1. முஸாவாத³வக்³கோ³

1. முஸாவாத³ஸிக்கா²பத³வண்ணனா

ஸம்பஜானமுஸாவாதே³தி ஏத்த² முஸாதி அபூ⁴தம் அதச்ச²ம் வத்து², வாதோ³தி தஸ்ஸ பூ⁴ததோ தச்ச²தோ விஞ்ஞாபனம், ஸம்பஜானஸ்ஸ முஸாவாதோ³ ஸம்பஜானமுஸாவாதோ³, தஸ்மிம் ஸம்பஜானமுஸாவாதே³தி அத்தோ². தேனாஹ ‘‘புப்³பே³’’திஆதி³. ஸோ ச பன முஸாவாதோ³ புப்³ப³பா⁴க³க்க²ணே, தங்க²ணே ச விஜானந்தஸ்ஸ ஹோதி ‘‘புப்³பே³வஸ்ஸ ஹோதி ‘முஸா ப⁴ணிஸ்ஸ’ந்தி, ப⁴ணந்தஸ்ஸ ஹோதி ‘முஸா ப⁴ணாமீ’’’தி (பாசி. 4) வுத்தத்தாதி ஆஹ ‘‘புப்³பே³பி ஜானித்வா வசனக்க²ணேபி ஜானந்தஸ்ஸா’’தி. ஏதஞ்ஹி த்³வயம் அங்க³பூ⁴தம், இதரம் பன ஹோது வா, மா வா, அகாரணமேதம். நனு சேதம் ப⁴ணனமேவ ஞாயதீதி ஆஹ ‘‘ப⁴ணனஞ்ச நாமா’’திஆதி³. அபூ⁴தஸ்ஸாதி அதச்ச²ஸ்ஸ.

ஹத்த²கம் ஸக்யபுத்தந்தி ஏத்த² ஹத்த²கோதி தஸ்ஸ தே²ரஸ்ஸ நாமம். ஸக்யானம் புத்தோதி ஸக்யபுத்தோ. பு³த்³த⁴காலே கிர ஸக்யகுலதோ அஸீதி புரிஸஸஹஸ்ஸானி பப்³ப³ஜிம்ஸு, தேஸம் ஸோ அஞ்ஞதரோ. அவஜானித்வா படிஜானனாதி³வத்து²ஸ்மிந்தி ஏத்த² அவஜானித்வா படிஜானனம் நாம தித்தி²யேஹி ஸத்³தி⁴ம் கதே²ந்தோ அத்தனோ வாதே³ கஞ்சி தோ³ஸம் ஸல்லக்கே²ந்தோ ‘‘நாயம் மம வாதோ³’’தி அவஜானித்வா புன கதே²ந்தோ கதே²ந்தோ நித்³தோ³ஸதம் ஸல்லக்கே²த்வா ‘‘மமேவ அயம் வாதோ³’’தி படிஜானாதி. ஆதி³ஸத்³தே³ன படிஜானித்வா அவஜானனம், அஞ்ஞேனஞ்ஞம் படிசரணம், ஸம்பஜானமுஸாபா⁴ஸனம், ஸங்கேதம் கத்வா விஸம்வாத³கரணஞ்ச ஸங்க³ண்ஹாதி. இதா³னி ஆபத்திபே⁴த³த³ஸ்ஸனத்த²ம் ‘‘உத்தரிமனுஸ்ஸத⁴ம்மாரோசனத்த²’’ந்திஆதி³ வுத்தம்.

அனுபதா⁴ரேத்வா ஸஹஸா ப⁴ணந்தஸ்ஸாதி அவீமம்ஸித்வா வேகே³ன தி³ட்ட²ம்பி ‘‘அதி³ட்ட²ம் மே’’திஆதி³னா ப⁴ணந்தஸ்ஸ. ‘‘அஞ்ஞம் ப⁴ணிஸ்ஸாமீ’’தி அஞ்ஞம் ப⁴ணந்தஸ்ஸாதி யோ மந்த³த்தா மோமூஹத்தா பக்க²லந்தோ ‘‘சீவர’’ந்தி வத்தப்³பே³ ‘‘சீர’’ந்திஆதீ³னி ப⁴ணதி, அயம் ‘‘அஞ்ஞம் ப⁴ணிஸ்ஸாமீ’’தி அஞ்ஞம் ப⁴ணதி நாம. யோ பன ஸாமணேரேன ‘‘அபி, ப⁴ந்தே, மய்ஹம் உபஜ்ஜா²யம் பஸ்ஸித்தா²’’தி வுத்தோ கேளிம் குருமானோ ‘‘தவ உபஜ்ஜா²யோ தா³ருஸகடம் யோஜேத்வா க³தோ ப⁴விஸ்ஸதீ’’தி வா ஸிங்கா³லஸத்³த³ம் ஸுத்வா ‘‘கஸ்ஸாயம் ஸத்³தோ³’’தி வுத்தோ ‘‘மாதுயா தே யானேன க³ச்ச²ந்தியா கத்³த³மே லக்³க³சக்கம் உத்³த⁴ரந்தானம் அயம் ஸத்³தோ³’’தி வா ஏவம் நேவ த³வா, ந ரவா அஞ்ஞம் ப⁴ணதி, ஸோ ஆபத்திம் ஆபஜ்ஜதியேவ. அஞ்ஞா பூரணகதா² நாம ஹோதி – ஏகோ கா³மே தோ²கம் தேலம் லபி⁴த்வா விஹாரம் ஆக³தோ ஸாமணேரம் ப⁴ணதி ‘‘த்வம் அஜ்ஜ குஹிம் க³தோ, கா³மோ ஏகதேலோ அஹோஸீ’’தி வா, பச்சி²காய ட²பிதம் பூவக²ண்ட³ம் லபி⁴த்வா ‘‘அஜ்ஜ கா³மே பச்சி²காஹி பூவே சாரேஸு’’ந்தி வா, அயம் முஸாவாதோ³வ ஹோதி. விஸம்வாத³னபுரேக்கா²ரதாதி விஸம் வாதே³ந்தி ஏதேனாதி விஸம்வாத³னம், வஞ்சனாதி⁴ப்பாயவஸப்பவத்தம் சித்தம், தஸ்ஸ புரேக்கா²ரதா விஸம்வாத³னபுரேக்கா²ரதா, விஸம்வாத³னசித்தஸ்ஸ புரதோ கரணந்தி அத்தோ².

முஸாவாத³ஸிக்கா²பத³வண்ணனா நிட்டி²தா.

2. ஓமஸவாத³ஸிக்கா²பத³வண்ணனா

ஓமஸவாதே³தி கு²ம்ஸனக³ரஹணவசனே. யஸ்மா பன தம் நேவ கண்ணஸுக²ம், ந ஹத³யஸுக²ம், தஸ்மா தேன கண்ணஞ்சேவ ஹத³யஞ்ச விஜ்ஜ²தீதி ஆஹ ‘‘ஓவிஜ்ஜ²னவசனே’’தி, ஜாதிஆதீ³ஹி க⁴டேத்வா வசனேதி வுத்தம் ஹோதி. தேனாஹ ‘‘ஜாதினாமா’’திஆதி³. தத்த² ஜாதி நாம ப்³ராஹ்மணாதி³ உக்கட்டா² சேவ சண்டா³லாதி³ ஹீனா ச ஜாதி. நாமம் நாம அவகண்ணகாதி³ ஹீனஞ்சேவ பு³த்³த⁴ரக்கி²தாதி³ உக்கட்ட²ஞ்ச நாமம். கோ³த்தம் நாம கோஸியாதி³ ஹீனஞ்சேவ கோ³தமாதி³ உக்கட்ட²ஞ்ச கோ³த்தம். கம்மம் நாம புப்ப²ச²ட்³ட³காதி³ ஹீனஞ்சேவ கஸிவணிஜ்ஜாதி³ உக்கட்ட²ஞ்ச கம்மம். ஸிப்பம் நாம நளகாராதி³ ஹீனஞ்சேவ முத்³தா³க³ணனாதி³ உக்கட்ட²ஞ்ச ஸிப்பம். ஆபா³தோ⁴ நாம ஸப்³போ³பி ரோகோ³ ஹீனோயேவ. அத² வா மது⁴மேஹோ உக்கட்டோ², ஸேஸோ ஹீனோதி வேதி³தப்³போ³. லிங்க³ம் நாம அதிதீ³கா⁴தி³ ஹீனஞ்சேவ நாதிதீ³கா⁴தி³ உக்கட்ட²ஞ்ச லிங்க³ம். கிலேஸோ நாம ராகா³தி³கோ ஸப்³போ³பி கிலேஸோ. ஆபத்தி நாம ஸோதாபத்தாதி³கா உக்கட்டா² சேவ பாராஜிகாதி³ அனுக்கட்டா² ச ஆபத்தி. அக்கோஸோ நாம ‘‘ஓட்டோ²ஸீ’’திஆதி³கோ ஹீனோ சேவ ‘‘பண்டி³தோஸீ’’திஆதி³கோ (பாசி. 15) உக்கட்டோ² ச அக்கோஸோ.

யதா² ததா²தி பாளிஆக³தானாக³தபதா³னம் யேன கேனசி ஆகாரேன. இமஸ்மிம் ஸிக்கா²பதே³ ட²பேத்வா பி⁴க்கு²ம் பி⁴க்கு²னிஆத³யோ ஸப்³பே³ ஸத்தா அனுபஸம்பன்னட்டா²னே டி²தாதி ஆஹ ‘‘இத⁴ சா’’திஆதி³. த³வகம்யதா நாம கேளிஹஸாதி⁴ப்பாயதா. ஸப்³ப³த்தா²தி உபஸம்பன்னானுபஸம்பன்னேஸு சேவ பாளிஆக³தானாக³தபதே³ஸு சாதி ஸப்³ப³த்த². அத்த²த⁴ம்மஅனுஸாஸனிபுரேக்கா²ரானந்தி ஏத்த² ‘‘சண்டா³லோஸீ’’திஆதி³காய பாளியா அத்த²ம் வண்ணேந்தோ அத்த²புரேக்கா²ரோ நாம. பாளிம் வாசேந்தோ த⁴ம்மபுரேக்கா²ரோ நாம. அனுஸிட்டி²யம் ட²த்வா ‘‘இதா³னிபி சண்டா³லோஸி, பாபம் மா அகாஸி. மா தமோதமபராயணோ அஹோஸீ’’திஆதி³னா (பாசி. அட்ட². 35) நயேன கதே²ந்தோ அனுஸாஸனிபுரேக்கா²ரோ நாமாதி வேதி³தப்³போ³.

ஓமஸவாத³ஸிக்கா²பத³வண்ணனா நிட்டி²தா.

3. பேஸுஞ்ஞஸிக்கா²பத³வண்ணனா

பி⁴க்கு²பேஸுஞ்ஞேதி பிஸதீதி பிஸுணா, யாய வாசாய ஸமக்³கே³ ஸத்தே அவயவபூ⁴தே வக்³கே³ பி⁴ன்னே கரோதி, ஸா வாசா பிஸுணா, பிஸுணா ஏவ பேஸுஞ்ஞம், தாய வாசாய ஸமன்னாக³தோ பிஸுணோ, தஸ்ஸ கம்மம் பேஸுஞ்ஞம், பி⁴க்கு²ஸ்ஸ பேஸுஞ்ஞம் பி⁴க்கு²பேஸுஞ்ஞம், தஸ்மிம் பி⁴க்கு²பேஸுஞ்ஞே, பி⁴க்கு²தோ ஸுத்வா பி⁴க்கு²னா, பி⁴க்கு²ஸ்ஸ வா உபஸம்ஹடபேஸுஞ்ஞேதி அத்தோ². தேனாஹ ‘‘ஜாதிஆதீ³ஹீ’’திஆதி³. தஞ்ச கோ² த்³வீஹி காரணேஹி உபஸம்ஹரதீதி ஆஹ ‘‘பி⁴க்கு²னோ பியகம்யதாய வா’’திஆதி³. தத்த² பி⁴க்கு²னோ பியகம்யதாயாதி யஸ்ஸ தம் பா⁴ஸதி, தஸ்ஸ பி⁴க்கு²னோ ‘‘ஏவமஹம் ஏதஸ்ஸ பியோ ப⁴விஸ்ஸாமீ’’தி அத்தனோ பியபா⁴வம் பத்த²யமானதாய. பே⁴தா³தி⁴ப்பாயேனாதி ‘‘ஏவமயம் தேன ஸத்³தி⁴ம் பி⁴ஜ்ஜிஸ்ஸதீ’’தி பரஸ்ஸ பரேன பே⁴த³ம் இச்ச²ந்தேன. அத² வா பியஸுஞ்ஞகரணதோ பேஸுஞ்ஞம் (ஸாரத்த². டீ. பாசித்திய 3.36) நிருத்தினயேன, யாய வாசாய யஸ்ஸ தம் பா⁴ஸதி, தஸ்ஸ ஹத³யே அத்தனோ பியபா⁴வம், பரஸ்ஸ ச ஸுஞ்ஞபா⁴வம் கரோதி, ஸா வாசா, ‘‘பி⁴க்கு²ஸ்ஸ பேஸுஞ்ஞம் பி⁴க்கு²பேஸுஞ்ஞ’’ந்திஆதி³னா ஏவம்பேத்த² அத்தோ² த³ட்ட²ப்³போ³. ‘‘வுத்தனயேனேவாதி ‘‘ஜாதிஆதீ³ஹி அக்கோஸவத்தூ²ஹீ’’திஆதி³னா வுத்தனயேன.

பாளிமுத்தகஅக்கோஸூபஸம்ஹாரேதி ‘‘சோரோஸீ’’திஆதி³னா அக்கோஸஸ்ஸ உபஸம்ஹாரே. ‘‘அனக்கோஸவத்து²பூ⁴தம் பன பேஸுஞ்ஞகரம் தஸ்ஸ கிரியம், வசனம் வா பியகம்யதாய உபஸம்ஹரந்தஸ்ஸ கிஞ்சாபி இமினா ஸிக்கா²பதே³ன ஆபத்தி ந தி³ஸ்ஸதி, ததா²பி து³க்கடேன ப⁴விதப்³ப³’’ந்தி (ஸாரத்த². டீ. பாசித்திய 3.36) வத³ந்தி. பாபக³ரஹிதாய வத³ந்தஸ்ஸாதி ஏகம் அக்கோஸந்தம், ஏகஞ்ச க²மந்தம் தி³ஸ்வா ‘‘அஹோ நில்லஜ்ஜோ, ஈதி³ஸம்பி நாம ப⁴வந்தம் புன வத்தப்³ப³ம் மஞ்ஞிஸ்ஸதீ’’தி ஏவம் கேவலம் பாபக³ரஹிதாய ப⁴ணந்தஸ்ஸ.

பேஸுஞ்ஞஸிக்கா²பத³வண்ணனா நிட்டி²தா.

4. பத³ஸோத⁴ம்மஸிக்கா²பத³வண்ணனா

பத³ஸோ த⁴ம்மம் வாசேய்யாதி ஏகதோ பத³ம் பத³ம் த⁴ம்மம் வாசேய்ய, கோட்டா²ஸம் கோட்டா²ஸம் வாசேய்யாதி அத்தோ². யஸ்மா ந கேவலம் திஸ்ஸோ ஸங்கீ³தியோ ஆருள்ஹத⁴ம்மம்யேவ பத³ஸோ வாசேந்தஸ்ஸ ஆபத்தி, தஸ்மா ‘‘ஸங்கீ³தித்தயம் அனாருள்ஹம்பீ’’திஆதி³ வுத்தம். ஆதி³-ஸத்³தே³ன (பாசி. அட்ட². 45) ஸீலூபதே³ஸ து⁴தங்க³பஞ்ஹஆரம்மணகதா² பு³த்³தி⁴கத³ண்ட³கஞ்ஞாணவத்து²அஸுப⁴கதா²தீ³னம் க³ஹணம். மேண்ட³கமிலிந்த³பஞ்ஹேஸு தே²ரஸ்ஸ ஸகப்படிபா⁴னே அனாபத்தி. யம் ரஞ்ஞோ ஸஞ்ஞாபனத்த²ம் ஆஹரித்வா வுத்தம், தத்த² ஆபத்தி. வண்ணபிடகஅங்கு³லிமாலபிடகரட்ட²பாலக³ஜ்ஜிதஆளவகக³ஜ்ஜிதகூ³ள்ஹமக்³க³கூ³ள்ஹவேஸ்ஸந்தரகூ³ள்ஹவினயவேத³ல்லபிடகாதீ³னி பன அபு³த்³த⁴வசனானியேவ.

யஸ்மா பன தம் பத³ம் சதுப்³பி³த⁴ம் ஹோதி, தஸ்மா தம் த³ஸ்ஸேதும் ‘‘பதா³னுபத³அன்வக்க²ரானுப்³யஞ்ஜனேஸூ’’தி வுத்தம். தத்த² பத³ந்தி ஏகோ கா³தா²பாதோ³ அதி⁴ப்பேதோ. அனுபத³ந்தி து³தியபாதோ³. அன்வக்க²ரந்தி ஏகேகம் அக்க²ரம். அனுப்³யஞ்ஜனந்தி புரிமப்³யஞ்ஜனேன ஸதி³ஸம் பச்சா²ப்³யஞ்ஜனம். யம் கிஞ்சி வா ஏகம் அக்க²ரம் அன்வக்க²ரம். அக்க²ரஸமூஹோ அனுப்³யஞ்ஜனம். அக்க²ரானுப்³யஞ்ஜனஸமூஹோ பத³ம். பட²மம் பத³ம் பத³மேவ, து³தியம் அனுபத³ந்தி ஏவமேத்த² நானாகரணம் வேதி³தப்³ப³ம். ஏதேஸு பதா³தீ³ஸு யம் கஞ்சி கோட்டா²ஸம் பி⁴க்கு²ஞ்ச பி⁴க்கு²னிஞ்ச ட²பேத்வா அவஸேஸபுக்³க³லேஹி ஸத்³தி⁴ம் ஏகதோ ப⁴ணந்தஸ்ஸ பதா³தி³க³ணனாய பாசித்தியந்தி ஸம்ப³ந்தோ⁴.

ஏத்த² கா³தா²ப³ந்தே⁴ஸு (பாசி. அட்ட². 45) தாவ ‘‘மனோபுப்³ப³ங்க³மா த⁴ம்மா’’தி (த⁴. ப. 1, 2) ஏகமேகம் பத³ம் ஸாமணேரேன ஸத்³தி⁴ம் ஏகதோ ஆரபி⁴த்வா ஏகதோயேவ நிட்டா²பேந்தஸ்ஸ பத³க³ணனாய பாசித்தியம். தே²ரேன ‘‘மனோபுப்³ப³ங்க³மா த⁴ம்மா’’தி வுத்தே தம் பத³ம் அபாபுணித்வா ‘‘மனோஸேட்டா² மனோமயா’’தி வசனகாலே பத்தேன ஸாமணேரேன ஏகதோ ப⁴ணந்தஸ்ஸ அனுபத³க³ணனாய. ‘‘ரூபம் அனிச்ச’’ந்திஆதி³ (ம. நி. 1.353, 356) வசனகாலே தேன ஸத்³தி⁴ம் ‘‘ரூ’’ காரமத்தமேவ வாசேந்தஸ்ஸ அன்வக்க²ரக³ணனாய. ஏஸ நயோ கா³தா²ப³ந்தே⁴பி. ‘‘ரூபம், பி⁴க்க²வே, அனிச்சம், வேத³னா அனிச்சா’’தி (ம. நி. 1.353, 356) இமம் ஸுத்தம் வாசயமானோ தே²ரேன ‘‘ரூபம் அனிச்ச’’ந்தி வுச்சமானே ஸாமணேரோ ஸீக⁴பஞ்ஞதாய ‘‘வேத³னா அனிச்சா’’தி இமம் அனிச்சபத³ம் தே²ரஸ்ஸ ‘‘ரூபம் அனிச்ச’’ந்தி ஏதேன அனிச்சபதே³ன ஸத்³தி⁴ம் ஏகதோ ப⁴ணந்தோ வாசம் நிச்சா²ரேதி, ஏவம் வாசேந்தஸ்ஸ அனுப்³யஞ்ஜனக³ணனாய பாசித்தியந்தி வேதி³தப்³ப³ம்.

திகபாசித்தியந்தி அனுபஸம்பன்னே அனுபஸம்பன்னஸஞ்ஞிவேமதிகஉபஸம்பன்னஸஞ்ஞீனம் வஸேன தீணி பாசித்தியானி. அனுபஸம்பன்னேன ஸத்³தி⁴ம் ஏகதோ உத்³தே³ஸக்³க³ஹணே ஏகதோ ப⁴ணந்தஸ்ஸ அனாபத்தீதி ஸம்ப³ந்தோ⁴. ஏஸ நயோ ‘‘ஸஜ்ஜா²யகரணே, தஸ்ஸ ஸந்திகே உத்³தே³ஸக்³க³ஹணே’’தி ஏத்தா²பி. தத்ராயம் வினிச்ச²யோ – உபஸம்பன்னோ ச அனுபஸம்பன்னோ ச நிஸீதி³த்வா உத்³தி³ஸாபேந்தி. ஆசரியோ ‘‘நிஸின்னானம் ப⁴ணாமீ’’தி தேஹி ஸத்³தி⁴ம் ஏகதோ வத³தி, ஆசரியஸ்ஸேவ ஆபத்தி. அனுபஸம்பன்னேன ஸத்³தி⁴ம் க³ண்ஹந்தஸ்ஸ அனாபத்தி. த்³வேபி டி²தா க³ண்ஹந்தி, ஏஸேவ நயோ. த³ஹரபி⁴க்கு² நிஸின்னோ, ஸாமணேரோ டி²தோ, ‘‘நிஸின்னஸ்ஸ ப⁴ணாமீ’’தி ப⁴ணதோ அனாபத்தி. ஸசே த³ஹரோ திட்ட²தி, இதரோ நிஸீத³தி, ‘‘டி²தஸ்ஸ ப⁴ணாமீ’’தி ப⁴ணதோபி அனாபத்தி. ஸசே ப³ஹூனம் பி⁴க்கூ²னம் அந்தரே ஏகோ ஸாமணேரோ நிஸின்னோ ஹோதி, தஸ்மிம் நிஸின்னே பத³ஸோ த⁴ம்மம் வாசேந்தஸ்ஸ அசித்தகா ஆபத்தி. ஸசே ஸாமணேரோ உபசாரம் முஞ்சித்வா டி²தோ வா நிஸின்னோ வா ஹோதி, யேஸம் வாசேதி, தேஸு அபரியாபன்னத்தா ஏகேன தி³ஸாபா⁴கே³ன பலாயனகக³ந்த²ம் நாம க³ண்ஹாதீதி ஸங்க²ம் க³ச்ச²தி, தஸ்மா அனாபத்தி.

ஸஜ்ஜா²யகரணேதி அனுபஸம்பன்னேன ஸத்³தி⁴ம் ஏகதோ ஸஜ்ஜா²யகரணே. தஸ்ஸ ஸந்திகே உத்³தே³ஸக்³க³ஹணேதி அனுபஸம்பன்னஸ்ஸ ஸந்திகே உத்³தே³ஸக்³க³ஹணே. யேபு⁴ய்யேன பகு³ணக³ந்த²ம் ப⁴ணந்தஸ்ஸாதி ஸசே ஏககா³தா²ய ஏகோ பாதோ³ நாக³ச்ச²தி, அவஸேஸா ஆக³ச்ச²ந்தி, அயம் யேபு⁴ய்யேன பகு³ணக³ந்தோ² நாம. ஏதேன நயேன ஸுத்தேபி வேதி³தப்³போ³, தம் ப⁴ணந்தஸ்ஸ. ஓஸாரேந்தஸ்ஸ சாதி பரிஸாமஜ்ஜே² ஸுத்தம் உச்சாரேந்தஸ்ஸ ச.

பத³ஸோத⁴ம்மஸிக்கா²பத³வண்ணனா நிட்டி²தா.

5. பட²மஸஹஸேய்யஸிக்கா²பத³வண்ணனா

இத⁴ ‘‘பி⁴க்கு²ம் ட²பேத்வா அவஸேஸோ அனுபஸம்பன்னோ நாமா’’தி (பாசி. 52) வசனதோ திரச்சா²னக³தோபி அனுபஸம்பன்னோயேவ, ஸோ ச கோ² ந ஸப்³போ³, மேது²னத⁴ம்மாபத்தியா வத்து²பூ⁴தோவாதி ஆஹ ‘‘அந்தமஸோ’’திஆதி³. தஸ்ஸ ச பரிச்சே²தோ³ மேது²னத⁴ம்மாபத்தியா வுத்தனயேனேவ வேதி³தப்³போ³. தி³ரத்ததிரத்தந்தி ஏத்த² தி³ரத்தவசனேன ந கோசி விஸேஸத்தோ² லப்³ப⁴தி, கேவலம் லோகவோஹாரவஸேன ப்³யஞ்ஜனஸிலிட்ட²தாய, முகா²ருள்ஹதாய ஏவம் வுத்தந்தி வேதி³தப்³ப³ம். த்³வின்னம் வா திண்ணம் வா ரத்தீனந்தி பன வசனத்த²மத்தத³ஸ்ஸனத்த²ம் வுத்தம், நிரந்தரதிரத்தத³ஸ்ஸனத்த²ம் வா தி³ரத்தக்³க³ஹணம் கதந்தி த³ட்ட²ப்³ப³ம். ஸஹஸேய்யந்தி ஏகதோ ஸேய்யம். ஸேய்யாதி ச காயப்பஸாரணஸங்கா²தம் ஸயனம்பி வுச்சதி ‘‘ஸயனம் ஸேய்யா’’தி கத்வா, யஸ்மிம் ஸேனாஸனே ஸயந்தி, தம்பி ‘‘ஸயந்தி ஏத்தா²தி ஸேய்யா’’தி கத்வா. தது³ப⁴யம்பி இத⁴ ஸாமஞ்ஞேன, ஏகஸேஸனயேன வா க³ஹிதந்தி ஆஹ ‘‘ஸப்³ப³ச்ச²ன்னபரிச்ச²ன்னே’’திஆதி³.

தத்த² யம் ஸேனாஸனம் உபரி பஞ்சஹி ச²த³னேஹி (பாசி. அட்ட². 51), அஞ்ஞேன வா கேனசி அந்தமஸோ வத்தே²னாபி ஸப்³ப³மேவ பரிச்ச²ன்னம், பூ⁴மிதோ பட்டா²ய யாவ ச²த³னம் ஆஹச்ச, அனாஹச்சாபி வா ஸப்³ப³ந்திமேன பரியாயேன தி³யட்³ட⁴ஹத்து²ப்³பே³தே⁴ன பாகாரேன வா அஞ்ஞேன வா கேனசி அந்தமஸோ வத்தே²னாபி பரிக்கி²த்தம், இத³ம் ஸப்³ப³ச்ச²ன்னஸப்³ப³பரிச்ச²ன்னம் நாம. யஸ்ஸ பன உபரி ப³ஹுதரம் டா²னம் ச²ன்னம், அப்பம் அச்ச²ன்னம், ஸமந்ததோ ச ப³ஹுதரம் பரிக்கி²த்தம், அப்பம் அபரிக்கி²த்தம், இத³ம் யேபு⁴ய்யேன ச²ன்னம் யேபு⁴ய்யேன பரிச்ச²ன்னம் நாம. தஸ்மிம் ஸப்³ப³ச்ச²ன்னபரிச்ச²ன்னே, யேபு⁴ய்யேன ச²ன்னபரிச்ச²ன்னே வா.

வித³ஹேய்யாதி கரேய்ய, தஞ்ச கோ² அத்த²தோ ஸம்பாத³னந்தி ஆஹ ‘‘ஸம்பாதே³ய்யா’’தி. அயஞ்ஹேத்த² ஸங்கே²பத்தோ² ‘‘ஸேனாஸனஸங்கா²தம் ஸேய்யம் பவிஸித்வா காயப்பஸாரணஸங்கா²தம் ஸேய்யம் கப்பேய்ய வித³ஹேய்ய ஸம்பாதே³ய்யா’’தி. தி³யட்³ட⁴ஹத்து²ப்³பே³தோ⁴ வட்³ட⁴கிஹத்தே²ன க³ஹேதப்³போ³. ஏகூபசாரோதி வலஞ்ஜனத்³வாரஸ்ஸ ஏகத்தம் ஸந்தா⁴ய வுத்தம். ஸதக³ப்³ப⁴ம் வா சதுஸாலம் ஏகூபசாரம் ஹோதீதி ஸம்ப³ந்தோ⁴. தத்த² வாதி புரிமபுரிமதி³வஸே யத்த² வுட்ட²ம், தஸ்மிம்யேவ ஸேனாஸனே வா. அஞ்ஞத்த² வா தாதி³ஸேதி யதா²வுத்தலக்க²ணேன ஸமன்னாக³தே அஞ்ஞஸ்மிம் புப்³பே³ அவுட்ட²ஸேனாஸனே வா. தேன வாதி யேன ஸஹ புரிமபுரிமதி³வஸே வுட்ட²ம், தேன வா. அஞ்ஞேன வாதி யேன ஸஹ புரிமபுரிமஸ்மிம் தி³வஸே வுட்ட²ம், ததோ அஞ்ஞேன வா. ஸங்கே²போதி ஸங்கே²பவண்ணனா. யதி³ ஏவம் வித்தா²ரோ கத²ம் வேதி³தப்³போ³தி ஆஹ ‘‘வித்தா²ரோ பனா’’திஆதி³.

உபட்³ட⁴ச்ச²ன்னபரிச்ச²ன்னாதீ³ஸூதி ஆதி³ஸத்³தே³ன ‘‘ஸப்³ப³ச்ச²ன்னே சூளகபரிச்ச²ன்னே து³க்கடம், யேபு⁴ய்யேன ச²ன்னே சூளகபரிச்ச²ன்னே து³க்கடம், ஸப்³ப³பரிச்ச²ன்னே சூளகச்ச²ன்னே து³க்கடம், யேபு⁴ய்யேன பரிச்ச²ன்னே சூளகச்ச²ன்னே து³க்கட’’ந்தி (பாசி. அட்ட². 53) அட்ட²கதா²யம் வுத்தானம் க³ஹணம். ததியாய ரத்தியா புராருணா நிக்க²மித்வா புன வஸந்தஸ்ஸாதி ததியாய ரத்தியா அருணதோ புரேதரமேவ நிக்க²மித்வா அருணம் ப³ஹி உட்டா²பேத்வா சதுத்த²தி³வஸே அத்த²ங்க³தே ஸூரியே புன வஸந்தஸ்ஸ. ஸப்³ப³ச்ச²ன்னஸப்³பா³பரிச்ச²ன்னாதீ³ஸூதி ஏத்த² பன ஆதி³ஸத்³தே³ன ‘‘ஸப்³ப³பரிச்ச²ன்னே ஸப்³ப³அச்ச²ன்னே, யேபு⁴ய்யேன அச்ச²ன்னே யேபு⁴ய்யேன அபரிச்ச²ன்னே’’தி (பாசி. 54) பாளியம் ஆக³தானம், ‘‘உபட்³ட⁴ச்ச²ன்னே சூளகபரிச்ச²ன்னே அனாபத்தி, உபட்³ட⁴பரிச்ச²ன்னே சூளகச்ச²ன்னே அனாபத்தி, சூளகச்ச²ன்னே சூளகபரிச்ச²ன்னே அனாபத்தீ’’தி (பாசி. அட்ட². 53) அட்ட²கதா²யம் ஆக³தானஞ்ச க³ஹணம்.

பட²மஸஹஸேய்யஸிக்கா²பத³வண்ணனா நிட்டி²தா.

6. து³தியஸஹஸேய்யஸிக்கா²பத³வண்ணனா

மனுஸ்ஸித்தி²யாதி ஜீவமானகமனுஸ்ஸித்தி²யா. ‘‘மதித்தீ² பன கிஞ்சாபி பாராஜிகவத்து²பூ⁴தா, அனுபாதி³ன்னபக்கே² பன டி²தத்தா ஸஹஸேய்யாபத்திம் ந கரோதீ’’தி (வஜிர. டீ. பாசித்திய 55) வத³ந்தி. அதி³ஸ்ஸமானரூபாஹி பன யக்கி²பேதீஹி, மேது²னஸ்ஸ அவத்து²பூ⁴தாய ச திரச்சா²னக³தித்தி²யா அனாபத்தி. பட²மதி³வஸேபீதி பட²மஸ்மிம் விய ஸிக்கா²பதே³ ந சதுத்தே²யேவ தி³வஸே, அத² கோ² இத⁴ பட²மதி³வஸேபீதி அத்தோ². இமினா இத⁴ தி³வஸபரிச்சே²தோ³ நத்தீ²தி த³ஸ்ஸேதி. அங்கே³ஸு பன பாசித்தியவத்து²கஸேனாஸனம், தத்த² மாதுகா³மேன ஸஹ நிபஜ்ஜனம், ஸூரியத்த²ங்க³மனந்தி தீணி அங்கா³னீதி அயம்பி விஸேஸோ த³ட்ட²ப்³போ³.

து³தியஸஹஸேய்யஸிக்கா²பத³வண்ணனா நிட்டி²தா.

7. த⁴ம்மதே³ஸனாஸிக்கா²பத³வண்ணனா

ச²ப்பஞ்சவாசாஹீதி ச²ஹி பஞ்சஹி வாசாஹி. வாசாபரிச்சே²தோ³ பனேத்த² கத²ம் வேதி³தப்³போ³தி ஆஹ ‘‘உத்தரி ச²ப்பஞ்சவாசாஹீ’’திஆதி³. ஸப்³ப³த்தா²தி ஸுத்தே, அட்ட²கதா²யஞ்ச. ஸசே அட்ட²கத²ம், த⁴ம்மபத³ம், ஜாதகாதி³வத்து²ம் வா கதே²துகாமோ ஹோதி, ச²ப்பத³மத்தமேவ கதே²தும் வட்டதி. பாளியா ஸத்³தி⁴ம் கதே²ந்தேன ஏகம் பத³ம் பாளிதோ, பஞ்ச அட்ட²கதா²தோதி ஏவம் ச² பதா³னி அனதிக்கமித்வாவ கதே²தப்³போ³. புரிஸேனாதி மனுஸ்ஸபுரிஸேன. தேனாஹ ‘‘மனுஸ்ஸவிக்³க³ஹம் க³ஹேத்வா பனா’’திஆதி³.

திகபாசித்தியந்தி மாதுகா³மே மாதுகா³மஸஞ்ஞிவேமதிகஅமாதுகா³மஸஞ்ஞீனம் வஸேன தீணி பாசித்தியானி. அஞ்ஞஸ்ஸ வா மாதுகா³மஸ்ஸாதி ஏகஸ்ஸ மாதுகா³மஸ்ஸ தே³ஸேத்வா நிஸின்னே புன ஆக³தஸ்ஸ அஞ்ஞஸ்ஸ மாதுகா³மஸ்ஸ, ஏவம் பன ஏகாஸனே நிஸின்னேன மாதுகா³மஸதஸ்ஸாபி தே³ஸேதும் வட்டதி. ‘‘விஞ்ஞுமனுஸ்ஸித்தி²யா’’தி வசனதோ அவிஞ்ஞித்தி²யாபி தே³ஸயதோ அனாபத்தி. இரியாபத²பரிவத்தாபா⁴வோதி அத்தனோ வா மாதுகா³மஸ்ஸ வா இரியாபத²பரிவத்தாபா⁴வோ. கப்பியகாரகஸ்ஸாபா⁴வோதி விஞ்ஞுஸ்ஸ கப்பியகாரகஸ்ஸாபா⁴வோ, து³தியானியதே வுத்தலக்க²ணஸ்ஸ மனுஸ்ஸஸ்ஸ அபா⁴வோதி வுத்தம் ஹோதி. கிரியாகிரியந்தி ஏத்த² உத்தரி ச²ப்பஞ்சவாசாஹி த⁴ம்மதே³ஸனா கிரியா, கப்பியகாரகஸ்ஸ அக்³க³ஹணம் அகிரியாதி த³ட்ட²ப்³ப³ம்.

த⁴ம்மதே³ஸனாஸிக்கா²பத³வண்ணனா நிட்டி²தா.

8. பூ⁴தாரோசனஸிக்கா²பத³வண்ணனா

நிப்பரியாயேனாதி ‘‘பட²மம் ஜா²னம் ஸமாபஜ்ஜி’’ந்திஆதி³னா (பாசி. 71) உஜுகமேவ. பரியாயேன ஆரோசிதந்தி ‘‘யோ தே விஹாரே வஸி, ஸோ பி⁴க்கு² பட²மம் ஜா²னம் ஸமாபஜ்ஜி, ஸமாபஜ்ஜதி, ஸமாபன்னோ’’திஆதி³னா (பாசி. 75) அஞ்ஞாபதே³ஸேன ப⁴ணிதம். பரினிப்³பா³னகாலே (பாசி. அட்ட². 77), பன அந்தரா வா அதிகட்³டி⁴யமானேன உபஸம்பன்னஸ்ஸ பூ⁴தம் ஆரோசேதும் வட்டதி. அனதிகட்³டி⁴யமானேனாபி (ஸாரத்த². டீ. பாசித்திய 3.77) ததா²ரூபே காரணே ஸதி ஆரோசேதும் வட்டதியேவ. தேனேவ அஞ்ஞதரேன த³ஹரபி⁴க்கு²னா உபவதி³தோ அஞ்ஞதரோ தே²ரோ ‘‘ஆவுஸோ, உபரிமக்³க³த்தா²ய வாயாமம் மா அகாஸி, கீ²ணாஸவோ தயா உபவதி³தோ’’தி ஆஹ. தே²ரேன ச ‘‘அத்தி² தே, ஆவுஸோ, இமஸ்மிம் ஸாஸனே பதிட்டா²’’தி புட்டோ² த³ஹரபி⁴க்கு² ‘‘ஆம, ப⁴ந்தே, ஸோதாபன்னோ ஆஹ’’ந்தி அவோச. ‘‘காரகோ அய’’ந்தி ஞத்வாபி படிபத்தியா அமோக⁴பா⁴வத³ஸ்ஸனேன ஸமுத்தேஜனாய, ஸம்பஹம்ஸனாய ச அரியா அத்தானம் பகாஸேந்தியேவ. தேனாஹ ‘‘ததா²ரூபே காரணே ஸதி உபஸம்பன்னஸ்ஸ ஆரோசயதோ’’தி. ஸுதபரியத்திஸீலகு³ணம் பன அனுபஸம்பன்னஸ்ஸபி ஆரோசேதும் வட்டதி. கஸ்மா ந இத⁴ உம்மத்தகாத³யோ க³ஹிதாதி ஆஹ ‘‘யஸ்மா பனா’’திஆதி³. ஆதி³ஸத்³தே³ன கி²த்தசித்தவேத³னாட்டானம் க³ஹணம். தஸ்மிம் ஸதீதி உம்மத்தகாதி³பா⁴வே ஸதி. இத⁴ ந க³ஹிதாதி இமஸ்மிம் ஸிக்கா²பதே³ பத³பா⁴ஜனியம் ந க³ஹிதா. அசித்தகந்தி பண்ணத்திஜானனசித்தாபா⁴வேன அசித்தகம். குஸலாப்³யாகதசித்தேஹி த்³விசித்த’’ந்தி இத³ம் உக்கட்ட²பரிச்சே²தே³ன அரியபுக்³க³லேயேவ ஸந்தா⁴ய வுத்தம். ந ஹி பண்ணத்திம் அஜானந்தா ஜா²னலாபி⁴னோ புது²ஜ்ஜனா வத்து²ம்ஹி லோப⁴வஸேன அகுஸலசித்தேனாபி ந ஆரோசேந்தீதி. து³க்க²வேத³னாய வா அபா⁴வதோ ‘‘த்³விவேத³ன’’ந்தி இமஸ்ஸ அனுரூபம் கத்வா ஏவம் வுத்தந்தி த³ட்ட²ப்³ப³ம்.

பூ⁴தாரோசனஸிக்கா²பத³வண்ணனா நிட்டி²தா.

9. து³ட்டு²ல்லாரோசனஸிக்கா²பத³வண்ணனா

த்³வின்னம் ‘ஆபத்திக்க²ந்தா⁴னந்தி பாராஜிகஸங்கா⁴தி³ஸேஸஸங்கா²தானம் த்³வின்னம் ஆபத்திக்க²ந்தா⁴னம். ஆயதிம் ஸம்வரத்தா²யாதி ‘‘ஏவமேஸ பரேஸு ஹிரோத்தப்பேனாபி ஆயதிம் ஸம்வரம் ஆபஜ்ஜிஸ்ஸதீ’’தி ஆயதிம் ஸம்வரத்தா²ய. ஆபத்தீனஞ்ச குலானஞ்ச பரியந்தம் கத்வா வா அகத்வா வாதி ‘‘ஏத்தகா ஆபத்தியோ ஆரோசேதப்³பா³, ஏத்தகேஸு குலேஸு ஆரோசேதப்³பா³’’தி ஏவம் ஆபத்தீனஞ்ச குலானஞ்ச பரியந்தம் கத்வா வா அகத்வா வா.

அது³ட்டு²ல்லாயாதி பாராஜிகஸங்கா⁴தி³ஸேஸம் ட²பேத்வா அவஸேஸபஞ்சாபத்திக்க²ந்த⁴ஸங்கா²தாய அது³ட்டு²ல்லாய ஆபத்தியா. அவஸேஸே ச² ஆபத்திக்க²ந்தே⁴தி ஸங்கா⁴தி³ஸேஸவஜ்ஜிதே ஸேஸே ச² ஆபத்திக்க²ந்தே⁴. புரிமபஞ்சஸிக்கா²பத³வீதிக்கமஸங்கா²தம் து³ட்டு²ல்லந்தி பாணாதிபாதவேரமணிஆதி³கஸ்ஸ ஆதி³தோ பஞ்சஸிக்கா²பத³ஸ்ஸ வீதிக்கமஸங்கா²தம் து³ட்டு²ல்லம். இதரம் அது³ட்டு²ல்லம் வா அஜ்ஜா²சாரந்தி ததோ அஞ்ஞம் விகாலபோ⁴ஜனாதி³கபஞ்சகம், ஸுக்கவிஸட்டி²காயஸம்ஸக்³க³து³ட்டு²ல்லஅத்தகாமஞ்சேதி அது³ட்டு²ல்லம் வா அஜ்ஜா²சாரம். வத்து²மத்தந்தி ‘‘அயம் ஸுக்கவிஸ்ஸட்டி²ம் ஆபன்னோ, து³ட்டு²ல்லம், அத்தகாமம், காயஸம்ஸக்³க³ம் ஆபன்னோ’’தி ஏவம் வத்து²மத்தம் வா ஆரோசேந்தஸ்ஸ. ஆபத்திமத்தந்தி ‘‘அயம் பாராஜிகம் ஆபன்னோ, ஸங்கா⁴தி³ஸேஸம், து²ல்லச்சயம், பாசித்தியம், பாடிதே³ஸனீயம், து³க்கடம், து³ப்³பா⁴ஸிதம் ஆபன்னோ’’தி ஏவம் ஆபத்திமத்தம் வா ஆரோசேந்தஸ்ஸ. வுத்தலக்க²ணஸ்ஸாதி ‘‘பாராஜிகம் அனஜ்ஜா²பன்னஸ்ஸா’’தி கங்கா². அட்ட². து³ட்டு²ல்லாரோசனஸிக்கா²பத³வண்ணனா) ஏவம் வுத்தலக்க²ணஸ்ஸ. ஸவத்து²கோதி வத்து²னா ஸஹ க⁴டிதோ.

து³ட்டு²ல்லாரோசனஸிக்கா²பத³வண்ணனா நிட்டி²தா.

10. பத²வீக²ணனஸிக்கா²பத³வண்ணனா

பாஸாணஸக்க²ரகத²லமரும்ப³வாலுகாதீ³ஸூதி ஏத்த² முட்டி²ப்பமாணதோ உபரி பாஸாணாதி வேதி³தப்³பா³. முட்டி²ப்பமாணா ஸக்க²ரா. கத²லாதி கபாலக²ண்டா³னி. மரும்பா³தி கடஸக்க²ரா. வாலுகா வாலிகாயேவ. அஞ்ஞதரஸ்ஸ ததியபா⁴கோ³ ஹோதீதி ததியோ பா⁴கோ³ ஹோதி. இத³ம் வுத்தம் ஹோதி – யதோ பம்ஸும் வா மத்திகம் வா ஆஹராபேத்வா விஸும் விஸும் கதே த்³வே கோட்டா²ஸா பம்ஸு வா மத்திகா வா ஏகோ பாஸாணாதீ³ஸு அஞ்ஞதரோ ஹோதி, அயம் மிஸ்ஸகபத²வீ நாமாதி. ஓவட்டோ² நாம தே³வேன ஓவட்டோ² (பாசி. 86). வுத்தந்தி பத³பா⁴ஜனியம், ஸீஹளட்ட²கதா²யமேவ வா வுத்தம். அதி⁴கதரபாஸாணாதி³மிஸ்ஸாதி அதி⁴கதரபாஸாணாதீ³ஹி மிஸ்ஸா, அத³ட்³டா⁴பி வுத்தப்பமாணதோ அதி⁴கதரபாஸாணாதி³மிஸ்ஸாதி அதி⁴ப்பாயோ. வா-ஸத்³தோ³ அவுத்தவிகப்பத்தோ², தேன ஊனகசதுமாஸோவட்ட²பத²விம் ஸங்க³ண்ஹாதி. ஸுத்³த⁴பாஸாணாதி³பே⁴தா³யாதி ஸுத்³தா⁴ பாஸாணா ஏத்தா²தி ஸுத்³த⁴பாஸாணா, ஸா ஆதி³ யஸ்ஸ பே⁴த³ஸ்ஸ ஸோ ஸுத்³த⁴பாஸாணாதி³. ஆதி³-ஸத்³தே³ன ஸுத்³த⁴ஸக்க²ராதீ³னம் க³ஹணம். ஸுத்³த⁴பாஸாணாதி³பே⁴தோ³ யஸ்ஸா ஸா ஸுத்³த⁴பாஸாணாதி³பே⁴தா³, தாய ஸுத்³த⁴பாஸாணாதி³பே⁴தா³ய, ஸுத்³த⁴பாஸாணாதி³ப்பகாராயாதி அத்தோ².

ஸயம் க²ணதீதி ஏத்த² யோ அந்தமஸோ பாத³ங்கு³ட்ட²கேனபி க²ணதி, உத³கம்பி ச²ட்³டே³ந்தோ பி⁴ந்த³தி, பாத³ங்கு³ட்ட²கேனபி விலிக²தி, பத்தம்பி பசந்தோ த³ஹதி, ஸோ ஸப்³போ³ க²ணதியேவாதி வேதி³தப்³போ³. தேனாஹ ‘‘க²ணனபே⁴த³னவிலேக²னபசனாதீ³ஹி விகோபேதீதி. பத்தம் பசந்தேன (பாசி. அட்ட². 87) ஹி புப்³பே³ பக்கட்டா²னேயேவ பசிதப்³போ³. அத³ட்³டா⁴ய பத²வியா அக்³கி³ம் ட²பேதும் ந வட்டதி. பத்தபசனகபாலஸ்ஸ பன உபரி அக்³கி³ம் ட²பேதும் வட்டதி. தா³ரூனம் உபரி ட²பேதி, ஸோ அக்³கி³ தானி த³ஹந்தோ க³ந்த்வா பத²விம் த³ஹதி, ந வட்டதி. இட்ட²கபாஸாணாதீ³ஸுபி ஏஸேவ நயோ. தத்ராபி ஹி இட்ட²காதீ³னம்யேவ உபரி ட²பேதும் வட்டதி. கஸ்மா? தேஸம் அனுபாதா³னத்தா. ந ஹி தானி அக்³கி³ஸ்ஸ உபாதா³னஸங்க²ம் க³ச்ச²ந்தி. ஸுக்க²கா²ணுருக்கா²தீ³ஸுபி அக்³கி³ம் தா³தும் ந வட்டதி. ஸசே பன ‘‘பத²விம் அபத்தமேவ நிப்³பா³பேத்வா க³மிஸ்ஸாமீ’’தி தே³தி, வட்டதி. பச்சா² நிப்³பா³பேதும் ந ஸக்கோதி, அவிஸயத்தா அனாபத்தி. வுத்தனயேனேவாதி ‘‘க²ணனபே⁴த³னவிலிக²னபசனாதீ³ஹீ’’தி வுத்தேனேவ நயேன. நியமேத்வாதி ஸன்னிட்டா²னம் கத்வா. இதரோதி ஆணாபகோ.

‘‘போக்க²ரணிம் க²ணா’’தி (பாசி. அட்ட². 86) வத³தி, வட்டதி. க²தாயேவ போக்க²ரணீ நாம ஹோதி, தஸ்மா அயம் கப்பியவோஹாரோ. ஏஸ நயோ ‘‘வாபிம், தளாகம், ஆவாடம் க²ணா’’திஆதீ³ஸுபி. ‘‘இமம் ஓகாஸம் க²ண, இமஸ்மிம் ஓகாஸே போக்க²ரணிம் க²ணா’’தி பன வத்தும் ந வட்டதி. ‘‘கந்த³ம் க²ண மூலம் க²ணா’’தி அனியமேத்வா வத்தும் வட்டதி. ‘‘இமம் வல்லிம் க²ண, இமஸ்மிம் ஓகாஸே கந்த³ம் வா மூலம் வா க²ணா’’தி வத்தும் ந வட்டதி. தேனாஹ ‘‘ஓகாஸம் அனியமேத்வா…பே… ப⁴ணந்தஸ்ஸா’’தி. ஆதபேன ஸுக்க²கத்³த³மோ ச ப²லதி, தத்ர யோ ஹேட்டா² பத²வியா அஸம்ப³த்³தோ⁴, தமேவ அபனேதும் வட்டதி. ஏஸ நயோ கோ³கண்டகேபி. தேனாஹ ‘‘ஆதபேன…பே… அஸம்ப³த்³த⁴’’ந்தி. தத்த² கோ³கண்டகோ (பாசி. அட்ட². 86) நாம கா³வீனம் கு²ரச்சி²ன்னகத்³த³மோ வுச்சதி. ஸசே பன ஹேட்டி²மதலேன பூ⁴மிஸம்ப³ந்தோ⁴, விகோபேதும் ந வட்டதி. பி⁴ஜ்ஜித்வா பதிதனதி³தடந்தி பி⁴ஜ்ஜித்வா நதி³ஸாமந்தா பதிதம் ஓமகசாதுமாஸம் ஓவட்ட²ம் நதி³தடம். ஸசே பன பி⁴ஜ்ஜித்வா உத³கேயேவ பகதி, தே³வே அதிரேகசாதுமாஸம் ஓவட்டே²பி உத³கேயேவ உத³கஸ்ஸ பதிதத்தா வட்டதி. மஹந்தம்பி நங்க³லச்சி²ன்னமத்திகாபிண்ட³ந்தி மஹந்தம்பி கஸிதட்டா²னே ஹேட்டா² பத²வியா அஸம்ப³த்³த⁴ம் நங்க³லச்சி²ன்னமத்திகாபிண்ட³ம். ஏவமாதி³ஸத்³தே³ன கூடாஸிஞ்சனயோக்³க³தனுககத்³த³மாதீ³னம் க³ஹணம். அஸஞ்சிச்ச ருக்கா²தி³பவட்டனேன பி⁴ந்த³ந்தஸ்ஸாதி பாஸாணருக்கா²தீ³னி வா பவட்டேந்தஸ்ஸ, கத்தரத³ண்டே³ன வா ஆஹச்ச ஆஹச்ச க³ச்ச²ந்தஸ்ஸ பத²வீ பி⁴ஜ்ஜதி, ஸா ‘‘தேன பி⁴ந்தி³ஸ்ஸாமீ’’தி ஏவம் ஸஞ்சிச்ச அபி⁴ன்னத்தா அஸஞ்சிச்ச பி⁴ன்னா நாம ஹோதி, இதி அஸஞ்சிச்ச ருக்கா²தி³ப்பவட்டனேன பி⁴ந்த³ந்தஸ்ஸ அனாபத்தி. அஸதியா பாத³ங்கு³ட்ட²காதீ³ஹி விலிக²ந்தஸ்ஸாதி யோ அஞ்ஞவிஹிதோ கேனசி ஸத்³தி⁴ம் கிஞ்சி கதே²ந்தோ பாத³ங்கு³ட்ட²கேன வா கத்தரயட்டி²யா வா பத²விம் விலிக²ந்தோ திட்ட²தி, தஸ்ஸ ஏவம் அஸதியா பாத³ங்கு³ட்ட²காதீ³ஹி விலிக²ந்தஸ்ஸ அனாபத்தி.

பத²வீக²ணனஸிக்கா²பத³வண்ணனா நிட்டி²தா.

முஸாவாத³வக்³கோ³ பட²மோ.