2. ஸஹஜாதவாரவண்ணனா

234-242. குஸலம் த⁴ம்மம் ஸஹஜாதோ, குஸலம் ஏகம் க²ந்த⁴ம் ஸஹஜாதோதிஆதீ³ஸு ஸஹஜாதஸத்³தே³ன ஸஹஜாதபச்சயகரணம் ஸஹஜாதாயத்தபா⁴வக³மனம் வா வுத்தந்தி தஸ்ஸ கரணஸ்ஸ க³மனஸ்ஸ வா குஸலாதீ³னம் கம்மபா⁴வதோ உபயோக³வசனம் கதந்தி த³ட்ட²ப்³ப³ம். ஏஸ நயோ பச்சயவாராதீ³ஸுபி. தத்ராபி ஹி பச்சயஸத்³தே³ன ச நிஸ்ஸயபச்சயகரணம் நிஸ்ஸயாயத்தபா⁴வக³மனம் வா வுத்தம், ஸம்ஸட்ட²ஸத்³தே³ன ச ஸம்பயுத்தபச்சயகரணம் ஸம்பயுத்தாயத்தபா⁴வக³மனம் வாதி தம்கம்மபா⁴வதோ உபயோக³வசனம் குஸலாதீ³ஸு கதந்தி. ஸஹஜாதம்பி ச உபாதா³ரூபம் பூ⁴தரூபஸ்ஸ பச்சயோ ந ஹோதீதி ‘‘படிச்சா’’தி இமினா வசனேன தீ³பிதோ பச்சயோ ந ஹோதீதி அத்தோ². ‘‘உபாதா³ரூபம் பூ⁴தரூபஸ்ஸா’’தி ச நித³ஸ்ஸனவஸேன வுத்தம். உபாதா³ரூபஸ்ஸபி ஹி உபாதா³ரூபம் யதா²வுத்தோ பச்சயோ ந ஹோதி, வத்து²வஜ்ஜானி ரூபானி ச அரூபானந்தி.

ஸஹஜாதவாரவண்ணனா நிட்டி²தா.