அஸாதா⁴ரணபாராஜிகம்

5. உப்³ப⁴ஜாணுமண்ட³லஸிக்கா²பத³வண்ணனா

உப்³ப⁴கப்பரந்தி து³தியமஹாஸந்தி⁴தோ உத்³த⁴ம். இதோ சிதோ ச ஸஞ்சரணந்தி ஹத்த²ஸ்ஸ வா காயஸ்ஸ வா திரியம் இதோ சிதோ ச ஸஞ்சரணம்.

ஏகதோஅவஸ்ஸுதேதி (பாசி. அட்ட². 662) பி⁴க்கு²னியா அவஸ்ஸவே, பி⁴க்கு²னியா காயஸம்ஸக்³க³ராகே³ன அவஸ்ஸுதபா⁴வே ஸதீதி அத்தோ². பி⁴க்கு²னியா வஸேனேவ ச ஏகதோஅவஸ்ஸுதபா⁴வோ க³ஹேதப்³போ³. வுத்தஞ்ஹேதம் ஸமந்தபாஸாதி³காயம் (பாசி. அட்ட². 662) –

‘‘ஏகதோஅவஸ்ஸுதேதி ஏத்த² கிஞ்சாபி ‘ஏகதோ’தி அவிஸேஸேன வுத்தம், ததா²பி பி⁴க்கு²னியா ஏவ அவஸ்ஸுதே ஸதி அயம் ஆபத்திபே⁴தோ³ வுத்தோதி வேதி³தப்³போ³’’தி.

புரிஸஸ்ஸ காயந்தி புரிஸஸ்ஸ யம் கஞ்சி காயம். உப⁴தோஅவஸ்ஸுதேபீதி பி⁴க்கு²னியா சேவ புரிஸஸ்ஸ ச காயஸம்ஸக்³க³ராகே³ன அவஸ்ஸுதபா⁴வே ஸதிபி. காயேனாதி யதா²பரிச்சி²ன்னேன அத்தனோ காயேன. காயப்படிப³த்³த⁴ந்தி புரிஸஸ்ஸ காயப்படிப³த்³த⁴ம். அவஸேஸகாயேன வாதி யதா²பரிச்சி²ன்னகாயதோ அவஸேஸேன காயேன, உப்³ப⁴க்க²கஅதோ⁴ஜாணுமண்ட³லஅதோ⁴கப்பரஸங்கா²தேன காயேனாதி வுத்தம் ஹோதி. தஸ்ஸ காயந்தி அவஸ்ஸுதஸ்ஸ தஸ்ஸ புரிஸஸ்ஸ யம் கஞ்சி காயம். யதா² சேத்த² ஸயம் ஆமஸந்தியா து²ல்லச்சயம், ஏவம் தஸ்ஸ ஆமஸனம் ஸாதி³யந்தியாபீதி த³ட்ட²ப்³ப³ம். புரிஸஸ்ஸ காயஸம்ஸக்³க³ராகோ³ நத்தீ²தி புரிஸஸ்ஸ மேது²னராகோ³, கே³ஹஸிதபேமம், ஸுத்³த⁴சித்தம் வா. அவஸேஸேதி பாராஜிககே²த்ததோ அவஸேஸே. காயப்படிப³த்³தே⁴ன காயப்படிப³த்³தா⁴தி³பே⁴தே³தி ‘‘காயப்படிப³த்³தே⁴ன காயப்படிப³த்³த⁴ம் ஆமஸதி, ஆபத்தி து³க்கடஸ்ஸா’’திஆதி³கே (பாசி. 659, 662) ஸப்³ப³வாரே. ‘‘அஸஞ்சிச்சா’’திஆதீ³ஸு விரஜ்ஜி²த்வா வா ஆமஸந்தியா, அஞ்ஞவிஹிதாய வா, ‘‘அயம் புரிஸோ’’தி வா ‘‘இத்தீ²’’தி வா அஜானந்தியா வா, தேன பு²ட்டா²யபி தம் ப²ஸ்ஸம் அஸ்ஸாத³யந்தியா வா ஆமஸனேபி ஸதி அனாபத்தி.

உப்³ப⁴ஜாணுமண்ட³லஸிக்கா²பத³வண்ணனா நிட்டி²தா.

6. வஜ்ஜப்படிச்சா²தி³காஸிக்கா²பத³வண்ணனா

பாராஜிகம் த⁴ம்மம் அஜ்ஜா²பன்னந்தி பி⁴க்கூ²ஹி ஸாதா⁴ரணானம் சதுன்னம், அஸாதா⁴ரணானம் சதுன்னஞ்சாதி அட்ட²ன்னமஞ்ஞதரம் அஜ்ஜா²பன்னம். இத³ஞ்ச பாராஜிகம் (பாசி. அட்ட². 666) பச்சா² பஞ்ஞத்தம், ஸங்கீ³திகாரகாசரியேஹி பன புரிமேன ஸத்³தி⁴ம் யுக³ளம் கத்வா இமஸ்மிம் ஓகாஸே ட²பிதந்தி வேதி³தப்³ப³ம். ‘‘அட்ட²ன்னம் பாராஜிகானம் அஞ்ஞதர’’ந்தி (பாசி. 666) வசனதோ பன வஜ்ஜப்படிச்சா²தி³கம் யா படிச்சா²தே³தி, ஸாபி வஜ்ஜப்படிச்சா²தி³கா ஏவாதி த³ட்ட²ப்³ப³ம். கிஞ்சாபி வஜ்ஜப்படிச்சா²த³னம் பேமவஸேன ஹோதி, ததா²பி ஸிக்கா²பத³வீதிக்கமசித்தம் தோ³மனஸ்ஸமேவ ஹோதீதி கத்வா து³க்க²வேத³னம் ஹோதீதி ‘‘தத்ர ஹி பாசித்தியம்…பே… ஸேஸம் தாதி³ஸமேவா’’தி வுத்தம்.

வஜ்ஜப்படிச்சா²தி³காஸிக்கா²பத³வண்ணனா நிட்டி²தா.

7. உக்கி²த்தானுவத்திகாஸிக்கா²பத³வண்ணனா

ஸத்து²ஸாஸனேனாதி ஞத்திஸம்பதா³ய சேவ அனுஸ்ஸாவனஸம்பதா³ய ச. இத⁴ பன சோத³னாஸாரணாபுப்³ப³கமேவ ஞத்திஅனுஸ்ஸாவனம் ஸத்து²ஸாஸனந்தி ஆஹ ‘‘இதா⁴பீ’’திஆதி³. கரணந்தி ஞத்திட்ட²பனஞ்சேவ அனுஸ்ஸாவனாவசனஞ்ச. அனாத³ரந்தி புக்³க³லே சேவ த⁴ம்மே ச ஆத³ரவிரஹிதம். தேனாஹ ‘‘யேனா’’திஆதி³. தத்த² பரியாபன்னக³ணே வாதி தஸ்மிம் ஸங்கே⁴ பரியாபன்னே ஸம்ப³ஹுலபுக்³க³லஸங்கா²தே க³ணே வா. ‘‘ஸம்மாவத்தனாய அவத்தமானந்தி அத்தோ²’’தி இமினா அதி⁴ப்பாயத்தோ² வுத்தோ. ஏககம்மாதி³கேதி ஏககம்மஏகுத்³தே³ஸஸமஸிக்கா²தாய. ஸஹ அயனபா⁴வேனாதி ஸஹ வத்தனபா⁴வேன. ஸமானோ ஸம்வாஸோ ஏதேஸந்தி ஸமானஸம்வாஸகா.

இதா³னி யேன ஸம்வாஸேன தே ‘‘ஸமானஸம்வாஸகா’’தி (பாசி. அட்ட². 669) வுத்தா, ஸோ ஸம்வாஸோ தஸ்ஸ உக்கி²த்தகஸ்ஸ தேஹி ஸத்³தி⁴ம் நத்தி², யேஹி ச ஸத்³தி⁴ம் தஸ்ஸ ஸோ ஸம்வாஸோ நத்தி², ந தேன தே பி⁴க்கூ² அத்தனோ ஸஹாயா கதா ஹோந்தி, தஸ்மா ஸோ அகதஸஹாயோ நாமாதி இமமத்த²ம் த³ஸ்ஸேதும் ‘‘யஸ்ஸ பனா’’திஆதி³ வுத்தம். ஏவம் பத³வண்ணனம் கத்வா இதா³னி அத்த²மத்தம் த³ஸ்ஸேதும் ‘‘ஸமானஸம்வாஸகபா⁴வம் அனுபக³தந்தி அத்தோ²’’தி வுத்தம். கிம் தம் அனுவத்தனந்தி கஸ்ஸசி ஆஸங்கா ஸியாதி தம் ஸரூபதோ த³ஸ்ஸேந்தோ ‘‘யம்தி³ட்டி²கோ ஸோ ஹோதீ’’திஆதி³மாஹ. தத்த² ஸோதி யோ உக்கி²த்தகோ, ஸோ.

உக்கி²த்தானுவத்திகாஸிக்கா²பத³வண்ணனா நிட்டி²தா.

8. அட்ட²வத்து²காஸிக்கா²பத³வண்ணனா

லோகஸ்ஸாத³மித்தஸந்த²வவஸேனாதி (ஸாரத்த². டீ. பாசித்திய 3.675) லோகஸ்ஸாத³ஸங்கா²தஸ்ஸ மித்தஸந்த²வஸ்ஸ வஸேன. கிம் தந்தி ஆஹ ‘‘காயஸம்ஸக்³க³ராகே³னா’’தி. காயஸம்ஸக்³க³ராகே³னேவ திந்தா இத⁴ அவஸ்ஸுதா நாம, ந மேது²னராகே³னாதி. கத²மேதம் விஞ்ஞாயதீதி ஆஹ ‘‘அயமேவ ஹீ’’திஆதி³. கிம் பனேத்த² காரணந்தி ஆஹ ‘‘ஸமந்தபாஸாதி³காயம் பனஸ்ஸ விசாரணா கதா’’தி. தத்தா²யம் விசாரணா – ஏத்த² ச அஸத்³த⁴ம்மோதி காயஸம்ஸக்³கோ³வ வேதி³தப்³போ³, ந மேது²னத⁴ம்மோ. ந ஹி மேது²னஸ்ஸ ஸாமந்தா து²ல்லச்சயம் ஹோதி. ‘‘விஞ்ஞூ படிப³லோ காயஸம்ஸக்³க³ம் ஸமாபஜ்ஜிது’’ந்தி (பாசி. 676) வசனம்பி சேத்த² ஸாத⁴கந்தி. யம் யேன கதம், தம் தஸ்ஸேவ ஹோதீதி. புரிஸபுக்³க³லஸ்ஸாதி ஸாமிவசனந்தி த³ஸ்ஸேதும் ‘‘யம் புரிஸபுக்³க³லேனா’’திஆதி³ வுத்தம். தத்த² ஹத்தோ²தி அத்தனோ ஹத்தோ². ந கேவலஞ்சேத்த² ஹத்த²க்³க³ஹணந்தி ‘‘ஹத்தோ² நாம கப்பரம் உபாதா³ய யாவ அக்³க³னகா²’’தி (பாசி. 676) வுத்தஸ்ஸ ஹத்த²ஸ்ஸேவ க³ஹணம், அத² கோ² தஸ்ஸ ச அஞ்ஞஸ்ஸபி அபாராஜிககே²த்தஸ்ஸ க³ஹணம் ஏகஜ்ஜ²ம் கத்வா ‘‘ஹத்த²க்³க³ஹண’’ந்தி வுத்தம். ததா² ஸங்கா⁴டிகண்ணக்³க³ஹணந்தி ந கேவலம் ஸங்கா⁴டிகண்ணஸ்ஸேவ க³ஹணம், அத² கோ² தஸ்ஸ ச அஞ்ஞஸ்ஸபி யஸ்ஸ கஸ்ஸசி சீவரப்பதே³ஸஸ்ஸ க³ஹணம் வுத்தந்தி த³ஸ்ஸேதும் ‘‘ஏத்த² ச யஸ்ஸ கஸ்ஸசீ’’திஆதி³ வுத்தம். இத்த²ன்னாமம் டா²னந்தி ஏவம்னாமகம் டா²னம். ‘‘படிபாடியா வா உப்படிபாடியா வா பூரேத்வா’’தி இத³ம் நித³ஸ்ஸனமத்தம். தஸ்மா படிபாடியா வா உப்படிபாடியா வா ஏகந்தரிகாய வா யேன தேன நயேன பூரேத்வாதி அத்தோ².

தா ஆபத்தியோதி தா ஆபன்னா ஆபத்தியோ. யதா² சேகேகஸ்மிம் வத்து²ஸ்மிம் ஏவம் விஸும் விஸும் ஸத்தஸு வத்தூ²ஸு ஸதக்க²த்தும்பி வீதிக்கந்தேஸு தா ஆபத்தியோ தே³ஸேத்வா முச்சதி. க³ணனூபிகாதி தே³ஸிதக³ணனம் உபக³ச்ச²தி. து⁴ரனிக்கே²பம் கத்வாதி ‘‘அஞ்ஞம் வத்து²ம் ஆபஜ்ஜிஸ்ஸாமீ’’தி உஸ்ஸாஹம் ட²பேத்வா.

அட்ட²வத்து²காஸிக்கா²பத³வண்ணனா நிட்டி²தா.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

பி⁴க்கு²னிபாதிமோக்கே² பாராஜிகவண்ணனா நிட்டி²தா.