10. போ³ஜ்ஜ²ங்க³விப⁴ங்கோ³

1. ஸுத்தந்தபா⁴ஜனீயம்

பட²மனயவண்ணனா

466. பதிட்டா²னம் இத⁴ ஸம்ஸாரே அவட்டா²னம், தஸ்ஸ மூலம் கிலேஸாதி ஆஹ ‘‘கிலேஸவஸேன பதிட்டா²ன’’ந்தி. பதிட்டா²னாய பன ப்³யாபாராபத்தி கம்மந்தி வுத்தம் ‘‘அபி⁴ஸங்கா²ரவஸேன ஆயூஹனா’’தி. யஸ்மா கிலேஸேஸு தண்ஹாதி³ட்டி²யோ தண்ஹாதி³ட்டி²சரிதானம் விஸேஸதோ ஸம்ஸாரனாயிகா, கிலேஸஸஹிதமேவ ச கம்மம் பதிட்டா²னாய ஹோதி, ந கேவலம், தஸ்மா வுத்தம் ‘‘தண்ஹாதி³ட்டீ²ஹி…பே… ஆயூஹனா’’தி. ததா² தண்ஹாய ப⁴வஸ்ஸாத³பா⁴வதோ, தி³ட்டி²யா விப⁴வாபி⁴னந்த³னபூ⁴தாய விப⁴வாபி⁴ஸங்க²ரணபா⁴வதோ ‘‘தண்ஹாவஸேன பதிட்டா²னம், தி³ட்டி²வஸேன ஆயூஹனா’’தி வுத்தம். தி³ட்டீ²ஸுபி அந்தோமுக²ப்பவத்தாய ப⁴வதி³ட்டி²யா விஸேஸதோ ஸம்ஸாரே அவட்டா²னம், யதோ ஓலீயனாதி வுச்சதீதி ஆஹ ‘‘ஸஸ்ஸததி³ட்டி²யா பதிட்டா²ன’’ந்தி. ப³ஹிமுக²ப்பவத்தாபி விப⁴வதி³ட்டி² ப⁴வாபி⁴ஸங்க²ரணம் நாதிவத்ததீதி வுத்தம் ‘‘உச்சே²த³தி³ட்டி²யா ஆயூஹனா’’தி. லயாபத்தி யதா²ரத்³த⁴ஸ்ஸ ஆரம்ப⁴ஸ்ஸ அனிட்டா²னம் அந்தோஸங்கோசபா⁴வதோதி ஆஹ ‘‘லீனவஸேன பதிட்டா²ன’’ந்தி. உத்³த⁴தாபத்தி அனுபாயபூ⁴தா ப்³யாபாராபத்தி அஸங்கோசபா⁴வதோதி வுத்தம் ‘‘உத்³த⁴ச்சவஸேன ஆயூஹனா’’தி. ததா² கோஸஜ்ஜபக்கி²கத்தா ச காமஸுகா²னுயோக³ஸ்ஸ உத்³த⁴ச்சபக்கி²கத்தா ச அத்தகிலமதா²னுயோக³ஸ்ஸ தது³ப⁴யவஸேன பதிட்டா²னாயூஹனா வுத்தா, இதரம் வுத்தனயானுஸாரேன வேதி³தப்³ப³ம். இதா⁴தி இமிஸ்ஸா ஸம்மோஹவினோத³னியா. அவுத்தானந்தி ‘‘கிலேஸவஸேன பதிட்டா²ன’’ந்திஆதீ³னம் வஸேன வேதி³தப்³பா³ பதிட்டா²னாயூஹனாதி யோஜனா.

ஸமப்பவத்தே த⁴ம்மேதி லீனுத்³த⁴ச்சவிரஹேன ஸமப்பவத்தே ஸம்பயுத்தத⁴ம்மே. படிஸஞ்சிக்க²தீதி பதிரூபம் ஸங்கலேதி க³ணேதி துலேதி. தேனாஹ ‘‘உபபத்திதோ இக்க²தீ’’தி. ததா³காரோதி படிஸங்கா²னாகாரோ உபபத்திதோ இக்க²னாகாரோ. ஏவஞ்ச கத்வாதி படிஸங்கா²னஸபா⁴வத்தா ஏவ உபேக்கா²ஸம்போ³ஜ்ஜ²ங்க³ஸ்ஸ. பச்சி²மபச்சி²மகாரணபா⁴வோதி பச்சி²மஸ்ஸ பச்சி²மஸ்ஸ காரணபா⁴வோ. புரிமம் புரிமஞ்ஹி பச்சி²மஸ்ஸ பச்சி²மஸ்ஸ விஸேஸபச்சயோதி.

467. அவிபரீதகாயாதி³ஸபா⁴வக்³க³ஹணஸமத்த²தாய ப³லவதீ ஏவ ஸதி. பஞ்ஞா க³ஹிதா ஸதினேபக்கேனாதி அத்தோ². ஏவம்சித்தோதி ஏவம் லாப⁴ஸக்காரஸிலோகஸன்னிஸ்ஸிதசித்தோ. சிரகதவத்தாதி³வஸேனாதி சிரகதவத்தாதி³ஸீஸேன. ‘‘வுத்தோ’’தி இமினாபி ‘‘கத்வா ஆஹ காயவிஞ்ஞத்திம்…பே… கோட்டா²ஸ’’ந்தி யோஜனா.

பரேஸந்தி ந அனந்தரானம். ஸப்³பே³ஸம்…பே… யோஜேதப்³பா³ ‘‘ஸப்³பே³ போ³ஜ்ஜ²ங்கா³ ஸப்³பே³ஸம் பச்சயவிஸேஸா ஹோந்தியேவா’’தி. காமேதீதி காமோ, அஸ்ஸாத³னவஸேன ஆமஸதீதி ஆமிஸம், காமோவ ஆமிஸந்தி காமாமிஸம், கிலேஸகாமோ. வத்து²காமோ பன ஆமஸீயதீதி ஆமிஸம். ஏவம் ஸேஸத்³வயம்பி. தேஸு லோகீயந்தி ஏத்த² ஸுக²விஸேஸாதி லோகோ, உபபத்திவிஸேஸோ. வட்டம் ஸம்ஸாரோ. காமஸ்ஸாத³வஸேன பவத்தோ லோபோ⁴ காமாமிஸம். ப⁴வவிஸேஸபத்த²னாவஸேன பவத்தோ லோகாமிஸம். விப⁴வோ நாம கிமத்தி²யோ, கோ வா தம் அபி⁴பத்தே²ய்யாதி வட்டானுகே³த⁴பூ⁴தோ லோபோ⁴ வட்டாமிஸந்தி ச வத³ந்தி. ததா³ரம்மணந்தி தஸ்ஸா தண்ஹாய ஆரம்மணம், ரூபாதி³. லோகத⁴ம்மா லாபா⁴த³யோ. வுத்தாவஸேஸா ஸப்³பா³வ தண்ஹா ஸம்ஸாரஜனகோ ராகோ³.

பட²மனயவண்ணனா நிட்டி²தா.

து³தியனயவண்ணனா

468-9. ஸப்³பே³ ஸத்தாதி காமப⁴வாதீ³ஸு, ஸஞ்ஞீப⁴வாதீ³ஸு, ஏகவோகாரப⁴வாதீ³ஸு ச ஸப்³ப³ப⁴வேஸு ஸப்³பே³ ஸத்தா. ஆஹாரதோ டி²தி ஏதேஸந்தி ஆஹாரட்டி²திகா, பச்சயட்டி²திகா. யேன பச்சயேன தே திட்ட²ந்தி, ஸோ ஏகோவ த⁴ம்மோ ஞாதபரிஞ்ஞாஸங்கா²தாய ‘‘ஆஹாரட்டி²திகா’’தி அபி⁴ஞ்ஞாய அபி⁴ஞ்ஞேய்யோ. த்³வே தா⁴துயோதி ஸங்க²தாஸங்க²ததா⁴துயோ. திஸ்ஸோ தா⁴துயோதி காமதா⁴துரூபதா⁴துஅரூபதா⁴துயோ. பஞ்ச விமுத்தாயதனானீதி ‘‘இத⁴, பி⁴க்க²வே, பி⁴க்கு²னோ ஸத்தா² த⁴ம்மம் தே³ஸேதி அஞ்ஞதரோ வா க³ருட்டா²னியோ’’திஆதி³னா (தீ³. நி. 3.322, 355; அ. நி. 5.26) ஆக³தானி விமுச்சனகாரணானி. அனுத்தரியானீதி த³ஸ்ஸனானுத்தரியாதீ³னி ச² அனுத்தரியானி. நித்³த³ஸவத்தூ²னீதி யேஹி காரணேஹி நித்³த³ஸோ ஹோதி, தானி நித்³த³ஸவத்தூ²னி நாம. தே³ஸனாமத்தஞ்சேதம். கீ²ணாஸவோ ஹி த³ஸவஸ்ஸோ ஹுத்வா பரினிப்³பு³தோ புன த³ஸவஸ்ஸோ ந ஹோதி. ந கேவலஞ்ச த³ஸவஸ்ஸோ, நவவஸ்ஸோபி…பே… ஏகமுஹுத்திகோபி ந ஹோதியேவ புன படிஸந்தி⁴யா அபா⁴வா, அட்டு²ப்பத்திவஸேன பனேவம் வுத்தம். தானி பன ‘‘இத⁴, பி⁴க்கு², ஸிக்கா²ஸமாதா³னே திப்³ப³ச்ச²ந்தோ³ ஹோதீ’’திஆதி³னா (தீ³. நி. 3.331) ஸுத்தே ஆக³தானியேவ. ‘‘ஸம்மாதி³ட்டி²ஸ்ஸ புரிஸபுக்³க³லஸ்ஸ மிச்சா²தி³ட்டி² நிஜ்ஜிண்ணா ஹோதீ’’திஆதீ³னி (தீ³. நி. 3.360; அ. நி. 10.106) த³ஸ நிஜ்ஜரவத்தூ²னி. க²ந்தா⁴த³யோதி க²ந்தா⁴யதனதா⁴தாத³யோ. வினந்த⁴னந்தி ‘‘ப⁴வாதி³வினந்த⁴னட்டே²ன வானம் வுச்சதி தண்ஹா’’தி த³ஸ்ஸேதி. க³மனந்தி அஸ்ஸாத³னவஸேன ஆரம்மணே பவத்திமாஹ. தேன வுத்தம் ‘‘பியரூபஸாதரூபேஸூ’’தி.

விபஸ்ஸனாஸஹக³தந்தி வேதி³தப்³ப³ம் விஞ்ஞத்திஸமுட்டா²பகத்தா. ‘‘மக்³க³ம் அப்பத்தம் காயிகம் வீரிய’’ந்தி விஸேஸேத்வா வுத்தத்தா பன லோகுத்தரவீரியம்பி பரியாயேன காயிகம் நாம அத்தீ²தி தீ³பிதம் ஹோதி.

ரூபாவசரே பீதிஸம்போ³ஜ்ஜ²ங்கோ³தி ந வுச்சதீதி ஆஹ ‘‘ரூபாவசரே…பே… படிக்கி²த்தா’’தி. யதா² விபஸ்ஸனாஸஹக³தா பீதி பரியாயேன ‘‘பீதிஸம்போ³ஜ்ஜ²ங்கோ³’’தி வுச்சதி, ஏவம் ரூபாவசரே பீதி நிப்³பே³த⁴பா⁴கி³யா வத்தப்³பா³ ஸியா. ஏவம் லப்³ப⁴மானாபி அலப்³ப⁴மானம் உபாதா³ய ந வுத்தா. ‘‘அவிதக்கஅவிசாரா’’தி விஸேஸனம் ஸந்தபணீதாய பீதியா த³ஸ்ஸனத்த²ம். போ³ஜ்ஜ²ங்க³பூ⁴தாதி பரியாயபோ³ஜ்ஜ²ங்க³பூ⁴தா. அவிதக்கஅவிசாரோ பீதி…பே… ந வுத்தோ ஸவிதக்கஸவிசாரத்தா தஸ்ஸ. ந ஹி காமாவசரா அவிதக்கஅவிசாரா பீதி அத்தி².

இத⁴ வுத்தோ பரியாயேனாதி அத்தோ². மக்³க³படிவேதா⁴னுலோமனதோ விபஸ்ஸனாய விய பாத³கஜ்ஜா²னேஸுபி ஸதிஆத³யோ ‘‘போ³ஜ்ஜ²ங்கா³’’த்வேவ வுச்சந்தீதி ஆஹ ‘‘நிப்³பே³த⁴பா⁴கி³யத்தா ந படிக்கி²பிதப்³போ³’’தி. ஏவம் கஸிணஜ்ஜா²னாதீ³ஸு போ³ஜ்ஜ²ங்கே³ உத்³த⁴ரந்தானம் அதி⁴ப்பாயம் வத்வா அனுத்³த⁴ரந்தானம் அதி⁴ப்பாயம் வத்தும் ‘‘அனுத்³த⁴ரந்தா பனா’’திஆதி³மாஹ. தே ஹி ஆஸன்னேகந்தகிச்சனிப்³ப³த்தீஹி விபஸ்ஸனாக்க²ணே போ³ஜ்ஜ²ங்கே³ உத்³த⁴ரந்தி, ந ஜா²னக்க²ணே தத³பா⁴வதோ. தேனாஹ ‘‘விபஸ்ஸனாகிச்சஸ்ஸ விய…பே… ந உத்³த⁴ரந்தீ’’தி. கஸிணனிஸ்ஸந்தோ³ அரூபானீதி ஆஹ ‘‘ததா³யத்தானீ’’தி.

து³தியனயவண்ணனா நிட்டி²தா.

ததியனயவண்ணனா

470-1. வோஸ்ஸஜ்ஜனம் பஹானம் வோஸ்ஸக்³கோ³, வோஸ்ஸஜ்ஜனம் வா விஸ்ஸட்ட²பா⁴வோ நிராஸங்கானுப்பவேஸோதி ஆஹ ‘‘வோஸ்ஸக்³க³ஸத்³தோ³…பே… து³வித⁴தா வுத்தா’’தி. விபஸ்ஸனாக்க²ணே தத³ங்க³தன்னின்னப்பகாரேன, மக்³க³க்க²ணே ஸமுச்சே²த³ததா³ரம்மணகரணப்பகாரேன.

ததியனயவண்ணனா நிட்டி²தா.

ஸுத்தந்தபா⁴ஜனீயவண்ணனா நிட்டி²தா.

2. அபி⁴த⁴ம்மபா⁴ஜனீயவண்ணனா

472. உபேக்க²னமுபேக்கா²ஸம்போ³ஜ்ஜ²ங்க³ஸ்ஸ ஸபா⁴வோ, ஸோ ச ஸமாதி⁴வீரியஸம்போ³ஜ்ஜ²ங்கோ³ விய ஸம்பயுத்தானம் ஊனாதி⁴கபா⁴வப்³யாவடோ அஹுத்வா தேஸம் அனூனானதி⁴கபா⁴வே மஜ்ஜ²த்தாகாரப்பவத்தீதி இமமத்த²ம் ஆஹ ‘‘உபேக்க²னவஸேனா’’திஆதி³னா. தத்த² உபபத்திதோ இக்க²னந்தி படிஸங்கா²னமாஹ.

அபி⁴த⁴ம்மபா⁴ஜனீயவண்ணனா நிட்டி²தா.

போ³ஜ்ஜ²ங்க³விப⁴ங்க³வண்ணனா நிட்டி²தா.