10. ஸப்பாணகஸிக்கா²பத³வண்ணனா

ஏகஸ்மிம் க⁴டே ஏகாவ ஆபத்தீதி ஏகஸ்மிம் உத³கக⁴டே ஏகாவ ஆபத்தி. ஏஸ நயோ ஸப்³ப³பா⁴ஜனேஸு. விச்சி²ந்த³ந்தஸ்ஸாதி தா⁴ரம் விச்சி²ந்த³ந்தஸ்ஸ. ஏகேகம் பக்கி²பந்தஸ்ஸாதி ஏகேகம் திணம் வா பண்ணம் வா மத்திகம் வா அஞ்ஞம் வா கட்ட²கோ³மயாதி³ம் பக்கி²பந்தஸ்ஸ. பரியாதா³னந்தி க²யம்.

‘‘பதீ³பே (ஸாரத்த². டீ. பாசித்திய 3.140) பதித்வா படங்கா³தி³பாணகா மரிஸ்ஸந்தீ’’தி ஜானந்தஸ்ஸாபி குஸலசித்தேன பதீ³புஜ்ஜலனம் விய ‘‘ஸிஞ்சனேன பாணகா மரிஸ்ஸந்தீ’’தி புப்³ப³பா⁴கே³ ஜானந்தஸ்ஸாபி ‘‘இத³ம் ஜலம் ஸிஞ்சாமீ’’தி ஸிஞ்சந்தஸ்ஸ வத⁴கசித்தம் ந ஹோதீதி ஆஹ ‘‘வினா வத⁴கசேதனாயா’’திஆதி³. ஏவஞ்ச கத்வா ‘‘பண்ணத்திவஜ்ஜ’’ந்தி இத³ம்பி ஸமத்தி²தம் ஹோதி. திசித்தந்தி குஸலாகுஸலாப்³யாகதவஸேன திசித்தம். ததா² ஹி பண்ணத்திம் மத்³தி³த்வா ஸிஞ்சந்தஸ்ஸ வா ஸிஞ்சாபேந்தஸ்ஸ வா அகுஸலசித்தேன ஹோதி, ‘‘ஆஸனம் தோ⁴விஸ்ஸாமீ’’தி சித்தேன தோ⁴வனத்த²ம் ஸிஞ்சந்தஸ்ஸ வா ஸிஞ்சாபேந்தஸ்ஸ வா குஸலசித்தேன ஹோதி, பண்ணத்திம் அஜானதா அரஹதா ஸிஞ்சனாதி³கரணே அப்³யாகதசித்தேன ஹோதீதி குஸலாகுஸலாப்³யாகதசித்தவஸேன திசித்தம் ஹோதி.

ஸப்பாணகஸிக்கா²பத³வண்ணனா நிட்டி²தா.

பூ⁴தகா³மவக்³கோ³ து³தியோ.