7. ஸப்பாணகவக்³கோ³

1. ஸஞ்சிச்சஸிக்கா²பத³வண்ணனா

ஸப்பாணகவக்³க³ஸ்ஸ பட²மே பாணோதி திரச்சா²னக³தபாணோ அதி⁴ப்பேதோ. தம் கு²த்³த³கம்பி மஹந்தம்பி மாரேந்தஸ்ஸ பாசித்தியமேவ, மஹந்தே பன உபக்கமமஹந்ததாய அகுஸலம் மஹந்தம் ஹோதி.

ஸாவத்தி²யம் உதா³யித்தே²ரம் ஆரப்³ப⁴ பாணம் ஜீவிதா வோரோபனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, ஸாணத்திகம், பாணே வேமதிகஸ்ஸ, அபாணே பாணஸஞ்ஞினோ, வேமதிகஸ்ஸ வா து³க்கடம். அபாணஸஞ்ஞிஸ்ஸ, அஸஞ்சிச்ச, அஜானந்தஸ்ஸ, நமரணாதி⁴ப்பாயஸ்ஸ, உம்மத்தகாதீ³னஞ்ச அனாபத்தி. ஸேஸம் மனுஸ்ஸவிக்³க³ஹே வுத்தனயமேவாதி.

ஸஞ்சிச்சஸிக்கா²பத³வண்ணனா நிட்டி²தா.

2. ஸப்பாணகஸிக்கா²பத³வண்ணனா

து³தியே ஸப்பாணகந்தி யே பாணகா பரிபோ⁴கே³ன மரந்தி, தேஹி ஸப்பாணகம், தாதி³ஸஞ்ஹி ஜானம் பரிபு⁴ஞ்ஜந்தஸ்ஸ பயோகே³ பயோகே³ பாசித்தியம்.

ஸாவத்தி²யம் ச²ப்³ப³க்³கி³யே ஆரப்³ப⁴ ஜானம் ஸப்பாணகம் உத³கம் பரிபு⁴ஞ்ஜனவத்து²ஸ்மிம் பஞ்ஞத்தம், ஸேஸமேத்த² ஸிஞ்சனஸிக்கா²பதே³ வுத்தனயேனேவ வேதி³தப்³ப³ந்தி.

ஸப்பாணகஸிக்கா²பத³வண்ணனா நிட்டி²தா.

3. உக்கோடனஸிக்கா²பத³வண்ணனா

ததியே யதா²த⁴ம்மந்தி யோ யஸ்ஸ அதி⁴கரணஸ்ஸ வூபஸமாய த⁴ம்மோ வுத்தோ, தேனேவ த⁴ம்மேன. நிஹதாதி⁴கரணந்தி நிஹதம் அதி⁴கரணம், ஸமத²க்க²ந்த⁴கே (சூளவ. 185 ஆத³யோ) ஸத்தா²ரா வுத்தத⁴ம்மேனேவ வூபஸமிதந்தி அத்தோ², வூபஸமனனயம் பனஸ்ஸ அதி⁴கரணஸமதே²ஸு த³ஸ்ஸயிஸ்ஸாம. புனகம்மாய உக்கோடேய்யாதி தஸ்ஸ தஸ்ஸ பி⁴க்கு²னோ ஸந்திகம் க³ந்த்வா ‘‘அகதம் கம்ம’’ந்திஆதீ³னி (பாசி. 394) வத³ந்தோ புனகரணத்தா²ய உச்சாலேய்ய. யதா²டி²தபா⁴வேன பதிட்டா²தும் ந த³தே³ய்ய, தஸ்ஸேவம் கரோந்தஸ்ஸ பாசித்தியம். யம் பன த⁴ம்மேன அதி⁴கரணம் நிஹதம், தம் ஸுனிஹதமேவ. ஸசே விப்பகதே கம்மே படிக்கோஸதி, தம் ஸஞ்ஞாபேத்வா காதப்³ப³ம். இதரதா² கம்மஞ்ச குப்பதி, காரகானஞ்ச ஆபத்தி.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ உக்கோடனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், த⁴ம்மகம்மே வேமதிகஸ்ஸ, அத⁴ம்மகம்மே த⁴ம்மகம்மஸஞ்ஞினோ, வேமதிகஸ்ஸ வா து³க்கடம். உப⁴யேஸு அத⁴ம்மகம்மஸஞ்ஞிஸ்ஸ, ‘‘அத⁴ம்மேன வா வக்³கே³ன வா அகம்மாரஹஸ்ஸ வா கம்மம் கத’’ந்தி ஜானந்தஸ்ஸ, உம்மத்தகாதீ³னஞ்ச அனாபத்தி. யதா²த⁴ம்மம் நிஹதபா⁴வோ, ஜானனா, உக்கோடனாதி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன து³க்க²வேத³னந்தி.

உக்கோடனஸிக்கா²பத³வண்ணனா நிட்டி²தா.

4. து³ட்டு²ல்லஸிக்கா²பத³வண்ணனா

சதுத்தே² து³ட்டு²ல்லந்தி ஸங்கா⁴தி³ஸேஸம் அதி⁴ப்பேதம், தம் யேன கேனசி உபாயேன ஞத்வா படிச்சா²தே³ந்தஸ்ஸ பாசித்தியம். ஸசேபி ‘‘ந தா³னி நம் கஸ்ஸசி பி⁴க்கு²னோ ஆரோசேஸ்ஸாமீ’’தி து⁴ரம் நிக்கி²பித்வா பச்சா² ஆரோசேதி, பாசித்தியம், ஆபஜ்ஜித்வாவ ஆரோசேஸ்ஸதி. ஸசே பன ஏவம் து⁴ரம் நிக்கி²பித்வா படிச்சா²த³னத்த²மேவ அஞ்ஞஸ்ஸ ஆரோசேதி, ஸோபி அஞ்ஞஸ்ஸாதி ஏதேனுபாயேன ஸமணஸதம்பி ஆபஜ்ஜதியேவ தாவ, யாவ கோடி ந சி²ஜ்ஜதி. கத²ம் பன கோடி சி²ஜ்ஜதி? ஸசே ஹி ஆபன்னோ ஏகஸ்ஸ ஆரோசேதி, ஸோபி அஞ்ஞஸ்ஸ ஆரோசேதி, ஸோ நிவத்தித்வா யேனஸ்ஸ ஆரோசிதம், தஸ்ஸேவ ஆரோசேதி, ஏவம் ததியேன புக்³க³லேன து³தியஸ்ஸ ஆரோசிதே கோடி சி²ன்னா ஹோதி.

ஸாவத்தி²யம் அஞ்ஞதரம் பி⁴க்கு²ம் ஆரப்³ப⁴ து³ட்டு²ல்லாபத்திபடிச்சா²த³னவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், து³ட்டு²ல்லாய ஆபத்தியா ஆதி³பதே³ பாசித்தியம், இதரேஸு த்³வீஸு து³க்கடம், அது³ட்டு²ல்லாய திகது³க்கடம், அனுபஸம்பன்னஸ்ஸ து³ட்டு²ல்லே வா அது³ட்டு²ல்லே வா அஜ்ஜா²சாரே து³க்கடமேவ. ‘‘ஸங்க⁴ஸ்ஸ ப⁴ண்ட³னாதீ³னி ப⁴விஸ்ஸந்தீ’’தி (பாசி. 401) வா ‘‘அயம் கக்க²ளோ ப²ருஸோ ஜீவிதந்தராயம் வா ப்³ரஹ்மசரியந்தராயம் வா கரிஸ்ஸதீ’’தி வா அனாரோசேந்தஸ்ஸ, பதிரூபம் பி⁴க்கு²ம் அபஸ்ஸதோ, ந சா²தே³துகாமஸ்ஸ, ‘‘பஞ்ஞாயிஸ்ஸதி ஸகேன கம்மேனா’’தி அனாரோசேந்தஸ்ஸ, உம்மத்தகாதீ³னஞ்ச அனாபத்தி. உபஸம்பன்னஸ்ஸ து³ட்டு²ல்லாபத்திஜானனம், ‘‘படிச்சா²தே³துகாமதாய நாரோசேஸ்ஸாமீ’’தி து⁴ரனிக்கே²போதி இமானேத்த² த்³வே அங்கா³னி. ஸமுட்டா²னாதீ³னி ஸமனுபா⁴ஸனஸஅஸானேவாதி.

து³ட்டு²ல்லஸிக்கா²பத³வண்ணனா நிட்டி²தா.

5. ஊனவீஸதிவஸ்ஸஸிக்கா²பத³வண்ணனா

பஞ்சமே ஊனவீஸதிவஸ்ஸந்தி படிஸந்தி⁴க்³க³ஹணதோ பட்டா²ய அபரிபுண்ணவீஸதிவஸ்ஸம். உபஸம்பாதே³ய்யாதி உபஜ்ஜா²யோ ஹுத்வா உபஸம்பாதே³ய்ய. ஸோ ச புக்³க³லோ அனுபஸம்பன்னோதி ஜானந்தேனாபி அஜானந்தேனாபி உபஸம்பாதி³தோ அனுபஸம்பன்னோவ. ஸசே பன ஸோ த³ஸவஸ்ஸச்சயேன அஞ்ஞம் உபஸம்பாதே³தி, தஞ்சே முஞ்சித்வா க³ணோ பூரதி, ஸூபஸம்பன்னோ. ஸோபி யாவ ந ஜானாதி, தாவ தஸ்ஸ நேவ ஸக்³க³ந்தராயோ ந மோக்க²ந்தராயோ, ஞத்வா பன புன உபஸம்பஜ்ஜிதப்³ப³ம். தே ச பி⁴க்கூ² கா³ரய்ஹாதி ட²பேத்வா உபஜ்ஜா²யம் அவஸேஸா கா³ரய்ஹா ஹோந்தி, ஸப்³பே³ து³க்கடம் ஆபஜ்ஜந்தி. இத³ம் தஸ்மிம் பாசித்தியந்தி யோ பன உபஜ்ஜா²யோ ஹுத்வா உபஸம்பாதே³தி, தஸ்மிம்யேவ புக்³க³லே இத³ம் பாசித்தியம் வேதி³தப்³ப³ம். தஸ்மா யோ ‘‘ஏவம் உபஸம்பாதே³ஸ்ஸாமீ’’தி க³ணம் வா ஆசரியம் வா பத்தம் வா சீவரம் வா பரியேஸதி, ஸீமம் வா ஸம்மன்னதி (பாசி. 404), உத³குக்கே²பம் வா பரிச்சி²ந்த³தி, ஸோ ஏதேஸு ஸப்³ப³கிச்சேஸு ஞத்தியா, த்³வீஸு ச கம்மவாசாஸு து³க்கடானி ஆபஜ்ஜித்வா கம்மவாசாபரியோஸானே பாசித்தியம் ஆபஜ்ஜதி.

ராஜக³ஹே ஸம்ப³ஹுலே பி⁴க்கூ² ஆரப்³ப⁴ ஊனவீஸதிவஸ்ஸம் உபஸம்பாத³னவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், ஊனவீஸதிவஸ்ஸே வேமதிகஸ்ஸ, பரிபுண்ணவீஸதிவஸ்ஸே ஊனகஸஞ்ஞினோ, வேமதிகஸ்ஸ ச து³க்கடம். உப⁴யத்த² பரிபுண்ணஸஞ்ஞிஸ்ஸ, உம்மத்தகாதீ³னஞ்ச அனாபத்தி. ஊனவீஸதிவஸ்ஸதா, ஊனகஸஞ்ஞிதா, உபஸம்பாத³னந்தி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன பண்ணத்திவஜ்ஜம், திசித்தம், திவேத³னந்தி.

ஊனவீஸதிவஸ்ஸஸிக்கா²பத³வண்ணனா நிட்டி²தா.

6. தே²ய்யஸத்த²ஸிக்கா²பத³வண்ணனா

ச²ட்டே² யே ராஜானம் வா வஞ்சேத்வா ஸுங்கம் வா பரிஹரிதுகாமா சோரா கதகம்மா சேவ அகதகம்மா ச மக்³க³ப்படிபன்னா, தேஸு இத⁴ தே²ய்யஸத்த²ஸஞ்ஞினோ தஸ்ஸ தே²ய்யஸத்த²பா⁴வம் ஞத்வா தேன ஸத்³தி⁴ம் ஸம்விதா⁴ய க³ச்ச²ந்தஸ்ஸ ஸம்விதா⁴னே ச க³மனே ச ஓவாத³வக்³கே³ வுத்தனயேன ஆபத்திவினிச்ச²யோ வேதி³தப்³போ³.

ஸாவத்தி²யம் அஞ்ஞதரம் பி⁴க்கு²ம் ஆரப்³ப⁴ தே²ய்யஸத்தே²ன ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், மனுஸ்ஸேஸு அஸம்வித³ஹந்தேஸு ஸயமேவ ஸம்வித³ஹித்வா க³ச்ச²ந்தஸ்ஸ, தே²ய்யஸத்தே² வேமதிகஸ்ஸ, அதே²ய்யஸத்தே² தே²ய்யஸத்த²ஸஞ்ஞினோ, வேமதிகஸ்ஸ ச து³க்கடம். அதே²ய்யஸத்த²ஸஞ்ஞிஸ்ஸ, அஸம்வித³ஹித்வா வா காலவிஸங்கேதேன வா, ஆபதா³ஸு வா, க³ச்ச²ந்தஸ்ஸ, உம்மத்தகாதீ³னஞ்ச அனாபத்தி. தே²ய்யஸத்த²பா⁴வோ, ஜானனம், ஸம்விதா⁴னம், அவிஸங்கேதேன க³மனந்தி இமானேத்த² சத்தாரி அங்கா³னி. தே²ய்யஸத்த²ஸமுட்டா²னம், கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

தே²ய்யஸத்த²ஸிக்கா²பத³வண்ணனா நிட்டி²தா.

7. ஸம்விதா⁴னஸிக்கா²பத³வண்ணனா

ஸத்தமே ஸாவத்தி²யம் அஞ்ஞதரம் பி⁴க்கு²ம் ஆரப்³ப⁴ மாதுகா³மேன ஸத்³தி⁴ம் ஏகத்³தா⁴னமக்³க³ம் படிபஜ்ஜனவத்து²ஸ்மிம் பஞ்ஞத்தம், ஸேஸமேத்த² பி⁴க்கு²னியா ஸத்³தி⁴ம் ஸம்விதா⁴னஸிக்கா²பதே³ வுத்தனயேனேவ வேதி³தப்³ப³ந்தி.

ஸம்விதா⁴னஸிக்கா²பத³வண்ணனா நிட்டி²தா.

8. அரிட்ட²ஸிக்கா²பத³வண்ணனா

அட்ட²மே ஸக்³க³மோக்கா²னம் அந்தராயம் கரோந்தீதி அந்தராயிகா, தே கம்மகிலேஸவிபாகஉபவாத³பஞ்ஞத்திவீதிக்கமனவஸேன பஞ்சவிதா⁴. தேஸு முது³கானம் அத்த²ரணாதீ³னம் ப²ஸ்ஸோ விய இத்தி²ஸம்ப²ஸ்ஸோபி வட்டதீதி மேது²னவீதிக்கமனே தோ³ஸம் அதி³ஸ்வா பஞ்ஞத்திவீதிக்கமந்தராயிகே ஸந்தா⁴ய ‘‘யேமே அந்தராயிகா த⁴ம்மா வுத்தா ப⁴க³வதா, தே படிஸேவதோ நாலம் அந்தராயாயா’’தி வுத்தம். அனேகபரியாயேனாதி ‘‘அட்டி²கங்கலூபமா காமா’’திஆதீ³ஹி (ம. நி. 2.42; பாசி. 417; சூளனி. க²க்³க³விஸாணஸுத்தனித்³தே³ஸ 147) நேகேஹி காரணேஹி. ஸோ பி⁴க்கு² பி⁴க்கூ²ஹீதி யே பஸ்ஸந்தி வா ஸுணந்தி வா, தேஹி திக்க²த்தும் ஏவம் வத்தப்³போ³ ‘‘மா ஆயஸ்மா ஏவம் அவச…பே… அலஞ்ச பன தே படிஸேவதோ அந்தராயாயா’’தி. ஏவம் வுத்தே அப்படினிஸ்ஸஜ்ஜந்தஸ்ஸ து³க்கடம், ஸுத்வா அவத³ந்தானம்பி து³க்கடம். புன ஸங்க⁴மஜ்ஜ²ம்பி ஆகட்³டி⁴த்வா ததே²வ வத்தப்³போ³, தத்ராபி தஸ்ஸ அப்படினிஸ்ஸஜ்ஜனே, இதரேஸஞ்ச அவசனே து³க்கடமேவ. ஏவம்பி அப்படினிஸ்ஸஜ்ஜந்தோ புன ஞத்திசதுத்தே²ன கம்மேன யாவததியம் ஸமனுபா⁴ஸிதப்³போ³, அத²ஸ்ஸ அப்படினிஸ்ஸஜ்ஜதோ புன ஞத்தியா ச த்³வீஹி ச கம்மவாசாஹி து³க்கடம், கம்மவாசாபரியோஸானே பாசித்தியம்.

ஸாவத்தி²யம் அரிட்ட²ம் ஆரப்³ப⁴ பாபிகாய தி³ட்டி²யா அப்படினிஸ்ஸஜ்ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், அத⁴ம்மகம்மே திகது³க்கடம். அஸமனுபா⁴ஸியமானஸ்ஸ, படினிஸ்ஸஜ்ஜந்தஸ்ஸ, உம்மத்தகாதீ³னஞ்ச அனாபத்தி. த⁴ம்மகம்மதா, ஸமனுபா⁴ஸனா, அப்படினிஸ்ஸஜ்ஜனந்தி இமானேத்த² தீணி அங்கா³னி. ஸமுட்டா²னாதீ³னி ஸமனுபா⁴ஸனஸதி³ஸானேவாதி.

அரிட்ட²ஸிக்கா²பத³வண்ணனா நிட்டி²தா.

9. உக்கி²த்தஸம்போ⁴க³ஸிக்கா²பத³வண்ணனா

நவமே ததா²வாதி³னாதி ‘‘ததா²ஹம் ப⁴க³வதா த⁴ம்ம’’ந்திஆதி³வாதி³னா. அகதானுத⁴ம்மேனாதி அனுத⁴ம்மோ வுச்சதி ஆபத்தியா அத³ஸ்ஸனே வா அப்படிகம்மே வா பாபிகாய தி³ட்டி²யா அப்படினிஸ்ஸக்³கே³ வா த⁴ம்மேன வினயேன உக்கி²த்தகஸ்ஸ அனுலோமவத்தம் தி³ஸ்வா கதஓஸாரணா, ஸோ ஓஸாரணஸங்கா²தோ அனுத⁴ம்மோ யஸ்ஸ ந கதோ, அயம் அகதானுத⁴ம்மோ நாம, தாதி³ஸேன ஸத்³தி⁴ந்தி அத்தோ². ஸம்பு⁴ஞ்ஜேய்ய வாதி ஆமிஸஸம்போ⁴க³ம் வா த⁴ம்மஸம்போ⁴க³ம் வா கரேய்ய. ஸம்வஸேய்ய வாதி உபோஸதா²தி³கம் ஸங்க⁴கம்மம் கரேய்ய. ஸஹ வா ஸேய்யம் கப்பேய்யாதி நானூபசாரேபி ஏகச்ச²ன்னே நிபஜ்ஜேய்ய. தத்த² ஆமிஸபரிபோ⁴கே³ ஏகப்பயோகே³ன ப³ஹூபி த³த³தோ வா க³ண்ஹதோ வா ஏகம் பாசித்தியம், விச்சி²ந்த³னே ஸதி பயோகே³ பயோகே³ பாசித்தியம். த⁴ம்மஸம்போ⁴கே³ பதா³தீ³ஹி உத்³தி³ஸந்தஸ்ஸ வா உத்³தி³ஸாபேந்தஸ்ஸ வா பத³ஸோத⁴ம்மே வுத்தனயேன, ஸம்வாஸே கம்மபரியோஸானவஸேன, ஸஹஸேய்யாய ஏகஸ்மிம் நிபன்னே இதரஸ்ஸ நிபஜ்ஜனப்பயோக³வஸேன ஆபத்திபரிச்சே²தோ³ வேதி³தப்³போ³.

ஸாவத்தி²யம் ச²ப்³ப³க்³கி³யே ஆரப்³ப⁴ அரிட்டே²ன பி⁴க்கு²னா ஸத்³தி⁴ம் ஸம்பு⁴ஞ்ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், உக்கி²த்தகே வேமதிகஸ்ஸ, அனுக்கி²த்தகே உக்கி²த்தகஸஞ்ஞினோ சேவ வேமதிகஸ்ஸ ச து³க்கடம். உபோ⁴ஸு அனுக்கி²த்தகஸஞ்ஞிஸ்ஸ, ‘‘ஓஸாரிதோ’’தி வா ‘‘தம் தி³ட்டி²ம் படினிஸ்ஸட்டோ²’’தி வா ஜானந்தஸ்ஸ, உம்மத்தகாதீ³னஞ்ச அனாபத்தி. அகதானுத⁴ம்மதா, ஜானனா, ஸம்போ⁴கா³தி³கரணந்தி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன பண்ணத்திவஜ்ஜம், திசித்தம், திவேத³னந்தி.

உக்கி²த்தஸம்போ⁴க³ஸிக்கா²பத³வண்ணனா நிட்டி²தா.

10. கண்டகஸிக்கா²பத³வண்ணனா

த³ஸமே ஸமணுத்³தே³ஸோதி ஸாமணேரோ. சராதி க³ச்ச². பிரேதி பர அமாமக. வினஸ்ஸாதி நஸ்ஸ, யத்த² தம் ந பஸ்ஸாம, தத்த² க³ச்சா²தி வுத்தம் ஹோதி. ததா²னாஸிதந்திஏத்த² ஸம்வாஸனாஸனா லிங்க³னாஸனா த³ண்ட³கம்மனாஸனாதி திஸ்ஸோ நாஸனா. தத்த² ஆபத்தியா அத³ஸ்ஸனாதீ³ஸு உக்கே²பனா ஸம்வாஸனாஸனா நாம. தூ³ஸகோ நாஸேதப்³போ³ (பாரா. 66), மேத்தியம் பி⁴க்கு²னிம் நாஸேதா²தி (சூளவ. 193; பாரா. 384) அயம் லிங்க³னாஸனா நாம. ‘‘அஜ்ஜதக்³கே³ தே, ஆவுஸோ ஸமணுத்³தே³ஸ, ந சேவ ஸோ ப⁴க³வா ஸத்தா² அபதி³ஸிதப்³போ³’’தி (பாசி. 429) அயம் த³ண்ட³கம்மனாஸனா நாம, அயம் இதா⁴தி⁴ப்பேதா. தேன வுத்தம் ‘‘ததா²னாஸித’’ந்தி. உபலாபேய்யாதி ‘‘பத்தம் வா சீவரம் வா உத்³தே³ஸம் வா பரிபுச்ச²ம் வா த³ஸ்ஸாமீ’’தி ஸங்க³ண்ஹேய்ய. உபட்டா²பேய்யாதி சுண்ணமத்திகாதீ³னி ஸாதி³யந்தோ தேன அத்தனோ உபட்டா²னம் காராபேய்ய. ஸம்போ⁴க³ஸஹஸேய்யா அனந்தரஸிக்கா²பதே³ வுத்தனயா ஏவ, தஸ்மா ஆபத்திபரிச்சே²தோ³பேத்த² தஸ்மிம் வுத்தனயேனேவ வேதி³தப்³போ³.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ கண்டகஸமணுத்³தே³ஸஉபலாபனவத்து²ஸ்மிம் பஞ்ஞத்தம், ஸேஸம் அரிட்ட²ஸிக்கா²பதே³ வுத்தஸதி³ஸமேவாதி.

கண்டகஸிக்கா²பத³வண்ணனா நிட்டி²தா.

ஸப்பாணகவக்³கோ³ ஸத்தமோ.