4. சதுத்த²பாராஜிகவண்ணனா

அனபி⁴ஜானந்தி ந அபி⁴ஜானம். யேன ஹி யோ த⁴ம்மோ அதி⁴க³தோ, ஸோ தஸ்ஸ பாகடோ ஹோதீதி ஆஹ ‘‘ஸகஸந்தானே’’திஆதி³. உத்தரிமனுஸ்ஸானந்தி பகதிமனுஸ்ஸேஹி உத்தரிதரானம் மனுஸ்ஸானம், உக்கட்ட²மனுஸ்ஸானந்தி அத்தோ². த⁴ம்மந்தி மஹக்³க³தலோகுத்தரபூ⁴தம் அதி⁴க³தத⁴ம்மம். அத² வா உத்தரிமனுஸ்ஸத⁴ம்மாதி உத்தரிமனுஸ்ஸத⁴ம்மோ. மனுஸ்ஸத⁴ம்மோ நாம வினா பா⁴வனாமனஸிகாரேன பகதியா மனுஸ்ஸேஹி நிப்³ப³த்தேதப்³போ³ த³ஸகுஸலகம்மபத²த⁴ம்மோ. ஸோ ஹி மனுஸ்ஸானம் சித்தாதி⁴ட்டா²னமத்தேன இஜ்ஜ²னதோ தேஸம் ஸோ பா⁴விதத⁴ம்மோ விய டி²தோதி ததா² வுத்தோ, மனுஸ்ஸக்³க³ஹணஞ்சேத்த² தேஸு ப³ஹுலம் பவத்தனதோ. ஜா²னாதி³கம் பன தப்³பி³து⁴ரந்தி ததுத்தரி, இதி உத்தரி மனுஸ்ஸத⁴ம்மாதி உத்தரிமனுஸ்ஸத⁴ம்மோ, தம் உத்தரிமனுஸ்ஸத⁴ம்மந்தி ஏவம்பேத்த² அத்தோ² த³ட்ட²ப்³போ³. ஸமுதா³சரந்தோதி ஆரோசேந்தோ.

கிஞ்சாபி லோகியலோகுத்தரா ஸப்³பா³வ பஞ்ஞா ‘‘ஞாண’’ந்தி வுச்சதி, இத⁴ பன மஹக்³க³தலோகுத்தராவ வேதி³தப்³பா³தி ஆஹ ‘‘மஹக்³க³தலோகுத்தரபஞ்ஞா ஜானனட்டே²ன ஞாண’’ந்தி. கிலேஸேஹி ஆரகத்தா பரிஸுத்³த⁴ட்டே²ன அரியந்தி ஆஹ ‘‘அரியம் விஸுத்³த⁴ம் உத்தம’’ந்தி. அரியஸத்³தோ³ சேத்த² விஸுத்³த⁴பரியாயோ, ந லோகுத்தரபரியாயோ. ஜா²னாதி³பே⁴தே³தி ஆதி³ஸத்³தே³ன ‘‘விமோக்கோ², ஸமாதி⁴, ஸமாபத்தி, ஞாணத³ஸ்ஸனம், மக்³க³பா⁴வனா, ப²லஸச்சி²கிரியா, கிலேஸப்பஹானம், வினீவரணதா சித்தஸ்ஸ, ஸுஞ்ஞாகா³ரே அபி⁴ரதீ’’தி (பாரா. 198) இமே ஸங்க³ண்ஹாதி. விஞ்ஞுஸ்ஸ மனுஸ்ஸஜாதிகஸ்ஸாதி ஆரோசேதப்³ப³புக்³க³லனித³ஸ்ஸனம். ஏதஸ்ஸ ஹி ஆரோசிதே ஆரோசிதம் ஹோதி, ந தே³வப்³ரஹ்மானம், நாபி பேதயக்க²திரச்சா²னக³தானந்தி. ஆரோசேய்யாதி வதே³ய்ய, விஞ்ஞாபேய்யாதி வுத்தம் ஹோதி. வினா அஞ்ஞாபதே³ஸேனாதி ‘‘யோ தே விஹாரே வஸதி, ஸோ பி⁴க்கு² பட²மஸ்ஸ ஜா²னஸ்ஸ லாபீ⁴’’திஆதி³னா (பாரா. 220) நயேன அஞ்ஞாபதே³ஸம் வினாதி அத்தோ². இதே⁴வாதி ‘‘இதி ஜானாமி, இதி பஸ்ஸாமீ’’தி இமஸ்மிம்யேவ பதே³. ‘‘தேன வுத்த’’ந்திஆதி³ நிக³மனம்.

ஸமனுக்³கா³ஹீயமானோதி சோதி³யமானோ, யம் வத்து² ஆரோசிதம் ஹோதி, தஸ்மிம் வத்து²ஸ்மிம் ‘‘கிம் தே அதி⁴க³தம், கிந்தி தே அதி⁴க³தம், கதா³ தே அதி⁴க³தம், கத்த² தே அதி⁴க³தம், கதமே தே கிலேஸா பஹீனா, கதமேஸம் த்வம் த⁴ம்மானம் லாபீ⁴’தி கேனசி வுச்சமானோ’’தி வுத்தம் ஹோதி. அஸமனுக்³கா³ஹீயமானோதி ந கேனசி வுச்சமானோ.

‘‘பி⁴க்கு²பா⁴வே ட²த்வா அப⁴ப்³போ³ ஜா²னாதீ³னி அதி⁴க³ந்து’’ந்தி ஸிக்கா²பதா³திக்கமஸ்ஸ அந்தராயகரத்தா வுத்தம். பி⁴க்கு²பா⁴வோ ஹிஸ்ஸ ஸக்³க³ந்தராயோ சேவ ஹோதி மக்³க³ந்தராயோ ச (பாரா. அட்ட². 2.198). வுத்தஞ்ஹேதம் ‘‘ஸாமஞ்ஞம் து³ப்பராமட்ட²ம், நிரயாயுபகட்³ட⁴தீ’’தி (ஸம். நி. 1.89; த⁴. ப. 311). அபரம்பி வுத்தம் ‘‘ஸிதி²லோ ஹி பரிப்³பா³ஜோ, பி⁴ய்யோ ஆகிரதே ரஜ’’ந்தி (ஸம். நி. 1.89; த⁴. ப. 313). பி⁴க்கு²பா⁴வோதி பாராஜிகம் ஆபஜ்ஜித்வா ‘‘ஸமணோ அஹ’’ந்தி படிஜானனதோ வோஹாரமத்தஸித்³தோ⁴ பி⁴க்கு²பா⁴வோ. தா³னாதீ³ஹீதி தா³னஸரணஸீலஸம்வராதீ³ஹி.

அஜானமேவாதி ஏத்த² ஏவாதி அவதா⁴ரணத்தே² நிபாதோ. ‘‘அஜானமேவ’’ந்திபி பட²ந்தி. தத்த² பன ‘‘ஏவம் ஜானாமி, ஏவம் பஸ்ஸாமீ’’தி அவசந்தி யோஜேதப்³ப³ம். வசனத்த²விரஹதோதி ‘‘பட²மம் ஜா²னம் ஸமாபஜ்ஜி’’ந்தி ஆதி³வசனஸ்ஸ (பாரா. 209) அத்த²பூ⁴தேன ஜா²னாதி³னா வஜ்ஜிதத்தா துச்ச²ம் உத³காதி³ஸுஞ்ஞம் பா⁴ஜனம் விய. முஸாதி விஸம்வாத³னபுரேக்கா²ரஸ்ஸ பரவிஸம்வாத³கோ வசீபயோகோ³, காயபயோகோ³ வா. தேனாஹ ‘‘வஞ்சனாதி⁴ப்பாயதோ முஸா’’தி. முஸா ச வஞ்சனாதி⁴ப்பாயோ ச புப்³ப³பா⁴க³க்க²ணே, தங்க²ணே ச. வுத்தஞ்ஹி ‘‘புப்³பே³ வாஸ்ஸ ஹோதி ‘முஸா ப⁴ணிஸ்ஸ’ந்தி, ப⁴ணந்தஸ்ஸ ஹோதி ‘முஸா ப⁴ணாமீ’’’தி (பாரா. 200). ஏதஞ்ஹி த்³வயம் அங்க³பூ⁴தம், இதரம் பன ஹோது வா, மா வா, அகாரணமேதம். அப⁴ணிந்தி விஞ்ஞாபனம் அகாஸிம்.

அஞ்ஞத்ர அதி⁴மானாதி அதி⁴க³தோ மானோ, அதி⁴கோ வா மானோ அதி⁴மானோ, த²த்³த⁴மானோதி அத்தோ², தம் வினாதி அத்தோ². கஸ்ஸ பனாயம் அதி⁴மானோ உப்பஜ்ஜதி, கஸ்ஸ நுப்பஜ்ஜதி? அரியஸாவகஸ்ஸ தாவ நுப்பஜ்ஜதி (பாரா. அட்ட². 2.196). ஸோ ஹி மக்³க³ப²லனிப்³பா³னபஹீனகிலேஸாவஸிட்ட²கிலேஸபச்சவேக்க²ணேன ஸஞ்ஜாதஸோமனஸ்ஸோ அரியகு³ணப்படிவேதே⁴ நிக்கங்கோ², தஸ்மா ஸோதாபன்னாதீ³னம் ‘‘அஹம் ஸகதா³கா³மீ’’திஆதி³வஸேன மானோ நுப்பஜ்ஜதி. து³ஸ்ஸீலஸ்ஸ நுப்பஜ்ஜதி. ஸோ ஹி அரியகு³ணாதி⁴க³மே நிராஸோவ. ஸீலவதோபி பரிச்சத்தகம்மட்டா²னஸ்ஸ நித்³தா³ராமதாதி³மனுயுத்தஸ்ஸ நுப்பஜ்ஜதி, ஸுபரிஸுத்³த⁴ஸீலஸ்ஸ பன கம்மட்டா²னே அப்பமத்தஸ்ஸ நாமரூபம் வவத்த²பேத்வா பச்சயபரிக்³க³ஹேன விதிண்ணகங்க²ஸ்ஸ திலக்க²ணம் ஆரோபேத்வா ஸங்கா²ரே ஸம்மஸந்தஸ்ஸ ஆரத்³த⁴விபஸ்ஸகஸ்ஸ உப்பஜ்ஜதி. தேனாஹ ‘‘ய்வாய’’ந்திஆதி³. தத்த² திலக்க²ணம் ஆரோபேத்வாதி (ஸாரத்த². டீ. 2.196) கலாபஸம்மஸனவஸேன அனிச்சாதி³லக்க²ணத்தயம் ஆரோபேத்வா. ஸம்மஸந்தஸ்ஸாதி விபஸ்ஸந்தஸ்ஸ. ஆரத்³த⁴விபஸ்ஸகஸ்ஸாதி உத³யப்³ப³யானுபஸ்ஸனாய ஆரத்³த⁴விபஸ்ஸகஸ்ஸ. அபத்தேதி அத்தனோ ஸந்தானே உப்பத்திவஸேன அபத்தே, அனதி⁴க³தேதி வுத்தம் ஹோதி. பத்தஸஞ்ஞிதாஸங்கா²தோதி ‘‘பத்தோ மயா உத்தரிமனுஸ்ஸத⁴ம்மோ’’தி ஏவம்ஸஞ்ஞிதாஸங்கா²தோ அதி⁴மானோ உப்பஜ்ஜதி. உப்பன்னோ ச ஸுத்³த⁴ஸமத²லாபி⁴ம் வா ஸுத்³த⁴விபஸ்ஸனாலாபி⁴ம் வா அந்தரா ட²பேதி. ஸோ ஹி த³ஸபி வீஸம்பி திம்ஸம்பி வஸ்ஸானி கிலேஸஸமுதா³சாரம் அபஸ்ஸந்தோ ‘‘அஹம் ஸோதாபன்னோ’’தி வா ‘‘ஸகதா³கா³மீ’’தி வா ‘‘அனாகா³மீ’’தி வா மஞ்ஞதி. ஸமத²விபஸ்ஸனாலாபி⁴ம் பன அரஹத்தேயேவ ட²பேதி. தஸ்ஸ ஹி ஸமாதி⁴ப³லேன கிலேஸா விக்க²ம்பி⁴தா, விபஸ்ஸனாப³லேன ஸங்கா²ரா ஸுபரிக்³க³ஹிதா, தஸ்மா ஸட்டி²ம்பி வஸ்ஸானி, அஸீதிம்பி வஸ்ஸானி, வஸ்ஸஸதம்பி கிலேஸா ந ஸமுதா³சரந்தி, கீ²ணாஸவஸ்ஸேவ சித்தாசாரோ ஹோதி. ஸோ ஏவம் தீ³க⁴ரத்தம் கிலேஸஸமுதா³சாரம் அபஸ்ஸந்தோ அந்தரா அட்ட²த்வாவ ‘‘அரஹா அஹ’’ந்தி மஞ்ஞதீதி. ‘‘தம் அதி⁴மானம் ட²பேத்வா’’தி இமினா ‘‘அஞ்ஞத்ரா’’தி பத³ம் அபேக்கி²த்வா ‘‘அதி⁴மானா’’தி உபயோக³த்தே² நிஸ்ஸக்கவசனந்தி த³ஸ்ஸேதி.

பாபிச்ச²தாயாதி பாபா இச்சா² ஏதஸ்ஸாதி பாபிச்சோ², தஸ்ஸ பா⁴வோ பாபிச்ச²தா, தாய, பாபிகாய இச்சா²யாதி அத்தோ². யா ஸா ‘‘இதே⁴கச்சோ து³ஸ்ஸீலோவ ஸமானோ ‘ஸீலவா’தி மம் ஜனோ ஜானாதூ’’திஆதி³னா (விப⁴. 851) நயேன வுத்தா, தாய அஸந்தகு³ணஸம்பா⁴வனிச்சா²யாதி வுத்தம் ஹோதி. இமினா பன மந்த³த்தா மோமூஹத்தா ஸமுதா³சரந்தஸ்ஸ அனாபத்தீதி த³ஸ்ஸேதி. அயம்பீதி பி-ஸத்³தே³ன ந கேவலம் புரிமா தயோவாதி த³ஸ்ஸேதி.

அஸந்தந்தி அபூ⁴தம். ஜா²னாதி³த⁴ம்மந்தி ஜா²னம், விமோக்கோ², ஸமாதி⁴, ஸமாபத்தி, ஞாணத³ஸ்ஸனம், மக்³க³பா⁴வனா, ப²லஸச்சி²கிரியா, கிலேஸப்பஹானம், வினீவரணதா சித்தஸ்ஸ, ஸுஞ்ஞாகா³ரே அபி⁴ரதீ’’தி (பாரா. 198) ஏவம் வுத்தம் உத்தரிமனுஸ்ஸத⁴ம்மம். யஸ்ஸ ஆரோசேதீதி (பாரா. அட்ட². 2.215) வாசாய வா ஹத்த²விகாராதீ³ஹி வா அங்க³பச்சங்க³சோபனேஹி விஞ்ஞத்திபதே² டி²தஸ்ஸ யஸ்ஸ புக்³க³லஸ்ஸ ஆரோசேதி. விஞ்ஞத்திபத²ம் பன அதிக்கமித்வா டி²தோ கோசி சே தி³ப்³பே³ன சக்கு²னா (ஸாரத்த². டீ. 2.215), தி³ப்³பா³ய ச ஸோததா⁴துயா தி³ஸ்வா ச ஸுத்வா ச ஜானாதி, ந பாராஜிகம். யோபி ‘‘கிம் அயம் ப⁴ணதீ’’தி ஸம்ஸயம் வா ஆபஜ்ஜதி, சிரம் வீமம்ஸித்வா வா பச்சா² ஜானாதி, ‘‘அவிஜானந்தோ’’இச்சேவ ஸங்க்²யம் க³ச்ச²தி. யோ பன ஜா²னாதீ³னி அத்தனோ அதி⁴க³மவஸேன வா உக்³க³ஹபரிபுச்சா²தி³வஸேன வா ந ஜானாதி, கேவலம் ‘‘ஜா²ன’’ந்தி வா ‘‘விமோக்கோ²’’தி வா வசனமத்தமேவ ஸுதம் ஹோதி, ஸோபி தேன வுத்தே ‘‘ஜா²னம் கிர ஸமாபஜ்ஜீ’’தி ஏஸ வத³தீதி யதி³ ஏத்தகமத்தம்பி ஜானாதி, ‘‘ஜானாதி’’ச்சேவ ஸங்க்²யம் க³ச்ச²தி, தஸ்ஸ வுத்தே பாராஜிகமேவ. ஸேஸோ பன ஏகஸ்ஸ வா த்³வின்னம் வா ப³ஹூனம் வா நியமிதானியமிதவஸேன விஸேஸோ ஸப்³போ³ ஸிக்கா²பச்சக்கா²னகதா²யம் வுத்தனயேனேவ வேதி³தப்³போ³. பரியாயபா⁴ஸனே பன ‘‘அஹ’’ந்தி அவுத்தத்தா படிவிஜானந்தஸ்ஸ வுத்தேபி து²ல்லச்சயம். விஸம்வாத³னாதி⁴ப்பாயேன முஸாவாத³பயோக³ஸ்ஸ கதத்தா அப்படிவிஜானந்தஸ்ஸாபி து³க்கடந்தி ஆஹ ‘‘யோ தே விஹாரே வஸதி…பே… து³க்கட’’ந்தி. அனுல்லபனாதி⁴ப்பாயஸ்ஸாதி உல்லபனாதி⁴ப்பாயவிரஹிதஸ்ஸ, அபூ⁴தாரோசனாதி⁴ப்பாயவிரஹிதஸ்ஸாதி அத்தோ². உம்மத்தகாத³யோ புப்³பே³ வுத்தனயா ஏவ. இத⁴ பன ஆதி³கம்மிகா வக்³கு³முதா³தீரியபி⁴க்கூ², தேஸம் அனாபத்தி.

சதுத்த²பாராஜிகவண்ணனா நிட்டி²தா.

பாராஜிகனிக³மனவண்ணனா

இதா⁴தி இமஸ்மிம் பி⁴க்கு²பாதிமோக்கே². உத்³தி³ட்ட²பாராஜிகபரிதீ³பனமேவாதி உத்³தி³ட்டா²னம் சதுன்னம் பாராஜிகானம் பரிதீ³பனவசனமேவ. அவதா⁴ரணம் பன ந அஞ்ஞேஸம்பீதி த³ஸ்ஸனத்த²ம். தேனாஹ ‘‘ஸமோதா⁴னேத்வா பனா’’திஆதி³. தத்த² ஸமோதா⁴னேத்வாதி தத்த² தத்த² ஆக³தானி ஏத்தே²வ ஸமோத³ஹித்வா, பக்கி²பித்வா ராஸிம் கத்வாதி அத்தோ². பாளியம் ஆக³தானீதி உத்³தே³ஸபாளியம் ஆக³தானி. பி⁴க்கு²னீனம் அஸாதா⁴ரணானி சத்தாரீதி உப்³ப⁴ஜாணுமண்ட³லிகா, வஜ்ஜப்படிச்சா²தி³கா, உக்கி²த்தானுவத்திகா, அட்ட²வத்து²காதி இமானி பி⁴க்கு²னீனம் பி⁴க்கூ²ஹி அஸாதா⁴ரணானி சத்தாரி. பண்ட³காதீ³னஞ்ஹி ஏகாத³ஸன்னம் அப⁴ப்³ப³பா⁴வோ பாராஜிகாபத்திஸதி³ஸத்தா பாராஜிகோதி ஆஹ ‘‘ஏகாத³ஸன்ன’’ந்திஆதி³. அப⁴ப்³ப³பா⁴வஸங்கா²தேஹீதி வத்து²விபன்னதாதி³னா பப்³ப³ஜ்ஜூபஸம்பதா³ய நஅரஹபா⁴வஸங்கா²தேஹி. பண்ட³கதிரச்சா²னக³தஉப⁴தோப்³யஞ்ஜனகா (பாரா. அட்ட². 2.233) ஹி தயோ வத்து²விபன்னா அஹேதுகப்படிஸந்தி⁴கா, தேஸம் ஸக்³கோ³ அவாரிதோ, மக்³கோ³ பன வாரிதோ. அப⁴ப்³பா³ ஹி தே மக்³க³ப்படிலாபா⁴ய வத்து²விபன்னத்தா. பப்³ப³ஜ்ஜாபி நேஸம் படிக்கி²த்தா, தஸ்மா தேபி பாராஜிகாவ. தே²ய்யஸம்வாஸகோ, தித்தி²யபக்கந்தகோ, மாதுகா⁴தகோ, பிதுகா⁴தகோ, அரஹந்தகா⁴தகோ, பி⁴க்கு²னிதூ³ஸகோ, லோஹிதுப்பாத³கோ, ஸங்க⁴பே⁴த³கோதி இமே அட்ட² அத்தனோ கிரியாய விபன்னத்தா அப⁴ப்³ப³ட்டா²னம் பத்தாதி பாராஜிகாவ. தேஸு தே²ய்யஸம்வாஸகோ, தித்தி²யபக்கந்தகோ, பி⁴க்கு²னிதூ³ஸகோதி இமேஸம் திண்ணம் ஸக்³கோ³ அவாரிதோ, மக்³கோ³ பன வாரிதோவ. இதரேஸம் பஞ்சன்னம் உப⁴யம்பி வாரிதம். தே ஹி அனந்தராவ நரகே நிப்³ப³த்தனகஸத்தா. யதா³ பி⁴க்கு²னீ விப்³ப⁴மிதுகாமா ஹுத்வா காஸாவமேவ வா கி³ஹிவத்த²ம் வா கி³ஹினிவாஸனாகாரேன நிவாஸேதி, ததா³ பாராஜிகமாபன்னா நாம ஹோதீதி ஆஹ ‘‘கி³ஹிபா⁴வம் பத்த²யமானாயா’’திஆதி³. ஸா ஹி அஜ்ஜா²சாரவீதிக்கமம் அகத்வாபி ஏத்தாவதா அஸ்ஸமணீ நாம ஹோதி.

தீ³க⁴தாய லம்ப³மானம் அங்க³ஜாதமேதஸ்ஸாதி லம்பீ³ (ஸாரத்த². டீ. 2.233). ந ஸோ ஏத்தாவதா பாராஜிகோ, அத² கோ² யதா³ அனபி⁴ரதியா பீளிதோ அத்தனோ அங்க³ஜாதம் முகே² வா வச்சமக்³கே³ வா பவேஸேதி, ததா³ பாராஜிகோ ஹோதி. முது³கதா பிட்டி² ஏதஸ்ஸாதி முது³பிட்டி²கோ, கதபரிகம்மாய முது³காய பிட்டி²யா ஸமன்னாக³தோ. ஸோபி யதா³ அனபி⁴ரதியா பீளிதோ அத்தனோ அங்க³ஜாதம் அத்தனோ முக²மக்³க³வச்சமக்³கே³ஸு அஞ்ஞதரம் பவேஸேதி, ததா³ பாராஜிகோ ஹோதி. பரஸ்ஸ அங்க³ஜாதம் முகே²ன க³ண்ஹாதீதி யோ அனபி⁴ரதியா பீளிதோ பரஸ்ஸ ஸுத்தஸ்ஸ வா பமத்தஸ்ஸ வா அங்க³ஜாதம் முகே²ன க³ண்ஹாதி. பரஸ்ஸ அங்க³ஜாதே அபி⁴னிஸீத³தீதி யோ அனபி⁴ரதியா பீளிதோ பரஸ்ஸ அங்க³ஜாதம் கம்மனியம் தி³ஸ்வா அத்தனோ வச்சமக்³கே³ன தஸ்ஸூபரி நிஸீத³தி, தம் அத்தனோ வச்சமக்³க³ம் பவேஸேதீதி அத்தோ². ஏதானி ஹி சத்தாரி யஸ்மா உபி⁴ன்னம் ராக³வஸேன ஸதி³ஸபா⁴வூபக³தானம் த⁴ம்மோ ‘‘மேது²னத⁴ம்மோ’’தி வுச்சதி, தஸ்மா ஏகேன பரியாயேன மேது²னத⁴ம்மம் அப்படிஸேவித்வாயேவ கேவலம் மக்³கே³ன மக்³க³ப்பவேஸனவஸேன ஆபஜ்ஜிதப்³ப³த்தா மேது²னத⁴ம்மபாராஜிகஸ்ஸ அனுலோமேந்தீதி ‘‘அனுலோமபாராஜிகானீ’’தி வுச்சந்தி.

ஏத்தா²ஹ – மாதுகா⁴தகபிதுகா⁴தகஅரஹந்தகா⁴தகா ததியபாராஜிகம் ஆபன்னா, பி⁴க்கு²னிதூ³ஸகோ, லம்பி³ஆத³யோ சத்தாரோ ச பட²மபாராஜிகம் ஆபன்னா ஏவாதி கத்வா குதோ சதுவீஸதீதி (ஸாரத்த². டீ. 2.233)? வுச்சதே – மாதுகா⁴தகாத³யோ ஹி சத்தாரோ இத⁴ அனுபஸம்பன்னா ஏவ அதி⁴ப்பேதா, லம்பி³ஆத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா பன ஏகேன பரியாயேன மேது²னத⁴ம்மம் அப்படிஸேவினோ ஹோந்தி, தஸ்மா விஸும் வுத்தாதி. து³தியவிகப்பே கச்சித்தா²தி ஏத்த² கச்சி அத்தா²தி பத³ச்சே²தோ³ காதப்³போ³.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

பாராஜிகவண்ணனா நிட்டி²தா.