9. ரூபியஸம்வோஹாரஸிக்கா²பத³வண்ணனா

கதாதி³வஸேனாதி கதஅகதகதாகதவஸேன. ஸுவண்ணாதி³சதுப்³பி³த⁴ம்பி நிஸ்ஸக்³கி³யவத்து² இத⁴ ரூபியக்³க³ஹணேன க³ஹிதந்தி ஆஹ ‘‘ஜாதரூபரஜதபரிவத்தன’’ந்தி. இத³ஞ்ச உக்கட்ட²பரிச்சே²தே³ன வுத்தந்தி த³ட்ட²ப்³ப³ம். தேனாஹ ‘‘புரிமஸிக்கா²பதே³ன ஹீ’’திஆதி³. பரிவத்தனந்தி ஸாதி³தரூபியஸ்ஸ பரிவத்தனம். புரிமனயானுஸாரேனாதி ‘‘அஹம், ப⁴ந்தே, நானப்பகாரகம் ரூபியஸம்வோஹாரம் ஸமாபஜ்ஜிம், இத³ம் மே நிஸ்ஸக்³கி³ய’’ந்திஆதி³னா (பாரா. 589).

ரூபியஸம்வோஹாரவத்து²ஸ்மிந்தி படிக்³க³ஹணஸ்ஸேவ படிக்கி²த்தத்தா படிக்³க³ஹிதபரிவத்தனே தோ³ஸம் அதி³ஸ்வா ரூபியபரிவத்தனே. தஸ்ஸ வாதி பரிவத்திதஸ்ஸ வா. த⁴னஸ்ஸ வாதி அத்தனோ மூலத⁴னஸ்ஸ வா. அத்தனோ வா ஹி அரூபியேன பரஸ்ஸ ரூபியம் சேதாபேய்ய, அத்தனோ வா ரூபியேன பரஸ்ஸ அரூபியம், உப⁴யதா²பி ரூபியஸம்வோஹாரோ கதோவ ஹோதீதி.

ரூபியஸம்வோஹாரஸிக்கா²பத³வண்ணனா நிட்டி²தா.