஆஹ ‘‘யஸ்மா’’திஆதி³. அத² யதா² ‘‘பணீதபோ⁴ஜனானீ’’தி, ஏவம் ‘‘ஸப்பிப⁴த்த’’ந்தி இத³ம்பி கஸ்மா ந விஞ்ஞாயதீதி சே? அனேகந்திகத்தா. ததா² ஹி ‘‘பணீதபோ⁴ஜனானீ’’தி வுத்தே ‘‘பணீதஸம்ஸட்டா²னி போ⁴ஜனானி பணீதபோ⁴ஜனானீ’’தி அயமத்தோ² ஏகந்ததோ பஞ்ஞாயதி, ‘‘ஸப்பிப⁴த்த’’ந்தி வுத்தே பன ‘‘ஸப்பிமயம் ப⁴த்தம் ஸப்பிப⁴த்த’’ந்திபி விஞ்ஞாயமானத்தா ‘ஸப்பிஸம்ஸட்ட²ம் ப⁴த்தம் ஸப்பிப⁴த்த’’ந்தி அயமத்தோ² ந ஏகந்ததோ பஞ்ஞாயதி. ஏஸ நயோ ‘‘நவனீதப⁴த்தம் தே³ஹீ’’திஆதீ³ஸுபி.

புரிமனயேனேவாதி ‘‘ப⁴த்தம் த³த்வா ஸப்பிம் கத்வா பு⁴ஞ்ஜா’’தி புரிமேனேவ நயேன. ஸசே பன ‘‘ஸப்பினா’’தி வுத்தே கேவலம் ஸேஸேஸு நவனீதாதீ³ஸு அஞ்ஞதரேன தே³தி, விஸங்கேதமேவ ஹோதி. அனாபத்தீதி விஸங்கேதத்தா ஸப்³பா³ஹியேவ ஆபத்தீஹி அனாபத்தி. ‘‘கிஞ்சாபி அனாபத்தி, அத்தனோ பன பயோகே³ன நிப்³ப³த்தத்தா ந பு⁴ஞ்ஜிதப்³ப³’’ந்தி வத³ந்தி. கப்பியஸப்பினாதி கப்பியமம்ஸஸப்பினா. ஏஸ நயோ அகப்பியஸப்பினாதி ஏத்தா²பி. கப்பியாகப்பியதா ஹி மம்ஸானம்யேவ, ந ஸப்பிஆதீ³னம். ட²பேத்வா ஏகம் மனுஸ்ஸவஸாதேலம் ஸப்³பே³ஸம் கீ²ரத³தி⁴ஸப்பினவனீதவஸாதேலேஸு அகப்பியம் நாம நத்தி².

பரிபோ⁴கே³பி து³க்கடமேவ இத⁴ அனதி⁴ப்பேதத்தாதி அதி⁴ப்பாயோ. ஸசே அஸதி அகப்பியஸப்பிம்ஹி புரிமனயேனேவ அகப்பியனவனீதாதீ³னி தே³தி ‘‘ஸப்பிம் கத்வா பு⁴ஞ்ஜா’’தி, அகப்பியஸப்பினாவ தி³ன்னம் ஹோதி. யதா² ச ‘‘கப்பியஸப்பினா தே³ஹீ’’தி வுத்தே அகப்பியஸப்பினா தே³தி, விஸங்கேதம், ஏவம் ‘‘‘அகப்பியஸப்பினா’தி வுத்தே கப்பியஸப்பினா தே³தீ’’தி ஏத்தா²பி படிபாடியா ஏகமேகம் வித்தா²ரேத்வா வுச்சமானேபி அயமேவத்தோ² வத்தப்³போ³ ஸியா, ஸோ ச ஸங்கே²பேனபி ஸக்கா விஞ்ஞாதுந்தி வித்தா²ரனயம் ஹித்வா இமினாவ நயேன ஸப்³ப³பதே³ஸு வினிச்ச²யோ வேதி³தப்³போ³தி வுத்தம். அயஞ்ஹேத்த² ஸங்கே²பத்தோ² – யேன யேன விஞ்ஞத்தி ஹோதி, தஸ்மிம் வா தஸ்ஸ மூலே வா லத்³தே⁴ தம் தம் லத்³த⁴மேவ ஹோதி. ஸசே பன அஞ்ஞம் பாளியா ஆக³தம் வா அனாக³தம் வா தே³தி, விஸங்கேதந்தி. நானாட்டா²னே வாதி தஸ்மிம்யேவ க⁴ரே ஸப்பிம், இதரஸ்மிம் நவனீதந்திஆதி³னா நானாட்டா²னே வா.

பணீதபோ⁴ஜனஸிக்கா²பத³வண்ணனா நிட்டி²தா.

10. த³ந்தபோனஸிக்கா²பத³வண்ணனா

காயேனாதி ஹத்தா²தீ³ஸு யேன கேனசி ஸரீராவயவேன, அந்தமஸோ பாத³ங்கு³லியாபி க³ண்ஹந்தோ காயேன க³ண்ஹாதி நாமாதி வேதி³தப்³போ³. தா³னேபி ஏஸேவ நயோ. காயப்படிப³த்³தே⁴னாதி பத்தாதீ³ஸு யேன கேனசி ஸரீரஸம்ப³த்³தே⁴ன உபகரணேன. தா³னேபி ஏஸேவ நயோ. கடச்சு²ஆதீ³ஸு யேன கேனசி உபகரணேன தி³ன்னம் காயப்படிப³த்³தே⁴ன தி³ன்னம்யேவ ஹோதி. அஞ்ஞதரேனாதி காயேன வா காயப்படிப³த்³தே⁴ன வா நிஸ்ஸக்³கி³யேன வாதி அத்தோ². தத்த² நிஸ்ஸக்³கி³யேனாதி (பாசி. அட்ட². 265) காயதோ ச காயப்படிப³த்³த⁴தோ ச மோசேத்வா ஹத்த²பாஸே டி²தஸ்ஸ காயே வா காயப்படிப³த்³தே⁴ வா பாதியமானஞ்ஹி நிஸ்ஸக்³கி³யேன பயோகே³ன தி³ன்னம் நாம ஹோதி. தஸ்ஸாதி படிக்³க³ஹிதகஸ்ஸ. வுத்தவிபல்லாஸவஸேனாதி வுத்தஸ்ஸ படிபக்க²வஸேன. இத³ம் வுத்தம் ஹோதி – யம் காயகாயப்படிப³த்³த⁴னிஸ்ஸக்³கி³யானம் அஞ்ஞதரேன தி³ய்யமானே காயேன வா காயப்படிப³த்³தே⁴ன வா க³ண்ஹாதி, ஏதம் படிக்³க³ஹிதம் நாமாதி.

ஸம்ஹாரிமேனாதி தா²மமஜ்ஜி²மேன புரிஸேன ஸம்ஹாரிமேன, இமினா அஸம்ஹாரிமே ப²லகே வா பாஸாணே வா படிக்³க³ஹணம் ந ருஹதீதி த³ஸ்ஸேதி. தா⁴ரேதும் ஸமத்தே²னாதி ஸந்தா⁴ரேதும் யோக்³கே³ன, இமினா ஸுகு²மேஸு திந்திணிகாதி³பண்ணேஸு படிக்³க³ஹணம் ந ருஹதீதி த³ஸ்ஸேதி. அதத்த²ஜாதகருக்க²பண்ணேனாதி ஜாதட்டா²னதோ சுதேன பது³மினிபண்ணாதி³னா, இமினா பன மஹந்தேபி தத்த²ஜாதகே பது³மினிபண்ணே வா கிம்ஸுகபண்ணாதி³ம்ஹி வா படிக்³க³ஹேதும் ந வட்டதி. ந ஹி தம் காயப்படிப³த்³த⁴ஸங்க²ம் க³ச்ச²தீதி த³ஸ்ஸேதி. யதா² ச தத்த²ஜாதகே, ஏவம் கா²ணுகே ப³ந்தி⁴த்வா ட²பிதமஞ்சாதி³ம்ஹிபி. நனு படிப³த்³த⁴ப்படிப³த்³தே⁴னாபி பத்தாதா⁴ராதி³னா படிக்³க³ண்ஹந்தஸ்ஸ படிக்³க³ஹணம் ருஹதி, அத² கஸ்மா காயகாயப்படிப³த்³தே⁴ஹியேவ படிக்³க³ஹணம் இத⁴ வுத்தம், ந படிப³த்³த⁴ப்படிப³த்³தே⁴னாபீதி ஆஹ ‘‘படிப³த்³த⁴ப்படிப³த்³த⁴ம் நாம இத⁴ நத்தீ²’’தி. கேசி பன ‘‘ஆதா⁴ரகேன படிக்³க³ஹணம் காயப்படிப³த்³த⁴ப்படிப³த்³தே⁴ன படிக்³க³ஹணம் நாம ஹோதி, தஸ்மா ந வட்டதீ’’தி வத³ந்தி, தம் வசனமத்தமேவ. அத்த²தோ பன ஸப்³ப³ம்பி தம் காயப்படிப³த்³த⁴மேவ ஹோதீதி த³ஸ்ஸேதி.

அகல்லகோதி கி³லானோ. முகே²ன படிக்³க³ண்ஹாதீதி ஸஹத்தே²ன க³ஹேத்வா பரிபு⁴ஞ்ஜிதும் அஸக்கோந்தோ முகே²ன படிக்³க³ண்ஹாதி. அபி⁴ஹடபா⁴ஜனதோ பதிதரஜம்பி வட்டதி அபி⁴ஹடத்தாதி அதி⁴ப்பாஹோ.

தஸ்மிம் ட²த்வாதி தாதி³ஸே ஹத்த²பாஸே ட²த்வா. யந்தி யம் பா⁴ரம். மஜ்ஜி²மோ புரிஸோதி தா²மமஜ்ஜி²மபுரிஸோ. வினயே பஞ்ஞத்தம் து³க்கடம் வினயது³க்கடம். தம் அனுபஸம்பன்னஸ்ஸ த³த்வாதி பிண்டா³ய சரித்வா விஹாரம் வா ஆஸனஸாலம் வா க³ந்த்வா தம் பி⁴க்க²ம் அனுபஸம்பன்னஸ்ஸ த³த்வா, இத³ஞ்ச புப்³பா³போ⁴க³ஸ்ஸ அனுரூபவஸேன வுத்தம். யஸ்மா பன தம் ‘‘அனுபஸம்பன்னஸ்ஸ த³ஸ்ஸாமீ’’தி சித்துப்பாத³மத்தேன தம்ஸந்தகம் நாம ந ஹோதி, தஸ்மா வினாபி தஸ்ஸ தா³னாதி³ம் படிக்³க³ஹேத்வா பரிபு⁴ஞ்ஜிதும் வட்டதி.

அஸ்ஸுகே²ளஸிங்கா⁴ணிகாதீ³ஸூதி ஏத்த² அஸ்ஸு நாம அக்கி²ஜலம். கே²ளோ நாம லாலா. ஸிங்கா⁴ணிகாதி அந்தோஸீஸதோ பூதிஸேம்ஹபா⁴வம் ஆபன்னம் மத்த²லுங்க³ம் க³லித்வா தாலுமத்த²கவிவரேன ஓதரித்வா நாஸாபுடே பூரேத்வா டி²தம் வுச்சதி, ஆதி³ஸத்³தே³ன முத்தகரீஸஸேம்ஹத³ந்தமலஅக்கி²கூ³த²கண்ணகூ³த²கானம், ஸரீரே உட்டி²தலோணஸ்ஸ ச க³ஹணம். டா²னதோதி அக்கி²கூபாதி³தோ. அந்தரா சே க³ண்ஹாதி, கிம் ஹோதீதி ஆஹ ‘‘உக்³க³ஹிதகம் நாம ஹோதீ’’தி, து³ட்டு² க³ஹிதகம் நாம ஹோதீதி அத்தோ². ப²லினிந்தி ப²லவந்தம். தத்த²ஜாதகப²லினிஸாகா²ய வாதி தஸ்மிம் ருக்கே² ஜாதாய ப²லினிஸாகா²ய வா. து³ருபசிண்ணது³க்கடந்தி ‘‘ந கத்தப்³ப³’’ந்தி வாரிதஸ்ஸ கதத்தா து³ட்டு² ஆசிண்ணம் சரிதந்தி து³ருபசிண்ணம், தஸ்மிம் து³க்கடம் து³ருபசிண்ணது³க்கடஞ்ச ஆபஜ்ஜதீதி அத்தோ².

ஆஹரீயதீதி ஆஹாரோ, அஜ்ஜோ²ஹரிதப்³ப³ம் யம் கிஞ்சி, இத⁴ பன சத்தாரி காலிகானி அதி⁴ப்பேதானீதி ஆஹ ‘‘யம் கிஞ்சீ’’திஆதி³. தத்த² அருணுக்³க³மனதோ யாவ டி²தமஜ்ஜ²ன்ஹிகா பு⁴ஞ்ஜிதப்³ப³தோ யாவ காலோ அஸ்ஸாதி யாவகாலிகம். அருணுக்³க³மனதோ யாவ யாமாவஸானா பிபாஸாய ஸதி பிபாஸச்சே²த³னத்த²ம் பாதப்³ப³தோ யாமோ காலோ அஸ்ஸாதி யாமகாலிகம். யாவ ஸத்தாஹம் நித³ஹித்வா பரிபு⁴ஞ்ஜிதப்³ப³தோ ஸத்தாஹம் காலோ அஸ்ஸாதி ஸத்தாஹகாலிகம். யாவஜீவம்பி பரிஹரித்வா பரிபு⁴ஞ்ஜிதப்³ப³தோ யாவ ஜீவம் ஏதஸ்ஸாதி யாவஜீவிகம். தேனாஹ ‘‘தத்தா²’’திஆதி³.

வனமூலபத்தபுப்ப²ப²லாதீ³தி ஏத்த² தாவ மூலம் நாம மூலககா²ரகசச்சுதம்ப³காதீ³னம் தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ஞ்சேவ போ⁴ஜனீயத்த²ஞ்ச ப²ரணகம் ஸூபேய்யபண்ணமூலம். பத்தம் நாம மூலககா²ரகசச்சுதம்ப³காதீ³னம் தாதி³ஸம்யேவ பத்தம். புப்ப²ம் நாம மூலககா²ரகாதீ³னம் தாதி³ஸம்யேவ புப்ப²ம். ப²லம் நாம பனஸலபு³ஜாதீ³னம் தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ஞ்சேவ போ⁴ஜனீயத்த²ஞ்ச ப²ரணகம் ப²லம். ஆதி³ஸத்³தே³ன கந்த³மூலாதீ³னம் க³ஹணம்.

அம்ப³பானந்தி (மஹாவ. அட்ட². 300) ஆமேஹி வா பக்கேஹி வா அம்பே³ஹி கதபானம். தத்த² ஆமேஹி கரோந்தேன அம்ப³தருணாதீ³னி பி⁴ந்தி³த்வா உத³கே பக்கி²பித்வா ஆதபே ஆதி³ச்சபாகேன பசித்வா பரிஸ்ஸாவேத்வா தத³ஹுபடிக்³க³ஹிதேஹி மது⁴ஸக்கரகப்பூராதீ³ஹி யோஜேத்வா காதப்³ப³ம். ஏவம் கதம் புரேப⁴த்தமேவ கப்பதி. அனுபஸம்பன்னேன கதம் லபி⁴த்வா பன புரேப⁴த்தம் படிக்³க³ஹிதம் புரேப⁴த்தம் ஸாமிஸபரிபோ⁴கே³னாபி வட்டதி, பச்சா²ப⁴த்தம் நிராமிஸபரிபோ⁴கே³ன யாவ அருணுக்³க³மனா வட்டதி. ஏஸ நயோ ஸப்³ப³பானேஸு.

தேஸு பன ஜம்பு³பானந்தி ஜம்பு³ப²லேஹி கதபானம். சோசபானந்தி அட்டி²கேஹி கத³லிப²லேஹி கதபானம். மோசபானந்தி அனட்டி²கேஹி கத³லிப²லேஹி கதபானம். மது⁴கபானந்தி மது⁴கானம் ஜாதிரஸேன கதபானம். தம் பன உத³கஸம்பி⁴ன்னம் வட்டதி, ஸுத்³த⁴ம் ந வட்டதி. முத்³தி³காபானந்தி முத்³தி³கா உத³கே மத்³தி³த்வா அம்ப³பானம் விய கதபானம். ஸாலூகபானந்தி ரத்துப்பலனீலுப்பலாதீ³னம் ஸாலூகே மத்³தி³த்வா கதபானம். பா²ருஸகபானந்தி பா²ருஸகேஹி அம்ப³பானம் விய கதபானம். இமினாவ நயேன வேத்தபானாதீ³னி வேதி³தப்³பா³னி. ஏதானி ச பன ஸப்³பா³னி பானானி அக்³கி³பாகானி ந வட்டந்தி. தேனாஹ ‘‘ஸீதோத³கேனா’’திஆதி³. அவஸேஸேஸுபி அனுஞ்ஞாதப²லபத்தபுப்ப²ரஸேஸூதி த⁴ஞ்ஞப²லபக்கஸாகமது⁴கபுப்ப²ரஸதோ அவஸேஸேஸு ‘‘அனுஜானாமி, பி⁴க்க²வே, ஸப்³ப³ம் ப²லரஸம் ட²பேத்வா த⁴ஞ்ஞப²லரஸ’’ந்திஆதி³னா (மஹாவ. 300) அனுஞ்ஞாதகேஸு ப²லபத்தபுப்ப²ரஸேஸுபி.

கா²த³னீயத்த²ந்தி கா²த³னீயேன கத்தப்³ப³கிச்சம். நேவ ப²ரதீதி ந நிப்பா²தே³தி. அனாஹாரேபி உத³கே ஆஹாரஸஞ்ஞாயாதி ‘‘ஆஹாரம் ஆஹரேய்யா’’தி பத³ஸ்ஸ பத³பா⁴ஜனே (பாசி. 265) வுத்தமத்த²ம் ஸம்மா அஸல்லக்கே²த்வா ‘‘ஆஹரீயதீதி ஆஹாரோ’’தி அனாஹாரேபி உத³கே ஆஹாரஸஞ்ஞாய குக்குச்சாயந்தானம். த³ந்தபோனே ச ‘‘முக²த்³வாரம் ஆஹடம் இத³’’ந்தி ஸஞ்ஞாயாதி முக²த்³வாரம் அனாஹடம்பி த³ந்தபோனம் ‘‘முக²த்³வாரம் ஆஹடம் இத³ம் த³ந்தபோன’’ந்தி விபல்லத்த²ஸஞ்ஞாய குக்குச்சாயந்தானம். யதா²ஸுக²ம் பாதுந்தி படிக்³க³ஹேத்வா வா அப்படிக்³க³ஹேத்வா வா யதா²காமம் பாதும். த³ந்தபோனபரிபோ⁴கே³னாதி த³ந்தகட்ட²பரிபோ⁴கே³ன, த³ந்ததோ⁴வனாதி³னாதி அத்தோ², இமினா தஸ்ஸ பன ரஸம் கி³லிதும் ந வட்டதீதி த³ஸ்ஸேதி.

சத்தாரி மஹாவிகடானீதி கூ³த²ம், முத்தம், சா²ரிகா, மத்திகா (மஹாவ. 268) ச ‘‘ஆஸயாதி³வஸேன விரூபானி ஜாதானீ’’தி கத்வா விகடானீதி வா அபகதிபோ⁴ஜனத்தா விகடானி ‘‘விரூபானி ஜாதானீ’’தி வா அத்தோ². ஸதி பச்சயேதி காரணே ஸதி, ஸப்பத³ட்டே²தி அத்தோ². தூ⁴மாதி³அப்³போ³ஹாரிகாபா⁴வோதி தூ⁴மபுப்ப²க³ந்த⁴த³ந்தக²யாதி³அப்³போ³ஹாரிகாபா⁴வோ.

த³ந்தபோனஸிக்கா²பத³வண்ணனா நிட்டி²தா.

போ⁴ஜனவக்³கோ³ சதுத்தோ².