காமாவசரகுஸலபத³பா⁴ஜனீயவண்ணனா

1. ‘‘யே வா பன…பே… அரூபினோ த⁴ம்மா’’தி இத³ம் ‘‘ப²ஸ்ஸோ ஹோதீ’’தி ஏவமாதி³கம் விய ந விஸும் ‘‘தேபி ஹோந்தீ’’தி ஹோதி-ஸத்³தே³ன ஸம்ப³ந்த⁴ம் கத்வா வுத்தம், உத்³தி³ட்டா²வஸேஸே ச பன க³ஹேத்வா ‘‘இமே த⁴ம்மா குஸலா’’தி அப்பேதும் வுத்தந்தி அப்பனாய அவரோதி⁴தம். ஏவஞ்ச கத்வா நித்³தே³ஸேபி ஏதஸ்ஸ பத³பா⁴ஜனீயம் ந வுத்தந்தி. ஸரூபேன பன அத³ஸ்ஸிதத்தா ‘‘அத்தீ²’’தி வத்வா து³தியேன ஹோதி-ஸத்³தே³ன ஸம்ப³ந்தோ⁴ நித்³தே³ஸோ ச ந கதோ, ஸங்கே²பேன பன உத்³தி³ஸித்வா ஸங்கே²பேனேவ யே வா பன த⁴ம்மா நித்³தி³ட்டா²தி ஏதஸ்ஸ த⁴ம்மஸ்ஸ உத்³தே³ஸே அவரோதோ⁴ யுத்தோ. த⁴ம்மனித்³தே³ஸே ச நித்³தே³ஸாவஸானே வுத்தஸ்ஸாதி.

புச்சா²பரிச்சே²த³வசனேனேவ புச்சா²பா⁴வே விஞ்ஞாதே புச்சா²விஸேஸஞாபனத்த²ம் ஆஹ ‘‘அயம் கதே²துகம்யதாபுச்சா²’’தி. பஞ்சவிதா⁴ ஹீதி மஹானித்³தே³ஸே (மஹானி. 150; சூளனி. புண்ணகமாணவபுச்சா²னித்³தே³ஸ 12; மேத்தகூ³மாணவபுச்சா²னித்³தே³ஸ 18) ஆக³தா புச்சா² த³ஸ்ஸேதி. லக்க²ணந்தி ஞாதும் இச்சி²தோ யோ கோசி ஸபா⁴வோ. அஞ்ஞாதந்தி யேன கேனசி ஞாணேன அஞ்ஞாதபா⁴வம் ஆஹ. அதி³ட்ட²ந்தி த³ஸ்ஸனபூ⁴தேன ஞாணேன பச்சக்க²ம் விய அதி³ட்ட²தம். அதுலிதந்தி ‘‘ஏத்தகம் இத³’’ந்தி துலாபூ⁴தாய பஞ்ஞாய அதுலிததம். அதீரிதந்தி தீரணபூ⁴தாய பஞ்ஞாய அகதஞாணகிரியாஸமாபனதம். அவிபூ⁴தந்தி ஞாணஸ்ஸ அபாகடபா⁴வம். அவிபா⁴விதந்தி ஞாணேன அபாகடீகதபா⁴வம். அதி³ட்ட²ம் ஜோதீயதி ஏதாயாதி அதி³ட்ட²ஜோதனா. அனுமதியா புச்சா² அனுமதிபுச்சா². ‘‘தம் கிம் மஞ்ஞத², பி⁴க்க²வே’’திஆதி³புச்சா²ய ஹி ‘‘கா தும்ஹாகம் அனுமதீ’’தி அனுமதி புச்சி²தா ஹோதி. கதே²துகம்யதாதி கதே²துகம்யதாய.

பபே⁴த³தோ த⁴ம்மானம் தே³ஸனந்தி மாதிகாதே³ஸனம் ஆஹ. தத்த² ஹி புரதோ குஸலாதி³கே பபே⁴தே³ வத்வா பச்ச²தோ த⁴ம்மா வுத்தாதி ‘‘பபே⁴த³வந்தத³ஸ்ஸனத்த²’’ந்தி நித்³தே³ஸம் ஆஹ. இத³ம் வுத்தம் ஹோதி – மாதிகாய ஸவிஸேஸனா த⁴ம்மா வுத்தா, தே ச விஸேஸிதப்³ப³த்தா பதா⁴னா, பதா⁴னஞ்ச இதிகத்தப்³ப³தாய யுஜ்ஜதீதி த⁴ம்மானமேவ பதா⁴னானம் புச்சி²தப்³ப³தா விஸ்ஸஜ்ஜிதப்³ப³தா ச ஹோதி, தஸ்மா தே புச்சி²தப்³பே³ த³ஸ்ஸேதும் ‘‘கதமே த⁴ம்மா’’தி வுத்தம், தே பன விஸேஸவந்தோ புச்சி²தாதி த³ஸ்ஸேதும் புன ‘‘குஸலா’’தி வுத்தந்தி ஏவம் பபே⁴த³வந்தத³ஸ்ஸனத்த²ம் அயம் பதா³னுக்கமோ கதோதி. ‘‘இமே த⁴ம்மா குஸலா’’தி விஸ்ஸஜ்ஜனேபி ஏவமேவ யோஜனா காதப்³பா³. ‘‘பபே⁴த³தோ த⁴ம்மானம் தே³ஸனம் தீ³பேத்வா’’தி ஏதஸ்ஸ அத்த²ம் விவரிதும் ‘‘இமஸ்மிஞ்ஹீ’’திஆதி³மாஹ. அனேகப்பபே⁴தா³ தே³ஸேதப்³பா³தி ஸம்ப³ந்தோ⁴. தஸ்மாதி அவோஹாரதே³ஸனதோ த⁴ம்மானமேவ தே³ஸேதப்³ப³த்தா தேஸஞ்ச க⁴னவினிப்³போ⁴க³படிஸம்பி⁴தா³ஞாணாவஹனதோ பபே⁴த³வந்தானம் தே³ஸேதப்³ப³த்தா ‘‘குஸலா…பே… தீ³பேத்வா’’தி ஏதேன ஸம்ப³ந்தோ⁴. ஏவமேவ ஹி யதா²வுத்ததீ³பனஸ்ஸ ஹேதும் ஸகாரணம் பகாஸேதும் புன ‘‘த⁴ம்மாயேவா’’திஆதி³ வுத்தந்தி. த⁴ம்மாதி ஸாமஞ்ஞமத்தவசனேன ஸமூஹாதி³க⁴னவஸேன ஏகத்தக்³க³ஹணம் ஹோதீதி ஏகத்தவினிப்³போ⁴க³கரணம் க⁴னவினிப்³போ⁴க³ஞாணம் ஆவஹதி பபே⁴த³தே³ஸனா, ததா² குஸலாதி³த⁴ம்மானம் அப்³யாகதாதி³அத்தா²னஞ்ச தீ³பனதோ த⁴ம்மபடிஸம்பி⁴தா³தி³ஞாணஞ்ச ஆவஹதி. ‘‘பபே⁴த³வந்தத³ஸ்ஸனத்த²’’ந்தி ஏதம் விவரிதும் ‘‘இதா³னி யே தேனா’’திஆதி³மாஹ. பபே⁴த³…பே… யுஜ்ஜதி இதிகத்தப்³ப³தாயுத்தஸ்ஸ விஸேஸனத்தா. அத² வா உத்³தே³ஸோ த⁴ம்மப்பதா⁴னோ, புச்சா² ஸம்ஸயிதப்பதா⁴னா, ந ச த⁴ம்மபா⁴வோ ஸம்ஸயிதோ, குஸலாதி³பே⁴தோ³ பன ஸம்ஸயிதோதி நிச்சி²தஸம்ஸயிதவஸேனாயம் பதா³னுக்கமோ கதோ.

ஏத்தா²தி ஏதஸ்மிம் வசனே. கிமத்த²மாஹ ப⁴க³வாதி தம் த³ஸ்ஸேதும் ஆஹ ‘‘ஸமயே நித்³தி³ஸி சித்த’’ந்தி. பரியோஸானேதி ஸமயே சித்தனித்³தே³ஸஸ்ஸ ‘‘யஸ்மிம்…பே… ஆரப்³பா⁴’’தி ஏதஸ்ஸ பரியோஸானே. தஸ்மிம் ஸமயேதி தஸ்மிம் சித்துப்பாத³ஸமயே. சித்தேன ஸமயம் நியமேத்வான அத² பச்சா² போ³தே⁴துந்தி ஸம்ப³ந்தோ⁴. விஜ்ஜமானேபி போ⁴ஜனக³மனாதி³ஸமயனானத்தே ஸமவாயாதி³னானத்தே ச யதா²வுத்தசித்தனியமிதா விஸேஸிதா அஞ்ஞஸ்மிம் ஸமயே யதா²தி⁴ப்பேதானம் ப²ஸ்ஸாதீ³னம் அபா⁴வா சித்தனியமிதே ஸமயே ப²ஸ்ஸாத³யோ போ³தே⁴தும் விஸேஸனமேவ தாவ சித்தம் த³ஸ்ஸேதும் ஸமயே சித்தம் நித்³தி³ஸீதி அத்தோ². விஸேஸிதப்³போ³பி ஹி ஸமயோ அத்தனோ உபகாரத்த²ம் விஸேஸனபா⁴வம் ஆபஜ்ஜதி, விஸேஸனபூ⁴தஞ்ச சித்தம் தது³பகாரத்த²ம் விஸேஸிதப்³ப³பா⁴வந்தி. ஸந்ததிக⁴னாதீ³னம் அயம் விஸேஸோ – புரிமபச்சி²மானம் நிரந்தரதாய ஏகீபூ⁴தானமிவ பவத்தி ஸந்ததிக⁴னதா, ததா² ப²ஸ்ஸாதீ³னம் ஏகஸமூஹவஸேன து³ப்³பி³ஞ்ஞேய்யகிச்சபே⁴த³வஸேன ஏகாரம்மணதாவஸேன ச ஏகீபூ⁴தானமிவ பவத்தி ஸமூஹாதி³க⁴னதாதி.

காலஞ்ச ஸமயஞ்சாதி யுத்தகாலஞ்ச பச்சயஸாமக்³கி³ஞ்ச. க²ணோதி ஓகாஸோ. ததா²க³துப்பாதா³தி³கோ ஹி மக்³க³ப்³ரஹ்மசரியஸ்ஸ ஓகாஸோ தப்பச்சயபடிலாப⁴ஹேதுத்தா. க²ணோ ஏவ ச ஸமயோ. யோ ‘‘க²ணோ’’தி ச ‘‘ஸமயோ’’தி ச வுச்சதி, ஸோ ஏகோவாதி அத்தோ². மஹாஸமயோதி மஹாஸமூஹோ. ஸமயோபி கோ²தி ஸிக்கா²பரிபூரணஸ்ஸ ஹேதுபி. ஸமயப்பவாத³கேதி தி³ட்டி²ப்பவாத³கே. தத்த² ஹி நிஸின்னா தித்தி²யா அத்தனோ அத்தனோ ஸமயம் பவத³ந்தீதி. அத்தா²பி⁴ஸமயாதி ஹிதபடிலாபா⁴. அபி⁴ஸமேதப்³போ³தி அபி⁴ஸமயோ, அபி⁴ஸமயோ அத்தோ² அபி⁴ஸமயட்டோ²தி பீளனாதீ³னி அபி⁴ஸமிதப்³ப³பா⁴வேன ஏகீபா⁴வம் உபனேத்வா வுத்தானி, அபி⁴ஸமயஸ்ஸ வா படிவேத⁴ஸ்ஸ விஸயபூ⁴தோ அத்தோ² அபி⁴ஸமயட்டோ²தி தானேவ ததா² ஏகத்தேன வுத்தானி. தத்த² பீளனம் து³க்க²ஸச்சஸ்ஸ தம்ஸமங்கி³னோ ஹிம் ஸனம் அவிப்பா²ரிகதாகரணம். ஸந்தாபோ து³க்க²து³க்க²தாதி³பா⁴வேன ஸந்தாபனம் பரித³ஹனம்.

‘‘இதா⁴’’தி வசனம் அகுஸலேஸு அப்³யாகதேஸு ச கேஸுசி க²ணஸ்ஸ அஸம்ப⁴வதோ. நனு குஸலானஞ்ச நவமேன க²ணேன வினா உப்பத்தி ஹோதீதி? நோ ந ஹோதி, ந பன நவமோ ஏவ க²ணோ, சதுசக்கானிபி க²ணோதி வுத்தானி. ஸப்³ப³ந்திமேன பரிச்சே²தே³ன அத்தஸம்மாபணிதி⁴க²ணமந்தரேன நத்தி² குஸலஸ்ஸ உப்பத்தீதி க²ணோ இத⁴ க³ஹிதோ. இந்த்³ரியவிஸயமனஸிகாராதீ⁴னம் விஞ்ஞாணந்தி ஏவமாதி³ ஸாதா⁴ரணப²லம் த³ட்ட²ப்³ப³ம். நவமோதி அட்ட²க்க²ணே உபாதா³ய வுத்தம். சதுசக்கம் வத்ததீதி புன பதிரூபதே³ஸவாஸாதி³ஸம்பத்தி சதுசக்கம் விபரிவத்ததீதி அத்தோ². ஓகாஸபூ⁴தானீதி அத்தனோ நிப்³ப³த்தியா ‘‘இதா³னி உப்பஜ்ஜந்து குஸலானீ’’தி அனுமதிதா³னம் விய பூ⁴தானி.

சித்தகாலோதி த⁴ம்மேனேவ ஸதா காலோ விஸேஸிதோ, ந தஸ்ஸ பவத்தித்த² பவத்திஸ்ஸதி பவத்ததீதி ஏதேன அவத்தா²விஸேஸேன, நாபி தஸ்ஸ விஜானனகிச்சேன, தஸ்மா ஏவம்விதே⁴ த⁴ம்மே உபாதா³ய பஞ்ஞத்தோதி வுத்தோ. கமப்பவத்தா விஸேஸா ஏவ படிபாடீதி பீ³ஜபா⁴வோ ச படிபாடீதி வத்துமரஹதீதி இமினாதி⁴ப்பாயேன ‘‘பீ³ஜகாலோதி த⁴ம்மபடிபாடிம் உபாதா³ய பஞ்ஞத்தோ’’தி ஆஹ. த⁴ம்மபடிபாடிம் வாதி அட்ட²கலாபத⁴ம்மே ஸந்தா⁴யாஹ. ஸஞ்சிதா விய க³ய்ஹமானகாலா ஏவ காலஸஞ்சயோ, யதா² வா ததா² வா காலோதி ஏகம் ஸபா⁴வம் க³ஹேத்வா அபி⁴னிவேஸம் கரோந்தஸ்ஸ தத³பி⁴னிவேஸனிஸேத⁴னத்த²ம் ‘‘ஸோ பனேஸ ஸபா⁴வதோ அவிஜ்ஜமானத்தா பஞ்ஞத்திமத்தகோ’’தி ஆஹ. ஞத்வா விஞ்ஞேய்யோதி ஸம்ப³ந்தோ⁴. இதரோ பன ஹேதூதி ஏஸ ஸமயோ பச்சயோவ விஞ்ஞேய்யோ. ஏத்தா²தி ஏதஸ்மிம் அதி⁴காரே ந ஹேதுஹேது ஸாதா⁴ரணஹேது சாதி அத்தோ². ஸமவாயோ பச்சயஸாமக்³கீ³, ஹேது பன ஏகேகோ பச்சயோதி அயமேதேஸம் விஸேஸோ வேதி³தப்³போ³. சக்கு²விஞ்ஞாணாதீ³னம் அனேகபச்சயத³ஸ்ஸனேன தம்தம்த்³வாரிகானம் குஸலானஞ்ச தப்பச்சயதம் த³ஸ்ஸேதி.

பரிக்³க³ஹோ கதோ அட்ட²கதா²சரியேஹி. ஏககாரணவாதோ³தி பகதிகாரணவாதோ³, இஸ்ஸரகாரணவாதோ³ வா. அஞ்ஞமஞ்ஞாபேக்கோ²தி அவயவானம் அஞ்ஞமஞ்ஞாபேக்க²தாய ஸமுதா³யோ வுத்தோ. அபேக்கா² ச யாவ ஸஹாயகாரணஸமாக³மோ ந ஹோதி, தாவ ப²லஸ்ஸ அனிப்பா²த³னம் ஸமாக³மே நிப்பா²த³னஸமத்த²ஸ்ஸ நிப்பா²த³னஞ்ச. ஸமாக³மோ ச யேஸு யுஜ்ஜமானேஸு நிப்³யாபாரேஸுபி ப²லஸ்ஸ பவத்தி, தேஸம் ஸப்³பா⁴வோதி.

அஸாமக்³கீ³…பே… பத்திதோதி சக்கு²ரூபாலோகமனஸிகாரானம் அஸமவேதானம் சக்கு²விஞ்ஞாணஸ்ஸ அஹேதுபா⁴வே ஸதி ஸமவேதானஞ்ச தம்ஸபா⁴வாவினிவத்திதோ ஹேதுபா⁴வானாபத்திதோதி அத்தோ². ந ஹி ஸபா⁴வந்தரம் அஞ்ஞேன ஸஹிதம் ஸபா⁴வந்தரம் ஹோதீதி. ஏகஸ்மிந்தி அந்த⁴ஸதே ஏகேகஸ்மிம் அந்தே⁴தி அதி⁴ப்பாயோ. அஞ்ஞதா² யதா²ருதவஸேன அத்தே² க³ய்ஹமானே ஏகஸ்ஸ அந்த⁴ஸ்ஸ த³ஸ்ஸனாஸமத்த²தா ஸப்³பே³ஸம்பி ந ஹோதி, நாபி ஏகஸ்ஸ அஸமத்த²தாய ஸப்³பே³ஸம்பி அஸமத்த²தா வுத்தா, கிந்து ஸப்³பே³ஸம் விஸும் அஸமத்த²தாய ஏவாதி உபமாவசனம் ந யுஜ்ஜேய்ய, நாபி உபமோபமிதப்³ப³ஸம்ப³ந்தோ⁴. ந ஹி உபமிதப்³பே³ஸு சக்கா²தீ³ஸு ஏகஸ்ஸ அஸமத்த²தாய ஸப்³பே³ஸம்பி அஸமத்த²தா வுத்தா, கிந்து ஸப்³பே³ஸம் விஸும் அஸமத்த²தாய ஸஹிதானம் அஸமத்த²தாதி. அந்த⁴ஸதம் பஸ்ஸதீதி ச அந்த⁴ஸதம் ஸஹிதம் பஸ்ஸதீதி அதி⁴ப்பாயோ அஞ்ஞதா² வுத்தனயேன உபமிதப்³பா³ஸமானதாபத்திதோ. ஸாதா⁴…பே… டி²தபா⁴வோதி யேஸு விஜ்ஜமானேஸு ப²லப்பவத்தி தேஸம் ஸமோதா⁴னே, யதா² பவத்தமானேஸு தேஸு ப²லப்பவத்தி, ததா² பவத்திமாஹ. ந யேஸம் கேஸஞ்சி அனேகேஸம் ஸமோதா⁴னமத்தம் ஸாமக்³கீ³. ந ஹி ஸத்³த³க³ந்த⁴ரஸபோ²ட்ட²ப்³ப³ஸமோதா⁴னம் சக்கு²விஞ்ஞாணஸ்ஸ, கட்ட²கபாலபாஸாணஸமோதா⁴னம் வா ஸோதவிஞ்ஞாணஸ்ஸ ஹேதூதி. தந்தி தம் த³ஸ்ஸனம். அஸா…பே… ஸித்³தோ⁴தி நாயமத்தோ² ஸாதே⁴தப்³போ³ விஸும் அஹேதூனம் சக்கா²தீ³னம் ஸஹிதானம் ஹேதுபா⁴வஸ்ஸ பச்சக்க²ஸித்³த⁴த்தாதி அத்தோ². ந ஹி பச்சக்க²ஸித்³தே⁴ யுத்திமக்³க³னம் யுத்தந்தி.

மனுஸ்ஸத்தாதீ³னம் க²ணாவயவானம் ஸாமக்³கீ³ க²ணஸாமக்³கீ³, தம் வினா ஸோ நவமசக்கஸம்பத்திஸங்கா²தோ க²ணோ நத்தி². ஸா ஏவ ஹி க²ணஸாமக்³கீ³ ஸோ க²ணோதி அத்தோ². க²ண…பே… தீ³பேதி அத்தனோ து³ல்லப⁴தாயாதி அத்தோ². க²ணத்தோ² வா ஸமயஸத்³தோ³ க²ணஸங்கா²தோ ஸமயோதி வுத்தோ. ஸோ யஸ்மிம் து³ல்லபே⁴ க²ணே ஸதீதி இமஸ்ஸத்த²ஸ்ஸ விபா⁴வனவஸேன ததா³யத்தாய குஸலுப்பத்தியா து³ல்லப⁴பா⁴வம் தீ³பேதி. ஏதேனுபாயேன ஸமவாய…பே… வுத்திம் தீ³பேதீதி ஏத்த² இதோ பரேஸு ச யோஜனா தஸ்ஸ தஸ்ஸ தம்தம்தீ³பனே காதப்³பா³.

தஸ்ஸ புரிஸஸ்ஸாதி ‘‘ஸேய்யதா²பி பி⁴க்க²வே சத்தாரோ த³ள்ஹத⁴ம்மா த⁴னுக்³க³ஹா ஸிக்கி²தா கதஹத்தா² கதுபாஸனா சதுத்³தி³ஸா டி²தா அஸ்ஸு, அத² புரிஸோ ஆக³ச்சே²ய்ய ‘அஹம் இமேஸம்…பே… கதுபாஸனானம் கண்டே³ கி²த்தே கி²த்தே அப்பதிட்டி²தே பத²வியம் க³ஹேத்வா ஆஹரிஸ்ஸாமீ’’’தி (ஸம். நி. 2.228) ஏவம் வுத்தஜவனபுரிஸஸ்ஸ. தாவ பரித்தகோதி க³மனஸ்ஸாதா³னம் தே³வபுத்தானம் ஹேட்டு²பரியாயேன படிமுக²ம் தா⁴வந்தானம் ஸிரஸி பாதே³ ச ப³த்³த⁴கு²ரதா⁴ராஸன்னிபாததோ ச பரித்ததரோ காலோ. காலஸங்கா²தோ ஸமயோ சித்தபரிச்சி²ன்னோ வுச்சமானோ தேனேவ பரிச்சே²த³கசித்தேன ‘‘ஏவம் பரித்தோ அஹ’’ந்தி அத்தனோ பரித்ததம் தீ³பேதி. யதா² சாஹம், ஏவம் ஸப்³போ³ குஸலசித்தப்பவத்திகாலோதி தஸ்ஸ பரித்ததம் தீ³பேதி. ஸத்³த³ஸ்ஸ தீ³பனா வுத்தனயானுஸாரேன வேதி³தப்³பா³.

பகதிவாதீ³னம் மஹதோ விய அணுவாதீ³னம் த்³விஅணுகஸ்ஸ விய ச ஏகஸ்ஸேவ. ஹேது…பே… வுத்திதம் தீ³பேதீதி பச்சயாயத்தவுத்திதீ³பனதோ தப்பரபா⁴வா ஹேதுஸங்கா²தஸ்ஸ பராயத்தவுத்திதீ³பனதா வுத்தா. ஸதி பன பச்சயாயத்தபா⁴வே பச்சயஸாமக்³கீ³ஆயத்ததா ஸமவாயஸங்கா²தேன தீ³பியதீதி அதப்பரபா⁴வதோ தஸ்ஸ தம்தீ³பனதா ந வுத்தா. அனேன ஸமயேன கத்துபூ⁴தேன, அனேன ஸமயேன வா கரணபூ⁴தேன ப⁴க³வதா படிஸேதி⁴தோதி அத்தோ². ஏஸ நயோ புரிமாஸு தீ³பனாஸு.

அதி⁴கரணவஸேனாதி ஆதா⁴ரவஸேன. ஏத்தா²தி காலஸமூஹஸங்கா²தே ஸமயே க³ஹிதேதி அத்தோ². காலோபி ஹி சித்தபரிச்சி²ன்னோ ஸபா⁴வதோ அவிஜ்ஜமானோபி ஆதா⁴ரபா⁴வேனேவ ஸஞ்ஞாதோ ‘‘அதி⁴கரண’’ந்தி வுத்தோ தம்க²ணப்பவத்தானம் ததோ புப்³பே³ பரதோ ச அபா⁴வா. பா⁴வோதி கிரியா. கிரியாய கிரியந்தரலக்க²ணம் பா⁴வேனபா⁴வலக்க²ணம். யதா² கா³வீஸு து³ய்ஹமானாஸு க³தோ, து³த்³தா⁴ஸு ஆக³தோதி தோ³ஹனகிரியா க³மனகிரியாய லக்க²ணம் ஹோதி, ஏவமிஹாபி ‘‘யஸ்மிம் ஸமயே தஸ்மிம் ஸமயே’’தி ச வுத்தே ஸதீதி அயமத்தோ² விஞ்ஞாயமானோ ஏவ ஹோதி அஞ்ஞகிரியாஸம்ப³ந்தா⁴பா⁴வேன பத³த்த²ஸ்ஸ ஸத்தாவிரஹாபா⁴வதோதி ஸமயஸ்ஸ ஸத்தாகிரியாய சித்துப்பாத³கிரியா ப²ஸ்ஸாதி³ப⁴வனகிரியா ச லக்கீ²யதீதி உப⁴யத்த² ஸமயஸத்³தே³ பு⁴ம்மனித்³தே³ஸோ கதோ லக்க²ணபூ⁴தபா⁴வயுத்தோதி.

உத்³தா³னதோதி உத்³தே³ஸதோ ஸங்கே²பதோ. கிலேஸகாமோ வத்து²காமபா⁴வம் ப⁴ஜந்தோ காமனீயவஸேன ப⁴ஜதி, ந காமனவஸேனாதி காமனவஸேன கிலேஸகாமோ ஏவ ஹோதி, ந வத்து²காமோ. து³விதோ⁴பேஸோதி வசனேன து³வித⁴ஸ்ஸபி ஸஹிதஸ்ஸ அவசரணப்பதே³ஸம் ஸங்க³ண்ஹாதி. தேன வத்து²காமஸ்ஸேவ பவத்திதே³ஸோ ரூபாரூபதா⁴துத்³வயம் அபனீதம் ஹோதி. நனு ச து³விதோ⁴பி ஸஹிதோ ரூபாரூபதா⁴தூஸு பவத்ததி ரூபாரூபாவசரத⁴ம்மானம் வத்து²காமத்தா ததா³ரம்மணானம் ரூபாரூபராகா³னஞ்ச கிலேஸகாமபா⁴வஸித்³தி⁴தோதி? தம் ந, ப³ஹலகிலேஸஸ்ஸ காமராக³ஸ்ஸ கிலேஸகாமபா⁴வேன இத⁴ ஸங்க³ஹிதத்தா. ஏவஞ்ச கத்வா ரூபாரூபதா⁴தூஸு பவத்தமானேஸு காமாவசரத⁴ம்மேஸு நிகந்தி இத⁴ ந ஸங்க³ஹிதா ஸுகு²மத்தா. ‘‘உத்³தா³னதோ த்³வே காமா’’தி ஸப்³ப³காமே உத்³தி³ஸித்வாபி ஹி ‘‘து³விதோ⁴பேஸோ’’தி ஏத்த² ததே³கதே³ஸபூ⁴தா அஞ்ஞமஞ்ஞஸஹிததாபரிச்சி²ன்னா காமராக³தப்³ப³த்து²கத⁴ம்மாவ ஸங்க³ஹிதாதி, நிரவஸேஸோ வா கிலேஸகாமோ காமராகோ³ காமதண்ஹாரூபதண்ஹாஅரூபதண்ஹானிரோத⁴தண்ஹாபே⁴தோ³ இத⁴ பவத்ததீதி அனவஸேஸப்பவத்திதம் ஸந்தா⁴ய ‘‘து³விதோ⁴பேஸோ’’தி வுத்தம், வத்து²காமோபி ச அப்பகோ இதா⁴பி ந வத்ததி ரூபாரூபாவசரவிபாகமத்தோ, ததா²பி பரிபுண்ணவத்து²காமத்தா காமாவசரத⁴ம்மாவ இத⁴ க³ஹிதா. ஏவஞ்ச கத்வா ஸஸத்தா²வசரோபமா யுத்தா ஹோதி. ‘‘ரூபூபபத்தியா மக்³க³ம் பா⁴வேதீ’’தி (த⁴. ஸ. 163; விப⁴. 625) ஏத்த² ரூபப⁴வோ உத்தரபத³லோபம் கத்வா ‘‘ரூப’’ந்தி வுத்தோ, ஏவமிதா⁴பி உத்தரபத³லோபோ த³ட்ட²ப்³போ³. அஞ்ஞதா² ஹி சித்தம் காமாவசராவசரந்தி வுச்சேய்யாதி. ஆரம்மணகரணவஸேனாதிஆதி³கே ‘‘காமோ’’தி ஸப்³ப³ம் தண்ஹமாஹ, தஸ்மா ‘‘காமஞ்சேஸா’’திஆதி³ வுத்தம், ‘‘காமே அவசாரேதீதி காமாவசார’’ந்தி வத்தப்³பே³ சா-ஸத்³த³ஸ்ஸ ரஸ்ஸத்தம் கதம்.

ருள்ஹிஸத்³தே³னாதி ஞாணஸம்பயுத்தேஸு ருள்ஹேன ஸத்³தே³ன, ஞாணஸம்பயுத்தேஸு வா பவத்தித்வா அனவஜ்ஜஸுக²விபாகதாய தம்ஸதி³ஸேஸு ஞாணவிப்பயுத்தேஸு ருள்ஹேன ஸத்³தே³ன. அத² வா கிஞ்சி நிமித்தம் க³ஹேத்வா ஸதிபி அஞ்ஞஸ்மிம் தம்னிமித்தயுத்தே கிஸ்மிஞ்சிதே³வ விஸயே ஸம்முதியா சிரகாலதாவஸேன நிமித்தவிரஹேபி பவத்தி ருள்ஹி நாம யதா² ‘‘மஹியம் ஸேதீதி மஹிம்ஸோ, க³ச்ச²ந்தீதி கா³வோ’’தி, ஏவம் குஸலஸத்³த³ஸ்ஸபி ருள்ஹிபா⁴வோ வேதி³தப்³போ³. பஞ்ஞானித்³தே³ஸே ‘‘கோஸல்ல’’ந்தி அபி⁴த⁴ம்மே (த⁴. ஸ. 16) வுத்தம், தஸ்ஸ ச பா⁴வா குஸலஸத்³த³ப்பவத்தீதி கோஸல்லயோகா³ குஸலந்தி அயம் அபி⁴த⁴ம்மபரியாயோ ஹோதி. குஸலந்தி குஸலபா⁴வம் ஆஹ.

விபாகாதீ³னம் அவஜ்ஜபடிபக்க²தா நத்தீ²தி குஸலமேவ அனவஜ்ஜலக்க²ணம் வுத்தம். அனவஜ்ஜலக்க²ணமேவாதி ஸுக²விபாகஸபா⁴வஸ்ஸ லக்க²ணபா⁴வனிவாரணத்த²ம் அவதா⁴ரணம் கதம், தம்னிவாரணஞ்ச தஸ்ஸ பச்சுபட்டா²னதம் வத்து²காமதாய கதம். ஸம்பத்திஅத்தே²ன ரஸேன வோதா³னபா⁴வரஸம். ப²லட்டே²ன பச்சுபட்டா²னேன இட்ட²விபாகபச்சுபட்டா²னம். ஸபா⁴வோ கக்க²ளாதி³பு²ஸனாதி³கோ அஸாதா⁴ரணோ. ஸாமஞ்ஞம் ஸாதா⁴ரணோ அனிச்சாதி³ஸபா⁴வோ. இத⁴ ச குஸலலக்க²ணம் ஸப்³ப³குஸலஸாதா⁴ரணஸபா⁴வத்தா ஸாமஞ்ஞம் த³ட்ட²ப்³ப³ம், அகுஸலாதீ³ஹி அஸாதா⁴ரணதாய ஸபா⁴வோ வா. உபட்டா²னாகாரோதி க³ஹேதப்³ப³பா⁴வேன ஞாணஸ்ஸ உபட்ட²ஹனாகாரோ. ப²லம் பன அத்தனோ காரணம் படிச்ச தப்படிபி³ம்ப³பா⁴வேன, படிமுக²ம் வா உபட்டா²தீதி பச்சுபட்டா²னம்.

விஜானாதீதி ஸஞ்ஞாபஞ்ஞாகிச்சவிஸிட்ட²ம் விஸயக்³க³ஹணம் ஆஹ. ஸப்³ப³சித்தஸாதா⁴ரணத்தா யத்த² யத்த² யதா² யதா² அத்தோ² லப்³ப⁴தி, தத்த² தத்த² ததா² ததா² க³ஹேதப்³போ³தி. யம் ஆஸேவனபச்சயபா⁴வேன சினோதி, யஞ்ச கம்முனா அபி⁴ஸங்க²தத்தா சிதம், தம் ததா² ‘‘சித்த’’ந்தி வுத்தம். யம் பன ததா² ந ஹோதி, தம் பரித்தகிரியத்³வயம் அந்திமஜவனஞ்ச லப்³ப⁴மானசிந்தனவிசித்ததாதி³வஸேன ‘‘சித்த’’ந்தி வேதி³தப்³ப³ம். ஹஸிதுப்பாதோ³ பன அஞ்ஞஜவனக³திகோவ. சித்தானம் பனாதி விசித்ரானந்தி அத்தோ². தத³ந்தோக³த⁴த்தா ஹி ஸமுதா³யவோஹாரேன அவயவோபி ‘‘சித்த’’ந்தி வுச்சதி யதா² பப்³ப³தனதீ³ஸமுத்³தா³தி³ஏகதே³ஸேஸு தி³ட்டே²ஸு பப்³ப³தாத³யோ தி³ட்டா²தி வுச்சந்தீதி. சரணம் நாம க³ஹேத்வா சரிதப்³ப³சித்தபடோ. ரூபானீதி பி³ம்பா³னி.

அஜ்ஜ²த்திகந்தி இந்த்³ரியப³த்³த⁴ம் வத³தி. சித்தகதமேவாதி சித்தஸ்ஸ மூலகாரணதம் ஸந்தா⁴ய வுத்தம். கம்மஸ்ஸ ஹேதம் சித்தம் காரணந்தி. தம் பன அத்த²ம் விபா⁴வேதும் ‘‘காயகம்மாதி³பே⁴த³’’ந்திஆதி³மாஹ. லிங்க³னானத்தந்தி ஸண்டா²னனானத்தம், பி⁴ன்னஸண்டா²னங்க³பச்சங்க³வதோ ஸரீரஸ்ஸ வா நானத்தம். வோஹாரவஸேன இத்தி²புரிஸாதி³பா⁴வேன வோஹரிதப்³பே³ஸு பத்த²னாவிஸேஸா உப்பஜ்ஜந்தி, ததோ கம்மவிஸேஸா. ஏவமித³ம் கம்மனானத்தம் வோஹாரனானத்ததோ ஹோதி. அபா…பே… காதி³தாதி ஏவமாதீ³ஸு ஆதி³-ஸத்³தே³ஹி க³தியா உபபத்தியா அத்தபா⁴வே லோகத⁴ம்மேஸு ச நானாகரணானி ஸுத்தாக³தானி ஸங்க³ண்ஹாதி.

கம்மனானத்தாதி³வஸேனாதி ஏத்த² குஸலாகுஸலவஸேன கம்மனானத்தம் வேதி³தப்³ப³ம். விஸதி³ஸஸபா⁴வதா ஹி நானத்தந்தி. குஸலகம்மஸ்ஸ தா³னாதி³வஸேன காயஸுசரிதாதி³பா⁴வேன ச புது²த்தம், அகுஸலகம்மஸ்ஸ ச மச்ச²ரியாதீ³ஹி காயது³ச்சரிதாதீ³ஹி ச புது²த்தம் வேதி³தப்³ப³ம். ப³ஹுப்பகாரதா ஹி புது²த்தந்தி. அன்னதா³னாதி³வஸேன தா³னாதீ³னம் பாணாதிபாதாவிரதிஆதி³வஸேன காயஸுசரிதாதீ³னம் ஆவாஸமச்ச²ரியாதி³வஸேன மச்ச²ரியாதீ³னம் பாணாதிபாதாதி³வஸேன காயது³ச்சரிதாதீ³னஞ்ச பபே⁴தோ³ வேதி³தப்³போ³. ஏகேகஸ்ஸ ஹி பகாரஸ்ஸ பே⁴தோ³ பபே⁴தோ³தி. நானத்தாதீ³னம் வவத்தா²னம் ததா² ததா² வவத்தி²ததா நிச்சி²ததா. ஏதேனுபாயேன லிங்க³னானத்தாதீ³னி வேதி³தப்³பா³னி. கம்மனானத்தாதீ³ஹி நிப்³ப³த்தானி ஹி தானீதி.

பச்சுப்பன்னஸ்ஸ லிங்க³ஸ்ஸ கம்மதோ பவத்திம் தத³னுக்கமேன பச்சுப்பன்னகம்மஸ்ஸ நிப்ப²த்திஞ்ச த³ஸ்ஸேத்வா ததோ அனாக³தலிங்க³னானத்தாதி³னிப்ப²த்தித³ஸ்ஸனேன ஸம்ஸாரம் க⁴டேந்தோ ‘‘கம்மனானாகரணம் படிச்சா’’திஆதி³மாஹ. தத்த² புரிமேன கம்மவசனேன அவிஜ்ஜாஸங்கா²ரா, லிங்கா³தி³வசனேன விஞ்ஞாணாதீ³னி ப⁴வபரியோஸானானி, க³திஆதி³வசனேன ஜாதிஜராமரணானி க³ஹிதானீதி த³ட்ட²ப்³பா³னி. தத்த² க³தீதி நிரயாத³யோ பஞ்ச க³தியோ வுச்சந்தி, தாஸம் நானாகரணம் அபதா³தி³பா⁴வோ. தா ஹி ததா² பி⁴ன்னாதி. உபபத்தீதி கோ³மஹிம்ஸாதி³க²த்தியாதி³சாதுமஹாராஜிகாதி³உபபத்தியோ, தாஸம் நானாகரணம் உச்சாதி³தா. க²த்தியோ ஏவ ஹி ஏகச்சோ குலபோ⁴க³இஸ்ஸரியாதீ³ஹி உச்சோ ஹோதி, ஏகச்சோ நீசோ. தேஹி ஏவ ஹீனதாய ஹீனோ, பதா⁴னபா⁴வம் நீததாய பணீதோ, அட்³ட⁴தாய ஸுக³தோ, த³லித்³த³தாய து³க்³க³தோ. குலவஸேன வா உச்சனீசதா, இஸ்ஸரியவஸேன ஹீனபணீததா, போ⁴க³வஸேன ஸுக³தது³க்³க³ததா யோஜேதப்³பா³. ஸுவண்ணது³ப்³ப³ண்ணதாதி ஓதா³தஸாமாதி³வண்ணஸுத்³தி⁴அஸுத்³தி⁴வஸேன வுத்தம். ஸுஜாதது³ஜ்ஜாததாதி நிக்³ரோத⁴பரிமண்ட³லாதி³ஆரோஹபரிணாஹேஹி லக்க²ணேஹி வா அத்தபா⁴வபரிபுண்ணாபரிபுண்ணஜாததாவஸேன. ஸுஸண்டி²தது³ஸ்ஸண்டி²ததாதி அங்க³பச்சங்கா³னம் ஸண்டா²னவஸேன.

அபரம்பி வுத்தம் அஜ்ஜ²த்திகசித்தஸ்ஸ யதா²வுத்தஸ்ஸ சித்தகதபா⁴வஸாத⁴கம் ஸுத்தம் ‘‘கம்மதோ’’திஆதி³. கம்மஞ்ஹி சித்ததோ நிப்³ப³த்தந்தி ததோ நிப்ப²ஜ்ஜமானம் ஸப்³ப³ம்பி சித்தம் சித்தகதமேவாதி ஸாதே⁴தி. கம்மனிப்³ப³த்ததோ லிங்க³தோ பவத்தமானலிங்க³ஸஞ்ஞா மூலகாரணதோ கம்மதோ ஆஸன்னகாரணதோ லிங்க³தோ ச பவத்தா ஹோதீதி ‘‘கம்மதோ…பே… பவத்தரே’’தி ஆஹ. அத² வா லிங்க³ஞ்ச ஸஞ்ஞா ச லிங்க³ஸஞ்ஞா, தா யதா²ஸங்க்²யம் கம்மதோ லிங்க³தோ ச பவத்தரேதி அத்தோ². ஸஞ்ஞாதோ பே⁴த³ம் க³ச்ச²ந்தீதி தே இத்தி²புரிஸாதி³லிங்க³ஸஞ்ஞாதோ இத்தி²புரிஸாதி³வோஹாரபே⁴த³ம் த⁴ம்மா க³ச்ச²ந்தி, ததா² ததா² வோஹரிதப்³பா³தி அத்தோ². இமாய கா³தா²ய அதீதபச்சுப்பன்னத்³த⁴படிச்சஸமுப்பாத³வஸேன சித்தகதம் சித்தம் த³ஸ்ஸிதம்.

லோகோ ஏவ பஜாதத்தா பஜாதி புரிமபாத³ஸ்ஸ விவரணம் பச்சி²மபாதோ³ த³ட்ட²ப்³போ³. யதா² ரத²ஸ்ஸ ஆணி நிப³ந்த⁴னா, ஏவம் ஸத்தலோகரத²ஸ்ஸ கம்மம் நிப³ந்த⁴னந்தி உபமாஸம்ஸந்த³னம் வேதி³தப்³ப³ம். இமாய ச கா³தா²ய அத்³த⁴த்³வயவஸேன சித்தஸ்ஸ கம்மவிஞ்ஞாணகததா த³ஸ்ஸிதா. கித்திந்தி பரம்முகா² கித்தனம் பத்த²டயஸதம். பஸம்ஸந்தி ஸம்முகா² பஸம்ஸனம் து²திம். கம்மனானாகரணந்தி கம்மதோ நிப்³ப³த்தனானாகரணம் கம்மஜேஹி அனுமியமானம் கம்மஸ்ஸேவ வா நானாகரணம்.

கம்மஸ்ஸகாதி கம்மஸயா. கம்மஸ்ஸ தா³யம் தேன தா³தப்³ப³ம் ஆதி³யந்தீதி கம்மதா³யாதா³. அண்ட³ஜாதீ³னஞ்ச யோனீனம் கம்மதோ நிப்³ப³த்தத்தா கம்மமேவ யோனி அத்தபா⁴வபடிலாப⁴னிமித்தம் ஏதேஸந்தி கம்மயோனீ. ப³ந்த⁴னட்டே²ன கம்மம் ப³ந்து⁴ ஏதேஸந்தி கம்மப³ந்தூ⁴.

சித்தஸ்ஸாதி கம்மவிஞ்ஞாணஸ்ஸ. தஸ்ஸ பன அலத்³தோ⁴காஸதா அஞ்ஞேன கம்மேன படிபா³ஹிதத்தா தத³விபச்சனோகாஸே புக்³க³லஸ்ஸ நிப்³ப³த்தத்தா ச வேதி³தப்³பா³. விஜ்ஜமானம்பி அபராபரியவேத³னீயகம்மவிஞ்ஞாணம் காலக³திபயோகா³தி³ஸஹகாரீபச்சயவிகலதாய அவஸேஸபச்சயவேகல்லம் த³ட்ட²ப்³ப³ம். ஏகச்சசித்தந்தி சித்தேன கத்தப்³ப³சித்ரேன ஏகச்சபூ⁴தம் தேன கத்தப்³ப³சித்ரமாஹ.

அனுப⁴வித்வா ப⁴வித்வா ச அபக³தம் பூ⁴தாபக³தம். அனுபூ⁴தபூ⁴ததா ஹி பூ⁴ததாஸாமஞ்ஞேன பூ⁴தஸத்³தே³ன வுத்தா. ஸாமஞ்ஞமேவ ஹி உபஸக்³கே³ன விஸேஸீயதீதி. அனுபூ⁴தஸத்³தோ³ ச கம்மவசனிச்சா²பா⁴வதோ அனுப⁴வகவாசகோ த³ட்ட²ப்³போ³. விகப்பகா³ஹவஸேன ராகா³தீ³ஹி தப்³பி³பக்கே²ஹி ச அகுஸலம் குஸலஞ்ச ஆரம்மணரஸம் அனுப⁴வதி, ந விபாகோ கம்மவேக³க்கி²த்தத்தா, நாபி கிரியா அஹேதுகானம் அதிது³ப்³ப³லதாய ஸஹேதுகானஞ்ச கீ²ணகிலேஸஸ்ஸ ச²ளங்கு³பேக்கா²வதோ உப்பஜ்ஜமானானம் அதிஸந்தவுத்தித்தா. ஏத்த² ச புரிமனயே குஸலாகுஸலமேவ வத்தும் அதி⁴ப்பாயவஸேன ‘‘பூ⁴தாபக³த’’ந்தி வுத்தம். யம் ‘‘உப்பன்னானம் அகுஸலானம் த⁴ம்மானம் பஹானாய உப்பன்னானம் குஸலானம் த⁴ம்மானம் டி²தியா’’தி (ஸம். நி. 5.651-662; விப⁴. 390-391) ஏத்த² உப்பன்னந்தி க³ஹேத்வா தம்ஸதி³ஸானம் பஹானம், வுத்³தி⁴ ச வுத்தா, பச்சி²மனயே பன ச-ஸத்³தே³ன குஸலாகுஸலஞ்ச ஆகட்³டி⁴த்வா ஸப்³ப³ம் ஸங்க²தம் வுத்தம் பூ⁴தாபக³தபா⁴வாபி⁴தா⁴னாதி⁴ப்பாயேன.

விபச்சிதும் ஓகாஸகரணவஸேன உப்பதிதம் அதீதகம்மஞ்ச ததோ உப்பஜ்ஜிதும் ஆரத்³தோ⁴ அனாக³தோ விபாகோ ச ‘‘ஓகாஸகதுப்பன்ன’’ந்தி வுத்தோ. யம் உப்பன்னஸத்³தே³ன வினாபி விஞ்ஞாயமானம் உப்பன்னம், தம் ஸந்தா⁴ய ‘‘நாஹம், பி⁴க்க²வே, ஸஞ்சேதனிகான’’ந்திஆதி³ (அ. நி. 10.217, 219) வுத்தம். தாஸு தாஸு பூ⁴மீஸூதி மனுஸ்ஸதே³வாதி³அத்தபா⁴வஸங்கா²தேஸு உபாதா³னக்க²ந்தே⁴ஸு. தஸ்மிம் தஸ்மிம் ஸந்தானே அனுப்பத்திஅனாபாதி³ததாய அஸமூஹதம். ஏத்த² ச லத்³த⁴பூ⁴மிகம் ‘‘பூ⁴மிலத்³த⁴’’ந்தி வுத்தம் அக்³கி³ஆஹிதோ விய. ஓகாஸகதுப்பன்னஸத்³தே³பி ச ஓகாஸோ கதோ ஏதேனாதி, ஓகாஸோ கதோ ஏதஸ்ஸாதி ச து³வித⁴த்தே²பி ஏவமேவ கதஸத்³த³ஸ்ஸ பரனிபாதோ வேதி³தப்³போ³.

ஸப்³ப³தா³ அவத்தமானம்பி க³மியசித்தம் படிபக்க²பச்சவேக்க²ணாய அவிக்க²ம்பி⁴தத்தா ‘‘உப்பன்ன’’ந்தி வுத்தம். அந்தரதா⁴பேதீதி விக்க²ம்பி⁴கா ஆனாபானஸ்ஸதி விக்க²ம்பே⁴தி. அந்தராயேவாதி பூ⁴மிலத்³தே⁴ ஸபூ⁴மியம் அப்³போ³ச்சி²ன்னே விச்சி²ந்தி³த்வாதி அத்தோ². அனதீதம் அனனாக³தஞ்ச க²ணத்தயேகதே³ஸக³தம்பி உப்பஜ்ஜமானம் ‘‘க²ணத்தயக³த’’ந்தி வுத்தம். தே³ஸனாய பதா⁴னேன க³ஹிதோ அத்தோ² ‘‘ஸீஸ’’ந்தி வுச்சதி. லோகியத⁴ம்மஞ்ஹி தே³ஸேதப்³ப³ம் பத்வா தே³ஸனாய சித்தம் புப்³ப³ங்க³மம் ஹோதி, த⁴ம்மஸபா⁴வம் வா ஸந்தா⁴யேதம் வுத்தம். அகுஸலாதி ஸப்³பே³பி அகுஸலா த⁴ம்மா வுத்தா. சேதனாதி கேசி. அகுஸலபா⁴கி³யாதி ராகா³த³யோ ஏகந்தஅகுஸலா. அகுஸலபக்கி²காதி ப²ஸ்ஸாத³யோபி தப்பக்கி²கா. மனோ தேஸம் த⁴ம்மானம் பட²மம் உப்பஜ்ஜதீதி ஸஹஜாதோபி மனோ ஸம்பயுத்தே ஸங்க³ண்ஹித்வா அதி⁴பதிபா⁴வேன பவத்தமானோ பட²மம் உப்பன்னோ விய ஹோதீதி ஏவம் வுத்தோ. ஸம்பயுத்தாபி தத³னுவத்தனதாய அன்வதே³வ அகுஸலா த⁴ம்மாதி வுத்தா, அனந்தரபச்சயமனம் வா ஸந்தா⁴ய மனோபுப்³ப³ங்க³மதா வுத்தா. சித்தேன நீயதீதி அபி⁴ஸங்கா²ரவிஞ்ஞாணம் ஸந்தா⁴யாஹ, தண்ஹாஸம்பயுத்தம் வா. பப⁴ஸ்ஸரந்தி ஸபா⁴வபண்ட³ரதம் ஸந்தா⁴யாஹ. அரக்கி²தேதி ஸதியா அனுனயபடிகா⁴தீ³ஹி அரக்கி²தே, ராகா³தீ³ஹி ப்³யாபன்னே, தேஹி ஏவ அவஸ்ஸுதே. சித்தஸ்ஸ புப்³ப³ங்க³மபா⁴வஸாத⁴னே அஞ்ஞமஞ்ஞம் ப³லதா³னவஸேன ஸுத்தானுரக்க²ணம், இத⁴ வா உபஸம்ஹதானம் ஆபி⁴த⁴ம்மிகேஹி விஞ்ஞாதானம் சிரகாலப்பவத்திவஸேன வேதி³தப்³ப³ம்.

கதரபஞ்ஞம் த்வந்திஆதி³ ந பாளிஆருள்ஹம், ஏவம் ப⁴க³வா புச்ச²தீதி அட்ட²கதா²யமேவ வுத்தம். பஞ்ஞா பன கிமத்தி²யாதி இத³ம்பி ஏகம் ஸுத்தம். ‘‘அபி⁴ஞ்ஞத்தா² பரிஞ்ஞத்தா² பஹானத்தா²’’தி தஸ்ஸ விஸ்ஸஜ்ஜனம்.

ஸாதந்தி ஸபா⁴வவஸேன வுத்தம், மது⁴ரந்தி மது⁴ரம் வியாதி உபமாவஸேன. போனோப்³ப⁴விகாதி புனப்³ப⁴வகரணஸீலா. தத்ரதத்ராபி⁴னந்த³னதோ நந்தீ³, நந்தி³பூ⁴தோ ராகோ³ நந்தி³ராகோ³, நந்தி³ராக³பா⁴வேன ஸஹக³தாதி நந்தி³ராக³ஸஹக³தாதி ந ஏத்த² ஸம்பயோக³வஸேன ஸஹக³தபா⁴வோ அத்தீ²தி ஸஹக³தஸத்³தோ³ தண்ஹாய நந்தி³ராக³பா⁴வம் ஜோதேதி. நந்தி³ராக³பூ⁴தாதி சஸ்ஸ அத்தோ². நிஸ்ஸயேதி பாத³கே. ரூபாரூபாரம்மணானந்தி பத²வீகஸிணாதி³ஆகாஸாதி³ஆரம்மணானம். ஸம்ஸட்டே²தி கீ²ரோத³கம் விய ஸமோதி³தே ஏகீபா⁴வமிவ க³தே. ஸஹஜாதேதி ஸம்பயுத்தஸஹஜாதே, ந ஸஹஜாதமத்தே. இதா⁴பீதி ‘‘இமஸ்மிம்பி பதே³ அயமேவ அத்தோ² அதி⁴ப்பேதோ’’தி இமிஸ்ஸா அட்ட²கதா²ய யதா²த³ஸ்ஸிதஸம்ஸட்ட²ஸத்³தோ³ ஸஹஜாதே அதி⁴ப்பேதோதி. அரூபம் ரூபேனாதி படிஸந்தி⁴க்க²ணே வத்து²னா. உக்கட்ட²னித்³தே³ஸோதி அனவஸேஸஸங்க³ஹேன கதோ அதிஸயனித்³தே³ஸோ.

அனாப⁴ட்ட²தாயேவாதி ‘‘தி³ட்ட²ம் ஸுத’’ந்திஆதீ³ஸு தி³ட்ட²தாத³யோ விய அபா⁴ஸிதப்³ப³தா அனாப⁴ட்ட²தா. ஸப்³பா³காரேன ஸதி³ஸஸ்ஸ து³தியசித்தஸ்ஸ ஸஸங்கா²ரிகதாவசனேன இமஸ்ஸ அஸங்கா²ரிகதா விஞ்ஞாயதி, தஸ்மா அபா⁴ஸிதப்³ப³தாய ந க³ஹிதோதி அத்தோ² யுஜ்ஜதி. அதி⁴ப்பாயோ பன பாளியம் அபா⁴ஸிதத்தா ஏவ தத்த² தே³ஸேதப்³ப³பா⁴வேன ந க³ஹிதோ ந ஸங்க³ஹிதோ ந தஸ்ஸத்த²ஸ்ஸ அபா⁴வாதி. அத² வா பாளியம் அனாப⁴ட்ட²தாய ஏவ அட்ட²கதா²யம் ந க³ஹிதோ ந தஸ்ஸத்தோ² வுத்தோ. நியமேத்வாவாதி பரதோ ஏவம்வித⁴ஸ்ஸேவ ஸஸங்கா²ரிகபா⁴வவசனதோ இத⁴ தத³வசனேனேவ அஸங்கா²ரிகபா⁴வம் நியமேத்வா.

மனோவிஞ்ஞாணந்தி ஏத்த² த்³வாரம் வத்தூ²தி வுத்தம், த்³வாரேன வா தம்ஸஹாயபூ⁴தம் ஹத³யவத்து² வுத்தம். ஸரஸபா⁴வேனாதி ஸகிச்சபா⁴வேன. அவிஜ்ஜா ஹி ஸங்கா²ரானம் பச்சயபா⁴வகிச்சா, அஞ்ஞாஸாதா⁴ரணோ வா ரஸிதப்³போ³ விஞ்ஞாதப்³போ³ பா⁴வோ ஸரஸபா⁴வோ, அவிஜ்ஜாஸபா⁴வோ ஸங்கா²ரஸபா⁴வோதி ஏவமாதி³கோ. ‘‘ஸரஸஸபா⁴வேனா’’திபி பாடோ², ஸோயேவ அத்தோ². அவிஜ்ஜாபச்சயாதி வா ஸரஸேன, ஸங்கா²ராதி ஸபா⁴வேன.

ஏகஸமுட்டா²னாதி³தா ரூபத⁴ம்மேஸு ஏவ யோஜேதப்³பா³ தேஸு தப்³போ³ஹாரபா³ஹுல்லதோ. அதீதாதி³பா⁴வோ ரூபாரூபத⁴ம்மேஸு, சித்தசேதஸிகனிப்³பா³னானம்பி வா யதா²ஸபா⁴வம் ஏகத்³வினகுதோசிஸமுட்டா²னதா யோஜேதப்³பா³. அனாபாத²க³தாதி சக்கா²தீ³னம் அகோ³சரக³தா ஸுகு²மரஜாதி³ரூபம் விய வத்து²பரித்ததாய தத்தாயோகு³ளே பதிதோத³கபி³ந்து³ரூபம் விய க²ணபரித்ததாய அதிதூ³ரதாய அச்சாஸன்னாதி³தாய அதீதானாக³ததாய ச. விஸயோ அனஞ்ஞத்த²பா⁴வேன, கோ³சரோ ச தத்த² சரணேன வுத்தோ, தப்³பி³ஸயனிச்ச²யேன மனோ படிஸரணம். அயமத்தோ² ஸித்³தோ⁴ ஹோதி அஞ்ஞதா² தேஸம் த⁴ம்மாரம்மணபா⁴வேன ‘‘நேஸம் கோ³சரவிஸயம் பச்சனுபோ⁴தீ’’தி வசனஸ்ஸ அனுபபத்திதோ. தி³ப்³ப³சக்கு²தி³ப்³ப³ஸோதஇத்³தி⁴வித⁴ஞாணேஹி யதா²வுத்தனயேன அனாபாத²க³தானி ரூபாதீ³னி ஆலம்பி³யமானானி ந த⁴ம்மாரம்மணந்தி கத்த²சி வுச்சமானானி தி³ட்டா²னி, இதரதா² ச தி³ட்டா²னி ‘‘தி³ப்³பே³ன சக்கு²னா ரூபம் பஸ்ஸதீ’’திஆதீ³ஸூதி.

ஆபாத²மாக³ச்ச²தி மனஸா பஞ்சவிஞ்ஞாணேஹி ச க³ஹேதப்³ப³பா⁴வூபக³மனேன. க⁴ட்டேத்வாதி படிமுக²பா⁴வாபாத²ம் க³ந்த்வா. ஸரபா⁴ணகஸ்ஸ ஓஸாரகஸ்ஸ. பகதியா தி³ட்டா²தி³வஸேன ஆபாத²க³மனஞ்ச போ⁴ஜனபரிணாமஉதுபோ⁴ஜனவிஸேஸஉஸ்ஸாஹாதீ³ஹி கல்யம், ரோகி³னோ வாதாதீ³ஹி ச உபத்³து³தம் வா காயம் அனுவத்தந்தஸ்ஸ ஜாக³ரஸ்ஸ ப⁴வங்க³ஸ்ஸ சலனபச்சயானம் காயிகஸுக²து³க்க²உதுபோ⁴ஜனாதி³உபனிஸ்ஸயானம் சித்தபணித³ஹனஸதி³ஸாஸதி³ஸஸம்ப³ந்த⁴த³ஸ்ஸனாதி³பச்சயானம், ஸுத்தஸ்ஸ ச ஸுபினத³ஸ்ஸனே தா⁴துக்கோ²பா⁴தி³பச்சயானம் வஸேன வேதி³தப்³ப³ம். அதி³ட்ட²ஸ்ஸ அஸுதஸ்ஸ அனாக³தபு³த்³த⁴ரூபாதி³னோ பஸாத³தா³துகாமதாவத்து²ஸ்ஸ தம்ஸதி³ஸதாஸங்கா²தேன தி³ட்ட²ஸுதஸம்ப³ந்தே⁴னேவ. ந கேவலம் தம்ஸதி³ஸதாவ உப⁴யஸம்ப³ந்தோ⁴, கிந்து தப்³பி³பக்க²தா ததே³கதே³ஸதா தம்ஸம்பயுத்ததாதி³கோ ச வேதி³தப்³போ³. கேனசி வுத்தே கிஸ்மிஞ்சி ஸுதே அவிசாரேத்வா ஸத்³த³ஹனம் ஸத்³தா⁴, ஸயமேவ தம் விசாரேத்வா ரோசனம் ருசி, ‘‘ஏவம் வா ஏவம் வா ப⁴விஸ்ஸதீ’’தி ஆகாரவிசாரணம் ஆகாரபரிவிதக்கோ, விசாரேந்தஸ்ஸ கத்த²சி தி³ட்டி²யா நிஜ்ஜா²னக்க²மனம் தி³ட்டி²னிஜ்ஜா²னக்க²ந்தி.

கே³ருகஹரிதாலஞ்ஜனாதி³தா⁴தூஸு. ஸுப⁴னிமித்தம் ஸுப⁴க்³க³ஹணஸ்ஸ நிமித்தம். தம் ஸுப⁴னிமித்தத்தா ரஞ்ஜனீயத்தா ச லோப⁴ஸ்ஸ வத்து². நியமிதஸ்ஸ சித்தஸ்ஸ வஸேன நியமிதவஸேன. ஏவமிதரேஸு த்³வீஸு. ஆபோ⁴கோ³ ஆபு⁴ஜிதம். லூக²புக்³க³லா தோ³ஸப³ஹுலா. அதோ³ஸப³ஹுலா ஸினித்³த⁴புக்³க³லா. தத³தி⁴முத்ததாதி பீதினின்னசித்ததா. இமேஹி…பே… வேதி³தப்³போ³ பீதியா ஸோமனஸ்ஸவிப்பயோகா³ஸம்ப⁴வதோதி அதி⁴ப்பாயோ.

ஜீவிதவுத்தியா ஆயதனபா⁴வதோ ஹத்தா²ரோஹாதி³ஸிப்பமேவ ஸிப்பாயதனம். கஸிவாணிஜ்ஜாதி³கம்மமேவ கம்மாயதனம். ஆயுவேதா³தி³விஜ்ஜா ஏவ விஜ்ஜாட்டா²னம். அப்³யாபஜ்ஜேதி தோ³மனஸ்ஸப்³யாபாத³ரஹிதே ரூபப⁴வே. த⁴ம்மபதா³தி த⁴ம்மகோட்டா²ஸா. பிலவந்தீதி உபட்ட²ஹந்தி பதி³ஸ்ஸந்தி. யோகா³தி பா⁴வனாபி⁴யோகா³ ஸமாதி⁴தோ. வத்து²விஸத³கிரியாதி அஜ்ஜ²த்திகபா³ஹிரானம் வத்தூ²னம் நிம்மலபா⁴வகிரியா. ஸத்³தா⁴தீ³னம் இந்த்³ரியானம் அஞ்ஞமஞ்ஞானதிவத்தனம் இந்த்³ரியஸமத்தபடிபாத³னதா. க³ம்பீ⁴ரானம் ஞாணேன சரிதப்³பா³னம், க³ம்பீ⁴ரஞாணேன வா சரிதப்³பா³னம் ஸுத்தந்தானம் பச்சவேக்க²ணா க³ம்பீ⁴ரஞாணசரியபச்சவேக்க²ணா.

வம்ஸோதி அனுக்கமோ. தந்தீதி ஸந்ததி. பவேணீதி ஸம்ப³ந்தோ⁴. ஸப்³ப³மேதம் சாரித்தகிரியாபப³ந்த⁴ஸ்ஸ வசனம். சாரித்தஸீலத்தா ஸீலமயம். ‘‘த³ஸ்ஸாமீ’’தி வசீபே⁴தே³ன வத்து²ஸ்ஸ பரிணதத்தா ததோ பட்டா²ய தா³னம் ஆரத்³த⁴ம் நாம ஹோதி, யதோ தஸ்ஸ அத்தனோ பரிணாமனாதீ³ஸு ஆபத்தி ஹோதி. விஜ்ஜமானவத்து²ஸ்மிம் சிந்தனகாலதோ பட்டா²ய தா³னம் ஆரத்³த⁴ந்தி தத்த² தா³னமயம் குஸலம் ஹோதீதி அதி⁴ப்பாயோ. ந ஹி தா³னவத்து²ம் அவிஜ்ஜமானகம்பி ஸங்க²ரோந்தஸ்ஸ குஸலம் ந ஹோதீதி. தம் பன தா³னமயஸ்ஸ புப்³ப³பா⁴கோ³தி ததே³வ ப⁴ஜேய்ய, வுத்தம் அட்ட²கதா²யம். குலவம்ஸாதி³வஸேனாதி உதா³ஹரணமத்தமேவேதம். அத்தனா ஸமாதி³ன்னவத்தவஸேன ஸப்புரிஸவத்தகா³மஜனபத³வத்தாதி³வஸேன ச சாரித்தஸீலதா வேதி³தப்³பா³.

ஸவத்து²கந்தி பே⁴ரிஆதி³வத்து²ஸஹிதம் கத்வா. விஜ்ஜமானகவத்து²ந்தி பே⁴ரிஆதி³வத்து²ம். த⁴ம்மஸ்ஸவனகோ⁴ஸனாதீ³ஸு ச ஸவத்து²கம் கத்வா ஸத்³த³ஸ்ஸ தா³னம் ஸத்³த³வத்தூ²னம் டா²னகரணானம் ஸஸத்³த³ப்பவத்திகரணமேவாதி தஸ்ஸ சிந்தனம் விஜ்ஜமானவத்து²பரிச்சாகோ³ வேதி³தப்³போ³. பா⁴ஜேத்வா த³ஸ்ஸேஸி த⁴ம்மராஜா இத⁴ ச ரூபாரம்மணாதி³பா⁴வம், அஞ்ஞத்த² ச ‘‘தீணிமானி, பி⁴க்க²வே, புஞ்ஞகிரியவத்தூ²னீ’’தி (தீ³. நி. 3.305) தா³னமயாதி³பா⁴வம், அபரத்த² ச ‘‘கதமே த⁴ம்மா குஸலா? தீணி…பே… தம்ஸமுட்டா²னம் காயகம்ம’’ந்திஆதி³னா காயகம்மாதி³பா⁴வஞ்ச வத³ந்தோ. அபரியாபன்னா சாதி பரமத்த²தோ அவிஜ்ஜமானத்தா அஞ்ஞாயதனத்தா ச அஸங்க³ஹிதா.

பரிபோ⁴க³ரஸோ பரிபோ⁴க³பச்சயம் பீதிஸோமனஸ்ஸம். அயம் பன ரஸஸமானதாவஸேன க³ஹணம் உபாதா³ய ரஸாரம்மணந்தி வுத்தோ, ந ஸபா⁴வதோ. ஸபா⁴வேன பன க³ஹணம் உபாதா³ய பீதிஸோமனஸ்ஸம் த⁴ம்மாரம்மணமேவ ஹோதீதி ‘‘ஸுகா² வேத³னா த⁴ம்மாரம்மண’’ந்தி வுத்தம். ஆரம்மணமேவ நிப³த்³த⁴ந்தி ரூபாரம்மணம்…பே… த⁴ம்மாரம்மணந்தி ஏவம் நியமேத்வா வுத்தம். கம்மஸ்ஸ அனிப³த்³த⁴த்தாதி கம்மஸ்ஸ அனியதத்தா. யதா² ஹி ரூபாதீ³ஸு ஏகாரம்மணம் சித்தம் அனஞ்ஞாரம்மணம் ஹோதி, ந ஏவம் காயத்³வாராதீ³ஸு ஏகத்³வாரிககம்மம் அஞ்ஞஸ்மிம் த்³வாரே நுப்பஜ்ஜதி, தஸ்மா கம்மஸ்ஸ த்³வாரனியமரஹிதத்தா த்³வாரம்பி கம்மனியமரஹிதந்தி இத⁴ ஆரம்மணம் விய நியமேத்வா ந வுத்தம். வினா ஆரம்மணேன அனுப்பஜ்ஜனதோதி ஏதஸ்ஸபி சத்தோ² ‘‘யதா² காயகம்மாதீ³ஸு ஏகம் கம்மம் தேன த்³வாரேன வினா அஞ்ஞஸ்மிம் த்³வாரே சரதி, ந ஏவம் ரூபாதீ³ஸு ஏகாரம்மணம் சித்தம் தேனாரம்மணேன வினா ஆரம்மணந்தரே உப்பஜ்ஜதீ’’தி வேதி³தப்³போ³. ந ஹி யதா² வசீத்³வாரே உப்பஜ்ஜமானம்பி ‘‘காயகம்ம’’ந்தி வுச்சதி, ஏவம் ஸத்³தா³ரம்மணே உப்பஜ்ஜமானம் ‘‘ரூபாரம்மண’’ந்தி வுச்சதி.

காமாவசரகுஸலம்

காயகம்மத்³வாரகதா²வண்ணனா

இமஸ்ஸ பனத்த²ஸ்ஸாதி கம்மத்³வாரானம் அஞ்ஞமஞ்ஞஸ்மிம் அனியததாய ‘‘த்³வாரே சரந்தி கம்மானீ’’திஆதி³னா பகாஸனத்த²ம். பஞ்ச விஞ்ஞாணானீதி ஏத்த² ச²ட்ட²ஸ்ஸ விஞ்ஞாணஸ்ஸ தஸ்ஸ ச த்³வாரஸ்ஸ அனுத்³தே³ஸோ த்³வாரத்³வாரவந்தானம் ஸஹாபா⁴வா. நியதரூபரூபவஸேன சதுஸமுட்டா²னிககாயா வுத்தாதி ஸத்³த³ஸ்ஸ விகாரரூபாதீ³னஞ்ச அஸங்க³ஹோ.

பட²மஜவனஸமுட்டி²தா வாயோதா⁴து யதி³பி தஸ்மிம் க²ணே ரூபானம் தே³ஸந்தருப்பத்திஹேதுபா⁴வேன சாலேதும் ந ஸக்கோதி, ததா²பி விஞ்ஞத்திவிகாரஸஹிதாவ ஸா வேதி³தப்³பா³. த³ஸஸு ஹி தி³ஸாஸு யம் தி³ஸம் க³ந்துகாமோ அங்க³பச்சங்கா³னி வா கி²பிதுகாமோ, தம்தி³ஸாபி⁴முகா²னேவ ரூபானி ஸா ஸந்த²ம்பே⁴தி ஸந்தா⁴ரேதி சாதி தத³பி⁴முக²பா⁴வவிகாரவதீ ஹோதி, அதி⁴ப்பாயஸஹபா⁴வீ ச விகாரோ விஞ்ஞத்தீதி. ஏவஞ்ச கத்வா ஆவஜ்ஜனஸ்ஸபி விஞ்ஞத்திஸமுட்டா²பகபா⁴வோ யதா²தி⁴ப்பாயவிகாரரூபுப்பாத³னேன உபபன்னோ ஹோதி, யதோ பா³த்திம்ஸ சித்தானி ரூபிரியாபத²விஞ்ஞத்திஜனகானி வுத்தானீதி. யோஜனம் க³தோ, த³ஸயோஜனம் க³தோதி வத்தப்³ப³தம் ஆபஜ்ஜாபேதி அனேகஸஹஸ்ஸவாரம் உப்பன்னா.

வாயோதா⁴துயா…பே… பச்சயோ ப⁴விதுந்தி த²ம்ப⁴னசலனேஸு வாயோதா⁴துயா பச்சயோ ப⁴விதும் ஸமத்தோ² சித்தஸமுட்டா²னமஹாபூ⁴தானம் ஏகோ ஆகாரவிஸேஸோ அத்தி², அயம் விஞ்ஞத்தி நாம. தேஸஞ்ஹி ததா³காரத்தா வாயோதா⁴து த²ம்பே⁴தி சாலேதி சாதி. ந சித்தஸமுட்டா²னாதி ஏதேன பரமத்த²தோ அபா⁴வம் த³ஸ்ஸேதி. ந ஹி ரூபம் அப்பச்சயம் அத்தி², ந ச நிப்³பா³னவஜ்ஜோ அத்தோ² நிச்சோ அத்தீ²தி. விஞ்ஞத்திதாயாதி விஞ்ஞத்திவிகாரதாய. சித்தஸமுட்டா²னபா⁴வோ விய மஹாபூ⁴தவிகாரதாய உபாதா³ரூபபா⁴வோ ச அதி⁴ப்பேதோதி வேதி³தப்³போ³.

காயிககரணந்தி காயத்³வாரப்பவத்தம் சித்தகிரியம், அதி⁴ப்பாயந்தி அத்தோ². காரேதி மஞ்ஞேதி ஏதேன வண்ணக்³க³ஹணானுஸாரேன க³ஹிதாய விஞ்ஞத்தியா யம் கரணம் விஞ்ஞாதப்³ப³ம், தஸ்ஸ விஜானனேன விஞ்ஞத்தியா விஞ்ஞாதத்தம் த³ஸ்ஸேதி. ந ஹி விஞ்ஞத்திரஹிதேஸு ருக்க²சலனாதீ³ஸு ‘‘இத³மேஸ காரேதீ’’தி விஜானனம் ஹோதீதி. சக்கு²விஞ்ஞாணஸ்ஸ ஹி ரூபே அபி⁴னிபாதமத்தம் கிச்சம், ந அதி⁴ப்பாயஸஹபு⁴னோ சலனவிகாரஸ்ஸ க³ஹணம். சித்தஸ்ஸ பன லஹுபரிவத்திதாய சக்கு²விஞ்ஞாணவீதி²யா அனந்தரம் மனோவிஞ்ஞாணேன விஞ்ஞாதம்பி சலனம் சக்கு²னா தி³ட்ட²ம் விய மஞ்ஞந்தி அவிஸேஸவிது³னோ, தஸ்மா யதா² நீலாபி⁴னிபாதவஸப்பவத்தாய சக்கு²விஞ்ஞாணவீதி²யா நீலந்தி பவத்தாய மனோவிஞ்ஞாணவீதி²யா ச அந்தரம் ந விஞ்ஞாயதி, ஏவம் அவிஞ்ஞாயமானந்தரேன மனோத்³வாரவிஞ்ஞாணேன க³ஹிதே தஸ்மிம் சித்தேன ஸஹேவ அனுபரிவத்தே காயத²ம்ப⁴னவிகாரசோபனஸங்கா²தே ‘‘இத³மேஸ காரேதி, அயமஸ்ஸ அதி⁴ப்பாயோ’’தி விஜானனம் ஹோதி.

தாலபண்ணாதி³ரூபானி தி³ஸ்வா தத³னந்தரப்பவத்தாய மனோத்³வாரவீதி²யா அவிஞ்ஞாயமானந்தராய தாலபண்ணாதீ³னம் உத³காதி³ஸஹசாரிப்பகாரதம் ஸஞ்ஞாணாகாரம் க³ஹேத்வா உத³காதி³க்³க³ஹணம் விய. ஏத்த² உத³கம் ப⁴விஸ்ஸதீதிஆதி³னா ச உத³காதி³ஸம்ப³ந்த⁴னாகாரேன ரூபக்³க³ஹணானுஸாரவிஞ்ஞாணேன யம் உத³காதி³ விஞ்ஞாதப்³ப³ம், தஸ்ஸ விஜானனேன ததா³காரஸ்ஸ விஞ்ஞாததா வுத்தாதி த³ட்ட²ப்³பா³. ஏதஸ்ஸ பன காயிககரணக்³க³ஹணஸ்ஸ உத³காதி³க்³க³ஹணஸ்ஸ ச புரிமஸித்³த⁴ஸம்ப³ந்த⁴க்³க³ஹணம் உபனிஸ்ஸயோ ஹோதீதி த³ட்ட²ப்³ப³ம். அத² பன நாலம்பி³தாபி விஞ்ஞத்தி காயிககரணக்³க³ஹணஸ்ஸ ச பச்சயோ புரிமஸித்³த⁴ஸம்ப³ந்த⁴க்³க³ஹணோபனிஸ்ஸயவஸேன ஸாதி⁴ப்பாயவிகாரபூ⁴தவண்ணக்³க³ஹணானந்தரம் பவத்தமானஸ்ஸ அதி⁴ப்பாயக்³க³ஹணஸ்ஸ அதி⁴ப்பாயஸஹபூ⁴விகாராபா⁴வே அபா⁴வதோ, ஏவம் ஸதி வண்ணக்³க³ஹணானந்தரேன உத³காதி³க்³க³ஹணேனேவ தாலபண்ணாதி³ஸஞ்ஞாணாகாரோ விய வண்ணக்³க³ஹணானந்தரேன அதி⁴ப்பாயக்³க³ஹணேனேவ விஞ்ஞத்தி பாகடா ஹோதீதி ‘‘இத³ஞ்சித³ஞ்ச ஏஸ காரேதி மஞ்ஞே’’தி அதி⁴ப்பாயவிஜானனேனேவ விஞ்ஞத்தியா விஞ்ஞாததா வுத்தா.

அயம் நோ பஹரிதுகாமோதி அதி⁴ப்பாயவிஜானனேன விஞ்ஞத்தியா பாகடபா⁴வம் த³ஸ்ஸேதி. ந ஹி தத³பாகடபா⁴வே அதி⁴ப்பாயவிஜானனம் ஹோதீதி. ஸம்முகீ²…பே… யேவ நாம ஹோதீதி அஸம்முகீ²பூ⁴ததாய அனாபாத²க³தானம் ரூபாதீ³னம் சக்கு²விஞ்ஞேய்யாதி³பா⁴வோ விய ஸபா⁴வபூ⁴தம் தம் த்³விதா⁴ விஞ்ஞத்திபா⁴வம் ஸாதே⁴தி. பரம் போ³தே⁴துகாமதாய வினாபி அபி⁴க்கமனாதி³ப்பவத்தனேன ஸோ சித்தஸஹபூ⁴விகாரோ அதி⁴ப்பாயம் விஞ்ஞாபேதி, ஸயஞ்ச விஞ்ஞாயதீதி த்³விதா⁴பி விஞ்ஞத்தியேவாதி வேதி³தப்³பா³.

தஸ்மிம் த்³வாரே ஸித்³தா⁴தி தேன த்³வாரேன விஞ்ஞாதப்³ப³பா⁴வதோ தேனேவ த்³வாரேன நாமலாப⁴தோ தஸ்மிம் த்³வாரே பாகடபா⁴வவஸேன ஸித்³தா⁴. குஸலம் வா அகுஸலம் வாதி ட²பேதப்³ப³ம். கஸ்மா? யஸ்மா பரவாதி³னோ அவிபாகஸ்ஸ கம்மபா⁴வோ ந ஸித்³தோ⁴, இதரஸ்ஸ பன ஸித்³தோ⁴தி விஞ்ஞத்திஸமுட்டா²பகானம் ஏகாத³ஸன்னம் கிரியசித்தானம் வஸேன திகம் பூரேத்வா ட²பேதப்³ப³ம்.

த்³வாரே சரந்தி கம்மானீதி ஏத்த² அயமதி⁴ப்பாயோ – யதி³ த்³வாரா த்³வாரந்தரசாரினோ ஹோந்தி, த்³வாரஸம்பே⁴தா³ கம்மஸம்பே⁴தோ³பீதி காயகம்மம் காயகம்மத்³வாரந்தி அஞ்ஞமஞ்ஞவவத்தா²னம் ந ஸியா, கம்மானம்பி கம்மந்தரசரணே ஏஸேவ நயோ. யதி³ பன த்³வாரானம்பி த்³வாரபா⁴வேன கம்மந்தரசரணம் கம்மானஞ்ச த்³வாரந்தரசரணம் ந ஸியா, ஸுட்டு²தரம் கம்மத்³வாரவவத்தா²னம் ஸியா. ந பன கம்மானம் த்³வாரந்தரே அசரணம் அத்தி², கிந்து த்³வாரே அஞ்ஞஸ்மிஞ்ச சரந்தி கம்மானி அஞ்ஞானிபி. யஸ்மா பன த்³வாரே த்³வாரானி ந சரந்தி, தஸ்மா அத்³வாரசாரீஹி த்³வாரேஹி காரணபூ⁴தேஹி கம்மானி த்³வாரந்தரே சரந்தானிபி வவத்தி²தானி. ந கேவலம் கம்மானேவ, தேஹி பன த்³வாரானிபீதி ஏவம் கம்மத்³வாரானி அஞ்ஞமஞ்ஞம் வவத்தி²தானி ‘‘யேபு⁴ய்யேனவுத்திதாய தப்³ப³ஹுலவுத்திதாய சா’’தி வுச்சமானாய வவத்தா²னயுத்தியா. தத்த² த்³வாராபேக்க²த்தா கம்மானம் காயகம்மாதி³பா⁴வஸ்ஸ அத்³வாரசாரீஹி த்³வாரேஹி வவத்தா²னம் ஹோதி, ந பன த்³வாரந்தரசாரீஹி கம்மேஹி த்³வாரானம் அவவத்தா²னம் கம்மானபேக்க²காயத்³வாராதி³பா⁴வேஹி த்³வாரேஹி வவத்தி²தானம் காயகம்மாதீ³னம் காயகம்மத்³வாராதி³வவத்தா²னகரத்தா. அத² வா த்³வாரந்தரே சரந்தானிபி காயாதீ³ஹி உபலக்கி²தானேவ சரந்தி பாணாதிபாதாதீ³னம் ஏவம்ஸபா⁴வத்தா ஆணத்திஹத்த²விகாராதீ³ஹி வுச்சமானஸ்ஸபி காயாதீ³ஹி ஸாதே⁴தப்³ப³ஸபா⁴வாவபோ³த⁴தோ, தஸ்மா ந கம்மந்தரஸ்ஸ அத்தனி சரந்தஸ்ஸபி த்³வாரந்தரம் ஸனாமம் தே³தி, நாபி கம்மம் த்³வாரஸ்ஸ, தம்தம்த்³வாரமேவ பன கம்மஸ்ஸ கம்மஞ்ச த்³வாரந்தரே சரந்தம்பி அத்தனோயேவ த்³வாரஸ்ஸ நாமம் தே³தீதி ஸித்³த⁴ம் அஞ்ஞமஞ்ஞவவத்தா²னம். புப்³பே³ பன த்³வாரேஸு அனிப³த்³த⁴தா கம்மானம் த்³வாரந்தரசரணமேவ ஸந்தா⁴ய வுத்தா, ந ஏதம் வவத்தா²னந்தி.

தத்தா²தி தேஸு த்³வாரகம்மேஸு. காயகம்மஸ்ஸ உப்பஜ்ஜனட்டா²னந்தி தம்ஸஹஜாதா விஞ்ஞத்தியேவ வுச்சதி. கிஞ்சாபி ஹி ஸா தஸ்ஸ கேனசி பகாரேன பச்சயோ ந ஹோதி, ததா²பி கம்மஸ்ஸ விஸேஸிகா விஞ்ஞத்தி தம்ஸஹஜாதா ஹோதீதி தஸ்ஸ உப்பத்திட்டா²னபா⁴வேன வுத்தா யதா²வுத்தனியமேன அஞ்ஞவிஸேஸனஸ்ஸ கம்மஸ்ஸ விஸேஸனந்தரே உப்பத்திஅபா⁴வா. காயேன பன கதத்தாதி காயவிஞ்ஞத்திம் ஜனேத்வா தாய ஜீவிதிந்த்³ரியுபச்சே²தா³தி³னிப்பா²த³னதோ அத்தனோ நிப்ப²த்திவஸேன ‘‘காயேன கதம் கம்ம’’ந்தி வுத்தம். காரணபூ⁴தோ ஹி பனேத்த² காயோதி.

அஞ்ஞமஞ்ஞம் வவத்தி²தாதி ஏத்த² கம்முனா காயோ காயகம்மத்³வாரந்தி ஏவம் வவத்தி²தோ, ந காயோ இச்சேவ. யதா² ஸூசிகம்முனா ஸூசிகம்மகரணந்தி வவத்தி²தா, ந ஸூசி இச்சேவ, ததா² இத³ம்பி த³ட்ட²ப்³ப³ம். அஞ்ஞமஞ்ஞம் வவத்தி²தாதி ச அஞ்ஞமஞ்ஞம் விஸேஸிதாதி அத்தோ². ஏவம் ஸந்தேதி யதா²வுத்தம் வவத்தா²னனியமம் அக்³க³ஹேத்வா ‘‘த்³வாரே சரந்தி கம்மானீ’’திஆதி³வசனமேவ க³ஹேத்வா சோதே³தி. தத்த² ஏவம் ஸந்தேதி கம்மானம் த்³வாரசரணே அஞ்ஞமஞ்ஞேன ச வவத்தா²னே நாமலாபே⁴ விஸேஸனே ஸதீதி அத்தோ².

காயகம்மத்³வாரகதா²வண்ணனா நிட்டி²தா.

வசீகம்மத்³வாரகதா²வண்ணனா

சதூஹி, பி⁴க்க²வே, அங்கே³ஹி ஸமன்னாக³தாதி ஏத்த² ஸுபா⁴ஸிதபா⁴ஸனஸங்கா²தா அபிஸுணவாசா, த⁴ம்மபா⁴ஸனஸங்கா²தோ அஸம்ப²ப்பலாபோ, பியபா⁴ஸனஸங்கா²தா அப²ருஸவாசா, ஸச்சபா⁴ஸனஸங்கா²தோ அமுஸாவாதோ³ சாதி ஏதா வாசா ததா²பவத்தா சேதனா த³ட்ட²ப்³பா³. ஸஹஸத்³தா³ பனாதி தஸ்ஸ விகாரஸ்ஸ ஸத்³தே³ன ஸஹ ஸம்பூ⁴தத்தா வுத்தம். சித்தானுபரிவத்திதாய பன ஸோ ந யாவ ஸத்³த³பா⁴வீதி த³ட்ட²ப்³போ³, விதக்கவிப்பா²ரஸத்³தோ³ ந ஸோதவிஞ்ஞேய்யோதி பவத்தேன மஹாஅட்ட²கதா²வாதே³ன சித்தஸமுட்டா²னஸத்³தோ³ வினாபி விஞ்ஞத்திக⁴ட்டனேன உப்பஜ்ஜதீதி ஆபஜ்ஜதி. ‘‘யா தாய வாசாய விஞ்ஞத்தீ’’தி (த⁴. ஸ. 636) ஹி வசனதோ அஸோதவிஞ்ஞேய்யஸத்³தே³ன ஸஹ விஞ்ஞத்தியா உப்பத்தி நத்தீ²தி விஞ்ஞாயதீதி.

சித்தஸமுட்டா²னம் ஸத்³தா³யதனந்தி ஏத்த² ச ந கோசி சித்தஸமுட்டா²னோ ஸத்³தோ³ அஸங்க³ஹிதோ நாம அத்தீ²தி அதி⁴ப்பாயேன மஹாஅட்ட²கதா²வாத³ம் படிஸேதே⁴தி. ச²ப்³பி³தே⁴ன ரூபஸங்க³ஹாதீ³ஸு ஹி ‘‘ஸோதவிஞ்ஞேய்ய’’ந்தி ‘‘தி³ட்ட²ம் ஸுத’’ந்தி ஏத்த² ‘‘ஸுத’’ந்தி ச ந கோசி ஸத்³தோ³ ந ஸங்க³ய்ஹதீதி. மஹாஅட்ட²கதா²யம் பன விஞ்ஞத்திஸஹஜமேவ ஜிவ்ஹாதாலுசலனாதி³கரவிதக்கஸமுட்டி²தம் ஸுகு²மஸத்³த³ம் ‘‘தி³ப்³ப³ஸோதேன ஸுத்வா ஆதி³ஸதீ’’தி ஸுத்தே பட்டா²னே ச ஓளாரிகஸத்³த³ம் ஸந்தா⁴ய ‘‘ஸோதவிஞ்ஞாணஸ்ஸ ஆரம்மணபச்சயேன பச்சயோ’’தி வுத்தந்தி இமினா அதி⁴ப்பாயேன அஸோதவிஞ்ஞேய்யதா வுத்தா ஸியா. ஸத்³தோ³ ச அஸோதவிஞ்ஞேய்யோ சாதி விருத்³த⁴மேதந்தி பன படிக்கே²போ வேதி³தப்³போ³. விஞ்ஞத்திபச்சயா க⁴ட்டனா விஞ்ஞத்திக⁴ட்டனா. விஞ்ஞத்தி ஏவ வா. க⁴ட்டனாகாரப்பவத்தபூ⁴தவிகாரோ ஹி ‘‘க⁴ட்டனா’’தி வுத்தோ. ஸங்க⁴ட்டனேன ஸஹேவ ஸத்³தோ³ உப்பஜ்ஜதி, ந புப்³பா³பரபா⁴வேன. பத²வீதா⁴துயாதி இத³ம் வாயோதா⁴துயா விய சாலனம் பத²வீதா⁴துயா ஸங்க⁴ட்டனம் கிச்சம் அதி⁴கந்தி கத்வா வுத்தம், விகாரஸ்ஸ ச தப்பச்சயபா⁴வோ வுத்தனயேனேவ வேதி³தப்³போ³. தப்³பி³காரானஞ்ஹி பூ⁴தானம் அஞ்ஞமஞ்ஞஸ்ஸ பச்சயபா⁴வோதி. அஞ்ஞம்பி ஸப்³ப³ம் விதா⁴னம் காயவிஞ்ஞத்தியம் விய வேதி³தப்³ப³ம்.

திஸமுட்டா²னிககாயம்…பே… ந லப்³ப⁴தி. ந ஹி சாலனம் உபாதி³ன்னக⁴ட்டனந்தி. சாலனஞ்ஹி தே³ஸந்தருப்பாத³னபரம்பரதா, க⁴ட்டனம் பச்சயவிஸேஸேன பூ⁴தகலாபானம் ஆஸன்னதருப்பாதோ³தி. உபத்த²ம்ப⁴னகிச்சம்பி நத்தீ²தி உபத்த²ம்ப⁴னேன வினா பட²மசித்தஸமுட்டா²னாபி க⁴ட்டனாகாரேன பவத்ததீதி க⁴ட்டனத்த²ம் உபத்த²ம்ப⁴னேன பயோஜனம் நத்தி², லத்³தா⁴ஸேவனேன சித்தேனேவ க⁴ட்டனஸ்ஸ ப³லவபா⁴வதோ சாதி அதி⁴ப்பாயோ. உபத்த²ம்ப⁴னம் நத்தி² அத்தீ²தி விசாரேத்வா க³ஹேதப்³ப³ம்.

வசீகம்மத்³வாரகதா²வண்ணனா நிட்டி²தா.

மனோகம்மத்³வாரகதா²வண்ணனா

அயம் நாம சேதனா கம்மம் ந ஹோதீதி ந வத்தப்³பா³தி இத³ம் யஸ்ஸ த்³வாரம் மனோ, தம்த³ஸ்ஸனத்த²ம் வுத்தம். கப்பேதீதி ‘‘த்வம் பு²ஸனம் கரோஹி, த்வம் வேத³யித’’ந்தி ஏவம் கப்பேந்தம் விய பவத்ததீதி அத்தோ². பகப்பனஞ்ச ததே³வ. கிம் பிண்ட³ம் கரோதீதி ஆயூஹனத்த²வஸேன புச்ச²தி. ப²ஸ்ஸாதி³த⁴ம்மே ஹி அவிப்பகிண்ணே கத்வா ஸகிச்சேஸு பவத்தனம் ஆயூஹனம், தத்தே²வ ப்³யாபாரணம் சேதயனம், ததா²கரணம் அபி⁴ஸங்க²ரணந்தி. தேபூ⁴மகஸ்ஸேவ க³ஹணம் லோகுத்தரகம்மஸ்ஸ கம்மக்க²யகரத்தா.

மனோகம்மத்³வாரகதா²வண்ணனா நிட்டி²தா.

கம்மகதா²வண்ணனா

சேதயித்வா கம்மம் கரோதீதி ஏத்த² யஸ்மா புரிமசேதனாய சேதயித்வா ஸன்னிட்டா²னகம்மம் கரோதி, தஸ்மா சேதனாபுப்³ப³கம் கம்மம் தம்சேதனாஸபா⁴வமேவாதி சேதனம் அஹம் கம்மம் வதா³மீதி அத்தோ². அத² வா ஸமானகாலத்தேபி காரணகிரியா புப்³ப³காலா விய வத்தும் யுத்தா, ப²லகிரியா ச அபரகாலா விய. யஸ்மா ச சேதனாய சேதயித்வா காயவாசாஹி சோபனகிரியம் மனஸா ச அபி⁴ஜ்ஜா²தி³கிரியம் கரோதி, தஸ்மா தஸ்ஸா கிரியாய காரிகம் சேதனம் அஹம் கம்மம் வதா³மீதி அத்தோ². காயே வாதி காயவிஞ்ஞத்திஸங்கா²தே காயே வா. ஸதீதி த⁴ரமானே, அனிரோதி⁴தே வா. காயஸமுட்டா²பிகா சேதனா காயஸஞ்சேதனா. ஏத்த² ச ஸுக²து³க்கு²ப்பாத³கேன கம்மேன ப⁴விதப்³ப³ம், சேதனா ச ஸுக²து³க்கு²ப்பாதி³கா வுத்தாதி தஸ்ஸா கம்மபா⁴வோ ஸித்³தோ⁴ ஹோதி. ஸஞ்சேதனியந்தி ஸஞ்சேதனஸபா⁴வவந்தம். ஸமித்³தி⁴த்தே²ரேன ‘‘ஸஞ்சேதனியம், ஆவுஸோ…பே… மனஸா ஸுக²ம் ஸோ வேத³யதீ’’தி (ம. நி. 3.300; கதா². 539) அவிப⁴ஜித்வா ப்³யாகதோ. ஸுக²வேத³னீயந்திஆதி³னா பன விப⁴ஜித்வா ப்³யாகாதப்³போ³ ஸோ பஞ்ஹோ, தஸ்மா ஸம்மா ப்³யாகதோ நாம ந ஹோதி. இதரத்³வயேபி ஏஸேவ நயோ. யதா² பன ஸுத்தானி டி²தானி, ததா² சோபனகிரியானிஸ்ஸயபூ⁴தா காயவாசா அபி⁴ஜ்ஜா²தி³கிரியானிஸ்ஸயோ ச மனோத்³வாரானி, யாய பன சேதனாய தேஹி காயாதீ³ஹி கரணபூ⁴தேஹி சோபனாபி⁴ஜ்ஜா²தி³கிரியம் கரோந்தி வாஸிஆதீ³ஹி விய சே²த³னாதி³ம், ஸா சேதனா கம்மந்தி த்³வாரப்பவத்தியம்பி கம்மத்³வாராபே⁴த³னஞ்ச கம்மத்³வாரவவத்தா²னஞ்ச தி³ஸ்ஸதி, ஏவஞ்ச ஸதி ‘‘காயேன சே கதம் கம்ம’’ந்திஆதி³கா³தா²யோ (த⁴. ஸ. அட்ட². 1 காயகம்மத்³வார) அதிவிய யுஜ்ஜந்தி.

லோகுத்தரமக்³கோ³ இத⁴ லோகியகம்மகதா²யம் அனதி⁴ப்பேதோபி ப⁴ஜாபியமானோ தீணி கம்மானி ப⁴ஜதி. மனேன து³ஸ்ஸீல்யந்தி காயிகவாசஸிகவீதிக்கமவஜ்ஜம் ஸப்³ப³ம் அகுஸலம் ஸங்க³ண்ஹாதி, மிச்சா²தி³ட்டி²ஸங்கப்பவாயாமஸதிஸமாதி⁴ம் வா. தம்பி சேதம் ‘‘மனஸா ஸம்வரோ ஸாதூ⁴’’தி (ஸம். நி. 1.116; த⁴. ப. 361) வுத்தஸ்ஸ ஸம்வரஸ்ஸ படிபக்க²வஸேன வுத்தம், ந ஸீலவிபத்திவஸேன. ந ஹி ஸா மானஸிகா அத்தீ²தி மக்³க³ஸ்ஸேவ ப⁴ஜாபனம் மஹாவிஸயத்தா. போ³ஜ்ஜ²ங்கா³ ஹி மனோகம்மமேவ ப⁴ஜேய்யும், ந ச ந ஸக்கா மக்³க³ப⁴ஜாபனேனேவ தேஸம் ப⁴ஜாபனம் விஞ்ஞாதுந்தி.

கம்மபத²ம் அப்பத்தானம்பி தம்தம்த்³வாரே ஸம்ஸந்த³னம் அவரோத⁴னம் த்³வாரந்தரே கம்மந்தருப்பத்தியம்பி கம்மத்³வாராபே⁴த³னஞ்ச த்³வாரஸம்ஸந்த³னம் நாம. ‘‘திவிதா⁴, பி⁴க்க²வே, காயஸஞ்சேதனா அகுஸலம் காயகம்ம’’ந்திஆதி³னா (கதா². 539) கம்மபத²ப்பத்தாவ ஸன்னிட்டா²பகசேதனா கம்மந்தி வுத்தாதி புரிமசேதனா ஸப்³பா³ காயகம்மம் ந ஹோதீதி வுத்தம். ஆணாபேத்வா…பே… அலப⁴ந்தஸ்ஸாதி ஆணத்தேஹி அமாரிதபா⁴வம் ஸந்தா⁴ய வுத்தம், வசீது³ச்சரிதம் நாம ஹோதி அகம்மபத²பா⁴வதோதி அதி⁴ப்பாயோ. ‘‘இமே ஸத்தா ஹஞ்ஞந்தூ’’தி பவத்தப்³யாபாத³வஸேன சேதனாபக்கி²கா வா ப⁴வந்தி காயகம்மவோஹாரலாபா⁴. அப்³போ³ஹாரிகா வா மனோகம்மவோஹாரவிரஹா. ஸஸம்பா⁴ரபத²வீஆதீ³ஸு ஆபாத³யோ ஏத்த² நித³ஸ்ஸனம்.

குலும்ப³ஸ்ஸாதி க³ப்³ப⁴ஸ்ஸ, குலஸ்ஸேவ வா. திஸ்ஸோபி ஸங்கீ³தியோ ஆருள்ஹதாய அனனுஜானனதோ ‘‘தவ ஸுத்தஸ்ஸா’’தி வுத்தம். த³ஸவிதா⁴ இத்³தி⁴ படிஸம்பி⁴தா³மக்³கே³ இத்³தி⁴கதா²ய க³ஹேதப்³பா³. பா⁴வனாமயந்தி அதி⁴ட்டா²னித்³தி⁴ம் ஸந்தா⁴ய வத³தி. க⁴டபே⁴தோ³ விய பரூபகா⁴தோ, உத³கவினாஸோ விய இத்³தி⁴வினாஸோ ச ஹோதீதி உபமா ஸம்ஸந்த³தி. தவ பஞ்ஹோதி பா⁴வனாமயாய பரூபகா⁴தோ ஹோதீதி வுத்தோ ஞாபேதும் இச்சி²தோ அத்தோ². ஆத²ப்³ப³ணித்³தி⁴ விஜ்ஜாமயித்³தி⁴ ஹோதி. ஸத்தமே பதே³தி மண்ட³லாதி³தோ ஸத்தமே பதே³.

வசனந்தரேன க³மேதப்³ப³த்த²ம் நேய்யத்த²ம், ஸயமேவ க³மிதப்³ப³த்த²ம் நீதத்த²ம். கிரியதோ ஸமுட்டா²தி, உதா³ஹு அகிரியதோதி தேனாதி⁴ப்பேதம் ஸம்பஜானமுஸாவாத³ம் ஸந்தா⁴ய புச்ச²தி, ந உபோஸத²க்க²ந்த⁴கே வுத்தம். தத்த² அவுத்தமேவ ஹி ஸோ அனரியவோஹாரம் வுத்தந்தி க³ஹேத்வா வோஹரதீதி. வாசாகி³ரந்தி வாசாஸங்கா²தம் கி³ரம், வாசானுச்சாரணம் வா.

க²ந்த³ஸிவாத³யோ ஸேட்டா²தி க²ந்தா³தி குமாரா. ஸிவாதி மஹேஸ்ஸரா, மிச்சா²தி³ட்டி²யா நித³ஸ்ஸனத்த²மித³ம் வுத்தந்தி த³ட்ட²ப்³ப³ம். நத்தி²கதி³ட்டா²த³யோ ஏவ ஹி கம்மபத²ப்பத்தா கம்மந்தி. சேதனா பனேத்த² அப்³போ³ஹாரிகாதி காயத்³வாரே வசீத்³வாரே ச ஸமுட்டி²தாபி காயகம்மம் வசீகம்மந்தி ச வோஹாரம் ந லப⁴தி அபி⁴ஜ்ஜா²தி³ப்பதா⁴னத்தா. ‘‘திவிதா⁴, பி⁴க்க²வே, மனோஸஞ்சேதனா அகுஸலம் மனோகம்ம’’ந்தி பன வசனதோ ஸபா⁴வேனேவ ஸா மனோகம்மம், ந அபி⁴ஜ்ஜா²தி³பக்கி²கத்தாதி ‘‘அபி⁴ஜ்ஜா²தி³பக்கி²காவா’’தி ந வுத்தம். இமஸ்மிம் பன டா²னே காயங்க³வாசங்கா³னி அசோபேத்வா சிந்தனகாலே சேதனாபி சேதனாஸம்பயுத்தத⁴ம்மாபி மனோத்³வாரே ஏவ ஸமுட்ட²ஹந்தி, தஸ்மா சேதனாய அப்³போ³ஹாரிகபா⁴வோ கத²ஞ்சி நத்தீ²தி அதி⁴ப்பாயோ.

‘‘திவிதா⁴, பி⁴க்க²வே, காயஸஞ்சேதனா குஸலம் காயகம்ம’’ந்திஆதி³வசனதோ (கதா². 539) பாணாதிபாதாதி³படிபக்க²பூ⁴தா தப்³பி³ரதிவிஸிட்டா² சேதனாவ பாணாதிபாதவிரதிஆதி³கா ஹோந்தீதி ‘‘சேதனாபக்கி²கா வா’’தி வுத்தம், ந ‘‘விரதிபக்கி²கா’’தி. ரக்க²தீதி அவினாஸேத்வா கதே²தி. பி⁴ந்த³தீதி வினாஸேத்வா கதே²தி.

கம்மகதா²வண்ணனா நிட்டி²தா.

சக்கு²விஞ்ஞாணத்³வாரந்தி சக்கு²விஞ்ஞாணஸ்ஸ த்³வாரம். சக்கு² ச தம் விஞ்ஞாணத்³வாரஞ்சாதி வா சக்கு²விஞ்ஞாணத்³வாரம். சக்கு² விஞ்ஞாணத்³வாரந்தி வா அஸமாஸனித்³தே³ஸோ. தம் பன சக்கு²மேவ. ஏஸ நயோ ஸேஸேஸுபி. ‘‘சக்கு²னா ஸம்வரோ ஸாதூ⁴’’திஆதி³காய (த⁴. ப. 360) கா³தா²ய பஸாத³காயசோபனகாயஸம்வரே ஏகஜ்ஜ²ம் கத்வா காயேன ஸம்வரோ வுத்தோ, தம் இத⁴ பி⁴ந்தி³த்வா அட்ட² ஸம்வரா, தப்படிபக்க²பா⁴வேன அஸம்வரா அட்ட² கதி²தா. ஸீலஸம்வராத³யோபி பஞ்சேவ ஸம்வரா ஸப்³ப³த்³வாரேஸு உப்பஜ்ஜமானாபி, தப்படிபக்க²பா⁴வேன து³ஸ்ஸீல்யாதீ³னி அஸம்வராதி வுத்தானி. தத்த² து³ஸ்ஸீல்யம் பாணாதிபாதாதி³சேதனா. முட்ட²ஸ்ஸச்சம் ஸதிபடிபக்கா² அகுஸலா த⁴ம்மா. பமாத³ந்தி கேசி. ஸீதாதீ³ஸு படிகோ⁴ அக்க²ந்தி. தி²னமித்³த⁴ம் கோஸஜ்ஜம்.

வினா வசீத்³வாரேன ஸுத்³த⁴ம் காயத்³வாரஸங்கா²தந்தி இத³ம் வசீத்³வாரஸல்லக்கி²தஸ்ஸ முஸாவாதா³தி³னோபி காயத்³வாரே பவத்திஸப்³பா⁴வா அஸுத்³த⁴தா அத்தீ²தி தம்னிவாரணத்த²ம் வுத்தம். ந ஹி தம் காயகம்மம் ஹோதி. ஸுத்³த⁴வசீத்³வாரோபலக்கி²தம் பன வசீகம்மமேவ ஹோதீதி. ஏத்த² அஸம்வரோதி ஏதேன ஸுத்³த⁴காயத்³வாரேன உபலக்கி²தோ அஸம்வரோ த்³வாரந்தரே உப்பஜ்ஜமானோபி வுத்தோ. த்³வாரந்தரானுபலக்கி²தம் ஸப்³ப³ம் தம்த்³வாரிகாகுஸலஞ்சேதி வேதி³தப்³ப³ம். ஏவஞ்ச கத்வா கம்மபத²ஸம்ஸந்த³னே ‘‘சோபனகாயஅஸம்வரத்³வாரவஸேன உப்பஜ்ஜமானோ அஸம்வரோ அகுஸலம் காயகம்மமேவ ஹோதீ’’திஆதி³ ‘‘அகுஸலம் காயகம்மம் சோபனகாயஅஸம்வரத்³வாரவஸேன வசீஅஸம்வரவஸேன ச உப்பஜ்ஜதீ’’திஆதி³னா ஸஹ அவிருத்³த⁴ம் ஹோதி. அஸம்வரோ ஹி த்³வாரந்தரே உப்பஜ்ஜமானோபி ஸத்³வாரே ஏவாதி வுச்சதி, ஸத்³வாரவஸேன உப்பன்னோதி ச, கம்மம் அஞ்ஞத்³வாரே அஞ்ஞத்³வாரவஸேன சாதி ஏவம் அவிருத்³த⁴ம்.

அத² வா ஏத்தா²தி ஸுத்³த⁴ம் அஸுத்³த⁴ந்தி ஏதம் அவிசாரேத்வா ஏதஸ்மிம் சோபனேதி வுத்தம் ஹோதி. ஏவம் ஸதி த்³வாரந்தரோபலக்கி²தம் கம்மபத²பா⁴வப்பத்ததாய வசீமனோகம்மம் சோபனகாயஅஸம்வரத்³வாரே உப்பன்னம், ஸேஸம் ஸப்³ப³ம் தம்த்³வாருப்பன்னாகுஸலம் விய ‘‘சோபனகாயஅஸம்வரோ’’தி வுச்சதி. கம்மபத²பா⁴வப்பத்தியா த்³வாரந்தருப்பன்னம் காயகம்மஞ்ச ததா² ந வுச்சதீதி கம்மபத²ஸம்ஸந்த³னவிரோதோ⁴ ஸியா, தத³விரோத⁴ம் தத்தே²வ வக்கா²ம. ஸீலஸம்வராத³யோ பஞ்ச நிக்கே²பகண்டே³ ஆவி ப⁴விஸ்ஸந்தி. தத்த² ஞாணஸம்வரே பச்சயஸன்னிஸ்ஸிதஸீலஸ்ஸ, வீரியஸம்வரே ச ஆஜீவபாரிஸுத்³தி⁴யா அந்தோக³த⁴தா த³ட்ட²ப்³பா³.

அகுஸலகம்மபத²கதா²வண்ணனா

ஸரஸேனேவ ச பதனஸபா⁴வஸ்ஸ பாணஸ்ஸ அந்தரா ஏவ அதீவ பாதனம் அதிபாதோ, ஸணிகம் பதிதும் அத³த்வாவ ஸீக⁴ம் பாதனந்தி அத்தோ². அதிக்கம்ம வா ஸத்தா²தீ³ஹி அபி⁴ப⁴வித்வா பாதனம் அதிபாதோ. பயோக³வத்து²மஹந்ததாதீ³ஹி மஹாஸாவஜ்ஜதா தேஹி பச்சயேஹி உப்பஜ்ஜமானாய சேதனாய ப³லவபா⁴வதோ. யதா²வுத்தபச்சயவிபரியாயேபி தம்தம்பச்சயேஹி உப்பஜ்ஜமானாய சேதனாய ப³லவாப³லவவஸேனேவ அப்பஸாவஜ்ஜமஹாஸாவஜ்ஜதா வேதி³தப்³பா³. இத்³தி⁴மயோ கம்மவிபாகஜித்³தி⁴மயோ தா³டா²கோடிகாதீ³னம் விய.

கோ³த்தரக்கி²தா ஸகோ³த்தேஹி ரக்கி²தா. த⁴ம்மரக்கி²தா ஸஹத⁴ம்மிகேஹி ரக்கி²தா. ஸஸாமிகா ஸாரக்கா². யஸ்ஸா க³மனே ரஞ்ஞா த³ண்டோ³ ட²பிதோ, ஸா ஸபரித³ண்டா³. அத்த²ப⁴ஞ்ஜகோதி கம்மபத²ப்பத்தம் வுத்தம். கம்மபத²கதா² ஹேஸாதி. அத்தனோ ஸந்தகம் அதா³துகாமதாயாதிஆதி³ முஸாவாத³ஸாமஞ்ஞதோ வுத்தம். ஹஸாதி⁴ப்பாயேன விஸம்வாத³னபுரேக்கா²ரஸ்ஸேவ முஸாவாதோ³. ஸுஞ்ஞபா⁴வந்தி பீதிவிரஹிததாய ரித்ததம். அத்த²விபன்னதாய ந ஹத³யங்க³மா. அக்³க³ண்ஹந்தேதி அஸத்³த³ஹந்தே கம்மபத²பே⁴தோ³ ந ஹோதி. யோ கோசி பன ஸம்ப²ப்பலாபோ த்³வீஹி ஸம்பா⁴ரேஹி ஸிஜ்ஜ²தீதி. அத்தனோ பரிணாமனம் சித்தேனேவாதி வேதி³தப்³ப³ம். மிச்சா² பஸ்ஸதீதி விதத²ம் பஸ்ஸதி.

கோட்டா²ஸதோதி ப²ஸ்ஸபஞ்சமகாதீ³ஸு சித்தங்க³கோட்டா²ஸேஸு யே கோட்டா²ஸா ஹோந்தி, ததோதி அத்தோ². நனு ச சேதனா கம்மபதே²ஸு ந வுத்தாதி படிபாடியா ஸத்தன்னம் கம்மபத²பா⁴வோ ந யுத்தோதி? ந, அவசனஸ்ஸ அஞ்ஞஹேதுத்தா. ந ஹி சேதனாய அகம்மபத²த்தா கம்மபத²ராஸிம்ஹி அவசனம், கதா³சி பன கம்மபதோ² ஹோதி, ந ஸப்³ப³தா³தி கம்மபத²பா⁴வஸ்ஸ அனியதத்தா அவசனம். யதா³ பன கம்மபதோ² ஹோதி, ததா³ கம்மபத²ராஸிஸங்க³ஹோ ந நிவாரிதோதி. ‘‘பஞ்ச ஸிக்கா²பதா³ பரித்தாரம்மணா ஏவா’’தி ஏதேன அதி³ன்னாதா³னாதீ³னம் ஸத்தாரம்மணபா⁴வவிரோத⁴ம் ‘‘ஸத்தஸங்கா²தே ஸங்கா²ரே ஏவ ஆரப்³ப⁴ பவத்திதோ’’தி ஸயமேவ பரிஹரிஸ்ஸதி. ‘‘நத்தி² ஸத்தா ஓபபாதிகா’’தி பவத்தமானா தி³ட்டி² தேபூ⁴மகத⁴ம்மவிஸயாவாதி ஸங்கா²ராரம்மணதா வுத்தா. விபாகனிஸ்ஸந்த³ப²லானி யதா²க்கமம் நிரயாதி³விபாகது³க்³க³ததாதீ³னி.

அகுஸலகம்மபத²கதா²வண்ணனா நிட்டி²தா.

குஸலகம்மபத²கதா²வண்ணனா

பாணாதிபாதாதீ³ஹி பன விரதியோதி ஏதம் யாஹி விரதீஹி ஸம்பயுத்தா சேதனா ‘‘காயவசீகம்மானீ’’தி வுச்சந்தி, தாஸஞ்ச கம்மபத²பா⁴வோ யுத்தோதி கத்வா வுத்தம். ததா² ஹி வக்க²தி ‘‘படிபாடியா ஸத்த சேதனாபி வட்டந்தி விரதியோபீ’’தி. அல்லஸஸமம்ஸந்தி ஜீவமானகஸஸமம்ஸம். வோரோபேதா ஹுத்வா நாபி⁴ஜானாமி. து³ஸ்ஸீல்யாதா³ரம்மணா ததா³ரம்மணா. ஜீவிதிந்த்³ரியாதி³ஆரம்மணா கத²ம் து³ஸ்ஸீல்யாதீ³னி பஜஹந்தீதி தம் த³ஸ்ஸேதும் ‘‘யதா² பனா’’திஆதி³ வுத்தம். அனபி⁴ஜ்ஜா²…பே… விரமந்தஸ்ஸாதி அபி⁴ஜ்ஜ²ம் பஜஹந்தஸ்ஸாதி அத்தோ². ந ஹி மனோது³ச்சரிதா விரதி அத்தி² அனபி⁴ஜ்ஜா²தீ³ஹேவ தப்பஹானதோ.

கம்மபத²ஸம்ஸந்த³னகதா²வண்ணனா

கம்மபத²ப்பத்தானம் து³ஸ்ஸீல்யாதீ³னம் அஸம்வரானம் ததா² து³ச்சரிதானஞ்ச அகுஸலகம்மபதே²ஹி கம்மபத²ப்பத்தானமேவ ச ஸுஸீல்யாதீ³னம் ஸம்வரானம் ததா² ஸுசரிதானஞ்ச குஸலகம்மபதே²ஹி அத்த²தோ நானத்தாபா⁴வத³ஸ்ஸனம். அத² வா தேஸம் ப²ஸ்ஸத்³வாராதீ³ஹி அவிரோத⁴பா⁴வேன தீ³பனம் கம்மபத²ஸம்ஸந்த³னந்தி கேசி வத³ந்தி, ததே³தம் விசாரேதப்³ப³ம். ந ஹி பஞ்சப²ஸ்ஸத்³வாரபஞ்சஅஸம்வரத்³வாரபஞ்சஸம்வரத்³வாரேஸு உப்பன்னானம் அஸம்வரானம் ஸம்வரானஞ்ச கம்மபத²தா அத்தி² பாணாதிபாதாதீ³னம் பரஸந்தகவத்து²லோப⁴பரஸத்தாரம்மணப்³யாபாத³அஹேதுகதி³ட்டி²ஆதீ³னஞ்ச தேஸு த்³வாரேஸு அனுப்பத்திதோ. திவித⁴கஆயது³ச்சரிதாதீ³னி ச கம்மபதா²தி பாகடா ஏவாதி கிம் தேஸம் கம்மபதே²ஹி நானத்தாபா⁴வத³ஸ்ஸனேன, ந ச து³ச்சரிதானம் ஸுசரிதானஞ்ச ப²ஸ்ஸத்³வாராதி³வஸேன உப்பத்தி தீ³பிதா, நாபி அஸம்வரானம் ஸம்வரானஞ்ச யதோ தேஸம் ப²ஸ்ஸத்³வாராதீ³ஹி அவிரோத⁴பா⁴வேன தீ³பனா ஸியா, கேவலம் பன ப²ஸ்ஸத்³வாராதி³வஸேன உப்பன்னானம் அஸம்வரானம் ஸம்வரானஞ்ச காயகம்மாதி³தா தீ³பிதா. யதி³ ச ஏத்தகம் கம்மபத²ஸம்ஸந்த³னம், ‘‘அகுஸலம் காயகம்மம் பஞ்சப²ஸ்ஸத்³வாரவஸேன நுப்பஜ்ஜதீ’’திஆதி³ கம்மபத²ஸம்ஸந்த³னம் ந ஸியா. ஏஸாபி ச²ப²ஸ்ஸத்³வாராதீ³ஹி அவிரோத⁴தீ³பனாதி சே, வுத்தமேவ பகாரந்தரேன த³ஸ்ஸேதும் ‘‘அத² வா’’தி ந வத்தப்³ப³ம். ஸமுச்சயத்தே² ச அத² வா-ஸத்³தே³ கம்மபத²ப்பத்தானேவ து³ஸ்ஸீல்யாதீ³னி காயகம்மாதி³னாமேஹி வத³ந்தேஹி மனோகம்மஸ்ஸ ச²ப²ஸ்ஸத்³வாரவஸேன உப்பத்தி ந வத்தப்³பா³. ந ஹி தம் சக்கு²த்³வாராதி³வஸேன உப்பஜ்ஜதீதி. யதி³ ச கம்மபத²ப்பத்தா ஏவ அஸம்வராத³யோ க³ஹிதா, து³ச்சரிதேஹி அஞ்ஞேஸம் அஸம்வரானம் அபா⁴வா தேஸஞ்ச தம்தம்கம்மபா⁴வஸ்ஸ வுத்தத்தா ‘‘சோபனகாயஅஸம்வரத்³வாரவஸேன உப்பன்னோ அஸம்வரோ அகுஸலம் காயகம்மமேவ ஹோதீ’’திஆதி³ ந வத்தப்³ப³ம் ஸியா. வுச்சமானே ஹி தஸ்மிம் ஸங்கரோ ஸியா, வசீமனோகம்மானிபி ஹி காயத்³வாரே உப்பஜ்ஜந்தி, ததா² ஸேஸத்³வாரேஸுபி கம்மந்தரானீதி.

அத² பன த்³வாரந்தரே உப்பஜ்ஜமானம் கம்மந்தரம்பி தம்த்³வாரிககம்மமேவ ஸியா, ‘‘திவித⁴ம் காயது³ச்சரிதம் அகுஸலம் காயகம்மமேவா’’திஆதி³, ‘‘அகுஸலம் காயகம்மம் சோபனகாயஅஸம்வரத்³வாரவஸேன வாசாஅஸம்வரத்³வாரவஸேன ச உப்பஜ்ஜதீ’’திஆதி³ ச விருஜ்ஜே²ய்ய. து³ச்சரிதானஞ்ஹி அஞ்ஞத்³வாரசரணம் அத்தி², ந சஸ்ஸ த்³வாரந்தருப்பன்னம் கம்மந்தரம் ஹோதீதி. தஸ்மா ஹேட்டா² கம்மபத²ப்பத்தானம் ஏவ காயகம்மாதி³பா⁴வஸ்ஸ வுத்தத்தா ஸேஸானஞ்ச தம்தம்த்³வாருப்பன்னானம் குஸலாகுஸலானம் த்³வாரஸம்ஸந்த³னே தம்தம்த்³வாரபக்கி²கபா⁴வஸ்ஸ கதத்தா இத⁴ கம்மபத²ம் அப்பத்தானஞ்ச சேதனாபா⁴வதோ அகம்மானஞ்ச அஸம்வரானம் ஸம்வரானஞ்ச ப⁴ஜாபியமானானம் கம்மபதா²னம் விய காயகம்மாதி³தாதீ³பனம், கம்மபத²ப்பத்தானம் திவித⁴காயது³ச்சரிதாதீ³னம் திவித⁴காயஸுசரிதாதீ³னஞ்ச த்³வாரந்தரசரணேபி காயகம்மாதி³பா⁴வாவிஜஹனதீ³பனம், யதா²பகாஸிதானஞ்ச கம்மபத²பா⁴வம் பத்தானம் அபத்தானஞ்ச அகுஸலகாயகம்மாதீ³னஞ்ச குஸலகாயகம்மாதீ³னஞ்ச ப²ஸ்ஸத்³வாராதீ³ஹி உப்பத்திபகாஸனஞ்ச கம்மபத²ஸம்ஸந்த³னம் நாம. கஸ்மா? அகம்மபதா²னம் கம்மபதே²ஸு கம்மபதா²னஞ்ச அகம்மபதே²ஸு ஸமானனாமதாவஸேன, கம்மபதா²னம் கம்மபதே²ஸு ஸாமஞ்ஞனாமாவிஜஹனவஸேன, உப⁴யேஸஞ்ச உப்பத்திவஸேன த்³வாரேஸு ஏத்த² ஸம்ஸந்தி³தத்தா.

தத்த² திவித⁴கம்மத்³வாரவஸேன உப்பன்னானம் கம்மானம் ஞாதகம்மபா⁴வதாய தம்தம்கம்மபா⁴வஸ்ஸ அவசனீயத்தா கம்மத்³வாரேஸு தேஸம் உப்பத்தியா ச வுத்தத்தா பஞ்சவிஞ்ஞாணத்³வாரவஸேன அஸம்வராதீ³னம் உப்பத்திபரியாயவசனாபா⁴வதோ ச கம்மத்³வாரவிஞ்ஞாணத்³வாரானி விரஜ்ஜி²த்வா ‘‘பஞ்சப²ஸ்ஸத்³வாரவஸேன ஹி உப்பன்னோ’’திஆதி³ வுத்தம். ‘‘யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி ஸுக²ம் வா’’திஆதி³னா ‘‘சக்கு²ஸம்ப²ஸ்ஸபச்சயா வேத³னாக்க²ந்தோ⁴ அத்தி² குஸலோ’’திஆதி³னா ச பஞ்சப²ஸ்ஸத்³வாரவஸேன அஸம்வராதீ³னம் உப்பத்திபரியாயோ வுத்தோ, ந ச ‘‘யமித³ம் சக்கு²விஞ்ஞாணபச்சயா’’திஆதி³வசனம் அத்தீ²தி. வுத்தம்பி சேதம் ‘‘சக்கு²விஞ்ஞாணஸஹஜாதோ ஹி ப²ஸ்ஸோ சக்கு²ஸம்ப²ஸ்ஸோ’’திஆதி³ (த⁴. ஸ. 1 கம்மகதா²; மஹானி. அட்ட². 86). தேன ஹி அஸம்வரானம் ஸம்வரானஞ்ச சக்கு²ஸம்ப²ஸ்ஸாதீ³ஹி அஸஹஜாதத்தா மனோஸம்ப²ஸ்ஸஸஹஜாதானஞ்ச சக்கு²ஸம்ப²ஸ்ஸத்³வாராதி³வஸேன உப்பத்தி தீ³பிதாதி. ‘‘ஸோ ஹி காயத்³வாரே சோபனம் பத்தோ அகுஸலம் காயகம்மம் ஹோதீ’’திஆதி³னா ‘‘சோபனகாயஅஸம்வரத்³வாரவஸேன உப்பன்னோ அகுஸலம் காயகம்மமேவ ஹோதீ’’திஆதி³னா ச வசீகம்மாதீ³னஞ்ச கம்மபத²ப்பத்தானம் அஸம்வரபூ⁴தானம் காயகம்மாதி³பா⁴வே ஆபன்னே ‘‘சதுப்³பி³த⁴ம் வசீது³ச்சரிதம் அகுஸலம் வசீகம்மமேவ ஹோதீ’’திஆதி³னா அபவாதே³ன நிவத்தி த³ட்ட²ப்³பா³. ஏவஞ்ச கத்வா புப்³பே³ த³ஸ்ஸிதேஸு அஸம்வரவினிச்ச²யேஸு து³தியவினிச்ச²யேஸு ச ந கோசி விரோதோ⁴. ந ஹி வசீகம்மாதி³பூ⁴தோ சோபனகாயஅஸம்வரோ காயகம்மாதி³ ஹோதீதி.

அகுஸலம் மனோகம்மம் பன ச²ப²ஸ்ஸத்³வாரவஸேன உப்பஜ்ஜதி, தம் காயவசீத்³வாரேஸு சோபனம் பத்தம் அகுஸலம் காயவசீகம்மம் ஹோதீதி ஏத்த² கிம் தம் அகுஸலம் மனோகம்மம் நாம, ஹேட்டா² த³ஸ்ஸிதனயேன ச காயவசீத்³வாரேஸு உப்பன்னம் திவித⁴ம் மனோது³ச்சரிதம் சோபனம் அப்பத்தம் ஸப்³பா³குஸலஞ்ச. யதி³ ஏவம் தஸ்ஸ காயவசீகம்மபா⁴வோ நத்தீ²தி ‘‘சோபனப்பத்தம் காயவசீகம்மம் ஹோதீ’’தி ந யுஜ்ஜதீதி? நோ ந யுஜ்ஜதி சோபனப்பத்தம் காயே வாசாய ச அகுஸலம் கம்மம் ஹோதீதி அத்த²ஸித்³தி⁴தோ. கம்மம் பன ஹோந்தம் கிம் கம்மம் ஹோதீதி? மனோகம்மமேவ ஹோதீதி. இத³ம் வுத்தம் ஹோதி – சோபனப்பத்தம் அகுஸலம் காயத்³வாரே வசீத்³வாரே ச மனோகம்மம் ஹோதீதி. அத² வா தம்-ஸத்³த³ஸ்ஸ மனோகம்மேன ஸம்ப³ந்த⁴ம் அகத்வா ச²ப²ஸ்ஸத்³வாரவஸேன யம் உப்பஜ்ஜதி, தந்தி யதா²வுத்தஉப்பாத³மத்தபரிச்சி²ன்னேன ஸம்ப³ந்தோ⁴ காதப்³போ³. கிம் பன தந்தி? கம்மகதா²ய பவத்தமானத்தா கம்மந்தி விஞ்ஞாயதி, தஞ்ச மனோஸம்ப²ஸ்ஸத்³வாரே உப்பஜ்ஜமானம்பி திவித⁴ம் கம்மம் ஹோதீதி. யதா² தம் ஹோதி, தம் த³ஸ்ஸேதும் ‘‘காயவசீத்³வாரேஸு சோபனம் பத்த’’ந்திஆதி³மாஹ. தத்த² நியமஸ்ஸ அகதத்தா சோபனப்பத்தி உபலக்க²ணபா⁴வேன காயவசீகம்மனாமஸாதி⁴காவ, ந பன ஸப்³ப³ம்பி சோபனப்பத்தம் காயவசீகம்மமேவ, நாபி குஸலபக்கே² சோபனம் அப்பத்தம் காயவசீகம்மம் ந ஹோதீதி அயமத்தோ² ஸித்³தோ⁴வ ஹோதீதி.

அத² வா தந்தி தம் ச²ப²ஸ்ஸத்³வாரவஸேன உப்பஜ்ஜமானம் மனோகம்மந்தி ஸப்³ப³ம் மனஸாபி நிப்ப²ஜ்ஜமானம் கம்மம் மனோகம்மந்தி சோத³காதி⁴ப்பாயேன க³ஹேத்வா வத³தி, ந புப்³பே³ த³ஸ்ஸிதமனோகம்மந்தி. யோ ஹி பரஸ்ஸ அதி⁴ப்பாயோ ‘‘மனஸா நிப்ப²த்திதோ ஸப்³பே³ன மனோகம்மேனேவ ப⁴விதப்³ப³ம், ந காயவசீகம்மேனா’’தி, தம் நிவத்தேத்வா கம்மத்தயனியமம் த³ஸ்ஸேதும் இத³மாரத்³த⁴ம் ‘‘தம் காயவசீத்³வாரேஸு சோபனம் பத்த’’ந்திஆதி³. ஏத்த² ச ஸங்கராபா⁴வோ புரிமனயேனேவ வேதி³தப்³போ³. அத² வா கம்மந்தி அவிஸேஸேன கம்மஸத்³த³மத்தேன ஸம்ப³ந்த⁴ம் கத்வா யதா²வுத்தோ கம்மப்பபே⁴தோ³ யதா² ஹோதி, தம் பகாரம் த³ஸ்ஸேதி. அஸங்கரோ ச வுத்தனயோவ. யம் பன வத³ந்தி ‘‘காயவசீகம்மஸஹஜாதா அபி⁴ஜ்ஜா²த³யோ யதா³ சேதனாபக்கி²கா ஹோந்தி, ததா³ தானி மனோகம்மானி காயவசீகம்மானி ஹோந்தீ’’தி, தஞ்ச ந, சேதனாபக்கி²கானம் மனோகம்மத்தாபா⁴வா. அப்³போ³ஹாரிகத்தே ச மனோகம்மதா ஸுட்டு²தரம் நத்தி². வுத்தம்பி சேதம் ‘‘அப்³போ³ஹாரிகா வா’’தி. தஸ்மா மனோகம்மஸ்ஸ காயவசீகம்மதா ந வத்தப்³பா³. அபி⁴ஜ்ஜா²தி³கிரியாகாரிகாய ஏவ சேதனாய ஸம்பயுத்தா அபி⁴ஜ்ஜா²த³யோ மனோகம்மம், ந பாணாதிபாதாதி³காயவசீகிரியாகாரிகாயாதி பி⁴ய்யோபி தேஸம் மனோகம்மதாதி ந தேஸம் மனோகம்மானம் ஸதம் காயவசீகம்மதா வத்தப்³பா³தி. ஏவம் கம்மானம் த்³வாரேஸு த்³வாரானஞ்ச கம்மேஸு அனியதத்தா த்³வாரனிப³ந்த⁴னம் ந கதம். இதா³னி அகதேபி ச த்³வாரனிப³ந்த⁴னே யேஸம் த்³வாரானம் வஸேன இத³ம் சித்தம் உப்பஜ்ஜதி, தேஸம் தம்தம்த்³வாரகம்மபதா²னஞ்ச வஸேன உப்பத்தியா யதா²ப⁴ட்ட²பாளியா வுத்தாய ச தீ³பனத்த²ம் ‘‘தத்த² காமாவசர’’ந்திஆதி³மாஹ. சித்தம் திவித⁴கம்மத்³வாரவஸேன உப்பஜ்ஜதீதி இத³ம் மனோகம்மத்³வாரபூ⁴தஸ்ஸ தேன ஸபா⁴வேன உப்பத்திம் க³ஹேத்வா வுத்தம். யதா² வா சித்தம் சித்தாதி⁴பதேய்யந்தி ஸம்பயுத்தவஸேன வுச்சதி, ஏவமிதா⁴பீதி வேதி³தப்³ப³ம். சோபனத்³வயரஹிதஸ்ஸ மனோபப³ந்த⁴ஸ்ஸ மனோகம்மத்³வாரபா⁴வே பன வத்தப்³ப³மேவ நத்தி².

கம்மபத²ஸம்ஸந்த³னகதா²வண்ணனா நிட்டி²தா.

த்³வாரகதா²வண்ணனா நிட்டி²தா.

அயம் யோஜனாதி ‘‘ரூபாரம்மணம் வா…பே… த⁴ம்மாரம்மணம் வா’’தி ஏதேன ஸஹ ‘‘யம் யம் வா பனா’’தி ஏதஸ்ஸ அயம் ஸம்ப³ந்தோ⁴தி அத்தோ². கோ பனாயம் ஸம்ப³ந்தோ⁴தி? யேன வசனானி அஞ்ஞமஞ்ஞம் ஸம்ப³ஜ்ஜ²ந்தி, தம் புப்³பா³பரவசனே பயோஜனம் ஸம்ப³ந்தோ⁴. இத⁴ ச ஸப்³பா³ரம்மணதாதி³த³ஸ்ஸனம் ‘‘ரூபாரம்மணம் வா…பே… த⁴ம்மாரம்மணம் வா’’தி ஏதஸ்ஸ அனந்தரம் ‘‘யம் யம் வா பனா’’தி ஏதஸ்ஸ வசனே பயோஜனம் யோஜனா த³ட்ட²ப்³ப³ம். தத்த² ‘‘ரூபாரம்மணம் வா…பே… த⁴ம்மாரம்மணம் வா ஆரப்³பா⁴’’தி ஏத்தகேன ஆபன்னம் தோ³ஸம் த³ஸ்ஸேத்வா தன்னிவத்தனவஸேன ‘‘யம் யம் வா பனா’’தி ஏதஸ்ஸ பயோஜனம் த³ஸ்ஸேதும் ‘‘ஹேட்டா²’’திஆதி³மாஹ. து³தியே அத்த²விகப்பே ‘‘யம் யம் வாபனா’’தி ஏதேன அப்பதா⁴னம்பி ரூபாதி³ம் ஆகட்³ட⁴தி. ந ஹி பதா⁴னஸ்ஸ சித்தஸ்ஸ அத்தனோயேவ ஆரம்மணபா⁴வோ அத்தீ²தி. ஹேட்டா² வுத்தனயேனாதி ஸப்³பா³ரம்மணதாதி³னயேன. ‘‘ஹேட்டா² க³ஹிதமேவ க³ஹிதந்தி வத்வா தஸ்ஸ வசனே பயோஜனம் த³ஸ்ஸேதும் ‘ரூபம் வா…பே… இத³ம் வா இத³ம் வா ஆரப்³பா⁴’தி கதே²தும் இத³ம் வுத்த’’ந்தி வுத்தம். தத்த² இத³ம் வா இத³ம் வாதி ஏதம் ஸப்³பா³ரம்மணதாதி³ம் ஸந்தா⁴ய கதி²தந்தி வேதி³தப்³ப³ம்.

த⁴ம்முத்³தே³ஸவாரகதா²

ப²ஸ்ஸபஞ்சமகராஸிவண்ணனா

ஆசரியானந்தி ரேவதாசரியஸ்ஸ. ந பனேதம் ஸாரதோ த³ட்ட²ப்³ப³ம். ந ஹி ப²ஸ்ஸாதீ³னம் காமாவசராதி³பா⁴வத³ஸ்ஸனத்த²ம் இத³மாரத்³த⁴ம், கிந்து தஸ்மிம் ஸமயே ப²ஸ்ஸாதி³ஸபா⁴வத³ஸ்ஸனத்த²ந்தி.

சித்தஸ்ஸ பட²மாபி⁴னிபாதத்தாதி ஸப்³பே³ சேதஸிகா சித்தாயத்தா சித்தகிரியாபா⁴வேன வுச்சந்தீதி ப²ஸ்ஸோ ‘‘சித்தஸ்ஸ பட²மாபி⁴னிபாதோ’’தி வுத்தோ. காமம் உப்பன்னப²ஸ்ஸோ புக்³க³லோ சித்தசேதஸிகராஸி வா ஆரம்மணேன பு²ட்டோ² ப²ஸ்ஸஸஹஜாதாய வேத³னாய தம்ஸமகாலமேவ வேதே³தி, ப²ஸ்ஸோ பன ஓபா⁴ஸஸ்ஸ பதீ³போ விய வேத³னாதீ³னம் பச்சயவிஸேஸோ ஹோதீதி புரிமகாலோ விய வுத்தோ. கோ³பானஸீனம் உபரி திரியம் ட²பிதகட்ட²ம் பக்க²பாஸோ. கட்ட²த்³வயாதி³ விய ஏகதே³ஸேன ஏகபஸ்ஸேன அனல்லீயமானோபி ரூபேன ஸஹ ப²ஸ்ஸஸ்ஸ ஸாமஞ்ஞம் அனல்லீயமானம் ஸங்க⁴ட்டனமேவ, ந விஸயபா⁴வோ, ஸங்க⁴ட்டனஞ்ச ப²ஸ்ஸஸ்ஸ சித்தாரம்மணானம் ஸன்னிபதனபா⁴வோ ஏவ. வத்தா²ரம்மணஸன்னிபாதேன ஸம்பஜ்ஜதீதி ஸங்க⁴ட்டனஸம்பத்திகோ ப²ஸ்ஸோ. பாணித்³வயஸ்ஸ ஸன்னிபாதோ விய சித்தாரம்மணஸன்னிபாதோ ப²ஸ்ஸோ சித்தஸ்ஸ ஆரம்மணே ஸன்னிபதிதப்பவத்தியா பச்சயோ ஹோதீதி கிச்சட்டே²னேவ ரஸேன ஸங்க⁴ட்டனரஸோ. ததா² பச்சயபா⁴வோ ஹி தஸ்ஸ ப²ஸ்ஸஸ்ஸ ஸங்க⁴ட்டனகிச்சந்தி. யதா² ஹி பாணியா பாணிம்ஹி ஸங்க⁴ட்டனம் தப்³பி³ஸேஸபூ⁴தா ரூபத⁴ம்மா, ஏவம் சித்தஸ்ஸ ஆரம்மணே ஸங்க⁴ட்டனம் தப்³பி³ஸேஸபூ⁴தோ ஏகோ சேதஸிகத⁴ம்மோ த³ட்ட²ப்³போ³. சித்தேயேவாதி ஏதேன சேதஸிகஸபா⁴வதம் வத்தா²ரம்மணேஹி அஸம்ஸட்ட²ம் ஸங்க⁴ட்டனம் வேத³னாய த³ஸ்ஸேதி, ந பன வத்து²னிஸ்ஸயதம் படிக்கி²பதி. தஸ்ஸ ப²ஸ்ஸஸ்ஸ காரணபூ⁴தோ தத³னுரூபோ ஸமன்னாஹாரோ தஜ்ஜாஸமன்னாஹாரோ. இந்த்³ரியஸ்ஸ தத³பி⁴முக²பா⁴வோ ஆவஜ்ஜனாய ச ஆரம்மணகரணம் விஸயஸ்ஸ பரிக்க²ததா அபி⁴ஸங்க²ததா விஞ்ஞாணஸ்ஸ விஸயபா⁴வகரணந்தி அத்தோ².

ஸுக²வேத³னாயமேவ லப்³ப⁴தி அஸ்ஸாத³பா⁴வதோதி அதி⁴ப்பாயோ. விஸ்ஸவிதாயாதி அரஹதாய. அனேகத்த²த்தா ஹி தா⁴தூனம் அரஹத்தோ² விபுப்³போ³ ஸுஸத்³தோ³. விஸ்ஸவம் வா ஸஜனம் வஸிதா காமகாரிதா விஸ்ஸவிதா. ஆரம்மணரஸேகதே³ஸமேவ அனுப⁴வந்தீதி இத³ம் பு²ஸனாதி³கிச்சம் ஏகதே³ஸானுப⁴வனமிவ ஹோதீதி கத்வா வுத்தம். வேத³யிதஸபா⁴வோ ஏவ ஹி அனுப⁴வனந்தி. பு²ஸனாதி³பா⁴வேன வா ஆரம்மணக்³க³ஹணம் ஏகதே³ஸானுப⁴வனம், வேத³யிதபா⁴வேன க³ஹணம் யதா²காமம் ஸப்³பா³னுப⁴வனம். ஏவம் ஸபா⁴வானேவ தானி க³ஹணானீதி ந வேத³னாய விய ப²ஸ்ஸாதீ³னம்பி யதா²ஸககிச்சகரணேன ஸாமிபா⁴வானுப⁴வனம் சோதே³தப்³ப³ம். அயம் இதா⁴தி ஏதேன பஞ்சஸு வேத³னாஸு இமஸ்மிம் சித்தே அதி⁴ப்பேதம் ஸோமனஸ்ஸவேத³னம் வத³தி, தஸ்மா அஸோமனஸ்ஸவேத³னம் அபனேத்வா க³ஹிதாய ஸோமனஸ்ஸவேத³னாய ஸமானா இட்டா²காரஸம்போ⁴க³ரஸதா வுத்தாதி வேதி³தப்³பா³.

நிமித்தேன புனஸஞ்ஜானனகிச்சா பச்சாபி⁴ஞ்ஞாணரஸா. புனஸஞ்ஜானனஸ்ஸ பச்சயோ புனஸஞ்ஜானனபச்சயோ, ததே³வ நிமித்தம் புன…பே… நிமித்தம், தஸ்ஸ கரணம் புன…பே… கரணம். புனஸஞ்ஜானனபச்சயபூ⁴தம் வா நிமித்தகரணம் புன…பே… கரணம், தத³ஸ்ஸா கிச்சந்தி அத்தோ². புனஸஞ்ஜானனபச்சயனிமித்தகரணம் நிமித்தகாரிகாய நிமித்தேன ஸஞ்ஜானந்தியா ச ஸப்³பா³ய ஸஞ்ஞாய ஸமானம் வேதி³தப்³ப³ம். ஞாணமேவ அனுவத்ததி, தஸ்மா அபி⁴னிவேஸகாரிகா விபரீதக்³கா³ஹிகா ச ந ஹோதீதி அதி⁴ப்பாயோ. ஏதேனுபாயேன ஸமாதி⁴ஸம்பயுத்தாய அசிரட்டா²னதா ச ந ஹோதீதி த³ட்ட²ப்³பா³.

அபி⁴ஸந்த³ஹதீதி பப³ந்த⁴தி பவத்தேதி. சேதனாபா⁴வோ ப்³யாபாரபா⁴வோ. தி³கு³ணுஸ்ஸாஹாதி ந தி³கு³ணம் வீரியயோக³ம் ஸந்தா⁴ய வுத்தம், அத்தனோ ஏவ பன ப்³யாபாரகிச்சஸ்ஸ மஹந்தபா⁴வம் தீ³பேதி. உஸ்ஸாஹனபா⁴வேனாதி ஆத³ரபா⁴வேன. ஸா ஹி ஸயம் ஆத³ரபூ⁴தா ஸம்பயுத்தே ஆத³ரயதீதி.

விஜானனம் ஆரம்மணஸ்ஸ உபலத்³தி⁴. ஸந்த³ஹனம் சித்தந்தரஸ்ஸ அனுப்பப³ந்த⁴னம். சக்கு²னா ஹி தி³ட்ட²ந்தி சக்கு²னா த³ட்ட²ப்³ப³ம். யதா² ‘‘தி³ட்ட²ம் ஸுதம் முதம் விஞ்ஞாத’’ந்தி த³ட்ட²ப்³பா³தி³ வுச்சதி, ஏவமிதா⁴பி வேதி³தப்³ப³ம். சக்கு²னா ஹீதிஆதீ³ஸு சக்கு²னா…பே… மனஸா த்³வாரேனாதி அத்தோ². நக³ரகு³த்திகஸ்ஸ விய சித்தஸ்ஸ ஆரம்மணவிபா⁴வனமத்தம் உபதா⁴ரணமத்தம் உபலத்³தி⁴மத்தம் கிச்சம், ஆரம்மணபடிவேத⁴னபச்சாபி⁴ஞ்ஞாணாதி³ பன கிச்சம் பஞ்ஞாஸஞ்ஞாதீ³னந்தி வேதி³தப்³ப³ம். புரிமனித்³தி³ட்ட²ந்தி ஸமயவவத்தா²னே நித்³தி³ட்ட²ம். பா⁴வேந்தோ விய ந ந உப்பஜ்ஜதி, கிந்து உப்பஜ்ஜதீதி த³ஸ்ஸேதும் ‘‘சித்தம் ஹோதீ’’தி வுத்தந்தி ஏதம் ஹோதி-ஸத்³த³ஸ்ஸ உப்பஜ்ஜதி-ஸத்³த³ஸ்ஸ ச ஸமானத்த²த்தே ஸதி யுஜ்ஜேய்ய, தத³த்த²த்தே ச தத்த² உப்பன்னம் ஹோதீதி ந வுச்சேய்ய. ந ஹி யுத்தம் உப்பன்னம் உப்பஜ்ஜதீதி வத்தும். சித்தஸ்ஸ ச உப்பன்னதா ஸமயவவத்தா²னே வுத்தா ஏவாதி கிம் தஸ்ஸ புன உப்பத்தித³ஸ்ஸனேன. யேன ச ஸமயவவத்தா²னம் கதம், தஸ்ஸ நித்³தே³ஸோ ந ந ஸக்கா காதுந்தி கிம் தம் நித்³தே³ஸத்த²ம் உத்³தே³ஸேன து³தியேன, நித்³தே³ஸேனேவ ச ப²ஸ்ஸாதீ³ஹி ச அஞ்ஞத்தம் சித்தஸ்ஸ ஸிஜ்ஜ²தீதி கிம் தத³த்தே²ன புன வசனேன, அஞ்ஞப்பயோஜனத்தா பன புரிமஸ்ஸ சித்தவசனஸ்ஸ பச்சி²மம் வுத்தம். புரிமஞ்ஹி ஸமயவவத்தா²னத்த²மேவ வுத்தம், ந வவத்தி²தஸமயே விஜ்ஜமானத⁴ம்மத³ஸ்ஸனத்த²ம், இதரஞ்ச தஸ்மிம் ஸமயே விஜ்ஜமானத⁴ம்மத³ஸ்ஸனத்த²ம் வுத்தம், ந ஸமயவவத்தா²னத்த²ம், ந ச அஞ்ஞத³த்த²ம் வசனம் அஞ்ஞத³த்த²ம் வத³தி, ந ச லேஸேன வுத்தோதி கத்வா மஹாகாருணிகோ அத்த²ம் பாகடம் ந கரோதீதி.

ப²ஸ்ஸபஞ்சமகராஸிவண்ணனா நிட்டி²தா.

ஜா²னங்க³ராஸிவண்ணனா

விதக்கேதீதி த⁴ம்மதோ அஞ்ஞஸ்ஸ கத்துனிவத்தனத்த²ம் த⁴ம்மமேவ கத்தாரம் நித்³தி³ஸதி. தஸ்ஸ பன வஸவத்திபா⁴வனிவாரணத்த²ம் ‘‘விதக்கனம் வா’’தி பா⁴வனித்³தே³ஸோ. ரூபம் ரூபந்தி பத²வீ பத²வீதி வா ஆகோடேந்தோ விய ஹோதீதி ஆகோடனலக்க²ணோ. ஆதி³தோ, அபி⁴முக²ம் வா ஹனனம் ஆஹனனம், பரிதோ, பரிவத்தேத்வா வா ஆஹனனம் பரியாஹனனம். விசாரதோ ஓளாரிகட்டே²ன விசாரஸ்ஸேவ புப்³ப³ங்க³மட்டே²ன அனுரவதோ ஓளாரிகோ தஸ்ஸ ச புப்³ப³ங்க³மோ க⁴ண்டாபி⁴கா⁴தோ விய ஹோதி விதக்கோ. ஸோ யதா² க⁴ண்டாபி⁴கா⁴தோ பட²மாபி⁴னிபாதோ ஹோதி, ஏவம் ஆரம்மணாபி⁴முக²னிரோபனட்டே²ன பட²மாபி⁴னிபாதோ ஹோதி. விப்பா²ரவாதி விசலனயுத்தோ. அனுப்பப³ந்தே⁴ன பவத்தியந்தி உபசாரே வா அப்பனாயம் வா ஸந்தானேன பவத்தியம். தத்த² ஹி விதக்கோ நிச்சலோ ஹுத்வா ஆரம்மணம் அனுபவிஸித்வா பவத்ததி. மண்ட³லந்தி க²லமண்ட³லம்.

பிணயதீதி தப்பேதி, வட்³டே⁴தி வா. ப²ரணரஸாதி பணீதரூபேஹி காயஸ்ஸ ப்³யாபனரஸா. உத³க்³க³பா⁴வோ ஓத³க்³யம். கு²த்³தி³கா லஹும் லோமஹம்ஸனமத்தம் கத்வா பி⁴ன்னா ந புன உப்பஜ்ஜதி. க²ணிகா ப³ஹுலம் உப்பஜ்ஜதி. உப்³பே³க³தோ ப²ரணா நிச்சலத்தா சிரட்டி²திகத்தா ச பணீததரா. பஸ்ஸத்³தி⁴யா நிமித்தபா⁴வேன க³ப்³ப⁴ம் க³ண்ஹந்தீ. அப்பனாஸம்பயுத்தாவ பீதி அப்பனாஸமாதி⁴பூரிகாதி கத்வா ஸா ட²பிதா. இதரா த்³வே க²ணிகோபசாரஸமாதி⁴பூரிகா பீதீ.

ஸமாதி⁴சித்தேனாதி ஸமாதி⁴ஸஹிதசித்தேன. அவிஸாரோ அத்தனோ ஏவ அவிஸரணஸபா⁴வோ. அவிக்கே²போ ஸம்பயுத்தானம் அவிக்கி²த்ததா. யேன ஸம்பயுத்தா அவிக்கி²த்தா ஹோந்தி, ஸோ த⁴ம்மோ அவிக்கே²போதி. விஸேஸதோதி யேபு⁴ய்யேன. ஸுக²விரஹிதோபி ஹி அத்தி² ஸமாதீ⁴தி. பதீ³பனித³ஸ்ஸனேன ஸந்தானட்டி²திபா⁴வம் ஸமாதி⁴ஸ்ஸ த³ஸ்ஸேதி.

ஜா²னங்க³ராஸிவண்ணனா நிட்டி²தா.

இந்த்³ரியராஸிவண்ணனா

ஸத்³த³ஹந்தி ஏதாயாதி ஸத்³த³ஹனகிரியாய பவத்தமானானம் த⁴ம்மானம் தத்த² ஆதி⁴பச்சபா⁴வேன ஸத்³தா⁴ய பச்சயதம் த³ஸ்ஸேதி. தஸ்ஸா ஹி த⁴ம்மானம் ததா²பச்சயபா⁴வே ஸதி ‘‘புக்³க³லோ ஸத்³த³ஹதீ’’தி வோஹாரோ ஹோதி. பஸாத³னீயட்டா²னேஸு பஸாத³ஸ்ஸ படிபக்க²பூ⁴தம் அகுஸலம் அஸ்ஸத்³தி⁴யம் மிச்சா²தி⁴மோக்கோ² ச. பஸாத³பூ⁴தோ நிச்ச²யோ வத்து²க³தோ அதி⁴மோக்க²லக்க²ணம், ந யேவாபனகாதி⁴மோக்கோ²தி. இந்த³ட்ட²ம் காரேதீதி ‘‘மம் அந்தரேன தும்ஹாகம் அதி⁴முச்சனம் நத்தி², மயா ஸத்³த³ஹதா²’’தி விய அத்தானம் அனுவத்தேதி ஸம்பயுத்தத⁴ம்மே. ஏவம் ஸேஸேஸுபி. பக்க²ந்த³னந்தி ஸம்ஸீத³னம். பங்கோ கத்³த³மதோ க⁴னீபூ⁴தோ ஹோதி. பணகம் பிச்சி²லம் உத³கமலம். பீதம் உத³கம். ஓகப்பனலக்க²ணாதி அனுபவிஸித்வா ஏவமேதந்தி கப்பனலக்க²ணா. அகலுஸபா⁴வோ அகாலுஸியம், அனாவிலபா⁴வோதி அத்தோ². பு³த்³தா⁴தி³வத்தூ²னி ஸத்³தே⁴ய்யானி. ஸப்புரிஸூபஸேவனஸத்³த⁴ம்மஸவனயோனிஸோமனஸிகாரத⁴ம்மானுத⁴ம்மபடிபத்தியோ ஸோதாபத்தியங்கா³னி. குஸலத⁴ம்மானம் ஆதா³னே ஹத்தோ² விய, ஸப்³ப³ஸம்பத்தினிப்பா²த³னே வித்தம் விய, அமதகஸிப²லப²லனே பீ³ஜம் விய த³ட்ட²ப்³பா³.

வீரபா⁴வோதி யேன வீரோ நாம ஹோதி, ஸோ த⁴ம்மோதி அத்தோ². அனுப³லப்பதா³னம் பக்³க³ஹோ. மக்³கோ³ க³ந்தப்³போ³ ஹோதி, மக்³கோ³ க³தோ, கம்மம் கத்தப்³ப³ம், கம்மம் கதம், அப்பமத்தகோ ஆபா³தோ⁴ உப்பன்னோ, கி³லானா வுட்டி²தோ ஹோதி அசிரவுட்டி²தோ கே³லஞ்ஞா, கா³மம் வா நிக³மம் வா பிண்டா³ய சரந்தோ ந லப⁴தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம், லப⁴தி…பே… பாரிபூரிந்தி ஏதானி அனுரூபபச்சவேக்க²ணாஸஹிதானி அட்ட² வீரியாரம்ப⁴வத்தூ²னி தம்மூலகானி வா பச்சவேக்க²ணானி.

சிரகதாதி³ஆரம்மணம் உபக³ந்த்வா டா²னம், அனிஸ்ஸஜ்ஜனம் வா ஆரம்மணஸ்ஸ உபட்டா²னம். உத³கே அலாபு³ விய ஆரம்மணம் பிலவித்வா க³ந்தும் அப்பதா³னம் பாஸாணஸ்ஸ விய நிச்சலஸ்ஸ ஆரம்மணஸ்ஸ ட²பனம் ஸாரணம் அஸம்முட்ட²தாகரணம் அபிலாபனம். அபிலாபே கரோதி அபிலாபேதி. க³தியோதி நிப்ப²த்தியோ ஸம்ப⁴வதோ ப²லதோ ச. அபரோ நயோதி ரஸாதி³த³ஸ்ஸனத்த²ம் ஆரத்³த⁴ம். ஸம்மோஸபச்சனீகம் கிச்சம் அஸம்மோஸோ, ந ஸம்மோஸாபா⁴வமத்தம். ஸதியா வத்து²பூ⁴தா காயாத³யோ காயாதி³ஸதிபட்டா²னா, ஸதியோயேவ வா புரிமா பச்சி²மானம் பத³ட்டா²னம்.

விக்கே²பஸ்ஸ உத்³த⁴ச்சஸ்ஸ. பஞ்ஞாபேதீதி பகாரேஹி ஜானாபேதி. ஏகாலோகா ஹோதீதி விபஸ்ஸனுபக்கிலேஸோபா⁴ஸம் ஸந்தா⁴யாஹ. மனதே விஜானாதி ஏதேனாதி வா மனோ, ஏவஞ்ச கத்வா ‘‘மனஞ்ச படிச்ச த⁴ம்மே சா’’தி (ம. நி. 1.204, 400; 3.421, 425) காரணபா⁴வேன மனோ வுத்தோ. ஸப்³போ³ ஹி மனோ அத்தனோ அனந்தரஸ்ஸ விஞ்ஞாணஸ்ஸ காரணந்தி. விஜானாதீதி பரிச்சி²ன்னோபலத்³தி⁴வஸேன ஜானாதி, ந ஸஞ்ஞாபஞ்ஞா விய ஸஞ்ஜானனபடிவிஜ்ஜ²னவஸேன.

பீதிஸோமனஸ்ஸஸம்பயோக³தோதி வுத்தே யேன யோகா³ ஸுமனோ ஹோதி, தம் ஸோமனஸ்ஸந்தி வுச்சதீதி பீதியா ச ஸோமனஸ்ஸபா⁴வோ ஆபஜ்ஜதி, தஸ்மா வினாபி காயேன வத்து²னா ஸாதவேத³னாஸம்பயோக³தோதி யோஜேதப்³ப³ம். ஏவஞ்ச நிப்பீதிகம் ஸோமனஸ்ஸஞ்ச ஸங்க³ஹிதம் ஹோதி, பீதிஉபலக்கி²தம் வா ஸோமனஸ்ஸம் ஸப்பீதிகம் நிப்பீதிகஞ்ச ஸோமனஸ்ஸந்தி அத்தோ² த³ட்ட²ப்³போ³.

பவத்தஸந்ததாதி⁴பதேய்யந்தி பவத்தஸங்கா²தாய ஸந்ததியா அதி⁴பதிபூ⁴தம். ஜீவிதிந்த்³ரியஸ்ஸ ஹி அத்தனோ விஜ்ஜமானக்க²ணே அனுபாலேந்தஸ்ஸ அனந்தரஞ்ச ஸானுபாலனானம் உப்பத்தியா ஹேதுபூ⁴தஸ்ஸ வஸேன பவத்தம் சிரட்டி²திகம் ஹோதி, தம்தம்கம்மவிஸேஸேன விஸேஸயுத்தம் யாவ சுதி அவிஸேஸேன வா யாவ பரினிப்³பா³னம் அவிச்சி²ன்னம் பவத்ததி ஜீவமானதாவிஸேஸயுத்தஞ்சாதி ரூபாரூபஜீவிதிந்த்³ரியானம் ஸமானலக்க²ணாதி³ம் வத்தும் ‘‘அத்தனா அவினிபு⁴த்தத⁴ம்மான’’ந்தி ஆஹ. அனுபாலேதப்³பா³னம் அத்தி²க்க²ணேயேவ. அஸதி ஹி அனுபாலேதப்³பே³ உப்பலாதி³ம்ஹி கிம் உத³கம் அனுபாலேய்யாதி. தஸ்ஸ தஸ்ஸாதி அனுபாலனாதி³கஸ்ஸ. ஸாத⁴னதோதி ஸாத⁴னேன. தம்ஸாத⁴னஞ்ச ஜீவமானவிஸேஸபச்சயபா⁴வதோ.

இந்த்³ரியராஸிவண்ணனா நிட்டி²தா.

மக்³க³ங்க³ராஸிவண்ணனா

ஸம்மாதி அவிபரீதனிய்யானிகபா⁴வேன. பஸத்த²தா ச ஏவமேவ த³ட்ட²ப்³பா³.

ப³லராஸிவண்ணனா

அஸ்ஸத்³தி⁴யேதி அஸ்ஸத்³தி⁴யகாரணா. உப⁴யபத³வஸேனாதி ஸத்³தா⁴பத³ம் ப³லபத³ந்தி ஏவமாதி³பத³த்³வயவஸேன. நியகஜ்ஜ²த்தம் ஜாதிஆதி³ஸமுட்டா²னம் ஏதிஸ்ஸாதி அஜ்ஜ²த்தஸமுட்டா²னா. க³ருனா கிஸ்மிஞ்சி வுத்தே கா³ரவவஸேன பதிஸ்ஸவனம் பதிஸ்ஸவோ, ஸஹ பதிஸ்ஸவேன ஸப்பதிஸ்ஸவம், பதிஸ்ஸவபூ⁴தம் தம்ஸபா⁴க³ஞ்ச யம்கிஞ்சி கா³ரவந்தி அத்தோ². ஜாதிஆதி³மஹத்தபச்சவேக்க²ணேன உப்பஜ்ஜமானா ச ஹிரீ தத்த² கா³ரவவஸேன பவத்ததீதி ‘‘ஸப்பதிஸ்ஸவலக்க²ணா’’தி வுச்சதி. வஜ்ஜம் பா⁴யதி தஞ்ச ப⁴யதோ பஸ்ஸதீதி வஜ்ஜபீ⁴ருகப⁴யத³ஸ்ஸாவீ. ஏவம்ஸபா⁴வம் ஓத்தப்பம். ஹிரீ பாபத⁴ம்மே கூ³த²ம் விய பஸ்ஸதி, ஓத்தப்பம் உண்ஹம் விய. தா³யஜ்ஜம் நவலோகுத்தரத⁴ம்மாதி³. அஜ்ஜ²த்தஸமுட்டா²னாதி³தா ச ஹிரீஓத்தப்பானம் தத்த² தத்த² பாகடபா⁴வேன வுத்தா, ந பன தேஸம் கதா³சி அஞ்ஞமஞ்ஞம் விப்பயோகா³. ந ஹி லஜ்ஜனம் நிப்³ப⁴யம் பாபப⁴யம் வா அலஜ்ஜனம் ஹோதீதி.

மூலராஸிவண்ணனா

அகே³தோ⁴ அனபி⁴ஜ்ஜ²னம் அனபி⁴கங்க²னம். அனல்லீனோ பா⁴வோ அதி⁴ப்பாயோ ஏதஸ்ஸாதி அனல்லீனபா⁴வோ, ஏவஞ்ஹி உபமாய ஸமேதி. அனுகூலமித்தோ அனுவத்தகோ. வினயரஸோதி வினயனரஸோ. அதோ³ஸோ து³ஸ்ஸீல்யமலஸ்ஸாதி இத³ம் து³ஸ்ஸீல்யஸ்ஸ தோ³ஸஸமுட்டா²னதம் தோ³ஸூபனிஸ்ஸயதஞ்ச ஸந்தா⁴ய வுத்தம். அபா⁴வனாயாதி ‘‘தத்த² ஜாதானம் த⁴ம்மானம் அனதிவத்தனட்டே²ன பா⁴வனாஇந்த்³ரியானம் ஏகரஸட்டே²ன பா⁴வனா தது³பக³வீரியவாஹனட்டே²ன பா⁴வனா ஆஸேவனட்டே²ன பா⁴வனா’’தி ஏவம் வுத்தாய பஞ்ஞாஸாத⁴னாய பா⁴வனாய அப்பவத்தி, தப்படிபக்க²பூ⁴தா வா அகுஸலா அபா⁴வனா. நிக்³கு³ணேபி கு³ணக்³க³ஹணம் அதி⁴கக்³க³ஹணம். விஜ்ஜமானம்பி கு³ணம் வித்³த⁴ம்ஸேத்வா க³ஹணம் ஊனக்³க³ஹணம். சதுவிபல்லாஸக்³க³ஹணம் விபரீதக்³க³ஹணம்.

யாதா²வஸபா⁴வேதி ‘‘ஏத்தகோ ஏதஸ்ஸ கு³ணோ, ஏத்தகோ தோ³ஸோ’’தி கு³ணதோ³ஸானம் ஸபா⁴வே ‘‘ஜராத⁴ம்மோ ஜீரதி, தம் குதேத்த² லப்³பா⁴ மா ஜீரீ’’தி ஏவமாதி³பச்சவேக்க²ணஸம்ப⁴வதோ. அலோபே⁴ன ச க³ஹட்டா²னம் கே²த்தவத்தா²தீ³ஸு விவாதா³பா⁴வதோ. அமோஹேன பப்³ப³ஜிதானம் தி³ட்டி²க³தவிவாதா³பா⁴வதோ. காமராகா³பி⁴னிவேஸவினிப³ந்தா⁴ ஹி க³ஹட்டா² க³ஹட்டே²ஹி விவத³ந்தி, தி³ட்டி²ராகா³பி⁴னிவேஸவினிப³ந்தா⁴ ஸமணா ஸமணேஹீதி. ராக³வஸேன மித்தஸந்த²வோ தோ³ஸவஸேன விரோதோ⁴ ச தப்³பி³ஸேஸேன உபக³மாபக³மா, ஆரம்மணே வா ரூபாதி³ம்ஹி அனுரோத⁴விரோதா⁴. அமஜ்ஜ²த்தபா⁴வஸ்ஸ படிகா⁴னுனயஸங்கா²தஸ்ஸ மோஹேன பவத்தி. ஸுக²விபரிணாமே து³க்க²ஸமாயோகே³ ச படிக⁴பவத்தியம் வேத³னாபரிக்³க³ஹோ ந ஸிஜ்ஜ²தீதி அதோ³ஸானுபா⁴வேன வேத³னாஸதிபட்டா²னம் ஸிஜ்ஜ²தி. தி³ப்³ப³விஹாரஸ்ஸாதி சதுன்னம் ஜா²னானம். அரியவிஹாரோ ப²லஸமாபத்தி. மோஹேன அவிசாரேந்தோ உதா³ஸீனபக்கே²ஸுபி ஸத்தஸங்கா²ரேஸு ஸப்³பே³ஸு அபி⁴ஸங்க³ம் கரோதீதி அமூள்ஹஸ்ஸ தத³பா⁴வோ வேதி³தப்³போ³. து³க்க²த³ஸ்ஸனஸ்ஸ ஆஸன்னபடிபக்க²த்தா தோ³ஸஸ்ஸ தப்படிபக்கே²ன அதோ³ஸேன து³க்க²த³ஸ்ஸனம் ஹோதி.

கம்மபத²ராஸிவண்ணனா

ஸுகா²தீ³னி அத்தனோ ந ப்³யாபாதே³தி ந வினாஸேதி பரஸ்ஸ சாதி த³ட்ட²ப்³ப³ம். கம்மபத²தாதம்ஸபா⁴க³தாஹி கம்மபத²வஸேன.

பஸ்ஸத்³தா⁴தி³யுக³லவண்ணனா

த³ரதோ² ஸாரம்போ⁴, து³க்க²தோ³மனஸ்ஸபச்சயானம் உத்³த⁴ச்சாதி³கானம் கிலேஸானம் சதுன்னம் வா க²ந்தா⁴னம் ஏதம் அதி⁴வசனம். உத்³த⁴ச்சப்பதா⁴னா கிலேஸா உத்³த⁴ச்சாதி³கிலேஸா, உத்³த⁴ச்சம் வா ஆதி³ம் கத்வா ஸப்³ப³கிலேஸே ஸங்க³ண்ஹாதி. ஸுவண்ணவிஸுத்³தி⁴ வியாதி யதா² ஸுவண்ணவிஸுத்³தி⁴ அலங்காரவிகதிவினியோக³க்க²மா, ஏவம் அயம்பி ஹிதகிரியாவினியோக³க்க²மா.

ஸமம், ஸமந்ததோ வா பகாரேஹி ஜானனம் ஸம்பஜஞ்ஞம். சேதியவந்த³னாதி³அத்த²ம் அபி⁴க்கமாதீ³ஸு அத்தா²னத்த²பரிக்³க³ண்ஹனம் ஸாத்த²கஸம்பஜஞ்ஞம். ஸதி ச அத்தே² ஸப்பாயாஸப்பாயரூபாதி³பரிக்³க³ண்ஹனம் ஸப்பாயஸம்பஜஞ்ஞம். கோ³சரகா³மாபி⁴க்கமனாதீ³ஸு கம்மட்டா²னாவிஜஹனம் கோ³சரஸம்பஜஞ்ஞம். அபி⁴க்கமனாதீ³னம் தா⁴துஆதி³வஸேன பவிசயோ அஸம்மோஹஸம்பஜஞ்ஞம். ஸப்³ப³கம்மட்டா²னபா⁴வனானுயுத்தானம் ஸப்³ப³யோகீ³னம் ஸப்³ப³தா³ உபகாரகா இமே த்³வே த⁴ம்மா பாரிபந்த²கஹரணதோ பா⁴வனாவட்³ட⁴னதோ ச. யதா²ஹ ‘‘த்³வே த⁴ம்மா ப³ஹுகாரா ஸதி ச ஸம்பஜஞ்ஞஞ்சா’’தி (தீ³. நி. 3.352). யுகே³ நத்³தா⁴ வியாதி யுக³னத்³தா⁴, அஞ்ஞமஞ்ஞம் நிமித்தபா⁴வேன ஸமம் பவத்தாதி அத்தோ². ‘‘புன சபரம், ஆவுஸோ, பி⁴க்கு² ஸமத²விபஸ்ஸனம் யுக³னத்³த⁴ம் பா⁴வேதீ’’தி (அ. நி. 4.170; படி. ம. 2.1) ஹி ஸுத்தே ஏதேஸம் யுக³னத்³த⁴தா வுத்தா. ஸப்³ப³குஸலத⁴ம்மேஸு லீனுத்³த⁴ச்சாபா⁴வோ ஏதேஹி த்³வீஹி ஸமம் யுத்தேஹீதி ‘‘வீரியஸமாதி⁴யோஜனத்தா²யா’’தி ஆஹ, யோக³வசனத்தா²யாதி அத்தோ².

யேவாபனகவண்ணனா

ரூபாபா⁴வேனாதி ருப்பனாபா⁴வேன. த⁴ம்மாதி ஏதஸ்ஸ அத்தோ² ஸபா⁴வதோ உபலப்³ப⁴மானாதி. மேத்தாபுப்³ப³பா⁴கோ³தி அப்பனாப்பத்தாய மேத்தாய புப்³ப³பா⁴கோ³, பரிகம்மமேத்தா ஏதஸ்மிம் சித்தே அத்தீ²தி அத்தோ². விரதிவஸேனாதி வசீபவத்தியா ந பூரேதி, கிந்து விரதியோகே³னாதி அத்தோ². அபண்ணகங்கா³னீதி அவிரத்³த⁴ங்கா³னி. யதா² ததா² வா ஆரம்மணே வினிச்ச²யனம் அதி⁴முச்சனம். ந ஹி அனதி⁴முச்சந்தோ பாணாதிபாதாதீ³ஸு தா³னாதீ³ஸு வா பவத்ததி, ஸத்³தா⁴ பன பஸாத³னீயேஸு பஸாதா³தி⁴மோக்கோ²தி அயமேதேஸம் விஸேஸோ. தா³ரகஸ்ஸ விய இதோ சிதோ ச ஸம்ஸப்பனஸ்ஸ கரிஸ்ஸாமி ந கரிஸ்ஸாமீதி அவினிச்ச²யஸ்ஸ படிபக்க²கிரியா அஸம்ஸப்பனம். புரிமமனதோதி ப⁴வங்க³தோ. விஸதி³ஸம் வீதி²ஜவனம் மனம் கரோதீதி மனஸிகாரஸாமஞ்ஞேன வீதி²ஜவனபடிபாத³கே த³ஸ்ஸேதி. தேஸு த⁴ம்மேஸூதி சித்தசேதஸிகத⁴ம்மேஸு. அததா³ரம்மணத்தேபி ஹி தேஸு ஸமப்பவத்தேஸு உதா³ஸீனபா⁴வதோ தத்ரமஜ்ஜ²த்ததாதி வுச்சதி. அலீனானுத்³த⁴தப்பவத்திபச்சயத்தா ஊனாதி⁴கனிவாரணரஸா. காயது³ச்சரிதாதி³வத்தூ²னந்தி பாணாதீ³னம். அமத்³த³னா மத்³த³னபடிபக்க²பா⁴வோவ.

தம்தம்ராஸிகிச்சவஸேன விபா⁴க³ரஹிதா அவிப⁴த்திகா. ஏத்தா²தி ஏதேஸு ஸவிப⁴த்திகேஸு து³தியட்டா²னாதீ³ஸுபி பா⁴ஜியமானேஸு அபுப்³ப³ம் நத்தீ²தி அத்தோ². பத³ம் பூரிதந்தி ஜா²னாதி³பத³ம் பஞ்சகாதி³வஸேன பூரிதம். பஞ்ச ஹி அங்கா³னி ஜா²னபத³ஸ்ஸ அத்தோ², தேஸு ஏகஸ்மிஞ்ச ஊனே ஜா²னபத³ம் ஊனம் ஹோதீதி. பத³ஸமூஹோ பத³கோட்டா²ஸோ வா தம் தமேவ வா பத³ம், அவுத்தம் ஹாபிதம் நாம ஹோதீதி வுத்தம் ‘‘பூரித’’ந்தி. வுத்தஸ்மிஞ்ஞேவ வுச்சமானே அனேகேஸம் புரிஸஸத்³தா³னம் விய கோசி ஸம்ப³ந்தோ⁴ நத்தீ²தி மஞ்ஞமானோ ஆஹ ‘‘அனனுஸந்தி⁴கா கதா²’’தி. அந்தரந்தரா வுத்தஸ்மிஞ்ஞேவ வுச்சமானே அனுக்கமேன த⁴ம்மா கதி²தா ந ஹோந்தீதி ஆஹ ‘‘உப்படிபாடியா’’தி. ப²ஸ்ஸபஞ்சமகராஸி ஸப்³ப³சித்துப்பாத³ஸாதா⁴ரணவஸேன சதுக்க²ந்த⁴தப்பச்சயஸங்க³ஹவஸேன ச வுத்தோ. யதா²வுத்தேஸு பன ராஸீஸு ஏகராஸிகிச்சஸ்ஸபி அபா⁴வா ச²ந்தா³த³யோ யேவாபனகவஸேன வுத்தா. வுத்தானம்பி ச த⁴ம்மானம் யதா² வேத³னாதீ³னம் ஜா²னங்கா³தி³பா⁴வோ வுத்தோ, ந ஏவம் ஸோவசஸ்ஸதாகல்யாணமித்ததாதி³விஸேஸோ வுத்தோதி தஸ்ஸ ஸங்க³ண்ஹனத்த²ம் கேசி த⁴ம்மே விஸும் ட²பேத்வா தே ச தஞ்ச விஸேஸம் ‘‘யே வா பனா’’தி ஆஹ. வேனேய்யஜ்ஜா²ஸயவஸேன வா ஸாவஸேஸே த⁴ம்மே வத்வா ‘‘யே வா பனா’’தி வுத்தம்.

யேவாபனகவண்ணனா நிட்டி²தா.

த⁴ம்முத்³தே³ஸவாரகதா²வண்ணனா நிட்டி²தா.