ஸங்கா⁴தி³ஸேஸகண்ட³ம்

1. உஸ்ஸயவாதி³காஸிக்கா²பத³வண்ணனா

மானுஸ்ஸயவஸேன கோதூ⁴ஸ்ஸயவஸேனாதி பா³ஹுல்லனயேன வுத்தம். தேனேவ வக்க²தி ‘‘திசித்தம் திவேத³ன’’ந்தி. அட்³ட³கரணத்தா²யாதி ஏத்த² அட்³டோ³தி வோஹாரிகவினிச்ச²யோ வுச்சதி. யம் பப்³ப³ஜிதா ‘‘அதி⁴கரண’’ந்திபி வத³ந்தி, தஸ்ஸ கரணத்தா²ய வோஹாரிகவினிச்ச²யத்தா²யாதி வுத்தம் ஹோதி. வீதிக்கமக்க²ணேயேவாதி வத்து²ஜ்ஜா²சாரக்க²ணேயேவ, ந ததியாய ஸமனுபா⁴ஸனாயாதி அதி⁴ப்பாயோ. பி⁴க்கு²னிம் ஸங்க⁴தோ நிஸ்ஸாரேதீதி ஆபன்னம் பி⁴க்கு²னிம் பி⁴க்கு²னிஸங்க⁴ம்ஹா நிஸ்ஸாரேதி. ஹேதும்ஹி சாயம் கத்துவோஹாரோ ‘‘நிஸ்ஸாரணஹேதுபூ⁴தத⁴ம்மோ ‘நிஸ்ஸாரணீயோ’தி வுத்தோ’’தி கத்வா.

யத்த² டி²தாயாதி உபஸ்ஸயபி⁴க்கா²சாரமக்³கா³தீ³ஸு யஸ்மிம் டா²னே டி²தாய. ததோ பட்டா²ய க³ச்ச²ந்தியாதி ததோ பட்டா²ய வோஹாரிகானம் ஸந்திகம் க³ச்ச²ந்தியா. து³தியேதி து³தியாரோசனே. தேனாதி உபாஸகேன. ஏவம் வுத்தாயாதி ‘‘மம ச தவ ச கத²ம் த்வம்யேவ ஆரோசேஹீ’’தி வுத்தாய. அஞ்ஞேன கதா²பேதீதி கப்பியகாரகேன கதா²பேதி. யதா² வா ததா² வா ஹி ஆரோசியமானேதி கப்பியகாரகோ வா பி⁴க்கு²னியா கத²ம் பட²மம் ஆரோசேது, இதரோ வா அத்தனோ கத²ம் (பாசி. அட்ட². 679). கப்பியகாரகோ வா உபி⁴ன்னம்பி கத²ம், இதரோ வா உபி⁴ன்னம்பி கத²ம் ஆரோசேதூதி ஏவம் யதா² ததா² ஆரோசியமானே. உபி⁴ன்னம்பி பன கத²ம் ஸுத்வாதி யதா² ததா² வா ஆரோசிதம் பன உபி⁴ன்னம்பி கத²ம் ஸுத்வா.

ஆகட்³டி⁴யமானா க³ச்ச²தீதி வுச்சமானா வோஹாரிகானம் ஸந்திகம் க³ச்ச²தி, இமஸ்ஸ ‘‘தஸ்ஸா அனாபத்தீ’’தி இமினா ஸம்ப³ந்தோ⁴. ஏவம் ஸேஸேஸுபி. ரக்க²ம் யாசதீதி த⁴ம்மிகம் ரக்க²ம் யாசதி. இதா³னி யதா² யாசிதா ரக்கா² த⁴ம்மிகா ஹோதி, தம் த³ஸ்ஸேதும் ‘‘உபஸ்ஸயே அஞ்ஞேஹி கதம் அனாசாரம் அனோதி³ஸ்ஸ ஆசிக்க²ந்தீ’’தி வுத்தம். தத்த² அதீதம் ஆரப்³ப⁴ அத்தி² ஓதி³ஸ்ஸ ஆசிக்க²னா (பாசி. அட்ட². 679), அத்தி² அனோதி³ஸ்ஸ ஆசிக்க²னா, அனாக³தம் ஆரப்³பா⁴பி அத்தி² ஓதி³ஸ்ஸ ஆசிக்க²னா, அத்தி² அனோதி³ஸ்ஸ ஆசிக்க²னா.

கத²ம் அதீதம் ஆரப்³ப⁴ ஓதி³ஸ்ஸ ஆசிக்க²னா ஹோதி? பி⁴க்கு²னுபஸ்ஸயே கா³மதா³ரகா, து⁴த்தாத³யோ வா யே கேசி அனாசாரம் வா ஆசரந்தி, ருக்க²ம் வா சி²ந்த³ந்தி, ப²லாப²லம் வா ஹரந்தி, பரிக்கா²ரே வா அச்சி²ந்த³ந்தி. பி⁴க்கு²னீ வோஹாரிகே உபஸங்கமித்வா ‘‘அம்ஹாகம் உபஸ்ஸயே இத³ம் நாம கத’’ந்தி வத³தி. ‘‘கேனா’’தி வுத்தே ‘‘அஸுகேன ச அஸுகேன சா’’தி ஆசிக்க²தி. ஏவம் அதீதம் ஆரப்³ப⁴ ஓதி³ஸ்ஸ ஆசிக்க²னா ஹோதி, ஸா ந வட்டதி. தஞ்சே ஸுத்வா தே வோஹாரிகா தேஸம் த³ண்ட³ம் கரோந்தி, ஸப்³ப³ம் பி⁴க்கு²னியா கீ³வா ஹோதி. ‘‘த³ண்ட³ம் க³ண்ஹிஸ்ஸந்தீ’’தி அதி⁴ப்பாயேபி ஸதி கீ³வாயேவ ஹோதி. ஸசே பன தஸ்ஸ ‘‘த³ண்ட³ம் க³ண்ஹதா²’’தி வத³தி, பஞ்சமாஸகமத்தே க³ஹிதே பாராஜிகம் ஹோதி.

தேஹி ‘‘கேனா’’தி வுத்தே பன ‘‘அஸுகேனா’தி வத்தும் அம்ஹாகம் ந வட்டதி, தும்ஹேயேவ ஜானிஸ்ஸத². கேவலஞ்ஹி மயம் ரக்க²ம் யாசாம, தம் நோ தே³த², அவஹடப⁴ண்ட³ம்பி ஆஹராபேதா²’’தி வத்தப்³ப³ம். ஏவம் அனோதி³ஸ்ஸ ஆசிக்க²னா ஹோதி, ஸா வட்டதி. ஏவம் வுத்தே ஸசேபி தே வோஹாரிகா தே காரகே க³வேஸித்வா தேஸம் த³ண்ட³ம் கரோந்தி, ஸப்³ப³ம் ஸாபதேய்யம்பி க³ஹிதம், பி⁴க்கு²னியா நேவ கீ³வா, ந ஆபத்தி.

பரிக்கா²ரம் ஹரந்தே தி³ஸ்வா தேஸம் அனத்த²காமதாய ‘‘சோரோ சோரோ’’தி வத்தும்பி ந வட்டதி. ஏவம் வுத்தேபி ஹி யம் தேஸம் த³ண்ட³ம் கரோந்தி, ஸப்³ப³ம் பி⁴க்கு²னியா கீ³வா ஹோதி. அத்தனோ வசனகரம் பன ‘‘இமினா மே பரிக்கா²ரோ க³ஹிதோ, தம் ஆஹராபேஹி, மா சஸ்ஸ த³ண்ட³ம் கரோதா²’’தி வத்தும் வட்டதி. தா³ஸதா³ஸிவாபிஆதீ³னம் அத்தா²ய அட்³ட³ம் கரோந்தி, அயம் அகப்பியஅட்³டோ³ நாம, ந வட்டதி.

கத²ம் அனாக³தம் ஆரப்³ப⁴ ஓதி³ஸ்ஸ ஆசிக்க²னா ஹோதி? வுத்தனயேனேவ பரேஹி அனாசாராதீ³ஸு கதேஸு பி⁴க்கு²னீ வோஹாரிகே ஏவம் வத³தி ‘‘அம்ஹாகம் உபஸ்ஸயே இத³ஞ்சித³ஞ்ச கரோந்தி, ரக்க²ம் நோ தே³த² ஆயதிம் அகரணத்தா²யா’’தி. ‘‘கேன ஏவம் கத’’ந்தி வுத்தே ‘‘அஸுகேன ச அஸுகேன சா’’தி ஆசிக்க²தி. ஏவம் அனாக³தம் ஆரப்³ப⁴ ஓதி³ஸ்ஸ ஆசிக்க²னா ஹோதி, ஸாபி ந வட்டதி. தேஸஞ்ஹி த³ண்டே³ கதே புரிமனயேனேவ ஸப்³ப³ம் பி⁴க்கு²னியா கீ³வா. ஸேஸம் புரிமஸதி³ஸமேவ.

ஸசே பன வோஹாரிகா பி⁴க்கு²னுபஸ்ஸயே ஏவரூபம் அனாசாரம் கரோந்தானம் ‘‘இமம் நாம த³ண்ட³ம் கரோமா’’தி பே⁴ரிம் சராபேத்வா ஆணாய அதிட்ட²மானே பரியேஸித்வா த³ண்ட³ம் கரோந்தி, பி⁴க்கு²னியா நேவ கீ³வா, ந ஆபத்தி.

யோ சாயம் பி⁴க்கு²னீனம் வுத்தோ, பி⁴க்கூ²னம்பி ஏஸேவ நயோ. பி⁴க்கு²னோபி ஹி ஓதி³ஸ்ஸ ஆசிக்க²னா ந வட்டதி, யம் ததா² ஆசிக்கி²தே தேஸம் த³ண்ட³ம் கரோந்தி, தம் ஸப்³ப³ம் கீ³வா ஹோதி. வுத்தனயேனேவ த³ண்ட³ம் க³ண்ஹாபேந்தஸ்ஸ பாராஜிகம். யோ பன ‘‘த³ண்ட³ம் கரிஸ்ஸந்தீ’’தி ஜானந்தோபி அனோதி³ஸ்ஸ கதே²தி, தே ச பரியேஸித்வா த³ண்ட³ம் கரோந்தியேவ, ந தோ³ஸோ. விஹாரஸீமாய ருக்கா²தீ³னி சி²ந்த³ந்தானம் வாஸிப²ரஸுஆதீ³னி க³ஹேத்வா பாஸாணே கோட்டேந்தி, ந வட்டதி. ஸசே தா⁴ரா பி⁴ஜ்ஜதி, காராபேத்வா தா³தப்³பா³. உபதா⁴வித்வா தேஸம் பரிக்கா²ரே க³ண்ஹந்தி, தம்பி ந காதப்³ப³ம். லஹுபரிவத்தஞ்ஹி சித்தம், தே²ய்யசேதனாய உப்பன்னாய மூலச்சே²ஜ்ஜம்பி க³ச்சே²ய்ய.

உஸ்ஸயவாதி³காஸிக்கா²பத³வண்ணனா நிட்டி²தா.

2. சோரிவுட்டா²பிகாஸிக்கா²பத³வண்ணனா

மல்லக³ணப⁴டிபுத்தக³ணாதி³கந்திஆதீ³ஸு (ஸாரத்த². டீ. பாசித்திய 3.683) மல்லக³ணோ நாம நாராயனப⁴த்திகோ தத்த² தத்த² பானீயட்ட²பனபோக்க²ரணிக²ணனாதி³புஞ்ஞகம்மகாரகோ க³ணோ. ப⁴டிபுத்தக³ணோ நாம குமாரப⁴த்திகக³ணோ. த⁴ம்மக³ணோதி ஸாஸனப⁴த்திகோ அனேகப்பகாரபுஞ்ஞகம்மகாரகோ க³ணோ. க³ந்தி⁴கஸேணீதி அனேகப்பகாரஸுக³ந்தி⁴விகதிகாரகோ க³ணோ. து³ஸ்ஸிகஸேணீதி து³ஸ்ஸவாணிஜஸமூஹோ, பேஸகாரக³ணோதி அத்தோ².

வுட்டா²பேந்தியாதி உபஸம்பாதே³ந்தியா. கேனசி கரணீயேன பக்கந்தாஸு பி⁴க்கு²னீஸு அக³ந்த்வா க²ண்ட³ஸீமம் யதா²னிஸின்னட்டா²னேயேவ அத்தனோ நிஸ்ஸிதகபரிஸாய ஸத்³தி⁴ம் வுட்டா²பேந்தியா வாசாசித்ததோ ஸமுட்டா²தி (பாசி. அட்ட². 683), அஞ்ஞம் ஸீமம் வா நதி³ம் வா க³ந்த்வா வுட்டா²பேந்தியா காயவாசாசித்ததோ ஸமுட்டா²தீதி ஆஹ ‘‘சோரிவுட்டா²பனஸமுட்டா²ன’’ந்தி. அனாபுச்சா² வுட்டா²பனவஸேன கிரியாகிரியம். பஞ்ஞத்திம் அஜானந்தா அரியாபி வுட்டா²பேந்தீதி வா கம்மவாசாபரியோஸானே ஆபத்திக்க²ணே விபாகாப்³யாகதஸமங்கி³தாவஸேன வா திசித்தம்.

சோரிவுட்டா²பிகாஸிக்கா²பத³வண்ணனா நிட்டி²தா.

3. ஏககா³மந்தரக³மனஸிக்கா²பத³வண்ணனா

அஞ்ஞோ கா³மோ கா³மந்தரம். நதி³பாரந்தி நதி³யா பாரிமதீரம். ‘‘கா³மந்தரம் க³ச்சே²ய்யா’’தி (பாசி. 687, 691) வுத்தத்தா அஞ்ஞஸ்மிம் கா³மேயேவ ஆபத்தி, ந ஸககா³மேதி ஆஹ ‘‘ஸககா³மதோ தாவா’’திஆதி³. பரிக்கே²பே வா உபசாரே வா அதிக்கந்தேதி பரிக்கி²த்தஸ்ஸ கா³மஸ்ஸ பரிக்கே²பே வா அபரிக்கி²த்தஸ்ஸ கா³மஸ்ஸ பரிக்கே²பாரஹட்டா²னே வா அதிக்கந்தே. து³தியேன அதிக்கந்தமத்தேதி து³தியேன பாதே³ன இதரஸ்ஸ கா³மஸ்ஸ பரிக்கே²பே வா உபசாரே வா அதிக்கந்தமத்தே. யேஸு பன போத்த²கேஸு ‘‘ஏகேன பாதே³ன இதரஸ்ஸ கா³மஸ்ஸ பரிக்கே²பே வா அதிக்கந்தே, உபசாரே வா ஓக்கந்தே து²ல்லச்சயம், து³தியேன அதிக்கந்தமத்தே, ஓக்கந்தமத்தே வா ஸங்கா⁴தி³ஸேஸோ’’தி பாடோ² தி³ஸ்ஸதி, தத்த² ‘‘ஓக்கந்தே, ஓக்கந்தமத்தே வா’’தி ஏதானி த்³வே பதா³னி பாளியா விருஜ்ஜ²ந்தி. ‘‘அபரிக்கி²த்தஸ்ஸ கா³மஸ்ஸ உபசாரம் அதிக்காமேந்தியா’’தி (பாசி. 692) ஹி பாளி. ததா² ஸமந்தபாஸாதி³காயபி விருஜ்ஜ²ந்தி. தத்த² ஹி –

‘‘பரிக்கே²பாரஹட்டா²னம் ஏகேன பாதே³ன அதிக்கமதி, து²ல்லச்சயம். து³தியேன அதிக்கந்தமத்தே ஸங்கா⁴தி³ஸேஸோ. அபிசேத்த² ஸககா³மதோ…பே… ஏகேன பாதே³ன இதரஸ்ஸ கா³மஸ்ஸ பரிக்கே²பே வா உபசாரேவா அதிக்கந்தமத்தே து²ல்லச்சயம், து³தியேன அதிக்கந்தமத்தே ஸங்கா⁴தி³ஸேஸோ’’தி –

வுத்தம். ‘‘பட²மம் பாத³ம் அதிக்காமேந்தியா’’திஆதி³வசனதோ (பாசி. 692) பத³ஸா க³மனமேவ இதா⁴தி⁴ப்பேதந்தி ஆஹ ‘‘பத³ஸா பவிஸந்தியா ஆபத்தீ’’தி. இமினா ஸசேபி ஹத்தி²பிட்டி²ஆதீ³ஹி வா இத்³தி⁴யா வா பவிஸதி, வட்டதியேவாதி த³ஸ்ஸேதி. அயமேத்த² ஸங்கே²போ, வித்தா²ரோ பன ஸமந்தபாஸாதி³காய (பாசி. அட்ட². 692) வுத்தோதி அதி⁴ப்பாயோ.

நதி³பாரக³மனே வுத்தலக்க²ணாய நதி³யாதி ‘‘நதீ³ நாம திமண்ட³லம் படிச்சா²தே³த்வா யத்த² கத்த²சி உத்தரந்தியா அந்தரவாஸகோ தேமியதீ’’தி (பாசி. 692) நதி³பாரக³மனவிப⁴ங்கே³ வுத்தலக்க²ணாய நதி³யா. நதி³பாரக³மனவிப⁴ங்கோ³ ஹி இத⁴ நதி³பாரக³மனஸத்³தே³ன வுத்தோ. புன ஓரிமதீரமேவ பச்சுத்தரந்தியா வாதி பரதீரம் க³ந்துகாமதாய ஓதிண்ணத்தா வுத்தம். இதரிஸ்ஸா பன அயம் பக்கந்தட்டா²னே டி²தா ஹோதி, தஸ்மா பரதீரம் க³ச்ச²ந்தியா அனாபத்தி. ஸசே ஸஜ்ஜா²யம் வா பதா⁴னம் வா அஞ்ஞம் வா கிஞ்சி கம்மம் குருமானா ‘‘புரே அருணேயேவ து³தியிகாய ஸந்திகம் க³மிஸ்ஸாமீ’’தி (பாசி. அட்ட². 692) ஆபோ⁴க³ம் கரோதி, அஜானந்தியா ஏவ தஸ்ஸா அருணோ உக்³க³ச்ச²தி, அனாபத்தீதி ஆஹ ‘‘புரே அருணேயேவா’’திஆதி³. அத² பன ‘‘யாவ அருணுக்³க³மனா இதே⁴வ ப⁴விஸ்ஸாமீ’’தி வா அனாபோ⁴கே³ன வா விஹாரஸ்ஸ ஏகதே³ஸே அச்ச²தி, து³தியிகாய ஹத்த²பாஸம் ந ஓதரதி, அருணுக்³க³மனே ஸங்கா⁴தி³ஸேஸோ. ஹத்த²பாஸோயேவ ஹி இத⁴ பமாணம். ஹத்த²பாஸாதிக்கமே ஏகக³ப்³போ⁴பி ந ரக்க²தி. தேனாஹ ‘‘ஏகக³ப்³பே⁴…பே… ஆபத்தீ’’தி.

த³ஸ்ஸனூபசாரம் வா ஸவனூபசாரம் வாதி ஏத்த² த³ஸ்ஸனூபசாரோ நாம யத்த² டி²தம் து³தியிகா பஸ்ஸதி. ஸவனூபசாரோ நாம யத்த² டி²தா மக்³க³மூள்ஹஸத்³தே³ன விய, த⁴ம்மஸ்ஸவனாரோசனஸத்³தே³ன விய ச ‘‘அய்யே’’தி ஸத்³தா³யந்தியா ஸத்³த³ம் ஸுணாதி. தஸ்மாதி யஸ்மா ஓஹீயனம் நாம த³ஸ்ஸனூபசாரஸவனூபசாரானமஞ்ஞதரஸ்ஸ விஜஹனம், தஸ்மா. அந்தோகா³மே பன ஓஹீயனம் வட்டதீதி ஆஹ ‘‘இந்த³கீ²லாதிக்கமதோ பட்டா²யா’’தி ஆதி³. தத்த² இந்த³கீ²லாதிக்கமதோதி உம்மாராதிக்கமதோ. ப³ஹிகா³மேதி கா³மஸ்ஸ ப³ஹிபதே³ஸே. மக்³க³மூள்ஹா உச்சாஸத்³த³ம் கரோந்தீதி ஆஹ ‘‘மக்³க³மூள்ஹஸத்³தே³ன வியா’’தி. மக்³க³மூள்ஹம் அவ்ஹாயந்தஸ்ஸ ஸத்³தே³ன வியாதிபி வத³ந்தி. ஸத்³தா³யந்தியாதி ஸத்³த³ம் கரோந்தியா. ‘‘ஸத்³த³ஸ்ஸவனாதிக்கமே ஆபத்தியேவா’’தி இமினா த³ஸ்ஸனூபசாரோ ஏவரூபே ஸவனூபசாரே விஜஹிதே ந ரக்க²தி, ஜஹிதமத்தேவ ஆபத்தி ஸங்கா⁴தி³ஸேஸஸ்ஸாதி த³ஸ்ஸேதி.

மக்³க³ம் க³ச்ச²ந்தீதி ஏகமக்³க³ம் க³ச்ச²ந்தி. ஸசே புரிமாயோ அஞ்ஞேன மக்³கே³ன க³ச்ச²ந்தி, பக்கந்தா நாம ஹோந்தி, அனாபத்தியேவ. த்³வின்னம் க³ச்ச²ந்தீனம் ஏகா அனுப³ந்தி⁴தும் அஸக்கோந்தீ ‘‘க³ச்ச²து அய’’ந்தி ஓஹீயதி, இதராபி ‘‘ஓஹீயது அய’’ந்தி க³ச்ச²தி, த்³வின்னம்பி ஆபத்தி. ஸசே பன க³ச்ச²ந்தீஸு புரிமாபி அஞ்ஞம் மக்³க³ம் க³ண்ஹாதி, பச்சி²மாபி அஞ்ஞம், ஏகா ஏகிஸ்ஸா பக்கந்தட்டா²னே திட்ட²தி, த்³வின்னம்பி அனாபத்தி.

‘‘ஸங்கா⁴தி³ஸேஸா சதுரோ’’தி (பரி. அட்ட². 479) அயம் பஞ்ஹோ அருணுக்³க³மனே கா³மந்தரபரியாபன்னம் நதி³பாரம் ஓக்கந்தபி⁴க்கு²னிம் ஸந்தா⁴ய வுத்தோ. ஸா ஹி ஸககா³மதோ பச்சூஸஸமயே நிக்க²மித்வா அருணுக்³க³மனகாலே வுத்தப்பகாரம் நதி³பாரம் ஓக்கந்தமத்தாவ ரத்திவிப்பவாஸகா³மந்தரனதி³பாரக³மனக³ணம்ஹாஓஹீயனலக்க²ணே ஏகப்பஹாரேனேவ சதுரோ ஸங்கா⁴தி³ஸேஸே ஆபஜ்ஜதி.

பக்க²ஸங்கந்தாய வாதி தித்தா²யதனம் ஸங்கந்தாய. அனந்தராயேனாதி ஹத்தி²மோசனாதி³அந்தராயம் வினா.

ஏககா³மந்தரக³மனஸிக்கா²பத³வண்ணனா நிட்டி²தா.

4. உக்கி²த்தகஓஸாரணஸிக்கா²பத³வண்ணனா

தஸ்ஸேவ காரகஸங்க⁴ஸ்ஸாதி யோ உக்கே²பனீயகம்மகாரகோ க³ணோ, தஸ்ஸேவ காரகஸங்க⁴ஸ்ஸ. வத்தே வா வத்தந்திந்தி தேசத்தாலீஸப்பபே⁴தே³ நேத்தா²ரவத்தே வத்தமானம்.

உக்கி²த்தகஓஸாரணஸிக்கா²பத³வண்ணனா நிட்டி²தா.

5. போ⁴ஜனப்படிக்³க³ஹணபட²மஸிக்கா²பத³வண்ணனா

ஏகதோஅவஸ்ஸுதேதி புக்³க³லஸ்ஸ வா பி⁴க்கு²னியா வா அவஸ்ஸுதே. மஹாபச்சரியம் பனேத்த² ‘‘பி⁴க்கு²னியா அவஸ்ஸுதபா⁴வேதி த³ட்ட²ப்³ப³’’ந்தி (பாசி. அட்ட². 701) வுத்தம். தம் ‘‘அனவஸ்ஸுதோதி ஜானந்தீ படிக்³க³ண்ஹாதீ’’தி (பாசி. 703) இமாய பாளியா ந ஸமேதி. யதி³ ஹி புக்³க³லஸ்ஸ அவஸ்ஸுதபா⁴வோ நப்பமாணம், கிம் ‘‘அனவஸ்ஸுதோதி ஜானந்தீ’’தி இமினா வசனேன, ‘‘அனாபத்தி உப⁴தோஅனவஸ்ஸுதா ஹோந்தி, அனவஸ்ஸுதா படிக்³க³ண்ஹாதீ’’தி ஏத்தகமேவ வத்தப்³ப³ம் ஸியா. உபோ⁴ஸு அனவஸ்ஸுதேஸூதி புக்³க³லோ சேவ பி⁴க்கு²னீ சாதி உபோ⁴ஸு அனவஸ்ஸுதேஸு க³ண்ஹந்தியா ஸப்³ப³தா²பி அனாபத்தி. ‘‘அனவஸ்ஸுதோ’’தி வா ஞத்வா க³ண்ஹந்தியாதி ஸயம் அனவஸ்ஸுதா ஸமானா அவஸ்ஸுதேபி ‘‘அனவஸ்ஸுதோ அய’’ந்தி ஸஞ்ஞாய தஸ்ஸ ஹத்த²தோ படிக்³க³ண்ஹந்தியா. அத² ஸயம் அனவஸ்ஸுதாபி அஞ்ஞம் அவஸ்ஸுதம் வா அனவஸ்ஸுதம் வா ‘‘அவஸ்ஸுதோ’’தி ஞத்வா படிக்³க³ண்ஹாதி, து³க்கடமேவ. வுத்தஞ்ஹேதம் அனந்தரஸிக்கா²பதே³ ‘‘கிஸ்ஸ த்வம், அய்யே, ந படிக்³க³ண்ஹாஸீதி, அவஸ்ஸுதா, அய்யேதி, த்வம் பன, அய்யே, அவஸ்ஸுதாதி, நாஹம், அய்யே, அவஸ்ஸுதா’’தி.

போ⁴ஜனப்படிக்³க³ஹணபட²மஸிக்கா²பத³வண்ணனா நிட்டி²தா.

6. போ⁴ஜனப்படிக்³க³ஹணது³தியஸிக்கா²பத³வண்ணனா

து³க்கடாதி³கா ஸங்கா⁴தி³ஸேஸபரியோஸானா ஆபத்தியோ இமினா ஸிக்கா²பதே³ன உய்யோஜிகாயேவ, இதரிஸ்ஸா பன ஆபத்திபே⁴தோ³ பட²மஸிக்கா²பதே³னாதி ஆஹ ‘‘ஸா ஏவம் உய்யோஜனேனா’’திஆதி³.

குலானுத்³த³யதாயாதி குலானுகம்பகதாய.

போ⁴ஜனப்படிக்³க³ஹணது³தியஸிக்கா²பத³வண்ணனா நிட்டி²தா.

7-13. ஸஞ்சரித்தாதி³ஸிக்கா²பத³வண்ணனா

ஸத்தமாதீ³னி உத்தானத்தா²னேவ.

ஸஞ்சரித்தாதி³ஸிக்கா²பத³வண்ணனா நிட்டி²தா.

14-17. ஸங்க⁴பே⁴த³காதி³ஸிக்கா²பத³வண்ணனா

பி⁴க்கு²னீ ஸங்க⁴ம் ந பி⁴ந்த³தீதி கம்மம், உத்³தே³ஸோ சாதி த்³வீஹி பே⁴தோ³, ஸோ தாய ஸத்³தி⁴ம் நத்தீ²தி பி⁴க்கு²னீ ஸங்க⁴ம் ந பி⁴ந்த³தி. ந கேவலம் பரிவாஸாபா⁴வோயேவாதி ஆஹ ‘‘சா²த³னபச்சயாபீ’’திஆதி³. ஏத்த² ச ‘‘சா²த³னபச்சயாபி ந து³க்கடம் ஆபஜ்ஜதீ’’தி பாடோ² த³ட்ட²ப்³போ³, சா²த³னபச்சயாபி து³க்கடம் ந ஆபஜ்ஜதீதி அத்தோ². ஏவஞ்ச கத்வா –

‘‘ஆபஜ்ஜதி க³ருகம் ஸாவஸேஸம்;

சா²தே³தி அனாத³ரியம் படிச்ச;

ந பி⁴க்கு²னீ நோ ச பு²ஸேய்ய வஜ்ஜம்;

பஞ்ஹாமேஸா குஸலேஹி சிந்திதா’’தி. (பரி. 481) –

ஏத்த² பி⁴க்கு²னினிஸேதோ⁴ உபபன்னோ ஹோதி. யேஸு பன போத்த²கேஸு ‘‘சா²த³னபச்சயா பன து³க்கடம் ஆபஜ்ஜதீ’’தி வினா ந-காரம் பாடோ² தி³ஸ்ஸதி, ஸோ பமாத³லேகோ²தி த³ட்ட²ப்³ப³ம். தஸ்மாதி யஸ்மா பரிவாஸோ நாம நத்தி², தஸ்மா. அத்தனோ ஸீமம் ஸோதே⁴த்வா விஹாரஸீமாய வாதி விஹாரே ப³த்³த⁴ஸீமமேவ ஸந்தா⁴ய வுத்தம். ஸோதே⁴தும் அஸக்கோந்தீஹீதி விஹாரஸீமம் ஸோதே⁴தும் அஸக்கோந்தீஹி.

முக²மத்தனித³ஸ்ஸனந்தி பவேஸோபாயமத்தனித³ஸ்ஸனம். ஏத்தா²ஹ – அத² கஸ்மா யதா² பி⁴க்கு²மானத்தகதா²ய ‘‘பரிக்கி²த்தஸ்ஸ விஹாரஸ்ஸ பரிக்கே²பதோ, அபரிக்கி²த்தஸ்ஸ விஹாரஸ்ஸ பரிக்கே²பாரஹட்டா²னதோ த்³வே லேட்³டு³பாதே அதிக்கம்மா’’தி (கங்கா². அட்ட². நிக³மனவண்ணனா) வுத்தம், ஏவமவத்வா ‘‘கா³மூபசாரதோ ச பி⁴க்கூ²னம் விஹாரூபசாரதோ ச த்³வே லேட்³டு³பாதே அதிக்கமித்வா’’தி இத⁴ வுத்தந்தி? தத்ர சேகே வத³ந்தி ‘‘பி⁴க்கூ²னம் வுத்தப்பகாரம் பதே³ஸம் அதிக்கமித்வா கா³மேபி தம் கம்மம் காதும் வட்டதி, பி⁴க்கு²னீனம் பன கா³மே ந வட்டதி, தஸ்மா ஏவம் வுத்த’’ந்தி. அபரே பன ப⁴ணந்தி ‘‘பி⁴க்கூ²னம்பி கா³மே ந வட்டதி, பி⁴க்கு²விஹாரோ நாம புப்³பே³யேவ கா³மூபசாரம் அதிக்கமித்வா திட்ட²தி, தஸ்மா கா³மம் அவத்வா விஹாரூபசாரமேவ ஹேட்டா² வுத்தம். பி⁴க்கு²னீனம் பன விஹாரோ கா³மேயேவ, ந ப³ஹி, தஸ்மா கா³மூபசாரஞ்ச விஹாரூபசாரஞ்ச உப⁴யமேவேத்த² த³ஸ்ஸிதம். தஸ்மா உப⁴யத்தா²பி அத்த²தோ நானாத்த²ம் நத்தீ²’’தி. வீமம்ஸித்வா யஞ்சேத்த² யுஜ்ஜதி, தம் க³ஹேதப்³ப³ம்.

ததோ பட்டா²யாதி ஆரோசிதகாலதோ பட்டா²ய.

ஸங்க⁴பே⁴த³காதி³ஸிக்கா²பத³வண்ணனா நிட்டி²தா.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

பி⁴க்கு²னிபாதிமோக்கே² ஸங்கா⁴தி³ஸேஸவண்ணனா நிட்டி²தா.