3. பச்சயவாரவண்ணனா

243. பச்சயாதி ஏத்த² பதி அயோ பச்சயோ. பதி-ஸத்³தோ³ பதிட்ட²த்த²ம் தீ³பேதி, அய-ஸத்³தோ³ க³திம், பதிட்டா²பூ⁴தா க³தி நிஸ்ஸயோ பச்சயோதி வுத்தம் ஹோதி, ததோ பச்சயா, பச்சயகரணதோ ததா³யத்தபா⁴வக³மனதோ வாதி அத்தோ².

‘‘மஹாபூ⁴தே பச்சயா சித்தஸமுட்டா²னம் ரூப’’ந்தி (பட்டா². 1.1.245) பூ⁴துபாதா³ரூபானி ஸஹ ஸங்க³ண்ஹித்வா வுத்தம். அட்ட²கதா²யம் பன சித்தஸமுட்டா²னே ச மஹாபூ⁴தே நிஸ்ஸாய சித்தஸமுட்டா²னம் உபாதா³ரூபந்தி ஸயம் நிஸ்ஸயோ அஹுத்வா நிஸ்ஸயே உப்பஜ்ஜமானேன உபாதா³ரூபேன நித³ஸ்ஸனம் கதந்தி த³ட்ட²ப்³ப³ம்.

255. அஸஞ்ஞ…பே… கடத்தாரூபம் உபாதா³ரூபந்தி ஏத்த² யோ படிச்சவாரே ஸஹஜாதே கம்மஉதுஜானம், கம்மே ச ஏகந்தானேகந்தகம்மஜானம் வஸேன அத்தோ² வுத்தோ, ஸோ நாதி⁴ப்பேதோ ஏவ ‘‘கடத்தாரூப’’ந்தி கம்மஸமுட்டா²னரூபஸ்ஸேவ ஸப்³ப³ஸ்ஸ ச க³ஹிதத்தாதி தம் பஹாய யதா²க³ஹிதஸ்ஸ கடத்தாரூபஸ்ஸ விஸேஸனவஸேன ‘‘உபாதா³ரூபஸங்கா²தம் கடத்தாரூப’’ந்தி அத்த²மாஹ. மஹாபூ⁴தே பன படிச்ச பச்சயா ச மஹாபூ⁴தானம் உப்பத்தி ந நிவாரேதப்³பா³தி உபாதா³ரூபக்³க³ஹணேன கடத்தாரூபக்³க³ஹணம் அவிஸேஸேத்வா உபாதா³ரூபானம் நிவத்தேதப்³பா³னம் அத்தி²தாய கடத்தாரூபக்³க³ஹணேனேவ உபாதா³ரூபக்³க³ஹணஸ்ஸ விஸேஸனம் த³ட்ட²ப்³ப³ம்.

269-276. ‘‘அப்³யாகதேன அப்³யாகதம், குஸலம், அகுஸல’’ந்தி வத்தப்³பே³ ‘‘அப்³யாகதேன குஸலம், அகுஸலம், அப்³யாகத’’ந்தி, ‘‘குஸலம் த⁴ம்மம் படிச்ச குஸலோ ச அகுஸலோ ச த⁴ம்மா குஸலஸ்ஸாதி அனாமஸித்வா’’தி ச புரிமபாடே² பமாத³லேகா² த³ட்ட²ப்³பா³.

286-287. நஹேதுபச்சயா நபுரேஜாதே த்³வேதி ஏத்த² அட்ட²கதா²யம் ‘‘ஆருப்பே பன அஹேதுகமோஹஸ்ஸ அஹேதுககிரியஸ்ஸ ச வஸேன த்³வேதி வுத்தா, நவிப்பயுத்தே த்³வேதி ஆருப்பே அஹேதுகாகுஸலகிரியவஸேனா’’தி வுத்தம், தம் லப்³ப⁴மானேஸு ஏகதே³ஸேன நித³ஸ்ஸனவஸேன வுத்தந்தி த³ட்ட²ப்³ப³ம். ஆருப்பே பன அஹேதுகமோஹஸ்ஸ அஹேதுககிரியாய அஹேதுகபடிஸந்தி⁴யா ஏகச்சஸ்ஸ ச ரூபஸ்ஸ வஸேன த்³வே வுத்தாதி, நவிப்பயுத்தே த்³வேதி ஆருப்பே அஹேதுகாகுஸலகிரியாஏகச்சரூபானம் வஸேனாதி வுத்தந்தி. ‘‘நோனத்தி²னோவிக³தேஸு ஏகந்தி ஸப்³ப³ரூபஸ்ஸ வஸேனா’’தி வுத்தம், நஹேதுமூலகத்தா இமஸ்ஸ நயஸ்ஸ ஹேதுபச்சயம் லப⁴ந்தம் ந லப்³ப⁴தீதி ‘‘ஏகச்சஸ்ஸ ரூபஸ்ஸ வஸேனா’’தி ப⁴விதப்³ப³ம். சக்கா²தி³த⁴ம்மவஸேன பன சித்தஸமுட்டா²னாதி³கோட்டா²ஸவஸேன வா ஸப்³ப³ம் லப்³ப⁴தீதி ‘‘ஸப்³ப³ரூபஸ்ஸா’’தி வுத்தம் ஸியா.

289-296. ஆக³தானாக³தந்தி பஞ்ஹவஸேன வுத்தம், லப்³ப⁴மானாலப்³ப⁴மானந்தி ஆக³தே ச பஞ்ஹே லப்³ப⁴மானாலப்³ப⁴மானத⁴ம்மவஸேன.

பச்சயவாரவண்ணனா நிட்டி²தா.