4. உபாதி³ன்னத்திகவண்ணனா

15. உபாதி³ன்னத்திகே அனுபாதி³ன்னஅனுபாதா³னியம் த⁴ம்மம் படிச்ச அனுபாதி³ன்னஅனுபாதா³னியோ த⁴ம்மோ உப்பஜ்ஜதி நாதி⁴பதிபச்சயாதி ஏதேன ஸயம் அதி⁴பதிபூ⁴தத்தா அவிரஹிதாரம்மணாதி⁴பதீஸுபி அதி⁴பதி து³விதே⁴னபி அதி⁴பதிபச்சயேன உப்பஜ்ஜதீதி ந வத்தப்³போ³, அயமேதஸ்ஸ ஸபா⁴வோதி த³ஸ்ஸேதி.

72. உபாதி³ன்னுபாதா³னியோ கப³ளீகாராஹாரோ உபாதி³ன்னுபாதா³னியஸ்ஸ காயஸ்ஸ ஆஹாரபச்சயேன பச்சயோதி ஏத்த² கம்மஜானம் ரூபானம் அப்³ப⁴ந்தரக³தா ஓஜா தஸ்ஸேவ கம்மஜகாயஸ்ஸ ரூபஜீவிதிந்த்³ரியம் விய கடத்தாரூபானம் அனுபாலனுபத்த²ம்ப⁴னவஸேன பச்சயோ, ந ஜனகவஸேனாதி அயமத்தோ² அட்ட²கதா²யம் வுத்தோ. ஏதஸ்மிம் பன அத்தே² ஸதி உபாதி³ன்னுபாதா³னியோ ச அனுபாதி³ன்னஅனுபாதா³னியோ ச த⁴ம்மா உபாதி³ன்னுபாதா³னியஸ்ஸ த⁴ம்மஸ்ஸ அத்தி²பச்சயேன பச்சயோ பச்சா²ஜாதிந்த்³ரியந்தி ஏத்த² ‘‘ஆஹார’’ந்திபி வத்தப்³ப³ம், யதி³ ச கம்மஜா ஓஜா ஸகலாபரூபானமேவ ஆஹாரபச்சயோ ஹோதி, ஏவம் ஸதி ‘‘உபாதி³ன்னுபாதா³னியோ கப³ளீகாராஹாரோ அனுபாதி³ன்னுபாதா³னியஸ்ஸ காயஸ்ஸ ஆஹாரபச்சயேன பச்சயோ’’தி ந வத்தப்³ப³ம் ஸியா, வுத்தஞ்சித³ம், தம்பி அனஜ்ஜோ²ஹடாய ஸஸந்தானக³தாய உபாதி³ன்னோஜாய அனுபாதி³ன்னுபாதா³னியஸ்ஸ காயஸ்ஸ ஆஹாரபச்சயம் ஸந்தா⁴ய வுத்தம். ஏவஞ்ச ஸதி ‘‘உபாதி³ன்னுபாதா³னியோ ச அனுபாதி³ன்னஅனுபாதா³னியோ ச த⁴ம்மா அனுபாதி³ன்னுபாதா³னியஸ்ஸ த⁴ம்மஸ்ஸ அத்தி²பச்சயேன பச்சயோ’’தி (பட்டா². 1.4.85) அயம்பி பஞ்ஹோ பச்சா²ஜாதாஹாரவஸேன உத்³த⁴ரிதப்³போ³ ஸியா, தஸ்மா அஜ்ஜோ²ஹடஸ்ஸ உபாதி³ன்னாஹாரஸ்ஸ லோகுத்தரக்க²ணே அபா⁴வதோ து³மூலகேஸு பட²மபஞ்ஹே ‘‘ஆஹார’’ந்தி ந வுத்தம். து³தியபஞ்ஹோ ச ந உத்³த⁴டோ, ந இதரஸ்ஸ உபாதி³ன்னாஹாரஸ்ஸ காமப⁴வே அஸம்ப⁴வாபா⁴வதோதி அஜ்ஜோ²ஹடமேவ மண்டூ³காதி³ஸரீரக³தம் உபாதி³ன்னாஹாரம் ஸந்தா⁴ய ‘‘உபாதி³ன்னுபாதா³னியோ கப³ளீகாராஹாரோ உபாதி³ன்னுபாதா³னியஸ்ஸ ச அனுபாதி³ன்னுபாதா³னியஸ்ஸ ச காயஸ்ஸ ஆஹாரபச்சயேன பச்சயோ’’தி (பட்டா². 1.4.74) வத³ந்தானம் வாதோ³ ப³லவதரோ. ந ஹி அஜ்ஜோ²ஹடமத்தாவ மண்டூ³காத³யோ குச்சி²வித்த²தம் ந கரோந்தி, ந ச ப³லம் ந உபஜாயந்தி, ந ச ரூபவிஸேஸோ ந விஞ்ஞாயதீதி.

‘‘அனுபாதி³ன்னஅனுபாதா³னியோ த⁴ம்மோ உபாதி³ன்னுபாதா³னியஸ்ஸ ச அனுபாதி³ன்னஅனுபாதா³னியஸ்ஸ ச த⁴ம்மஸ்ஸ அத்தி²பச்சயேன பச்சயோ ஸஹஜாதம் பச்சா²ஜாத’’ந்தி (பட்டா². 1.4.83) ஏவமாதீ³ஹி இத⁴ வுத்தேஹி ஏகமூலகது³கதிகாவஸானபஞ்ஹவிஸ்ஸஜ்ஜனேஹி ‘‘குஸலோ த⁴ம்மோ குஸலஸ்ஸ ச அப்³யாகதஸ்ஸ ச த⁴ம்மஸ்ஸ அத்தி²பச்சயேன பச்சயோ ஸஹஜாத’’ந்திஆதி³னா இத⁴ து³தியது³காவஸானே விய விஸ்ஸஜ்ஜனம் லப்³ப⁴தீதி விஞ்ஞாயதி. ஸுகா²வபோ³த⁴னத்த²ம் பன தத்த² ஸஹஜாதவஸேனேவ விஸ்ஸஜ்ஜனம் கதம். பச்சனீயே பன ஸஹஜாதஸ்ஸேவ அபடிக்கே²பே லாப⁴தோ, படிக்கே²பே ச அலாப⁴தோ ஸஹஜாதபச்சயவஸேனேவ ஏகமூலகது³காவஸானா தத்த² உத்³த⁴டா, இத⁴ பனேதேஹி விஸ்ஸஜ்ஜனேஹி ஏகோ த⁴ம்மோ ஸஹஜாதாதீ³ஸு அத்தி²பச்சயவிஸேஸேஸு அனேகேஹிபி அனேகேஸம் த⁴ம்மானம் ஏகோ அத்தி²பச்சயோ ஹோதீதி த³ஸ்ஸிதம் ஹோதி. ஏகோ ஹி த⁴ம்மோ ஏகஸ்ஸ த⁴ம்மஸ்ஸ ஏகேனேவ அத்தி²பச்சயவிஸேஸேன அத்தி²பச்சயோ ஹோதி, ஏகோ அனேகேஸம் ஏகேனபி அனேகேஹிபி, ததா² அனேகோ ஏகஸ்ஸ, அனேகோ அனேகேஸம் ஸமானத்தே பச்சயுப்பன்னத⁴ம்மானம், அத்தி²பச்சயவிஸேஸேஸு பன பஞ்சஸு ஸஹஜாதம் புரேஜாதேனேவ ஸஹ அத்தி²பச்சயோ ஹோதி, அனஞ்ஞத⁴ம்மத்தே பச்சா²ஜாதேன ச, ந நானாத⁴ம்மத்தே.

யதி³ ஸியா, ‘‘உபாதி³ன்னுபாதா³னியோ ச அனுபாதி³ன்னஅனுபாதா³னியோ ச த⁴ம்மா உபாதி³ன்னுபாதா³னியஸ்ஸ த⁴ம்மஸ்ஸ அத்தி²பச்சயேன பச்சயோ பச்சா²ஜாதம் இந்த்³ரிய’’ந்தி ஏத்த² ‘‘ஸஹஜாத’’ந்திபி வத்தப்³ப³ம் ஸியா. கம்மஜானஞ்ஹி பூ⁴தானம் ஸஹஜாதானம் பச்சா²ஜாதானஞ்ச லோகுத்தரானம் ஏகக்க²ணே லப்³ப⁴மானானம்பி ஏகோ அத்தி²பச்சயபா⁴வோ நத்தி² ஸஹஜாதபச்சா²ஜாதானம் நானாத⁴ம்மானம் விருத்³த⁴ஸபா⁴வத்தாதி தம் ந வுத்தந்தி வேதி³தப்³ப³ம். ஏவஞ்ச கத்வா பச்சனீயே ச ‘‘நஇந்த்³ரியே பா³வீஸா’’தி வுத்தம். அஞ்ஞதா² ஹி இந்த்³ரியபடிக்கே²பேபி ஸஹஜாதபச்சா²ஜாதவஸேன தஸ்ஸ பஞ்ஹஸ்ஸ லாப⁴தோ ‘‘தேவீஸா’’தி வத்தப்³ப³ம் ஸியாதி. புரேஜாதம் ஸஹஜாதேனேவ ஸஹ அத்தி²பச்சயோ ஹோதி, ந இதரேஹி, தம்பி வத்து² தம்ஸஹிதபுரேஜாதமேவ, ந இதரம். குஸலத்திகே ஹி பஞ்ஹாவாரே ‘‘நவிப்பயுத்தபச்சயா அத்தி²யா பஞ்சா’’தி (பட்டா². 1.1.649) வுத்தம், ஸனித³ஸ்ஸனத்திகே பன ‘‘விப்பயுத்தே பா³வீஸா’’தி. யம் பன தத்த² அத்தி²விப⁴ங்கே³ பச்சயுத்³தா⁴ரே ச திமூலகேகாவஸானம் உத்³த⁴டம், தம் வத்து²ஸஹிதஸ்ஸ ஆரம்மணபுரேஜாதஸ்ஸ ஸஹஜாதேன, ஸஹ பச்சயபா⁴வதோதி பச்சா²ஜாதம் ஆஹாரிந்த்³ரியேஹேவ, அனஞ்ஞத⁴ம்மத்தே ச ஸஹஜாதேன ச, ஆஹாரோ பச்சா²ஜாதிந்த்³ரியேஹேவ, இந்த்³ரியம் பச்சா²ஜாதாஹாரேனாதி ஏவமேதம் அத்தி²பச்சயவிபா⁴க³ம் ஸல்லக்கே²த்வா அனுலோமே பச்சனீயாதீ³ஸு ச லப்³ப⁴மானா பஞ்ஹா உத்³த⁴ரிதப்³பா³.

உபாதி³ன்னத்திகவண்ணனா நிட்டி²தா.