10. பரிப்³பா³ஜகஸுத்தவண்ணனா

30. த³ஸமே அபி⁴ஞ்ஞாதாதி ஏதி³ஸோ ச ஏதி³ஸோ சாதி அபி⁴லக்க²ணவஸேன ஞாதா. தேனாஹ ‘‘ஞாதா பாகடா’’தி. படிஸல்லானா வுட்டி²தோதி ஏத்த² படிஸல்லானந்தி தேஹி தேஹி ஸத்³தி⁴விஹாரிகஅந்தேவாஸிகஉபாஸகாதி³ஸத்தேஹி சேவ ரூபாரம்மணாதி³ஸங்கா²ரேஹி ச படினிவத்தித்வா அபஸக்கித்வா ஸல்லீனம் நிலீயனம், ஏகீபா⁴வோ பவிவேகோதி வுத்தம் ஹோதி. யோ ததோ வுட்டி²தோ, ஸோ படிஸல்லானா வுட்டி²தோ நாம ஹோதி. ப⁴க³வா பன யஸ்மா படிஸல்லானா உத்தமதோ ப²லஸமாபத்திதோ வுட்டா²ஸி, தஸ்மா வுத்தம் ‘‘படிஸல்லானா வுட்டி²தோதி ப²லஸமாபத்திதோ வுட்டி²தோ’’தி. வத்து²காமேஸூதி ரூபாதீ³ஸு கிலேஸகாமஸ்ஸ வத்து²பூ⁴தேஸு காமேஸு. ப³ஹலராக³ந்தி தி²ரமூலது³ம்மோசனீயதாஹி அஜ்ஜோ²ஸானேன ப³ஹலபூ⁴தம் கிலேஸகாமம். ஸகாரணாதி யேஹி காரணேஹி பரேஸம் வாதே³ தோ³ஸம் த³ஸ்ஸேந்தி, தேஹி காரணேஹி ஸகாரணா. ந ஹி லக்க²ணயுத்தேன ஹேதுனா வினா பரவாதே³ஸு தோ³ஸம் த³ஸ்ஸேதும் ஸக்கா.

ஏவமாதீ³தி ஏத்த² ஆதி³ஸத்³தே³ன ‘‘நத்தி² ஹேது நத்தி² பச்சயோ ஸத்தானம் ஸம்கிலேஸாயா’’தி (தீ³. நி. 1.168) ஏவமாதி³ம் ஸங்க³ண்ஹாதி, தஸ்மா ஏவமாதி³வாதி³னோ ஏவம் ஹேதுப்படிக்கே²பவாதி³னோதி அத்தோ². ஏத்த² ச நத்தி²கதி³ட்டி² விபாகம் படிபா³ஹதி, அகிரியதி³ட்டி² கம்மம் படிபா³ஹதி, அஹேதுகதி³ட்டி² உப⁴யம் படிபா³ஹதி. தத்த² கம்மம் படிபா³ஹந்தேன விபாகோ படிபா³ஹிதோ ஹோதி, விபாகம் படிபா³ஹந்தேனபி கம்மம் படிபா³ஹிதம். இதி ஸப்³பே³பேதே அத்த²தோ உப⁴யபடிபா³ஹகா அஹேதுவாதா³ சேவ அகிரியவாதா³ ச நத்தி²கவாதா³ ச ஹோந்தி.

ஓக்கந்தனியமாதி ஓகா³ள்ஹமிச்ச²த்தனியமா. ஸஜ்ஜா²யதீதி தம் தி³ட்டி²தீ³பகம் க³ந்த²ம் உக்³க³ஹேத்வா பட²தி. வீமம்ஸதீதி தஸ்ஸ அத்த²ம் விசாரேதி. தஸ்ஸாதிஆதி³ வீமம்ஸனாகாரத³ஸ்ஸனம். தஸ்மிம் ஆரம்மணேதி யதா²பரிகப்பிதஹேதுபச்சயாபா⁴வாதி³கே நத்தி² ஹேதூதிஆதி³னயப்பவத்தாய லத்³தி⁴யா ஆரம்மணே. மிச்சா²ஸதி ஸந்திட்ட²தீதி ‘‘நத்தி² ஹேதூ’’திஆதி³வஸேன அனுஸ்ஸவூபலத்³தே⁴ அத்தே² ததா³காரபரிவிதக்கனேஹி ஸவிக்³க³ஹே விய ஸரூபதோ சித்தஸ்ஸ பச்சுபட்டி²தே சிரகாலபரிசயேன ஏவமேதந்தி நிஜ்ஜா²னக்க²மபா⁴வூபக³மனேன நிஜ்ஜா²னக்க²ந்தியா ததா²க³ஹிதே புனப்புனம் ததே²வ ஆஸேவந்தஸ்ஸ ப³ஹுலீகரோந்தஸ்ஸ மிச்சா²விதக்கேன ஸமானீயமானா மிச்சா²வாயாமோபத்த²ம்பி⁴தா அதம்ஸபா⁴வம் தம்ஸபா⁴வந்தி க³ண்ஹந்தீ மிச்சா²ஸதீதி லத்³த⁴னாமா தம்லத்³தி⁴ஸஹக³தா தண்ஹா ஸந்திட்ட²தி. சித்தம் ஏகக்³க³ம் ஹோதீதி யதா²வுத்தவிதக்காதி³பச்சயலாபே⁴ன தஸ்மிம் ஆரம்மணே அவட்டி²ததாய அனேகக்³க³தம் பஹாய சித்தம் ஏகக்³க³ம் அப்பிதம் விய ஹோதி மிச்சா²ஸமாதி⁴னா. ஸோபி ஹி பச்சயவிஸேஸேன லத்³த⁴பா⁴வனாப³லோ கதா³சி ஸமாதா⁴னபடிரூபகிச்சகரோ ஹோதியேவ பஹரணவிஜ்ஜ²னாதீ³ஸு வியாதி த³ட்ட²ப்³ப³ம்.

ஜவனானி ஜவந்தீதி அனேகக்க²த்தும் தேனாகாரேன புப்³ப³பா⁴கி³யேஸு ஜவனவாரேஸு பவத்தேஸு ஸப்³ப³பச்சி²மே ஜவனவாரே ஸத்த ஜவனானி ஜவந்தி. பட²மஜவனே ஸதேகிச்சோ² ஹோதி, ததா² து³தியாதீ³ஸூதி த⁴ம்மஸபா⁴வத³ஸ்ஸனமேதம், ந பன தஸ்மிம் க²ணே தேஸம் ஸதேகிச்ச²பா⁴வாபாத³னம் கேனசி ஸக்கா காதும். தத்தா²தி தேஸு தீஸு மிச்சா²த³ஸ்ஸனேஸு. கோசி ஏகம் த³ஸ்ஸனம் ஓக்கமதீதி யஸ்ஸ ஏகஸ்மிம்யேவ அபி⁴னிவேஸோ ஆஸேவனா பவத்தா, ஸோ ஏகம்யேவ த³ஸ்ஸனம் ஓக்கமதி. யஸ்ஸ த்³வீஸு தீஸுபி வா அபி⁴னிவேஸோ ஆஸேவனா பவத்தா, ஸோ த்³வே தீணி ஓக்கமதி. ஏதேன யா புப்³பே³ உப⁴யபடிபா³ஹிகதாமுகே²ன பவத்தா அத்த²ஸித்³தா⁴ ஸப்³ப³தி³ட்டி²கா, ஸா புப்³ப³பா⁴கி³யா, மிச்சா²னியாமோக்கந்தியா பன யதா²ஸகம் பச்சயஸமுதா³க³மதி³ட்டி²தோ பி⁴ன்னாரம்மணானம் விய விஸேஸாதி⁴க³மானம் ஏகஜ்ஜ²ம் அனுப்பத்தியா அபி⁴கிண்ணா ஏவாதி த³ஸ்ஸேதி. ஏகஸ்மிம் ஓக்கந்தேபி த்³வீஸு தீஸு ஓக்கந்தேஸுபி நியதமிச்சா²தி³ட்டி²கோவ ஹோதீதி இமினா திஸ்ஸன்னம்பி தி³ட்டீ²னம் ஸமானப²லதம் ஸமானப³லஞ்ச த³ஸ்ஸேதி. தஸ்மா திஸ்ஸோபி சேதனா ஏகஸ்ஸ உப்பன்னா அஞ்ஞமஞ்ஞம் அனுப³லப்பதா³யிகா ஹோந்தி.

கிம் பனேஸ ஏதஸ்மிஞ்ஞேவ அத்தபா⁴வே நியதோ, உதா³ஹு அஞ்ஞஸ்மிம்பீதி? ஏதஸ்மிஞ்ஞேவ நியதோ. அகுஸலஞ்ஹி நாமேதம் அப³லம், ந குஸலம் விய மஹாப³லம். அஞ்ஞதா² ஸம்மத்தனியாமோ விய அச்சந்திகோ ஸியா, ஆஸேவனவஸேன பன ப⁴வந்தரேபி தம் தம் தி³ட்டி²ம் ரோசேதியேவ. தேனேவாஹ ‘‘வட்டகா²ணுகோ நாமேஸ ஸத்தோ’’தி. தஸ்மா ‘‘ஸகிம் நிமுக்³கோ³ நிமுக்³கோ³ ஏவ பா³லோ’’தி விய வட்டகா²ணுஜோதனா, யாதி³ஸேஹி பன பச்சயேஹி அயம் தம் த³ஸ்ஸனம் ஓக்கந்தோ புன கதா³சி மிச்ச²த்தனியாமோ தப்படிக்கே²பபச்சயே படிச்ச ததோ ஸீஸுக்கே²பனமஸ்ஸ ந ஹோதீதி ந வத்தப்³ப³ம். தேன வுத்தம் ‘‘யேபு⁴ய்யேனா’’தி. ஏதி³ஸாதி ‘‘பு³த்³தா⁴னம்பி அதேகிச்சா²’’திஆதி³னா வுத்தஸதி³ஸா.

அத்தனோ நிந்தா³ப⁴யேனாதி ‘‘ஸம்மா தி³ட்டி²ஞ்ச நாம தே க³ரஹந்தீ’’திஆதி³னா அத்தனோ உபரி பரேஹி வத்தப்³ப³னிந்தா³ப⁴யேன. க⁴ட்டனப⁴யேனாதி ததா² பரேஸம் அபஸாத³னப⁴யேன. ஸஹத⁴ம்மேன பரேன அத்தனோ உபரி காதப்³ப³னிக்³க³ஹோ உபாரம்போ⁴, ததோ பரித்தாஸோ உபாரம்ப⁴ப⁴யம். தம் பன அத்த²தோ உபவாத³ப⁴யம் ஹோதீதி ஆஹ ‘‘உபவாத³ப⁴யேனா’’தி. படிப்பஸ்ஸத்³தி⁴வஸேன அபி⁴ஜ்ஜா² வினயதி ஏதேனாதி அபி⁴ஜ்ஜா²வினயோ, அரஹத்தப²லம். தேனாஹ ‘‘அபி⁴ஜ்ஜா²வினயோ வுச்சதி அரஹத்த’’ந்தி.

பரிப்³பா³ஜகஸுத்தவண்ணனா நிட்டி²தா.

உருவேலவக்³க³வண்ணனா நிட்டி²தா.