6. ஸுராபானவக்³கோ³

1. ஸுராபானஸிக்கா²பத³வண்ணனா

ஸுராபானவக்³க³ஸ்ஸ பட²மே ஸுராமேரயபானேதி ஏத்த² பிட்டா²தீ³ஹி கதம் மஜ்ஜம் ஸுரா, புப்பா²தீ³ஹி கதோ ஆஸவோ மேரயம், தது³ப⁴யம்பி பீ³ஜதோ பட்டா²ய குஸக்³கே³னாபி பிவதோ பயோகே³ பயோகே³ பாசித்தியம்.

கோஸம்பி³யம் ஸாக³தத்தே²ரம் ஆரப்³ப⁴ மஜ்ஜபிவனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், அமஜ்ஜே மஜ்ஜஸஞ்ஞிஸ்ஸ, வேமதிகஸ்ஸ வா து³க்கடம். அமஜ்ஜஸஞ்ஞிஸ்ஸ, அமஜ்ஜம் மஜ்ஜவண்ணக³ந்த⁴ரஸம் லோணஸோவீரகம் வா ஸுத்தம் வா பிவதோ, வாஸக்³கா³ஹாபனத்த²ம் ஈஸகம் மஜ்ஜம் பக்கி²பித்வா ஸூபாதீ³னி பசந்தி, தேஸு ஸூபஸம்பாகாதீ³ஸு, ஆமலகரஸாதீ³ஹி அமஜ்ஜம் மஜ்ஜஸதி³ஸம் அரிட்ட²ம் கரோந்தி, தம் பிவதோ, உம்மத்தகாதீ³னஞ்ச அனாபத்தி. மஜ்ஜபா⁴வோ, தஸ்ஸ பானஞ்சாதி இமானேத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானி, இத³ம் பன லோகவஜ்ஜம், அகுஸலசித்தம், திவேத³னந்தி.

ஸுராபானஸிக்கா²பத³வண்ணனா நிட்டி²தா.

2. அங்கு³லிபதோத³கஸிக்கா²பத³வண்ணனா

து³தியே அங்கு³லிபதோத³கேதி அங்கு³லீஹி உபகச்ச²காதி³க⁴ட்டனம் வுச்சதி, அபிச யேன கேனசி ஸரீராவயவேன ஹஸாதி⁴ப்பாயஸ்ஸ உபஸம்பன்னம் பு²ஸதோ பாசித்தியம்.

ஸாவத்தி²யம் ச²ப்³ப³க்³கி³யே ஆரப்³ப⁴ அங்கு³லிபதோத³கேன ஹஸனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், அனுபஸம்பன்னே திகது³க்கடம், இத⁴ பன பி⁴க்கு²னீபி பி⁴க்கு²ஸ்ஸ, பி⁴க்கு² ச பி⁴க்கு²னியா அனுபஸம்பன்னோ ஏவ, காயப்படிப³த்³தா⁴தீ³ஸு ஸப்³ப³த்த² து³க்கடமேவ. ந ஹஸனாதி⁴ப்பாயஸ்ஸ, ஸதி கரணீயே ஆமஸதோ, உம்மத்தகாதீ³னஞ்ச அனாபத்தி. ஹஸாதி⁴ப்பாயதா, உபஸம்பன்னஸ்ஸ காயேன காயாமஸனந்தி இமானேத்த² த்³வே அங்கா³னி. ஸமுட்டா²னாதீ³னி பட²மபாராஜிகஸதி³ஸானேவாதி.

அங்கு³லிபதோத³கஸிக்கா²பத³வண்ணனா நிட்டி²தா.

3. ஹஸத⁴ம்மஸிக்கா²பத³வண்ணனா

ததியே உத³கே ஹஸத⁴ம்மேதி உத³ககீளா வுச்சதி. தஸ்மா யோ பி⁴க்கு² உபரிகோ³ப்ப²கே உத³கேயேவ க³ச்ச²ந்தோ ஹஸாதி⁴ப்பாயோ நிமுஜ்ஜதி வா உம்முஜ்ஜதி வா, தஸ்ஸ நிமுஜ்ஜனாதீ³னம் அத்தா²ய ஓதரந்தஸ்ஸ ஹத்த²வாரே பத³வாரே து³க்கடம், நிமுஜ்ஜனும்முஜ்ஜனேஸு பயோகே³ பயோகே³ பாசித்தியம், நிமுஜ்ஜித்வா அந்தோஉத³கேயேவ க³ச்ச²ந்தஸ்ஸ ஹத்த²வாரபத³வாரேஸு, தரந்தஸ்ஸ வா யேன யேன அங்கே³ன தரதி, தஸ்ஸ தஸ்ஸ பயோகே³ பயோகே³ பாசித்தியம்.

ஸாவத்தி²யம் ஸத்தரஸவக்³கி³யே பி⁴க்கூ² ஆரப்³ப⁴ உத³கே கீளனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், உத³கே அஹஸத⁴ம்மே ஹஸத⁴ம்மஸஞ்ஞினோ, வேமதிகஸ்ஸ வா து³க்கடம், ததா² நாவாய கீளதோ ஹத்தே²ன வா பாதே³ன வா கட்டே²ன வா கத²லாய வா உத³கம் பஹரதோ, பா⁴ஜனக³தம் உத³கம் வா கஞ்ஜிகாதீ³னி வா சிக்க²ல்லம் வா கி²பனகீளாய கீளதோ து³க்கடம். அத்த²ஜோதகம் பன அக்க²ரம் சி²ந்தி³தும் வட்டதி. ந ஹஸாதி⁴ப்பாயஸ்ஸ, ஸதி கரணீயே ஓதரித்வா நிமுஜ்ஜனாதீ³னி கரோந்தஸ்ஸ, பாரம் க³ச்ச²தோ, ஆபதா³ஸு, உம்மத்தகாதீ³னஞ்ச அனாபத்தி. உபரிகோ³ப்ப²கதா, ஹஸாதி⁴ப்பாயேன கீளனந்தி இமானேத்த² த்³வே அங்கா³னி. ஸமுட்டா²னாதீ³னி பட²மபாராஜிகஸதி³ஸானீதி.

ஹஸத⁴ம்மஸிக்கா²பத³வண்ணனா நிட்டி²தா.

4. அனாத³ரியஸிக்கா²பத³வண்ணனா

சதுத்தே² அனாத³ரியேதி புக்³க³லஸ்ஸ வா த⁴ம்மஸ்ஸ வா அனாத³ரகரணே. தஸ்மா யோ பி⁴க்கு² உபஸம்பன்னேன பஞ்ஞத்தேன வுச்சமானோ தஸ்ஸ வா வசனம் அகத்துகாமதாய, தம் வா த⁴ம்மம் அஸிக்கி²துகாமதாய அனாத³ரியம் கரோதி, தஸ்ஸ தஸ்மிம் அனாத³ரியே பாசித்தியம்.

கோஸம்பி³யம் ச²ன்னத்தே²ரம் ஆரப்³ப⁴ அனாத³ரியகரணவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், அனுபஸம்பன்னே திகது³க்கடம், உபஸம்பன்னேன வா அனுபஸம்பன்னேன வா ‘‘இத³ம் ந ஸல்லேகா²ய ஸம்வத்ததீ’’திஆதி³னா நயேன அபஞ்ஞத்தேன வுச்சமானஸ்ஸ அனாத³ரியேபி து³க்கடமேவ. பவேணிஆக³தம் பன உக்³க³ஹம் க³ஹேத்வா ‘‘ஏவம் அம்ஹாகம் ஆசரியானம் உக்³க³ஹோ பரிபுச்சா²’’தி (பாசி. 344) ப⁴ணந்தஸ்ஸ, உம்மத்தகாதீ³னஞ்ச அனாபத்தி. உபஸம்பன்னஸ்ஸ பஞ்ஞத்தேன வசனம், அனாத³ரியகரணந்தி இமானேத்த² த்³வே அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன து³க்க²வேத³னந்தி.

அனாத³ரியஸிக்கா²பத³வண்ணனா நிட்டி²தா.

5. பி⁴ம்ஸாபனஸிக்கா²பத³வண்ணனா

பஞ்சமே பி⁴ம்ஸாபேய்யாதி பி⁴ம்ஸாபனத்த²ம் ரூபாதீ³னி உபஸம்ஹரேய்ய, ப⁴யானககத²ம் வா கதே²ய்ய. ஸோ பன பா⁴யது வா, மா வா, இதரஸ்ஸ பாசித்தியம்.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ பி⁴ம்ஸாபனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம். அனுபஸம்பன்னே திகது³க்கடம், ந பி⁴ம்ஸாபேதுகாமஸ்ஸ ததா² கரோதோ, உம்மத்தகாதீ³னஞ்ச அனாபத்தி. உபஸம்பன்னதா, தஸ்ஸ த³ஸ்ஸனஸவனவிஸயே பி⁴ம்ஸாபேதுகாமதாய வாயாமனந்தி இமானேத்த² த்³வே அங்கா³னி. ஸமுட்டா²னாதீ³னி அனந்தரஸிக்கா²பத³ஸதி³ஸானேவாதி.

பி⁴ம்ஸாபனஸிக்கா²பத³வண்ணனா நிட்டி²தா.

6. ஜோதிஸிக்கா²பத³வண்ணனா

ச²ட்டே² விஸிப்³ப³னாபேக்கோ²தி தப்பிதுகாமோ. ஸமாத³ஹேய்யாதி ஜாலேய்ய, அஞ்ஞத்ர ததா²ரூபப்பச்சயாதி பதீ³புஜ்ஜாலனம் வா பத்தபசனாதீ³ஸு ஜோதிகரணம் வாதி ஏவரூபம் பச்சயம் வினா. தத்ராயம் வினிச்ச²யோ – ஸயம் ஸமாத³ஹந்தஸ்ஸ அரணிஸண்டா²பனதோ பட்டா²ய யாவ ஜாலா ந உட்ட²ஹதி, தாவ ஸப்³ப³ப்பயோகே³ஸு து³க்கடம், ஜாலுட்டா²னே பாசித்தியம். ஸமாத³ஹாபேந்தஸ்ஸ ஆணத்தியா து³க்கடம், ஸகிம் ஆணத்தேன ப³ஹும்பி ஸமாத³ஹிதே ஏகமேவ பாசித்தியம்.

ப⁴க்³கே³ஸு ஸம்ப³ஹுலே பி⁴க்கூ² ஆரப்³ப⁴ ஜோதிம் ஸமாத³ஹித்வா விஸிப்³ப³னவத்து²ஸ்மிம் பஞ்ஞத்தம், ‘‘அகி³லானோ, அஞ்ஞத்ர ததா²ரூபப்பச்சயா’’தி இமானேத்த² த்³வே அனுபஞ்ஞத்தியோ, ஸாதா⁴ரணபஞ்ஞத்தி, ஸாணத்திகம், திகபாசித்தியம், கி³லானஸ்ஸ அகி³லானஸஞ்ஞினோ, வேமதிகஸ்ஸ வா து³க்கடம், ததா² படிலாதம் உக்கி²பந்தஸ்ஸ, தஞ்ச அவிஜ்ஜா²தம் உக்கி²பித்வா யதா²டா²னே ட²பேந்தஸ்ஸ. விஜ்ஜா²தம் பன ஜாலயதோ பாசித்தியமேவ. கி³லானஸ்ஸ கி³லானஸஞ்ஞிஸ்ஸ, அஞ்ஞேன கதம் வா வீதச்சிதங்கா³ரம் வா விஸிப்³பே³ந்தஸ்ஸ, பதீ³பஜோதிகஜந்தாக⁴ராதி³கே ததா²ரூபப்பச்சயே, ஆபதா³ஸு, உம்மத்தகாதீ³னஞ்ச அனாபத்தி. அகி³லானதா, அனுஞ்ஞாதகாரணாபா⁴வோ, விஸிப்³பே³துகாமதா, ஸமாத³ஹனந்தி இமானேத்த² சத்தாரி அங்கா³னி. ஸமுட்டா²னாதீ³னி ஸஞ்சரித்தே வுத்தனயேனேவ வேதி³தப்³பா³னீதி.

ஜோதிஸிக்கா²பத³வண்ணனா நிட்டி²தா.

7. நஹானஸிக்கா²பத³வண்ணனா

ஸத்தமே நஹாயேய்யாதி யோ பி⁴க்கு² மஜ்ஜி²மதே³ஸே நஹானதி³வஸதோ பட்டா²ய அத்³த⁴மாஸே அபுண்ணே அஞ்ஞத்ர ஸமயா ‘‘நஹாயிஸ்ஸாமீ’’தி சுண்ணம் வா மத்திகம் வா அபி⁴ஸங்க²ரோதி, தஸ்ஸ ததோ பட்டா²ய ஸப்³ப³ப்பயோகே³ஸு து³க்கடம், நஹானபரியோஸானே பாசித்தியம். ஸமயேஸு பரிவேணஸம்மஜ்ஜனமத்தம்பி கம்மஸமயோ, அத்³த⁴யோஜனம் க³ந்துகாமஸ்ஸ, க³ச்ச²தோ, க³தஸ்ஸ வா அத்³தா⁴னக³மனஸமயோ, ஸரஜேன வாதேன ஓகிண்ணஸ்ஸ த்³வீஸு வா தீஸு வா உத³கபு²ஸிதேஸு காயே பதிதேஸு வாதவுட்டி²ஸமயோதி வேதி³தப்³போ³. ஸேஸம் உத்தானமேவ.

ராஜக³ஹே ஸம்ப³ஹுலே பி⁴க்கூ² ஆரப்³ப⁴ ந மத்தம் ஜானித்வா நஹாயனவத்து²ஸ்மிம் பஞ்ஞத்தம், ‘‘அஞ்ஞத்ர ஸமயா’’தி அயமேத்த² ச²ப்³பி³தா⁴ அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், அதிரேகத்³த⁴மாஸே ஊனகஸஞ்ஞினோ, வேமதிகஸ்ஸ வா து³க்கடம். அதிரேகஸஞ்ஞிஸ்ஸ, ஸமயே வா நஹாயந்தஸ்ஸ, யோ வா நதீ³பாரம் க³ச்ச²ந்தோ வாலுகம் உக்கிரித்வா கதஆவாடேஸுபி நஹாயதி, தஸ்ஸ, பச்சந்திமே ஜனபதே³ ஸப்³பே³ஸம், ஆபதா³ஸு, உம்மத்தகாதீ³னஞ்ச அனாபத்தி. மஜ்ஜி²மதே³ஸோ, ஊனகத்³த⁴மாஸே நஹானம், ஸமயானம் வா நதீ³பாரக³மனஸ்ஸ வா ஆபதா³னம் வா அபா⁴வோதி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.

நஹானஸிக்கா²பத³வண்ணனா நிட்டி²தா.

8. து³ப்³ப³ண்ணகரணஸிக்கா²பத³வண்ணனா

அட்ட²மே அலபீ⁴தி லபோ⁴, லபோ⁴ ஏவ லாபோ⁴, கிம் அலபி⁴? சீவரம், கீதி³ஸம்? நவம், இதி ‘‘நவசீவரலாபே⁴னா’’தி வத்தப்³பே³ அனுனாஸிகலோபம் அகத்வா நவம்சீவரலாபே⁴னாதி வுத்தம், படிலத்³த⁴னவசீவரேனாதி அத்தோ². மஜ்ஜே² டி²தபத³த்³வயே பனாதி நிபாதமத்தம். பி⁴க்கு²னாதி யேன லத்³த⁴ம், தஸ்ஸ நித³ஸ்ஸனம், ஸேஸம் பத³த்த²தோ உத்தானமேவ. அயம் பனேத்த² வினிச்ச²யோ – நிவாஸனபாருபனுபக³ம் சீவரம் லபி⁴த்வா தஸ்ஸ நிட்டி²தரஜனஸ்ஸ யஸ்மிம் வா தஸ்மிம் வா பதே³ஸே கம்ஸனீலேன வா பத்தனீலேன வா கத்³த³மேன வா யேன கேனசி காளகேன வா மோரக்கி²மண்ட³லமங்கு³லபிட்டீ²னம் அஞ்ஞதரப்பமாணம் கப்பபி³ந்து³ம் ஆதி³யித்வா தம் சீவரம் பரிபு⁴ஞ்ஜிதப்³ப³ம், அனாதி³யித்வா பரிபு⁴ஞ்ஜந்தஸ்ஸ பாசித்தியம்.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ அத்தனோ சீவரஅஜானனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், ஆதி³ன்னே அனாதி³ன்னஸஞ்ஞினோ, வேமதிகஸ்ஸ வா து³க்கடம். ஆதி³ன்னஸஞ்ஞிஸ்ஸ, கப்பே நட்டே², கப்பகதோகாஸே ஜிண்ணே, கப்பகதேன அகப்பகதே ஸம்ஸிப்³பி³தே, பச்சா² ஆரோபிதேஸு அக்³க³ளஅனுவாதபரிப⁴ண்டே³ஸு தம் பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. வுத்தப்பகாரஸ்ஸ சீவரஸ்ஸ அகதகப்பகதா, ந நட்ட²சீவராதி³தா, நிவாஸனம் வா பாருபனம் வாதி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானி, இத³ம் பன கிரியாகிரியந்தி.

து³ப்³ப³ண்ணகரணஸிக்கா²பத³வண்ணனா நிட்டி²தா.

9. விகப்பனஸிக்கா²பத³வண்ணனா

நவமே விகப்பேத்வாதி ஏத்த² த்³வே விகப்பனா ஸம்முகா²விகப்பனா பரம்முகா²விகப்பனா ச. கத²ம் ஸம்முகா²விகப்பனா ஹோதி? சீவரானம் ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா ‘இமம் சீவர’ந்தி வா ‘இமானி சீவரானீ’தி வா ‘ஏதம் சீவர’ந்தி வா ‘ஏதானி சீவரானீ’தி வா வத்வா ‘துய்ஹம் விகப்பேமீ’தி வத்தப்³ப³ம், அயமேகா ஸம்முகா²விகப்பனா. ஏத்தாவதா நிதே⁴தும் வட்டதி, பரிபு⁴ஞ்ஜிதும் பன விஸ்ஸஜ்ஜேதும் வா அதி⁴ட்டா²தும் வா ந வட்டதி. ‘‘மய்ஹம் ஸந்தகம், மய்ஹம் ஸந்தகானி பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் கரோஹீ’’தி (பாசி. 374) ஏவம் பன வுத்தே பச்சுத்³தா⁴ரோ நாம ஹோதி, ததோ பபு⁴தி பரிபோ⁴கா³த³யோபி வட்டந்தி. அபரோ நயோ, ததே²வ சீவரானம் ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா தஸ்ஸேவ பி⁴க்கு²னோ ஸந்திகே ‘இமம் சீவர’ந்தி வா ‘இமானி சீவரானீ’தி வா ‘ஏதம் சீவர’ந்தி வா ‘ஏதானி சீவரானீ’தி வா வத்வா பஞ்சஸு ஸஹத⁴ம்மிகேஸு அஞ்ஞதரஸ்ஸ அத்தனா அபி⁴ருசிதஸ்ஸ யஸ்ஸ கஸ்ஸசி நாமம் க³ஹேத்வா ‘‘திஸ்ஸஸ்ஸ பி⁴க்கு²னோ விகப்பேமீ’’தி வா ‘‘திஸ்ஸாய பி⁴க்கு²னியா, ஸிக்க²மானாய, ஸாமணேரஸ்ஸ, திஸ்ஸாய ஸாமணேரியா விகப்பேமீ’’தி வா வத்தப்³ப³ம், அயம் அபராபி ஸம்முகா²விகப்பனா. ஏத்தாவதா நிதே⁴தும் வட்டதி, பரிபோ⁴கா³தீ³ஸு ஏகம்பி ந வட்டதி. தேன பன பி⁴க்கு²னா ‘‘திஸ்ஸஸ்ஸ பி⁴க்கு²னோ ஸந்தகம்…பே… திஸ்ஸாய ஸாமணேரியா ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் கரோஹீ’’தி வுத்தே பச்சுத்³தா⁴ரோ நாம ஹோதி, ததோ பபு⁴தி பரிபோ⁴கா³த³யோபி வட்டந்தி.

கத²ம் பரம்முகா²விகப்பனா ஹோதி? சீவரானம் ததே²வ ஏகப³ஹுபா⁴வம் ஸன்னிஹிதாஸன்னிஹிதபா⁴வஞ்ச ஞத்வா ‘இமம் சீவர’ந்தி வா ‘இமானி சீவரானீ’தி வா ‘ஏதம் சீவர’ந்தி வா ‘ஏதானி சீவரானீ’தி வா வத்வா ‘‘துய்ஹம் விகப்பனத்தா²ய த³ம்மீ’’தி வத்தப்³ப³ம். தேன வத்தப்³போ³ ‘‘கோ தே மித்தோ வா ஸந்தி³ட்டோ² வா’’தி. ததோ இதரேன புரிமனயேனேவ ‘திஸ்ஸோ பி⁴க்கூ²’தி வா…பே… ‘திஸ்ஸா ஸாமணேரீ’தி வா வத்தப்³ப³ம். புன தேன பி⁴க்கு²னா ‘‘அஹம் திஸ்ஸஸ்ஸ பி⁴க்கு²னோ த³ம்மீ’’தி வா…பே… ‘‘திஸ்ஸாய ஸாமணேரியா த³ம்மீ’’தி வா வத்தப்³ப³ம், அயம் பரம்முகா²விகப்பனா. ஏத்தாவதா நிதே⁴தும் வட்டதி, பரிபோ⁴கா³தீ³ஸு ஏகம்பி ந வட்டதி. தேன பன பி⁴க்கு²னா து³தியஸம்முகா²விகப்பனாயம் வுத்தனயேனேவ ‘‘இத்த²ன்னாமஸ்ஸ ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் கரோஹீ’’தி வுத்தே பச்சுத்³தா⁴ரோ நாம ஹோதி, ததோ பபு⁴தி பரிபோ⁴கா³த³யோபி வட்டந்தீதி. பத்தவிகப்பனாயம்பி ஏஸேவ நயோ. இதி இமாஸு த்³வீஸு விகப்பனாஸு யாய காயசி விகப்பனாய பஞ்சஸு ஸஹத⁴ம்மிகேஸு யஸ்ஸ கஸ்ஸசி சீவரம் விகப்பேத்வா வுத்தனயேன அகதப்பச்சுத்³தா⁴ரம் வா யேன வினயகம்மம் கதம், தஸ்ஸ வா விஸ்ஸாஸேன அக்³க³ஹேத்வா பரிபு⁴ஞ்ஜந்தஸ்ஸ பாசித்தியம்.

ஸாவத்தி²யம் உபனந்த³ம் ஆரப்³ப⁴ அப்பச்சுத்³தா⁴ரணம் பரிபு⁴ஞ்ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், தம் பன அதி⁴ட்ட²ஹந்தஸ்ஸ வா விஸ்ஸஜ்ஜேந்தஸ்ஸ வா து³க்கடம், ததா² பச்சுத்³தா⁴ரணே அப்பச்சுத்³தா⁴ரணஸஞ்ஞிஸ்ஸ வேமதிகஸ்ஸ வா. பச்சுத்³தா⁴ரணஸஞ்ஞிஸ்ஸ பன விஸ்ஸாஸேன பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. ஸாமம் விகப்பிதஸ்ஸ அப்பச்சுத்³தா⁴ரோ, விகப்பனுபக³சீவரதா, பரிபோ⁴கோ³தி இமானேத்த² தீணி அங்கா³னி. ஸமுட்டா²னாதீ³னி பட²மகதி²னஸதி³ஸானேவ, இத³ம் பன கிரியாகிரியந்தி.

விகப்பனஸிக்கா²பத³வண்ணனா நிட்டி²தா.

10. அபனிதா⁴னஸிக்கா²பத³வண்ணனா

த³ஸமே பத்தந்தி அதி⁴ட்டா²னுபக³ம். சீவரந்தி விகப்பனுபக³ம். நிஸீத³னம் நாம ஸத³ஸம் வுச்சதி. ஸூசிக⁴ரம் நாம ஸஸூசிகம் வா அஸூசிகம் வா. காயப³ந்த⁴னம் நாம பட்டிகா வா ஸூகரந்தகம் வா. அபனிதே⁴ய்யாதி அபனேத்வா நித³ஹேய்ய. ஹஸாபேக்கோ²தி ஹஸாதி⁴ப்பாயோ. பாசித்தியந்தி ஸயம் அபனிதே⁴ந்தஸ்ஸ பாசித்தியம், அஞ்ஞம் ஆணாபேந்தஸ்ஸ ஆணத்தியா து³க்கடம், தேன அபனிஹிதே இதரஸ்ஸ பாசித்தியம்.

ஸாவத்தி²யம் ச²ப்³ப³க்³கி³யே ஆரப்³ப⁴ அபனிதா⁴னவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, ஸாணத்திகம், திகபாசித்தியம், அனுபஸம்பன்னே திகது³க்கடம், வுத்தப்பகாரானி பன பத்தாதீ³னி ட²பேத்வா அஞ்ஞம் பரிக்கா²ரம் உபஸம்பன்னஸ்ஸ வா அனுபஸம்பன்னஸ்ஸ வா ஸந்தகம் அபனிதே⁴ந்தஸ்ஸ து³க்கடமேவ. து³ன்னிக்கி²த்தம் படிஸாமேந்தஸ்ஸ, ‘‘த⁴ம்மகத²ம் கத்வா த³ஸ்ஸாமீ’’தி படிஸாமேந்தஸ்ஸ, உம்மத்தகாதீ³னஞ்ச அனாபத்தி. உபஸம்பன்னஸ்ஸ ஸந்தகானம் பத்தாதீ³னம் அபனிதா⁴னம், விஹேஸேதுகாமதா வா ஹஸாதி⁴ப்பாயதா வாதி இமானேத்த² த்³வே அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.

அபனிதா⁴னஸிக்கா²பத³வண்ணனா நிட்டி²தா.

ஸுராபானவக்³கோ³ ச²ட்டோ².