4. போ⁴ஜனவக்³கோ³

1. ஆவஸத²ஸிக்கா²பத³வண்ணனா

போ⁴ஜனவக்³க³ஸ்ஸ பட²மே அகி³லானேனாதி அத்³த⁴யோஜனம்பி க³ந்தும் ஸமத்தே²ன. ஏகோதி ஏகதி³வஸிகோ. ஆவஸத²பிண்டோ³தி ‘‘இமேஸம் வா ஏத்தகானம் வா’’தி ஏகம் பாஸண்ட³ம் வா, ‘‘ஏத்தகமேவா’’தி ஏவம் ப⁴த்தம் வா அனோதி³ஸ்ஸ ஸாலாதீ³ஸு யத்த² கத்த²சி புஞ்ஞகாமேஹி பஞ்ஞத்தம் போ⁴ஜனம். பு⁴ஞ்ஜிதப்³போ³தி ஏககுலேன வா நானாகுலேஹி வா ஏகதோ ஹுத்வா ஏகஸ்மிம் வா டா²னே, நானாடா²னேஸு வா ‘‘அஜ்ஜ ஏகஸ்மிம், ஸ்வே ஏகஸ்மி’’ந்தி ஏவம் அனியதட்டா²னே வா பஞ்ஞத்தோ ஏகஸ்மிம் டா²னே ஏகதி³வஸமேவ பு⁴ஞ்ஜிதப்³போ³. ததோ சே உத்தரீதி து³தியதி³வஸதோ பட்டா²ய தஸ்மிம் வா டா²னே அஞ்ஞஸ்மிம் வா டா²னே தேஸம் ஸந்தகஸ்ஸ படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம்.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ அனுவஸித்வா ஆவஸத²பிண்ட³பு⁴ஞ்ஜனவத்து²ஸ்மிம் பஞ்ஞத்தம், ‘‘அகி³லானேனா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், கி³லானஸ்ஸ அகி³லானஸஞ்ஞினோ வேமதிகஸ்ஸ வா து³க்கடம். கி³லானஸ்ஸ கி³லானஸஞ்ஞினோ, யோ ச ஸகிம் பு⁴ஞ்ஜதி, க³ச்ச²ந்தோ வா அந்தராமக்³கே³ ஏகதி³வஸம், க³தட்டா²னே ஏகதி³வஸம், பச்சாக³ந்தோபி அந்தராமக்³கே³ ஏகதி³வஸம், ஆக³தட்டா²னே ஏகதி³வஸம், க³மிஸ்ஸாமீ’தி ச பு⁴ஞ்ஜித்வா நிக்க²ந்தோ கேனசி உபத்³த³வேன நிவத்தித்வா கே²மபா⁴வம் ஞத்வா க³ச்ச²ந்தோ புன ஏகதி³வஸம் பு⁴ஞ்ஜதி, யஸ்ஸ வா ஸாமிகா நிமந்தேத்வா தே³ந்தி, யோ வா பி⁴க்கூ²னம்யேவ உத்³தி³ஸ்ஸ பஞ்ஞத்தம், ந யாவத³த்த²ம் பஞ்ஞத்தம், ட²பேத்வா வா பஞ்ச போ⁴ஜனானி அஞ்ஞம் பு⁴ஞ்ஜதி, தஸ்ஸ ச, உம்மத்தகாதீ³னஞ்ச அனாபத்தி. ஆவஸத²பிண்ட³தா, அகி³லானதா, அனுவஸித்வா பரிபோ⁴ஜனந்தி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸிக்கா²பத³ஸதி³ஸானீதி.

ஆவஸத²ஸிக்கா²பத³வண்ணனா நிட்டி²தா.

2. க³ணபோ⁴ஜனஸிக்கா²பத³வண்ணனா

து³தியே க³ணபோ⁴ஜனேதி க³ணஸ்ஸ போ⁴ஜனே. இத⁴ ச க³ணோதி சத்தாரோ வா ததுத்தரி வா பி⁴க்கூ², தேஸம் நிமந்தனதோ வா விஞ்ஞத்திதோ வா லத்³தே⁴ ஓத³னாதீ³னம் பஞ்சன்னம் போ⁴ஜனானம் அஞ்ஞதரபோ⁴ஜனேதி அத்தோ². தத்தா²யம் வினிச்ச²யோ – ஸசே ஹி கோசி சத்தாரோ பி⁴க்கூ² உபஸங்கமித்வா யேன கேனசி வேவசனேன வா பா⁴ஸந்தரேன வா பஞ்சன்னம் போ⁴ஜனானம் நாமம் க³ஹேத்வா ‘‘ஓத³னேன நிமந்தேமி, ஓத³னம் மே க³ண்ஹதா²’’திஆதி³னா நயேன நிமந்தேதி, தே சே ஏவம் ஏகதோ வா நானாதோ வா நிமந்திதா ஏகதோ வா நானாதோ வா க³ந்த்வா ஏகதோ க³ண்ஹந்தி, பச்சா² ஏகதோ வா நானாதோ வா பு⁴ஞ்ஜந்தி, க³ணபோ⁴ஜனம் ஹோதி. படிக்³க³ஹணமேவ ஹேத்த² பமாணம். ஸசே ஓத³னாதீ³னம் நாமம் க³ஹேத்வா ஏகதோ வா நானாதோ வா விஞ்ஞாபேத்வா ச க³ந்த்வா ச ஏகதோ க³ண்ஹந்தி, ஏவம்பி க³ணபோ⁴ஜனமேவ. தஸ்ஸ து³வித⁴ஸ்ஸாபி ஏவம் படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம். கி³லானஸமயாதீ³ஸு யதா³ பாதா³னம்பி ப²லிதத்தா ந ஸக்கா பிண்டா³ய சரிதும், அயம் கி³லானஸமயோ. அத்த²தகதி²னானம் பஞ்ச மாஸா, இதரேஸம் கத்திகமாஸோதி அயம் சீவரதா³னஸமயோ. யதா³ யோ சீவரே கரியமானே கிஞ்சிதே³வ சீவரே கத்தப்³ப³ம் கம்மம் கரோதி, அயம் சீவரகாரஸமயோ. யதா³ அத்³த⁴யோஜனம்பி க³ந்துகாமோ வா ஹோதி க³ச்ச²தி வா க³தோ வா, அயம் அத்³தா⁴னக³மனஸமயோ. நாவாபி⁴ருஹனஸமயேபி ஏஸேவ நயோ. யதா³ கோ³சரகா³மே சத்தாரோ பி⁴க்கூ² பிண்டா³ய சரித்வா ந யாபேந்தி, அயம் மஹாஸமயோ. யதா³ யோகோசி பப்³ப³ஜிதோ ப⁴த்தேன நிமந்தேதி, அயம் ஸமணப⁴த்தஸமயோ, ஏதேஸு ஸமயேஸு பு⁴ஞ்ஜிதும் வட்டதி.

ராஜக³ஹே தே³வத³த்தம் ஆரப்³ப⁴ விஞ்ஞாபேத்வா பு⁴ஞ்ஜனவத்து²ஸ்மிம் பஞ்ஞத்தம், ‘‘அஞ்ஞத்ர ஸமயா’’தி அயமேத்த² ஸத்தவிதா⁴ அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், நக³ணபோ⁴ஜனே க³ணபோ⁴ஜனஸஞ்ஞிஸ்ஸ வேமதிகஸ்ஸ வா து³க்கடம். நக³ணபோ⁴ஜனஸஞ்ஞிஸ்ஸ பன, யே ச த்³வே தயோ ஏகதோ க³ண்ஹந்தி, ப³ஹூனம் பிண்டா³ய சரித்வா ஏகதோ பு⁴ஞ்ஜந்தானம், நிச்சப⁴த்திகாதீ³ஸு, பஞ்ச போ⁴ஜனானி ட²பேத்வா ஸப்³ப³த்த², உம்மத்தகாதீ³னஞ்ச அனாபத்தி. க³ணபோ⁴ஜனதா, ஸமயாபா⁴வோ, அஜ்ஜோ²ஹரணந்தி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.

க³ணபோ⁴ஜனஸிக்கா²பத³வண்ணனா நிட்டி²தா.

3. பரம்பரபோ⁴ஜனஸிக்கா²பத³வண்ணனா

ததியே பரம்பரபோ⁴ஜனேதி க³ணபோ⁴ஜனே வுத்தனயேனேவ பஞ்சஹி போ⁴ஜனேஹி நிமந்திதஸ்ஸ யேன யேன பட²மம் நிமந்திதோ, தஸ்ஸ தஸ்ஸ போ⁴ஜனதோ உப்படிபாடியா வா அவிகப்பேத்வா வா பரஸ்ஸ பரஸ்ஸ போ⁴ஜனே. தஸ்மா யோ பி⁴க்கு² பஞ்சஸு ஸஹத⁴ம்மிகேஸு அஞ்ஞதரஸ்ஸ ‘‘மய்ஹம் ப⁴த்தபச்சாஸம் துய்ஹம் த³ம்மீ’’தி வா ‘‘விகப்பேமீ’’தி வா ஏவம் ஸம்முகா² வா ‘‘இத்த²ன்னாமஸ்ஸ த³ம்மீ’’தி (பாசி. 226) வா ‘‘விகப்பேமீ’’தி வா ஏவம் பரம்முகா²வா பட²மனிமந்தனம் அவிகப்பேத்வா பச்சா² நிமந்திதகுலே லத்³த⁴பி⁴க்க²தோ ஏகஸித்த²ம்பி அஜ்ஜோ²ஹரதி, பாசித்தியம். ஸமயா வுத்தனயா ஏவ.

வேஸாலியம் ஸம்ப³ஹுலே பி⁴க்கூ² ஆரப்³ப⁴ அஞ்ஞத்ர நிமந்திதபோ⁴ஜனவத்து²ஸ்மிம் பஞ்ஞத்தம், ‘‘அஞ்ஞத்ர ஸமயா’’தி அயமேத்த² திவிதா⁴ அனுபஞ்ஞத்தி, பரிவாரே பன விகப்பனம்பி க³ஹேத்வா ‘‘சதஸ்ஸோ அனுபஞ்ஞத்தியோ’’தி (பரி. 86) வுத்தம், அஸாதா⁴ரணபஞ்ஞத்தி, அனாணத்திகம், திகபாசித்தியம், நபரம்பரபோ⁴ஜனே பரம்பரபோ⁴ஜனஸஞ்ஞினோ வேமதிகஸ்ஸ வா து³க்கடம். நபரம்பரபோ⁴ஜனஸஞ்ஞிஸ்ஸ பன, யோ ச ஸமயே வா விகப்பேத்வா வா ஏகஸம்ஸட்டா²னி வா த்³வே தீணி நிமந்தனானி ஏகதோ வா கத்வா பு⁴ஞ்ஜதி, நிமந்தனப்படிபாடியா பு⁴ஞ்ஜதி, ஸகலேன கா³மேன வா பூகே³ன வா நிமந்திதோ தேஸு யத்த²கத்த²சி பு⁴ஞ்ஜதி, நிமந்தியமானோ வா ‘‘பி⁴க்க²ம் க³ஹேஸ்ஸாமீ’’தி வத³தி, தஸ்ஸ, நிச்சப⁴த்திகாதீ³ஸு, பஞ்ச போ⁴ஜனானி ட²பேத்வா ஸப்³ப³த்த², உம்மத்தகாதீ³னஞ்ச அனாபத்தி. பரம்பரபோ⁴ஜனதா, ஸமயாபா⁴வோ, அஜ்ஜோ²ஹரணந்தி இமானேத்த² தீணி அங்கா³னி. ஸமுட்டா²னாதீ³னி பட²மகதி²னஸதி³ஸானேவ, இத³ம் பன கிரியாகிரியந்தி.

பரம்பரபோ⁴ஜனஸிக்கா²பத³வண்ணனா நிட்டி²தா.

4. காணமாதாஸிக்கா²பத³வண்ணனா

சதுத்தே² பூவேஹீதி பஹேணகத்தா²ய படியத்தேஹி அதிரஸகமோத³கஸக்க²லிகாதீ³ஹி யேஹி கேஹிசி க²ஜ்ஜகேஹி. மந்தே²ஹீதி பாதே²ய்யத்தா²ய படியத்தேஹி யேஹி கேஹிசி ஸத்துதிலதண்டு³லாதீ³ஹி. த்³வத்திபத்தபூராதி முக²வட்டியா ஹேட்டி²மலேக²ம் அனதிக்கந்தா த்³வே வா தயோ வா பத்தபூரா. ததோ சே உத்தரீதி ஸசேபி ததியம் பத்தம் தூ²பீகதம் க³ண்ஹாதி, முக²வட்டியா ஹேட்டி²மலேக²தோ உபரிட்டி²தபூவக³ணனாய பாசித்தியம். த்³வத்திபத்தபூரே படிக்³க³ஹேத்வாதி ஏத்த² யேன த்³வே க³ஹிதா ஹோந்தி, தேன ப³ஹி பி⁴க்கு²ம் தி³ஸ்வா ‘‘ஏத்த² மயா த்³வே பத்தபூரா க³ஹிதா, த்வம் ஏகம் க³ண்ஹேய்யாஸீ’’தி வத்தப்³ப³ம், தேனாபி அஞ்ஞம் பஸ்ஸித்வா ‘‘பட²மம் ஆக³தேன த்³வே பத்தபூரா க³ஹிதா, மயா ஏகோ க³ஹிதோ, த்வம் மா க³ண்ஹீ’’தி வத்தப்³ப³ம். யேன பட²மம் ஏகோ க³ஹிதோ, தஸ்ஸாபி பரம்பராரோசனே ஏஸேவ நயோ. யேன பன ஸயமேவ தயோ க³ஹிதா, தேன அஞ்ஞம் தி³ஸ்வா ‘‘மா கோ² த்வம் ஏத்த² படிக்³க³ண்ஹீதி வத்தப்³ப³ம், அவத³ந்தஸ்ஸ து³க்கடம், தம் ஸுத்வா க³ண்ஹந்தஸ்ஸாபி து³க்கடமேவ. ததோ நீஹரித்வா பி⁴க்கூ²ஹி ஸத்³தி⁴ம் ஸம்விப⁴ஜிதப்³ப³ந்தி லத்³த⁴ட்டா²னதோ ஸப்³பா³ஸன்னம் ஆஸனஸாலம் வா விஹாரம் வா யத்த² வா பன நிப³த்³த⁴ம் படிக்கமதி, தத்த² க³ந்த்வா ஏகம் பத்தபூரம் அத்தனோ ட²பேத்வா ஸேஸம் பி⁴க்கு²ஸங்க⁴ஸ்ஸ தா³தப்³ப³ம். யதா²மித்தம் பன தா³தும் ந லப்³ப⁴தி. யேன ஏகோ க³ஹிதோ, ந தேன கிஞ்சி அகாமா தா³தப்³ப³ம், யதா²ருசி காதப்³ப³ம்.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ ந மத்தம் ஜானித்வா படிக்³க³ஹணவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், ஊனகத்³வத்திபத்தபூரே அதிரேகஸஞ்ஞிஸ்ஸ வேமதிகஸ்ஸ வா து³க்கடம். ஊனகஸஞ்ஞிஸ்ஸ பன, ந பஹேணகத்தா²ய ந பாதே²ய்யத்தா²ய வா படியத்தம், தத³த்தா²ய படியத்தஸேஸகம் வா, க³மனே வா படிப்பஸ்ஸத்³தே⁴, ஞாதகப்பவாரிதானம் வா தே³ந்தானம், அத்தனோ த⁴னேன க³ண்ஹந்தஸ்ஸ, உம்மத்தகாதீ³னஞ்ச அனாபத்தி. வுத்தலக்க²ணபூவமந்த²தா, அஸேஸகதா, அப்படிப்பஸ்ஸத்³த⁴க³மனதா, அனஞ்ஞாதகாதி³தா, அதிரேகப்படிக்³க³ஹணந்தி இமானேத்த² பஞ்ச அங்கா³னி, ஸமுட்டா²னாதீ³னி ஸஞ்சரித்தஸதி³ஸானேவாதி.

காணமாதாஸிக்கா²பத³வண்ணனா நிட்டி²தா.

5. பட²மபவாரணாஸிக்கா²பத³வண்ணனா

பஞ்சமே பு⁴த்தாவீதி பு⁴த்தவா, யேன பஞ்சன்னம் போ⁴ஜனானம் ஸாஸபமத்தம்பி அஜ்ஜோ²ஹரிதம், ஸோ ஏவம் வுச்சதி. பவாரிதோதி ‘‘அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தோ அபி⁴ஹரதி, படிக்கே²போ பஞ்ஞாயதீ’’தி (பாசி. 239) ஏவம் பாளியம் வுத்தபஞ்சங்க³வஸேன கதப்பவாரணோ, கதப்படிக்கே²போதி அத்தோ². தத்த² யஸ்மா ‘‘அஸனம் பஞ்ஞாயதீ’’தி இமினா விப்பகதபோ⁴ஜனோ ‘பவாரிதோ’தி வுத்தோ. யோ ச விப்பகதபோ⁴ஜனோ, தேன கிஞ்சி பு⁴த்தம், கிஞ்சி அபு⁴த்தம், யஞ்ச பு⁴த்தம், தம் ஸந்தா⁴ய ‘பு⁴த்தாவீ’திபி ஸங்க²ம் க³ச்ச²தி. தஸ்மா ‘பு⁴த்தாவீ’திவசனேன விஸும் கிஞ்சி அத்த²ஸித்³தி⁴ம் ந பஸ்ஸாம, ‘‘தி³ரத்ததிரத்த’’ந்திஆதீ³ஸு (பாசி. 52) பன தி³ரத்தாதி³வசனம் விய பவாரிதபத³ஸ்ஸ பரிவாரபா⁴வேன ப்³யஞ்ஜனஸிலிட்ட²தாய சேதம் வுத்தந்தி வேதி³தப்³ப³ம்.

பவாரணங்கே³ஸு பன அஸனம் பஞ்ஞாயதீதி விப்பகதபோ⁴ஜனம் தி³ஸ்ஸதி, தம் பு⁴ஞ்ஜமானோ சேஸ புக்³க³லோ ஹோதீதி அத்தோ². போ⁴ஜனம் பஞ்ஞாயதீதி பவாரணப்பஹோனகம் போ⁴ஜனம் தி³ஸ்ஸதி, ஓத³னாதீ³னம் சே அஞ்ஞதரம் படிக்கி²பிதப்³ப³ம் போ⁴ஜனம் ஹோதீதி அத்தோ². ஹத்த²பாஸே டி²தோதி பவாரணப்பஹோனகம் சே போ⁴ஜனம் க³ண்ஹித்வா தா³யகோ அட்³ட⁴தேய்யஹத்த²ப்பமாணே ஓகாஸே டி²தோ ஹோதீதி அத்தோ². அபி⁴ஹரதீதி ஸோ சே தா³யகோ தஸ்ஸ தம் போ⁴ஜனம் காயேன அபி⁴ஸம்ஹரதீதி அத்தோ². படிக்கே²போ பஞ்ஞாயதீதி படிக்கே²போ தி³ஸ்ஸதி, தம் சே அபி⁴ஹடம் ஸோ பி⁴க்கு² காயேன வா வாசாய வா படிக்கி²பதீதி அத்தோ². ஏவம் பஞ்சன்னம் அங்கா³னம் வஸேன பவாரிதோ ஹோதி.

தத்ராயம் வினிச்ச²யோ – ‘அஸன’ந்திஆதீ³ஸு தாவ யஞ்ச அஸ்னாதி, யஞ்ச போ⁴ஜனம் ஹத்த²பாஸே டி²தேன அபி⁴ஹடம் படிக்கி²பதி, தம் ஓத³னோ கும்மாஸோ ஸத்து மச்சோ² மம்ஸந்தி இமேஸம் அஞ்ஞதரமேவ வேதி³தப்³ப³ம். தத்த² ஓத³னோ நாம ஸாலி வீஹி யவோ கோ³து⁴மோ கங்கு³ வரகோ குத்³ரூஸகோதி இமேஸம் ஸத்தன்னம் த⁴ஞ்ஞானம் தண்டு³லே க³ஹேத்வா ‘‘ப⁴த்தம் பசாமா’’தி வா ‘‘யாகு³ம் பசாமா’’தி வா யம்கிஞ்சி ஸந்தா⁴ய பசந்து, ஸசே உண்ஹம் வா ஸீதலம் வா பு⁴ஞ்ஜந்தானம் போ⁴ஜனகாலே க³ஹிதக³ஹிதட்டா²னே ஓதி⁴ பஞ்ஞாயதி, ஓத³னோ ஹோதி, பவாரணம் ஜனேதி. யோ பன பாயாஸோ வா அம்பி³லயாகு³ வா உத்³த⁴னதோ ஓதாரிதமத்தா அப்³பு⁴ண்ஹா ஸக்கா ஹோதி ஆவிஜ்ஜி²த்வா பிவிதும், ஸா யஸ்ஸ ஹத்தே²ன க³ஹிதோகாஸேபி ஓதி⁴ ந பஞ்ஞாயதி, பவாரணம் ந ஜனேதி. ஸசே பன உஸுமாய விக³தாய க⁴னபா⁴வம் க³ச்ச²தி, ஓதி⁴ம் த³ஸ்ஸேதி, புன பவாரணம் ஜனேதி, புப்³பே³ தனுகபா⁴வோ ந ரக்க²தி. ஸசேபி ப³ஹூ பண்ணப²லகளீரே பக்கி²பித்வா முட்டி²மத்தாபி தண்டு³லா பக்கி²த்தா ஹோந்தி, போ⁴ஜனகாலே சே ஓதி⁴ பஞ்ஞாயதி, பவாரணம் ஜனேதி. அயாகு³கே நிமந்தனே ‘‘யாகு³ம் த³ஸ்ஸாமா’’தி ப⁴த்தே உத³ககஞ்ஜிககீ²ராதீ³னி ஆகிரித்வா ‘‘யாகு³ம் க³ண்ஹதா²’’தி தே³ந்தி, கிஞ்சாபி தனுகா ஹோதி, பவாரணம் ஜனேதியேவ. ஸசே பன பக்குதி²தேஸு உத³காதீ³ஸு பக்கி²பித்வா பசித்வா தே³ந்தி, யாகு³ஸங்க³ஹமேவ க³ச்ச²தி. ஸசே யாகு³யாபி ஸாஸபமத்தம்பி மச்ச²மம்ஸக்க²ண்ட³ம் வா ந்ஹாரு வா பக்கி²த்தம் ஹோதி, பவாரணம் ஜனேதி. ட²பேத்வா ஸானுலோமானம் வுத்தத⁴ஞ்ஞானம் தண்டு³லே அஞ்ஞேஹி வேளுதண்டு³லாதீ³ஹி வா கந்த³மூலப²லேஹி வா யேஹி கேஹிசி கதப⁴த்தம் பவாரணம் ந ஜனேதி. கும்மாஸோ நாம யவேஹி கதோ. அஞ்ஞேஹி பன முக்³கா³தீ³ஹி கதகும்மாஸோ பவாரணம் ந ஜனேதி. ஸத்து நாம ஸத்த த⁴ஞ்ஞானி ப⁴ஜ்ஜித்வா கதோ. அந்தமஸோ க²ரபாகப⁴ஜ்ஜிதானம் வீஹீனம் தண்டு³லே கோட்டேத்வா கதசுண்ணம்பி குண்ட³கம்பி ஸத்துஸங்க³ஹமேவ க³ச்ச²தி. ஸமபாகப⁴ஜ்ஜிதானம் பன ஆதபஸுக்கா²னம் குண்ட³கம் வா, யே கேசி தண்டு³லா வா லாஜா வா, லாஜேஹி கதப⁴த்தஸத்துஆதீ³னி வா ந பவாரேந்தி. மச்ச²மம்ஸேஸு ஸசே யாகு³ம் பிவந்தஸ்ஸ யாகு³ஸித்த²மத்தானேவ த்³வே மச்ச²க்க²ண்டா³னி வா மம்ஸக்க²ண்டா³னி வா ஏகபா⁴ஜனே வா நானாபா⁴ஜனே வா தே³ந்தி, தானி சே அகா²த³ந்தோ அஞ்ஞம் பவாரணப்பஹோனகம் யம்கிஞ்சி படிக்கி²பதி, ந பவாரேதி. ததோ ஏகம் கா²தி³தம், ஏகம் ஹத்தே² வா பத்தே வா ஹோதி, ஸசே அஞ்ஞம் படிக்கி²பதி பவாரேதி. த்³வேபி கா²தி³தானி ஹோந்தி, முகே² ஸாஸபமத்தம்பி அவஸிட்ட²ம் நத்தி², ஸசேபி அஞ்ஞம் படிக்கி²பதி, ந பவாரேதி. யோ பன அகப்பியமம்ஸம் குலதூ³ஸனவேஜ்ஜகம்மஉத்தரிமனுஸ்ஸத⁴ம்மாரோசனஸாதி³தரூபியாதீ³ஹி நிப்³ப³த்தம் அகப்பியபோ⁴ஜனஞ்ச அஞ்ஞம் கப்பியம் வா அகப்பியம் வா கா²த³ந்தோ படிக்கி²பதி, ந பவாரேதி.

ஏவம் யஞ்ச அஸ்னாதி, யஞ்ச போ⁴ஜனம் ஹத்த²பாஸே டி²தேன அபி⁴ஹடம் படிக்கி²பந்தோ பவாரணம் ஜனேதி, தம் ஞத்வா இதா³னி யதா² ஆபஜ்ஜதி, தஸ்ஸ ஜானனத்த²ம் அயம் வினிச்ச²யோ வேதி³தப்³போ³ – ‘‘அஸனம் போ⁴ஜன’’ந்தி ஏத்த² தாவ யேன ஏகஸித்த²ம்பி அஜ்ஜோ²ஹடம் ஹோதி, ஸோ ஸசே பத்தமுக²ஹத்தே²ஸு யத்த²கத்த²சி போ⁴ஜனே ஸதி ஸாபேக்கோ²வ அஞ்ஞம் வுத்தலக்க²ணம் போ⁴ஜனம் படிக்கி²பதி, பவாரேதி. ஸசே பன நிரபேக்கோ² ஹோதி, யம் பத்தாதீ³ஸு அவஸிட்ட²ம், தம் ந ச அஜ்ஜோ²ஹரிதுகாமோ, அஞ்ஞஸ்ஸ வா தா³துகாமோ, அஞ்ஞத்ர வா க³ந்த்வா பு⁴ஞ்ஜிதுகாமோ, ஸோ படிக்கி²பந்தோபி ந பவாரேதி. ‘‘ஹத்த²பாஸே டி²தோ’’தி ஏத்த² பன ஸசே பி⁴க்கு² நிஸின்னோ ஹோதி, ஆனிஸத³ஸ்ஸ பச்சி²மந்ததோ பட்டா²ய, ஸசே டி²தோ, பண்ஹீனம் அந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய தா³யகஸ்ஸ நிஸின்னஸ்ஸ வா டி²தஸ்ஸ வா நிபன்னஸ்ஸ வா ட²பேத்வா பஸாரிதஹத்த²ம் யம் ஆஸன்னதரம் அங்க³ம், தஸ்ஸ ஓரிமந்தேன பரிச்சி²ந்தி³த்வா அட்³ட⁴தேய்யஹத்தோ² ‘ஹத்த²பாஸோ’தி வேதி³தப்³போ³. தஸ்மிம் ட²த்வா அபி⁴ஹடம் படிக்கி²பந்தஸ்ஸேவ பவாரணா ஹோதி, ந ததோ பரம். ‘அபி⁴ஹரதீ’தி ஹத்த²பாஸப்³ப⁴ந்தரே டி²தோ க³ஹணத்த²ம் உபனாமேதி. ஸசே பன அனந்தரனிஸின்னோபி பி⁴க்கு² ஹத்தே² வா ஆதா⁴ரகே வா டி²தம் பத்தம் அனபி⁴ஹரித்வாவ ‘‘ப⁴த்தம் க³ண்ஹதா²’’தி வத³தி, தம் படிக்கி²பதோ பவாரணா நத்தி². ப⁴த்தபச்சி²ம் ஆனேத்வா புரதோ பூ⁴மியம் ட²பேத்வா ஏவம் வுத்தேபி ஏஸேவ நயோ. ஈஸகம் பன உத்³த⁴ரித்வா வா அபனாமேத்வா வா ‘க³ண்ஹதா²’தி வுத்தே தம் படிக்கி²பதோ பவாரணா ஹோதி. ப⁴த்தபச்சி²ம் க³ஹேத்வா பரிவிஸந்தஸ்ஸ அஞ்ஞோ ‘‘அஹம் தா⁴ரேஸ்ஸாமீ’’தி க³ஹிதமத்தமேவ கரோதி, பரிவேஸகோயேவ பன தம் தா⁴ரேதி, தஸ்மா ஸா அபி⁴ஹடாவ ஹோதி, ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ஹோதி. ஸசே பன பரிவேஸகேன பு²ட்ட²மத்தாவ ஹோதி, இதரோவ நம் தா⁴ரேதி, ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ந ஹோதி. கடச்சு²னா உத்³த⁴டே பன ஹோதி, த்³வின்னம் ஸமபா⁴ரேபி படிக்கி²பந்தோ பவாரேதியேவ. அனந்தரஸ்ஸ தி³ய்யமானே இதரோ பத்தம் பித³ஹதி, அஞ்ஞஸ்ஸ அபி⁴ஹடம் நாம படிக்கி²த்தம் ஹோதி, தஸ்மா பவாரணா நத்தி². ‘படிக்கே²போ’தி ஏத்த² வாசாய அபி⁴ஹடே படிக்கே²போ ந ருஹதி, காயேன அபி⁴ஹடம் பன அங்கு³லிசலனாதி³னா காயவிகாரேன வா ‘‘அலம், மா தே³ஹீ’’திஆதி³னா வசீவிகாரேன வா படிக்கி²பதோ பவாரணா ஹோதி.

ஏகோ ஸமம்ஸகம் ரஸம் அபி⁴ஹரதி, ‘‘ரஸம் படிக்³க³ண்ஹதா²’’தி வத³தி, தம் ஸுத்வா படிக்கி²பதோ பவாரணா நத்தி². ‘மம்ஸரஸ’ந்தி வுத்தே பன படிக்கி²பதோ பவாரணா ஹோதி. ‘‘இமம் க³ண்ஹதா²’’தி வுத்தேபி ஹோதியேவ. மம்ஸம் விஸும் கத்வா ‘மம்ஸரஸ’ந்தி வுத்தேபி ஸசே ஸாஸபமத்தம்பி க²ண்ட³ம் அத்தி², படிக்கி²பதோ பவாரணா ஹோதி. ஸசே நத்தி², வட்டதி. களீரபனஸாதீ³ஹி மிஸ்ஸேத்வா மச்ச²மம்ஸம் பசந்தி, தம் க³ஹேத்வா ‘‘களீரஸூபம் க³ண்ஹத², பனஸப்³யஞ்ஜனம் க³ண்ஹதா²’’தி வத³தி, ஏவம்பி ந பவாரேதி. கஸ்மா? அபவாரணாரஹஸ்ஸ நாமேன வுத்தத்தா. ‘‘மச்ச²மம்ஸம் ப்³யஞ்ஜன’’ந்தி வா ‘‘இமம் க³ண்ஹதா²’’தி வா வுத்தே பன பவாரேதி, அயமேத்த² ஸங்கே²போ, வித்தா²ரோ பன ஸமந்தபாஸாதி³காயம் வுத்தோ. க³மனாதீ³ஸு பன யஸ்மிம் இரியாபதே² பவாரேதி, தம் அவிகோபேந்தேனேவ பு⁴ஞ்ஜிதப்³ப³ம்.

அனதிரித்தந்தி ந அதிரித்தம், ந அதி⁴கந்தி அத்தோ². தம் பன கப்பியகதாதீ³ஹி ஸத்தஹி வினயகம்மாகாரேஹி அகதம் வா கி³லானஸ்ஸ அனதி⁴கம் வா ஹோதி. தஸ்மா பத³பா⁴ஜனே (பாசி. 239) ‘அகப்பியகத’ந்திஆதி³ வுத்தம், தத்த² யம் ப²லம் வா கந்த³மூலாதி³ வா பஞ்சஹி ஸமணகப்பியேஹி கப்பியம் அகதம், யஞ்ச அகப்பியமம்ஸம் வா அகப்பியபோ⁴ஜனம் வா, ஏதம் அகப்பியம் நாம, தம் அகப்பியம் ‘‘அலமேதம் ஸப்³ப³’’ந்தி ஏவம் அதிரித்தம் கதம் அகப்பியகதந்தி வேதி³தப்³ப³ம். அப்படிக்³க³ஹிதகதந்தி பி⁴க்கு²னா அப்படிக்³க³ஹிதம்யேவ புரிமனயேன அதிரித்தம் கதம். அனுச்சாரிதகதந்தி கப்பியம் காரேதும் ஆக³தேன பி⁴க்கு²னா ஈஸகம்பி அனுக்கி²த்தம் வா அனபனாமிதம் வா கதம். அஹத்த²பாஸே கதந்தி கப்பியம் காரேதும் ஆக³தஸ்ஸ ஹத்த²பாஸதோ ப³ஹி டி²தேன கதம். அபு⁴த்தாவினா கதந்தி யோ அதிரித்தம் கரோதி, தேன பவாரணப்பஹோனகம் போ⁴ஜனம் அபு⁴த்தேன கதம். பு⁴த்தாவினா பவாரிதேன ஆஸனா வுட்டி²தேன கதந்தி இத³ம் உத்தானமேவ. ‘‘அலமேதம் ஸப்³ப³’’ந்தி அவுத்தந்தி வசீபே⁴த³ம் கத்வா ஏவம் அவுத்தம் ஹோதி. இதி இமேஹி ஸத்தஹி வினயகம்மாகாரேஹி யம் அதிரித்தம் கப்பியம் அகதம், யஞ்ச பன ந கி³லானாதிரித்தம், தது³ப⁴யம்பி அனதிரித்தம். அதிரித்தம் பன தஸ்ஸேவ படிபக்க²னயேன வேதி³தப்³ப³ம்.

அபிசேத்த² பு⁴த்தாவினா கதம் ஹோதீதி (பாசி. 239) அந்தமஸோ அனந்தரனிஸின்னஸ்ஸ பத்ததோ ஏகம்பி ஸித்த²ம் வா மம்ஸஹீரம் வா கா²தி³த்வா கதம்பி பு⁴த்தாவினா கதம் ஹோதி, யோ பாதோவ ஏவம் பு⁴த்தாவீ பவாரிதோ நிஸீத³தியேவ, ஸோ உபகட்டே²பி காலே அபி⁴ஹடம் பிண்ட³ம் பி⁴க்கு²னா உபனீதம் கப்பியம் காதும் லப⁴தி. ஸசே பன தஸ்மிம் கப்பியே கதே பு⁴ஞ்ஜந்தஸ்ஸ அஞ்ஞம் ஆமிஸம் ஆகிரந்தி, தம் ஸோ புன காதும் ந லப⁴தி. யஞ்ஹி அகதம், தம் காதப்³ப³ம். யேன ச அகதம், தேன ச காதப்³ப³ந்தி (பாசி. அட்ட². 238-9) வுத்தம், தஸ்மா தஸ்மிம் பா⁴ஜனே கரியமானே பட²மகதேன ஸத்³தி⁴ம் கதம் ஹோதீதி தம் காதும் ந வட்டதி. அஞ்ஞஸ்மிம் பன பா⁴ஜனே தேன வா அஞ்ஞேன வா காதும் வட்டதி. ஏவம் கதம் பட²மகதேன மிஸ்ஸேத்வாபி பு⁴ஞ்ஜிதும் வட்டதி, ந கேவலஞ்ச தஸ்ஸ யேன பன கதம், தம் ட²பேத்வா அஞ்ஞேஸம் பவாரிதானம்பி பு⁴ஞ்ஜிதும் வட்டதி. யதா² பன அகதேன மிஸ்ஸம் ந ஹோதி, ஏவம் முக²ஞ்ச ஹத்த²ஞ்ச ஸுத்³த⁴ம் கத்வா பு⁴ஞ்ஜிதப்³ப³ம். கி³லானாதிரித்தம் பன ந கேவலம் கி³லானஸ்ஸ பு⁴த்தாவஸேஸமேவ, அத² கோ² யம்கிஞ்சி கி³லானம் உத்³தி³ஸ்ஸ ‘‘அஜ்ஜ வா ஸ்வே வா யதா³ வா இச்ச²தி, ததா³ கா²தி³ஸ்ஸதீ’’தி ஆஹடம், தம் ஸப்³ப³ம் ‘கி³லானாதிரித்த’ந்தி வேதி³தப்³ப³ம். கா²த³னீயம் வா போ⁴ஜனீயம் வாதி யம்கிஞ்சி யாவகாலிகம். கா²தே³ய்ய வா பு⁴ஞ்ஜேய்ய வா பாசித்தியந்தி ஏத்த² வுத்தனயேன பவாரிதஸ்ஸ அனதிரித்தம் யம்கிஞ்சி ஆமிஸம் அஜ்ஜோ²ஹரணத்தா²ய படிக்³க³ண்ஹதோ க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம்.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ அஞ்ஞத்ர பு⁴ஞ்ஜனவத்து²ஸ்மிம் பஞ்ஞத்தம், ‘‘அனதிரித்த’’ந்தி அயமேத்த² அனுபஞ்ஞத்தி, அஸாதா⁴ரணபஞ்ஞத்தி, அனாணத்திகம், திகபாசித்தியம், யாமகாலிகாதீ³னி ஆஹாரத்தா²ய க³ண்ஹதோ, நிராமிஸானி அஜ்ஜோ²ஹரதோ ச து³க்கடம், ததா² அதிரித்தே அனதிரித்தஸஞ்ஞினோ சேவ வேமதிகஸ்ஸ ச. அதிரித்தஸஞ்ஞினோ பன, ‘‘அதிரித்தம் காராபேத்வா பு⁴ஞ்ஜிஸ்ஸாமீ’’தி க³ண்ஹந்தஸ்ஸ, அஞ்ஞஸ்ஸத்தா²ய க³ண்ஹந்தஸ்ஸ, யாமகாலிகாதீ³னி தேஸம் அனுஞ்ஞாதபரிபோ⁴க³வஸேன நிராமிஸானி பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. பவாரிதபா⁴வோ, ஆமிஸஸ்ஸ அனதிரித்ததா, காலேன அஜ்ஜோ²ஹரணந்தி இமானேத்த² தீணி அங்கா³னி. ஸமுட்டா²னாதீ³னி பட²மகதி²னஸதி³ஸானேவ, இத³ம் பன கிரியாகிரியந்தி.

பட²மபவாரணாஸிக்கா²பத³வண்ணனா நிட்டி²தா.

6. து³தியபவாரணாஸிக்கா²பத³வண்ணனா

ச²ட்டே² அபி⁴ஹட்டு²ம் பவாரேய்யாதி அபி⁴ஹரித்வா ‘‘ஹந்த³, பி⁴க்கு² கா²த³ வா பு⁴ஞ்ஜ வா’’தி ஏவம் பவாரேய்ய. ஜானந்தி ஸுத்வா வா தி³ஸ்வா வா தஸ்ஸ பவாரிதபா⁴வம் ஜானந்தோ. ஆஸாத³னாபேக்கோ²தி ஆஸாத³னம் சோத³னம் மங்குகரணபா⁴வம் அபேக்க²மானோ. பு⁴த்தஸ்மிம் பாசித்தியந்தி ஏத்த² அபி⁴ஹாரே தாவ து³க்கடம், ஸசே ஸோ தம் க³ண்ஹாதி, புன அபி⁴ஹாரகஸ்ஸ து³க்கடம், தஸ்மிம் பன பு⁴ஞ்ஜந்தே அபி⁴ஹாரகஸ்ஸ தஸ்ஸ அஜ்ஜோ²ஹாரே அஜ்ஜோ²ஹாரே து³க்கடம், போ⁴ஜனபரியோஸானே பாசித்தியம்.

ஸாவத்தி²யம் அஞ்ஞதரம் பி⁴க்கு²ம் ஆரப்³ப⁴ அனதிரித்தேன போ⁴ஜனேன அபி⁴ஹட்டு²ம் பவாரணாவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், பவாரிதே பவாரிதஸஞ்ஞினோ பாசித்தியம். வேமதிகஸ்ஸ, யாமகாலிகாதீ³னி ஆஹாரத்தா²ய அபி⁴ஹரந்தஸ்ஸ, தேஸஞ்ச படிக்³க³ஹணஅஜ்ஜோ²ஹாரேஸு, அப்பவாரிதே ச பவாரிதஸஞ்ஞினோ, வேமதிகஸ்ஸ ச து³க்கடம். அப்பவாரிதஸஞ்ஞிஸ்ஸ பன, யோ ச அதிரித்தம் காராபேத்வா தே³தி, ‘‘காராபேத்வா வா பு⁴ஞ்ஜாஹீ’’தி தே³தி, யோ வா ‘‘அஞ்ஞஸ்ஸத்தா²ய ஹரந்தோ க³ச்சா²ஹீ’’தி தே³தி, யோ ச யாமகாலிகாதீ³னி ‘‘ஸதி பச்சயே பரிபு⁴ஞ்ஜாஹீ’’தி தே³தி, தஸ்ஸ, உம்மத்தகாதீ³னஞ்ச அனாபத்தி. பவாரிததா, பவாரிதஸஞ்ஞிதா, ஆஸாத³னாபேக்க²தா, அனதிரித்தேன அபி⁴ஹட்டு²ம் பவாரணதா, போ⁴ஜனபரியோஸானந்தி இமானேத்த² பஞ்ச அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன து³க்க²வேத³னந்தி.

து³தியபவாரணாஸிக்கா²பத³வண்ணனா நிட்டி²தா.

7. விகாலபோ⁴ஜனஸிக்கா²பத³வண்ணனா

ஸத்தமே விகாலேதி விக³தே காலே, மஜ்ஜ²ன்ஹிகாதிக்கமனதோ யாவ அருணுக்³க³மனாதி அதி⁴ப்பாயோ. தஸ்மா யோ பி⁴க்கு² ஏதஸ்மிம் அந்தரே யம்கிஞ்சி வனமூலப²லம் உபாதா³ய ஆமம் வா பக்கம் வா ஆமிஸஸங்கே²பக³தம் கா²த³னீயம் வா போ⁴ஜனீயம் வா அஜ்ஜோ²ஹரணத்தா²ய படிக்³க³ண்ஹாதி, தஸ்ஸ படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம்.

ராஜக³ஹே ஸத்தரஸவக்³கி³யே பி⁴க்கூ² ஆரப்³ப⁴ விகாலே போ⁴ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், யாமகாலிகாதீ³னி ஆஹாரத்தா²ய படிக்³க³ஹணஅஜ்ஜோ²ஹாரேஸு, காலே விகாலஸஞ்ஞிஸ்ஸ, வேமதிகஸ்ஸ ச து³க்கடம், காலே காலஸஞ்ஞிஸ்ஸ யாமகாலிகாதீ³னி ஸதி பச்சயே பரிபு⁴ஞ்ஜந்தஸ்ஸ உம்மத்தகாதீ³னஞ்ச அனாபத்தி. ‘‘அனுஜானாமி, பி⁴க்க²வே, ரோமட்ட²கஸ்ஸ ரோமட்ட²ம், ந ச பி⁴க்க²வே ப³ஹிமுக²த்³வாரா நீஹரித்வா அஜ்ஜோ²ஹரிதப்³ப³’’ந்தி (சூளவ. 273) அனுஞ்ஞாதனயேன ரோமட்ட²கஸ்ஸாபி அனாபத்தி. விகாலதா, யாவகாலிகதா, அஜ்ஜோ²ஹரணந்தி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானீதி.

விகாலபோ⁴ஜனஸிக்கா²பத³வண்ணனா நிட்டி²தா.

8. ஸன்னிதி⁴காரகஸிக்கா²பத³வண்ணனா

அட்ட²மே ஸன்னிதி⁴காரகந்தி காரோ கரணம் கிரியாதி அத்த²தோ ஏகம், ஸன்னிதி⁴ காரோ அஸ்ஸாதி ஸன்னிதி⁴காரம், ஸன்னிதி⁴காரமேவ ஸன்னிதி⁴காரகம், படிக்³க³ஹேத்வா ஏகரத்திம் வீதினாமிதஸ்ஸேதம் நாமம். தஸ்மா ஏவம் ஸன்னிதி⁴கதம் யம்கிஞ்சி யாவகாலிகம் வா யாமகாலிகம் வா ‘அஜ்ஜோ²ஹரிஸ்ஸாமீ’தி க³ண்ஹந்தஸ்ஸ படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம். ஸசேபி பத்தோ து³த்³தோ⁴தோ ஹோதி, யம் அங்கு³லியா க⁴ம்ஸந்தஸ்ஸ லேகா² பஞ்ஞாயதி, க³ண்டி²கபத்தஸ்ஸ வா க³ண்டி²கந்தரே ஸ்னேஹோ பவிட்டோ² ஹோதி, யோ உண்ஹே ஓதாபேந்தஸ்ஸ பக்³க⁴ரதி, உண்ஹயாகு³யா வா க³ஹிதாய ஸந்தி³ஸ்ஸதி, தாதி³ஸே பத்தேபி புனதி³வஸே பு⁴ஞ்ஜந்தஸ்ஸ பாசித்தியம். யம் பன பி⁴க்கு² நிரபேக்கோ² ஸாமணேரானம் பரிச்சஜித்வா தேஹி நிஹிதம் லபி⁴த்வா பு⁴ஞ்ஜதி, தம் வட்டதி. ஸயம் படிக்³க³ஹேத்வா அபரிச்சத்தமேவ ஹி து³தியதி³வஸே கப்பியபோ⁴ஜனம் பு⁴ஞ்ஜந்தஸ்ஸ பாசித்தியம். அகப்பியேஸு பன மனுஸ்ஸமம்ஸே து²ல்லச்சயேன ஸத்³தி⁴ம் பாசித்தியம், ஸேஸேஸு பன து³க்கடேன ஸத்³தி⁴ம். யாமகாலிகம் ஸதி பச்சயே அஜ்ஜோ²ஹரதோ பாசித்தியம், ஆஹாரத்தா²ய அஜ்ஜோ²ஹரதோ து³க்கடேன ஸத்³தி⁴ம். யோ பன பவாரிதோ ஹுத்வா அனதிரித்தகதம் அஜ்ஜோ²ஹரதி, தஸ்ஸ ஸப்³ப³விகப்பேஸு அபரம்பி பாசித்தியம் வட்³ட⁴தி. ஸசே விகாலே அஜ்ஜோ²ஹரதி, அனதிரித்தபச்சயா ஸப்³ப³விகப்பேஸு அனாபத்தி, ஸதி பச்சயே விகாலபச்சயா யாமகாலிகாதீ³ஸு ச அனாபத்தி. அவஸேஸேஸு விகாலபச்சயா பாசித்தியம் வட்³ட⁴தியேவ. பி⁴க்கு²ஸ்ஸ பன ஸன்னிதி⁴ பி⁴க்கு²னியா வட்டதி, பி⁴க்கு²னியா ச ஸன்னிதி⁴ பி⁴க்கு²ஸ்ஸ வட்டதி, பி⁴க்கு²னிக்க²ந்த⁴கே (சூளவ. 421-422) அனுஞ்ஞாதத்தா வட்டதீதி.

ஸாவத்தி²யம் ஆயஸ்மந்தம் பே³லட்ட²ஸீஸம் ஆரப்³ப⁴ ஸன்னிதி⁴காரகபோ⁴ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், ஸத்தாஹகாலிக யாவஜீவிகானம் பன ஆஹாரத்தா²ய படிக்³க³ஹணே அஜ்ஜோ²ஹாரே ச து³க்கடம். யதா² சேதானி ஆஹாரத்தா²ய ந கப்பந்தி, ஏவம் யாவகாலிகாதீ³ஹி ஸம்ஸட்டா²னிபி, வுத்தஞ்ஹேதம் ‘‘யாவகாலிகேன, பி⁴க்க²வே, யாமகாலிகம் தத³ஹுபடிக்³க³ஹிதம் காலே கப்பதி, விகாலே ந கப்பதீ’’திஆதி³ (மஹாவ. 305). தஸ்மா ஸசேபி தம் தம் தேன தேன ஸத்³தி⁴ம் ஸம்ஸட்ட²ம் லப⁴தி, ஸசே அஸம்பி⁴ன்னரஸம் வா ஹோதி ஸுதோ⁴தம் வா, யதா² இதரேன ஸம்ஸக்³கோ³ ந பஞ்ஞாயதி, அத்தனோ காலானுரூபேன பரிபு⁴ஞ்ஜிதும் வட்டதி.

ஸசே பன ஸம்பி⁴ன்னரஸம் வா ஹோதி து³த்³தோ⁴தம் வா, ந வட்டதி. யாவகாலிகஞ்ஹி அத்தனா ஸத்³தி⁴ம் ஸம்பி⁴ன்னரஸானி தீணிபி யாமகாலிகாதீ³னி அத்தனோ ஸபா⁴வம் உபனேதி, யாமகாலிகம் த்³வேபி ஸத்தாஹகாலிகாதீ³னி அத்தனோ ஸபா⁴வம் உபனேதி, ஸத்தாஹகாலிகம் யாவஜீவிகமேவ அத்தனோ ஸபா⁴வம் உபனேதி. தஸ்மா தேன தத³ஹுபடிக்³க³ஹிதேன ஸத்³தி⁴ம் தத³ஹுபடிக்³க³ஹிதம் வா புரே படிக்³க³ஹிதம் வா யாவஜீவிகம் ஸத்தாஹம் கப்பதி, த்³வீஹப்படிக்³க³ஹிதேன சா²ஹம், தீஹப்படிக்³க³ஹிதேன பஞ்சாஹம்…பே… ஸத்தாஹப்படிக்³க³ஹிதேன தத³ஹேவ கப்பதீதி வேதி³தப்³ப³ம். தஸ்மாயேவ ஹி ‘‘ஸத்தாஹகாலிகேன, பி⁴க்க²வே, யாவஜீவிகம் தத³ஹுபடிக்³க³ஹித’’ந்தி அவத்வா ‘‘படிக்³க³ஹிதம் ஸத்தாஹம் கப்பதீ’’தி வுத்தம். காலயாமஸத்தாஹாதிக்கமேஸு சேத்த² விகாலபோ⁴ஜன ஸன்னிதி⁴பே⁴ஸஜ்ஜஸிக்கா²பதா³னம் வஸேன ஆபத்தியோ வேதி³தப்³பா³, இமேஸு பன சதூஸு காலிகேஸு யாவகாலிகம் யாமகாலிகந்தி இமமேவ த்³வயம் அந்தோவுட்ட²ஞ்சேவ ஸன்னிதி⁴காரகஞ்ச, ஸத்தாஹகாலிகம் யாவஜீவிகஞ்ச அகப்பியகுடியம் நிக்கி²பிதும்பி வட்டதி, ஸன்னிதி⁴ம்பி ந ஜனேதி. அகப்பியகுடியம் அந்தோவுட்டே²ன பன தேன ஸத்³தி⁴ம் இதரத்³வயம் தத³ஹுபடிக்³க³ஹிதம்பி ந வட்டதி, முக²ஸன்னிதி⁴ நாம ஹோதி, மஹாபச்சரியம் பன அந்தோவுட்ட²ம் ஹோதீதி வுத்தம். தத்த² நாமமத்தமேவ நானாகரணம், ஆபத்தி பன து³க்கடமேவ. தத்த² அகப்பியகுடி நாம ஸங்க⁴ஸ்ஸ வா உபஸம்பன்னபுக்³க³லஸ்ஸ வா ஸந்தகம் வஸனத்தா²ய கதகே³ஹம், தத்த² ஸஹஸேய்யப்பஹோனகே பதே³ஸே வுட்ட²ம் யாவகாலிகஞ்ச யாமகாலிகஞ்ச ஸங்கி⁴கம் வா உபஸம்பன்னபுக்³க³லஸ்ஸ வா ஸந்தகம் அந்தோவுட்ட²ம் நாம ஹோதி, தத்த² பக்கம் அந்தோபக்கம் நாம, யத்த² கத்த²சி பன ஸயம் பக்கம் ஸாமம் பக்கம் நாம, தம் ஸப்³ப³ம் அனஜ்ஜோ²ஹரணீயம். தேன தேன ஸத்³தி⁴ம் ஸம்ஸட்ட²ம்பி தம்க³திகமேவ, ஸப்³ப³ம் அஜ்ஜோ²ஹரந்தஸ்ஸ து³க்கடம். தஸ்மா அந்தோவுட்ட²அந்தோபக்கமோசனத்த²ம் ப⁴க³வதா சதஸ்ஸோ கப்பியபூ⁴மியோ (மஹாவ. 295) அனுஞ்ஞாதா, தாஸம் வினிச்ச²யோ ஸமந்தபாஸாதி³காயம் (மஹாவ. அட்ட². 295) வுத்தோ. யத்த² பனேதா ந ஸந்தி, தத்த² அனுபஸம்பன்னஸ்ஸ ஸந்தகம் கத்வா பரிபு⁴ஞ்ஜிதும் வட்டதி. ஸாமம் பாகம்பி புனபாகம் வட்டதி, அஸன்னிதி⁴காரகே ஸன்னிதி⁴காரகஸஞ்ஞினோ, வேமதிகஸ்ஸ வா து³க்கடம். அஸன்னிதி⁴காரகஸஞ்ஞினோ, யாவகாலிகாதீ³னி தீணி நித³ஹித்வா ஸகம் ஸகம் காலம் அனதிக்கமித்வா, யாவஜீவிகம் ஸதா³பி ஸதி பச்சயே பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. ஆமிஸம், ஸன்னிதி⁴பா⁴வோ, தஸ்ஸ அஜ்ஜோ²ஹரணந்தி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.

ஸன்னிதி⁴காரகஸிக்கா²பத³வண்ணனா நிட்டி²தா.

9. பணீதபோ⁴ஜனஸிக்கா²பத³வண்ணனா

நவமே பணீதபோ⁴ஜனானீதி பணீதஸம்ஸட்டா²னி ஸத்தத⁴ஞ்ஞனிப்³ப³த்தானி போ⁴ஜனானி. யதா² ஹி ஆஜஞ்ஞயுத்தோ ரதோ² ‘ஆஜஞ்ஞரதோ²’தி வுச்சதி, ஏவமிதா⁴பி பணீதஸம்ஸட்டா²னி போ⁴ஜனானி பணீதபோ⁴ஜனானீதி. யேஹி பன பணீதேஹி ஸம்ஸட்டா²னி, தானி ‘பணீதபோ⁴ஜனானீ’தி வுச்சந்தி, தேஸம் பபே⁴த³த³ஸ்ஸனத்த²ம் ஸேய்யதி²த³ம் ஸப்பி நவனீதந்திஆதி³மாஹ, தத்த² ஸப்பிஆதீ³னி பே⁴ஸஜ்ஜஸிக்கா²பதே³ (கங்கா². அட்ட². பே⁴ஸஜ்ஜஸிக்கா²பத³வண்ணனா) வுத்தலக்க²ணேனேவ வேதி³தப்³பா³னி. மச்சா²தீ³ஸு பன ஸப்³போ³பி ‘ஓத³கோ’தி (பாசி. 260) வுத்தலக்க²ணோ மச்சோ² மச்சோ²யேவ. யேஸம் பன மம்ஸம் கப்பதி, தேஸம் மம்ஸஞ்ச கீ²ரத³தீ⁴னி ச இதா⁴தி⁴ப்பேதானி. ஏவரூபானி பணீதபோ⁴ஜனானீதி யானி ஏதேஹி ஸப்பிஆதீ³ஹி ஸம்ஸட்ட²த்தா ‘பணீதபோ⁴ஜனானீ’தி வுச்சந்தி, ததா²ரூபானி பணீதபோ⁴ஜனானி. அகி³லானோதி யஸ்ஸ தேஹி வினாபி பா²ஸு ஹோதி. அத்தனோ அத்தா²ய விஞ்ஞாபேத்வாதி ஏத்த² பன யோ அகி³லானோ ஸுத்³தா⁴னி ஸப்பிஆதீ³னி பே⁴ஸஜ்ஜத்தா²ய விஞ்ஞாபேதி, ஸோ மஹானாமஸிக்கா²பதே³ன (பாசி. 303) காரேதப்³போ³, மச்சா²தீ³னி சத்தாரி விஞ்ஞாபேந்தோ ஸூபோத³னவிஞ்ஞத்தியா (பாசி. 612-613) காரேதப்³போ³, ஸப்பிஆதீ³ஹி ஸம்ஸட்ட²போ⁴ஜனானி விஞ்ஞாபேந்தோ இமினா காரேதப்³போ³. தத்ராயம் வினிச்ச²யோ – ‘‘ஸப்பினா ப⁴த்தம் தே³ஹி, ஸப்பிம் ஆகிரித்வா தே³ஹி, ஸப்பிமிஸ்ஸகம் கத்வா தே³ஹி, ஸஹ ஸப்பினா தே³ஹி, ஸப்பிஞ்ச ப⁴த்தஞ்ச தே³ஹீ’’தி ஏவம் விஞ்ஞாபேந்தஸ்ஸ தாவ விஞ்ஞத்தியா து³க்கடம், படிக்³க³ஹணே து³க்கடம், அஜ்ஜோ²ஹரணே அஜ்ஜோ²ஹரணே பாசித்தியம். ‘‘ஸப்பிப⁴த்தம் தே³ஹீ’’தி வுத்தே பன யஸ்மா ஸாலிப⁴த்தம் விய ஸப்பிப⁴த்தம் நாம நத்தி², தஸ்மா ஸூபோத³னவிஞ்ஞத்தியா து³க்கடமேவ ஹோதி. ஸசே பன ‘‘ஸப்பினா ப⁴த்தம் தே³ஹீ’’தி வுத்தே ப⁴த்தம் த³த்வா ‘‘ஸப்பிம் கத்வா பு⁴ஞ்ஜாஹீ’’தி நவனீதகீ²ராதீ³னி வா கப்பியப⁴ண்ட³ம் வா தே³தி ‘‘இமினா ஸப்பிம் க³ஹேத்வா பு⁴ஞ்ஜாஹீ’’தி, யதா²வத்து²கமேவ. ‘‘கோ³ஸப்பினா ப⁴த்தம் தே³ஹீ’’தி வுத்தே பன கோ³ஸப்பிம் வா தே³து, தஸ்மிம் அஸதி புரிமனயேன நவனீதாதீ³னி வா, கா³விம்யேவ வா தே³து ‘‘இதோ ஸப்பினா பு⁴ஞ்ஜாஹீ’’தி, யதா²வத்து²கமேவ. ஸசே பன ‘‘கோ³ஸப்பினா தே³ஹீ’’தி யாசிதோ அஜிகாஸப்பிஆதீ³ஹி தே³தி, விஸங்கேதம். ஏவஞ்ஹி ஸதி அஞ்ஞம் யாசிதேன அஞ்ஞம் தி³ன்னம் நாம ஹோதி, தஸ்மா அனாபத்தி, ஏஸ நயோ ‘‘அஜிகாஸப்பினா தே³ஹீ’’திஆதீ³ஸுபி. ‘‘கப்பியஸப்பினா தே³ஹீ’’தி வுத்தே அகப்பியஸப்பினா தே³தி, விஸங்கேதமேவ. ‘‘அகப்பியஸப்பினா தே³ஹீ’’தி வுத்தே அகப்பியஸப்பினாவ தே³தி, படிக்³க³ஹணேபி பரிபோ⁴கே³பி து³க்கடமேவ. இமினா நயேன ஸப்³ப³பதே³ஸு வினிச்ச²யோ வேதி³தப்³போ³. ஸசே பன ஸப்³பே³ஹிபி ஸப்பிஆதீ³ஹி ஏகட்டா²னே வா நானாட்டா²னே வா விஞ்ஞாபேத்வா படிலத்³த⁴ம் ஏகதோ ஸம்பி⁴ன்னரஸம் கத்வா ததோ குஸக்³கே³ன ஏகபி³ந்து³ம்பி அஜ்ஜோ²ஹரதி, நவ பாசித்தியானி.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ பணீதபோ⁴ஜனவிஞ்ஞத்திவத்து²ஸ்மிம் பஞ்ஞத்தம், ‘‘அகி³லானோ’’தி அயமேத்த² அனுபஞ்ஞத்தி, அஸாதா⁴ரணபஞ்ஞத்தி, அனாணத்திகம், திகபாசித்தியம், கி³லானஸ்ஸ அகி³லானஸஞ்ஞினோ, வேமதிகஸ்ஸ வா து³க்கடம். கி³லானஸஞ்ஞிஸ்ஸ, கி³லானகாலே விஞ்ஞாபேத்வா அகி³லானஸ்ஸ பு⁴ஞ்ஜதோ, கி³லானஸ்ஸ ஸேஸகே, ஞாதகப்பவாரிதட்டா²னதோ, அஞ்ஞஸ்ஸத்தா²ய விஞ்ஞத்தே, அத்தனோ த⁴னேன க³ஹிதே, உம்மத்தகாதீ³னஞ்ச அனாபத்தி. பணீதபோ⁴ஜனதா, அகி³லானதா, கதவிஞ்ஞத்தியா படிலாபோ⁴, அஜ்ஜோ²ஹரணந்தி இமானேத்த² சத்தாரி அங்கா³னி. அத்³தா⁴னஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பணீதபோ⁴ஜனஸிக்கா²பத³வண்ணனா நிட்டி²தா.

10. த³ந்தபோனஸிக்கா²பத³வண்ணனா

த³ஸமே அதி³ன்னந்தி காயேன வா காயப்படிப³த்³தே⁴ன வா க³ண்ஹந்தஸ்ஸ ஹத்த²பாஸே ட²த்வா காயகாயப்படிப³த்³த⁴னிஸ்ஸக்³கி³யானம் அஞ்ஞதரேன ந தி³ன்னம், அப்படிக்³க³ஹிதகஸ்ஸேதம் நாமம். அப்படிக்³க³ஹிதகஞ்ஹி பி⁴க்கு²னோ அத்தனோ ஸந்தகம்பி அஜ்ஜோ²ஹரிதும் ந வட்டதி. படிக்³க³ஹிதம் அந்தமஸோ விஸ்ஸாஸிகஸந்தகம்பி வட்டதி, தஸ்ஸ லக்க²ணம் வுத்தவிபல்லாஸேன வேதி³தப்³ப³ம். ஸசே ஹி யோ கோசி அனுபஸம்பன்னோ அந்தமஸோ திரச்சா²னோபி பி⁴க்கு²ஸ்ஸ வா பி⁴க்கு²னியா வா ஹத்த²பாஸே டி²தோ காயாதீ³னம் அஞ்ஞதரேன தே³தி, தஞ்சே பி⁴க்கு²னா யேன கேனசி ஸரீராவயவேன வா, தப்படிப³த்³தே⁴ன வா, ஸம்ஹாரிமேன ச அந்தமஸோ மஞ்சேனாபி, தா⁴ரேதும் ஸமத்தே²ன ச அந்தமஸோ அதத்த²ஜாதகருக்க²பண்ணேனாபி, ஸூசியா பராமட்ட²மத்தேனாபி படிக்³க³ஹிதம், படிக்³க³ஹிதமேவ ஹோதி. படிப³த்³த⁴ப்படிப³த்³த⁴ம் நாம இத⁴ நத்தி², யம்பி நத்து²கரணியா தி³ய்யமானம் நாஸிகாய, அகல்லகோ வா முகே²ன படிக்³க³ண்ஹாதி, ஸப்³ப³ம் வட்டதி, ஆபோ⁴க³மத்தமேவ ஹேத்த² பமாணம். புப்³பா³போ⁴கே³ ச ஸதி பச்சா² நித்³தா³யந்தஸ்ஸ பத்தே தி³ன்னம்பி ஹத்த²பாஸே ஸதி படிக்³க³ஹிதமேவ ஹோதி. யம்பி ‘‘பத்தேன படிக்³க³ண்ஹிஸ்ஸாமீ’’தி நிஸின்னஸ்ஸேவ ஹத்தே² பததி, தம் வட்டதியேவ. அபி⁴ஹடபா⁴ஜனதோ பதிதரஜம்பி வட்டதி, தத்த² டி²தனிஸின்னனிபன்னானம் பவாரணாஸிக்கா²பதே³ வுத்தனயேனேவ ஹத்த²பாஸோ வேதி³தப்³போ³.

ஸசே பன தா³யகப்படிக்³கா³ஹகேஸு ஏகோ ஆகாஸே ஹோதி, ஏகோ பூ⁴மியம், பூ⁴மட்ட²ஸ்ஸ ஸீஸேன ஆகாஸட்ட²ஸ்ஸ ச ட²பேத்வா தா³தும் வா க³ஹேதும் வா பஸாரிதஹத்த²ம் யம் ஆஸன்னதரம் அங்க³ம், தஸ்ஸ ஓரிமந்தேன ஹத்த²பாஸப்பமாணம் பரிச்சி²ந்தி³தப்³ப³ம். ஸசேபி ஏகோ கூபே ஹோதி, ஏகோ கூபதடே, ஏகோ வா ருக்கே², ஏகோ பத²வியம், வுத்தனயேனேவ ஹத்த²பாஸப்பமாணம் பரிச்சி²ந்தி³தப்³ப³ம். தஸ்மிம் ட²த்வா ஸசேபி த்³வே தயோ வா ஸாமணேரா யம் மஜ்ஜி²மோ புரிஸோ உக்கி²பிதும் ஸக்கோதி, ஏவரூபம் பா⁴ரம் பவட்டேந்தா பி⁴க்கு²னோ பூ⁴மியம் ட²பிதஹத்த²ம் ஆரோபேந்தி, உக்கி²பித்வா வா பி⁴க்கு²னோ பஸாரிதஹத்தே² ஏகதே³ஸேனாபி ட²பேந்தி, தம் படிக்³க³ஹிதமேவ ஹோதி. யம் பன பிண்டா³ய சரந்தஸ்ஸ பத்தே ரஜம் பததி, தம் அப்படிக்³க³ஹிதமேவ ஹோதி, தஸ்மா படிக்³க³ஹேத்வாவ பி⁴க்கா² க³ண்ஹிதப்³பா³. அப்படிக்³க³ஹேத்வா க³ண்ஹந்தஸ்ஸ வினயது³க்கடம், தம் பன புன படிக்³க³ஹேத்வா பு⁴ஞ்ஜந்தஸ்ஸ அனாபத்தி. ஸசே ‘‘படிக்³க³ஹேத்வா தே³தா²’’தி வுத்தே வசனம் அஸ்ஸுத்வா வா அனாதி³யித்வா வா பி⁴க்க²ம் தே³ந்தியேவ, வினயது³க்கடா முச்சதி, புன படிக்³க³ஹேத்வா அஞ்ஞா பி⁴க்கா² படிக்³க³ஹேதப்³பா³. ஸசே மஹாவாதோ ததோ ததோ ரஜம் பாதேதி, ந ஸக்கா ஹோதி பி⁴க்க²ம் க³ஹேதும், ‘‘அனுபஸம்பன்னஸ்ஸ த³ஸ்ஸாமீ’’தி ஸுத்³த⁴சித்தேன ஆபோ⁴க³ம் கத்வா க³ண்ஹிதும் வட்டதி. தம் அனுபஸம்பன்னஸ்ஸ த³த்வா புன தேன தி³ன்னம் வா தஸ்ஸ விஸ்ஸாஸேன வா படிக்³க³ஹேத்வா பு⁴ஞ்ஜிதும் வட்டதி. அஸ்ஸுகே²ளஸிங்கா⁴ணிகாதீ³ஸு யம் டா²னதோ சவித்வா ஹத்தே² வா பத்தே வா பததி, தம் படிக்³க³ஹேதப்³ப³ம், அங்க³லக்³க³ம் படிக்³க³ஹிதமேவ. பதந்தம்பி வோச்சி²ன்னஞ்சே அந்தரா ந க³ஹேதப்³ப³ம், உக்³க³ஹிதகம் நாம ஹோதி, தம் பச்சா² படிக்³க³ஹிதம்பி ந வட்டதி. யம் பன பே⁴ஸஜ்ஜம் வா மூலப²லம் வா மாதாதீ³னம் அத்தா²ய க³ஹேத்வா சா²யத்தா²ய வா ப²லினிஸாக²ம் உக்கி²பித்வா க³ச்ச²தி, ததோ யம் இச்ச²தி, தம் புன படிக்³க³ஹேத்வா பரிபு⁴ஞ்ஜிதும் வட்டதி. யோ பன தத்த² ஜாதகப²லினிஸாகா²ய வா வல்லியா வா க³ஹேத்வா சாலேதி. தஸ்ஸ ததோ லத்³த⁴ம் ப²லம் ந வட்டதி, து³ருபசிண்ணது³க்கடஞ்ச ஆபஜ்ஜதி, அஞ்ஞஸ்ஸ தம் வட்டதி, ப²லிருக்க²ம் பன அபஸ்ஸயிதும் வா ஆலம்பி³தும் வா வட்டதி, படிக்³க³ஹேத்வா ட²பிதே யம் அஞ்ஞம் அங்குராதி³ உப்பஜ்ஜதி, படிக்³க³ஹிதமேவ தம். யாவ ஹி ஹத்த²தோ முத்தே நிரபேக்கோ² ந ஹோதி, நிரபேக்க²தாய வா ஹத்த²தோ ந முச்சதி, தாவ ந படிக்³க³ஹணம் விஜஹதி, அயமேத்த² ஸங்கே²போ, வித்தா²ரோ பன ஸமந்தபாஸாதி³காயம் வுத்தோ.

முக²த்³வாரந்தி க³லனாளிகம். முகே²ன வா ஹி பவிட்ட²ம் ஹோது, நாஸிகாய வா, க³லேன அஜ்ஜோ²ஹரணீயதாய ஸப்³ப³ம்பி தம் முக²த்³வாரம் பவேஸிதமேவ ஹோதி. ஆஹாரந்தி யம்கிஞ்சி யாவகாலிகம் வா யாமகாலிகம் வா ஸத்தாஹகாலிகம் வா யாவஜீவிகம் வா. ஸப்³ப³ஞ்ஹேதம் அஜ்ஜோ²ஹரணீயத்தா ‘ஆஹாரோ’தி வுச்சதி, தத்த² ஸப்³ப³ம்பி த⁴ஞ்ஞம் வா த⁴ஞ்ஞானுலோமம் வா தாலனாளிகேரபனஸலபு³ஜஅலாபு³கும்ப⁴ண்ட³புஸ்ஸப²லதிபுஸப²லஏளாலுகஸங்கா²தம் நவவித⁴ம் மஹாப²லஞ்சேவ அபரண்ணஞ்ச, யஞ்சஞ்ஞம் வனமூலபத்தபுப்ப²ப²லாதி³ ஆஹாரத்த²ம் ப²ரதி, தம் ஸப்³ப³ம் யாவ மஜ்ஜ²ன்ஹிககாலோ, தாவ பரிபு⁴ஞ்ஜிதப்³ப³தோ யாவகாலிகம் நாம. அம்ப³பானம் ஜம்பு³பானம் சோசபானம் மோசபானம் மது⁴கபானம் முத்³தி³கபானம் ஸாலூகபானம் பா²ருஸகபானந்தி இமானி அட்ட² பானானி, யானி ச தேஸம் அனுலோமானி வேத்ததிந்திணிகமாதுலுங்க³கபிட்ட²கோஸம்ப³கரமந்தா³தி³கு²த்³த³கப²லபானானி, ஏதானி ஸப்³பா³னி அனுபஸம்பன்னேஹி ஸீதோத³கேன மத்³தி³த்வா கதானி ஆதி³ச்சபாகானி வா யாவ ரத்தியா பச்சி²மயாமம் நித³ஹித்வா பரிபு⁴ஞ்ஜிதப்³ப³தோ யாமகாலிகானி நாம. அவஸேஸேஸு அனுஞ்ஞாதப²லபத்தபுப்ப²ரஸேஸுபி ஏஸேவ நயோ. ஸப்பிஆதீ³னி பஞ்ச பே⁴ஸஜ்ஜானி ஸத்தாஹம் நித³ஹித்வா பரிபு⁴ஞ்ஜிதப்³ப³தோ ஸத்தாஹகாலிகானி நாம. இத³ம் பன யாவகாலிகாதி³த்தயம் காலவிமுத்தஞ்ச உத³கம் ட²பேத்வா அவஸேஸமூலப²லாப²லாதி³ யம் நேவ கா²த³னீயத்த²ம் ந போ⁴ஜனீயத்த²ம் ப²ரதி, தம் யாவஜீவம் நித³ஹித்வா ஸதி பச்சயே பரிபு⁴ஞ்ஜிதப்³ப³தோ யாவஜீவிகம் நாம. ஆஹரேய்யாதி பவேஸேய்ய. அஞ்ஞத்ர உத³கத³ந்தபோனாதி இத³ம் அனாஹாரேபி உத³கே ஆஹாரஸஞ்ஞாய, த³ந்தபோனே ச ‘‘முக²த்³வாரம் ஆஹடம் இத³’’ந்தி ஸஞ்ஞாய குக்குச்சாயந்தானம் குக்குச்சவினோத³னத்த²ம் வுத்தம். உத³கஞ்ஹி யதா²ஸுக²ம் பாதும், த³ந்தகட்ட²ஞ்ச த³ந்தபோனபரிபோ⁴கே³ன பரிபு⁴ஞ்ஜிதும் வட்டதி. ட²பேத்வா பன இத³ம் த்³வயம் அவஸேஸம் அஜ்ஜோ²ஹரணத்தா²ய க³ண்ஹதோ க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம், ஸசேபி த³ந்தகட்ட²ரஸோ அஜானந்தஸ்ஸ அந்தோ பவிஸதி, பாசித்தியமேவ.

வேஸாலியம் அஞ்ஞதரம் பி⁴க்கு²ம் ஆரப்³ப⁴ அதி³ன்னம் ஆஹாரம் ஆஹரணவத்து²ஸ்மிம் பஞ்ஞத்தம், ‘‘அஞ்ஞத்ர உத³கத³ந்தபோனா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், படிக்³க³ஹிதகே அப்படிக்³க³ஹிதஸஞ்ஞினோ, வேமதிகஸ்ஸ வா து³க்கடம். படிக்³க³ஹிதஸஞ்ஞிஸ்ஸ, உத³கத³ந்தபோனே, சத்தாரி மஹாவிகடானி ஸதி பச்சயே அஸதி கப்பியகாரகே ஸாமம் க³ஹேத்வா பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. ஏத்த² து³ப்³ப³சோபி அஸமத்தோ²பி கப்பியகாரகோ அஸந்தபக்கே²யேவ திட்ட²தி, சா²ரிகாய அஸதி ஸுக்க²தா³ரும் ஜா²பேத்வா, தஸ்மிஞ்ச அஸதி அல்லதா³ரும் ருக்க²தோ சி²ந்தி³த்வாபி காதும், மத்திகத்தா²ய ச பத²விம் க²ணிதும்பி வட்டதி, இத³ம் பன சதுப்³பி³த⁴ம்பி மஹாவிகடம் காலோதி³ஸ்ஸம் நாம ஸப்பத³ட்ட²க்க²ணேயேவ ஸாமம் க³ஹேதும் வட்டதி, அஞ்ஞதா³ படிக்³கா³ஹாபேத்வா பரிபு⁴ஞ்ஜிதப்³ப³ம். அப்படிக்³க³ஹிதகதா, அனனுஞ்ஞாததா, தூ⁴மாதி³அப்³போ³ஹாரிகாபா⁴வோ, அஜ்ஜோ²ஹரணந்தி இமானேத்த² சத்தாரி அங்கா³னி. ஸமுட்டா²னாதீ³னி ஏளகலோமஸதி³ஸானீதி.

த³ந்தபோனஸிக்கா²பத³வண்ணனா நிட்டி²தா.

போ⁴ஜனவக்³கோ³ சதுத்தோ².