5. உப்³ப⁴ஜாணுமண்ட³லஸிக்கா²பத³வண்ணனா

உப்³ப⁴கப்பரந்தி து³தியமஹாஸந்தி⁴தோ உத்³த⁴ம். இதோ சிதோ ச ஸஞ்சரணந்தி ஹத்த²ஸ்ஸ வா காயஸ்ஸ வா திரியம் இதோ சிதோ ச ஸஞ்சரணம்.

ஏகதோஅவஸ்ஸுதேதி (பாசி. அட்ட². 662) பி⁴க்கு²னியா அவஸ்ஸவே, பி⁴க்கு²னியா காயஸம்ஸக்³க³ராகே³ன அவஸ்ஸுதபா⁴வே ஸதீதி அத்தோ². பி⁴க்கு²னியா வஸேனேவ ச ஏகதோஅவஸ்ஸுதபா⁴வோ க³ஹேதப்³போ³. வுத்தஞ்ஹேதம் ஸமந்தபாஸாதி³காயம் (பாசி. அட்ட². 662) –

‘‘ஏகதோஅவஸ்ஸுதேதி ஏத்த² கிஞ்சாபி ‘ஏகதோ’தி அவிஸேஸேன வுத்தம், ததா²பி பி⁴க்கு²னியா ஏவ அவஸ்ஸுதே ஸதி அயம் ஆபத்திபே⁴தோ³ வுத்தோதி வேதி³தப்³போ³’’தி.

புரிஸஸ்ஸ காயந்தி புரிஸஸ்ஸ யம் கஞ்சி காயம். உப⁴தோஅவஸ்ஸுதேபீதி பி⁴க்கு²னியா சேவ புரிஸஸ்ஸ ச காயஸம்ஸக்³க³ராகே³ன அவஸ்ஸுதபா⁴வே ஸதிபி. காயேனாதி யதா²பரிச்சி²ன்னேன அத்தனோ காயேன. காயப்படிப³த்³த⁴ந்தி புரிஸஸ்ஸ காயப்படிப³த்³த⁴ம். அவஸேஸகாயேன வாதி யதா²பரிச்சி²ன்னகாயதோ அவஸேஸேன காயேன, உப்³ப⁴க்க²கஅதோ⁴ஜாணுமண்ட³லஅதோ⁴கப்பரஸங்கா²தேன காயேனாதி வுத்தம் ஹோதி. தஸ்ஸ காயந்தி அவஸ்ஸுதஸ்ஸ தஸ்ஸ புரிஸஸ்ஸ யம் கஞ்சி காயம். யதா² சேத்த² ஸயம் ஆமஸந்தியா து²ல்லச்சயம், ஏவம் தஸ்ஸ ஆமஸனம் ஸாதி³யந்தியாபீதி த³ட்ட²ப்³ப³ம். புரிஸஸ்ஸ காயஸம்ஸக்³க³ராகோ³ நத்தீ²தி புரிஸஸ்ஸ மேது²னராகோ³, கே³ஹஸிதபேமம், ஸுத்³த⁴சித்தம் வா. அவஸேஸேதி பாராஜிககே²த்ததோ அவஸேஸே. காயப்படிப³த்³தே⁴ன காயப்படிப³த்³தா⁴தி³பே⁴தே³தி ‘‘காயப்படிப³த்³தே⁴ன காயப்படிப³த்³த⁴ம் ஆமஸதி, ஆபத்தி து³க்கடஸ்ஸா’’திஆதி³கே (பாசி. 659, 662) ஸப்³ப³வாரே. ‘‘அஸஞ்சிச்சா’’திஆதீ³ஸு விரஜ்ஜி²த்வா வா ஆமஸந்தியா, அஞ்ஞவிஹிதாய வா, ‘‘அயம் புரிஸோ’’தி வா ‘‘இத்தீ²’’தி வா அஜானந்தியா வா, தேன பு²ட்டா²யபி தம் ப²ஸ்ஸம் அஸ்ஸாத³யந்தியா வா ஆமஸனேபி ஸதி அனாபத்தி.

உப்³ப⁴ஜாணுமண்ட³லஸிக்கா²பத³வண்ணனா நிட்டி²தா.