8. த³ஸ்ஸனேனபஹாதப்³ப³த்திகவண்ணனா

த³ஸ்ஸனேனபஹாதப்³ப³த்திகே த³ஸ்ஸனேன பஹாதப்³போ³ த⁴ம்மோ பா⁴வனாய பஹாதப்³ப³ஸ்ஸ த⁴ம்மஸ்ஸ ஏகேனபி பச்சயேன பச்சயோ ந ஹோதீதி இத³ம் படிச்சஸமுப்பாத³விப⁴ங்கே³ விசாரிதனயேன விசாரேதப்³ப³ந்தி.

த³ஸ்ஸனேனபஹாதப்³ப³த்திகவண்ணனா நிட்டி²தா.

புச்சா²க³ணனகா³தா²யோ

குஸலாதி³ ஏககத்தய-மதா²தி³ அந்தேன மஜ்ஜி²மந்தேன;

ஆதி³ ச மஜ்ஜே²ன து³கா, தயோ திகேகோ ச விஞ்ஞேய்யோ.

தேஸ்வேகேகம் மூலம் கத்வா, தம் ஸத்தஸத்தகா புச்சா²;

ஏகேகபச்சயே யதா², ப⁴வந்தி ஏகூனபஞ்ஞாஸ.

ச²ஸத்ததாதி⁴கஸதம், ஸஹஸ்ஸமேகஞ்ச ஸுத்³தி⁴கே புச்சா²;

ஏஸ ச நயோனுலோமே, பச்சனீயே சாதி நாஞ்ஞத்த².

ராஸிகு³ணிதஸ்ஸ ராஸிஸ்ஸட்³ட⁴ம், ஸஹ ராஸிகஸ்ஸ பிண்டோ³ ஸோ;

ராஸிஸ்ஸ வா ஸஹேகஸ்ஸட்³ட⁴ம், புன ராஸினா கு³ணிதம்.

இதி ஹேதுமூலகாது³க-திகாத³யோ ச²ச்ச ஸத்ததிஸதா த்³வே;

சதுவீஸதேத்த² புச்சா², அட்³டு⁴ட்³ட⁴ஸஹஸ்ஸனஹுதஞ்ச.

தாஸம் யஸ்மா ஸுத்³தி⁴க-நயோ ந பச்சேகபச்சயே தஸ்மா;

சதுவீஸதிகு³ணிதானம், ஸஸுத்³தி⁴கானம் அயம் க³ணனா.

லக்க²த்தயம் த்³வினஹுதம், பஞ்ச ஸஹஸ்ஸானி ஸத்த ச ஸதானி;

த்³வாபஞ்ஞாஸா ஏதா, அனுலோமே பிண்டி³தா புச்சா².

அனுலோமஸதி³ஸக³ணனா, ப⁴வந்தி புச்சா²னயே ச பச்சனீயே;

ஹாபேத்வா பன ஸேஸே, நயத்³வயே ஸுத்³தி⁴கே லத்³தா⁴.

ச²ப்பஞ்ஞாஸ ப⁴வந்தி புச்சா², ச²ஸதஸஹிதஞ்ச லக்க²தேரஸகம்;

புச்சா²னயேஸு க³ணிதா, படிச்சவாரே சதூஸ்வபி.

ஸத்தஹி கு³ணிதா குஸலத்திகே த்³வயம், நவுதிஞ்சேவ பஞ்சஸதா;

சத்தாரி ஸஹஸ்ஸானி ச, ததே²கனவுதே ச லக்க²கா.

நாத்³வாவீஸதி கு³ணிதா, திகேஸு ஸப்³பே³ஸு வீஸதி ச கோடி;

லக்க²த்தயம் ஸஹஸ்ஸம், சதுவீஸதி சாபி விஞ்ஞேய்யா.

திகபட்டா²னம்.

ஏககபச்சயே பன, நவ நவ கத்வா ஸஸோளஸத்³விஸதம்;

ஹேதுது³கபட²மவாரே, பட²மனயே ஸுத்³தி⁴கே புச்சா².

ஹேதாதி³மூலகனயே-ஸ்வேகேகஸ்மிம் து³காதி³பே⁴த³யுதே;

சதுராஸீதிசதுஸத-ஸஹிதம் ஸஹஸ்ஸத்³வயம் புச்சா².

தா சதுவீஸதிகு³ணிதா, ஸஸுத்³தி⁴கா ஏத்த² ஹோந்தி அனுலோமே;

த்³வத்திம்ஸட்ட²ஸதாதி⁴க-ஸஹஸ்ஸனவகட்³ட⁴லக்க²கா.

ஏவம் பச்சனீயே த்³வே, ஸுத்³தி⁴கரஹிதா சதூஸ்வதோ ஹோந்தி;

ச²ன்னவுதட்ட²ஸதட்ட²-திம்ஸஸஹஸ்ஸத்³விலக்க²கானி.

தா பன ஸத்தகு³ணா த்³வே, ஸத்ததிஸதத்³வயம் ஸஹஸ்ஸானி;

த்³வாஸத்ததி ஹோந்தி ததோ, ஸோளஸ லக்கா²னி ஹேதுது³கே.

தா ஸதகு³ணா து³கஸதே, ஸதத்³வயம் ஸத்தவீஸதி ஸஹஸ்ஸா;

த்³வாஸத்ததிலக்கா²னி ச, ஸோளஸகோடி ததோ புச்சா².

து³கபட்டா²னம்.

து³கதிகபட்டா²னே திக-பக்கே²போ ஹோதி ஏகமேகது³கே;

தஸ்ஸ ச²ஸட்டி²கு³ணேன தே, ச²ஸட்டி²ஸதம் து³கா ஹோந்தி.

ஹேதுது³கலத்³த⁴புச்சா², கு³ணிதா தேஹி ச ஹோந்தி திகபத³மேவ;

து³கபட்டா²னே புச்சா², தாஸம் க³ணனா அயம் ஞேய்யா.

த்³வாபஞ்ஞாஸ ஸதானி ச, நவேவ நஹுதானி நவ ச ஸட்டி²ஞ்ச;

லக்கா²னி தீஹி ஸஹிதம், ஸதம் ஸஹஸ்ஸஞ்ச கோடினம்.

து³கதிகபட்டா²னம்.

திகது³கபட்டா²னே திக-மேகேகம் த்³விஸதபே⁴த³னம் கத்வா;

த்³வாவீஸத்³விஸதகு³ணா, ஞேய்யா குஸலத்திகே லத்³தா⁴.

புச்சா² அட்ட²ஸதாதி⁴க-சதுஸஹஸ்ஸத்³விலக்க²யுத்தானம்;

கோடீனம் ச²க்கமதோ², கோடிஸஹஸ்ஸானி சத்தாரி.

திகது³கபட்டா²னம்.

திகதிகபட்டா²னே, தேஸட்டி²விதே⁴கேகபே⁴த³னா து திகா;

தேஹி ச கு³ணிதா குஸல-த்திகபுச்சா²பி ஹோந்தி புச்சா² தா.

த்³வாத³ஸ பஞ்சஸதா சது-ஸட்டி²ஸஹஸ்ஸானி நவுதி சேகூனா;

லக்கா²னமேகஸட்டி², த்³வாத³ஸஸதகோடியோ சேவ.

திகதிகபட்டா²னம்.

த்³வயஹீனத்³வயஸதகு³ணோ, ஏகேகோ து³கது³கே தேஹி;

ஹேதுது³கே லத்³தா⁴ ஸங்க்²ய-பே⁴தே³ஹி ச வட்³டி⁴தா புச்சா².

ச²ஸதயுதானி பஞ்சா-ஸீதிஸஹஸ்ஸானி லக்க²னவகஞ்ச;

ஏகாத³ஸாபி கோடி, புன கோடிஸதானி தேத்திம்ஸ.

து³கது³கபட்டா²னம்.

ஸம்பிண்டி³தா து புச்சா², அனுலோமே ச²ப்³பி³தே⁴பி பட்டா²னே;

ச²த்திம்ஸதிஸதஸஹஸ்ஸ-ட்ட²கயுதஸத்தனஹுதானி.

லக்கா²னி ச²ச்ச சத்தா-லீஸேவ நவாத² கோடியோ த³ஸ ச;

ஸத்தகோடிஸதேஹி ச, கோடிஸஹஸ்ஸானி நவ ஹோந்தி.

தா சதுகு³ணிதா புச்சா², சதுப்பபே⁴தே³ ஸமந்தபட்டா²னே;

சதுசத்தாலீஸஸதத்தயம், ஸஹஸ்ஸானி தேரஸ ச.

ஸத்தாஸீதி ச லக்கா²னம், கோடீனஞ்ச ஸத்தஸத்ததியோ;

ஹோந்திட்ட²ஸதானிட்ட²-திம்ஸஸதஸஹஸ்ஸானி இதி க³ணனா.

பட்டா²னஸ்ஸ புச்சா²க³ணனகா³தா².

பட்டா²னபகரண-மூலடீகா ஸமத்தா.

இதி ப⁴த³ந்தஆனந்தா³சரியகேன கதா லீனத்த²பத³வண்ணனா

அபி⁴த⁴ம்மஸ்ஸ மூலடீகா ஸமத்தா.