6. விதக்கத்திகவண்ணனா

22. விதக்கத்திகே படிச்சவாரானுலோமே அதி⁴பதியா தேவீஸாதி ஸத்தஸு மூலகேஸு யதா²க்கமம் ஸத்த பஞ்ச தீணி ஏகம் தீணி தீணி ஏகந்தி ஏவம் தேவீஸ, அஞ்ஞமஞ்ஞே அட்ட²வீஸ ஸத்த பஞ்ச பஞ்ச தீணி சத்தாரி தீணி ஏகந்தி ஏவம், புரேஜாதே ஏகாத³ஸ தீணி சத்தாரி த்³வே து³தியததியது³மூலகேஸு ஏகம் ஏகந்தி ஏவம், ததா² ஆஸேவனே. அஞ்ஞானி க³ணனானி ஹேதுஆரம்மணஸதி³ஸானி.

31. பச்சனீயே நாதி⁴பதிபச்சயே பட²மபஞ்ஹே ‘‘அவிதக்கவிசாரமத்தே க²ந்தே⁴ படிச்ச அவிதக்கவிசாரமத்தா அதி⁴பதீ’’தி வத்வா புன ‘‘விபாகம் அவிதக்கவிசாரமத்தம் ஏகம் க²ந்த⁴ம் படிச்சா’’திஆதி³னா விஸ்ஸஜ்ஜனம் கதம், ந பன அவிஸேஸேன. கஸ்மா? விபாகவஜ்ஜானம் அவிதக்கவிசாரமத்தக்க²ந்தா⁴னம் ஏகந்தேன ஸாதி⁴பதிபா⁴வதோ. விபாகானம் பன லோகுத்தரானமேவ ஸாதி⁴பதிபா⁴வோ, ந இதரேஸந்தி தே விஸும் நித்³தா⁴ரேத்வா வுத்தா. லோகுத்தரவிபாகாதி⁴பதிஸ்ஸ சேத்த² புரிமகோட்டா²ஸேயேவ ஸங்க³ஹோ வேதி³தப்³போ³.

38. நாஸேவனமூலகே அவிதக்கவிசாரமத்தம் விபாகேன ஸஹ க³ச்ச²ந்தேனாதி ஏதம் மூலம் அவிதக்கவிசாரமத்தஅவிதக்கவிசாரபதே³ஹி அவிதக்கேஹி ஸஹ யோஜேந்தேன நபுரேஜாதஸதி³ஸம் பாளிக³மனம் காதப்³ப³ந்தி வுத்தம் ஹோதி. ஸதி³ஸதா சேத்த² யேபு⁴ய்யேன விஸதி³ஸதா ச த³ட்ட²ப்³பா³. தத்த² ஹி ஆருப்பே அவிதக்கவிசாரமத்தம் இத⁴ விபாகம் அவிதக்கவிசாரமத்தந்திஆதி³ யோஜேதப்³ப³ந்தி அயமேத்த² விஸேஸோ. இத³ஞ்ச நாஸேவனவிப⁴ங்கா³னந்தரம் லிகி²தப்³ப³ம், ந ஜா²னானந்தரம், கேஸுசி போத்த²கேஸு லிகி²தம்.

பச்சயவாரே பட²மக⁴டனே பவத்திபடிஸந்தி⁴யோதி து³மூலகேஸு பட²மே ஸத்தஸுபி பஞ்ஹேஸு பவத்திஞ்ச படிஸந்தி⁴ஞ்ச யோஜேத்வாதி வுத்தம் ஹோதி.

49. பச்சனீயே ஸத்தஸு டா²னேஸு ஸத்த மோஹா உத்³த⁴ரிதப்³பா³ மூலபதே³ஸு ஏவாதி ஸவிதக்கஸவிசாராதி³பதே³ஸு மூலபத³மேவ அவஸானபா⁴வேன யேஸு பஞ்ஹேஸு யோஜிதம், தேஸு ஸத்தஸு பஞ்ஹேஸு ஸத்த மோஹா உத்³த⁴ரிதப்³பா³தி அத்தோ².

பஞ்ஹாவாரபச்சனீயே ‘‘அவிதக்கவிசாரமத்தோ த⁴ம்மோ அவிதக்கவிசாரமத்தஸ்ஸ த⁴ம்மஸ்ஸ ஆரம்மணஸஹஜாதஉபனிஸ்ஸயகம்மபச்சயேன பச்சயோ’’தி கேஸுசி போத்த²கேஸு பாடோ² தி³ஸ்ஸதி, உபனிஸ்ஸயேன பன ஸங்க³ஹிதத்தா ‘‘கம்மபச்சயேன பச்சயோ’’தி ந ஸக்கா வத்தும். உபாதி³ன்னத்திகபஞ்ஹாவாரபச்சனீயே ஹி ‘‘அனுபாதி³ன்னஅனுபாதா³னியோ த⁴ம்மோ அனுபாதி³ன்னஅனுபாதா³னியஸ்ஸ த⁴ம்மஸ்ஸ ஸஹஜாதஉபனிஸ்ஸயபச்சயேன பச்சயோ’’தி (பட்டா². 1.4.58, 62) ஏத்தகமேவ வுத்தம். பரித்தத்திகபஞ்ஹாவாரபச்சனீயே ச ‘‘மஹக்³க³தோ த⁴ம்மோ மஹக்³க³தஸ்ஸ த⁴ம்மஸ்ஸ ஆரம்மணஸஹஜாதஉபனிஸ்ஸயபச்சயேன பச்சயோ’’தி (பட்டா². 2.12.57, 65, 73) ஏத்தகமேவ வுத்தந்தி. ஏத்தகமேவ ச அவிதக்கவிசாரமத்தம் கம்மம் அப்பமாணம் மஹக்³க³தஞ்ச, தஞ்ச து³ப்³ப³லம் ந ஹோதீதி ஏதேஹியேவ வசனேஹி விஞ்ஞாயதீதி.

விதக்கத்திகவண்ணனா நிட்டி²தா.