3. ததியபாராஜிகவண்ணனா

ஸந்தி ஸஹத்தே² உபஸக்³கோ³. தேன ஸத்³தி⁴ம் உஸ்ஸுக்கவசனமேதம் ‘‘ஸஞ்சிச்சா’’தி ஆஹ ‘‘ஸஞ்சேதேத்வா’’திஆதி³. உஸ்ஸுக்கவசனந்தி ஏத்த² உஸ்ஸுக்கவசனம் (ஸாரத்த². டீ. 2.172) நாம புப்³ப³காலகிரியாவசனம். அயஞ்ஹி ஸமானகத்துகேஸு புப்³பா³பரகாலகிரியாவசனேஸு புப்³ப³காலகிரியாவசனஸ்ஸ நிருத்திவோஹாரோ. இதா³னி ‘‘ஸத்³தி⁴ம் சேதேத்வா’’தி இமினா ஸங்கே²பேன வுத்தமேவத்த²ம் பாகடம் கத்வா த³ஸ்ஸேதும் ‘‘பாணோ’’திஆதி³மாஹ. தத்த² ‘‘பாணோ’’தி ஸஞ்ஞாய ஸத்³தி⁴ம்யேவாதி ‘‘பாணோ’’தி ஸஞ்ஞம் அவிஜஹித்வா ஏவ, ‘‘பாணோ’’தி ஸஞ்ஞுப்பத்தியா அனந்தரந்தி வுத்தம் ஹோதி. ஏவஞ்ச கத்வா கத²ம் ஏகக்க²ணே ஏகஸ்ஸ சித்தஸ்ஸ உப⁴யாரம்மணபா⁴வோதி ஏதி³ஸீ சோத³னா அனவகாஸாதி த³ட்ட²ப்³ப³ம். கேசி பன ‘‘ஞாதபரிஞ்ஞாய தி³ட்ட²ஸபா⁴வேஸு த⁴ம்மேஸு தீரணபரிஞ்ஞாய திலக்க²ணம் ஆரோபேத்வா (ஸாரத்த². டீ. 2.172) ‘ரூபம் அனிச்ச’ந்திஆதி³னா ஸபா⁴வேன ஸத்³தி⁴ம் ஏகக்க²ணே அனிச்சாதி³லக்க²ணஜானனம் விய ‘பாணோ’தி ஸஞ்ஞாய ஸத்³தி⁴ம்யேவ ‘வதா⁴மி ந’ந்தி ஜானாதீ’’தி வத³ந்தி. அபரே பன ஆசரியா தத்தா²பி ஏவம் ந கதே²ந்தி. ஏத்த² ச மனுஸ்ஸவிக்³க³ஹோ’’தி அவத்வா ‘‘பாணோ’’தி வசனம் ‘‘மனுஸ்ஸோ அய’’ந்தி அஜானித்வா கேவலம் ஸத்தஸஞ்ஞாய கா⁴தேந்தஸ்ஸாபி பாராஜிகபா⁴வத³ஸ்ஸனத்த²ம் வுத்தம். சேதேத்வாதி சிந்தேத்வா. பகப்பேத்வாதி அபி⁴விசாரேத்வா, ஸன்னிட்டா²னம் கரித்வாதி அத்தோ².

இதா³னி மனுஸ்ஸஅத்தபா⁴வம் ஆதி³தோ பட்டா²ய த³ஸ்ஸேதும் ‘‘மனுஸ்ஸவிக்³க³ஹ’’ந்திஆதி³மாஹ. தத்த² கலலதோ பட்டா²யாதி படிஸந்தி⁴விஞ்ஞாணேன ஸத்³தி⁴ம் உப்பன்னகலலரூபதோ பட்டா²ய. கலலரூபம் நாம இத்தி²புரிஸானம் காயவத்து²பா⁴வத³ஸகவஸேன ஸமதிம்ஸ ரூபானி, நபும்ஸகானம் காயவத்து²த³ஸகவஸேன வீஸதி. தத்த² இத்தி²புரிஸானம் கலலரூபம் ஜாதிஉண்ணாய ஏகேன அம்ஸுனா உத்³த⁴டதேலபி³ந்து³மத்தம் ஹோதி அச்ச²ம் விப்பஸன்னம். வுத்தஞ்ஹேதம் அட்ட²கதா²யம் –

‘‘திலதேலஸ்ஸ யதா² பி³ந்து³, ஸப்பிமண்டோ³ அனாவிலோ;

ஏவம்வண்ணப்படிபா⁴க³ம், ‘கலல’ந்தி பவுச்சதீ’’தி. (ஸம். நி. அட்ட². 1.1.235; விப⁴. அட்ட². 26; பாரா. அட்ட². 2.172);

ஏவம் பரித்தகம் வத்து²ம் ஆதி³ம் கத்வா யாவ மரணகாலா ஏத்த²ந்தரே அனுபுப்³பே³ன வுட்³டி⁴ப்பத்தோ அத்தபா⁴வோ மனுஸ்ஸவிக்³க³ஹோ நாமாதி வுத்தம் ஹோதி. இத³ஞ்ச யேபு⁴ய்யவஸேனேவ வுத்தம். ஓபபாதிகஸம்ஸேத³ஜாபி ஹி மனுஸ்ஸா பாராஜிகவத்து²யேவ. கலலகாலேபீதி பட²மஸத்தாஹேபி. தத்த² ஹி ஸந்ததிவஸேன பவத்தமானம் கலலஸங்கா²தம் அத்தபா⁴வம் ஜீவிதா வோரோபேதும் ஸக்கா, ந பன ஸப்³ப³பட²மம் கலலரூபம். படிஸந்தி⁴சித்தேன ஹி ஸத்³தி⁴ம் திம்ஸ கம்மஜரூபானி நிப்³ப³த்தந்தி. தேஸு பன டி²தேஸுயேவ ஸோளஸ ப⁴வங்க³சித்தானி உப்பஜ்ஜித்வா நிருஜ்ஜ²ந்தி. ஏதஸ்மிம் அந்தரே க³ஹிதபடிஸந்தி⁴கஸ்ஸ தா³ரகஸ்ஸ வா மாதுயா வா பனஸ்ஸ அந்தராயோ நத்தி². அயஞ்ஹி மரணஸ்ஸ அனோகாஸோ நாம. பே⁴ஸஜ்ஜஸம்பதா³னேனாதி க³ப்³ப⁴பாதனபே⁴ஸஜ்ஜதா³னேன. ததோ வா உத்³த⁴ம்பீதி அப்³பு³த³பேஸிகாலாதீ³ஸுபி. ஜீவிதா வியோஜேய்யாதி ஸந்ததிவிகோபனவஸேன ஜீவிதிந்த்³ரியதோ அபனேய்ய.

இமஸ்ஸ பனத்த²ஸ்ஸாதி ‘‘ஸஞ்சிச்ச மனுஸ்ஸவிக்³க³ஹம் ஜீவிதா வோரோபேய்யா’’தி (பாரா. 171) இமஸ்ஸ அத்த²ஸ்ஸ. ஆவிபா⁴வத்த²ந்தி பகாஸனத்த²ம். பாணஸ்ஸ அதிபாதோ பாணாதிபாதோ, பாணவதோ⁴ பாணகா⁴தோதி வுத்தம் ஹோதி. ஸத்தோதி க²ந்த⁴ஸந்தானோ. தத்த² ஹி ஸத்தபஞ்ஞத்தி. ஜீவிதிந்த்³ரியந்தி ரூபாரூபஜீவிதிந்த்³ரியம். ரூபஜீவிதிந்த்³ரியே ஹி விகோபிதே இதரம்பி தம்ஸம்ப³ந்த⁴தாய வினஸ்ஸதீதி. யாய சேதனாயாதி தஸ்மிம் பாணே பாணஸஞ்ஞினோ காயவசீத்³வாரானம் அஞ்ஞதரத்³வாரப்பவத்தாய யாய சேதனாய. மனோத்³வாரே பன பவத்தாய வத⁴கசேதனாய பாணாதிபாதபா⁴வோ நத்தி². ஸா சேதனாதி ஸா ஜீவிதிந்த்³ரியுபச்சே²த³கஉபக்கமஸமுட்டா²பிகா காயவசீத்³வாரானம் அஞ்ஞதரத்³வாரப்பவத்தா வத⁴கசேதனா. இத³ம் வுத்தம் ஹோதி – யாய சேதனாய பவத்தமானஸ்ஸ ஜீவிதிந்த்³ரியஸ்ஸ நிஸ்ஸயபூ⁴தேஸு மஹாபூ⁴தேஸு உபக்கமகரணஹேது தம்மஹாபூ⁴தபச்சயா உப்பஜ்ஜனகமஹாபூ⁴தா நுப்பஜ்ஜிஸ்ஸந்தி (ஸாரத்த². டீ. 2.172), ஸா தாதி³ஸபயோக³ஸமுட்டா²பிகா சேதனா பாணாதிபாதோ. லத்³தூ⁴பக்கமானி ஹி மஹாபூ⁴தானி இதரபூ⁴தானி விய ந விஸதா³னீதி ஸமானஜாதிகானம் காரணம் ந ஹோந்தீதி.

பாணாதிபாதோ அஸ்ஸ அத்தீ²தி பாணாதிபாதீ. ஸம்ஸக்³கே³ அயமீகாரோ. தேனாஹ ‘‘வுத்தசேதனாய ஸமங்கி³புக்³க³லோ’’தி. ஸகோ ஹத்தோ² ஸஹத்தோ², தேன நிப்³ப³த்தோ பயோகோ³ ஸாஹத்தி²கோ. நிஸ்ஸஜ்ஜனம் நிஸ்ஸக்³கோ³, ஸோவ நிஸ்ஸக்³கி³யோ. ஏவம் ஆணத்திகோ. விஜ்ஜாமயோ மந்தபரிஜப்பனயோகோ³. இத்³தி⁴மயோ கம்மவிபாகஜித்³தி⁴மயோ.

இதா³னி யதா²வுத்தேயேவ ச² பயோகே³ விப⁴ஜித்வா த³ஸ்ஸேதும் ‘‘தத்தா²’’திஆதி³ வுத்தம். தத்த² தத்தா²தி தேஸு ச²ஸு பயோகே³ஸு. ஸாஹத்தி²கோதி ஏத்த² ஹத்தோ² உபலக்க²ணபா⁴வேன க³ஹிதோதி ஆஹ ‘‘காயேன வா’’திஆதி³. தத்த² காயேனாதி ஹத்தே²ன வா பாதே³ன வா முட்டி²னா வா ஜாணுனா வா யேன கேனசி அங்க³பச்சங்கே³ன. காயேகதே³ஸோ ஹேத்த² ஹத்தா²தி³காயோ அவயவே ஸமுதா³யோபசாரோ யதா² ‘‘கா³மோ த³ட்³டோ⁴’’தி. காயப்படிப³த்³தே⁴னாதி காயதோ அமோசிதேன அஸிஆதி³னா பஹரணேன. பஹரணந்தி காயவிஞ்ஞத்திஸஹிதாய வத⁴கசேதனாய அதி⁴ப்பேதத்த²ஸாத⁴னம். காயேன வா ஸத்திஆதீ³னம், காயப்படிப³த்³தே⁴ன வா உஸுயந்தபாஸாணாதீ³னம் நிஸ்ஸஜ்ஜனந்தி யதா²ஸம்ப⁴வம் யோஜேதப்³ப³ம். தத்தா²தி தேஸு ஸாஹத்தி²கனிஸ்ஸக்³கி³யேஸு. உத்³தி³ஸ்ஸானுத்³தி³ஸ்ஸபே⁴த³தோதி உத்³தி³ஸித்வா ச அனுத்³தி³ஸித்வா ச பவத்திபே⁴தே³ன. உத்³தி³ஸனம் உத்³தி³ஸோ, ஸோ ஏதஸ்ஸ அத்தீ²தி உத்³தி³ஸகோ, பயோகோ³, தஸ்மிம். ப³ஜ்ஜ²தி ஏதேனாதி ப³த்³தோ⁴, கம்மமேவ ப³த்³தோ⁴ கம்மப³த்³தோ⁴, பாணாதிபாதோதி அத்தோ². அத² வா ப³ந்த⁴னம் ப³த்³தோ⁴, கம்முனா ப³த்³தோ⁴ கம்மப³த்³தோ⁴, ஸோ அஸ்ஸ ஹோதி, பாணாதிபாதகம்மமஸ்ஸ ஸித்³த⁴ந்தி வுத்தம் ஹோதி. உப⁴யத்தா²பீதி உத்³தி³ஸகே, அனுத்³தி³ஸகே சாதி த்³வீஸுபி. பச்சா² வா தேனேவ ரோகே³ன மரதூதி யோஜனா. பஹரிதக்க²ணேயேவாதி மரணாய பஹோனகப்பஹாரஸ்ஸ லத்³த⁴க்க²ணேயேவ கம்மப³த்³தோ⁴. யதி³ அவஸ்ஸம் தேன மரதீதி அதி⁴ப்பாயோ. ஸசே பன மரணாதி⁴ப்பாயேன பஹாரம் த³த்வா தேன அமதஸ்ஸ புன அஞ்ஞேன சித்தேன பஹாரே தி³ன்னே பச்சா²பி பட²மப்பஹாரேனேவ மரதி, ததா³வ கம்மப³த்³தோ⁴. அத² து³தியபஹாரேன மரதி, நத்தி² பாணாதிபாதோ. உப⁴யேஹி மதேபி பட²மப்பஹாரேனேவ கம்மப³த்³தோ⁴, உப⁴யேஹிபி அமதே நேவத்தி பாணாதிபாதோ. ஏஸ நயோ ப³ஹூஹிபி ஏகஸ்ஸ பஹாரே தி³ன்னே. தத்ராபி ஹி யஸ்ஸ பஹாரேன மரதி, தஸ்ஸேவ கம்மப³த்³தோ⁴தி. ஆணாபனம் நாம வசீவிஞ்ஞத்திஸஹிதாய வத⁴கசேதனாய அதி⁴ப்பேதத்த²ஸாத⁴னம்.

இதா³னி இமஸ்மிம் ஆணத்திகபயோகே³ ஸங்கேதவிஸங்கேதபா⁴வஜானனத்த²ம் ச²ப்³பி³த⁴ம் நியமம் த³ஸ்ஸேந்தோ ‘‘தத்தா²’’திஆதி³மாஹ. தத்த² தத்தா²தி தஸ்மிம் ஆணத்திகபயோகே³. ஆணத்தினியாமகாதி ஆணத்திகபயோக³ஸாதி⁴கா. ஏதேஸு ஹி அவிரஜ்ஜி²தேஸுயேவ ஆணத்திகபயோகோ³ ஹோதி, ந அஞ்ஞதா²தி.

புக்³க³லோதி மாரேதப்³போ³ புக்³க³லோ. தேனாஹ ‘‘யம் ஹீ’’திஆதி³. ஆணாபகஸ்ஸ ஆபத்தீதி ஆணாபகஸ்ஸ ஆணத்திக்க²ணே ஆபத்தி, ஆணத்தஸ்ஸ மாரணக்க²ணே. ஆணாபகோ முச்சதீதி ஆணத்தஸ்ஸேவ கம்மப³த்³தோ⁴, வத்து²விஸேஸேன பனேத்த² கம்மவிஸேஸோ ச ஆபத்திவிஸேஸோ ச ஹோதீதி. ‘‘புரேப⁴த்தம் மாரேஹீ’’தி ஆணத்தோ புரேப⁴த்தமேவ மாரேதீதி ‘‘அஜ்ஜ ஸ்வே’’தி அனியமேத்வா ‘‘புரேப⁴த்தம் மாரேஹீ’’தி ஆணத்தோ யதா³ கதா³சி புரேப⁴த்தம் மாரேதி. யோ பன ‘‘அஜ்ஜ புப்³ப³ண்ஹே’’தி வுத்தோ மஜ்ஜ²ன்ஹே வா ஸாயன்ஹே வா ஸ்வே வா புப்³ப³ண்ஹே மாரேதி, விஸங்கேதோ ஹோதி, ஆணாபகஸ்ஸ நத்தி² கம்மப³த்³தோ⁴. புப்³ப³ண்ஹே மாரேதும் வாயமந்தஸ்ஸ மஜ்ஜ²ன்ஹே ஜாதேபி ஏஸேவ நயோ. ஏதேன நயேன ஸப்³ப³காலப்பபே⁴தே³ஸு ஸங்கேதவிஸங்கேததா வேதி³தப்³பா³.

ஏவம் வத்து²காலேஸு ஸங்கேதவிஸங்கேததம் த³ஸ்ஸேத்வா இதா³னி ஓகாஸாதீ³ஸு ஸங்கேதவிஸங்கேததம் அதிதி³ஸந்தோ ‘‘இமினா நயேனா’’திஆதி³மாஹ. தத்த² ஓகாஸோதி (பாரா. அட்ட². 2.174) கா³மோ வா வனம் வா கே³ஹத்³வாரம் வாதி ஏவமாதி³கோ. ஆவுத⁴ந்தி அஸி வா உஸு வா ஸத்தி வாதி ஏவமாதி³. இரியாபதோ²தி மாரேதப்³ப³ஸ்ஸ க³மனம் வா நிஸஜ்ஜா வாதி ஏவமாதி³. கிரியாவிஸேஸோதி விஜ்ஜ²னம் வா சே²த³னம் வா பே⁴த³னம் வா ஸங்க²முண்ட³கம் வாதி ஏவமாதி³. இமேஸு யதா² யதா² வத⁴கோ ஆணத்தோ, ததா² ததா² கதே ஆணாபகஸ்ஸ ஆபத்தி, அஞ்ஞதா² கதே விஸங்கேதோ ஹோதி. தேனாஹ ‘‘இமினா நயேனா’’திஆதி³. தத்த² ஸப்³ப³த்தா²தி ஓகாஸாதீ³ஸு சதூஸு. ஹோதி சேத்த² –

‘‘யதா²ணத்திவஸேனேவ, ஆணத்தேன கதே ஸதி;

ஆணாபகஸ்ஸ ஆபத்தி, விஸங்கேதோஞ்ஞதா² கதே’’தி.

ஆணத்தியம் பன அயம் விஸேஸோ – அதி⁴ட்டா²யாதி அதி⁴ட்ட²ஹித்வா ஆணாபேதி ‘‘ஏவம் விஜ்ஜ², ஏவம் பஹர, ஏவம் கா⁴தேஹீ’’தி (பாரா. 174) வுத்தாய பாளியா லப்³ப⁴தீதி ஞாதப்³போ³.

ஓபதந்தி ஏத்தா²தி ஓபாதோ, ஆவாடோ, தஸ்ஸ க²ணனம் ஓபாதக்க²ணனம். அபஸ்ஸேனஸம்விதா⁴னந்தி (பாரா. அட்ட². 2.177) அபஸ்ஸேனஸ்ஸ ஸம்விதா⁴னம். நிச்சபரிபோ⁴கோ³ மஞ்சோ வா பீட²ம் வா அபஸ்ஸேனப²லகம் வா தி³வாட்டா²னே நிஸீத³ந்தஸ்ஸ அபஸ்ஸேனகத்த²ம்போ⁴ வா தத்த²ஜாதகருக்கோ² வா சங்கமே அபஸ்ஸாய திட்ட²ந்தஸ்ஸ ஆலம்ப³னருக்கோ² வா ஆலம்ப³னப²லகம் வா, ஸப்³ப³ம்பேதம் அபஸ்ஸனீயட்டே²ன அபஸ்ஸேனம் நாம, தஸ்மிம் அபஸ்ஸேனே யதா² அபஸ்ஸயந்தம் விஜ்ஜ²தி வா சி²ந்த³தி வா, ததா² கத்வா வாஸிப²ரஸுஸத்திஆரகண்டகாதீ³ஸு அஞ்ஞதரஸ்ஸ ஸத்த²ஸ்ஸ ட²பனந்தி அத்தோ².

உபனிக்கி²பனம் நாம ஸமீபே நிக்கி²பனம். மனாபஸ்ஸ வா அமனாபஸ்ஸ வா ரூபஸ்ஸ உபஹரணம் ஸமீபே ட²பனம் ரூபூபஹாரோ, அத்தனா வா யக்க²பேதாதி³வேஸம் க³ஹேத்வா திட்ட²னம். ஆதி³ஸத்³தே³ன ஸத்³தூ³பஹாராதீ³னம் க³ஹணம். ஏத்தா²பீதி தா²வரபயோகே³பி. உத்³தி³ஸ்ஸானுத்³தி³ஸ்ஸபே⁴தோ³ வேதி³தப்³போ³, யதோ தத்த²பி புப்³பே³ வுத்தனயேனேவ கம்மப³த்³தோ⁴ ஹோதி. அயம் பன விஸேஸோ – மூலட்டே²ன ஓபாதாதீ³ஸு பரேஸம் மூலேன வா முதா⁴ வா தி³ன்னேஸுபி யதி³ தப்பச்சயா கோசி மரதி, மூலட்ட²ஸ்ஸேவ கம்மப³த்³தோ⁴. யதி³பி தேன, அஞ்ஞேன வா தத்ர ஓபாதே வினாஸேத்வா பூ⁴மிஸமே கதேபி பம்ஸுஹாரகா வா பம்ஸும் க³ண்ஹந்தா, மூலக²ணகா வா மூலானி க²ணந்தா ஆவாடம் கரோந்தி, தே³வே வா வஸ்ஸந்தே கத்³த³மோ ஜாயதி, தத்த² ச கோசி ஓதரித்வா வா லக்³கி³த்வா வா மரதி, மூலட்ட²ஸ்ஸேவ கம்மப³த்³தோ⁴. யதி³ பன யேன லத்³த⁴ம், ஸோ வா அஞ்ஞோ வா வித்த²ததரம் வா க³ம்பீ⁴ரதரம் வா கரோதி, தப்பச்சயா ச கோசி மரதி, உப⁴யேஸம்பி கம்மப³த்³தோ⁴. யதா² து மூலானி மூலேஹி ஸம்ஸந்த³ந்தி, ததா² தத்த² த²லே கதே முச்சதி. ஏவம் அபஸ்ஸேனஸம்விதா⁴னாதீ³ஸுபி யாவ தேஸம் பவத்தி, தாவ யதா²ஸம்ப⁴வம் கம்மப³த்³தோ⁴ வேதி³தப்³போ³.

விஜ்ஜாபரிஜப்பனந்தி ஆத²ப்³ப³ணிகேஹி, விஜ்ஜாத⁴ரேஹி ச மந்தபரிஜப்பனம். கம்மவிபாகஜாய இத்³தி⁴யாதி ஸாதிஸயகம்மனிப்³ப³த்தாய கம்மவிபாகேன ஸஹஜாதாய இத்³தி⁴யா, கம்மஸ்ஸ வா விபாகபா⁴வேன ஜாதாய இத்³தி⁴யா. பயோஜனந்தி பவத்தனம், கரணந்தி அத்தோ², தா³டா²வுதா⁴தீ³னம் தா³டா²கோடனாதீ³னமிவ மாரணத்த²ம் கம்மவிபாகஜித்³தி⁴விகாரகரணந்தி வுத்தம் ஹோதி.

கம்மஸாத⁴னோ வாயம் ஹாரகஸத்³தோ³ ப³ஹுலம்விதா⁴னேன தத்தா²பி ண்வுபச்சயஸ்ஸ ஸிஜ்ஜ²னதோதி ஆஹ ‘‘அத² வா’’திஆதி³. ஜீவிதஹரணகம், உபனிக்கி²பிதப்³ப³ம் வா ஸத்த²மேவ ஹாரகந்தி (ஸாரத்த². டீ. 2.172) விகப்பத்³வயேன வுத்தந்தி ஆஹ ‘‘ஸத்த²ஞ்ச தம் ஹாரகஞ்சாதி ஸத்த²ஹாரக’’ந்தி. ‘‘ஹாரகஸத்த²’’ந்தி வத்தப்³பே³ விஸேஸனஸ்ஸ பரனிபாதம் கத்வா ஏவம் வுத்தந்தி த³ட்ட²ப்³ப³ம். பரியேஸேய்யாதி க³வேஸேய்ய. ‘‘யதா² லப⁴தி, ததா² கரேய்யா’’தி இமினா பன அதி⁴ப்பாயத்த²மாஹ, ‘‘உபனிக்கி²பேய்யா’’தி இமினா ஸிகா²பத்தமத்த²ம். இதரதா² ஹி ‘‘பரியேஸேய்யா’’தி இமஸ்ஸ ‘‘உபனிக்கி²பேய்யா’’தி அயமத்தோ² அதி⁴ப்பேதோ ந ஸியா. பரியிட்ட²மத்தேயேவாதி பரியேஸிதமத்தேயேவ. யதி³ ஏவம் அத² கஸ்மா பாளியம் ‘‘ஸத்த²ஹாரகம் வாஸ்ஸ பரியேஸேய்யாதி அஸிம் வா ஸத்திம் வா பே⁴ண்டி³ம் வா லகு³ளம் வா பாஸாணம் வா ஸத்த²ம் வா விஸம் வா ரஜ்ஜும் வா’’தி (பாரா. 172) வுத்தந்தி ஆஹ ‘‘பத³பா⁴ஜனே பனா’’திஆதி³. அஸ்ஸாதி ‘‘ஸத்த²ஹாரகம் வாஸ்ஸ பரியேஸேய்யா’’தி இமஸ்ஸ பத³ஸ்ஸ. ப்³யஞ்ஜனானுரூபதோ பரிபுண்ணம் கத்வா அத்த²ஸ்ஸ அவுத்தத்தா ‘‘ப்³யஞ்ஜனம் அனாதி³யித்வா’’தி வுத்தம். ஸஸதி ஹிம்ஸதீதி ஸத்த²ம், ஸஸந்தி ஹிம்ஸந்தி ஏதேனாதி வா ஸத்த²ம். ஆதி³ஸத்³தே³ன ‘‘ஸத்திம் வா’’திஆதி³பாளிஸேஸம் ஸங்க³ண்ஹாதி. தத்த² லகு³ளந்தி முக்³க³ரோ. ஸத்த²ந்தி வுத்தாவஸேஸம் யம் கிஞ்சி ஸமுக²ம் வேதி³தப்³ப³ம்.

யோ ஏவம் மரதீதி யோ ஸத்த²ம் வா ஆஹரித்வா, விஸம் வா கா²தி³த்வா, ரஜ்ஜுயா வா உப்³ப³ந்தி⁴த்வா, ஸோப்³பா⁴தீ³ஸு வா பதித்வா, அஞ்ஞேஹி வா அக்³கி³பவேஸனஉத³கபவேஸனாதீ³ஹி உபாயேஹி மரதி. ‘‘ஸோ த⁴னம் வா லப⁴தீ’’திஆதி³னா நயேனாதி ஸோ த⁴னம் வா லப⁴தி, யஸம் வா லப⁴தி, ஸக்³க³ம் வா க³ச்ச²தி, த⁴ம்மோ வாஸ்ஸ ஹோதீதி இமினா நயேன. கிமனேன வேதி³தப்³ப³ந்தி ஆஹ ‘‘ஏதேனா’’திஆதி³. தத்த² ஏதேனாதி ‘‘மரணவண்ணம் வா ஸம்வண்ணேய்யா’’தி ஏதேன வசனேன. நயித⁴ ஏவந்தி இத⁴ மனுஸ்ஸவிக்³க³ஹபாராஜிகே ந ஏவம், ந பரியாயகதா²ய முச்சதீதி அத்தோ². தேனாஹ ‘‘ஸம்வண்ணேய்யா’’திஆதி³.

‘‘ஸத்த²ம் வா ஆஹரா’’திஆதி³னாதி ஏத்த² ஆதி³ஸத்³தே³ன ‘‘விஸம் வா கா²த³, ரஜ்ஜுயா வா உப்³ப³ந்தி⁴த்வா காலம் கரோஹி, ஸோப்³பே⁴ வா நரகே வா பபாதே வா பபதா’’திஆதி³ம் (பாரா. 172) ஸப்³ப³ம் மரணூபாயம் ஸங்க³ண்ஹாதி. ஏத்த² ச நரகோ (பாரா. அட்ட². 2.172) நாம தத்த² தத்த² ப²லந்தியா பூ⁴மியா ஸயமேவ நிப்³ப³த்தா மஹாத³ரீ, யத்த² ஹத்தீ²பி பதந்தி, சோராபி நிலீயித்வா திட்ட²ந்தி. பபாதோதி பப்³ப³தந்தரே வா த²லந்தரே வா ஏகதோ சி²ன்னோ. பாபகேனாதி லாமகேன. து³ஜ்ஜீவிதேனாதி து³க்க²ப³ஹுலத்தா து³க்கே²ன ஜீவிதேன. மதம் தே ஜீவிதா ஸேய்யாதி தவ மரணம் ஜீவிதா ஸுந்த³ரதரம். சித்தமஸ்ஸ அத்தீ²தி சித்தோ. ததா² மனோ. இதி-ஸத்³தோ³ ‘‘ஸப்³ப³மத்தீ²தி கோ², கச்சான, அயமேகோ அந்தோ, ஸப்³ப³ம் நத்தீ²தி கோ², கச்சான, அயம் து³தியோ அந்தோ’’திஆதீ³ஸு (ஸம். நி. 2.15; 3.90) விய நித³ஸ்ஸனே த³ட்ட²ப்³போ³ யதா²வுத்தஸ்ஸ பு³த்³தி⁴யம் விபரிவத்தமானஸ்ஸ மரணஸ்ஸ நித³ஸ்ஸனதோ. தேனேவாஹ ‘‘மதம் தே ஜீவிதா ஸேய்யோ’’திஆதி³.

நனு சேத்த² ‘‘மனோ’’தி இத³ம்பி அத்த²தோ சித்தமேவ, அத² கஸ்மா வுத்தந்தி ஆஹ ‘‘ஏத்த² சா’’திஆதி³. சித்தஸ்ஸ அத்த²தீ³பனத்த²ம் வுத்தந்தி நாயம் சித்தஸத்³தோ³ ‘‘சித்தஸங்கப்போ’’திஆதீ³ஸு (பாரா. 171) விய விசித்தாதி³அத்தோ², அத² கோ² விஞ்ஞாணவசனோதி தஸ்ஸ அத்த²தீ³பனத்த²ம் வுத்தம். இமினா புனருத்திதோ³ஸாபா⁴வம் த³ஸ்ஸேதி. கத²மேதம் விஞ்ஞாயதீதி ஆஹ ‘‘தேனேவஸ்ஸா’’திஆதி³. சித்தோ நானாப்பகாரகோ ஸங்கப்போ அஸ்ஸாதி சித்தஸங்கப்போ. விசித்தத்தோ² ஹேத்த² சித்தஸத்³தோ³ ‘‘நாஹம், பி⁴க்க²வே, அஞ்ஞம் ஏகனிகாயம்பி ஸமனுபஸ்ஸாமி ஏவம் சித்தம், யத²யித³ம், பி⁴க்க²வே, திரச்சா²னக³தா’’திஆதீ³ஸு (ஸம். நி. 3.100) விய. தேனாஹ ‘‘விசித்தஸங்கப்போ’’தி. ஏத்தா²பி இதிஸத்³தோ³ ஆஹரிதப்³போ³தி ‘‘சித்தஸங்கப்போ’’தி இமஸ்மிம் பதே³பி அதி⁴காரவஸேன இதிஸத்³தோ³ ஆஹரிதப்³போ³. இத³ஞ்ஹி ‘‘இதி சித்தஸங்கப்போ’’தி ஏவம் அவுத்தம்பி அதி⁴காரதோ வுத்தமேவ ஹோதீதி. ஸங்கப்போதி சேத்த² ‘‘தக்கோ விதக்கோ ஸங்கப்போ’’திஆதீ³ஸு (த⁴. ஸ. 7) விய ந விதக்கஸ்ஸேவ நாமம், அத² கோ² தஸ்ஸ ச அஞ்ஞேஸஞ்சாதி த³ஸ்ஸேதும் ‘‘ஸங்கப்போதி சா’’திஆதி³ ஆரத்³த⁴ம். ஸம்வித³ஹனமத்தஸ்ஸாதி ஸஞ்ஞாசேதனாவிதக்கஸங்கா²தஸ்ஸ ஸப்³ப³ஸ்ஸ ஸம்வித³ஹனஸ்ஸ. ஸாமஞ்ஞத்தோ² ஹேத்த² மத்தஸத்³தோ³ ‘‘ப்³ராஹ்மணமத்தம் போ⁴ஜேதீ’’திஆதீ³ஸு விய. தேனாஹ ‘‘தஞ்ச ஸம்வித³ஹன’’ந்திஆதி³. இமினா ஸம்வித³ஹனம் நாமேத்த² ந விதா⁴னந்தி த³ஸ்ஸேதி. அதி⁴ப்பாயோ நாம விதக்கோ.

உச்சாவசேன காரணேனாதி (பாரா. அட்ட². 2.172) மஹந்தாமஹந்தேன உபாயேன. தத்த² மரணவண்ணஸம்வண்ணனே தாவ ஜீவிதே ஆதீ³னவத³ஸ்ஸனவஸேன அவசாகாரதா, மரணே வண்ணப⁴ணனவஸேன உச்சாகாரதா வேதி³தப்³பா³. ஸமாத³பனே பன முட்டி²ஜாணுனிப்போத²னாதீ³ஹி மரணஸமாத³பனவஸேன உச்சாகாரதா, ஏகதோ பு⁴ஞ்ஜந்தஸ்ஸ நகே² விஸம் பக்கி²பித்வா மரணாதி³ஸமாத³பனவஸேன அவசாகாரதா வேதி³தப்³பா³.

ஏவம் அஸாதா⁴ரணவினிச்ச²யம் வத்வா இதா³னி ஸாதா⁴ரணவினிச்ச²யம் த³ஸ்ஸேதும் ‘‘வேஸாலிய’’ந்திஆதி³மாஹ. ஓபாதக்க²ணனாதீ³ஸு து³க்கடந்தி ஏத்த² ஸசேபி ஜாதபத²விம் க²ணதி, பாணாதிபாதஸ்ஸ புப்³ப³பயோக³த்தா பயோகே³ பயோகே³ து³க்கடம். மனுஸ்ஸவிக்³க³ஹோ நாக³ஸுபண்ணாதி³ஸதி³ஸோ திரச்சா²னக³தோ திரச்சா²னக³தமனுஸ்ஸவிக்³க³ஹோ, யக்கோ² ச பேதோ ச திரச்சா²னக³தமனுஸ்ஸவிக்³க³ஹோ ச யக்க²பேததிரச்சா²னக³தமனுஸ்ஸவிக்³க³ஹா, தேஸம். ‘‘ததா²’’தி இமினா து²ல்லச்சயம் அதிதி³ஸதி. இதா³னி ‘‘இமினா நயேனா’’திஆதி³னா அபஸ்ஸேனஸம்விதா⁴னாதீ³ஸுபி யதா²வுத்தஆபத்திபே⁴த³ம் அதிதி³ஸதி. ஸப்³ப³த்தா²தி அபஸ்ஸேனஸம்விதா⁴னாதீ³ஸு ஸப்³பே³ஸு பயோகே³ஸு.

இதா³னி அனாபத்திம் த³ஸ்ஸேதும் ‘‘அஸஞ்சிச்சா’’திஆதி³மாஹ. ஏத்த² ச ‘‘அஸஞ்சிச்சா’’தி (ஸாரத்த². டீ. 2.179) இத³ம் மரணஸம்வத்தனிகஉபக்கமஸ்ஸ அஸல்லக்க²ணம் ஸந்தா⁴ய வுத்தம், ‘‘அஜானந்தஸ்ஸா’’தி இத³ம் பன மரணஸம்வத்தனிகஉபகரணஸ்ஸ அஜானனம் ஸந்தா⁴ய, ‘‘நமரணாதி⁴ப்பாயஸ்ஸா’’தி இத³ம் உபக்கமம் ஜானந்தஸ்ஸாபி மரணாதி⁴ப்பாயஸ்ஸ அபா⁴வம். தேனாஹ ‘‘அஸஞ்சிச்சா’’திஆதி³. அசேதேத்வாதி அஸல்லக்கே²த்வா, விரஜ்ஜி²த்வாதி வுத்தம் ஹோதி.

முஸலுஸ்ஸாபனவத்து²ஸ்மிம் வியாதி ‘‘தேன கோ² பன ஸமயேன அஞ்ஞதரோ பி⁴க்கு² ப⁴த்தக்³கே³ அந்தரக⁴ரே ஆஸனம் பஞ்ஞபேந்தோ முஸலே உஸ்ஸிதே ஏகம் முஸலம் அக்³க³ஹேஸி. து³தியோ முஸலோ பரிபதித்வா அஞ்ஞதரஸ்ஸ தா³ரகஸ்ஸ மத்த²கே அவத்தா²ஸி. ஸோ காலமகாஸி. தஸ்ஸ குக்குச்சம் அஹோஸி…பே… கிம்சித்தோ த்வம் பி⁴க்கூ²தி. அஸஞ்சிச்ச அஹம் ப⁴க³வாதி. அனாபத்தி பி⁴க்கு² அஸஞ்சிச்சா’’தி (பாரா. 180) இமஸ்மிம் வத்து²ஸ்மிம் விய.

விஸக³தபிண்ட³பாதவத்து²ஸ்மிம் வியாதி ‘‘தேன கோ² பன ஸமயேன அஞ்ஞதரோ பிண்ட³சாரிகோ பி⁴க்கு² விஸக³தம் பிண்ட³பாதம் லபி⁴த்வா படிக்கமனம் ஹரித்வா பி⁴க்கூ²னம் அக்³க³காரிகம் அதா³ஸி. தே பி⁴க்கூ² காலமகம்ஸு. தஸ்ஸ குக்குச்சம் அஹோஸி…பே… கிம்சித்தோ த்வம் பி⁴க்கூ²தி. நாஹம் ப⁴க³வா ஜானாமீதி. அனாபத்தி பி⁴க்கு² அஜானந்தஸ்ஸா’’தி (பாரா. 181) இமஸ்மிம் வத்து²ஸ்மிம் விய.

பே⁴ஸஜ்ஜவத்து²ஸ்மிம் வியாதி ‘‘தேன கோ² பன ஸமயேன அஞ்ஞதரா வஞ்ஜா² இத்தீ² குலூபகம் பி⁴க்கு²ம் ஏதத³வோச ‘‘இங்கா⁴ய்ய பே⁴ஸஜ்ஜம் ஜானாஹி, யேனாஹம் விஜாயேய்ய’ந்தி. ‘ஸுட்டு² ப⁴கி³னீ’தி தஸ்ஸா பே⁴ஸஜ்ஜம் அதா³ஸி. ஸா காலமகாஸி. தஸ்ஸ குக்குச்சம் அஹோஸி…பே… அனாபத்தி பி⁴க்கு² பாராஜிகஸ்ஸ, ஆபத்தி து³க்கடஸ்ஸா’’தி (பாரா. 187) இமஸ்மிம் வத்து²ஸ்மிம் விய. இத⁴ ஆதி³கம்மிகா அஞ்ஞமஞ்ஞம் ஜீவிதா வோரோபிதபி⁴க்கூ², தேஸம் அனாபத்தி. அவஸேஸானம் மரணவண்ணஸம்வண்ணனகாதீ³னம் ஆபத்தியேவ.

அத² கத²ம் து³க்க²வேத³னந்தி, நனு ராஜானோ சோரம் தி³ஸ்வா ஹஸமானாபி ‘‘க³ச்ச²த², நம் கா⁴தேதா²’’தி வத³ந்தீதி? ஸச்சம் ஹஸமானா வத³ந்தி, ஸோ பன ஹாஸோ தேஸம் அஞ்ஞவிஸயோ, ஸன்னிட்டா²பகசேதனா து³க்க²ஸம்பயுத்தாவ. வுத்தஞ்ஹேதம் ஸமந்தபாஸாதி³காயம் ‘‘ஸசேபி ஹி ஸிரிஸயனம் ஆருள்ஹோ ரஜ்ஜஸம்பத்திஸுக²மனுப⁴வந்தோ ராஜா ‘சோரோ தே³வ ஆனீதோ’தி வுத்தே ‘க³ச்ச²த² நம் மாரேதா²’தி ஹஸமானோ ப⁴ணதி, தோ³மனஸ்ஸசித்தேனேவ ப⁴ணதீதி வேதி³தப்³போ³. ஸுக²வோகிண்ணத்தா, பன அனுப்பப³ந்தா⁴பா⁴வா ச து³ஜ்ஜானமேதம் புது²ஜ்ஜனேஹீ’’தி (பாரா. அட்ட². 2.179).

ததியபாராஜிகவண்ணனா நிட்டி²தா.