1. கதி²னஸிக்கா²பத³வண்ணனா

நிட்டி²தசீவரஸ்மிந்தி (பாரா. அட்ட². 2.462-463) நிட்டி²தஞ்ச தம் சீவரஞ்சாதி நிட்டி²தசீவரம், நிட்டி²தே ஆனிஸம்ஸமூலகே சீவரே, பச்சாஸாசீவரே சாதி அத்தோ². யஸ்மா பன தம் சீவரம் கரணேனபி நிட்டி²தம் ஹோதி நாஸனாதீ³ஹிபி, தஸ்மா ‘‘ஸூசிகம்மபரியோஸானேன வா’’திஆதி³ வுத்தம். தத்த² யம் கிஞ்சி ஸூசியா கத்தப்³ப³ம் பாஸகபட்டக³ண்டி²கபட்டபரியோஸானகம்மம், தம் ஸூசிகம்மபரியோஸானம் நாம, தேன. நட்ட²ந்தி சோராதீ³ஹி ஹடம். ஏதம்பி ஹி கரணபலிபோ³த⁴ஸ்ஸ நிட்டி²தத்தா ‘‘நிட்டி²த’’ந்தி வுச்சதி. வினட்ட²ந்தி உபசிகாதீ³ஹி கா²தி³தம். த³ட்³ட⁴ந்தி அக்³கி³னா த³ட்³ட⁴ம். சீவராஸா வா உபச்சி²ன்னாதி ‘‘அஸுகஸ்மிம் நாம குலே சீவரம் லபி⁴ஸ்ஸாமீ’’தி யா சீவராஸா உப்பன்னா ஹோதி, ஸா உபச்சி²ன்னா. ஏதேஸம்பி கரணபலிபோ³த⁴ஸ்ஸேவ நிட்டி²தத்தா நிட்டி²தபா⁴வோ வேதி³தப்³போ³. தேனாஹ ‘‘இமேஸு வா’’திஆதி³. ஏதேன சீவரபலிபோ³தா⁴பா⁴வோ வுத்தோ. தேனாஹ ‘‘சீவரஸ்ஸ கரணபலிபோ³தே⁴ உபச்சி²ன்னேதி அத்தோ²’’தி. கத²மேதம் விஞ்ஞாயதீதி ஆஹ ‘‘அத்த²தகதி²னஸ்ஸ ஹீ’’திஆதி³. பஞ்சானிஸம்ஸே அஞ்ஞத்த² க³ந்தும் அத³த்வா ஸங்க³ண்ஹனட்டே²ன கதி²னம், தி²ரந்தி அத்தோ², அத்த²தம் கதி²னம் யேன ஸோ அத்த²தகதி²னோ, தஸ்ஸ அத்த²தகதி²னஸ்ஸ. ஹீதி காரணத்தே² நிபாதோ. தாவ கதி²னானிஸம்ஸம் லப⁴தீதி ஏத்த² யோ அத்த²தகதி²னோ பி⁴க்கூ²தி அஜ்ஜா²ஹரிதப்³ப³ம், தாவ ஸோ அத்த²தகதி²னோ பி⁴க்கூ²தி வேதி³தப்³போ³, அனாமந்தசாராதி³கம் கதி²னானிஸம்ஸம் லப⁴தீதி அத்தோ². ‘‘அத்த²தகதி²னஸ்ஸ பி⁴க்கு²னோ’’தி இத³ம் வா ‘‘அத்த²தகதி²னோ பி⁴க்கூ²’’தி விப⁴த்திவிபரிணாமம் கத்வா யோஜேதப்³ப³ம். இத³ம் வுத்தம் ஹோதி – சீவரபலிபோ³தோ⁴ ஆவாஸபலிபோ³தோ⁴தி த்³வே பலிபோ³தா⁴. தேஸு ஏகபலிபோ³தே⁴பி ஸதி யஸ்மா அனாமந்தசாராதி³கம் ஆனிஸம்ஸம் லப⁴தி, நாஸதி. கஸ்மா? ‘‘நிட்டி²தசீவரஸ்மி’’ந்தி ஏதஸ்ஸ சீவரஸ்ஸ கரணபலிபோ³தே⁴ உபச்சி²ன்னேதி அயமத்தோ² விஞ்ஞாயதீதி. ஸங்க⁴ஸ்ஸாதி ஸங்கே⁴ன. கத்தரி சேதம் ஸாமிவசனம். உப்³ப⁴தேதி அட்ட²ன்னம் மாதிகானமஞ்ஞதரேன, அந்தருப்³பா⁴ரேன வா உத்³த⁴டே.

தத்ராதி தஸ்மிம் கதி²னே. உப்³பா⁴ரோ உத்³த⁴ரணம். புரிமவஸ்ஸம்வுட்டே² திம்ஸமத்தே பாவேய்யகே பி⁴க்கூ² உத்³தி³ஸ்ஸ ‘‘அனுஜானாமி, பி⁴க்க²வே, வஸ்ஸம்வுட்டா²னம் பி⁴க்கூ²னம் கதி²னம் அத்த²ரிது’’ந்தி கதி²னக்க²ந்த⁴கே (மஹாவ. 306) ப⁴க³வதா கதி²னஸ்ஸ அனுஞ்ஞாதத்தா ‘‘அயஞ்ஹி கதி²னத்தா²ரோ நாம…பே… அனுஞ்ஞாதோ’’தி வுத்தம். தத்த² புரிமவஸ்ஸம்வுட்டா²னந்தி வஸ்ஸச்சே²த³ம் அகத்வா புரிமவஸ்ஸம்வுட்டா²னந்தி அத்தோ². ஏதேன வுட்ட²வஸ்ஸவஸேன தாவ புரிமிகாய வஸ்ஸம் உபக³தாயேவ கதி²னத்தா²ரம் லப⁴ந்தி, ந பச்சி²மிகாய உபக³தாதி த³ஸ்ஸேதி. வுட்ட²வஸ்ஸவஸேன தாவ ஏவம் ஹோது, க³ணனவஸேன தம் கித்தகா லப⁴ந்தீதி ஆஹ ‘‘ஸோ’’திஆதி³. ஸோதி கதி²னத்தா²ரோ. ஸப்³ப³ந்திமேன பரிச்சே²தே³னாதி க³ணனவஸேன பச்சி²மகோடியா. பஞ்சன்னம் ஜனானம் வட்டதீதி பச்சி²மகோடியா சத்தாரோ கதி²னது³ஸ்ஸஸ்ஸ தா³யகா, ஏகோ படிக்³கா³ஹகோதி பஞ்சன்னம் ஜனானம் வட்டதி. கேசி பன ‘‘பஞ்சவக்³க³கரணீயத்தா ‘பஞ்சன்னம் ஜனானம் வட்டதீ’தி வுத்த’’ந்தி வத³ந்தி, தம் தேஸம் மதிமத்தம் ‘‘தத்ர, பி⁴க்க²வே, ய்வாயம் சதுவக்³கோ³ பி⁴க்கு²ஸங்கோ⁴ ட²பேத்வா தீணி கம்மானி உபஸம்பத³ம் பவாரணம் அப்³பா⁴ன’’ந்தி சம்பேய்யக்க²ந்த⁴கே (மஹாவ. 388) வுத்தத்தா. தஸ்மாதி யஸ்மா வுட்ட²வஸ்ஸவஸேன புரிமவஸ்ஸம்வுட்டா²னம் அனஞ்ஞாதோ, யஸ்மா ச ஸப்³ப³ந்திமேன பரிச்சே²தே³ன பஞ்சன்னம் ஜனானம் வட்டதி, தஸ்மா. யத்தா²தி யஸ்மிம் விஹாரே. ஆனிஸம்ஸேதி அனாமந்தசாராதி³கே கதி²னானிஸம்ஸே. அத² பன சத்தாரோ பி⁴க்கூ² வஸ்ஸம் உபக³தா, ஏகோ பரிபுண்ணவஸ்ஸோ ஸாமணேரோ ஸசே பச்சி²மிகாய உபஸம்பஜ்ஜதி, க³ணபூரகோ சேவ ஹோதி, ஆனிஸம்ஸஞ்ச லப⁴தி. தயோ பி⁴க்கூ², த்³வே ஸாமணேரா, த்³வே பி⁴க்கூ², தயோ ஸாமணேரா, ஏகோ பி⁴க்கு², சத்தாரோ ஸாமணேராதி ஏத்தா²பி ஏஸேவ நயோ.

க²ந்த⁴கே வுத்தாய ஞத்திது³தியகம்மவாசாயாதி –

‘‘ஸுணாது மே, ப⁴ந்தே, ஸங்கோ⁴, இத³ம் ஸங்க⁴ஸ்ஸ கதி²னது³ஸ்ஸம் உப்பன்னம். யதி³ ஸங்க⁴ஸ்ஸ பத்தகல்லம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ த³தே³ய்ய கதி²னம் அத்த²ரிதும், ஏஸா ஞத்தி. ஸுணாது மே, ப⁴ந்தே, ஸங்கோ⁴, இத³ம் ஸங்க⁴ஸ்ஸ கதி²னது³ஸ்ஸம் உப்பன்னம், ஸங்கோ⁴ இமம் கதி²னது³ஸ்ஸம் இத்த²ன்னாமஸ்ஸ பி⁴க்கு²னோ தே³தி கதி²னம் அத்த²ரிதும். யஸ்ஸாயஸ்மதோ க²மதி இமஸ்ஸ கதி²னது³ஸ்ஸஸ்ஸ இத்த²ன்னாமஸ்ஸ பி⁴க்கு²னோ தா³னம் கதி²னம் அத்த²ரிதும், ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸேய்ய. தி³ன்னம் இத³ம் ஸங்கே⁴ன கதி²னது³ஸ்ஸம் இத்த²ன்னாமஸ்ஸ பி⁴க்கு²னோ கதி²னம் அத்த²ரிதும், க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி (மஹாவ. 307) –

ஏவம் கதி²னக்க²ந்த⁴கே வுத்தாய ஞத்திது³தியகம்மவாசாய. கதி²னத்தா²ராரஹஸ்ஸாதி கதி²னம் அத்த²ரிதும் ப⁴ப்³ப³ஸ்ஸ. ஸோ ச கோ² புப்³ப³கரணஜானனாதீ³ஹி அட்ட²ஹி அங்கே³ஹி ஸமன்னாக³தோதி வேதி³தப்³போ³. வுத்தஞ்ஹேதம் வினயவினிச்ச²யே ‘‘அட்ட²த⁴ம்மகோவிதோ³ பி⁴க்கு², கதி²னத்தா²ரமரஹதீ’’தி. பரிவாரேபி (பரி. 409) வுத்தம் –

‘‘அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும். கதமேஹி அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும்? புப்³ப³கரணம் ஜானாதி, பச்சுத்³தா⁴ரம் ஜானாதி, அதி⁴ட்டா²னம் ஜானாதி, அத்தா²ரம் ஜானாதி, மாதிகம் ஜானாதி, பலிபோ³த⁴ம் ஜானாதி, உத்³தா⁴ரம் ஜானாதி, ஆனிஸம்ஸம் ஜானாதி, இமேஹி அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிது’’ந்தி.

ஏத்த² ச புப்³ப³கரணம் நாம தோ⁴வனவிசாரணச்சே²த³னப³ந்த⁴னஸிப்³ப³னரஜனகப்பகரணம். பச்சுத்³தா⁴ரோ நாம புராணஸங்கா⁴டிஆதீ³னம் பச்சுத்³த⁴ரணம். அதி⁴ட்டா²னம் நாம கதி²னசீவராதி⁴ட்டா²னம். அத்தா²ரோ நாம கதி²னத்தா²ரோ. மாதிகா நாம அட்ட² மாதிகா. பலிபோ³தோ⁴ நாம ஆவாஸபலிபோ³தோ⁴ சீவரபலிபோ³தோ⁴தி த்³வே பலிபோ³தா⁴. உத்³தா⁴ரோ நாம பக்கமனந்திகாத³யோ. ஆனிஸம்ஸோ நாம பஞ்சானிஸம்ஸா.

யம் பன ஸமந்தபாஸாதி³காயம் (மஹாவ. அட்ட². 306) வுத்தம் ‘‘கதி²னம் பன கேன அத்த²ரிதப்³ப³ம்? யஸ்ஸ ஸங்கோ⁴ கதி²னசீவரம் தே³தி, ஸங்கே⁴ன பன கஸ்ஸ தா³தப்³ப³ம்? யோ ஜிண்ணசீவரோ ஹோதி, ஸசே ப³ஹூ ஜிண்ணசீவரா ஹோந்தி, வுட்³ட⁴ஸ்ஸ தா³தப்³ப³ம். வுட்³டே⁴ஸுபி யோ மஹாபரிஸோ தத³ஹேவ சீவரம் கத்வா அத்த²ரிதும் ஸக்கோதி, தஸ்ஸ தா³தப்³ப³ம். ஸசே வுட்³டோ⁴ ந ஸக்கோதி, நவகதரோ ஸக்கோதி, தஸ்ஸ தா³தப்³ப³ம். அபிச ஸங்கே⁴ன மஹாதே²ரஸ்ஸ ஸங்க³ஹம் காதும் வட்டதி, தஸ்மா ‘தும்ஹே, ப⁴ந்தே, க³ண்ஹத², மயம் கத்வா த³ஸ்ஸாமா’தி வத்தப்³ப³’’ந்தி, தம்பி கதி²னத்தா²ராரஹம்யேவ க³ஹேத்வாவ தா³தப்³ப³ம். தே³ந்தேன பன தீஸு சீவரேஸு யம் யம் ஜிண்ணம் ஹோதி, தம் தத³த்தா²ய தா³தப்³ப³ம். பகதியா து³பட்டசீவரஸ்ஸ து³பட்டத்தா²யேவ தா³தப்³ப³ம். ஸசேபிஸ்ஸ ஏகபட்டசீவரம் க⁴னம் ஹோதி, கதி²னஸாடகோ ச பேலவோ, ஸாருப்பத்தா²ய து³பட்டப்பஹோனகமேவ தா³தப்³ப³ம். ‘‘அஹம் அலப⁴ந்தோ ஏகபட்டம் பாருபாமீ’’தி வத³ந்தஸ்ஸாபி து³பட்டம் தா³தும் வட்டதி. யோ பன லோப⁴பகதிகோ ஹோதி, தஸ்ஸ ந தா³தப்³ப³ம். தேனாபி கதி²னம் அத்த²ரித்வா பச்சா² ஸிப்³பே³த்வா ‘‘த்³வே சீவரானி கரிஸ்ஸாமீ’’தி ந க³ஹேதப்³ப³ம்.

தேனாதி கதி²னத்தா²ரகேன பி⁴க்கு²னா. தத³ஹேவாதி தஸ்மிம்யேவ தி³வஸே. பஞ்ச வா அதிரேகானி வா க²ண்டா³னி சி²ந்தி³த்வாதி யதா² பஞ்சக²ண்டி³காதீ³னம் ஸங்கா⁴டிஆதீ³னம் திண்ணம் சீவரானம் அஞ்ஞதரப்பஹோனகானி மஹாமண்ட³லஅட்³ட⁴மண்ட³லாதி³வஸேன பஞ்ச க²ண்டா³னி வா அதிரேகானி வா ஸத்தாதி³க²ண்டா³னி ஹோந்தி, ஏவம் சி²ந்தி³த்வா. தஸ்மிஞ்ச கதி²னசீவரே கரியமானே ‘‘அஹம் தே²ரோ’’தி வா ‘‘ப³ஹுஸ்ஸுதோ’’தி வா ஏகேனாபி அகாதும் ந லப்³ப⁴தி. அனாத³ரியேன அகரோந்தஸ்ஸ து³க்கடம். தஸ்மா ஸப்³பே³ஹேவ ஸன்னிபதித்வா தோ⁴வனசே²த³னஸிப்³ப³னரஜனானி நிட்டா²பேதப்³பா³னி. தேனாஹ ‘‘ஸேஸபி⁴க்கூ²ஹிபி தஸ்ஸ ஸஹாயேஹி ப⁴விதப்³ப³’’ந்தி. கதசீவரமேவாதி நிட்டி²தபரிகம்மமேவ கதி²னது³ஸ்ஸம். ஸப்³ப³ந்திமேன பரிச்சே²தே³ன அந்தரவாஸகோபி சி²ந்தி³த்வாவ காதப்³போ³ அஞ்ஞதா² அத்தா²ரவிபத்திதோ. யதா²ஹ –

‘‘கத²ஞ்ச பன, பி⁴க்க²வே, அனத்த²தம் ஹோதி கதி²னம்? ந உல்லிகி²தமத்தேன அத்த²தம் ஹோதி கதி²னம்…பே… ந அஞ்ஞத்ர பஞ்சகேன வா அதிரேகபஞ்சகேன வா தத³ஹேவ ஸஞ்சி²ன்னேனா’’தி (மஹாவ. 308).

தேனேவாஹ ‘‘அச்சி²ன்னாஸிப்³பி³தம் பன ந வட்டதீ’’தி. தேன பி⁴க்கு²னாதி அத்தா²ரகேன பி⁴க்கு²னா. அத்த²ரிதப்³ப³ந்தி அத்த²ரணம் காதப்³ப³ம். தஞ்ச கோ² ததா²வசீபே⁴த³கரணமேவாதி த³ட்ட²ப்³ப³ம். யதா²ஹ –

‘‘ஸசே ஸங்கா⁴டியா கதி²னம் அத்த²ரிதுகாமோ ஹோதி, போராணிகா ஸங்கா⁴டி பச்சுத்³த⁴ரிதப்³பா³, நவா ஸங்கா⁴டி அதி⁴ட்டா²தப்³பா³, ‘இமாய ஸங்கா⁴டியா கதி²னம் அத்த²ராமீ’தி வாசா பி⁴ந்தி³தப்³பா³’’தி (பரி. 413) –

வித்தா²ரோ. ‘‘ப⁴ந்தே, ஆவுஸோ’’தி ச ‘‘அனுமோத³த², அனுமோதா³ஹீ’’தி ச வசனபே⁴த³ம் ஸந்தா⁴ய ‘‘தே²ரானஞ்சா’’திஆதி³ வுத்தம்.

ஏவம் அத்தா²ரகேன படிபஜ்ஜிதப்³ப³விதி⁴ம் த³ஸ்ஸேத்வா இதா³னி அனுமோத³கேஹி படிபஜ்ஜிதப்³ப³விதி⁴ம் த³ஸ்ஸேதும் ‘‘தேஹிபீ’’திஆதி³ வுத்தம். ‘‘அனுமோதா³மா’’தி அத்தனாவ அத்தனி கா³ரவவஸேன வுத்தம். கிஞ்சாபி ஏவம் வுத்தம், ததா²பி ஏககேன ‘‘அனுமோதா³மா’’தி வத்தும் ந வட்டதி, ‘‘அனுமோதா³மி’’ச்சேவ வத்தப்³ப³ந்தி வத³ந்தி, வீமம்ஸித்வா க³ஹேதப்³ப³ம். இதா³னி கதி²னானிஸம்ஸே த³ஸ்ஸேதும் பூ⁴மிம் விசாரயந்தோ ‘‘புரிமவஸ்ஸம்வுட்டே²ஸுபீ’’திஆதி³மாஹ. தத்த² தேஸம்யேவாதி அத்தா²ரகஅனுமோத³கானம்யேவ. வுத்தஞ்ஹேதம் பரிவாரே ‘‘த்³வின்னம் புக்³க³லானம் அத்த²தம் ஹோதி கதி²னம் அத்தா²ரகஸ்ஸ ச அனுமோத³கஸ்ஸ சா’’தி (பரி. 403). தேதி அத்தா²ரகஅனுமோத³கா. ததோ பட்டா²யாதி அத்தா²ரானுமோத³னதோ பட்டா²ய. யாவ கதி²னஸ்ஸுப்³பா⁴ராதி ந கேவலம் சீவரமாஸேயேவ, அத² கோ² அட்ட²ன்னம் மாதிகானம் அஞ்ஞதரேன வா அந்தருப்³பா⁴ரேன வா யாவ கதி²னஸ்ஸுப்³பா⁴ரா பஞ்சானிஸம்ஸே லப⁴ந்தி, உத்³த⁴டே பன ந லப⁴ந்தீதி அத்தோ².

இதா³னி தே பஞ்சானிஸம்ஸே ஸரூபதோ த³ஸ்ஸேதும் ‘‘அனாமந்தசாரோ’’திஆதி³மாஹ. தத்த² அனாமந்தசாரோ நாம பஞ்சன்னம் போ⁴ஜனானம் அஞ்ஞதரேன நிமந்திதஸ்ஸ ஸந்தம் பி⁴க்கு²ம் அனாபுச்சா² குலேஸு சாரித்தாபஜ்ஜனம். அஸமாதா³னசாரோ நாம நாமேனாதி⁴ட்டி²தஸ்ஸ சீவரஸ்ஸ அஸமாதா³னசரணம், நாமேனாதி⁴ட்டி²தானம் திண்ணம் சீவரானமஞ்ஞதரம் சீவரம் யத்த² கத்த²சி நிக்கி²பித்வா அஞ்ஞத்த² அருணுட்டா²பனந்தி அத்தோ², சீவரவிப்பவாஸோதி வுத்தம் ஹோதி. யாவத³த்த²சீவரந்தி யாவதா சீவரேன அத்தோ² ஹோதி, தாவதகம் அனதி⁴ட்டி²தம் அவிகப்பிதம் சீவரதா⁴ரணம், த³ஸாஹமதிக்கமித்வா சீவரஸ்ஸ ட²பனந்தி அத்தோ². க³ணஸ்ஸ போ⁴ஜனம் க³ணபோ⁴ஜனம். க³ணோதி சேத்த² சத்தாரோ வா ததுத்தரி வா பி⁴க்கூ². தேஸம் விஞ்ஞத்திதோ வா நிமந்தனதோ வா லத்³த⁴ஸ்ஸ ஓத³னாதீ³னம் பஞ்சன்னம் அஞ்ஞதரபோ⁴ஜனஸ்ஸ ஸஹ க³ஹணந்தி அத்தோ². யோ ச தத்த² சீவருப்பாதோ³தி தத்த² கதி²னத்த²தஸீமாய மதகசீவரம் வா ஹோது, ஸங்க⁴ம் உத்³தி³ஸ்ஸ தி³ன்னம் வா ஸங்கி⁴கேன தத்ருப்பாதே³ன ஆப⁴தம் வா யேன கேனசி ஆகாரேன யம் ஸங்கி⁴கம் சீவரம் உப்பஜ்ஜதி, தம் தேஸம் ப⁴விஸ்ஸதீதி அத்தோ². தேனாஹ ‘‘தஸ்மிம் ஆவாஸே ஸங்க⁴ஸ்ஸ உப்பன்னசீவரஞ்சா’’தி.

‘‘யம் பன தத்த² ஸங்க⁴ஸ்ஸ உப்பன்னம் பத்தாதி³ வா அஞ்ஞம் ப⁴ண்ட³ம் வா, தம் ஸப்³பே³ஸம் பாபுணாதி. யம் பன தத்ருப்பாதே³ன தண்டு³லாதி³னா வத்த²ம் சேதாபிதம், அத்த²தகதி²னானமேவ தானி வத்தா²னி பாபுணந்தி. வத்தே²ஹி பன தண்டு³லாதீ³ஸு சேதாபிதேஸு ஸப்³பே³ஸம் தானி பாபுணந்தீ’’தி க³ண்டி²பதே³ வுத்தம், தம்பி சேதாபிதகாலதோ பட்டா²ய சீவருப்பாதோ³ ந ஹோதீதி ஸுவுத்தந்தி த³ட்ட²ப்³ப³ம். அனத்த²தகதி²னா பன இமேஸு பஞ்சஸு ஆனிஸம்ஸேஸு சீவரமாஸே அஸமாதா³னசாரம் ட²பேத்வா ஸேஸானிஸம்ஸே லப⁴ந்தி. யதி³ அஸமாதா³னசாரோபி லப்³பே⁴ய்ய, பாவேய்யகா பி⁴க்கூ² வஸ்ஸம்வுட்டா² ஓகபுண்ணேஹி சீவரேஹி ந ப⁴க³வந்தம் உபஸங்கமேய்யும். யஸ்மா தம் ந லப்³ப⁴தி, தஸ்மா சீவரமாஸேபி சீவரம் ஸமாதா³ய ஏவ ப⁴க³வந்தம் உபஸங்கமிம்ஸு.

ஏவம் கதி²னத்தா²ரம் த³ஸ்ஸேத்வா இதா³னி உப்³பா⁴ரம் த³ஸ்ஸேந்தோ ‘‘தம் பனேதம் கதி²ன’’ந்திஆதி³மாஹ. தத்த² மாதிகாதி மாதரோ, ஜனேத்தியோதி அத்தோ². கதி²னுப்³பா⁴ரஞ்ஹி ஏதா அட்ட² ஜனேந்தி. தாஸு பக்கமனம் அந்தோ ஏதிஸ்ஸாதி பக்கமனந்திகா. ஏவம் ஸேஸாபி வேதி³தப்³பா³. தத்த² யோ பி⁴க்கு² அத்த²தகதி²னோ கதி²னசீவரம் ஆதா³ய தஸ்மிம் ஆவாஸே நிரபேக்கோ² ‘‘ந பச்சேஸ்ஸ’’ந்தி பக்கமதி, தஸ்ஸேவம் பக்கமதோ கதி²னுத்³தா⁴ரோ அதிக்கந்தமத்தாய ஸீமாய ஹோதீதி பக்கமனந்திகோ கதி²னுத்³தா⁴ரோதி வேதி³தப்³போ³.

யோ பன ஆனிஸம்ஸசீவரம் ஆதா³ய பக்கமதி, தஸ்ஸ ப³ஹிஸீமாக³தஸ்ஸ ஏவம் ஹோதி ‘‘இதே⁴விமம் கரிஸ்ஸாமி, ந புன தம் விஹாரம் க³ச்சி²ஸ்ஸாமீ’’தி தஸ்மிம் ஆவாஸே நிரபேக்கோ² ஹுத்வா தம் சீவரம் காரேதி, தஸ்ஸ பி⁴க்கு²னோ நிட்டா²னந்திகோ கதி²னுத்³தா⁴ரோ.

யதி³ பன ஆனிஸம்ஸமூலசீவரம் ஆதா³ய ப³ஹிஸீமாக³தோ ‘‘நேவிமம் சீவரம் கரிஸ்ஸாமி, ந ச தம் ஆவாஸம் க³ச்சி²ஸ்ஸாமீ’’தி ஸன்னிட்டா²னம் கரோதி, ததா³ ஸன்னிட்டா²னந்திகோ கதி²னுத்³தா⁴ரோ.

ததே³வ ஆனிஸம்ஸசீவரம் லத்³தா⁴ தம் ஆதா³ய ப³ஹிஸீமம் க³ந்த்வா ‘‘இதே⁴விமம் சீவரம் கரிஸ்ஸாமி, ந க³ச்சி²ஸ்ஸாமீ’’தி கரோந்தஸ்ஸ ஸசே தம் சீவரம் நஸ்ஸதி வினஸ்ஸதி ட³ய்ஹதி, நாஸனந்திகோ கதி²னுத்³தா⁴ரோ ஹோதி.

ஸசே பன ஆனிஸம்ஸசீவரம் லத்³தா⁴ தஸ்மிம் விஹாரே ஸாபேக்கோ²வ ப³ஹிஸீமாக³தோ ‘‘விஹாரே பி⁴க்கூ²ஹி அந்தருப்³பா⁴ரம் கத’’ந்தி ஸுணாதி, தஸ்ஸ ஸவனந்திகோ கதி²னுத்³தா⁴ரோ ஹோதி.

ஆஸாய அவச்சே²தோ³ ஏதிஸ்ஸாதி ஆஸாவச்சே²தி³கா. யோ பன யேன கேனசி ‘‘துய்ஹம் சீவரம் த³ஸ்ஸாமீ’’தி வுத்தோ தஸ்மிம் சீவரே ஆஸாய விஹாரே அபேக்க²ம் பஹாய ப³ஹிஸீமாக³தோ புன தேன ‘‘ந ஸக்கோமி தா³து’’ந்தி வுத்தே ஆஸம் சி²ந்த³தி, தஸ்ஸ ஆஸாவச்சே²தி³கோ கதி²னுத்³தா⁴ரோ ஹோதி.

யோ பன வஸ்ஸம்வுட்ட²விஹாரதோ அஞ்ஞம் விஹாரம் ஸாபேக்கோ²வ க³ந்த்வா ஆக³ச்ச²ந்தோ அந்தராமக்³கே³யேவ கதி²னுத்³தா⁴ரம் வீதினாமேதி, தஸ்ஸ ஸீமாதிக்கமனந்திகோ கதி²னுத்³தா⁴ரோ.

ஸஹ உப்³பா⁴ரேனாதி ஸஹுப்³பா⁴ரா. ஆனிஸம்ஸசீவரம் ஆதா³ய ஸாபேக்கோ²வ ப³ஹி க³ந்த்வா கதி²னுத்³தா⁴ரம் ஸம்பு⁴ணந்தஸ்ஸ கதி²னுத்³தா⁴ரோ ஸஹுப்³பா⁴ரோதி வேதி³தப்³போ³.

‘‘ஏதஸ்மிம் பன பக்கமனந்திகே கதி²னுத்³தா⁴ரே பட²மம் சீவரபலிபோ³தோ⁴ சி²ஜ்ஜதீ’’திஆதி³னா சீவரபலிபோ³து⁴பச்சே²தா³தி³கஸ்ஸ வினிச்ச²யஸ்ஸ வித்தா²ரதோ ஸமந்தபாஸாதி³காயம் (மஹாவ. அட்ட². 311) வுத்தத்தா 8 ‘‘தத்த² வித்தா²ரவினிச்ச²யோ’’திஆதி³மாஹ. அத்தா²ருப்³பா⁴ரானம்யேவ வா வித்தா²ரவினிச்ச²யஸ்ஸ தத்தா²க³தத்தா ஏவம் வுத்தந்தி த³ட்ட²ப்³ப³ம். ஸேஸபலிபோ³தா⁴பா⁴வந்தி அவஸேஸஸ்ஸ பலிபோ³த⁴ஸ்ஸ அபா⁴வம், ஆவாஸபலிபோ³தா⁴பா⁴வந்தி அத்தோ².

அஸ்ஸாதி காலஸ்ஸ. த³ஸாஹபரமந்தி அச்சந்தஸம்யோகே³ உபயோக³வசனந்தி ஆஹ ‘‘தம் த³ஸாஹபரமம் கால’’ந்தி. அதிரேகந்தி அதி⁴கம், ஸோ ச அதி⁴கபா⁴வோ அதி⁴ட்டி²தவிகப்பிதசீவரதோதி ஆஹ ‘‘அதி⁴ட்டி²தவிகப்பிதேஸூ’’திஆதி³. கோ²மந்தி (பாரா. அட்ட². 2.636-638) கோ²மஸுத்தேஹி வாயிதம் கோ²மபட்டசீவரம். ததா² ஸேஸானி. கம்ப³லம் நாம மனுஸ்ஸலோமவாளலோமே ட²பேத்வா ஸேஸலோமேஹி வாயித்வா கதவத்த²ம். ஸாணம் நாம ஸாணவாகேஹி கதவத்த²ம். ப⁴ங்க³ம் நாம கோ²மஸுத்தாதீ³ஹி பஞ்சஹி மிஸ்ஸேத்வா கதவத்த²ம். ‘‘பாடேக்கம் வாகமயமேவா’’திபி வத³ந்தி. தத³னுலோமானம் வாதி து³கூலம் பத்துண்ணம் ஸோமாரபட்டம் சீனபட்டம் இத்³தி⁴ஜம் தே³வதி³ன்னந்தி தேஸம் கோ²மாதீ³னம்யேவ அனுலோமானம் ச²ன்னம் சீவரானம் வா, தத்த² து³கூலம் ஸாணஸ்ஸ அனுலோமம் வாகமயத்தா. பத்துண்ணதே³ஸே பாணகேஹி ஸஞ்ஜாதவத்த²ம் பத்துண்ணம். ஸோமாரதே³ஸே ஜாதம் வத்த²ம் ஸோமாரபட்டம். ததா² சீனபட்டம். இமானி தீணிபி கோஸேய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴ஜம் ஏஹிபி⁴க்கூ²னம் புஞ்ஞித்³தி⁴யா நிப்³ப³த்தசீவரம். தம் பன கோ²மாதீ³னமஞ்ஞதரம் ஹோதீதி தேஸம்யேவ அனுலோமம். தே³வேஹி தி³ன்னம் சீவரம் தே³வதி³ன்னம், தம் கப்பருக்கே² நிப்³ப³த்தம் ஜாலினியா தே³வகஞ்ஞாய அனுருத்³த⁴த்தே²ரஸ்ஸ தி³ன்னவத்த²ஸதி³ஸம், தம்பி கோ²மாதீ³னம்யேவ அனுலோமம் ஹோதி தேஸு அஞ்ஞதரபா⁴வதோ.

தீ³க⁴தோ வட்³ட⁴கிஹத்த²ப்பமாணம், வித்தா²ரதோ ததோ உபட்³ட⁴ப்பமாணம் விகப்பனுபக³ம் பச்சி²மம். அட்ட²ங்கு³லம் ஸுக³தங்கு³லேனாதி ஏத்த² ஸுக³தங்கு³லம் நாம இதா³னி மஜ்ஜி²மஸ்ஸ புரிமஸ்ஸ தீணி அங்கு³லானி, தேன ஸுக³தங்கு³லேன அட்ட²ங்கு³லம் வட்³ட⁴கிஹத்த²ப்பமாணந்தி அத்தோ². சதுரங்கு³லவித்த²தந்தி ஏத்தா²பி யதா²வுத்தானுஸாரேனேவ அத்தோ² வேதி³தப்³போ³. யேஸம் பன அதி⁴ட்டா²னவிகப்பனானம் அபா⁴வதோ அதி⁴ட்டி²தவிகப்பிதேஸு அபரியாபன்னத்தா இத³ம் அதிரேகசீவரம் நாம ஹோதி.

தம் அதி⁴ட்டா²னவிகப்பனம் கேனாகாரேன ஜானிதப்³ப³ந்தி அனுயோக³ம் ஸந்தா⁴ய தம் த³ஸ்ஸேதும் ‘‘யம் பன வுத்த’’ந்திஆதி³ ஆரத்³த⁴ம். தத்த² யம் பன வுத்தந்தி அதிரேகசீவரம் த³ஸ்ஸேதும் ‘‘அதி⁴ட்டி²தவிகப்பிதேஸு அபரியாபன்னத்தா’’தி அம்ஹேஹி யம் வுத்தந்தி அத்தோ². திசீவரம் அதி⁴ட்டா²துந்தி நாமம் வத்வா அதி⁴ட்டா²தும். ந விகப்பேதுந்தி ஸங்கா⁴டிஆதி³னாமேன விகப்பேதும் ந அனுஜானாமீதி அத்தோ². ‘‘இமம் சீவரம் விகப்பேமீ’’தி பன விகப்பேதும் வட்டதியேவ. ஸாமஞ்ஞவசனம் பன திசீவரஸ்ஸ கண்டு³படிச்சா²தி³வஸ்ஸிகஸாடிகானம் விய காலவஸேன விஸேஸாபா⁴வா சஸ்ஸ விகப்பேதப்³ப³தாதி த³ஸ்ஸனத்த²ம், ந பன ஸப்³ப³தா² விகப்பனபடிஸேத⁴னத்த²ந்தி த³ட்ட²ப்³ப³ம். ததா² ஹி புராணசீவரம் பச்சுத்³த⁴ரித்வா நவஸ்ஸ அதி⁴ட்டா²னவசனதோ, ‘‘அனாபத்தி அதி⁴ட்டே²தி விகப்பேதீ’’திஆதி³வசனதோ (பாரா. 469) ச திசீவரஸ்ஸபி விகப்பனாய ஓகாஸோ தி³ன்னோ. ஏஸ நயோ ஸப்³ப³த்த². திசீவராதீ³னி ஹி அதி⁴ட்ட²ஹந்தேன ‘‘இமம் ஸங்கா⁴டிம் அதி⁴ட்டா²மீ’’திஆதி³னா தம் தம் நாமம் வத்வா அதி⁴ட்டா²தப்³ப³ம். விகப்பேந்தேன பன ‘‘இமம் ஸங்கா⁴டி’’ந்திஆதி³னா தஸ்ஸ தஸ்ஸ சீவரஸ்ஸ நாமம் அக்³க³ஹேத்வா ‘‘இமம் சீவரம் துய்ஹம் விகப்பேமீ’’தி விகப்பேதப்³ப³ம். திசீவரம் வா ஹோது, அஞ்ஞம் வா, யதி³ தம் தம் நாமம் க³ஹேத்வா விகப்பேதி, அவிகப்பிதம் ஹோதி, அதிரேகசீவரட்டா²னேயேவ திட்ட²தி. ததோ பரம் விகப்பேதுந்தி சதுமாஸதோ பரம் ‘‘இமம் சீவரம் விகப்பேமீ’’தி விகப்பேதும். இத³ஞ்ச பரிபு⁴ஞ்ஜிதும் அனுஞ்ஞாதம். கேசி பன (ஸாரத்த². டீ. 2.469) ‘‘ததோ பரம் விகப்பேத்வா யாவ ஆகா³மிஸம்வச்ச²ரே வஸ்ஸானம் சதுமாஸம், தாவ ட²பேதும் அனுஞ்ஞாத’’ந்தி வத³ந்தி. ததோ பரந்தி ஆபா³த⁴தோ பரம். ‘‘இமாஸஞ்ச பன வஸ்ஸிகஸாடிககண்டு³படிச்சா²தீ³னம் ததோ பரம் விகப்பேத்வா பரிபோ⁴க³ஸ்ஸ அனுஞ்ஞாதத்தா ததா²விகப்பிதம் அஞ்ஞனாமேன அதி⁴ட்ட²ஹித்வா பரிபு⁴ஞ்ஜிதப்³ப³’’ந்தி க³ண்டி²பதே³ஸு வுத்தம். அதி⁴ட்டா²தப்³ப³விகப்பேதப்³ப³தா ஜானிதப்³பா³தி அதி⁴ட்டா²தப்³ப³ம் விகப்பேதப்³ப³ந்தி ஏவம் அதி⁴ட்டா²னவிகப்பனா ஜானிதப்³பா³தி அத்தோ².

பஞ்சபரிமாணம் அஸ்ஸாதி பஞ்சகம், முட்டி²ஸ்ஸ முட்டி²ஹத்த²ஸ்ஸ ஸம்ப³ந்த⁴ம் பஞ்சகம் முட்டி²பஞ்சகம். ஏஸ ந யோ முட்டி²த்திகந்தி ஏத்தா²பி. பாருபனேனபி ஸக்கா நாபி⁴ம் படிச்சா²தே³துந்தி ஆஹ ‘‘த்³விஹத்தோ²பி வட்டதீ’’தி. ந கேவலம் அட்³ட⁴தேய்யோவ வட்டதி, அத² கோ² த்³விஹத்தோ²பி வட்டதீதி பி-ஸத்³த³ஸ்ஸ அத்தோ² த³ட்ட²ப்³போ³. அதிரேகஞ்சாதி ஸுக³தசீவரப்பமாணம்பி ததோ அதி⁴கம்பி. பச்சுத்³த⁴ராமீதி ட²பேமி, பரிச்சஜாமீதி வா அத்தோ². ‘‘இமம் சீவரம் ஸங்கா⁴டிம் அதி⁴ட்டா²மீ’’தி (ஸாரத்த². டீ. 2.469) ஏவம்பி வத்தும் வட்டதி. காயவிகாரம் கரோந்தேனாதி ஹத்தா²தி³னா சீவரம் பராமஸந்தேன, சாலேந்தேன வா. இத³ஞ்ஹி அதி⁴ட்டா²னம் யேன கேனசி ஸரீராவயவேன அபு²ஸந்தஸ்ஸ ந வட்டதி. து³வித⁴ந்தி ஸம்முகா²பரம்முக²பே⁴தே³ன து³வித⁴ம். வாசா பி⁴ந்தி³தப்³பா³தி வசனம் நிச்சா²ரேதப்³ப³ம். அந்தோக³ப்³பா⁴தீ³ஸூதி அந்தோக³ப்³ப⁴உபரிபாஸாதே³ஸு. ஸாமந்தவிஹாரேதி யத்த² தத³ஹேவ க³ந்த்வா நிவத்தேதும் ஸக்கா, ஏவரூபே ஸமீபவிஹாரே. இத³ஞ்ச தே³ஸனாஸீஸமத்தம், தஸ்மா தூ³ரே டி²தம்பி அதி⁴ட்டா²தப்³ப³ந்தி வத³ந்தி. ‘‘ட²பிதட்டா²னம் ஸல்லக்கே²த்வா’’தி இமினா சீவரஸம்லக்க²ணம் வுத்தம். ந ஹி ட²பிதட்டா²னமத்தஸல்லக்க²ணேன கிஞ்சி பயோஜனம் அத்தி².

அதி⁴ட்ட²ஹித்வா ட²பிதவத்தே²ஹீதி பச்சத்த²ரணமுக²புஞ்ச²னசோளபரிக்கா²ரசோளவஸேன அதி⁴ட்ட²ஹித்வா ட²பிதவத்தே²ஹி. அதி⁴ட்டா²னதோ புப்³பே³ ஸங்கா⁴டிஆதி³வோஹாரஸ்ஸ அபா⁴வதோ ‘‘இமம் பச்சுத்³த⁴ராமீ’’தி பச்சத்த²ரணாதீ³னம் விஸும் பச்சுத்³த⁴ரணவிதி⁴ம் த³ஸ்ஸேதி. பச்சத்த²ரணாதி³னாமேன பன அதி⁴ட்டா²தப்³ப³த்தா ‘‘இமம் பச்சத்த²ரணம் பச்சுத்³த⁴ராமீ’’திஆதி³னா வுத்தேபி நேவத்தி² தோ³ஸோ. புன அதி⁴ட்டா²தப்³பா³னீதி ஸங்கா⁴டிஆதி³னாமேன அதி⁴ட்டா²தப்³பா³னி. பரிக்கா²ரசோளகஸ்ஸ பன பரிக்கா²ரசோளவஸேன அதி⁴ட்ட²ஹித்வா ட²பிதவத்தே²ஹிபி ஸங்கா⁴டிஆதி³ம்ஹி கதே பச்சுத்³த⁴ரித்வா புன அதி⁴ட்டா²தப்³ப³ந்தி நத்தி². புப்³பே³ கதாதி⁴ட்டா²னமேவ அதி⁴ட்டா²னம். அதி⁴ட்டி²தேன பன தேன ஸத்³தி⁴ம் மஹந்ததரமேவ து³தியம் பட்டம் வா க²ண்ட³ம் வா ஸம்ஸிப்³ப³ந்தேன அதி⁴ட்டா²தப்³ப³ம், ஸமே வா கு²த்³த³கே வா அதி⁴ட்டா²னகிச்சம் நத்தி². ஸுக²பரிபோ⁴க³த்த²ந்தி விப்பவாஸதோ³ஸாபா⁴வதோ யத்த² கத்த²சி ட²பேத்வா த⁴ம்மஸ்ஸவனாதி³னா கிச்சேன அஞ்ஞத்த² அருணம் உட்டா²பேத்வா ஆக³ந்த்வா நிஸ்ஸஜ்ஜனம் வினாவ பரிபு⁴ஞ்ஜிதும் ஸக்குணேய்யதாய ஸுக²பரிபோ⁴க³த்த²ம். பரிக்கா²ரசோளம் அதி⁴ட்டா²துந்தி பரிக்கா²ரசோளம் கத்வா அதி⁴ட்டா²தும்.

அனதிரித்தபமாணாதி ‘‘தீ³க⁴ஸோ ச² வித³த்தி²யோ ஸுக³தவித³த்தி²யா, திரியம் அட்³ட⁴தேய்யா’’தி (பாசி. 543) வுத்தப்பமாணதோ அனதி⁴கபமாணா. பச்சுத்³த⁴ரித்வா விகப்பேதப்³பா³தி வஸ்ஸிகஸாடிகபா⁴வதோ அபனேத்வா விகப்பேதப்³பா³, ஹேமந்தஸ்ஸ பட²மதி³வஸதோ பட்டா²ய அந்தோத³ஸாஹே வஸ்ஸிகஸாடிகாவஸ்ஸிகஸாடிகபா⁴வதோ அபனேத்வா ‘‘இமம் சீவரம் துய்ஹம் விகப்பேமீ’’திஆதி³னா நயேன விகப்பேதப்³பா³தி வுத்தம் ஹோதி. அஞ்ஞதா² ஹி ‘‘வஸ்ஸிகஸாடிகா வஸ்ஸானமாஸாதிக்கமேனாபி, கண்டு³படிச்சா²தி³ ஆபா³த⁴வூபஸமேனாபி அதி⁴ட்டா²னம் விஜஹதீ’’தி (கங்கா². அட்ட². கதி²னஸிக்கா²பத³வண்ணனா) வக்க²மானத்தா வஸ்ஸானமாஸதோ பரம் அஸதி அதி⁴ட்டா²னே கிம் பச்சுத்³த⁴ரேய்யாதி ‘‘பச்சுத்³த⁴ரித்வா’’தி வசனமேவ நோபபஜ்ஜேய்ய.

கேசி பன (ஸாரத்த². டீ. 2.469) ‘‘யதா² கதி²னமாஸப்³ப⁴ந்தரே உப்பன்னசீவரம் கதி²னமாஸாதிக்கமே நிஸ்ஸக்³கி³யம் ஹோதி, ஏவமயம் வஸ்ஸிகஸாடிகாபி வஸ்ஸானமாஸாதிக்கமே நிஸ்ஸக்³கி³யா ஹோதி. தஸ்மா கத்திகபுண்ணமதி³வஸே பச்சுத்³த⁴ரித்வா ததோ பரம் ஹேமந்தஸ்ஸ பட²மதி³வஸே விகப்பேதப்³பா³தி ஏவமத்தோ² க³ஹேதப்³போ³, பச்சுத்³த⁴ரித்வா ததோ பரம் விகப்பேதப்³பா³தி பத³யோஜனா வேதி³தப்³பா³’’தி ச வத³ந்தி, தம் ந யுத்தம். கதி²னமாஸே உப்பன்னஞ்ஹி சீவரம் அதிரேகசீவரட்டா²னே டி²தத்தா அவஸானதி³வஸே அனதி⁴ட்டி²தம் கதி²னமாஸாதிக்கமே நிஸ்ஸக்³கி³யம் ஹோதி. அயம் பன வஸ்ஸிகஸாடிகா அதி⁴ட்ட²ஹித்வா ட²பிதத்தா ந தேன ஸதி³ஸாதி வஸ்ஸானாதிக்கமே கத²ம் நிஸ்ஸக்³கி³யம் ஹோதி அனதி⁴ட்டி²தஅவிகப்பிதமேவ ஹி தம் காலாதிக்கமே நிஸ்ஸக்³கி³யம் ஹோதி, தஸ்மா ஹேமந்தேபி வஸ்ஸிகஸாடிகா த³ஸாஹபரிஹாரம் லப⁴தி. ஏவம் கண்டு³படிச்சா²தி³பி அதி⁴ட்டா²னவிஜஹனதோ பரம் த³ஸாஹபரிஹாரம் லப⁴தி. த³ஸாஹம் பன அனதிக்காமேத்வா விகப்பேதப்³பா³. நஹானத்தா²ய அனுஞ்ஞாதத்தா வண்ணபே⁴த³மத்தரத்தாபி சேஸா வட்டதீதி வுத்தம். ‘‘த்³வே பன ந வட்டந்தீ’’தி த்³வின்னம் அதி⁴ட்டா²னாபா⁴வதோ வுத்தம். ‘‘ஸசே வஸ்ஸானே அபரா வஸ்ஸிகஸாடிகா உப்பன்னா ஹோதி, புரிமவஸ்ஸிகஸாடிகம் பச்சுத்³த⁴ரித்வா, விகப்பேத்வா ச அதி⁴ட்டா²தப்³பா³’’தி வத³ந்தி.

பமாணயுத்தந்தி ‘‘தீ³க⁴ஸோ ஸுக³தவித³த்தி²யா த்³வே வித³த்தி²யோ, வித்தா²ரதோ தி³யட்³ட⁴ம் த³ஸா வித³த்தீ²’’தி (பாசி. 531 ஆத³யோ) இமினா பமாணேன யுத்தம். பமாணிகாதி ‘‘ஸுக³தவித³த்தி²யா தீ³க⁴ஸோ சதஸ்ஸோ வித³த்தி²யோ, திரியம் த்³வே வித³த்தி²யோ’’தி ஏவம் வுத்தப்பமாணயுத்தா. பச்சுத்³த⁴ரித்வா விகப்பேதப்³பா³தி ஏத்த² யம் வத்தப்³ப³ம், தம் ஹேட்டா² வுத்தமேவ. யஸ்மா பி⁴க்கூ²னம் திசீவரே பரிபுண்ணே, அத்தே² ச ஸதி பரிஸ்ஸாவனாதீ³ஹி ‘‘அனுஜானாமி, பி⁴க்க²வே, பரிக்கா²ரசோளக’’ந்தி (மஹாவ. 357) ப³ஹூனம் பத்தத்த²விகபரிஸ்ஸாவனாதீ³னம் ஸங்க³ஹவஸேன பரிக்கா²ரசோளாதி⁴ட்டா²னமனுஞ்ஞாதம், தஸ்மா ‘‘பரிக்கா²ரசோளே க³ணனா நத்தீ²’’திஆதி³ வுத்தம். ப⁴க³வதா ஹி யம் யம் பி⁴க்கூ² லப⁴ந்தி, தம் தம் இமினா விதா⁴னேன அதி⁴ட்ட²ஹித்வா புன ‘‘யேன யேன பரிஸ்ஸாவனாதி³னா அத்தோ² ஹோதி, தம் தம் கத்வா க³ண்ஹந்தூ’’தி அனுகம்பாய அனுஞ்ஞாதம். தேனேவாஹ ‘‘த²விகாபீ’’திஆதி³. ஆதி³ஸத்³தே³ன ‘‘ஏதானி சீவரானி பரிக்கா²ரசோளானி அதி⁴ட்டா²மீ’’தி அஸம்முகா²தி⁴ட்டா²னம் ஸங்க³ண்ஹாதி. ‘‘ஸேனாஸனபரிக்கா²ரத்தா²ய தி³ன்னபச்சத்த²ரணே சா’’தி இமினா அத்தனோ ஸந்தகம் படிக்கி²பதி. கேசி பன (ஸாரத்த². டீ. 2.469) ‘‘அனிவாஸேத்வா, அபாருபித்வா ச கேவலம் பஞ்சபீடே²ஸுயேவ அத்த²ரித்வா பரிபு⁴ஞ்ஜியமானம் பச்சத்த²ரணம் அத்தனோ ஸந்தகம்பி அனதி⁴ட்டி²தம் வட்டதீ’’தி வத³ந்தி, தம் அயுத்தம் ஸேனாஸனபரிக்கா²ரத்தா²ய தி³ன்ன’’ந்தி பச்சத்த²ரணஸ்ஸ விஸேஸிதத்தா. பி⁴ஸிபி³ப்³போ³ஹனபாவாரகோஜவானம்பி ஸேனாஸனபரிக்கா²ரதோயேவ அதி⁴ட்டா²னகிச்சம் நத்தீ²தி வேதி³தப்³ப³ம்.

அதி⁴ட்டி²தஞ்ச பனேதம் சீவரம் பரிபு⁴ஞ்ஜதோ கத²ம் அதி⁴ட்டா²னம் விஜஹதீதி ஆஹ ‘‘ஸப்³ப³ஞ்ச பனேத’’ந்திஆதி³. தத்த² அச்சி²ந்தி³த்வா க³ஹணேனாதி சோராதீ³ஹி அச்சி²ந்தி³த்வா க³ஹணேன. ஹீனாயாவத்தனேனாதி கி³ஹிபா⁴வாய ஆவத்தனேன, விப்³ப⁴மேனாதி அத்தோ², ‘‘ஸீலவந்தோவ ஹுத்வா கி³ஹீ ப⁴விஸ்ஸாமீ’’தி ஸேதவத்த²னிவாஸனேனாதி வுத்தம் ஹோதி. ‘‘அந்திமவத்து²ம் அஜ்ஜா²பன்னஸ்ஸ ஸேதவத்த²னிவாஸோ வா காஸாயசஜனம் வா ஹீனாயாவத்தன’’ந்தி கேசி. ‘‘‘ஹீனாயாவத்தனேனா’தி இமினா பி⁴க்கு²னியா ஏவ அதி⁴ட்டா²னவிஜஹனம் க³ஹிதம் ஹோதி. ஸா ஹி யதா³ விப்³ப⁴மதி, ததா³ அஸ்ஸமணீ ஹோதி. பி⁴க்கு² பன விப்³ப⁴மந்தோபி யாவ ஸிக்க²ம் ந பச்சக்கா²தி, தாவ பி⁴க்கு²யேவாதி அதி⁴ட்டா²னம் ந விஜஹதீ’’தி அபரே. ஸிக்கா²பச்சக்கா²னேனாதி லிங்கே³ டி²தஸ்ஸேவ ஸிக்கா²ய பச்சக்கா²னேன. யோ ஹி பி⁴க்கு²லிங்கே³ டி²தோவ ஸிக்க²ம் பச்சக்கா²தி, தஸ்ஸ காயலக்³க³ம்பி சீவரம் அதி⁴ட்டா²னம் விஜஹதீதி. காலங்கிரியாயாதி மரணேன. லிங்க³பரிவத்தனேனாதி புரிஸலிங்க³ஸ்ஸ, இத்தி²லிங்க³ஸ்ஸ வா பரிவத்தனேன, புரிஸஸ்ஸ இத்தி²லிங்க³பாதுபா⁴வேன, இத்தி²யா வா புரிஸலிங்க³பாதுபா⁴வேனாதி வுத்தம் ஹோதி.

கனிட்ட²ங்கு³லினக²பிட்டி²ப்பமாணேனாதி ஹேட்டி²மபரிச்சே²த³ம் த³ஸ்ஸேதி. ஓரதோதி அப்³ப⁴ந்தரதோ. யோ பன து³ப்³ப³லட்டா²னே பட²மம் அக்³க³ளம் த³த்வா பச்சா² து³ப்³ப³லட்டா²னம் சி²ந்தி³த்வா அபனேதி, அதி⁴ட்டா²னம் ந பி⁴ஜ்ஜதி. மண்ட³லபரிவத்தனேபி ஏஸேவ நயோ. து³பட்டஸ்ஸ பன ஏகஸ்மிம் படலே சி²த்³தே³ வா ஜாதே, க³லிதே வா அதி⁴ட்டா²னம் ந பி⁴ஜ்ஜதி. கு²த்³த³கம் சீவரம் மஹந்தம் கரோதி, மஹந்தம் வா கு²த்³த³கம் கரோதி, அதி⁴ட்டா²னம் ந பி⁴ஜ்ஜதி. உபோ⁴ கோடியோ மஜ்ஜே² கரோந்தோ ஸசே பன பட²மம் சி²ந்தி³த்வா பச்சா² க⁴டேதி, அதி⁴ட்டா²னம் பி⁴ஜ்ஜதி. அத² க⁴டேத்வா சி²ந்த³தி, ந பி⁴ஜ்ஜதி. ரஜகேஹி தோ⁴வாபேத்வா ஸேதம் கரோந்தஸ்ஸாபி அதி⁴ட்டா²னம் அதி⁴ட்டா²னமேவ. வஸ்ஸானமாஸாதிக்கமேனாபீதி ஏத்த² பி-ஸத்³தோ³ ஸம்பிண்ட³னத்தோ². தேன ந கேவலம் புப்³பே³ வுத்தேன தா³னாதி³னா அட்ட²விதே⁴னேவ காரணேன வஸ்ஸிகஸாடிகா அதி⁴ட்டா²னம் விஜஹதி, அத² கோ² வஸ்ஸானமாஸாதிக்கமேனபீதி ஏவமேத்த² அத்தோ² த³ட்ட²ப்³போ³. ஏஸ நயோ ஆபா³த⁴வூபஸமேனாபீதி ஏத்தா²பி. விகப்பனஸிக்கா²பதே³தி (பாசி. 372 ஆத³யோ) பாசித்தியே ஸுராபானவக்³க³ஸ்ஸ நவமஸிக்கா²பதே³.

தம் அதிக்காமயதோதி ஏத்த² தந்தி சீவரம், காலம் வா பராமஸதீதி ஆஹ ‘‘தம் யதா²வுத்தஜாதிப்பமாண’’ந்திஆதி³. அஸ்ஸாதி பி⁴க்கு²ஸ்ஸ. தஸ்ஸ யோ அருணோதி தஸ்ஸ சீவருப்பாத³தி³வஸஸ்ஸ யோ அதிக்கந்தோ அருணோ. சீவருப்பாத³தி³வஸேன ஸத்³தி⁴ந்தி சீவருப்பாத³தி³வஸஸ்ஸ அருணேன ஸத்³தி⁴ம். தி³வஸஸத்³தே³ன சேத்த² தம்தி³வஸனிஸ்ஸிதோ அருணோ வுத்தோ. இதா³னி யஸ்ஸ ச நிஸ்ஸஜ்ஜிதப்³ப³ம், யதா² ச நிஸ்ஸஜ்ஜிதப்³ப³ம், தம் த³ஸ்ஸேதும் ‘‘தம் க³ஹேத்வா’’திஆதி³ வுத்தம். தத்ராயம் நயோதி தஸ்மிம் நிஸ்ஸஜ்ஜனே அயம் விதி⁴. அஞ்ஞதா²பீதி பா⁴ஸந்தரேனாபி, யாய காயசி பா⁴ஸாயபீதி அத்தோ². படிப³லேனாதி வத்தும் ஸமத்தே²ன. ஆயதிம் ஸம்வரேய்யாஸீதி உபரி ஸம்வரமாபஜ்ஜேய்யாஸி, ஸம்வுதகாயவசீத்³வாரோ ப⁴வேய்யாஸீதி அத்தோ². இமானி ச ‘‘பஸ்ஸஸீ’’திஆதீ³னி யதா²க்கமம் படிக்³கா³ஹகதே³ஸகேஹி வத்தப்³ப³வசனானி. ததா² ஹி ‘‘பஸ்ஸஸீ’’தி படிக்³கா³ஹகேன வத்தப்³ப³வசனம், ‘‘ஆம பஸ்ஸாமீ’’தி தத³னுதே³ஸகேன வத்தப்³ப³வசனம். ‘‘ஆயதிம் ஸம்வரேய்யாஸீ’’தி தத³னுப்படிக்³கா³ஹகேன வத்தப்³ப³வசனம், ‘‘ஸாது⁴ ஸுட்டு² ஸம்வரிஸ்ஸாமீ’’தி தத³னுதே³ஸகேன வத்தப்³ப³வசனம். இமினா ச அத்தனோ ஆயதிம் ஸம்வரே பதிட்டி²தபா⁴வம் த³ஸ்ஸேதி. த்³வீஸு, பன ஸம்ப³ஹுலாஸு வாதி த்³வீஸு வா ஸம்ப³ஹுலாஸு வா ஆபத்தீஸு புரிமனயேனேவ வசனபே⁴தோ³ காதப்³போ³. ஞத்தியம் ஆபத்திம் ஸரதி விவரதீதி ஏத்த² ‘‘த்³வே ஆபத்தியோ’’தி வா ‘‘ஸம்ப³ஹுலா ஆபத்தியோ’’தி வா வசனபே⁴தோ³ காதப்³போ³. த்³வீஸு, ப³ஹூஸு வா வசனபே⁴தோ³ காதப்³போ³தி ‘‘ஸங்கோ⁴ இமானி சீவரானீ’’தி வத்து²வஸேன வசனபே⁴தோ³ காதப்³போ³.

ஏவம் ஸங்க⁴ஸ்ஸ நிஸ்ஸஜ்ஜனவிதி⁴ம் த³ஸ்ஸேத்வா க³ணஸ்ஸ நிஸ்ஸஜ்ஜனவிதி⁴ம் த³ஸ்ஸேதும் ‘‘க³ணஸ்ஸ பன நிஸ்ஸஜ்ஜந்தேனா’’திஆதி³மாஹ. தத்த² ஸேஸம் புரிமஸதி³ஸமேவாதி நிஸ்ஸஜ்ஜனாபத்திப்படிக்³க³ஹணனிஸ்ஸட்ட²சீவரதா³னேஸு ‘‘ஆயஸ்மந்தான’’ந்திஆதி³னா வுத்தவசனபே⁴த³ம் வினா அவஸேஸம் ஸங்க⁴ஸ்ஸ நிஸ்ஸஜ்ஜனாதீ³ஸு வுத்தஸதி³ஸமேவாதி அத்தோ².

இதா³னி புக்³க³லஸ்ஸ நிஸ்ஸஜ்ஜனவிதி⁴ம் த³ஸ்ஸேதும் ‘‘புக்³க³லஸ்ஸ பனா’’திஆதி³ வுத்தம். தத்த² த்³வீஸு, தீஸு வாதி த்³வீஸு, தீஸு வா ஆபத்தீஸு சேவ தா³தப்³ப³சீவரேஸு ச. யதா² ச க³ணஸ்ஸ நிஸ்ஸஜ்ஜனே, ஏவம் த்³வின்னம் நிஸ்ஸஜ்ஜனேபி பாளி வேதி³தப்³பா³. யதி³ ஹி விஸேஸோ ப⁴வேய்ய, யதே²வ ‘‘அனுஜானாமி, பி⁴க்க²வே, திண்ணம் பாரிஸுத்³தி⁴உபோஸத²ம் காதும், ஏவஞ்ச பன, பி⁴க்க²வே, காதப்³போ³ – ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³’’திஆதி³னா (மஹாவ. 168) நயேன திண்ணம் பாரிஸுத்³தி⁴உபோஸத²ம் வத்வா ‘‘அனுஜானாமி, பி⁴க்க²வே, த்³வின்னம் பாரிஸுத்³தி⁴உபோஸத²ம் காதும், ஏவஞ்ச பன, பி⁴க்க²வே, கத்தப்³போ³ – தே²ரேன பி⁴க்கு²னா ஏகம்ஸம் உத்தராஸங்க³’’ந்திஆதி³னா நயேன விஸும்யேவ த்³வின்னம் பாரிஸுத்³தி⁴உபோஸதோ² வுத்தோ, ஏவம் இதா⁴பி விஸும் பாளிம் வதே³ய்ய. யஸ்மா பன நத்தி², தஸ்மா அவத்வாவ க³தோதி க³ணஸ்ஸ வுத்தா பாளியேவேத்த² பாளி. ஆபத்திப்படிக்³க³ஹணே பன அயம் விஸேஸோ – யதா² க³ணஸ்ஸ நிஸ்ஸஜ்ஜித்வா ஆபத்தியா தே³ஸியமானாய ஆபத்திப்படிக்³கா³ஹகோ பி⁴க்கு² ஞத்திம் ட²பேதி, ஏவம் அட்ட²பேத்வா த்³வீஸு அஞ்ஞதரேன யதா² ஏகபுக்³க³லோ படிக்³க³ண்ஹாதி, ஏவம் ஆபத்தி படிக்³க³ஹேதப்³பா³. த்³வின்னஞ்ஹி ஞத்திட்ட²பனம் நாம நத்தி². யதி³ ஸியா, த்³வின்னம் பாரிஸுத்³தி⁴உபோஸத²ம் விஸும் ந வதே³ய்ய. நிஸ்ஸட்ட²சீவரதா³னேபி யதா² ‘‘இமம் சீவரம் ஆயஸ்மதோ த³ம்மீ’’தி ஏகோ வத³தி, ஏவம் ‘‘மயம் இமம் சீவரம் ஆயஸ்மதோ தே³மா’’தி வத்தும் வட்டதி. இதோ க³ருகதரானிபி ஹி ஞத்திது³தியகம்மானி அபலோகேத்வா காதப்³பா³னீதி வுத்தானி அத்தி², தேஸம் ஏதம் அனுலோமம். தேனேவாஹ ‘‘த்³வின்னம் பனா’’திஆதி³. நிஸ்ஸட்ட²சீவரம் பன தா³தப்³ப³மேவ, அதா³தும் ந லப்³ப⁴தி. வினயகம்மமத்தமேவ ஹேதம். ந தம் தேன ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா தி³ன்னமேவ ஹோதி. தேனாஹ ‘‘நிஸ்ஸட்ட²வத்து²’’ந்திஆதி³.

அனிஸ்ஸஜ்ஜித்வா பரிபு⁴ஞ்ஜந்தஸ்ஸ து³க்கடந்தி ஸகிம் நிவத்த²ம் வா ஸகிம் பாருதம் வா காயதோ அமோசேத்வா தி³வஸம்பி சரதி, ஏகமேவ து³க்கடம். மோசேத்வா நிவாஸேதி வா பாருபதி வா, பயோகே³ பயோகே³ து³க்கடம். து³ன்னிவத்த²ம் வா து³ப்பாருதம் வா ஸண்டா²பேந்தஸ்ஸ அனாபத்தி. அஞ்ஞஸ்ஸ தம் பரிபு⁴ஞ்ஜதோபி அனாபத்தி. ‘‘அஞ்ஞேன கதம் படிலபி⁴த்வா பரிபு⁴ஞ்ஜதீ’’திஆதி³வசனஞ்சேத்த² (பாரா. 570) ஸாத⁴கம். த³ஸாஹம் அனதிக்கந்தேபி அதிக்கந்தஸஞ்ஞினோ, வேமதிகஸ்ஸ ச து³க்கடந்தி ஏத்தா²பி ‘‘பரிபு⁴ஞ்ஜந்தஸ்ஸா’’தி ஆனேத்வா ஸம்ப³ந்தி⁴தப்³ப³ம். அதிக்கந்தே அனதிக்கந்தஸஞ்ஞினோபீதி த³ஸாஹம் அதிக்கந்தே சீவரே ‘‘அனதிக்கந்தம் இத³’’ந்தி ஏவம் ஸஞ்ஞினோ, த³ஸாஹே வா அதிக்கந்தே ‘‘அனதிக்கந்தோ த³ஸாஹோ’’தி ஏவம் ஸஞ்ஞினோ.

இதா³னி ‘‘அனதி⁴ட்டி²தே அதி⁴ட்டி²தஸஞ்ஞினோ நிஸ்ஸக்³கி³ய’’ந்திஆதி³ஆபத்திவாரம் ஸங்க³ஹேத்வா த³ஸ்ஸேந்தோ ‘‘ததா²’’திஆதி³மாஹ. ததா²தி யதா² த³ஸாஹம் அதிக்கந்தே ஸஞ்ஞாபே⁴தே³ன திகபாசித்தியம், ததா² அனதி⁴ட்டி²தாதீ³ஸு ஸத்தஸு விகப்பேஸு அதி⁴ட்டி²தாதி³ஸஞ்ஞாபே⁴த³தோதி அத்தோ². தத்த² அவிஸ்ஸஜ்ஜிதே விஸ்ஸஜ்ஜிதஸஞ்ஞினோதி கஸ்ஸசி அதி³ன்னே அபரிச்சத்தே ‘‘தி³ன்னம் பரிச்சத்தம் மயா’’தி ஏவம் ஸஞ்ஞினோ. அனட்டே² நட்ட²ஸஞ்ஞினோதி அத்தனோ சீவரேன ஸத்³தி⁴ம் ப³ஹூனி அஞ்ஞேஸம் சீவரானி ஏகதோ ட²பிதானி, தானி சே சோரா ஹரந்தி, தத்ரேஸ அத்தனோ சீவரே அனட்டே² நட்ட²ஸஞ்ஞீ ஹோதி, தஸ்ஸ நட்ட²ஸஞ்ஞினோ. ஏஸ நயோ அவினட்டா²தீ³ஸுபி. அவிலுத்தேதி ஏத்த² பன க³ப்³ப⁴ம் பி⁴ந்தி³த்வா பஸய்ஹாவஹாரவஸேன அவிலுத்தேதி வேதி³தப்³ப³ம்.

விஸ்ஸஜ்ஜிதேதி (பாரா. அட்ட². 2.469) அஞ்ஞஸ்ஸ தி³ன்னே. கத²ம் பன தி³ன்னம் ஹோதி, கத²ம் க³ஹிதம்? ‘‘இமம் துய்ஹம் தே³மி, த³தா³மி, த³ஜ்ஜாமி, ஓணோஜேமி, பரிச்சஜாமி, விஸ்ஸஜ்ஜாமி, நிஸ்ஸஜ்ஜாமீ’’தி வா வத³தி, ‘‘இத்த²ன்னாமஸ்ஸ தே³மி…பே… நிஸ்ஸஜ்ஜாமீ’’தி வா வத³தி, ஸம்முகா²பி பரம்முகா²பி தி³ன்னம்யேவ ஹோதி. ‘‘துய்ஹம் க³ண்ஹாஹீ’’தி வுத்தே ‘‘மய்ஹம் க³ண்ஹாமீ’’தி வத³தி, ஸுதி³ன்னம், ஸுக்³க³ஹிதஞ்ச. ‘‘தவ ஸந்தகம் கரோஹி, தவ ஸந்தகம் ஹோது, தவ ஸந்தகம் கரிஸ்ஸஸீ’’தி வுத்தே ‘‘மம ஸந்தகம் கரோமி, மம ஸந்தகம் ஹோது, மம ஸந்தகம் கரிஸ்ஸாமீ’’தி வத³தி, து³த்³தி³ன்னம், து³க்³க³ஹிதஞ்ச. நேவ தா³தா தா³தும் ஜானாதி, ந இதரோ க³ஹேதும். ஸசே பன ‘‘தவ ஸந்தகம் கரோஹீ’’தி வுத்தே ‘‘ஸாது⁴, ப⁴ந்தே, மய்ஹம் க³ண்ஹாமீ’’தி க³ண்ஹாதி, ஸுக்³க³ஹிதம், ஸசே பன ஏகோ ‘‘க³ண்ஹாஹீ’’தி வத³தி, இதரோ ‘‘ந க³ண்ஹாமீ’’தி வத³தி, புன ஸோ ‘‘தி³ன்னம் மயா துய்ஹம், க³ண்ஹாஹீ’’தி வத³தி, இதரோபி ‘‘ந மய்ஹம் இமினா அத்தோ²’’தி வத³தி. ததோ புரிமோபி ‘‘மயா தி³ன்ன’’ந்தி த³ஸாஹம் அதிக்காமேதி, பச்சி²மோபி ‘‘மயா படிக்கி²த்த’’ந்தி, கஸ்ஸாபத்தீதி? ந கஸ்ஸசி. யஸ்ஸ பன ருச்சதி, தேன அதி⁴ட்ட²ஹித்வா பரிபு⁴ஞ்ஜிதப்³ப³ம். யோ பன அதி⁴ட்டா²னே வேமதிகோ, தேன கிம் காதப்³ப³ம்? வேமதிகபா⁴வம் ஆரோசேத்வா ‘‘ஸசே அனதி⁴ட்டி²தம் ப⁴விஸ்ஸதி, ஏவம் மே கப்பியம் ஹோதீ’’தி வத்வா வுத்தனயேனேவ நிஸ்ஸஜ்ஜிதப்³ப³ம். ந ஹி ஏவம் ஜானாபேத்வா வினயகம்மம் கரோந்தஸ்ஸ முஸாவாதோ³ ஹோதி.

யதா² ச இத³ம், ஏவம் இதோ பரானிபீதி யதா² இத³ம் அதிரேகசீவரதா⁴ரணஸிக்கா²பத³ம் ஆசாரவிபத்தி, ஏவம் இதோ பரானிபி ஸிக்கா²பதா³னி ஆசாரவிபத்தியேவாதி அத்தோ². தேனாஹ ‘‘உப⁴தோபாதிமோக்கே²ஸூ’’திஆதி³. ஆஜீவவிபத்திபச்சயா பன ட²பேத்வா து³ப்³பா⁴ஸிதம் ச² ஆபத்திக்க²ந்தா⁴ பஞ்ஞத்தாதி –

‘‘ஆஜீவஹேது ஆஜீவகாரணா பாபிச்சோ² இச்சா²பகதோ அஸந்தம் அபூ⁴தம் உத்தரிமனுஸ்ஸத⁴ம்மம் உல்லபதி, ஆபத்தி பாராஜிகஸ்ஸ. ஆஜீவஹேது ஆஜீவகாரணா ஸஞ்சரித்தம் ஸமாபஜ்ஜதி, ஆபத்தி ஸங்கா⁴தி³ஸேஸஸ்ஸ. ஆஜீவஹேது ஆஜீவகாரணா ‘யோ தே விஹாரே வஸதி, ஸோ பி⁴க்கு² அரஹா’தி ப⁴ணதி, படிவிஜானந்தஸ்ஸ ஆபத்தி து²ல்லச்சயஸ்ஸ. ஆஜீவஹேது ஆஜீவகாரணா பி⁴க்கு² பணீதபோ⁴ஜனானி அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி பாசித்தியஸ்ஸ. ஆஜீவஹேது ஆஜீவகாரணா பி⁴க்கு²னீ பணீதபோ⁴ஜனானி அகி³லானா அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. ஆஜீவஹேது ஆஜீவகாரணா பி⁴க்கு² ஸூபம் வா ஓத³னம் வா அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி து³க்கடஸ்ஸா’’தி (பரி. 287) –

ஏவம் பாராஜிகாதி³வஸேன ட²பேத்வா து³ப்³பா⁴ஸிதம் ஆஜீவவிபத்திபச்சயா ச² ஆபத்திக்க²ந்தா⁴ பஞ்ஞத்தா. தி³ட்டி²விபத்திபச்சயா பாசித்தியது³க்கடவஸேன த்³வே ஆபத்திக்க²ந்தா⁴ பஞ்ஞத்தாதி ஸமனுபா⁴ஸனாய பாபிகாய தி³ட்டி²யா அப்படினிஸ்ஸஜ்ஜனே ஞத்தியா து³க்கடம், கம்மவாசாபரியோஸானே பாசித்தியந்தி ஏவம் தி³ட்டி²விபத்திபச்சயா பாசித்தியது³க்கடவஸேன த்³வே ஆபத்திக்க²ந்தா⁴ பஞ்ஞத்தா. ஏத்தா²தி விபத்திகதா²ஸு.

க³ணனுபக³தாதி தி³வஸக³ணனம் உபக³தபா⁴வோ. அஞ்ஞேஹி ‘‘இமம் சீவரம் இத்த²ன்னாமஸ்ஸ தே³மா’’தி பரஹத்தே² தி³ன்னம்பி ‘‘ந தாவ தம் க³ணனுபக³ம், யாவ ந ஹத்த²ம் க³ச்ச²தீ’’தி (மஹாவ. 259) சம்மக்க²ந்த⁴கே வுத்தத்தா யாவ ஆஹரித்வா வா ந தி³ன்னம், ‘‘தும்ஹாகம், ப⁴ந்தே, சீவரம் உப்பன்ன’’ந்தி பஹிணித்வா வா அனாரோசிதம், தாவ தி³வஸக³ணனம் ந உபேதி, அனதி⁴ட்டி²தம் வட்டதி. யதா³ பன ஆனேத்வா தி³ன்னம் ஹோதி, ‘‘உப்பன்ன’’ந்தி வா ஸுதம், ததோ பட்டா²ய க³ணனுபக³ம் ஹோதி, அந்தோத³ஸாஹே அதி⁴ட்டா²தப்³ப³ம். கதி²னஸஞ்ஞிதம் ஸமுட்டா²னமஸ்ஸாதி கதி²னஸமுட்டா²னம், ததியச²ட்ட²ஸமுட்டா²னவஸேன த்³விஸமுட்டா²னந்தி அத்தோ². காயவாசாஹி கத்தப்³ப³அதி⁴ட்டா²னவிகப்பனானம் அகரணேன காயவாசதோ, சித்தே பன ஸதி காயவாசாசித்ததோ ச ஸமுட்டா²தீதி வுத்தம் ஹோதி. அனதி⁴ட்டா²னாவிகப்பனவஸேன ஆபஜ்ஜனதோ அகிரியம். அஜானந்தோபி ஆபஜ்ஜதீதி நோஸஞ்ஞாவிமோக்க²ம். காயத்³வாரே ச வசீத்³வாரே ச கத்தப்³பா³கரணதோ காயகம்மம் வசீகம்மம்.

கதி²னஸிக்கா²பத³வண்ணனா நிட்டி²தா.