5. அசேலகவக்³கோ³

1. அசேலகஸிக்கா²பத³வண்ணனா

அசேலகவக்³க³ஸ்ஸ பட²மே ஏதேஸம் அசேலகாதீ³னம் அஞ்ஞதித்தி²யானம் யம்கிஞ்சி ஆமிஸம் ஏகப்பயோகே³ன தே³ந்தஸ்ஸ ஏகம் பாசித்தியம், அவச்சி²ந்தி³த்வா அவச்சி²ந்தி³த்வா தே³ந்தஸ்ஸ பயோகே³ பயோகே³ பாசித்தியம்.

வேஸாலியம் ஆயஸ்மந்தம் ஆனந்த³ம் ஆரப்³ப⁴ பரிப்³பா³ஜிகாய த்³வே பூவே தா³னவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், திகபாசித்தியம், உத³கத³ந்தபோனம் தே³ந்தஸ்ஸ, அதித்தி²யே தித்தி²யஸஞ்ஞிஸ்ஸ, வேமதிகஸ்ஸ ச து³க்கடம். அதித்தி²யே அதித்தி²யஸஞ்ஞிஸ்ஸ, அனுபஸம்பன்னேன தா³பேந்தஸ்ஸ, தேஸம் ஸந்திகே பா⁴ஜனம் நிக்கி²பித்வா ‘‘இத³ம் க³ண்ஹதா²’’தி ப⁴ணந்தஸ்ஸ, தேஸம் வா நிக்கி²த்தபா⁴ஜனே தே³ந்தஸ்ஸ, பா³ஹிரலேபம் தே³ந்தஸ்ஸ, உம்மத்தகாதீ³னஞ்ச அனாபத்தி. அஞ்ஞதித்தி²யதா, அனனுஞ்ஞாததா, அஜ்ஜோ²ஹரணீயம் அஜ்ஜோ²ஹரணத்தா²ய ஸஹத்தா² அனிக்கி²த்தபா⁴ஜனே தா³னந்தி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானீதி.

அசேலகஸிக்கா²பத³வண்ணனா நிட்டி²தா.

2. உய்யோஜனஸிக்கா²பத³வண்ணனா

து³தியே தா³பேத்வா வா அதா³பேத்வா வாதி யம்கிஞ்சி ஆமிஸம் தா³பேத்வா வா ந தா³பேத்வா வா. உய்யோஜேய்யாதி மாதுகா³மேன ஸத்³தி⁴ம் ஹஸனகீளனரஹோனிஸஜ்ஜாதீ³னி கத்துகாமோ ‘க³ச்சா²’திஆதீ³னி வத்வா உய்யோஜேய்ய. ஏததே³வாதி ஏதம் அனாசாரமேவ பச்சயம் கரித்வா, ந அஞ்ஞம் பதிரூபம் காரணம். பாசித்தியந்தி உய்யோஜனமத்தே தாவ து³க்கடம், யதா³ பனஸ்ஸ ஸோ த³ஸ்ஸனூபசாரம் வா ஸவனூபசாரம் வா ஏகேன பாதே³ன விஜஹதி, அபரம் து³க்கடம், து³தியேன விஜஹிதே பாசித்தியம். ஏத்த² ச த³ஸ்ஸனூபசாரஸ்ஸ அஜ்ஜோ²காஸே ட²த்வா த்³வாத³ஸஹத்த²ப்பமாணம், ததா² ஸவனூபசாரஸ்ஸ. ஸசே பன அந்தரா குட்டத்³வாரபாகாராத³யோ ஹோந்தி, தேஹி அந்தரிதபா⁴வோயேவ உபசாராதிக்கமோ.

ஸாவத்தி²யம் உபனந்த³ம் ஆரப்³ப⁴ உய்யோஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, உய்யோஜனாணத்திகாய ஸாணத்திகம், திகபாசித்தியம், அனுபஸம்பன்னே திகது³க்கடம், உபி⁴ன்னம்பி கலிஸாஸனாரோபனே து³க்கடமேவ, ‘‘உபோ⁴ ஏகதோ ந யாபேஸ்ஸாமா’’தி ஏவமாதீ³ஹி பதிரூபகாரணேஹி உய்யோஜேந்தஸ்ஸ, உம்மத்தகாதீ³னஞ்ச அனாபத்தி. அனாசாரம் ஆசரிதுகாமதா, தத³த்த²மேவ உபஸம்பன்னஸ்ஸ உய்யோஜனம், ஏவம் உய்யோஜிதஸ்ஸ உபசாராதிக்கமோதி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.

உய்யோஜனஸிக்கா²பத³வண்ணனா நிட்டி²தா.

3. ஸபோ⁴ஜனஸிக்கா²பத³வண்ணனா

ததியே ஸஹ உபோ⁴ஹி ஜனேஹீதி ஸபோ⁴ஜனம், தஸ்மிம் ஸபோ⁴ஜனே. அத² வா ஸபோ⁴ஜனேதி ஸபோ⁴கே³, ராக³பரியுட்டி²தபுரிஸஸ்ஸ ஹி இத்தீ² போ⁴கோ³, இத்தி²யா ச புரிஸோ, தேனேவஸ்ஸ பத³பா⁴ஜனே ‘‘இத்தீ² சேவ ஹோதி, புரிஸோ சா’’திஆதி³ (பாசி. 281) வுத்தம். அனுபக²ஜ்ஜ நிஸஜ்ஜம் கப்பேய்யாதி அனுபவிஸித்வா நிஸீதே³ய்ய, யம் தஸ்மிம் குலே ஸயனிக⁴ரம், தஸ்ஸ மஹாசதுஸ்ஸாலாதீ³ஸு கதஸ்ஸ மஹல்லகஸ்ஸ பிட்ட²ஸங்கா⁴டதோ ஹத்த²பாஸம் விஜஹித்வா அந்தோஸயனஸ்ஸ ஆஸன்னே டா²னே, கு²த்³த³கஸ்ஸ வா வேமஜ்ஜ²ம் அதிக்கமித்வா நிஸீதே³ய்யாதி அத்தோ², ஏவம் நிஸின்னஸ்ஸ பாசித்தியம்.

ஸாவத்தி²யம் உபனந்த³ம் ஆரப்³ப⁴ அனுபக²ஜ்ஜ நிஸஜ்ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், அஸயனிக⁴ரே ஸயனிக⁴ரஸஞ்ஞினோ, வேமதிகஸ்ஸ வா து³க்கடம். நஸயனிக⁴ரஸஞ்ஞிஸ்ஸ, வுத்தலக்க²ணம் பதே³ஸம் அனதிக்கமித்வா நிஸின்னஸ்ஸ, பி⁴க்கு²ஸ்மிம் து³தியகே ஸதி, உபோ⁴ஸு நிக்க²ந்தேஸு வா, வீதராகே³ஸு வா நிஸீத³ந்தஸ்ஸ, உம்மத்தகாதீ³னஞ்ச அனாபத்தி. அவீதராக³ஜாயம்பதிகானம் ஸன்னிஹிததா, ஸயனிக⁴ரதா, து³தியஸ்ஸ பி⁴க்கு²னோ அபா⁴வோ, அனுபக²ஜ்ஜ நிஸீத³னந்தி இமானேத்த² சத்தாரி அங்கா³னி. ஸமுட்டா²னாதீ³னி பட²மபாராஜிகஸதி³ஸானீதி.

ஸபோ⁴ஜனஸிக்கா²பத³வண்ணனா நிட்டி²தா.

4-5. ரஹோபடிச்ச²ன்ன-ரஹோனிஸஜ்ஜஸிக்கா²பத³வண்ணனா

சதுத்த²பஞ்சமானி ஸாவத்தி²யம் உபனந்த³ம் ஆரப்³ப⁴ படிச்ச²ன்னாஸனே ச, ரஹோ ச நிஸஜ்ஜனவத்து²ஸ்மிம் பஞ்ஞத்தானி, ஸாதா⁴ரணபஞ்ஞத்தியோ, ஏதேஸம்பி ஸமுட்டா²னாதீ³னி பட²மபாராஜிகஸதி³ஸானேவ. ஸேஸோ கதா²னயோ அனியதத்³வயே வுத்தனயேனேவ வேதி³தப்³போ³.

ரஹோபடிச்ச²ன்ன-ரஹோனிஸஜ்ஜஸிக்கா²பத³வண்ணனா நிட்டி²தா.

6. சாரித்தஸிக்கா²பத³வண்ணனா

ச²ட்டே² நிமந்திதோதி பஞ்சன்னம் போ⁴ஜனானம் அஞ்ஞதரேன நிமந்திதோ. ஸப⁴த்தோ ஸமானோதி தேனேவ நிமந்தனப⁴த்தேன ஸப⁴த்தோ ஸமானோ. ஸந்தம் பி⁴க்கு²ம் அனாபுச்சா²தி அந்தோஉபசாரஸீமாய த³ஸ்ஸனூபசாரே பி⁴க்கு²ம் தி³ஸ்வா யம் ஸக்கா ஹோதி பகதிவசனேன ஆபுச்சி²தும், தாதி³ஸம் ‘‘அஹம் இத்த²ன்னாமஸ்ஸ க⁴ரம் க³ச்சா²மீ’’தி வா ‘‘சாரித்தம் ஆபஜ்ஜாமீ’’தி வா ஈதி³ஸேன வசனேன அனாபுச்சி²த்வா. புரேப⁴த்தம் வா பச்சா²ப⁴த்தம் வாதி யேன ப⁴த்தேன நிமந்திதோ, தஸ்மிம் பு⁴த்தே வா அபு⁴த்தே வா. குலேஸு சாரித்தம் ஆபஜ்ஜேய்யாதி யஸ்மிம் குலே நிமந்திதோ, ததோ அஞ்ஞானி குலானி பவிஸேய்ய. அஞ்ஞத்ர ஸமயா பாசித்தியந்தி ஸசே ஸோ பி⁴க்கு² வுத்தலக்க²ணம் து³வித⁴ம்பி ஸமயம் ட²பேத்வா அவீதிவத்தே மஜ்ஜ²ன்ஹிகே அஞ்ஞம் குலம் பவிஸதி, அத²ஸ்ஸ க⁴ரூபசாரோக்கமனே து³க்கடம், பட²மபாதே³ன உம்மாரம் அதிக்கமந்தஸ்ஸ அபரம்பி து³க்கடம், து³தியபாதே³ன அதிக்கமே பாசித்தியம்.

ராஜக³ஹே உபனந்த³ம் ஆரப்³ப⁴ சாரித்தாபஜ்ஜனவத்து²ஸ்மிம் பஞ்ஞத்தம், ‘‘ஸந்தம் பி⁴க்கு²ம், அனாபுச்சா², புரேப⁴த்தம் பச்சா²ப⁴த்தம், அஞ்ஞத்ர ஸமயா’’தி அயமேத்த² சதுப்³பி³தா⁴ அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், அனிமந்திதே நிமந்திதஸஞ்ஞிஸ்ஸ, வேமதிகஸ்ஸ வா து³க்கடம். தஸ்மிம் அனிமந்திதஸஞ்ஞிஸ்ஸ, ஸமயே ஸந்தம் பி⁴க்கு²ம் ஆபுச்சி²த்வா, அஸந்தம் பி⁴க்கு²ம் அனாபுச்சி²த்வா பவிஸதோ, அஞ்ஞஸ்ஸ க⁴ரேன வா க⁴ரூபசாரேன வா மக்³கோ³ ஹோதி, தேன க³ச்ச²தோ, அந்தராராமபி⁴க்கு²னுபஸ்ஸயதித்தி²யஸேய்யபடிக்கமனப⁴த்தியக⁴ரானி க³ச்ச²தோ, ஆபதா³ஸு, உம்மத்தகாதீ³னஞ்ச அனாபத்தி. பஞ்சன்னம் போ⁴ஜனானம் அஞ்ஞதரேன நிமந்தனஸாதி³யனம், ஸந்தம் பி⁴க்கு²ம் அனாபுச்ச²னா, ப⁴த்தியக⁴ரதோ அஞ்ஞக⁴ரப்பவிஸனம், மஜ்ஜ²ன்ஹிகானதிக்கமோ, ஸமயஸ்ஸ வா ஆபதா³னம் வா அபா⁴வோதி இமானேத்த² பஞ்ச அங்கா³னி. ஸமுட்டா²னாதீ³னி பட²மகதி²னஸதி³ஸானேவ, இத³ம் பன கிரியாகிரியந்தி.

சாரித்தஸிக்கா²பத³வண்ணனா நிட்டி²தா.

7. மஹானாமஸிக்கா²பத³வண்ணனா

ஸத்தமே சதுமாஸப்பச்சயபவாரணாதி சத்தாரோ மாஸே கி³லானப்பச்சயபவாரணா, ஸப்³ப³ஞ்சேதம் வத்து²வஸேன வுத்தம். அயம் பனேத்த² அத்தோ² – சதுமாஸபவாரணா வா ஹோது, புனபவாரணா வா, நிச்சபவாரணா வா, ஸப்³பா³பி ஸாதி³தப்³பா³, ‘‘இதா³னி மம ரோகோ³ நத்தீ²’’தி ந படிக்கி²பிதப்³பா³, ‘‘ரோகே³ பன ஸதி விஞ்ஞாபேஸ்ஸாமீ’’தி அதி⁴வாஸேதப்³பா³தி. ததோ சே உத்தரி ஸாதி³யேய்யாதி ஏத்த² ஸசே தத்த² ரத்தீஹி வா பே⁴ஸஜ்ஜேஹி வா பரிச்சே²தோ³ கதோ ஹோதி ‘‘ஏத்தகாயேவ ரத்தியோ, ஏத்தகானி வா பே⁴ஸஜ்ஜானி விஞ்ஞாபேதப்³பா³னீ’’தி, அத² ததோ ரத்திபரியந்ததோ வா பே⁴ஸஜ்ஜபரியந்ததோ வா உத்தரி, ந பே⁴ஸஜ்ஜகரணீயேன வா பே⁴ஸஜ்ஜம், அஞ்ஞபே⁴ஸஜ்ஜகரணீயேன வா அஞ்ஞம் பே⁴ஸஜ்ஜம் விஞ்ஞாபேந்தஸ்ஸ பாசித்தியம்.

ஸக்கேஸு ச²ப்³ப³க்³கி³யே ஆரப்³ப⁴ பே⁴ஸஜ்ஜவிஞ்ஞாபனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், நததுத்தரி ததுத்தரிஸஞ்ஞினோ, வேமதிகஸ்ஸ வா து³க்கடம். நததுத்தரி நததுத்தரிஸஞ்ஞிஸ்ஸ, யேஹி பே⁴ஸஜ்ஜேஹி பவாரிதோ, ததோ அஞ்ஞேஹி வா அதி⁴கதரேஹி வா அத்தே² ஸதி, யாஸு ச ரத்தீஸு பவாரிதோ, தா அதிக்கமித்வாபி அத்தே² ஸதி யதா²பூ⁴தம் ஆசிக்கி²த்வா விஞ்ஞாபேந்தஸ்ஸ, யே ச ஞாதகே வா புக்³க³லிகப்பவாரணாய பவாரிதே வா அபரியந்தபவாரணாய வா பவாரிதே, அஞ்ஞஸ்ஸ வா அத்தா²ய, அத்தனோ வா த⁴னேன விஞ்ஞாபேந்தி, தேஸம், உம்மத்தகாதீ³னஞ்ச அனாபத்தி. ஸங்க⁴பவாரணதா, ததோ பே⁴ஸஜ்ஜவிஞ்ஞத்தி, அகி³லானதா, பரியந்தாதிக்கமோதி இமானேத்த² சத்தாரி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.

மஹானாமஸிக்கா²பத³வண்ணனா நிட்டி²தா.

8. உய்யுத்தஸேனாஸிக்கா²பத³வண்ணனா

அட்ட²மே உய்யுத்தந்தி கதஉய்யோக³ம், கா³மதோ நிக்க²ந்தந்தி அத்தோ². ஸேனந்தி சதுரங்கி³னிம். அஞ்ஞத்ர ததா²ரூபப்பச்சயாதி ததா²ரூபே காரணே அஸதி கேவலம் ஸேனம் த³ஸ்ஸனத்தா²ய க³ச்ச²தோ பதே³ பதே³ து³க்கடம், த³ஸ்ஸனூபசாரே ட²த்வா பஸ்ஸதோ பாசித்தியம். த³ஸ்ஸனூபசாரோ நாம யத்த² டி²தோ பஸ்ஸதி, தம் பன விஜஹித்வா புனப்புனம் பஸ்ஸதோ பயோகே³ பயோகே³ பாசித்தியம்.

ஸாவத்தி²யம் ச²ப்³ப³க்³கி³யே ஆரப்³ப⁴ ஸேனாத³ஸ்ஸனவத்து²ஸ்மிம் பஞ்ஞத்தம், ‘‘அஞ்ஞத்ர ததா²ரூபப்பச்சயா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், ஹத்தி²ஆதீ³ஸு ஏகமேகம் த³ஸ்ஸனாய க³மனே வுத்தனயேனேவ து³க்கடம், ததா² அனுய்யுத்தே உய்யுத்தஸஞ்ஞினோ, வேமதிகஸ்ஸ ச து³க்கடம். அனுய்யுத்தஸஞ்ஞினோ பன, ஆராமே ட²த்வா அத்தனோ டி²தோகாஸம் ஆக³தம், படிபத²ம் ஆக³ச்ச²ந்தஞ்ச பஸ்ஸதோ, ததா²ரூபப்பச்சயே, ஆபதா³ஸு, உம்மத்தகாதீ³னஞ்ச அனாபத்தி. உய்யுத்தஸேனம் த³ஸ்ஸனத்தா²ய க³மனம், அனுஞ்ஞாதோகாஸதோ அஞ்ஞத்ர த³ஸ்ஸனம், ததா²ரூபப்பச்சயஸ்ஸ ஆபதா³ய வா அபா⁴வோதி இமானேத்த² சத்தாரி அங்கா³னி. ஸமுட்டா²னாதீ³னி ஏளகலோமஸதி³ஸானி, இத³ம் பன லோகவஜ்ஜம், அகுஸலசித்தம், திவேத³னந்தி.

உய்யுத்தஸேனாஸிக்கா²பத³வண்ணனா நிட்டி²தா.

9. ஸேனாவாஸஸிக்கா²பத³வண்ணனா

நவமே ததோ சே உத்தரீதி திரத்ததோ உத்தரி சதுத்த²தி³வஸே அத்த²ங்க³தே ஸூரியே ஸேனாய திட்ட²து வா நிஸீத³து வா ஸயது வா, ஸசேபி ஆகாஸே இத்³தி⁴யா கஞ்சி இரியாபத²ம் கப்பேதி, பாசித்தியமேவ.

ஸாவத்தி²யம் ச²ப்³ப³க்³கி³யே ஆரப்³ப⁴ அதிரேகதிரத்தம் ஸேனாய வஸனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், ஊனகதிரத்தே அதிரேகஸஞ்ஞினோ, வேமதிகஸ்ஸ வா து³க்கடம். ஊனகஸஞ்ஞிஸ்ஸ, ததியாய ரத்தியா புராருணா நிக்க²மித்வா புன வஸதோ, கி³லானஸ்ஸ வா கி³லானகரணீயேன வா வஸதோ, படிஸேனாருத்³தா⁴ய ஸேனாய, கேனசி பலிபு³த்³த⁴ஸ்ஸ, ஆபதா³ஸு, உம்மத்தகாதீ³னஞ்ச அனாபத்தி. திரத்தாதிக்கமோ, ஸேனாய ஸூரியஸ்ஸ அத்த²ங்க³மோ, கி³லானதாதீ³னம் அபா⁴வோதி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.

ஸேனாவாஸஸிக்கா²பத³வண்ணனா நிட்டி²தா.

10. உய்யோதி⁴கஸிக்கா²பத³வண்ணனா

த³ஸமே உக்³க³ந்த்வா உக்³க³ந்த்வா ஏத்த² யுஜ்ஜ²ந்தீதி உய்யோதி⁴கம், ஸம்பஹாரட்டா²னஸ்ஸேதம் நாமம். ப³லஸ்ஸ அக்³க³ம் ஜானந்தி ஏத்தா²தி ப³லக்³க³ம், ப³லக³ணனட்டா²னந்தி அத்தோ². ஸேனாய வியூஹம் ஸேனாப்³யூஹம், ஸேனானிவேஸஸ்ஸேதம் நாமம். அனீகஸ்ஸ த³ஸ்ஸனம் அனீகத³ஸ்ஸனம். அனீகம் நாம ‘‘த்³வாத³ஸபுரிஸோ ஹத்தீ², திபுரிஸோ அஸ்ஸோ, சதுப்புரிஸோ ரதோ²’’திஇமினா (பாசி. 314) லக்க²ணேன தயோ ஹத்தீ² பச்சி²மகம் ஹத்தா²னீகம், அஸ்ஸானீகரதா²னீகேஸுபி ஏஸேவ நயோ. சத்தாரோ பன ஆவுத⁴ஹத்தா² புரிஸா பச்சி²மகம் பத்தானீகம். ஏதேஸு யம்கிஞ்சி த³ஸ்ஸனாய க³ச்ச²தோ பதே³ பதே³ து³க்கடம், த³ஸ்ஸனூபசாரே ட²த்வா பஸ்ஸதோ பாசித்தியம், உபசாரம் பன விஜஹித்வா புனப்புனம் பஸ்ஸதோ பயோகே³ பயோகே³ பாசித்தியம். ஸேஸம் உய்யுத்தஸேனாஸிக்கா²பதே³ வுத்தனயேனேவ வேதி³தப்³ப³ம், ஆபத்திபே⁴தோ³ பனேத்த² நத்தே²வாதி.

உய்யோதி⁴கஸிக்கா²பத³வண்ணனா நிட்டி²தா.

அசேலகவக்³கோ³ பஞ்சமோ.