3. பஞ்ஹபுச்ச²கவண்ணனா

ஸயம் ஜேட்ட²கபா⁴வேன பவத்தனதோ சத்தாரோ அதி⁴பதயோ அஞ்ஞமஞ்ஞம் க³ரும் ந கரோந்தி. தஸ்மா ‘‘சத்தாரோ இத்³தி⁴பாதா³ ந மக்³கா³தி⁴பதினோ’’தி வுத்தா. தேனாஹ ‘‘அஞ்ஞமஞ்ஞஸ்ஸ பன அதி⁴பதயோ ந ப⁴வந்தீ’’தி. ஏதமத்த²ந்தி ‘‘அதி⁴பதயோ அஞ்ஞமஞ்ஞஸ்ஸ அதி⁴பதீ ந ப⁴வந்தீ’’தி ஏதமத்த²ம். அதி⁴பதினோதி அதி⁴பதி ப⁴விதும் ஸமத்த²ஸ்ஸ. அதி⁴பதிம் ந கரோந்தீதி அதி⁴பதிம் கத்வா க³ரும் கத்வா நப்பவத்தந்தி. அதி⁴பதீனம் ஸஹபா⁴வேதி அதி⁴பதிகிச்சகரணேன ஸஹபவத்தியம். ‘‘அவீமம்ஸாதி⁴பதிகஸ்ஸ மக்³க³ஸ்ஸ அபா⁴வா’’தி இத³ம் ‘‘அதி⁴பதிதாஸமத்தா² த⁴ம்மா அதி⁴பதிபா⁴வேனேவ பவத்தேய்யு’’ந்தி தோ³ஸாரோபனவஸேனாஹ, ந யதா²தி⁴க³தவஸேன. அதி⁴பதித⁴ம்மானஞ்ஹி புப்³பா³பி⁴ஸங்கா²ரே ஸதி அதி⁴பதிபா⁴வேன பவத்தி, ந அஞ்ஞதா²தி ஸஹபா⁴வேபி தத³பா⁴வம் ஸந்தா⁴ய விஸேஸனம் ந கத்தப்³ப³ம் ஸியாதி ஸக்கா வத்தும். அஞ்ஞமஞ்ஞாதி⁴பதிகரணபா⁴வேதி அஞ்ஞமஞ்ஞம் அதி⁴பதிம் கத்வா பவத்தியம். வீமம்ஸாதி⁴பதிகத்தவசனந்தி வீமம்ஸாதி⁴பதிகபா⁴வஸ்ஸ வசனம். ந வத்தப்³ப³ம் ஸியா ஸப்³பே³ஸம்பி அதி⁴பதீனம் ஸாதி⁴பதிகத்தாதி அதி⁴ப்பாயோ. ஸஹபா⁴வோ படிக்கி²த்தோ ஏவ ஸாதி⁴பதிபா⁴வஸ்ஸ அனேகம்ஸிகதாவசனதோ.

பஞ்ஹபுச்ச²கவண்ணனா நிட்டி²தா.

இத்³தி⁴பாத³விப⁴ங்க³வண்ணனா நிட்டி²தா.