2. து³தியபாராஜிகவண்ணனா

ஏத்தா²தி ஏதேஸு த்³வீஸு. ஏககுடிகாதி³பே⁴தோ³ ஸப்³போ³பி கா³மோதி வேதி³தப்³போ³தி ஸம்ப³ந்தோ⁴. தத்த² ஏககுடிகாதி³பே⁴தோ³தி யஸ்மிம் கா³மே ஏகா ஏவ குடி ஏகம் கே³ஹம் ஸேய்யதா²பி மலயஜனபதே³, அயம் ஏககுடிகோ கா³மோ நாம. ஆதி³ஸத்³தே³ன ‘‘த்³விகுடிகோபி கா³மோ, திகுடிகோபி கா³மோ, சதுக்குடிகோபி கா³மோ’’தி (பாரா. 92) வுத்தப்பபே⁴த³ம் ஸங்க³ண்ஹாதி. அபி⁴னவனிவிட்டோ² ஏககுடிகாதி³கா³மோ பன யாவ மனுஸ்ஸா பவிஸித்வா வாஸம் ந கப்பேந்தி, தாவ கா³மஸங்க²ம் ந க³ச்ச²தி. கிம்பூ⁴தோதி ஆஹ ‘‘பரிக்கி²த்தோ வா’’திஆதி³. தத்த² பரிக்கி²த்தோ நாம இட்ட²கபாகாரம் ஆதி³ம் கத்வா அந்தமஸோ கண்டகஸாகா²ஹிபி பரிக்கி²த்தோ. தப்³பி³பரீதோ அபரிக்கி²த்தோ. அமனுஸ்ஸோ நாம யோ ஸப்³ப³ஸோ வா மனுஸ்ஸானம் அபா⁴வேன யக்க²பரிக்³க³ஹபூ⁴தோ, யதோ வா மனுஸ்ஸா கேனசி கரணீயேன புனபி ஆக³ந்துகாமா ஏவ அபக்கந்தா, யதோ பன நிரபேக்கா² ஹுத்வா பக்கமந்தி, ஸோ கா³மஸங்க²ம் ந க³ச்ச²தி. ந கேவலம் ஏககுடிகாதி³பே⁴தோ³வாதி ஆஹ ‘‘அந்தமஸோ’’திஆதி³. யோ கோசி ஸத்தோ²பீதி ஜங்க⁴ஸத்த²ஸகடஸத்தா²தீ³ஸு யோ கோசி ஸத்தோ²பி. இமஸ்மிம் ஸிக்கா²பதே³ நிக³மனக³ரானி விய கா³மக்³க³ஹணேனேவ கா³மூபசாரோபி ஸங்க³ஹிதோதி ஆஹ ‘‘ட²பேத்வா கா³மஞ்ச கா³மூபசாரஞ்சா’’தி. அஞ்ஞதா² பன மாதிகாய அனவஸேஸதோ அவஹாரட்டா²னபரிக்³க³ஹோ கதோ நாம ந ஹோதி, ந ச பு³த்³தா⁴ ஸாவஸேஸம் பாராஜிகம் பஞ்ஞாபேந்தி.

தத்தா²தி தேஸு கா³மகா³மூபசாரேஸு. த்³வாரேதி நிப்³ப³கோஸஸ்ஸ உத³கபதனட்டா²னதோ அப்³ப⁴ந்தரே. அந்தோகே³ஹேதி பமுக²ஸ்ஸ அப்³ப⁴ந்தரே. கதபரிக்கே²போதி பாகாரவதிஆதீ³ஹி கதபரிக்கே²போ. ஸுப்பபதனாதி³பரிச்சே²தோ³ பனேத்த² அபரிக்கி²த்தக⁴ரம் ஸந்தா⁴ய வுத்தோ. ந கேவலம் க⁴ரஸ்ஸ புரதோ, அத² கோ² ஸமந்ததோ தத்தகோவ பரிச்சே²தோ³ க⁴ரூபசாரோ நாமாதி க³ஹேதப்³ப³ம். ‘‘புரதோ’’திஆதி³கம் பன லோகியேஹி ததா²கரணதோ வுத்தம். தா²மமஜ்ஜி²மஸ்ஸாதி மஜ்ஜி²மதா²மஸ்ஸ, நேவ அப்பதா²மஸ்ஸ, ந மஹாதா²மஸ்ஸாதி வுத்தம் ஹோதி. ‘‘யதா² தருணமனுஸ்ஸா’’திஆதி³னா யதா² மாதுகா³மோ காகே உட்³டா³பேந்தோ உஜுகமேவ ஹத்த²ம் உக்கி²பித்வா லேட்³டு³ம் கி²பதி, யதா² ச உத³குக்கே²பே உத³கம் கி²பந்தி, ஏவம் கி²த்தஸ்ஸ லேட்³டு³ஸ்ஸ பதிதட்டா²னம் படிக்கி²பதி. பவத்தித்வாதி லுடி²த்வா, பரிவத்தித்வாதி வுத்தம் ஹோதி. தஸ்ஸ ஸசே த்³வே இந்த³கீ²லா ஹோந்தீதி (பாரா. அட்ட². 1.92) தஸ்ஸ பரிக்கி²த்தஸ்ஸ கா³மஸ்ஸ ஸசே அனுராத⁴புரஸ்ஸேவ த்³வே உம்மாரா ஹோந்தி. யஸ்ஸ பன ஏகோ, தஸ்ஸ கா³மத்³வாரபா³ஹானம் வேமஜ்ஜே² டி²தஸ்ஸ லேட்³டு³பாதப்³ப⁴ந்தரம் கா³மூபசாரோ நாம. யத்ர பன இந்த³கீ²லோ நத்தி², தத்ர கா³மத்³வாரபா³ஹானம் வேமஜ்ஜ²ம். யத்ர த்³வாரபா³ஹாபி நத்தி², தத்த² உபோ⁴ஸு பஸ்ஸேஸு வதியா வா பாகாரஸ்ஸ வா கோடிவேமஜ்ஜ²ம்வ இந்த³கீ²லட்டா²னியத்தா இந்த³கீ²லோதி க³ஹேதப்³ப³ம். யோ பன கா³மோ புப்³பே³ மஹா ஹுத்வா பச்சா² குலேஸு நட்டே²ஸு அப்பகோ ஹோதி, ஸோ க⁴ரூபசாரதோ லேட்³டு³பாதேனேவ பரிச்சி²ந்தி³தப்³போ³. புரிமபரிச்சே²தோ³ பனஸ்ஸ பரிக்கி²த்தஸ்ஸாபி அபரிக்கி²த்தஸ்ஸாபி அப்பமாணமேவாதி. நனு சேதம் அபரிக்கி²த்தஸ்ஸ உபசாரத³ஸ்ஸனம் பத³பா⁴ஜனேன விருத்³த⁴மிவ தி³ஸ்ஸதி. தத்த² ஹி ‘‘கா³மூபசாரோ நாம பரிக்கி²த்தஸ்ஸ கா³மஸ்ஸ இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி (பாரா. 92) வத்வா ‘‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி (பாரா. 92) ஏத்தகமேவ வுத்தம், ந பன தம் லேட்³டு³பாதம் கா³மஸங்கே²பம் கத்வா ததோ பரம் கா³மூபசாரோதி வுத்தோதி ஆஹ ‘‘பத³பா⁴ஜனேபி ஹி இமினாவ நயேன அத்தோ² வேதி³தப்³போ³’’தி.

அயமேத்த² அதி⁴ப்பாயோ – இத⁴ கா³மோ நாம து³விதோ⁴ ஹோதி பரிக்கி²த்தோ ச அபரிக்கி²த்தோ ச (பாரா. அட்ட². 1.92). தத்ர பரிக்கி²த்தஸ்ஸ பரிக்கே²போயேவ பரிச்சே²தோ³. தஸ்மா தஸ்ஸ விஸும் பரிச்சே²த³ம் அவத்வா ‘‘கா³மூபசாரோ நாம பரிக்கி²த்தஸ்ஸ கா³மஸ்ஸ இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி பாளியம் வுத்தம். அபரிக்கி²த்தஸ்ஸ பன கா³மஸ்ஸ கா³மபரிச்சே²தோ³ வத்தப்³போ³. தஸ்மா தஸ்ஸ கா³மஸ்ஸ கா³மபரிச்சே²த³த³ஸ்ஸனத்த²ம் ‘‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி (பாரா. 92) வுத்தம். கா³மபரிச்சே²தே³ ச த³ஸ்ஸிதே கா³மூபசாரலக்க²ணம் புப்³பே³ வுத்தனயேனேவ ஸக்கா ஞாதுந்தி புன ‘‘தத்த² டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி ந வுத்தம், அத்தோ² பன தத்தா²பி அயமேவ யதா²வுத்தோதி. யோ பன க⁴ரூபசாரே டி²தஸ்ஸ லேட்³டு³பாதம்யேவ ‘‘கா³மூபசாரோ’’தி வத³தி, தஸ்ஸ க⁴ரூபசாரோ ‘‘கா³மோ’’தி ஆபஜ்ஜதி. ததோ க⁴ரம் க⁴ரூபசாரோ, கா³மோ கா³மூபசாரோதி ஏஸ விபா⁴கோ³ ஸங்கரீயதி. அஸம்கரதோ சேத்த² வினிச்ச²யோ வேதி³தப்³போ³. தஸ்மா பாளிஞ்ச அட்ட²கத²ஞ்ச ஸம்ஸந்தி³த்வா வுத்தனயேனேவேத்த² கா³மோ, கா³மூபசாரோ ச வேதி³தப்³போ³தி.

தத்தா²தி தேஸு த்³வீஸு உபசாரேஸு. ய்வாயம் உபசாரோ த³ஸ்ஸிதோதி ஸம்ப³ந்தோ⁴. விகாலே கா³மப்பவேஸனாதீ³ஸூதி ஏத்த² ஆதி³ஸத்³தே³ன அஸம்கச்சிகாகா³மப்பவேஸனம் (பாசி. 1225) ஸங்க³ண்ஹாதி. யோ பன பரிக்கி²த்தஸ்ஸ கா³மஸ்ஸ உபசாரோ வுத்தோ, ஸோ ந கத்த²சி வினயபிடகே உபயோக³ம் க³தோ. கேவலம் அபரிக்கி²த்தஸ்ஸ பரிக்கே²போகாஸதோ அபரோ ஏகோ லேட்³டு³பாதோ கா³மூபசாரோ நாமாதி ஞாபனத்த²ம் வுத்தோ. ஏவம் வுத்தே ஹி ஞாயதி ‘‘பரிக்கி²த்தஸ்ஸாபி சே கா³மஸ்ஸ ஏகோ லேட்³டு³பாதோ கப்பியபூ⁴மி ஸமானோ உபசாரோதி வுத்தோ, பகே³வ அபரிக்கி²த்தஸ்ஸ பரிக்கே²போகாஸதோ ஏகோ’’தி. இமேஸம் பரிச்சே²த³த³ஸ்ஸனத்த²ந்தி இமேஸம் கா³மாரஞ்ஞானம் பரிச்சே²த³த³ஸ்ஸனத்த²ம் வுத்தா அட்ட²கதா²யம். பாராஜிகவத்து²ந்தி பாத³க்³க⁴னகம். அவஹரந்தஸ்ஸாதி க³ண்ஹந்தஸ்ஸ.

அதி³ன்னந்தி (பாரா. அட்ட². 92) த³ந்தபோனஸிக்கா²பதே³ அத்தனோ ஸந்தகம்பி அப்படிக்³க³ஹிதகம் கப்பியம் அஜ்ஜோ²ஹரணீயம் வுச்சதி, இத⁴ பன யம் கிஞ்சி பரபரிக்³க³ஹிதம் ஸஸாமிகம் ப⁴ண்ட³ம், ததே³தம் தேஹி ஸாமிகேஹி காயேன வா வாசாய வா ந தி³ன்னந்தி அதி³ன்னம். அவஹாரப்பஹோனகமேவ பன த³ஸ்ஸேதும் ‘‘அஞ்ஞஸ்ஸ மனுஸ்ஸஜாதிகஸ்ஸ ஸந்தக’’ந்தி வுத்தம். ஸங்கா²ஸத்³த³ஸ்ஸேவ த-காரேன வட்³டே⁴த்வா வுத்தத்தா ‘‘ஸங்கா² ஸங்கா²தந்தி அத்த²தோ ஏக’’ந்தி வுத்தம். தத்த² அத்த²தோ ஏகந்தி பத³த்த²தோ ஏகம், அனத்த²ந்தரந்தி வுத்தம் ஹோதி. கோட்டா²ஸஸ்ஸேதம் நாமம் பா⁴க³தோ ஸங்கா²யதி உபட்டா²தீதி கத்வா. பபஞ்சஸங்கா²தி ஸத்தானம் ஸம்ஸாரே பபஞ்சேந்தி சிராயந்தீதி பபஞ்சா, தண்ஹாமானதி³ட்டி²யோ, யஸ்ஸ வா உப்பன்னா, தம் ‘‘ரத்தோ’’தி வா ‘‘மத்தோ’’தி வா ‘‘மிச்சா²தி³ட்டி²னிவிட்டோ²’’தி வா பபஞ்சேந்தி ப்³யஞ்ஜேந்தீதி பபஞ்சா, ஸங்கா² வுச்சதி கோட்டா²ஸோ, பபஞ்சாவ ஸங்கா² பபஞ்சஸங்கா², பபஞ்சகோட்டா²ஸாதி அத்தோ², தண்ஹாமானதி³ட்டி²யோதி வுத்தம் ஹோதி. தே²ய்யசித்தஸங்கா²தோதி ‘‘தே²ய்யசித்தோ’’தி கதி²தோ. ஏகோ சித்தகோட்டா²ஸோதி விஸ்ஸாஸதாவகாலிகாதி³க்³கா³ஹவஸப்பவத்தஅதே²ய்யசித்தகோட்டா²ஸதோ அஞ்ஞோ சித்தகோட்டா²ஸோ. தே²ய்யஸங்கா²தேனாதி தே²ய்யபூ⁴தசித்தகோட்டா²ஸேன. யதி³ ஏவம் அத² கஸ்மா ஏதஸ்ஸ விப⁴ங்கே³ ‘‘தே²ய்யசித்தோ அவஹரணசித்தோ’’தி (பாரா. 92) வுத்தந்தி ஆஹ ‘‘யோ சா’’திஆதி³. ப்³யஞ்ஜனம் அனாதி³யித்வாதி ப்³யஞ்ஜனே ஆத³ரம் அகத்வாதி அத்தோ², ஸத்³த³த்த²மனபேக்கி²த்வாதி வுத்தம் ஹோதி. அத்த²மேவாதி பா⁴வத்த²மேவ.

தே பன அவஹாராதி தே பஞ்சவீஸதி அவஹாரா. ஸவிஞ்ஞாணகாவிஞ்ஞாணகவஸேன நானாவிதோ⁴ ப⁴ண்டோ³ ஏதஸ்ஸ பஞ்சகஸ்ஸாதி நானாப⁴ண்ட³ம், பஞ்சன்னம் அவஹாரானம் ஸமூஹோ பஞ்சகம், பஞ்சபரிமாணமஸ்ஸாதி வா பஞ்சகம், நானாப⁴ண்ட³மேவ பஞ்சகம் நானாப⁴ண்ட³பஞ்சகம். ஸவிஞ்ஞாணகவஸேன ஏகோ ப⁴ண்டோ³ ஏதஸ்ஸாதி ஏகப⁴ண்ட³ம். ஸேஸம் வுத்தனயமேவ. ஸாஹத்தி²கோவ பஞ்சகம் ஸாஹத்தி²கபஞ்சகம். ஆதி³பத³வஸேன சேதம் நாமம் குஸலாதி³த்திகஸ்ஸ குஸலத்திகவோஹாரோ விய. தஸ்மா ஸாஹத்தி²காதி³பஞ்சகந்தி அத்த²தோ த³ட்ட²ப்³ப³ம். ஏஸ நயோ ஸேஸேஸு பஞ்சகத்³வயேஸு. ஏதஸ்ஸேவாதி ‘‘ஆதி³யேய்யா’’தி ஏதஸ்ஸேவ மாதிகாபத³ஸ்ஸ. இமேஸம் பதா³னம் வஸேனாதி இமேஸம் பஞ்சன்னம் பதா³னம் வஸேன. ஏத்த² ச பட²மபத³ம் அபி⁴யோக³வஸேன வுத்தம், து³தியபத³ம் அஞ்ஞேஸம் ப⁴ண்ட³ம் ஹரந்தஸ்ஸ க³ச்ச²தோ வஸேன, ததியபத³ம் உபனிக்கி²த்தப⁴ண்ட³வஸேன, சதுத்த²ம் ஸவிஞ்ஞாணகவஸேன, பஞ்சமம் த²லே நிக்கி²த்தாதி³வஸேன வுத்தந்தி வேதி³தப்³ப³ம்.

இதா³னி நேஸம் அத்த²யோஜனம் த³ஸ்ஸேதும் ‘‘தத்தா²’’திஆதி³மாஹ. தத்த² தத்தா²தி தேஸு த்³வீஸு பஞ்சகேஸு. இதரந்தி ஏகப⁴ண்ட³பஞ்சகம். ஆராமந்தி புப்பா²ராமப²லாராமம். அபி⁴யுஞ்ஜதீதி (பாரா. அட்ட². 1.102) பரஸந்தகம் ‘‘மம ஸந்தகோவ அய’’ந்தி முஸா ப⁴ணித்வா அபி⁴யுஞ்ஜதி சோதே³தி, அட்டம் கரோதீதி அத்தோ². ஸம்பஜானமுஸாவாதே³பி அதி³ன்னாதா³னஸ்ஸ புப்³ப³பயோக³த்தா து³க்கடந்தி ஆஹ ‘‘ஆபத்தி து³க்கடஸ்ஸா’’தி, து³க்கடஸங்கா²தா ஆபத்தி ப⁴வேய்யாதி அத்தோ². அத² வா து³க்கடஸஞ்ஞிதஸ்ஸ வீதிக்கமஸ்ஸ ஆபஜ்ஜனந்தி அத்தோ². ஏஸ நயோ ‘‘ஆபத்தி து²ல்லச்சயஸ்ஸா’’திஆதீ³ஸு. ஸாமிகஸ்ஸ விமதிம் உப்பாதே³தீதி வினிச்ச²யகுஸலதாய, ப³லவனிஸ்ஸிதாதி³பா⁴வேன வா ஆராமஸாமிகஸ்ஸ ஸம்ஸயம் ஜனேதி. கத²ம்? தஞ்ஹி ததா² வினிச்ச²யப்பஸுதம் தி³ஸ்வா ஸாமிகோ சிந்தேதி ‘‘ஸக்கி²ஸ்ஸாமி நு கோ² அஹம் இமம் ஆராமம் அத்தனோ காதும், ந ஸக்கி²ஸ்ஸாமி நு கோ²’’தி. ஏவம் தஸ்ஸ விமதி உப்பஜ்ஜமானா தேன உப்பாதி³தா ஹோதி. து⁴ரம் நிக்கி²பதீதி யதா³ பன ஸாமிகோ ‘‘அயம் த²த்³தோ⁴ கக்க²ளோ ஜீவிதப்³ரஹ்மசரியந்தராயம்பி மே கரேய்ய, அலம் தா³னி மய்ஹம் இமினா ஆராமேனா’’தி து⁴ரம் நிக்கி²பதி, உஸ்ஸாஹம் ட²பேதி, அத்தனோ ஸந்தககரணே நிருஸ்ஸாஹோ ஹோதீதி அத்தோ². ஆபத்தி பாராஜிகஸ்ஸ ஸசே ஸயம்பி கதது⁴ரனிக்கே²போ சாதி அதி⁴ப்பாயோ. அத² பன ஸாமிகேன து⁴ரே நிக்கி²த்தேபி அபி⁴யுஞ்ஜகோ து⁴ரம் அனிக்கி²பித்வாவ ‘‘இமம் ஸுட்டு² பீளேத்வா மம ஆணாபவத்திம் த³ஸ்ஸேத்வா கிங்காரப்படிஸ்ஸாவிபா⁴வே ட²பேத்வா த³ஸ்ஸாமீ’’தி தா³தப்³ப³பா⁴வே ஸஉஸ்ஸாஹோ, ரக்க²தி தாவ. அதா²பி அபி⁴யுஞ்ஜகோ அச்சி²ந்தி³த்வா ‘‘ந தா³னி இமம் இமஸ்ஸ த³ஸ்ஸாமீ’’தி து⁴ரம் நிக்கி²பதி, ஸாமிகோ பன து⁴ரம் ந நிக்கி²பதி, பக்க²ம் பரியேஸதி, காலம் ஆக³மேதி, ‘‘லஜ்ஜிபரிஸம் தாவ லபா⁴மி, பச்சா² ஜானிஸ்ஸாமீ’’தி க³ஹணேயேவ ஸஉஸ்ஸாஹோ ஹோதி, ரக்க²தியேவ. யதா³ பன ‘‘ஸோபி ந த³ஸ்ஸாமீ’’தி, ‘‘ஸாமிகோபி ந லச்சா²மீ’’தி ஏவம் உபோ⁴ து⁴ரம் நிக்கி²பந்தி, ததா³ அபி⁴யுஞ்ஜகஸ்ஸ பாராஜிகம்.

அஞ்ஞஸ்ஸ ப⁴ண்ட³ம் ஹரந்தோதி வேதனேன வா மித்தபா⁴வேன வா அஞ்ஞஸ்ஸ ப⁴ண்ட³ம் ஹரந்தோ. ஸீஸே பா⁴ரந்தி ஸீஸே டி²தபா⁴ரம். ஸீஸஸ்ஸ தாவ புரிமக³லே க³லவாடகோ, பிட்டி²க³லே கேஸஞ்சி கேஸந்தே ஆவட்டோ ஹோதி, க³லஸ்ஸேவ உபோ⁴ஸு பஸ்ஸேஸு கேஸஞ்சி கேஸா ஓருய்ஹ ஜாயந்தி, யே ‘‘கண்ணசூளிகா’’தி வுச்சந்தி, தேஸம் அதோ⁴பா⁴கோ³ சாதி அயம் ஹேட்டி²மகோ பரிச்சே²தோ³, ததோ உபரி ஸீஸம், ஏத்த²ந்தரே டி²தபா⁴ரந்தி வுத்தம் ஹோதி. க²ந்த⁴ம் ஓரோபேதீதி உபோ⁴ஸு பஸ்ஸேஸு கண்ணசூளிகாஹி பட்டா²ய ஹேட்டா², கப்பரேஹி பட்டா²ய உபரி, பிட்டி²க³லாவட்டதோ ச க³லவாடகதோ ச பட்டா²ய ஹேட்டா², பிட்டி²வேமஜ்ஜா²வட்டதோ ச உரபரிச்சே²த³மஜ்ஜே², ஹத³யாவாடகதோ ச பட்டா²ய உபரி க²ந்தோ⁴, தம் ஓரோபேதி.

அயம் பனேத்த² வினிச்ச²யோ – யோ பி⁴க்கு² ‘‘இத³ம் க³ஹேத்வா ஏத்த² யாஹீ’’தி (பாரா. அட்ட². 1.101) ஸாமிகேஹி அனாணத்தோ ஸயமேவ ‘‘மய்ஹம் இத³ம் நாம தே³த², அஹம் வோ ப⁴ண்ட³ம் வஹாமீ’’தி தேஸம் ப⁴ண்ட³ம் ஸீஸேன ஆதா³ய க³ச்ச²ந்தோ தே²ய்யசித்தேன தம் ப⁴ண்ட³ம் ஆமஸதி, து³க்கடம். யதா²வுத்தஸீஸபரிச்சே²த³ம் அனதிக்கமந்தோவ இதோ சிதோ ச க⁴ம்ஸந்தோ ஸாரேதிபி பச்சாஸாரேதிபி, து²ல்லச்சயம். க²ந்த⁴ம் ஓரோபிதமத்தே கிஞ்சாபி ஸாமிகானம் ‘‘வஹதூ’’தி சித்தம் அத்தி², தேஹி பன அனாணத்தத்தா பாராஜிகம். க²ந்த⁴ம் பன அனோரோபேத்வாபி ஸீஸதோ கேஸக்³க³மத்தம்பி சாவேந்தஸ்ஸ பாராஜிகம். யமகபா⁴ரஸ்ஸ பன ஏகோ பா⁴கோ³ ஸீஸே பதிட்டா²தி, ஏகோ பிட்டி²யம், தத்த² த்³வின்னம் டா²னானம் வஸேன வினிச்ச²யோ வேதி³தப்³போ³. அயம் பன ஸுத்³த⁴ஸீஸபா⁴ரஸ்ஸேவ வஸேன வுத்தோ. யோ சாயம் ஸீஸபா⁴ரே வுத்தோ, க²ந்த⁴பா⁴ராதீ³ஸுபி அயமேவ வினிச்ச²யோ வேதி³தப்³போ³.

உபனிக்கி²த்தம் ப⁴ண்ட³ந்தி ஸங்கோ³பனத்தா²ய அத்தனோ ஹத்தே² பரேஹி ட²பிதப⁴ண்ட³ம். அஹம் ந க³ண்ஹாமீதி ஸம்ப³ந்தோ⁴. அதீதத்தே² சேதம் வத்தமானவசனம், நாஹம் க³ஹேஸிந்தி அத்தோ². து³க்கடம் (பாரா. அட்ட². 1.111) ஸம்பஜானமுஸாவாதே³பி அதி³ன்னாதா³னஸ்ஸ புப்³ப³பயோக³த்தா. ‘‘கிம் தும்ஹே ப⁴ணத², நேவித³ம் மய்ஹம் அனுரூபம், ந தும்ஹாக’’ந்திஆதீ³னி வத³ந்தஸ்ஸாபி து³க்கடமேவ. ஸாமிகஸ்ஸ விமதிம் உப்பாதே³தீதி ‘‘ரஹோ மயா ஏதஸ்ஸ ஹத்தே² ட²பிதம், ந அஞ்ஞோ கோசி ஜானாதி, த³ஸ்ஸதி நு கோ² மே, நோ’’தி ஸாமிகஸ்ஸ விமதிம் உப்பாதே³தி. து⁴ரம் நிக்கி²பதீதி தஸ்ஸ ப²ருஸாதி³பா⁴வம் தி³ஸ்வா உஸ்ஸாஹம் ட²பேதி. தத்ர ஸசாயம் பி⁴க்கு² ‘‘கிலமேத்வா நம் த³ஸ்ஸாமீ’’தி தா³னே ஸஉஸ்ஸாஹோ, ரக்க²தி தாவ. ஸசே ஸோ தா³னே நிருஸ்ஸாஹோ, ப⁴ண்ட³ஸாமிகோ பன க³ஹணே ஸஉஸ்ஸாஹோ, ரக்க²தேவ. யதி³ பன ஸோ தஸ்மிம் தா³னே நிருஸ்ஸாஹோ, ப⁴ண்ட³ஸாமிகோபி ‘‘ந மய்ஹம் த³ஸ்ஸதீ’’தி து⁴ரம் நிக்கி²பதி, ஏவம் உபி⁴ன்னம் து⁴ரனிக்கே²பேன பி⁴க்கு²னோ பாராஜிகம். யதி³பி முகே²ன ‘‘த³ஸ்ஸாமீ’’தி வத³தி, சித்தேன பன அதா³துகாமோ, ஏவம்பி ஸாமிகஸ்ஸ து⁴ரனிக்கே²பேன பி⁴க்கு²னோ பாராஜிகம்.

ஸஹப⁴ண்ட³ஹாரகம் நேஸ்ஸாமீதி ‘‘ஸஹப⁴ண்ட³ஹாரகம் ப⁴ண்ட³ம் நேஸ்ஸாமீ’’தி சிந்தேத்வா. பட²மம் பாத³ம் அதிக்காமேதீதி ப⁴ண்ட³ஹாரகம் தஜ்ஜேத்வா தஸ்ஸ க³மனபத²ம் வாரேத்வா அத்தனா ருசிதமக்³க³ம் ஏகபாத³ம் அதிக்காமேதி. த²லட்ட²ந்தி (பாரா. அட்ட². 1.95) த²லே நிக்கி²த்தம், பூ⁴மிதலே வா பாஸாணபப்³ப³ததலாதீ³ஸு வா யத்த² கத்த²சி படிச்ச²ன்னே வா அப்படிச்ச²ன்னே வா ட²பிதந்தி அத்தோ². ப²ந்தா³பேதி, து²ல்லச்சயந்தி யோ ப²ந்தா³பேதி, தஸ்ஸ பயோகே³ பயோகே³ து²ல்லச்சயம், ஆமஸனே து³க்கடம், ப²ந்தா³பனே து²ல்லச்சயஞ்ச விஸும் விஸும் தே²ய்யசித்தேன ஆமஸனப²ந்தா³பனபயோகே³ கரோந்தஸ்ஸேவ ஹோதி. ‘‘ஏகபயோகே³ன க³ண்ஹந்தஸ்ஸ பன உத்³தா⁴ரே பாராஜிகமேவ, ந து³க்கடது²ல்லச்சயானீ’’தி வத³ந்தி. டா²னாதி டி²தட்டா²னதோ. ஸசே தம் த²லட்ட²ம் ராஸிகதம் ஹோதி, அந்தோகும்பி⁴யம் பா⁴ஜனக³தகரணமுட்டி²ச்சே²த³னவினிச்ச²யேன வினிச்சி²னிதப்³ப³ம். ஸசே ஏகாப³த்³த⁴ம் ஸிலேஸனிய்யாஸாதி³, பக்கமது⁴பா²ணிதவினிச்ச²யேன வினிச்சி²னிதப்³ப³ம். ஸசே க³ருகம் ஹோதி பா⁴ரப³த்³த⁴ம் லோஹபிண்டி³தேலமது⁴க⁴டாதி³ வா, கும்பி⁴யம் டா²னாசாவனவினிச்ச²யேன வினிச்சி²னிதப்³ப³ம். ஸங்க²லிகாப³த்³த⁴ஸ்ஸ ச டா²னபே⁴தோ³ ஸல்லக்கே²தப்³போ³. பத்த²ரித்வா ட²பிதம் பன பாவாரத்த²ரணகடஸாரகாதி³ம் உஜுகம் க³ஹேத்வா ஆகட்³ட⁴தி, பாரிமந்தே ஓரிமந்தேன பு²ட்டோ²காஸம் அதிக்கந்தே பாராஜிகம். ததே²வ க³ஹேத்வா பரதோ பேல்லதி, பாரிமந்தே பு²ட்டோ²காஸம் ஓரிமந்தே அதிக்கந்தே பாராஜிகம். வாமதோ வா த³க்கி²ணதோ வா அபனாமேந்தஸ்ஸ வாமந்தேன வா த³க்கி²ணந்தேன வா பு²ட்டோ²காஸம் த³க்கி²ணந்தே வா வாமந்தே வா அதிக்கந்தே பாராஜிகம். வேடே²த்வா உத்³த⁴ரதி, கேஸக்³க³மத்தம் ஆகாஸக³தம் கரோந்தஸ்ஸ பாராஜிகம்.

ஸகோ ஹத்தோ² ஸஹத்தோ², தேன நிப்³ப³த்தோ, தஸ்ஸ வா ஸம்ப³ந்தீ⁴தி ஸாஹத்தி²கோ, அவஹாரோ. ஆணாபனம் ஆணத்தி, தாய ஆணத்தியா நிப்³ப³த்தோ அவஹாரோ ஆணத்திகோ. நிஸ்ஸஜ்ஜனம் நிஸ்ஸக்³கோ³, ஸுங்ககா⁴தட்டா²னே, பரிகப்பிதோகாஸே ச ட²த்வா ப⁴ண்ட³ஸ்ஸ ப³ஹி நிபாதனம், நிஸ்ஸக்³கோ³வ நிஸ்ஸக்³கி³யோ. கிரியாஸித்³தி⁴தோ புரேதரமேவ பாராஜிகாபத்திஸங்கா²தம் அத்த²ம் ஸாதே⁴தீதி அத்த²ஸாத⁴கோ. து⁴ரஸ்ஸ ஆலயஸங்கா²தஸ்ஸ பா⁴ரஸ்ஸ நிக்கி²பனம் பரிச்சஜனம் நிருஸ்ஸாஹபா⁴வாபஜ்ஜனம் து⁴ரனிக்கே²போ. இதா³னி ப்³யஞ்ஜனே ஆத³ரம் அகத்வா தேஸம் அத்த²மத்தமேவ த³ஸ்ஸேந்தோ ‘‘தத்த² ஸாஹத்தி²கோ நாமா’’திஆதி³மாஹ. ஸஹத்தா²தி ஸஹத்தே²ன. கரணத்தே² ஹி இத³ம் நிஸ்ஸக்கவசனம். ‘‘அஸுகஸ்ஸ ப⁴ண்ட³ம் அவஹரா’’தி அஞ்ஞம் ஆணாபேதீதி ஏத்தா²பி ஆணத்திக்க²ணே ஏவ ஆபத்தி த³ட்ட²ப்³பா³. யதி³ ஏவம் இமஸ்ஸ, அத்த²ஸாத⁴கஸ்ஸ ச கோ விஸேஸோதி? தம் க²ணம் ஏவ க³ஹணே நியுஞ்ஜனம் ஆணத்திகபயோகோ³, காலந்தரேன க³ஹணத்த²ம் நியோகோ³ அத்த²ஸாத⁴கோதி (ஸாரத்த². டீ. 2.92; வி. வி. டீ. 1.92) அயமேதேஸம் விஸேஸோதி. தேனேவாஹ ‘‘அஸுகஸ்ஸ ப⁴ண்ட³ம் யதா³ ஸக்கோஸி, ததா³ தம் அவஹராதி ஆணாபேதீ’’தி.

ஸுங்ககா⁴தபரிகப்பிதோகாஸானந்தி ஸுங்ககா⁴தஞ்ச பரிகப்பிதோகாஸோ ச ஸுங்ககா⁴தபரிகப்பிதோகாஸா, தேஸம். தத்த² ஸுங்ககா⁴தந்தி (பாரா. அட்ட². 1.113) ருக்க²பப்³ப³தாதி³ஸஞ்ஞாணேன நியமிதஸ்ஸ ஸுங்கட்டா²னஸ்ஸேதம் அதி⁴வசனம். தஞ்ஹி யஸ்மா ததோ ராஜதே³ய்யபா⁴க³ம் ஸுங்கம் அத³த்வா நீஹரந்தா ரஞ்ஞோ ஸுங்கம் ஹனந்தி வினாஸேந்தி, தஸ்மா ‘‘ஸுங்ககா⁴த’’ந்தி வுத்தம்.

கோசி பரபரிவேணாதீ³னி பவிட்டோ² கிஞ்சி லோப⁴னேய்யப⁴ண்ட³ம் தி³ஸ்வா த்³வாரப்பமுகா²தி³வஸேன யம் டா²னம் ‘‘ஸசே மம் ஏத்த²ந்தரே பஸ்ஸிஸ்ஸந்தி, த³ட்டு²காமதாய க³ஹேத்வா விசரந்தோ விய த³ஸ்ஸாமி, நோ சே பஸ்ஸிஸ்ஸந்தி, ஹரிஸ்ஸாமீ’’தி பரிகப்பேதி, அயம் பரிகப்பிதோகாஸோ. ஆணத்திக்க²ணேயேவ பாராஜிகந்தி (பாரா. அட்ட². 1.121) அத்த²ஸாத⁴கசேதனாக்க²ணேயேவ பாராஜிகம். ஸசேபி அவஹாரகோ ஸட்டி²வஸ்ஸாதிக்கமேனபி தம் ப⁴ண்ட³ம் அவஹரதி, ஆணாபகோ ச அந்தராயேவ காலம் கரோதி, ஹீனாய வா ஆவத்ததி, அஸ்ஸமணோவ ஹுத்வா காலம் வா கரிஸ்ஸதி, ஹீனாய வா ஆவத்திஸ்ஸதி, அவஹாரகஸ்ஸ பன அவஹாரக்க²ணேயேவ பாராஜிகம். பாத³க்³க⁴னகதேலந்தி (பாரா. அட்ட². 1.94) ஏத்த² பாதோ³ நாம கஹாபணஸ்ஸ சதுத்தோ² பா⁴கோ³, தம் அக்³க⁴தீதி பாத³க்³க⁴னகம், பாத³க்³க⁴னகஞ்ச தம் தேலஞ்சாதி பாத³க்³க⁴னகதேலம். உபாஹனா ஆதி³ யேஸம் வத்தூ²னம் தானி உபாஹனாதீ³னி. ஆதி³ஸத்³தே³ன து³கூலஸாடகசம்மக்க²ண்டா³தீ³னம் க³ஹணம். பக்கி²பதீதி தே²ய்யசித்தேன பக்கி²பதி. தேனாஹ ‘‘ஹத்த²தோ முத்தமத்தேயேவ பாராஜிக’’ந்தி ஸசே பன அத்தனோபி கும்பி⁴யம் அஞ்ஞோ ஸப்பிம் வா தேலம் வா ஆகிரதி, தத்ர சாயம் தே²ய்யசித்தேன தேலபிவனகம் ப⁴ண்ட³ம் பக்கி²பதி, வுத்தனயேனேவ பாராஜிகம்.

காயேன வா வாசாய வா பயுஞ்ஜனம் ஆணாபனம் பயோகோ³, ஆணத்தஸ்ஸ ப⁴ண்ட³க்³க³ஹணதோ புப்³ப³த்தா புப்³போ³, இதி புப்³போ³ ச ஸோ பயோகோ³ சாதி புப்³ப³பயோகோ³. பயோகே³ன ஸஹ வத்தமானோ அவஹாரோ ஸஹபயோகோ³. ஸமம் ஏகீ ஹுத்வா வித³ஹித்வா மந்தேத்வா அவஹரணம் ஸம்விதா⁴வஹாரோ, அஞ்ஞமஞ்ஞம் ஸஞ்ஞுப்பத்தியா கதாவஹாரோதி வுத்தம் ஹோதி. புப்³ப³ண்ஹாதி³காலபரிச்சே²தே³ன ஸஞ்ஜானனம் ஸங்கேதோ, தஸ்ஸ கம்மம் ஸங்கேதகம்மம். நிமித்தஸ்ஸ கம்மம் நிமித்தகம்மம், ஸஞ்ஞுப்பாத³னத்த²ம் கஸ்ஸசி நிமித்தஸ்ஸ கரணந்தி அத்தோ². தத்தா²தி யதா²வுத்தேஸு புப்³ப³பயோகா³தீ³ஸு பஞ்சஸு. கி²லாதீ³னி ஸங்காமேத்வா கே²த்தாதி³க்³க³ஹணவஸேனாதி கி²லம், ரஜ்ஜும், வதிம், மரியாத³ம் வா பாகாரம் வா ஸங்காமேத்வா கே²த்தக்³க³ஹணவஸேன, கி²லம், ரஜ்ஜும், வதிம், மரியாத³ம் வா பாகாரம் வா ஸங்காமேத்வா வத்து²க்³க³ஹணவஸேன. ஸசே பன த்³வீஹி கி²லேஹி க³ஹேதப்³ப³ம் ஹோதி, பட²மே கி²லே து²ல்லச்சயம், து³தியே பாராஜிகம் (பாரா. அட்ட². 1.104). ஸசே தீஹி க³ஹேதப்³ப³ம் ஹோதி, பட²மே து³க்கடம், து³தியே து²ல்லச்சயம், ததியே பாராஜிகம். ஏவம் ப³ஹுகேஸுபி அவஸானே த்³வே ட²பேத்வா புரிமேஹி து³க்கடம், அவஸானே த்³வின்னம் ஏகேன து²ல்லச்சயம், இதரேன பாராஜிகம். ரஜ்ஜுபஸாரணாதீ³ஸுபி ஏஸேவ நயோ. யம் பன ஸமந்தபாஸாதி³காயம் ‘‘தஞ்ச கோ² ஸாமிகானம் து⁴ரனிக்கே²பேனா’’தி (பாரா. அட்ட². 1.104) வுத்தம், தம் ‘‘கே²த்தம் அபி⁴யுஞ்ஜதி, ஆபத்தி து³க்கடஸ்ஸா’’திஆதி³ (பாரா. 104) -அதி⁴காரே வுத்தத்தா அபி⁴யோக³வஸேன க³ஹணம் ஸந்தா⁴யாதி த³ட்ட²ப்³ப³ம். ஸம்வித³ஹித்வாதி ஏதஸ்ஸேவ வேவசனம். ஸம்மந்தயித்வாதி ஏகச்ச²ந்த³தாய ஏகஜ்ஜா²ஸயதாய ப⁴ணித்வாதி அத்தோ². இமஸ்மிம் அவஹாரே அஸம்மோஹத்த²ம் ‘‘ஏவம் ஸம்வித³ஹித்வா க³தேஸு ஹீ’’திஆதி³மாஹ. ஸஞ்ஜானனகம்மந்தி புப்³ப³ண்ஹாதி³காலபரிச்சே²த³வஸேன ஸஞ்ஞாணகரணம். தேனாஹ ‘‘ஸசே ஹீ’’திஆதி³.

ஏத்த² ச ‘‘புரேப⁴த்தம் அவஹரா’’தி வுத்தே (பாரா. அட்ட². 1.119) அஜ்ஜ வா புரேப⁴த்தம் அவஹரது, ஸ்வே வா, அனாக³தே வா ஸம்வச்ச²ரே, நத்தி² விஸங்கேதோ, உபி⁴ன்னம்பி பாராஜிகம். ஸசே பன ‘‘அஜ்ஜ புரேப⁴த்தம் அவஹரா’’தி வுத்தே ஸ்வே அவஹரதி. ‘‘அஜ்ஜா’’தி நியமிதம் ஸங்கேதம் அதிக்கம்ம பச்சா² அவஹடம் ஹோதி. ஸசே ‘‘ஸ்வே புரேப⁴த்தம் அவஹரா’’தி வுத்தே அஜ்ஜ புரேப⁴த்தம் அவஹரதி, ‘‘ஸ்வே’’தி நியமிதம் தம் ஸங்கேதம் அபத்வா புரே அவஹடம் ஹோதி, ஏவம் அவஹரந்தஸ்ஸ அவஹாரகஸ்ஸேவ பாராஜிகம், மூலட்ட²ஸ்ஸ அனாபத்தி. ‘‘ஸ்வேவ புரேப⁴த்த’’ந்தி வுத்தே தத³ஹேவ வா, ஸ்வே பச்சா²ப⁴த்தம் வா அவஹரந்தோபி தம்ஸங்கேததோ புரே ச பச்சா² ச அவஹரதி. யோ பன ஏவம்அகத்வா யதா²பரிச்சி²ன்னகாலமேவ அவஹரதி, அயம் ஸங்கேததோ அபுரே அபச்சா² தம் அவஹரதீதி வேதி³தப்³போ³. ஏஸ நயோ பச்சா²ப⁴த்தரத்திந்தி³வேஸுபி, புரிமயாமமஜ்ஜி²மயாமபச்சி²மயாமகாளஜுண்ஹமாஸஉதுஸம்வச்ச²ராதி³வஸேனாபி ஏத்த² ஸங்கேதவிஸங்கேததா வேதி³தப்³பா³. பரப⁴ண்டா³வஹாரஸஞ்ஞுப்பாத³ஸ்ஸ ஹேதுத்தா அக்கி²னிக²ணாதீ³னேவ நிமித்தந்தி அக்கி²னிக²ணாதி³னிமித்தம், தஸ்ஸ கரணம் அக்கி²னிக²ணாதி³னிமித்தகரணம். ஆதி³ஸத்³தே³ன ப⁴முகுக்கே²பஸீஸகம்பனஹத்த²லங்க⁴னபாணிப்பஹாரஅங்கு³லிபோ²டனகீ³வுன்னாமனஉக்காஸனாதி³அனேகப்பகாரம் ஸங்க³ண்ஹாதி. ஸேஸமேத்த² ஸங்கேதகம்மே வுத்தனயமேவ.

தே²னோ வுச்சதி சோரோ, தஸ்ஸ பா⁴வோ தே²ய்யம், தேன அவஹரணம் தே²ய்யாவஹாரோ. பஸய்ஹ அபி⁴ப⁴வித்வா அவஹரணம் பஸய்ஹாவஹாரோ. வத்த²ஸுத்தாதி³கம் பரிச்சி²ஜ்ஜ கப்பனம் பரிகப்போ, தேன அவஹரணம் பரிகப்பாவஹாரோ. திணபண்ணாதீ³ஹி படிச்ச²ன்னஸ்ஸ அவஹாரோ படிச்ச²ன்னாவஹாரோ. குஸேன அவஹாரோ குஸாவஹாரோ. கூடமானகூடகஹாபணாதீ³ஹீதி ஏத்த² கூடமானம் (தீ³. நி. அட்ட². 1.10; ம. நி. அட்ட². 1.293; பு. ப. அட்ட². 179) நாம ஹத³யபே⁴த³ஸிகா²பே⁴த³ரஜ்ஜுபே⁴த³வஸேன திவித⁴ம் மானகூடம். தத்த² ஹத³யந்தி நாளிஆதி³மானபா⁴ஜனானம் அப்³ப⁴ந்தரம், தஸ்ஸ பே⁴தோ³ சி²த்³த³கரணம் ஹத³யபே⁴தோ³, ஸோ ஸப்பிதேலாதி³மினனகாலே லப்³ப⁴தி. தானி ஹி க³ண்ஹந்தோ ஹேட்டா²சி²த்³தே³ன மானேன ‘‘ஸணிகம் ஆஸிஞ்சா’’தி வத்வா அந்தோபா⁴ஜனே ப³ஹும் பக்³க⁴ராபேத்வா க³ண்ஹாதி, த³த³ந்தோ ச சி²த்³த³ம் பிதா⁴ய ஸீக⁴ம் பூரேத்வா தே³தி.

ஸிகா²பே⁴தோ³ பன திலதண்டு³லாதி³மினனகாலே லப்³ப⁴தி. தானி ஹி க³ண்ஹந்தோ ஸணிகம் ஸிக²ம் உஸ்ஸாபேத்வா க³ண்ஹாதி, த³த³ந்தோ வேகே³ன பூரேத்வா ஸிக²ம் சி²ந்த³ந்தோ தே³தி.

ரஜ்ஜுபே⁴தோ³ கே²த்தவத்து²மினனகாலே லப்³ப⁴தி. கே²த்தாதி³ம் மினந்தா ஹி அமஹந்தம்பி மஹந்தம் கத்வா மினந்தி, மஹந்தம்பி அமஹந்தம்.

தம்ப³கம்ஸாதி³மயோ கூடோ கஹாபணோ கூடகஹாபணோ. ஆதி³ஸத்³தே³ன துலாகூடகம்ஸகூடவஞ்சனாதி³ம் ஸங்க³ண்ஹாதி. தத்த² துலாகூடம் ரூபகூடம், அங்க³கூடம், க³ஹணகூடம், படிச்ச²ன்னகூடந்தி சதுப்³பி³த⁴ம் ஹோதி. தத்த² ரூபகூடம் நாம த்³வே துலா ஸமரூபா கத்வா க³ண்ஹந்தோ மஹதியா க³ண்ஹாதி, த³த³ந்தோ கு²த்³தி³காய தே³தி. அங்க³கூடம் நாம க³ண்ஹந்தோ பச்சா²பா⁴கே³ ஹத்தே²ன துலம் அக்கமதி, த³த³ந்தோ புப்³ப³பா⁴கே³ அக்கமதி. க³ஹணகூடம் நாம க³ண்ஹந்தோ மூலே ரஜ்ஜும் க³ண்ஹாதி, த³த³ந்தோ அக்³கே³. படிச்ச²ன்னகூடம் நாம துலம் ஸுஸிரம் கத்வா அந்தோ அயசுண்ணம் பக்கி²பித்வா க³ண்ஹந்தோ தம் பச்சா²பா⁴கே³ கரோதி, த³த³ந்தோ அக்³க³பா⁴கே³.

கம்ஸோ வுச்சதி ஸுவண்ணபாதி, தாய வஞ்சனம் கம்ஸகூடம். கத²ம்? ஏகம் ஸுவண்ணபாதிம் கத்வா அஞ்ஞா த்³வே திஸ்ஸோ லோஹபாதியோ ஸுவண்ணவண்ணா கரோந்தி. ததோ ஜனபத³ம் க³ந்த்வா கிஞ்சிதே³வ அட்³ட⁴ம் குலம் பவிஸித்வா ‘‘ஸுவண்ணபா⁴ஜனானி கிணாதா²’’தி வத்வா அக்³கே⁴ புச்சி²தே ஸமக்³க⁴தரம் தா³துகாமா ஹோந்தி. ததோ தேஹி ‘‘கத²ம் இமேஸம் ஸுவண்ணபா⁴வோ ஜானிதப்³போ³’’தி வுத்தே ‘‘வீமம்ஸித்வா க³ண்ஹதா²’’தி ஸுவண்ணபாதிம் பாஸாணே க⁴ம்ஸித்வா ஸப்³பா³ பாதியோ த³த்வா க³ச்ச²தி.

வஞ்சனம் நாம தேஹி தேஹி உபாயேஹி பரேஸம் வஞ்சனம். தத்ரித³மேகம் வத்து² – ஏகோ கிர லுத்³த³கோ மிக³ஞ்ச மிக³போதகஞ்ச க³ஹேத்வா ஆக³ச்ச²தி, தமேகோ து⁴த்தோ ‘‘கிம் போ⁴ மிகோ³ அக்³க⁴தி, கிம் மிக³போதகோ’’தி ஆஹ. ‘‘மிகோ³ த்³வே கஹாபணே, மிக³போதகோ ஏக’’ந்தி வுத்தே ஏகம் கஹாபணம் த³த்வா மிக³போதகம் க³ஹேத்வா தோ²கம் க³ந்த்வா நிவத்தேந்தோ ‘‘ந மே போ⁴ மிக³போதகேன அத்தோ², மிக³ம் மே தே³ஹீ’’தி ஆஹ. ‘‘தேன ஹி த்³வே கஹாபணே தே³ஹீ’’தி ஆஹ. ஸோ ஆஹ ‘‘நனு போ⁴ மயா பட²மம் ஏகோ கஹாபணோ தி³ன்னோ’’தி. ஆம தி³ன்னோ, இமம் மிக³போதகம் க³ண்ஹ, ஏவம் ஸோ ச கஹாபணோ, அயஞ்ச கஹாபணக்³க⁴னகோ மிக³போதகோதி த்³வே கஹாபணா ப⁴விஸ்ஸந்தீதி. ஸோ ‘‘காரணம் வத³தீ’’தி ஸல்லக்கே²த்வா மிக³போதகம் க³ஹேத்வா மிக³ம் அதா³ஸீதி.

பஸய்ஹாதி (பாரா. அட்ட². 1.138) பரே அபி⁴பு⁴ய்ய. கா³மம் கா⁴தேந்தீதி கா³மகா⁴தகா, கா³மம் பஹரந்தா சோரா, தே ஆதி³ யேஸம் தே கா³மகா⁴தகாத³யோ. ஆதி³ஸத்³தே³ன சேத்த² பந்த²கா⁴தகாதீ³னம் க³ஹணம். உத்³தா⁴ரேயேவ பாராஜிகந்தி ‘‘ஸசே ஸாடகோ ப⁴விஸ்ஸதி, க³ண்ஹிஸ்ஸாமீ’’தி பரிகப்பஸ்ஸ பவத்தத்தா, ஸாடகஸ்ஸ ச தத்த² ஸப்³பா⁴வதோ. பத³வாரேன காரேதப்³போ³தி பூ⁴மியம் அனிக்கி²பித்வாவ வீமம்ஸிதத்தா வுத்தம். ப⁴ண்ட³தே³ய்யந்தி யம் பரஸ்ஸ நட்ட²ம், தஸ்ஸ மூலம் வா ததே³வ வா ப⁴ண்ட³ம் தா³தப்³ப³ந்தி அத்தோ².

தஸ்ஸாதி யோ ஏவம் பரிகப்பேதி, தஸ்ஸ. இமஸ்ஸ ‘‘அவஹாரோ ஹோதீ’’தி இமினா ஸம்ப³ந்தோ⁴.

பரேஸந்தி கீளந்தானம், பவிஸந்தானம் வா பரேஸம் மனுஸ்ஸானம். ‘‘பச்சா² க³ண்ஹிஸ்ஸாமீ’’தி பம்ஸுனா வா பண்ணேன வா படிச்சா²தே³தீதி ‘‘ஸசே இதா³னேவ ஓனமித்வா க³ண்ஹிஸ்ஸாமி, ‘கிம் ஸமணோ க³ண்ஹாதீ’தி மம் ஜானித்வா விஹேடே²ய்யும் பச்சா² க³ண்ஹிஸ்ஸாமீ’’தி பம்ஸுனா வா பண்ணேன வா படிச்சா²தே³தி. உத்³தா⁴ரோ நத்தீ²தி டா²னாசாவனம் நத்தீ²தி அத்தோ². ஸாமிகாதி அந்தாகா³மம் பவிஸிதுகாமா ப⁴ண்ட³ஸாமிகா மனுஸ்ஸா. உத்³தா⁴ரேதி உத்³த⁴ரணே, டா²னாசாவனேதி அத்தோ². டா²னாசாவனஞ்சேத்த² ஹேட்டா² வுத்தனயானுஸாரேன வேதி³தப்³ப³ம். பவேஸேதீதி டா²னாசாவனவஸேன பவேஸேதி, ஹேட்டி²மந்தேன பு²ட்டோ²காஸம் கேஸக்³க³மத்தம்பி உபரிமந்தேன அதிக்காமேந்தோ பவேஸேதீதி அத்தோ².

ஸமக்³க⁴தரந்தி அப்பக்³க⁴தரம். உத்³த⁴டமத்தே அவஹாரோதி ஸகபா⁴வப்பயோக³ஸ்ஸ நிட்டா²பிதத்தா, ந அத்த²ஸாத⁴கவஸேன. உத்³தா⁴ரே ரக்க²தி அத்தனோ கோட்டா²ஸே பாதேதுகாமதாய உத்³த⁴டத்தா. ஏஸேவ நயோ பாதனேபி ரக்க²தீதி ஏத்தா²பி. ‘‘உத்³தா⁴ரேயேவ ரக்க²தீ’’தி இமினாவ பாதனே ந ரக்க²தீதி அத்தே² ஸித்³தே⁴பி அத்த²ஸாத⁴கவஸேன அத்த²ம் த³ஸ்ஸேதும் ‘‘தம் உத்³த⁴ரித்வா’’திஆதி³ வுத்தம். ஸசே பன த்³வீஸுபி கோட்டா²ஸேஸு பதிதத³ண்ட³கே அத³ஸ்ஸனம் க³மேதி (பாரா. அட்ட². 1.138), ததோ அவஸேஸபி⁴க்கூ²ஸு க³தேஸு இதரோ ‘‘மய்ஹம், ப⁴ந்தே, த³ண்ட³கோ ந பஞ்ஞாயதீ’’தி, ‘‘மய்ஹம்பி, ஆவுஸோ, ந பஞ்ஞாயதீ’’தி, ‘‘கதமோ பன, ப⁴ந்தே, மய்ஹம் பா⁴கோ³’’தி. ‘‘அயம் துய்ஹம் பா⁴கோ³’’தி அத்தனோ பா⁴க³ம் த³ஸ்ஸேதி. தஸ்மிம் விவதி³த்வா வா அவிவதி³த்வா வா தம் க³ண்ஹித்வா க³தே இதரோ தஸ்ஸ பா⁴க³ம் உத்³த⁴ரதி, உத்³தா⁴ரே பாராஜிகம். ஸசேபி தேன ‘‘அஹம் மம பா⁴க³ம் துய்ஹம் ந தே³மி, த்வம் பன அத்தனோ பா⁴க³ம் ஞத்வா க³ண்ஹா’’தி வுத்தேபி ‘‘நாயம் மமா’’தி ஜானந்தோபி தஸ்ஸேவ பா⁴க³ம் க³ண்ஹாதி, உத்³தா⁴ரே பாராஜிகம். ஸசே பன இதரோ ‘‘அயம் துய்ஹம் பா⁴கோ³, அயம் மய்ஹம் பா⁴கோ³தி கிம் இமினா விவாதே³னா’’தி சிந்தேத்வா ‘‘மய்ஹம் வா பத்தோ ஹோது, தும்ஹாகம் வா, யோ வரபா⁴கோ³, தம் தும்ஹே க³ண்ஹதா²’’தி வத³தி, தி³ன்னகம் நாம க³ஹிதம் ஹோதி, நத்தே²த்த² அவஹாரோ. ஸசே ஸோ விவாத³பீ⁴ருகோ பி⁴க்கு² ‘‘யம் துய்ஹம் ருச்சதி, தம் க³ண்ஹா’’தி வுத்தோ அத்தனோ பத்தம் வரபா⁴க³ம் ட²பேத்வா லாமகம்யேவ க³ஹேத்வா க³ச்ச²தி, ததோ இதரஸ்ஸ விசினிதாவஸேஸம் க³ண்ஹந்தஸ்ஸாபி அவஹாரோ நத்தே²வ. ஏவமிமானி பஞ்ச பஞ்சகானி ஸமோதா⁴னேத்வா இமே பஞ்சவீஸதி அவஹாரா வேதி³தப்³பா³. நிட்டி²தோ ‘‘ஆதி³யேய்யா’’தி இமஸ்ஸ பத³ஸ்ஸ வினிச்ச²யோ. தேனாஹ ‘‘இதி யம் வுத்தம்…பே… யஸ்ஸத்தோ² பகாஸிதோ ஹோதீ’’தி.

ராஜானோதி கிஞ்சாபி அவிஸேஸேன வுத்தம், அபராதா⁴னுரூபம் பன சே²ஜ்ஜபே⁴ஜ்ஜானுஸாஸகோ பமாணபூ⁴தோவ இதா⁴தி⁴ப்பேதோதி ஆஹ ‘‘ராஜானோதி இத³ம் பி³ம்பி³ஸாரம்யேவ ஸந்தா⁴ய வுத்த’’ந்தி. ஸோ ஹி த⁴ம்மிகராஜத்தா யதா²பவேணியாவ கரோதி. அஞ்ஞே பன காகணிகமத்தஸ்ஸபி ஸீஸம் சி²ந்தே³ய்யும், ப³ஹுகஸ்ஸாபி ந வா கிஞ்சி கரேய்யும். தேனாஹ ‘‘அஞ்ஞே பனா’’திஆதி³. ஹனனம் நாம போத²னஞ்சேவ சே²த³னஞ்சாதி ஆஹ ‘‘ஹத்தா²தீ³ஹி வா’’திஆதி³. ஆதி³ஸத்³தே³ன பாத³கஸாவேத்தஅட்³ட⁴த³ண்ட³கானம் க³ஹணம். ரஜ்ஜுப³ந்த⁴னாதீ³ஹீதி ஆதி³ஸத்³தே³ன அந்து³ப³ந்த⁴னஸங்க²லிகாப³ந்த⁴னக⁴ரப³ந்த⁴னனக³ரப³ந்த⁴னபுரிஸகு³த்தீனம் க³ஹணம். நீஹரேய்யுந்தி ரட்ட²தோ நிக்கா²மேய்யும். சோரோஸி…பே… தே²னோஸீதி ஏத்த² ‘‘பரிபா⁴ஸேய்யு’’ந்தி பத³ம் அஜ்ஜா²ஹரிதப்³ப³ம் ஊனத்தா பத³ப்பயோக³ஸ்ஸ. தேனாஹ ‘‘இமேஹி வசனேஹி பரிபா⁴ஸேய்யு’’ந்தி. யதா²ரூபம் பன யஸ்மா பாத³தோ பட்டா²ய ஹோதி, தஸ்மா ‘‘பாத³ஸ்ஸ வா பாதா³ரஹஸ்ஸ வா’’தி ஆஹ. போராணகஸ்ஸ கஹாபணஸ்ஸ சதுத்தோ² பா⁴கோ³ பாதோ³, பாத³ம் அரஹதீதி பாதா³ரஹோ, தஸ்ஸ பாத³ஸ்ஸ வா பாதா³ரஹஸ்ஸ வா. ஏத்த² ச பாதே³ன கஹாபணஸ்ஸ சதுத்த²பா⁴க³ம் அகப்பியப⁴ண்ட³மேவ த³ஸ்ஸேதி, பாதா³ரஹேன பாத³க்³க⁴னகம் கப்பியப⁴ண்ட³ம். ஏத்தாவதா ஹேட்டி²மந்தத³ஸ்ஸனேன ஸப்³பா³காரேன து³தியபாராஜிகப்பஹோனகவத்து² த³ஸ்ஸிதம் ஹோதீதி த³ட்ட²ப்³ப³ம். போராணகஸ்ஸாதி (ஸாரத்த². டீ. 2.88; வி. வி. டீ. 1.88) போராணஸத்தா²னுரூபம் உப்பாதி³தஸ்ஸ லக்க²ணஸம்பன்னஸ்ஸ நீலகஹாபணஸதி³ஸஸ்ஸ கஹாபணஸ்ஸ. ஏதேன ருத்³ரதா³மகாதீ³னி படிக்கி²பதி.

ஏவம் அஸாதா⁴ரணவினிச்ச²யம் த³ஸ்ஸேத்வா இதா³னி ஸாதா⁴ரணவினிச்ச²யம் த³ஸ்ஸேதும் ‘‘ராஜக³ஹே’’திஆதி³மாஹ. ரஞ்ஞோதி பி³ம்பி³ஸாரரஞ்ஞோ. மாஸகோ நாம போராணகஸ்ஸ கஹாபணஸ்ஸ வீஸதிமோ பா⁴கோ³. யோ லோகே ‘‘மஞ்ஜேட்டீ²’’திபி வுச்சதி. இதா³னி இமஸ்மிம் அதி³ன்னாதா³னே வினிச்ச²யம் த³ஸ்ஸேதும் ‘‘ஸப்³ப³த்தா²’’திஆதி³ வுத்தம். ஸப்³ப³த்தா²தி ஊனமாஸகாதிரேகமாஸகபஞ்சமாஸகேஸு. பரிஹீனாபரிஹீனவஸேனாதி அக்³க⁴ஸ்ஸ பரிஹீனாபரிஹீனவஸேன. அயமேத்த² ஸங்கே²போ, வித்தா²ரோ பன ஏவம் வேதி³தப்³போ³ – இத³ஞ்ஹி அதி³ன்னாதா³னம் வினிச்சி²னந்தேன ஓதிண்ணே வத்து²ஸ்மிம் ஸஹஸா அவினிச்சி²னித்வா பஞ்ச டா²னானி ஓலோகேதப்³பா³னி. யானி ஸந்தா⁴ய போராணா ஆஹு –

‘‘வத்து²ம் காலஞ்ச தே³ஸஞ்ச, அக்³க⁴ம் பரிபோ⁴க³பஞ்சமம்;

துலயித்வா பஞ்சடா²னானி, தா⁴ரேய்யத்த²ம் விசக்க²ணோ’’தி. (பாரா. அட்ட². 1.92);

தத்த² ச வத்தூ²தி ப⁴ண்ட³ம். அவஹாரகேன ஹி ‘‘மயா இத³ம் நாம அவஹட’’ந்தி வுத்தேபி ஆபத்திம் அனாரோபேத்வாவ தம் ப⁴ண்ட³ம் ஸஸாமிகம் வா அஸாமிகம் வாதி உபபரிக்கி²தப்³ப³ம். ஸஸாமிகேபி ஸாமிகானம் ஸாலயபா⁴வோ வா நிராலயபா⁴வோ வா உபபரிக்கி²தப்³போ³. ஸசே தேஸம் ஸாலயகாலே அவஹடம், ப⁴ண்ட³ம் அக்³கா⁴பேத்வா ஆபத்தி காரேதப்³பா³. ஸசே நிராலயகாலே, ந பாராஜிகேன காரேதப்³போ³. ப⁴ண்ட³ஸாமிகேஸு பன ப⁴ண்ட³ம் ஆஹராபேந்தேஸு ப⁴ண்ட³ம் தா³தப்³ப³ம். அயமேத்த² ஸாமீசி. ஏவம் வத்து² ஓலோகேதப்³ப³ம்.

காலோதி அவஹாரகாலோ. ததே³வ ஹி ப⁴ண்ட³ம் கதா³சி ஸமக்³க⁴ம் ஹோதி, கதா³சி மஹக்³க⁴ம். தஸ்மா தம் ப⁴ண்ட³ம் யஸ்மிம் காலே அவஹடம், தஸ்மிம்யேவ காலே யோ தஸ்ஸ அக்³கோ⁴, தேன அக்³கே⁴ன ஆபத்தி காரேதப்³பா³. ஏவம் காலோ ஓலோகேதப்³போ³.

தே³ஸோதி அவஹாரதே³ஸோ. தஞ்ஹி ப⁴ண்ட³ம் யஸ்மிம் தே³ஸே அவஹடம், தஸ்மிம்யேவ தே³ஸே யோ தஸ்ஸ அக்³கோ⁴, தேன அக்³கே⁴ன ஆபத்தி காரேதப்³பா³. ப⁴ண்டு³ட்டா²னதே³ஸே ஹி ப⁴ண்ட³ம் ஸமக்³க⁴ம் ஹோதி, அஞ்ஞத்த² மஹக்³க⁴ம். ஏவம் தே³ஸோ ஓலோகேதப்³போ³.

அக்³கோ⁴தி (பாரா. அட்ட². 1.92) ப⁴ண்ட³க்³கோ⁴. நவப⁴ண்ட³ஸ்ஸ ஹி யோ அக்³கோ⁴, ஸோ பச்சா² பரிஹாயதி. யதா² நவதோ⁴தோ பத்தோ அட்ட² வா த³ஸ வா அக்³க⁴தி, ஸோ பச்சா² பி⁴ன்னோ வா சி²த்³தோ³ வா ஆணிக³ண்டி²காஹதோ வா அப்பக்³கோ⁴ ஹோதி, தஸ்மா ந ஸப்³ப³தா³ ப⁴ண்ட³ம் பகதிஅக்³கே⁴னேவ காதப்³ப³ந்தி. ஏவம் அக்³கோ⁴ ஓலோகேதப்³போ³.

பரிபோ⁴கோ³தி ப⁴ண்ட³ஸ்ஸ பரிபோ⁴கோ³. பரிபோ⁴கே³னாபி ஹி வாஸிஆதி³ப⁴ண்ட³ஸ்ஸ அக்³கோ⁴ பரிஹாயதி, தஸ்மா ஏவம் உபபரிக்கி²தப்³ப³ம் – ஸசே கோசி கஸ்ஸசி பாத³க்³க⁴னகம் வாஸிம் ஹரதி, தத்ர வாஸிஸாமிகோ புச்சி²தப்³போ³ ‘‘தயா அயம் வாஸி கித்தகேன கீதா’’தி. ‘‘பாதே³ன, ப⁴ந்தே’’தி. ‘‘கிம் பன தே கிணித்வாவ ட²பிதா, உதா³ஹு தம் வலஞ்ஜேஸீ’’தி? ஸசே வத³தி ‘‘ஏகதி³வஸம் மே த³ந்தகட்ட²ம் வா ரஜனச²ல்லி வா பத்தபசனதா³ரு வா சி²ன்னம், க⁴ம்ஸித்வா வா நிஸிதா’’தி. அத²ஸ்ஸ போராணோ அக்³கோ⁴ ப⁴ட்டோ²தி வேதி³தப்³போ³. யதா² ச வாஸியா, ஏவம் அஞ்ஜனியா வா அஞ்ஜனிஸலாகாய வா குஞ்சிகாய வா பலாலேன வா து²ஸேஹி வா இட்ட²கசுண்ணேன வா ஏகவாரம் க⁴ம்ஸித்வா தோ⁴வனமத்தேனாபி அக்³கோ⁴ ப⁴ஸ்ஸதி. திபுமண்ட³லஸ்ஸ மகரத³ந்தச்சே²த³னேனாபி பரிமத்³த³னமத்தேனாபி, உத³கஸாடிகாய ஸகிம் நிவாஸனபாருபனேனாபி, பரிபோ⁴க³ஸீஸேன அம்ஸே வா ஸீஸே வா ட²பனமத்தேனாபி, தண்டு³லாதீ³னம் பப்போ²டனேனாபி ததோ ஏகம் வா த்³வே வா அபனயனேனபி, அந்தமஸோ ஏகம் பாஸாணஸக்க²ரம் உத்³த⁴ரித்வா ச²ட்³டி³தமத்தேனாபி, ஸப்பிதேலாதீ³னம் பா⁴ஜனந்தரபரிவத்தனேனபி, அந்தமஸோ ததோ மக்கி²கம் வா கிபில்லிகம் வா உத்³த⁴ரித்வா ச²ட்³டி³தமத்தேனபி, கு³ளபிண்ட³கஸ்ஸ மது⁴ரபா⁴வஜானனத்த²ம் நகே²ன விஜ்ஜி²த்வா அணுமத்தம் க³ஹிதமத்தேனபி அக்³கோ⁴ ப⁴ஸ்ஸதி. தஸ்மா யம் கிஞ்சி பாத³க்³க⁴னகம் வுத்தனயேனேவ ஸாமிகேன பரிபோ⁴கே³ன ஊனம் கதம் ஹோதி, ந தம் அவஹாரகோ பி⁴க்கு² பாராஜிகேன காரேதப்³போ³தி. ஏவம் பரிபோ⁴கோ³ ஓலோகேதப்³போ³.

ஏவம் இமானி துலயித்வா பஞ்ச டா²னானி தா⁴ரேய்ய அத்த²ம் விசக்க²ணோ ஆபத்திம் வா அனாபத்திம் வா க³ருகம் வா லஹுகம் வா ஆபத்திம் யதா²டா²னே ட²பேய்யாதி.

ஏவம் தத்த² வினிச்ச²யம் த³ஸ்ஸேத்வா இதா³னி அனாபத்திம் த³ஸ்ஸேந்தோ ‘‘ஸகஸஞ்ஞிஸ்ஸா’’திஆதி³மாஹ. தத்த² ஸகஸஞ்ஞிஸ்ஸாதி ‘‘மய்ஹம் ஸந்தகம் இத³ம் ப⁴ண்ட³’’ந்தி ஏவம் ஸகஸஞ்ஞிஸ்ஸ பரப⁴ண்ட³ம்பி க³ண்ஹதோ க³ஹணே அனாபத்தி, க³ஹிதம் பன புன தா³தப்³ப³ம். ஸசே ஸாமிகேஹி ‘‘தே³ஹீ’’தி வுத்தோ ந தே³தி, தேஸம் து⁴ரனிக்கே²பே பாராஜிகம். விஸ்ஸாஸக்³கா³ஹேதி (பாரா. அட்ட². 1.131) விஸ்ஸாஸக்³க³ஹணேபி அனாபத்தி. விஸ்ஸாஸக்³கா³ஹலக்க²ணம் பன இமினா ஸுத்தேன ஜானிதப்³ப³ம் –

‘‘அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ விஸ்ஸாஸம் க³ஹேதும், ஸந்தி³ட்டோ² ச ஹோதி, ஸம்ப⁴த்தோ ச ஆலபிதோ ச ஜீவதி ச ஜானாதி ச ‘க³ஹிதே மே அத்தமனோ’’’தி (மஹாவ. 356).

தத்த² ஸந்தி³ட்டோ²தி தி³ட்ட²மத்தகமித்தோ. ஸம்ப⁴த்தோதி த³ள்ஹமித்தோ. ஆலபிதோதி ‘‘மம ஸந்தகம் யம் இச்ச²ஸி, தம் க³ண்ஹேய்யாஸி, ஆபுச்சி²த்வா க³ஹணே காரணம் நத்தீ²’’தி வுத்தோ. ஜீவதீதி அனுட்டா²னஸேய்யாய ஸயிதோபி யாவ ஜீவிதிந்த்³ரியுபச்சே²த³ம் ந பாபுணாதி. க³ஹிதே ச அத்தமனோதி க³ஹிதே துட்ட²சித்தோ. ஏவரூபஸ்ஸ ஸந்தகம் ‘‘க³ஹிதே மே அத்தமனோ ப⁴விஸ்ஸதீ’’தி ஜானந்தேன க³ஹேதும் வட்டதி. அனவஸேஸபரியாதா³னவஸேன சேதானி பஞ்சங்கா³னி வுத்தானி. விஸ்ஸாஸக்³கா³ஹோ பன தீஹி அங்கே³ஹி ருஹதி. கத²ம்? ஸந்தி³ட்டோ², ஜீவதி, க³ஹிதே அத்தமனோ, ஸம்ப⁴த்தோ, ஜீவதி, க³ஹிதே அத்தமனோ, ஆலபிதோ, ஜீவதி, க³ஹிதே அத்தமனோதி ஏவம்.

யோ பன ஜீவதி, ந ச க³ஹிதே அத்தமனோ ஹோதி, தஸ்ஸ ஸந்தகம் விஸ்ஸாஸபா⁴வேன க³ஹிதம்பி புன தா³தப்³ப³ம். த³த³ந்தேன ச மதகத⁴னம் தாவ யே தஸ்ஸ த⁴னே இஸ்ஸரா க³ஹட்டா² வா பப்³ப³ஜிதா வா, தேஸம் தா³தப்³ப³ம். அனத்தமனஸ்ஸ ஸந்தகம் தஸ்ஸேவ தா³தப்³ப³ம். யோ பன பட²மம்யேவ ‘‘ஸுட்டு² கதம் தயா மம ஸந்தகம் க³ண்ஹந்தேனா’’தி வசீபே⁴தே³ன வா சித்துப்பாத³மத்தேன வா அனுமோதி³த்வா பச்சா² கேனசி காரணேன குபிதோ, ஸோ பச்சாஹராபேதும் ந லப⁴தி. யோ ச அதா³துகாமோ, சித்தேன பன அதி⁴வாஸேதி, ந கிஞ்சி வத³தி, ஸோபி புன பச்சாஹராபேதும் ந லப⁴தி. யோ பன ‘‘மயா தும்ஹாகம் ஸந்தகம் க³ஹித’’ந்தி வா ‘‘பரிபு⁴த்த’’ந்தி வா வுத்தோ க³ஹிதம் வா ஹோது, பரிபு⁴த்தம் வா, ‘‘மயா பன தம் கேனசிதே³வ கரணீயேன ட²பிதம், பாகதிகம் காதும் வட்டதீ’’தி வத³தி, அயம் பச்சாஹராபேதும் லப⁴தி.

தாவகாலிகேதி ‘‘படித³ஸ்ஸாமி படிகரிஸ்ஸாமீ’’தி ஏவம் க³ண்ஹந்தஸ்ஸ தாவகாலிகேபி க³ஹணே அனாபத்தி. க³ஹிதம் பன ஸசே ப⁴ண்ட³ஸாமிகோ புக்³க³லோ வா க³ணோ வா ‘‘துய்ஹேவேதம் ஹோதூ’’தி அனுஜானாதி, இச்சேதம் குஸலம். நோ சே அனுஜானாதி, ஆஹராபேந்தே தா³தப்³ப³ம். ஸங்க⁴ஸந்தகம் பன படிதா³துமேவ வட்டதி.

பேதபரிக்³க³ஹேதி ஏத்த² பன பேத்திவிஸயே உபபன்னாபி, காலம் கத்வா தஸ்மிம்யேவ அத்தபா⁴வே நிப்³ப³த்தாபி, சாதுமஹாராஜிகாத³யோ தே³வாபி ஸப்³பே³ ‘‘பேதா’’த்வேவ ஸங்க்²யம் க³தா, தேஸம் பரிக்³க³ஹே அனாபத்தி. தே³வதாய பன உத்³தி³ஸ்ஸ ப³லிகம்மம் கரோந்தேஹி ருக்கா²தீ³ஸு லக்³கி³தஸாடகே வத்தப்³ப³மேவ நத்தி². தஞ்ச கோ² ஆரக்க²கேஹி அபரிக்³க³ஹிதே, பரிக்³க³ஹிதம் பன க³ஹேதும் ந வட்டதி (ஸாரத்த². டீ. 2.131).

திரச்சா²னக³தபரிக்³க³ஹேதி நாக³ஸுபண்ணாதீ³னம் திரச்சா²னக³தானம் பரிக்³க³ஹே. ஸசேபி ஹி தே³வோ வா நாக³ஸுபண்ணோ வா மனுஸ்ஸரூபேன ஆபணம் பஸாரேதி, ததோ சஸ்ஸ ஸந்தகம் கோசி தி³ப்³ப³சக்கு²கோ பி⁴க்கு² தம் ஞத்வா க³ஹேத்வா க³ச்ச²தி, வட்டதி.

பம்ஸுகூலஸஞ்ஞிஸ்ஸாதி ‘‘அஸாமிகம் இத³ம் பம்ஸுகூல’’ந்தி ஏவஸஞ்ஞிஸ்ஸாபி க³ஹணே அனாபத்தி. ஸசே பன தம் ஸஸாமிகம் ஹோதி, ஆஹராபேந்தே தா³தப்³ப³ம். உம்மத்தகாதீ³னி புப்³பே³ வுத்தப்பகாரானேவ. ஆதி³கம்மிகோ பனேத்த² த⁴னியோ. அவஸேஸானம் பன ரஜகப⁴ண்டி³காதி³சோரானம் ச²ப்³ப³க்³கி³யாதீ³னம் ஆபத்தியேவ.

ஸசித்தகேஹி தீஹி ஸமுட்டா²னேஹி இத³ம் ஸமுட்டா²தீதி ஆஹ ‘‘அதி³ன்னாதா³னஸமுட்டா²ன’’ந்தி. ததா² ஹி ஸாஹத்தி²கம் காயசித்ததோ ஸமுட்டா²தி. ஆணத்திகம் வாசாசித்ததோ ஸமுட்டா²தி. ஸாஹத்திகாணத்திகம் காயவாசாசித்ததோ ஸமுட்டா²தி, தஞ்ச கோ² ‘‘பா⁴ரியமித³ம், த்வம் ஏகபஸ்ஸம் க³ண்ஹ, அஹம் ஏகபஸ்ஸ’’ந்தி ஸம்விதா⁴ய உப⁴யேஸம் பயோகே³ன ஏகஸ்ஸ வத்து²னோ டா²னாசாவனே லப்³ப⁴தி. ‘‘காயவசீகம்ம’’ந்தி அவசனம் பன காயவாசானம் ஈதி³ஸே டா²னே அங்க³மத்தத்தா. யாய பன சேதனாய ஸமுட்டா²பிதோ பயோகோ³ ஸாஹத்தி²கோ வா ஆணத்திகோ வா பதா⁴னபா⁴வேன டா²னாசாவனம் ஸாதே⁴தி, தஸ்ஸா வஸேன ஆபத்தி காரேதப்³பா³. அஞ்ஞதா² ஸாஹத்தி²கம் வா ஆணத்திகஸ்ஸ அங்க³ம் ந ஹோதி, ஆணத்திகம் வா ஸாஹத்தி²கஸ்ஸாதி இத³ம் விருஜ்ஜ²தி. ‘‘அதி³ன்னம் ஆதி³யாமீ’’தி ஸஞ்ஞாய அபா⁴வேன முச்சனதோ ஸஞ்ஞாவிமோக்க²ம். காயேன கதம் கம்மம் காயகம்மம், காயத்³வாரேன கதந்தி அத்தோ². வசீகம்மந்தி ஏத்தா²பி ஏஸேவ நயோ. துட்டோ² வா பீ⁴தோ வா மஜ்ஜ²த்தோ வா நம் ஆபஜ்ஜதீதி திவேத³னம். ஸேஸம் பட²மஸிக்கா²பதே³ வுத்தனயேனேவ வேதி³தப்³ப³ம்.

து³தியபாராஜிகவண்ணனா நிட்டி²தா.