10. த³ந்தபோனஸிக்கா²பத³வண்ணனா

த³ஸமே அதி³ன்னந்தி காயேன வா காயப்படிப³த்³தே⁴ன வா க³ண்ஹந்தஸ்ஸ ஹத்த²பாஸே ட²த்வா காயகாயப்படிப³த்³த⁴னிஸ்ஸக்³கி³யானம் அஞ்ஞதரேன ந தி³ன்னம், அப்படிக்³க³ஹிதகஸ்ஸேதம் நாமம். அப்படிக்³க³ஹிதகஞ்ஹி பி⁴க்கு²னோ அத்தனோ ஸந்தகம்பி அஜ்ஜோ²ஹரிதும் ந வட்டதி. படிக்³க³ஹிதம் அந்தமஸோ விஸ்ஸாஸிகஸந்தகம்பி வட்டதி, தஸ்ஸ லக்க²ணம் வுத்தவிபல்லாஸேன வேதி³தப்³ப³ம். ஸசே ஹி யோ கோசி அனுபஸம்பன்னோ அந்தமஸோ திரச்சா²னோபி பி⁴க்கு²ஸ்ஸ வா பி⁴க்கு²னியா வா ஹத்த²பாஸே டி²தோ காயாதீ³னம் அஞ்ஞதரேன தே³தி, தஞ்சே பி⁴க்கு²னா யேன கேனசி ஸரீராவயவேன வா, தப்படிப³த்³தே⁴ன வா, ஸம்ஹாரிமேன ச அந்தமஸோ மஞ்சேனாபி, தா⁴ரேதும் ஸமத்தே²ன ச அந்தமஸோ அதத்த²ஜாதகருக்க²பண்ணேனாபி, ஸூசியா பராமட்ட²மத்தேனாபி படிக்³க³ஹிதம், படிக்³க³ஹிதமேவ ஹோதி. படிப³த்³த⁴ப்படிப³த்³த⁴ம் நாம இத⁴ நத்தி², யம்பி நத்து²கரணியா தி³ய்யமானம் நாஸிகாய, அகல்லகோ வா முகே²ன படிக்³க³ண்ஹாதி, ஸப்³ப³ம் வட்டதி, ஆபோ⁴க³மத்தமேவ ஹேத்த² பமாணம். புப்³பா³போ⁴கே³ ச ஸதி பச்சா² நித்³தா³யந்தஸ்ஸ பத்தே தி³ன்னம்பி ஹத்த²பாஸே ஸதி படிக்³க³ஹிதமேவ ஹோதி. யம்பி ‘‘பத்தேன படிக்³க³ண்ஹிஸ்ஸாமீ’’தி நிஸின்னஸ்ஸேவ ஹத்தே² பததி, தம் வட்டதியேவ. அபி⁴ஹடபா⁴ஜனதோ பதிதரஜம்பி வட்டதி, தத்த² டி²தனிஸின்னனிபன்னானம் பவாரணாஸிக்கா²பதே³ வுத்தனயேனேவ ஹத்த²பாஸோ வேதி³தப்³போ³.

ஸசே பன தா³யகப்படிக்³கா³ஹகேஸு ஏகோ ஆகாஸே ஹோதி, ஏகோ பூ⁴மியம், பூ⁴மட்ட²ஸ்ஸ ஸீஸேன ஆகாஸட்ட²ஸ்ஸ ச ட²பேத்வா தா³தும் வா க³ஹேதும் வா பஸாரிதஹத்த²ம் யம் ஆஸன்னதரம் அங்க³ம், தஸ்ஸ ஓரிமந்தேன ஹத்த²பாஸப்பமாணம் பரிச்சி²ந்தி³தப்³ப³ம். ஸசேபி ஏகோ கூபே ஹோதி, ஏகோ கூபதடே, ஏகோ வா ருக்கே², ஏகோ பத²வியம், வுத்தனயேனேவ ஹத்த²பாஸப்பமாணம் பரிச்சி²ந்தி³தப்³ப³ம். தஸ்மிம் ட²த்வா ஸசேபி த்³வே தயோ வா ஸாமணேரா யம் மஜ்ஜி²மோ புரிஸோ உக்கி²பிதும் ஸக்கோதி, ஏவரூபம் பா⁴ரம் பவட்டேந்தா பி⁴க்கு²னோ பூ⁴மியம் ட²பிதஹத்த²ம் ஆரோபேந்தி, உக்கி²பித்வா வா பி⁴க்கு²னோ பஸாரிதஹத்தே² ஏகதே³ஸேனாபி ட²பேந்தி, தம் படிக்³க³ஹிதமேவ ஹோதி. யம் பன பிண்டா³ய சரந்தஸ்ஸ பத்தே ரஜம் பததி, தம் அப்படிக்³க³ஹிதமேவ ஹோதி, தஸ்மா படிக்³க³ஹேத்வாவ பி⁴க்கா² க³ண்ஹிதப்³பா³. அப்படிக்³க³ஹேத்வா க³ண்ஹந்தஸ்ஸ வினயது³க்கடம், தம் பன புன படிக்³க³ஹேத்வா பு⁴ஞ்ஜந்தஸ்ஸ அனாபத்தி. ஸசே ‘‘படிக்³க³ஹேத்வா தே³தா²’’தி வுத்தே வசனம் அஸ்ஸுத்வா வா அனாதி³யித்வா வா பி⁴க்க²ம் தே³ந்தியேவ, வினயது³க்கடா முச்சதி, புன படிக்³க³ஹேத்வா அஞ்ஞா பி⁴க்கா² படிக்³க³ஹேதப்³பா³. ஸசே மஹாவாதோ ததோ ததோ ரஜம் பாதேதி, ந ஸக்கா ஹோதி பி⁴க்க²ம் க³ஹேதும், ‘‘அனுபஸம்பன்னஸ்ஸ த³ஸ்ஸாமீ’’தி ஸுத்³த⁴சித்தேன ஆபோ⁴க³ம் கத்வா க³ண்ஹிதும் வட்டதி. தம் அனுபஸம்பன்னஸ்ஸ த³த்வா புன தேன தி³ன்னம் வா தஸ்ஸ விஸ்ஸாஸேன வா படிக்³க³ஹேத்வா பு⁴ஞ்ஜிதும் வட்டதி. அஸ்ஸுகே²ளஸிங்கா⁴ணிகாதீ³ஸு யம் டா²னதோ சவித்வா ஹத்தே² வா பத்தே வா பததி, தம் படிக்³க³ஹேதப்³ப³ம், அங்க³லக்³க³ம் படிக்³க³ஹிதமேவ. பதந்தம்பி வோச்சி²ன்னஞ்சே அந்தரா ந க³ஹேதப்³ப³ம், உக்³க³ஹிதகம் நாம ஹோதி, தம் பச்சா² படிக்³க³ஹிதம்பி ந வட்டதி. யம் பன பே⁴ஸஜ்ஜம் வா மூலப²லம் வா மாதாதீ³னம் அத்தா²ய க³ஹேத்வா சா²யத்தா²ய வா ப²லினிஸாக²ம் உக்கி²பித்வா க³ச்ச²தி, ததோ யம் இச்ச²தி, தம் புன படிக்³க³ஹேத்வா பரிபு⁴ஞ்ஜிதும் வட்டதி. யோ பன தத்த² ஜாதகப²லினிஸாகா²ய வா வல்லியா வா க³ஹேத்வா சாலேதி. தஸ்ஸ ததோ லத்³த⁴ம் ப²லம் ந வட்டதி, து³ருபசிண்ணது³க்கடஞ்ச ஆபஜ்ஜதி, அஞ்ஞஸ்ஸ தம் வட்டதி, ப²லிருக்க²ம் பன அபஸ்ஸயிதும் வா ஆலம்பி³தும் வா வட்டதி, படிக்³க³ஹேத்வா ட²பிதே யம் அஞ்ஞம் அங்குராதி³ உப்பஜ்ஜதி, படிக்³க³ஹிதமேவ தம். யாவ ஹி ஹத்த²தோ முத்தே நிரபேக்கோ² ந ஹோதி, நிரபேக்க²தாய வா ஹத்த²தோ ந முச்சதி, தாவ ந படிக்³க³ஹணம் விஜஹதி, அயமேத்த² ஸங்கே²போ, வித்தா²ரோ பன ஸமந்தபாஸாதி³காயம் வுத்தோ.

முக²த்³வாரந்தி க³லனாளிகம். முகே²ன வா ஹி பவிட்ட²ம் ஹோது, நாஸிகாய வா, க³லேன அஜ்ஜோ²ஹரணீயதாய ஸப்³ப³ம்பி தம் முக²த்³வாரம் பவேஸிதமேவ ஹோதி. ஆஹாரந்தி யம்கிஞ்சி யாவகாலிகம் வா யாமகாலிகம் வா ஸத்தாஹகாலிகம் வா யாவஜீவிகம் வா. ஸப்³ப³ஞ்ஹேதம் அஜ்ஜோ²ஹரணீயத்தா ‘ஆஹாரோ’தி வுச்சதி, தத்த² ஸப்³ப³ம்பி த⁴ஞ்ஞம் வா த⁴ஞ்ஞானுலோமம் வா தாலனாளிகேரபனஸலபு³ஜஅலாபு³கும்ப⁴ண்ட³புஸ்ஸப²லதிபுஸப²லஏளாலுகஸங்கா²தம் நவவித⁴ம் மஹாப²லஞ்சேவ அபரண்ணஞ்ச, யஞ்சஞ்ஞம் வனமூலபத்தபுப்ப²ப²லாதி³ ஆஹாரத்த²ம் ப²ரதி, தம் ஸப்³ப³ம் யாவ மஜ்ஜ²ன்ஹிககாலோ, தாவ பரிபு⁴ஞ்ஜிதப்³ப³தோ யாவகாலிகம் நாம. அம்ப³பானம் ஜம்பு³பானம் சோசபானம் மோசபானம் மது⁴கபானம் முத்³தி³கபானம் ஸாலூகபானம் பா²ருஸகபானந்தி இமானி அட்ட² பானானி, யானி ச தேஸம் அனுலோமானி வேத்ததிந்திணிகமாதுலுங்க³கபிட்ட²கோஸம்ப³கரமந்தா³தி³கு²த்³த³கப²லபானானி, ஏதானி ஸப்³பா³னி அனுபஸம்பன்னேஹி ஸீதோத³கேன மத்³தி³த்வா கதானி ஆதி³ச்சபாகானி வா யாவ ரத்தியா பச்சி²மயாமம் நித³ஹித்வா பரிபு⁴ஞ்ஜிதப்³ப³தோ யாமகாலிகானி நாம. அவஸேஸேஸு அனுஞ்ஞாதப²லபத்தபுப்ப²ரஸேஸுபி ஏஸேவ நயோ. ஸப்பிஆதீ³னி பஞ்ச பே⁴ஸஜ்ஜானி ஸத்தாஹம் நித³ஹித்வா பரிபு⁴ஞ்ஜிதப்³ப³தோ ஸத்தாஹகாலிகானி நாம. இத³ம் பன யாவகாலிகாதி³த்தயம் காலவிமுத்தஞ்ச உத³கம் ட²பேத்வா அவஸேஸமூலப²லாப²லாதி³ யம் நேவ கா²த³னீயத்த²ம் ந போ⁴ஜனீயத்த²ம் ப²ரதி, தம் யாவஜீவம் நித³ஹித்வா ஸதி பச்சயே பரிபு⁴ஞ்ஜிதப்³ப³தோ யாவஜீவிகம் நாம. ஆஹரேய்யாதி பவேஸேய்ய. அஞ்ஞத்ர உத³கத³ந்தபோனாதி இத³ம் அனாஹாரேபி உத³கே ஆஹாரஸஞ்ஞாய, த³ந்தபோனே ச ‘‘முக²த்³வாரம் ஆஹடம் இத³’’ந்தி ஸஞ்ஞாய குக்குச்சாயந்தானம் குக்குச்சவினோத³னத்த²ம் வுத்தம். உத³கஞ்ஹி யதா²ஸுக²ம் பாதும், த³ந்தகட்ட²ஞ்ச த³ந்தபோனபரிபோ⁴கே³ன பரிபு⁴ஞ்ஜிதும் வட்டதி. ட²பேத்வா பன இத³ம் த்³வயம் அவஸேஸம் அஜ்ஜோ²ஹரணத்தா²ய க³ண்ஹதோ க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம், ஸசேபி த³ந்தகட்ட²ரஸோ அஜானந்தஸ்ஸ அந்தோ பவிஸதி, பாசித்தியமேவ.

வேஸாலியம் அஞ்ஞதரம் பி⁴க்கு²ம் ஆரப்³ப⁴ அதி³ன்னம் ஆஹாரம் ஆஹரணவத்து²ஸ்மிம் பஞ்ஞத்தம், ‘‘அஞ்ஞத்ர உத³கத³ந்தபோனா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், படிக்³க³ஹிதகே அப்படிக்³க³ஹிதஸஞ்ஞினோ, வேமதிகஸ்ஸ வா து³க்கடம். படிக்³க³ஹிதஸஞ்ஞிஸ்ஸ, உத³கத³ந்தபோனே, சத்தாரி மஹாவிகடானி ஸதி பச்சயே அஸதி கப்பியகாரகே ஸாமம் க³ஹேத்வா பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. ஏத்த² து³ப்³ப³சோபி அஸமத்தோ²பி கப்பியகாரகோ அஸந்தபக்கே²யேவ திட்ட²தி, சா²ரிகாய அஸதி ஸுக்க²தா³ரும் ஜா²பேத்வா, தஸ்மிஞ்ச அஸதி அல்லதா³ரும் ருக்க²தோ சி²ந்தி³த்வாபி காதும், மத்திகத்தா²ய ச பத²விம் க²ணிதும்பி வட்டதி, இத³ம் பன சதுப்³பி³த⁴ம்பி மஹாவிகடம் காலோதி³ஸ்ஸம் நாம ஸப்பத³ட்ட²க்க²ணேயேவ ஸாமம் க³ஹேதும் வட்டதி, அஞ்ஞதா³ படிக்³கா³ஹாபேத்வா பரிபு⁴ஞ்ஜிதப்³ப³ம். அப்படிக்³க³ஹிதகதா, அனனுஞ்ஞாததா, தூ⁴மாதி³அப்³போ³ஹாரிகாபா⁴வோ, அஜ்ஜோ²ஹரணந்தி இமானேத்த² சத்தாரி அங்கா³னி. ஸமுட்டா²னாதீ³னி ஏளகலோமஸதி³ஸானீதி.

த³ந்தபோனஸிக்கா²பத³வண்ணனா நிட்டி²தா.

போ⁴ஜனவக்³கோ³ சதுத்தோ².