6. ஏளகலோமஸிக்கா²பத³வண்ணனா

அத்³தா⁴னமக்³க³ப்படிபன்னஸ்ஸாதி அத்³தா⁴னமேவ மக்³கோ³ அத்³தா⁴னமக்³கோ³, தம் படிபன்னஸ்ஸாதி அத்தோ². தேனாஹ ‘‘அத்³தா⁴னஸங்கா²த’’ந்திஆதி³. அத்³தா⁴னஸத்³தே³ன விஸேஸிதத்தா பன ‘‘தீ³க⁴மக்³க³’’ந்தி வுத்தம். அத்³தா⁴னக³மனஸமயஸ்ஸ விப⁴ங்கே³ ‘‘அத்³த⁴யோஜனம் க³ச்சி²ஸ்ஸாமீதி பு⁴ஞ்ஜிதப்³ப³’’ந்திஆதி³வசனதோ (பாசி. 218) அத்³த⁴யோஜனம்பி அத்³தா⁴னமக்³கோ³ ஹோதி. ஏளகலோமானி சேதானி அத்³தா⁴னமக்³க³தோ அஞ்ஞத்த² உப்பன்னானி படிக்³க³ஹேதும் ந வட்டந்தி, யதோ ‘‘அத்³தா⁴னமக்³க³ப்படிபன்னஸ்ஸா’’திஆதி³கம் வுத்தந்தி அனுயோக³ம் ஸந்தா⁴யாஹ ‘‘ஸப்³ப³ஞ்சேத’’ந்திஆதி³. தத்த² ஸப்³ப³ஞ்சேதந்தி ‘‘பி⁴க்கு²னோ பனேவ அத்³தா⁴னமக்³க³ப்படிபன்னஸ்ஸ ஏளகலோமானி உப்பஜ்ஜேய்யு’’ந்திஆதி³கம் ஏதம் ஸப்³ப³ம். வத்து²மத்ததீ³பனமேவாதி ‘‘தேன கோ² பன ஸமயேன அஞ்ஞதரஸ்ஸ பி⁴க்கு²னோ கோஸலேஸு ஜனபதே³ ஸாவத்தி²ம் க³ச்ச²ந்தஸ்ஸ அந்தராமக்³கே³ ஏளகலோமானி உப்பஜ்ஜிம்ஸூ’’திஆதி³கஸ்ஸ (பாரா. 571) வத்து²மத்தஸ்ஸ தீ³பனமேவ. யத்த² கத்த²சீதி அத்³தா⁴னதோ அஞ்ஞத்தா²பி யத்த² கத்த²சி டா²னேஸு. ஸஹத்தா²தி கரணத்தே² நிஸ்ஸக்கவசனந்தி ஆஹ ‘‘ஸஹத்தே²னா’’தி. லக்க²ணவசனஞ்சேதம், தஸ்மா யேன கேனசி ஸரீராவயவேனாதி அத்தோ² த³ட்ட²ப்³போ³. தேனாஹ ‘‘அத்தனா ஹரிதப்³பா³னீதி அத்தோ²’’தி. அஸந்தே ஹாரகேதி ஏத்த² பதா³னம் அந்தோக³தா⁴வதா⁴ரணதோ அவதா⁴ரணத்தோ² லப்³ப⁴தீதி ஆஹ ‘‘அஸந்தேயேவா’’திஆதி³.

ஏத்த² ச ‘‘இமானி மே, ப⁴ந்தே, ஏளகலோமானி தியோஜனம் அதிக்காமிதானி நிஸ்ஸக்³கி³யானீ’’திஆதி³னா (பாரா. 573) நிஸ்ஸஜ்ஜனவிதா⁴னம் வேதி³தப்³ப³ம். திகபாசித்தியந்தி அதிரேகதியோஜனே அதிரேகதியோஜனஸஞ்ஞிவேமதிகஊனகஸஞ்ஞீனம் வஸேன தீணி பாசித்தியானி. வாஸாதி⁴ப்பாயேன க³ந்த்வா ததோ பரம் ஹரணேதி யத்த² க³தோ, தத்த² உத்³தே³ஸபரிபுச்சா²தீ³னம் வா பச்சயாதீ³னம் வா அலாபே⁴ன ததோ பரம் அஞ்ஞத்த² ஹரணே, ததோபி அஞ்ஞத்தா²தி ஏவம் யோஜனஸதம்பி ஹரணே அனாபத்தி. அச்சி²ன்னம் வா நிஸ்ஸட்ட²ம் வாதி சோரேஹி அச்சி²ன்னம் வா வினயகம்மகதம் வா. கதப⁴ண்ட³ந்தி கதம் ப⁴ண்ட³ம் கம்ப³லகோஜவஸந்த²தாதி³ யம் கிஞ்சி அந்தமஸோ ஸுத்தகேன ப³த்³த⁴மத்தம்பி. தேனாஹ ‘‘அந்தமஸோ’’திஆதி³. யோ பன தனுகபத்தத்த²விகந்தரே (பாரா. அட்ட². 2.575) வா ஆயோக³அம்ஸப³த்³த⁴ககாயப³ந்த⁴னாதீ³னம் அந்தரேஸு வா பிப்ப²லிகாதீ³னம் மலரக்க²ணத்த²ம் ஸிபாடிகாயம் வா அந்தமஸோ வாதாபா³தி⁴கோ கண்ணச்சி²த்³தே³பி லோமானி பக்கி²பித்வா க³ச்ச²தி, ஆபத்தியேவ. ஸுத்தகேன பன ப³ந்தி⁴த்வா பக்கி²த்தம் கதப⁴ண்ட³ட்டா²னே திட்ட²தி, வேணிம் கத்வா ஹரதி, இத³ம் நிதா⁴னமுக²ம் நாம, ஆபத்தியேவ.

பட²மப்படிலாபோ⁴தி அத்தனோ அத்தா²ய ஏளகலோமானம் பட²முப்பத்தி. ஏதேன அச்சி²ன்னனிஸ்ஸட்ட²ப்படிலத்³தா⁴னம் படிக்கே²போ. அஞ்ஞஸ்ஸ அஜானந்தஸ்ஸ யானே பக்கி²பித்வாதி (பாரா. அட்ட². 2.572) க³ச்ச²ந்தே ரதா²தி³கே வா ஹத்தி²பிட்டி²ஆதீ³ஸு வா ஸாமிகஸ்ஸ அஜானந்தஸ்ஸேவ ‘‘ஹரிஸ்ஸதீ’’தி பக்கி²பித்வா. அக³ச்ச²ந்தேபி ஏஸேவ நயோ. ஸசே பன அக³ச்ச²ந்தே ரதா²தி³ம்ஹி வா ஹத்தி²பிட்டி²ஆதீ³ஸு வா ட²பேத்வா ஆரோஹித்வா ஸாரேதி, ஹேட்டா² வா க³ச்ச²ந்தோ சோதே³தி, பக்கோஸந்தோ வா அனுப³ந்தா⁴பேதி, ‘‘அஞ்ஞம் ஹராபேதீ’’தி (பாரா. 575) வசனதோ அனாபத்தி. ஏத்த² ச ‘‘அஜானந்தஸ்ஸ யானே’’தி இமினா ஜானந்தஸ்ஸ சே யானே பக்கி²பதி, அஞ்ஞம் ஹராபேதி நாமாதி த³ஸ்ஸேதி. அஹரணபச்சாஹரணந்தி ஹரணபச்சாஹரணானமபா⁴வோ.

ஏளகலோமஸிக்கா²பத³வண்ணனா நிட்டி²தா.