7. ஸந்துட்டி²ஸுத்தவண்ணனா

27. ஸத்தமே நித்³தோ³ஸானீதி அவஜ்ஜரஹிதானி ஆக³மனஸுத்³தி⁴தோ காயமண்ட³னாதி³கிலேஸவத்து²பா⁴வாபா⁴வதோ ச. தத்த² ஸுலப⁴தாய பரியேஸனது³க்க²ஸ்ஸ அபா⁴வோ த³ஸ்ஸிதோ, அப்பதாய பரிஹரணது³க்க²ஸ்ஸபி அபா⁴வோ த³ஸ்ஸிதோ, அனவஜ்ஜதாய அக³ரஹிதப்³ப³தாய பி⁴க்கு²ஸாருப்பபா⁴வோ த³ஸ்ஸிதோ ஹோதி. அப்பதாய வா பரித்தாஸஸ்ஸ அவத்து²தா, ஸுலப⁴தாய கே³தா⁴தீ³னம் அவத்து²தா, அனவஜ்ஜதாய ஆதீ³னவத³ஸ்ஸனனிஸ்ஸரணபஞ்ஞானம் அத்தி²தா த³ஸ்ஸிதா ஹோதி. அப்பதாய வா லாபே⁴ன ந ஸோமனஸ்ஸம் ஜனயந்தி, அலாபே⁴ன ந தோ³மனஸ்ஸம் ஜனயந்தி, அனவஜ்ஜதாய விப்படிஸாரனிமித்தம் அஞ்ஞாணுபேக்க²ம் ந ஜனயந்தி அவிப்படிஸாரவத்து²பா⁴வதோ.

பம்ஸுகூலந்தி ஸங்காரகூடாதீ³ஸு யத்த² கத்த²சி பம்ஸூனம் உபரி டி²தத்தா அப்³பு⁴க்³க³தட்டே²ன பம்ஸுகூலம் வியாதி பம்ஸுகூலம், பம்ஸு விய குச்சி²தபா⁴வம் உலதி க³ச்ச²தீதி பம்ஸுகூலந்தி ஏவம் லத்³த⁴னாமம் ரதி²காதீ³ஸு பதிதனந்தகானி உச்சினித்வா கதசீவரம். ருக்க²மூலந்தி விவேகானுரூபம் யம் கிஞ்சி ருக்க²ஸமீபம். யம் கிஞ்சி முத்தந்தி யம் கிஞ்சி கோ³முத்தம். கேசி பனேத்த² ‘‘கோ³முத்தபரிபா⁴விதஹரீதகக²ண்ட³ம் பூதிமுத்த’’ந்தி வத³ந்தி. ‘‘பூதிபா⁴வேன ஆபணாதி³தோ விஸ்ஸட்ட²ம் ச²ட்³டி³தம் அபரிக்³க³ஹிதம் யம் கிஞ்சி பே⁴ஸஜ்ஜம் பூதிமுத்தந்தி அதி⁴ப்பேத’’ந்தி அபரே.

யதோ கோ²தி பச்சத்தே நிஸ்ஸக்கவசனம், யம் கோ²தி வுத்தம் ஹோதி. தேன துட்டோ² ஹோதீதி வுத்தகிரியம் பராமஸதி. துட்டோ²தி ஸந்துட்டோ². இத³மஸ்ஸாஹந்தி ய்வாயம் சதுப்³பி³தே⁴ன யதா²வுத்தேன பச்சயேன அப்பேன ஸுலபே⁴ன ஸந்தோஸோ, இத³ம் இமஸ்ஸ பி⁴க்கு²னோ ஸீலஸம்வராதீ³ஸு அஞ்ஞதரம் ஏகம் ஸாமஞ்ஞங்க³ம் ஸமணபா⁴வகாரணந்தி அஹம் வதா³மி. ஸந்துட்ட²ஸ்ஸ ஹி சதுபாரிஸுத்³தி⁴ஸீலம் பரிபுண்ணம் ஹோதி, ஸமத²விபஸ்ஸனா ச பா⁴வனாபாரிபூரிம் க³ச்ச²ந்தி. அத² வா ஸாமஞ்ஞம் நாம அரியமக்³கோ³, தஸ்ஸ ஸங்கே²பதோ த்³வே அங்கா³ பா³ஹிரம் அஜ்ஜ²த்திகந்தி. தத்த² பா³ஹிரம் ஸப்புரிஸூபனிஸ்ஸயோ ஸத்³த⁴ம்மஸ்ஸவனஞ்ச. அஜ்ஜ²த்திகம் பன யோனிஸோமனஸிகாரோ த⁴ம்மானுத⁴ம்மப்படிபத்தி ச. தேஸு யஸ்மா யதா²ரஹம் த⁴ம்மானுத⁴ம்மப்படிபத்திபூ⁴தா தஸ்ஸ மூலபூ⁴தா சேதே த⁴ம்மா, யதி³த³ம் அப்பிச்ச²தா ஸந்துட்டி²தா பவிவித்ததா அஸம்ஸட்ட²தா ஆரத்³த⁴வீரியதாதி ஏவமாத³யோ, தஸ்மா வுத்தம் ‘‘இத³மஸ்ஸாஹம் அஞ்ஞதரம் ஸாமஞ்ஞங்க³ந்தி வதா³மீ’’தி.

ஸேனாஸனமாரப்³பா⁴தி விஹாராதி³ம் மஞ்சபீடா²தி³ஞ்ச ஸேனாஸனம் நிஸ்ஸாய. சீவரம் பானபோ⁴ஜனந்தி நிவாஸனாதி³சீவரம் அம்ப³பானகாதி³பானம் கா²த³னீயபோ⁴ஜனீயாதி³பு⁴ஞ்ஜிதப்³ப³வத்து²ஞ்ச ஆரப்³பா⁴தி ஸம்ப³ந்தோ⁴. விகா⁴தோதி விகா⁴தபா⁴வோ, சித்தஸ்ஸ து³க்க²ம் ந ஹோதீதி யோஜனா. அயஞ்ஹேத்த² ஸங்கே²பத்தோ² – ‘‘அமுகஸ்மிம் நாம ஆவாஸே பச்சயா ஸுலபா⁴’’தி லபி⁴தப்³ப³ட்டா²னக³மனேன வா ‘‘மய்ஹம் பாபுணாதி, ந துய்ஹ’’ந்தி விவாதா³பஜ்ஜனேன வா நவகம்மகரணாதி³வஸேன வா ஸேனாஸனாதீ³னி பரியேஸந்தானம் அஸந்துட்டா²னம் இச்சி²தாலாபா⁴தி³னா யோ விகா⁴தோ சித்தஸ்ஸ ஹோதி, ஸோ தத்த² ஸந்துட்ட²ஸ்ஸ ந ஹோதி. தி³ஸா நப்படிஹஞ்ஞதீதி ஸந்துட்டி²யா சாதுத்³தி³ஸபா⁴வேன தி³ஸா ந படிஹனதி. வுத்தஞ்ஹேதம் ‘‘சாதுத்³தி³ஸோ அப்படிகோ⁴ ச ஹோதி, ஸந்துஸ்ஸமானோ இதரீதரேனா’’தி (ஸு. நி. 42).

ஸமணத⁴ம்மஸ்ஸ அனுலோமாதி ஸமணத⁴ம்மஸ்ஸ ஸமத²விபஸ்ஸனாபா⁴வனாய, அரியமக்³க³ஸ்ஸேவ வா அனுச்ச²விகா அப்பிச்ச²தாத³யோ. துட்ட²சித்தஸ்ஸ பி⁴க்கு²னோதி துட்ட²சித்தேன பி⁴க்கு²னா. அதி⁴க்³க³ஹிதா ஹோந்தீதி படிபக்க²த⁴ம்மே அபி⁴ப⁴வித்வா க³ஹிதா ஹோந்தி. அந்தோக³தாதி அப்³ப⁴ந்தரக³தா. ந பரிபா³ஹிராதி ந பா³ஹிரா கதா.

ஸந்துட்டி²ஸுத்தவண்ணனா நிட்டி²தா.