4. சக்கவக்³கோ³

1. சக்கஸுத்தவண்ணனா

31. சதுத்த²ஸ்ஸ பட²மே சத்தாரி சக்கானீதி ஏத்த² சக்கம் நாம தா³ருசக்கம், ரதனசக்கம், த⁴ம்மசக்கம், இரியாபத²சக்கம், ஸம்பத்திசக்கந்தி பஞ்சவித⁴ம். தத்த² ‘‘யம் பனித³ம், ஸம்ம, ரத²காரசக்கம் ச²ஹி மாஸேஹி நிட்டி²தம் சா²ரத்தூனேஹீ’’தி (அ. நி. 3.15) இத³ம் தா³ருசக்கம். ‘‘பிதரா பவத்திதம் சக்கம் அனுவத்தேதீ’’தி (ஸம். நி. 1.215) இத³ம் ரதனசக்கம். ‘‘மயா பவத்திதம் சக்க’’ந்தி (ஸு. நி. 562; பு³. வம். 27.17; ஜா. 1.1.104; 1.5.100, 103) இத³ம் த⁴ம்மசக்கம். ‘‘சதுசக்கம் நவத்³வார’’ந்தி (ஸம். நி. 1.29, 109) இத³ம் இரியாபத²சக்கம். ‘‘சத்தாரிமானி, பி⁴க்க²வே, சக்கானி யேஹி ஸமன்னாக³தானம் தே³வமனுஸ்ஸானம் சதுசக்கம் பவத்ததீ’’தி (அ. நி. 4.31) இத³ம் ஸம்பத்திசக்கம். இதா⁴பி ஏததே³வ அதி⁴ப்பேதந்தி ஆஹ ‘‘சத்தாரி ஸம்பத்திசக்கானி வத்தந்தீ’’தி. அனுச்ச²விகே தே³ஸேதி புஞ்ஞகிரியாய ஸம்மாபடிபத்தியா அனுரூபதே³ஸே. ஸேவனம் காலேன காலம் உபஸங்கமனம். ப⁴ஜனம் ப⁴த்திவஸேன பயிருபாஸனம். அத்தனோ ஸம்மா ட²பனந்தி அத்தனோ சித்தஸந்தானஸ்ஸ யோனிஸோ ட²பனம். ஸத்³தா⁴தீ³ஸு நிவேஸனந்தி ஆஹ ‘‘ஸசே’’திஆதி³. இத³மேவ சேத்த² பமாணந்தி இத³மேவ புப்³பே³கதபுஞ்ஞதாஸங்கா²தம் ஸம்பத்திசக்கம் ஏவ ஏதேஸு ஸம்பத்திசக்கேஸு பமாணபூ⁴தம் இதரேஸம் காரணபா⁴வதோ. தேனாஹ ‘‘யேன ஹீ’’திஆதி³. ஸோ ஏவ ச கதபுஞ்ஞோ புக்³க³லோ அத்தானம் ஸம்மா ட²பேதி அகதபுஞ்ஞஸ்ஸ தத³பா⁴வதோ.

சக்கஸுத்தவண்ணனா நிட்டி²தா.

2. ஸங்க³ஹஸுத்தவண்ணனா

32. து³தியே தஸ்ஸ தா³னமேவ தா³தப்³ப³ந்தி பப்³ப³ஜிதஸ்ஸ பப்³ப³ஜிதபரிக்கா²ரம் பத்தசீவராதி³, கி³ஹினோ கி³ஹிபரிக்கா²ரம் வத்தா²வுத⁴யானஸயனாதி³ தா³தப்³ப³ம். ஸப்³ப³ந்தி ஸப்³ப³ம் உபகாரம். மக்கே²த்வா நாஸேதி மக்கி²பா⁴வே ட²த்வா. தேலேன விய மக்கே²தீதி ஸததோ⁴ததேலேன மக்கே²தி விய. அத்த²வட்³ட⁴னகதா²தி ஹிதாவஹகதா². கதா²க³ஹணஞ்சேத்த² நித³ஸ்ஸனமத்தம், பரேஸம் ஹிதாவஹோ காயப்பயோகோ³பி அத்த²சரியா. அட்ட²கதா²யம் பன வசிப்பயோக³வஸேனேவ அத்த²சரியா வுத்தா. ஸமானத்ததாதி ஸதி³ஸபா⁴வோ, ஸமானட்டா²னே ட²பனம், தம் பனஸ்ஸ ஸமானட்ட²பனம் அத்தஸதி³ஸதாகரணமுகே²ன ஏகஸம்போ⁴க³தா. அத்தனோ ஸுகு²ப்பத்தியம் தஸ்ஸ ச து³க்கு²ப்பத்தியம் தேன து³க்கே²ன அத்தனா ஏகஸம்போ⁴க³தாதி ஆஹ ‘‘ஸமானஸுக²து³க்க²பா⁴வோ’’தி. ஸா ச ஸமானஸுக²து³க்க²தா ஏகதோ நிஸஜ்ஜாதி³னா பாகடா ஹோதீதி த³ஸ்ஸேந்தோ ‘‘ஏகாஸனே’’திஆதி³மாஹ.

தத்த² ஜாதியா ஹீனோ போ⁴கே³ன அதி⁴கோ து³ஸ்ஸங்க³ஹோ ஹோதி. ந ஹி ஸக்கா தேன ஸத்³தி⁴ம் ஏகபரிபோ⁴கோ³ காதும் ஜாதியா ஹீனத்தா. தஸ்ஸ ததா² அகரியமானே ச ஸோ குஜ்ஜ²தி போ⁴கே³ன அதி⁴கத்தா, தஸ்மா ஸோ து³ஸ்ஸங்க³ஹோ. போ⁴கே³ன ஹீனோ ஜாதியா அதி⁴கோபி து³ஸ்ஸங்க³ஹோ ஹோதி. ஸோ ஹி ‘‘அஹம் ஜாதிமா’’தி போ⁴க³ஸம்பன்னேன ஸத்³தி⁴ ஏகபரிபோ⁴க³ம் இச்ச²தி, தஸ்மிம் அகரியமானே குஜ்ஜ²தி. உபோ⁴ஹிபி ஹீனோ ஸுஸங்க³ஹோ ஹோதி. ந ஹி ஸோ இதரேன ஸத்³தி⁴ம் ஏகபரிபோ⁴க³ம் இச்ச²தி ஜாதியா ஹீனபா⁴வதோ, ந அகரியமானோ குஜ்ஜ²தி போ⁴கே³ன ஹீனபா⁴வதோ. உபோ⁴ஹி ஸதி³ஸோபி ஸுஸங்க³ஹோயேவ. ஸதி³ஸபா⁴வேனேவ இதரேன ஸஹ ஏகபரிபோ⁴க³ஸ்ஸ பச்சாஸீஸாய, அகரணே ச தஸ்ஸ குஜ்ஜ²னஸ்ஸ அபா⁴வதோ. பி⁴க்கு² து³ஸ்ஸீலோ து³ஸ்ஸங்க³ஹோ ஹோதி. ந ஹி ஸக்கா தேன ஸத்³தி⁴ம் ஏகபரிபோ⁴க³ம் காதும், அகரியமானே ச குஜ்ஜ²தி. ஸீலவா பன ஸுஸங்க³ஹோ ஹோதி. ஸீலவா ஹி அதீ³யமானேபி கிஸ்மிஞ்சி ஆமிஸே அகரியமானேபி ஸங்க³ஹே ந குஜ்ஜ²தி, அஞ்ஞம் அத்தனா ஸத்³தி⁴ம் பரிபோ⁴க³ம் அகரோந்தம்பி ந பாபகேன சித்தேன பஸ்ஸதி பேஸலபா⁴வதோ. ததோ ஏவ பரிபோ⁴கோ³பி அனேன ஸத்³தி⁴ம் ஸுகரோ ஹோதி, தஸ்மா கி³ஹி சே, உபோ⁴ஹி ஸதி³ஸோ. பப்³ப³ஜிதோ சே, ஸீலவா புக்³க³லோ. ஏவம் ஸமானத்ததாய ஸங்க³ஹேதப்³போ³. தேனேவாஹ ‘‘ஸோ ஸசே க³ஹட்ட²ஸ்ஸ ஜாதியா பப்³ப³ஜிதஸ்ஸ ஸீலேன ஸதி³ஸோ ஹோதி, தஸ்ஸாயம் ஸமானத்ததா காதப்³பா³’’தி. ஸேஸம் ஸுவிஞ்ஞேய்யமேவ.

ஸங்க³ஹஸுத்தவண்ணனா நிட்டி²தா.

3. ஸீஹஸுத்தவண்ணனா

33. ததியே ஸீஹோதி பரிஸ்ஸயஸஹனதோ படிபக்க²ஹனனதோ ச ‘‘ஸீஹோ’’தி லத்³த⁴னாமோ மிகா³தி⁴பதி. சத்தாரோதி ஸமானேபி ஸீஹஜாதிபா⁴வே வண்ணவிஸேஸாதி³ஸித்³தே⁴ன விஸேஸேன சத்தாரோ ஸீஹா. தே இதா³னி நாமதோ வண்ணதோ ஆஹாரதோ த³ஸ்ஸேத்வா இதா⁴தி⁴ப்பேதஸீஹம் நானப்பகாரதோ விபா⁴வேதும் ‘‘திணஸீஹோ’’திஆதி³ ஆரத்³த⁴ம். திணப⁴க்கோ² ஸீஹோ திணஸீஹோ புரிமபதே³ உத்தரபத³லோபேன யதா² ‘‘ஸாகபத்தி²வோ’’தி (பாணினி 2.1.60). காளவண்ணதாய காளஸீஹோ. ததா² பண்டு³ஸீஹோ. தேனாஹ ‘‘காளகா³விஸதி³ஸோ, பண்டு³பலாஸவண்ணகா³விஸதி³ஸோ’’தி ச. ரத்தகம்ப³லஸ்ஸ விய கேஸரோ கேஸரகலோமோ ஏதஸ்ஸ அத்தீ²தி கேஸரீ. லாகா²பரிகம்மகதேஹி விய பாத³பரியந்தேஹீதி ச யோஜனா.

கம்மானுபா⁴வஸித்³த⁴அதி⁴பச்சமஹேஸக்க²தாஹி ஸப்³ப³மிக³க³ணஸ்ஸ ராஜா. ஸுவண்ணகு³ஹதோ வாதிஆதி³ ‘‘ஸீஹஸ்ஸ விஹாரோ கிரியா ஏவம் ஹோதீ’’தி கத்வா வுத்தம்.

ஸமம் பதிட்டா²பேத்வாதி ஸப்³ப³பா⁴கே³ஹி ஸமமேவ பூ⁴மியம் பதிட்டா²பேத்வா. ஆகட்³டி⁴த்வாதி புரதோ ஆகட்³டி⁴த்வா. அபி⁴ஹரித்வாதி அபி⁴முக²ம் ஹரித்வா. ஸங்கா⁴தந்தி வினாஸம். வீஸதியட்டி²கம் டா²னம் உஸப⁴ம்.

ஸமஸீஹோதி ஸமஜாதிகோ ஸமப்பபா⁴வோ ச ஸீஹோ. ஸமானோஸ்மீதி தே³ஸனாமத்தம், ஸமப்பபா⁴வதாய ஏவ ந பா⁴யதி. ஸக்காயதி³ட்டி²ப³லவதாயாதி ‘‘கே அஞ்ஞே அம்ஹேஹி உத்தரிதரா, அத² கோ² மயமேவ மஹாப³லா’’தி ஏவம் ப³லாதிமானனிமித்தாய அஹம்காரஹேதுபூ⁴தாய ஸக்காயதி³ட்டி²யா ப³லவபா⁴வேன. ஸக்காயதி³ட்டி²யா பஹீனத்தாதி நிரஹம்காரத்தா அத்தஸினேஹஸ்ஸ ஸுட்டு² ஸமுக்³கா⁴தத்தா ந பா⁴யதி.

ததா² ததா²தி ஸீஹஸதி³ஸதாதி³னா தேன தேன பகாரேன அத்தானம் கதே²ஸீதி வத்வா தமத்த²ம் விவரித்வா த³ஸ்ஸேதும் ‘‘ஸீஹோதி கோ²’’திஆதி³ வுத்தம்.

கதமஹாபி⁴னீஹாரஸ்ஸ லோகனாத²ஸ்ஸ போ³தி⁴யா நியதபா⁴வப்பத்தியா ஏகந்தபா⁴வீ பு³த்³த⁴பா⁴வோதி கத்வா ‘‘தீஸு பாஸாதே³ஸு நிவாஸகாலோ, மக³த⁴ரஞ்ஞோ படிஞ்ஞாதா³னகாலோ, பாயாஸஸ்ஸ பரிபு⁴த்தகாலோ’’திஆதி³னா அபி⁴ஸம்போ³தி⁴தோ புரிமாவத்தா²பி ஸீஹஸதி³ஸா கத்வா த³ஸ்ஸிதா. பா⁴வினி பூ⁴தூபசாரோபி ஹி லோகவோஹாரோ. விஜ்ஜாபா⁴வஸாமஞ்ஞதோ த்³விவிஜ்ஜம் இதரவிஜ்ஜம்பி ஏகஜ்ஜ²ம் க³ஹேத்வா படிச்சஸமுப்பாத³ஸம்மஸனதோ தம் புரேதரஸித்³த⁴ம் விய கத்வா ஆஹ ‘‘திஸ்ஸோ விஜ்ஜா ஸோதே⁴த்வா’’தி. அனுலோமபடிலோமதோ பவத்தஞாணஸ்ஸ வஸேன ‘‘யமகஞாணமந்த²னேனா’’தி வுத்தம்.

தத்த² விஹரந்தஸ்ஸாதி அஜபாலனிக்³ரோத⁴மூலே விஹரந்தஸ்ஸ. ஏகாத³ஸமே தி³வஸேதி ஸத்தஸத்தாஹதோ பரம் ஏகாத³ஸமே தி³வஸே. அசலபல்லங்கேதி இஸிபதனே த⁴ம்மசக்கப்பவத்தனத்த²ம் நிஸின்னபல்லங்கே. தம்பி ஹி கேனசி அப்படிவத்தியம் த⁴ம்மசக்கப்பவத்தனத்த²ம் நிஸஜ்ஜாதி கத்வா வஜிராஸனம் விய அசலபல்லங்கம் வுச்சதி. இமஸ்மிஞ்ச பன பதே³தி ‘‘த்³வேமே, பி⁴க்க²வே, அந்தா’’திஆதி³னயப்பவத்தே ச இமஸ்மிம் ஸத்³த⁴ம்மகோட்டா²ஸே. த⁴ம்மகோ⁴ஸோ…பே… த³ஸஸஹஸ்ஸிலோகதா⁴தும் படிச்சா²தே³ஸி ‘‘ஸப்³ப³த்த² டி²தா ஸுணந்தூ’’தி அதி⁴ட்டா²னேன. ஸோளஸஹாகாரேஹீதி து³க்க²பரிஞ்ஞா, ஸமுத³யப்பஹானம், நிரோத⁴ஸச்சி²கிரியா, மக்³க³பா⁴வனாதி ஏகேகஸ்மிம் மக்³கே³ சத்தாரி சத்தாரி கத்வா ஸோளஸஹி ஆகாரேஹி.

பட²மேன நயேன அபி⁴ஸம்போ³தி⁴தோ புரிமதராவத்தா²பி அவஸ்ஸம்பா⁴விதாய க³ஹேத்வா ஸீஹஸதி³ஸதம் த³ஸ்ஸேத்வா இதா³னி அபி⁴ஸம்பு³த்³தா⁴வத்தா²ஸு ஏவ ஸீஹஸதி³ஸதம் த³ஸ்ஸேதும் ‘‘அபரோ நயோ’’திஆதி³ ஆரத்³த⁴ம். அட்ட²ஹி காரணேஹீதி ‘‘ததா² ஆக³தோதி ததா²க³தோ, ததா² க³தோதி ததா²க³தோ, தத²லக்க²ணம் ஆக³தோதி ததா²க³தோ, தத²த⁴ம்மே யாதா²வதோ அபி⁴ஸம்பு³த்³தோ⁴தி ததா²க³தோ, தத²த³ஸ்ஸிதாய ததா²க³தோ, தத²வாதி³தாய ததா²க³தோ, ததா²காரிதாய ததா²க³தோ, அபி⁴ப⁴வனட்டே²ன ததா²க³தோ’’தி (தீ³. நி. அட்ட². 1.7; ம. நி. அட்ட². 1.12; ஸம். நி. அட்ட². 2.3.78; அ. நி. அட்ட². 1.1.170; உதா³. அட்ட². 18; இதிவு. அட்ட². 38; தே²ரகா³. அட்ட². 1.3; பு³. வம். அட்ட². 1.2 நிதா³னகதா²; மஹானி. அட்ட². 14; படி. ம. 1.37) ஏவம் வுத்தேஹி அட்ட²ஹி ததா²க³தஸாத⁴கேஹி காரணேஹி. யதி³பி ப⁴க³வா போ³தி⁴பல்லங்கே நிஸின்னமத்தேவ அபி⁴ஸம்பு³த்³தோ⁴ ந ஜாதோ, ததா²பி தாய நிஸஜ்ஜாய நிஸின்னோவ பனுஜ்ஜ ஸப்³ப³ம் பரிஸ்ஸயம் அபி⁴ஸம்பு³த்³தோ⁴ ஜாதோ. ததா² ஹி தம் ‘‘அபராஜிதபல்லங்க’’ந்தி வுச்சதி, தஸ்மா ‘‘யாவ போ³தி⁴பல்லங்கா வா’’தி வத்வா தேன அபரிதுஸ்ஸந்தோ ‘‘யாவ அரஹத்தமக்³க³ஞாணா வா’’தி ஆஹ.

இதி ஸக்காயோதி ஏத்த² இதிஸத்³தோ³ நித³ஸ்ஸனத்தோ². தேன ஸக்காயோ ஸரூபதோ பரிமாணதோ பரிச்சே²த³தோ ச த³ஸ்ஸிதோதி ஆஹ ‘‘அயம் ஸக்காயோ’’திஆதி³. ‘‘அயம் ஸக்காயோ’’தி இமினா பஞ்சுபாதா³னக்க²ந்தா⁴ ஸரூபதோ த³ஸ்ஸிதா. ‘‘ஏத்தகோ ஸக்காயோ’’தி இமினா தே பரிமாணதோ த³ஸ்ஸிதா. தஸ்ஸ ச பரிமாணஸ்ஸ ஏகந்திகபா⁴வம் த³ஸ்ஸேந்தேன ‘‘ந இதோ பி⁴ய்யோ ஸக்காயோ அத்தீ²’’தி வுத்தம். ஸபா⁴வதோதி ஸலக்க²ணதோ. ஸரஸதோதி ஸகிச்சதோ. பரியந்ததோதி பரிமாணபரியந்ததோ. பரிச்சே²த³தோதி யத்தகே டா²னே தஸ்ஸ பவத்திதஸ்ஸ பரிச்சி²ந்த³னதோ. பரிவடுமதோதி பரியோஸானப்பவத்திதோ. ஸப்³பே³பி பஞ்சுபாதா³னக்க²ந்தா⁴ த³ஸ்ஸிதா ஹோந்தி யதா²வுத்தேன விபா⁴கே³ன. அயம் ஸக்காயஸ்ஸ ஸமுத³யோ நாமாதி அயம் ஆஹாராதி³ஸக்காயஸ்ஸ ஸமுத³யோ நாம. தேனாஹ ‘‘ஏத்தாவதா’’திஆதி³. அத்த²ங்க³மோதி நிரோதோ⁴. ‘‘ஆஹாரஸமுத³யா ஆஹாரனிரோதா⁴’’தி ச அஸாதா⁴ரணமேவ தம் க³ஹேத்வா ஸேஸேஸு ஆதி³-ஸத்³தே³ன ஸங்க³ண்ஹாதி.

பண்ணாஸலக்க²ணபடிமண்டி³தந்தி பண்ணாஸஉத³யவயலக்க²ணவிபூ⁴ஸிதம் ஸமுத³யத்த²ங்க³மக்³க³ஹணதோ. கீ²ணாஸவத்தாதி அனவஸேஸம் ஸாவஸேஸஞ்ச ஆஸவானம் பரிக்கீ²ணத்தா. அனாகா³மீனம்பி ஹி ப⁴யம் சித்துத்ராஸஞ்ச ந ஹோதீதி. ஞாணஸம்வேகோ³ ப⁴யதுபட்டா²னபஞ்ஞா. இதராஸம் பன தே³வதானந்தி அகீ²ணாஸவதே³வே ஸந்தா⁴ய வத³தி. போ⁴தி த⁴ம்மாலபனமத்தந்தி ஸபா⁴வகத²னமத்தம்.

சக்கந்தி ஸத்து² ஆணாசக்கம். தம் பன த⁴ம்மதோ ஆக³தந்தி த⁴ம்மசக்கம். தத்த² அரியஸாவகானம் படிவேத⁴த⁴ம்மதோ ஆக³தந்தி த⁴ம்மசக்கம். இதரேஸம் தே³ஸனாத⁴ம்மதோ ஆக³தந்தி த⁴ம்மசக்கம். து³விதே⁴பி ஞாணம் பதா⁴னந்தி ஞாணஸீஸேன வுத்தம் ‘‘படிவேத⁴ஞாணம்பி தே³ஸனாஞாணம்பீ’’தி. இதா³னி தம் ஞாணம் ஸரூபதோ த³ஸ்ஸேதும் ‘‘படிவேத⁴ஞாணம் நாமா’’திஆதி³ வுத்தம். யஸ்மா தஸ்ஸ ஞாணஸ்ஸ படிவித்³த⁴த்தா ப⁴க³வா தானி ஸட்டி² நயஸஹஸ்ஸானி வேனேய்யானம் த³ஸ்ஸேதும் ஸமத்தோ² அஹோஸி, தஸ்மா தானி ஸட்டி² நயஸஹஸ்ஸானி தேன ஞாணேன ஸத்³தி⁴ம்யேவ ஸித்³தா⁴னீதி கத்வா த³ஸ்ஸேந்தோ ‘‘ஸட்டி²யா ச நயஸஹஸ்ஸேஹி படிவிஜ்ஜீ²’’தி ஆஹ. திபரிவட்டந்தி ‘‘இத³ம் து³க்க²’’ந்தி ச ‘‘பரிஞ்ஞேய்ய’’ந்தி ச ‘‘பரிஞ்ஞாத’’ந்தி ச ஏவம் திபரிவட்டம், தம்யேவ த்³வாத³ஸாகாரம். தந்தி தே³ஸனாஞாணம். ஏஸ ப⁴க³வா. அப்படிபுக்³க³லோதி படினிதி⁴பூ⁴தபுக்³க³லரஹிதோ. ஏகஸதி³ஸஸ்ஸாதி நிப்³பி³காரஸ்ஸ.

ஸீஹஸுத்தவண்ணனா நிட்டி²தா.

4. அக்³க³பஸாத³ஸுத்தவண்ணனா

34. சதுத்தே² அக்³கே³ஸு பஸாதா³தி ஸேட்டே²ஸு பஸாதா³. அக்³கா³ வா பஸாதா³தி ஸேட்ட²பூ⁴தா பஸாதா³. ஸேட்ட²வசனோ ஹேத்த² அக்³க³ஸத்³தோ³. புரிமஸ்மிம் அத்த²விகப்பே அக்³க³ஸத்³தே³ன பு³த்³தா⁴தி³ரதனத்தயம் வுச்சதி. தேஸு ப⁴க³வா தாவ அஸதி³ஸட்டே²ன, கு³ணவிஸிட்ட²ட்டே²ன, அஸமஸமட்டே²ன ச அக்³கோ³. ஸோ ஹி மஹாபி⁴னீஹாரம் த³ஸன்னம் பாரமீனம் பவிசயஞ்ச ஆதி³ம் கத்வா போ³தி⁴ஸம்பா⁴ரகு³ணேஹி சேவ பு³த்³த⁴கு³ணேஹி ச பயோஜனேஹி ச ஸேஸஜனேஹி அஸதி³ஸோதி அஸதி³ஸட்டே²னபி அக்³கோ³. யே சஸ்ஸ தே கு³ணா மஹாகருணாத³யோ, தேஹி ஸேஸஸத்தானம் கு³ணேஹி விஸிட்ட²ட்டே²னபி ஸப்³ப³ஸத்துத்தமதாய அக்³கோ³. யே பன புரிமகா ஸம்மாஸம்பு³த்³தா⁴ ஸப்³ப³ஸத்தேஹி அஸமா, தேஹி ஸத்³தி⁴ம் அயமேவ ரூபகாயகு³ணேஹி சேவ த⁴ம்மகாயகு³ணேஹி ச ஸமோதி அஸமஸமட்டே²னபி அக்³கோ³. ததா² து³ல்லப⁴பாதுபா⁴வதோ அச்ச²ரியமனுஸ்ஸபா⁴வதோ ப³ஹுஜனஹிதஸுகா²வஹதோ அது³தியஅஸஹாயாதி³பா⁴வதோ ச ப⁴க³வா லோகே அக்³கோ³தி வுச்சதி. யதா²ஹ –

‘‘ஏகபுக்³க³லஸ்ஸ, பி⁴க்க²வே, பாதுபா⁴வோ து³ல்லபோ⁴ லோகஸ்மிம். கதமஸ்ஸ ஏகபுக்³க³லஸ்ஸ? ததா²க³தஸ்ஸ அரஹதோ ஸம்மாஸம்முத்³த⁴ஸ்ஸ. ஏகபுக்³க³லோ, பி⁴க்க²வே, லோகே உப்பஜ்ஜமானோ உப்பஜ்ஜதி அச்ச²ரியமனுஸ்ஸோ. ஏகபுக்³க³லோ, பி⁴க்க²வே, லோகே உப்பஜ்ஜமானோ உப்பஜ்ஜதி ப³ஹுஜன…பே… ஸம்மாஸம்பு³த்³தோ⁴. ஏகபுக்³க³லோ, பி⁴க்க²வே, லோகே உப்பஜ்ஜமானோ உப்பஜ்ஜதி அது³தியோ அஸஹாயோ அப்படிமோ அப்படிபா⁴கோ³ அப்படிபுக்³க³லோ அஸமோ அஸமஸமோ த்³விபதா³னம் அக்³கோ³. கதமோ ஏகபுக்³க³லோ? ததா²க³தோ அரஹம் ஸம்மாஸம்பு³த்³தோ⁴’’தி (அ. நி. 1.171-173).

த⁴ம்மஸங்கா⁴ அஞ்ஞத⁴ம்மஸங்கே⁴ஹி அஸதி³ஸட்டே²ன விஸிட்ட²கு³ணதாய து³ல்லப⁴பாதுபா⁴வாதி³னா ச அக்³கா³. ததா² ஹி தேஸம் ஸ்வாக்கா²ததாதி³ஸுப்படிபன்னதாதி³கு³ணவிஸேஸேஹி அஞ்ஞே த⁴ம்மஸங்க⁴ஸதி³ஸா அப்பதரம் நிஹீனா வா நத்தி², குதோ ஸேட்டா². ஸயமேவ தேஹி விஸிட்ட²கு³ணதாய ஸேட்டா². ததா² து³ல்லபு⁴ப்பாத³அச்ச²ரியபா⁴வப³ஹுஜனஹிதஸுகா²வஹஅது³தியாஸஹாயாதி³ஸபா⁴வா ச தே. யத³க்³கே³ன ஹி ப⁴க³வா து³ல்லப⁴பாதுபா⁴வோ, தத³க்³கே³ன த⁴ம்மஸங்கா⁴பீதி. அச்ச²ரியாதீ³ஸுபி ஏஸேவ நயோ. ஏவம் அக்³கே³ஸு ஸேட்டே²ஸு உத்தமேஸு பவரேஸு கு³ணவிஸிட்டே²ஸு பஸாதா³தி அக்³க³ப்பஸதா³.

து³தியஸ்மிம் பனத்தே² யதா²வுத்தேஸு அக்³கே³ஸு பு³த்³தா⁴தீ³ஸு உப்பத்தியா அக்³க³பூ⁴தா பஸாதா³ அக்³க³ப்பஸாதா³. யே பன அரியமக்³கே³ன ஆக³தா அவேச்சப்பஸாதா³, தே ஏகந்தேனேவ அக்³க³பூ⁴தா பஸாதா³தி அக்³க³ப்பஸாதா³. யதா²ஹ – ‘‘இத⁴, பி⁴க்க²வே, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதீ’’திஆதி³ (ஸம். நி. 5.1037-1038). அக்³க³விபாகத்தாபி சேதே அக்³க³ப்பஸாதா³. வுத்தம்பி சேதம் – ‘‘அக்³கே³ கோ² பன பஸன்னானம் அக்³கோ³ விபாகோ’’தி (அ. நி. 4.34; இதிவு. 90).

அபதா³ வாதிஆதீ³ஸு வா-ஸத்³தோ³ ஸமுச்சயத்தோ², ந விகப்பத்தோ². யதா² ‘‘அனுப்பன்னோ வா காமாஸவோ உப்பஜ்ஜதி, உப்பன்னோ வா காமாஸவோ பவட்³ட⁴தீ’’தி (ம. நி. 1.17) ஏத்த² அனுப்பன்னோ ச உப்பன்னோ சாதி அத்தோ². யதா² ச ‘‘பூ⁴தானம் வா ஸத்தானம் டி²தியா ஸம்ப⁴வேஸீனம் வா அனுக்³க³ஹாயா’’தி ஏத்த² பூ⁴தானஞ்ச ஸம்ப⁴வேஸீனஞ்சாதி அத்தோ². யதா² ச ‘‘அக்³கி³தோ வா உத³கதோ வா மிது²பே⁴த³தோ வா’’தி (தீ³. நி. 2.152) ஏத்த² அக்³கி³தோ ச உத³கதோ ச மிது²பே⁴த³தோ சாதி அத்தோ², ஏவம் ‘‘அபதா³ வா…பே… அக்³க³மக்கா²யதீ’’தி (அ. நி. 4.34; இதிவு. 90) ஏத்தா²பி அபதா³ ச த்³விபதா³ சாதி ஸம்பிண்ட³னவஸேன அத்தோ² த³ட்ட²ப்³போ³. தேன வுத்தம் ‘‘வா-ஸத்³தோ³ ஸமுச்சயத்தோ², ந விகப்பத்தோ²’’தி.

ரூபினோதி ரூபவந்தோ. ந ரூபினோதி அரூபினோ. ஸஞ்ஞினோதி ஸஞ்ஞவந்தோ. ந ஸஞ்ஞினோதி அஸஞ்ஞினோ. ‘‘அபதா³ வா’’திஆதி³ஸப்³ப³பதே³ஹி காமப⁴வோ, ரூபப⁴வோ, அரூபப⁴வோ, ஏகவோகாரப⁴வோ, சதுவோகாரப⁴வோ, பஞ்சவோகாரப⁴வோ, ஸஞ்ஞிப⁴வோ, அஸஞ்ஞிப⁴வோ, நேவஸஞ்ஞினாஸஞ்ஞிப⁴வோதி நவவிதே⁴பி ப⁴வே ஸத்தேபி அனவஸேஸதோ பரியாதி³யித்வா த³ஸ்ஸேதி. ஏத்த² ஹி ரூபிக்³க³ஹணேன காமப⁴வோ, ரூபப⁴வோ, பஞ்சவோகாரப⁴வோ, ஏகவோகாரப⁴வோ ச த³ஸ்ஸிதோ, அரூபிக்³க³ஹணேன அரூபப⁴வோ, சதுவோகாரப⁴வோ ச த³ஸ்ஸிதோ, ஸஞ்ஞிப⁴வாத³யோ பன ஸரூபேனேவ த³ஸ்ஸிதா. அபதா³தி³க்³க³ஹணேன காமப⁴வபஞ்சவோகாரப⁴வஸஞ்ஞிப⁴வானம் ஏகதே³ஸோவ த³ஸ்ஸிதோ.

கஸ்மா பனேத்த² யதா² அது³தியஸுத்தே ‘‘த்³விபதா³னம் அக்³கோ³’’தி த்³விபதா³ ஏவ க³ஹிதா, ஏவம் த்³விபத³க்³க³ஹணமேவ அகத்வா அபதா³தி³க்³க³ஹணம் கதந்தி? வுச்சதே – அது³தியஸுத்தே தாவ ஸேட்ட²தரவஸேன த்³விபத³க்³க³ஹணமேவ கதம். இமஸ்மிஞ்ஹி லோகே ஸேட்டோ² நாம உப்பஜ்ஜமானோ அபத³சதுப்பத³ப³ஹுபதே³ஸு ந உப்பஜ்ஜதி, த்³விபதே³ஸுயேவ உப்பஜ்ஜதி. கதரேஸு த்³விபதே³ஸு? மனுஸ்ஸேஸு சேவ தே³வேஸு ச. மனுஸ்ஸேஸு உப்பஜ்ஜமானோ ஸகலலோகம் வஸே வத்தேதும் ஸமத்தோ² பு³த்³தோ⁴ ஹுத்வா உப்பஜ்ஜதி, தே³வேஸு உப்பஜ்ஜமானோ த³ஸஸஹஸ்ஸிலோகதா⁴தும் வஸே வத்தனகோ மஹாப்³ரஹ்மா ஹுத்வா உப்பஜ்ஜதி, ஸோ தஸ்ஸ கப்பியகாரகோ வா ஆராமிகோ வா ஸம்பஜ்ஜதி. இதி ததோபி ஸேட்ட²தரவஸேனேஸ த்³விபதா³னம் அக்³கோ³தி தத்த² வுத்தம். இத⁴ பன அனவஸேஸபரியாதா³னவஸேன ஏவம் வுத்தம் ‘‘யாவதா, பி⁴க்க²வே, ஸத்தா அபதா³ வா…பே… நேவஸஞ்ஞினாஸஞ்ஞினோ வா, ததா²க³தோ தேஸம் அக்³க³மக்கா²யதீ’’தி. நித்³தா⁴ரணே சேதம் ஸாமிவசனம். ம-காரோ பத³ஸந்தி⁴கரோ, அக்³கோ³ அக்கா²யதீதி பத³விபா⁴கோ³. தேனேவாஹ ‘‘கு³ணேஹி அக்³கோ³’’திஆதி³.

அக்³கோ³ விபாகோ ஹோதீதி அக்³கே³ ஸம்மாஸம்பு³த்³தே⁴ பஸன்னானம் யோ பஸாதோ³ அக்³கோ³ ஸேட்டோ² உத்தமகோடிபூ⁴தோ வா, தஸ்மா தஸ்ஸ விபாகோபி அக்³கோ³ ஸேட்டோ² உத்தமகோடிபூ⁴தோ உளாரதமோ பணீததமோ ஹோதி. ஸோ பன பஸாதோ³ து³விதோ⁴ லோகியலோகுத்தரபே⁴த³தோ. தேஸு லோகியஸ்ஸ தாவ –

‘‘யே கேசி பு³த்³த⁴ம் ஸரணம் க³தாஸே,

ந தே க³மிஸ்ஸந்தி அபாயபூ⁴மிம்;

பஹாய மானுஸம் தே³ஹம்,

தே³வகாயம் பரிபூரேஸ்ஸந்தி. (தீ³. நி. 2.332; இதிவு. அட்ட². 90; ஸம். நி. 1.37);

‘‘பு³த்³தோ⁴தி கித்தயந்தஸ்ஸ, காயே ப⁴வதி யா பீதி;

வரமேவ ஹி ஸா பீதி, கஸிணேனபி ஜம்பு³தீ³பஸ்ஸ. (தீ³. நி. அட்ட². 1.6; இதிவு. அட்ட². 90);

‘‘ஸதம் ஹத்தீ² ஸதம் அஸ்ஸா, ஸதம் அஸ்ஸதரீரதா²;

ஸதம் கஞ்ஞாஸஹஸ்ஸானி, ஆமுக்கமணிகுண்ட³லா;

ஏகஸ்ஸ பத³வீதிஹாரஸ்ஸ, கலம் நாக்³க⁴ந்தி ஸோளஸிம்’’. (சூளவ. 305);

‘‘ஸாது⁴ கோ², தே³வானமிந்த³, பு³த்³த⁴ம் ஸரணக³மனம் ஹோதி, பு³த்³த⁴ம் ஸரணக³மனஹேது கோ², தே³வானமிந்த³, ஏவமிதே⁴கச்சே ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி. தே அஞ்ஞே தே³வே த³ஸஹி டா²னேஹி அதி⁴க்³க³ண்ஹந்தி தி³ப்³பே³ன ஆயுனா, தி³ப்³பே³ன வண்ணேன, தி³ப்³பே³ன ஸுகே²ன, தி³ப்³பே³ன யஸேன, தி³ப்³பே³ன ஆதி⁴பதேய்யேன, தி³ப்³பே³ஹி ரூபேஹி, தி³ப்³பே³ஹி ஸத்³தே³ஹி, தி³ப்³பே³ஹி க³ந்தே⁴ஹி, தி³ப்³பே³ஹி ரஸேஹி, தி³ப்³பே³ஹி போ²ட்ட²ப்³பே³ஹீ’’தி (ஸம். நி. 4.341) –

ஏவமாதீ³னம் ஸுத்தபதா³னம் வஸேன பஸாத³ப²லவிஸேஸயோகோ³ வேதி³தப்³போ³, தஸ்மா ஸோ அபாயது³க்க²வினிவத்தனேன ஸத்³தி⁴ம் ஸம்பத்திப⁴வேஸு ஸுக²விஸேஸதா³யகோவ த³ட்ட²ப்³போ³.

லோகுத்தரோ பன ஸாமஞ்ஞப²லவிபாகதா³யகோ வட்டது³க்க²வினிவத்தகோ. ஸப்³போ³பி சாயம் பஸாதோ³ பரம்பராய வட்டது³க்க²ம் வினிவத்தேதியேவ. வுத்தஞ்ஹேதம் –

‘‘யஸ்மிம் ஸமயே, பி⁴க்க²வே, அரியஸாவகோ அத்தனோ ஸத்³த⁴ம் அனுஸ்ஸரதி, நேவஸ்ஸ தஸ்மிம் ஸமயே ராக³பரியுட்டி²தம் சித்தம் ஹோதி, ந தோ³ஸபரியுட்டி²தம்…பே… ந மோஹபரியுட்டி²தம் சித்தம் ஹோதி, உஜுக³தமேவஸ்ஸ தஸ்மிம் ஸமயே சித்தம் ஹோதி, உஜுக³தசித்தஸ்ஸ பாமோஜ்ஜம் ஜாயதி, பமுதி³தஸ்ஸ பீதி ஜாயதி…பே… நாபரம் இத்த²த்தாயாதி பஜானாதீ’’தி.

த⁴ம்மாதி ஸபா⁴வத⁴ம்மா. ஸங்க²தாதி ஸமேச்ச ஸம்பூ⁴ய பச்சயேஹி கதாதி ஸங்க²தா, ஸபச்சயா த⁴ம்மா. ஹேதூஹி பச்சயேஹி ச ந கேஹிசி கதா ஸங்க²தாதி அஸங்க²தா, அபச்சயோ நிப்³பா³னம். ஸங்க²தானம் பரியோஸிதபா⁴வேன ‘‘அஸங்க²தா’’தி புது²வசனம். விராகோ³ தேஸம் அக்³க³மக்கா²யதீதி தேஸம் ஸங்க²தாஸங்க²தத⁴ம்மானம் யோ விராக³ஸங்கா²தோ அஸங்க²தத⁴ம்மோ, ஸோ ஸபா⁴வேனேவ ஸண்ஹஸுகு²மபா⁴வதோ ஸந்ததரபணீததரபா⁴வதோ க³ம்பீ⁴ராதி³பா⁴வதோ மத³னிம்மத³னாதி³பா⁴வதோ அக்³க³ம் ஸேட்ட²ம் உத்தமம் பவரந்தி வுச்சதி. யதி³த³ந்தி நிபாதோ, யோ அயந்தி அத்தோ². மத³னிம்மத³னோதிஆதீ³னி ஸப்³பா³னி நிப்³பா³னவேவசனானி. தேனேவாஹ ‘‘விராகோ³திஆதீ³னி நிப்³பா³னஸ்ஸேவ நாமானீ’’தி. ராக³மதா³த³யோதி ஆதி³-ஸத்³தே³ன மானமத³புரிஸமதா³தி³கே ஸங்க³ண்ஹாதி. ஸப்³பா³ பிபாஸாதி காமபிபாஸாதி³கா ஸப்³பா³ பிபாஸா. ஸப்³பே³ ஆலயா ஸமுக்³கா⁴தம் க³ச்ச²ந்தீதி காமாலயாதி³கா ஸப்³பே³பி ஆலயா ஸமுக்³கா⁴தம் யந்தி. வட்டானீதி கம்மவட்டவிபாகவட்டானி. தண்ஹாதி அட்ட²ஸதப்பபே⁴தா³ ஸப்³பா³பி தண்ஹா.

அக்³கோ³ விபாகோ ஹோதீதி ஏத்தா²பி –

‘‘யே கேசி த⁴ம்மம் ஸரணம் க³தாஸே…பே…’’. (தீ³. நி. 2.332; ஸம் நி. 1.37);

‘‘த⁴ம்மோதி கித்தயந்தஸ்ஸ, காயே ப⁴வதி யா பீதி…பே…’’. (தீ³. நி. அட்ட². 1.6; இதிவு. அட்ட². 90);

‘‘ஸாது⁴ கோ², தே³வானமிந்த³, த⁴ம்மம் ஸரணக³மனம் ஹோதி, த⁴ம்மம் ஸரணக³மனஹேது கோ², தே³வானமிந்த³, ஏவமிதே⁴கச்சே…பே… தி³ப்³பே³ஹி போ²ட்ட²ப்³பே³ஹீ’’தி (ஸம். நி. 4.341) –

ஏவமாதீ³னம் ஸுத்தபதா³னம் வஸேன த⁴ம்மே பஸாத³ஸ்ஸ ப²லவிஸேஸயோகோ³ வேதி³தப்³போ³.

ஸங்கா⁴ வா க³ணா வாதி ஜனஸமூஹஸங்கா²தா யாவதா லோகே ஸங்கா⁴ வா க³ணா வா. ததா²க³தஸாவகஸங்கோ⁴தி அட்ட²அரியபுக்³க³லஸமூஹஸங்கா²தோ தி³ட்டி²ஸீலஸாமஞ்ஞேன ஸம்ஹதோ ததா²க³தஸ்ஸ ஸாவகஸங்கோ⁴. அக்³க³மக்கா²யதீதி அத்தனோ ஸீலஸமாதி⁴பஞ்ஞாவிமுத்திஆதி³கு³ணவிஸேஸேன தேஸம் ஸங்கா⁴னம் அக்³கோ³ ஸேட்டோ² உத்தமோ பவரோதி வுச்சதி. யதி³த³ந்தி யானி இமானி. சத்தாரி புரிஸயுகா³னி யுக³ளவஸேன, பட²மமக்³க³ட்டோ² பட²மப²லட்டோ²தி இத³மேகம் யுக³ளம், யாவ சதுத்த²மக்³க³ட்டோ² சதுத்த²ப²லட்டோ²தி இத³மேகம் யுக³ளந்தி ஏவம் சத்தாரி புரிஸயுகா³னி. அட்ட² புரிஸபுக்³க³லாதி புரிஸபுக்³க³லவஸேன ஏகோ பட²மமக்³க³ட்டோ², ஏகோ பட²மப²லட்டோ²தி இமினா நயேன அட்ட² புரிஸபுக்³க³லா. ஏத்த² ச புரிஸோதி வா புக்³க³லோதி வா ஏகத்தா²னி ஏதானி பதா³னி, வேனேய்யவஸேன பனேவம் வுத்தம். ஏஸ ப⁴க³வதோ ஸாவகஸங்கோ⁴தி யானிமானி யுக³ளவஸேன சத்தாரி யுகா³னி பாடியேக்கதோ அட்ட² புரிஸபுக்³க³லா, ஏஸ ப⁴க³வதோ ஸாவகஸங்கோ⁴. ஆஹுனேய்யோதிஆதீ³னி வுத்தத்தா²னேவ. இதா⁴பி –

‘‘யே கேசி ஸங்க⁴ம் ஸரணம் க³தாஸே…பே…’’. (தீ³. நி. 2.332; ஸம். நி. 1.37);

‘‘ஸங்கோ⁴தி கித்தயந்தஸ்ஸ, காயே ப⁴வதி யா பீதி…பே…’’. (தீ³. நி. அட்ட². 1.6; இதிவு. அட்ட². 90);

‘‘ஸாது⁴ கோ², தே³வானமிந்த³, ஸங்க⁴ம் ஸரணக³மனம் ஹோதி, ஸங்க⁴ம் ஸரணக³மனஹேது கோ², தே³வானமிந்த³…பே… தி³ப்³பே³ஹி போ²ட்ட²ப்³பே³ஹீ’’தி (ஸம். நி. 4.341) –

ஆதீ³னம் ஸுத்தபதா³னம் வஸேன ஸங்கே⁴ பஸாத³ஸ்ஸ ப²லவிஸேஸயோகோ³ தஸ்ஸ அக்³க³விபாகதா ச வேதி³தப்³பா³. ததா² அனுத்தரியபடிலாபோ⁴ ஸத்தமப⁴வாதி³தோ பட்டா²ய வட்டது³க்க²ஸமுச்சே²தோ³ அனுத்தரஸுகா²தி⁴க³மோதி ஏவமாதி³உளாரப²லனிப்பா²த³னவஸேன அக்³க³விபாகதா வேதி³தப்³பா³.

கா³தா²ஸு அக்³க³தோதி அக்³கே³ ரதனத்தயே, அக்³க³பா⁴வதோ வா பஸன்னானம். அக்³க³ம் த⁴ம்மந்தி அக்³க³ஸபா⁴வம் பு³த்³த⁴ஸுபோ³தி⁴ம் த⁴ம்மஸுத⁴ம்மதம் ஸங்க⁴ஸுப்படிபத்திம், ரதனத்தயஸ்ஸ அனஞ்ஞஸாதா⁴ரணம் உத்தமஸபா⁴வம், த³ஸப³லாதி³ஸ்வாக்கா²ததாதி³ஸுப்படிபன்னதாதி³கு³ணஸபா⁴வம் வா. விஜானதந்தி விஜானந்தானம். ஏவம் ஸாதா⁴ரணதோ அக்³க³ப்பஸாத³வத்து²ம் த³ஸ்ஸேத்வா இதா³னி அஸாதா⁴ரணதோ தம் விபா⁴கே³ன த³ஸ்ஸேதும் ‘‘அக்³கே³ பு³த்³தே⁴’’திஆதி³ வுத்தம். தத்த² பஸன்னானந்தி அவேச்சப்பஸாதே³ன ச இதரப்பஸாதே³ன ச பஸன்னானம் அதி⁴முத்தானம். விராகூ³பஸமேதி விராகே³ உபஸமே ச, ஸப்³ப³ஸ்ஸ ராக³ஸ்ஸ ஸப்³பே³ஸம் கிலேஸானம் அச்சந்தவிராக³ஹேதுபூ⁴தே அச்சந்தஉபஸமஹேதுபூ⁴தே சாதி அத்தோ². ஸுகே²தி வட்டது³க்க²க்க²யபா⁴வேன ஸங்கா²ரூபஸமஸுக²பா⁴வேன ஸுகே².

அக்³க³ஸ்மிம் தா³னம் த³த³தந்தி அக்³கே³ ரதனத்தயே தா³னம் த³த³ந்தானம் தே³ய்யத⁴ம்மம் பரிச்சஜந்தானம். தத்த² த⁴ரமானம் ப⁴க³வந்தம் சதூஹி பச்சயேஹி உபட்ட²ஹந்தா பூஜேந்தா ஸக்கரோந்தா, பரினிப்³பு³தம் ப⁴க³வந்தம் உத்³தி³ஸ்ஸ தா⁴துசேதியாதி³கே உபட்ட²ஹந்தா பூஜேந்தா ஸக்கரோந்தா பு³த்³தே⁴ தா³னம் த³த³ந்தி நாம. ‘‘த⁴ம்மம் பூஜேஸ்ஸாமா’’தி த⁴ம்மத⁴ரே புக்³க³லே சதூஹி பச்சயேஹி உபட்ட²ஹந்தா பூஜேந்தா ஸக்கரோந்தா த⁴ம்மஞ்ச சிரட்டி²திகம் கரோந்தா த⁴ம்மே தா³னம் த³த³ந்தி நாம. ததா² அரியஸங்க⁴ம் சதூஹி பச்சயேஹி உபட்ட²ஹந்தா பூஜேந்தா ஸக்கரோந்தா தம் உத்³தி³ஸ்ஸ இதரஸ்மிம்பி ததா² படிபஜ்ஜந்தா ஸங்கே⁴ தா³னம் த³த³ந்தி நாம. அக்³க³ம் புஞ்ஞம் பவட்³ட⁴தீதி ஏவம் ரதனத்தயே பஸன்னேன சேதஸா உளாரம் பரிச்சாக³ம் உளாரஞ்ச பூஜாஸக்காரம் பவத்தேந்தானம் தி³வஸே தி³வஸே அக்³க³ம் உளாரம் குஸலம் உபசீயதி. இதா³னி தஸ்ஸ புஞ்ஞஸ்ஸ அக்³க³விபாகதாய அக்³க³பா⁴வம் த³ஸ்ஸேதும் ‘‘அக்³க³ம் ஆயூ’’திஆதி³ வுத்தம். தத்த² ஆயூதி தி³ப்³ப³ம் வா மானுஸம் வா அக்³க³ம் உளாரம் பரமம் ஆயு பவட்³ட⁴தி உபரூபரி ப்³ரூஹதி. வண்ணோதி ரூபஸம்பதா³. யஸோதி பரிவாரஸம்பதா³. கித்தீதி து²திகோ⁴ஸோ. ஸுக²ந்தி காயிகம் சேதஸிகஞ்ச ஸுக²ம். ப³லந்தி காயப³லஞ்சேவ ஞாணப³லஞ்ச.

அக்³க³ஸ்ஸ ரதனத்தயஸ்ஸ தா³னம் தா³தா. அத² வா அக்³க³ஸ்ஸ தே³ய்யத⁴ம்மஸ்ஸ தா³னம் உளாரம் கத்வா தத்த² புஞ்ஞம் பவத்தேதா. அக்³க³த⁴ம்மஸமாஹிதோதி அக்³கே³ன பஸாத³த⁴ம்மேன தா³னாதி³த⁴ம்மேன ச ஸம்ஹிதோ ஸமன்னாக³தோ அசலப்பஸாத³யுத்தோ, தஸ்ஸ வா விபாகபூ⁴தேஹி ப³ஹுஜனஸ்ஸ பியமனாபதாதி³த⁴ம்மேஹி யுத்தோ. அக்³க³ப்பத்தோ பமோத³தீதி யத்த² யத்த² ஸத்தனிகாயே உப்பன்னோ, தத்த² தத்த² அக்³க³பா⁴வம் ஸேட்ட²பா⁴வம் அதி⁴க³தோ, அக்³க³பா⁴வம் வா லோகுத்தரமக்³க³ப²லம் அதி⁴க³தோ பமோத³தி அபி⁴ரமதி பரிதுஸ்ஸதீதி.

அக்³க³பஸாத³ஸுத்தவண்ணனா நிட்டி²தா.

5. வஸ்ஸகாரஸுத்தவண்ணனா

35. பஞ்சமே அரியே ஞாயேதி ஸம்கிலேஸதோ ஆரகத்தா அரியே நித்³தோ³ஸே பரிஸுத்³தே⁴ நிய்யானிகத⁴ம்மபா⁴வதோ ஞாயே காரணேதி அத்தோ². ஞாயதி நிச்ச²யேன கமதி நிப்³பா³னம், தம் வா ஞாயதி படிவிஜ்ஜீ²யதி ஏதேனாதீ ஞாயோ, அரியமக்³கோ³. ஸோ ஏவ ச ஸம்பாபகஹேதுபா⁴வதோ காரணந்தி வுச்சதி. இத⁴ பன ஸஹ விபஸ்ஸனாய அரியமக்³கோ³ அதி⁴ப்பேதோதி ஆஹ ‘‘ஸஹவிபஸ்ஸனகே மக்³கே³’’தி. கா³தா²ஸு ‘‘ஞாயம் த⁴ம்ம’’ந்தி ஏத்தா²பி ஏஸேவ நயோ.

வஸ்ஸகாரஸுத்தவண்ணனா நிட்டி²தா.

6. தோ³ணஸுத்தவண்ணனா

36. ச²ட்டே² உக்காஹி தா⁴ரியமானாஹீதி தீ³பிகாஹி தா⁴ரியமானாஹி, த³ண்ட³தீ³பிகாஸு ஜாலேத்வா தா⁴ரியமானாஸு மாபிதத்தாதி வுத்தம் ஹோதி. தஞ்ஹி நக³ரம் ‘‘மங்க³லதி³வஸே ஸுக²ணே ஸுனக்க²த்தம் மா அதிக்கமீ’’தி ரத்திம்பி உக்காஸு தா⁴ரியமானாஸு மாபிதம். உக்காஸு டா²தி உக்கட்டா², உக்காஸு விஜ்ஜோதயந்தீஸு டி²தா பதிட்டி²தாதி மூலவிபூ⁴ஜாதி³பக்கே²பேன (பாணினி 3.2.5) ஸத்³த³ஸித்³தி⁴ வேதி³தப்³பா³. நிருத்தினயேன வா உக்காஸு டி²தாஸு டி²தா ஆஸீதி உக்கட்டா². அபரே பன ப⁴ணந்தி ‘‘பூ⁴மிபா⁴க³ஸம்பத்தியா மனுஸ்ஸஸம்பத்தியா உபகரணஸம்பத்தியா ச ஸா நக³ரீ உக்கட்ட²கு³ணயோக³தோ உக்கட்டா²தி நாமம் லப⁴தீ’’தி. ஸேதப்³யந்தி தஸ்ஸ நக³ரஸ்ஸ நாமம். தம் பன கஸ்ஸபத³ஸப³லஸ்ஸ ஜாதனக³ரந்தி ஆஹ ‘‘அதீதே கஸ்ஸபஸம்மாஸம்பு³த்³த⁴ஸ்ஸ ஜாதனக³ர’’ந்தி.

விஜ்ஜந்தரிகாயாதி விஜ்ஜுனிச்ச²ரணக்க²ணே. அந்தரதோதி ஹத³யே. அந்தராதி ஆரம்ப⁴னிப்³ப³த்தீனம் வேமஜ்ஜே². அந்தரிகாயாதி அந்தராளே. ஏத்த² ச ‘‘தத³ந்தரம் கோ ஜானேய்ய (அ. நி. 6.44; 10.75), ஏதேஸம் அந்தரா கப்பா க³ணனதோ அஸங்க்²யேய்யா (பு³. வம். 28.3), அந்தரந்தரா கத²ம் ஓபபாதேதீ’’தி (ம. நி. 2.426) ச ஆதீ³ஸு விய காரணவேமஜ்ஜே²ஸு வத்தமானா அந்தராஸத்³தா³ ஏவ உதா³ஹரிதப்³பா³ ஸியும், ந பன சித்தக்க²ணவிவரேஸு வத்தமானா அந்தரஅந்தரிகஸத்³தா³. அந்தராஸத்³த³ஸ்ஸ ஹி அயமத்து²த்³தா⁴ரோதி.

அயம் பனேத்த² அதி⁴ப்பாயோ ஸியா – யேஸு அந்தராஸத்³தோ³ வத்ததி, தேஸு அந்தரஸத்³தோ³பி வத்ததீதி ஸமானத்த²த்தா அந்தராஸத்³த³த்தே² வத்தமானோ அந்தரஸத்³தோ³ உதா³ஹடோ. அந்தராஸத்³தோ³ ஏவ வா ‘‘யஸ்ஸந்தரதோ’’தி ஏத்த² கா³தா²ஸுக²த்த²ம் ரஸ்ஸம் கத்வா வுத்தோதி த³ட்ட²ப்³ப³ம். அந்தராஸத்³தோ³ ஏவ பன இகஸத்³தே³ன பத³ம் வட்³டே⁴த்வா ‘‘அந்தரிகா’’தி வுத்தோதி ஏவமேத்த² உதா³ஹரணோதா³ஹரிதப்³பா³னம் விரோதா⁴பா⁴வோ த³ட்ட²ப்³போ³. அயோஜியமானே உபயோக³வசனம் ந பாபுணாதி ஸாமிவசனஸ்ஸ பஸங்கே³ அந்தராஸத்³த³யோகே³ன உபயோக³வசனஸ்ஸ இச்சி²தத்தா. தேனேவாஹ ‘‘அந்தராஸத்³தே³ன பன யுத்தத்தா உபயோக³வசனம் கத’’ந்தி.

ஸகலஜம்பு³தீ³பே உப்பன்னம் மஹாகலஹம் வூபஸமேத்வாதி பரினிப்³பு³தே ப⁴க³வதி தா⁴தூனம் அத்தா²ய குஸினாரனக³ரம் பரிவாரேத்வா டி²தேஹி ஸேஸராஜூஹி ‘‘அம்ஹாகம் தா⁴துயோ வா தே³ந்து யுத்³த⁴ம் வா’’திஆதி³னா கோஸினாரகேஹி மல்லேஹி ஸத்³தி⁴ம் கதம் விவாத³ம் வூபஸமேத்வா. ஸோ கிர ப்³ராஹ்மணோ தேஸம் விவாத³ம் ஸுத்வா ‘‘ஏதே ராஜானோ ப⁴க³வதோ பரினிப்³பு³தட்டா²னே விவாத³ம் கரோந்தி, ந கோ² பனேதம் பதிரூபம், அலம் இமினா கலஹேன, வூபஸமேஸ்ஸாமி ந’’ந்தி க³ந்த்வா உன்னதே பதே³ஸே ட²த்வா த்³வேபா⁴ணவாரபரிமாணம் தோ³ணக³ஜ்ஜிதம் நாம அவோச. தத்த² பட²மபா⁴ணவாரே தாவ ஏகபத³ம்பி தே ந ஜானிம்ஸு. து³தியபா⁴ணவாரபரியோஸானே ச ‘‘ஆசரியஸ்ஸ விய போ⁴ ஸத்³தோ³, ஆசரியஸ்ஸ விய போ⁴ ஸத்³தோ³’’தி ஸப்³பே³ நிரவா அஹேஸும். ஜம்பு³தீ³பதலே கிர குலக⁴ரே ஜாதோ யேபு⁴ய்யேன தஸ்ஸ ந-அந்தேவாஸிகோ நாம நத்தி², அத² கோ² ஸோ அத்தனோ வசனம் ஸுத்வா நிரவே துண்ஹீபூ⁴தே விதி³த்வா புன –

‘‘ஸுணந்து போ⁴ந்தோ மம ஏகவாசம்,

அம்ஹாக பு³த்³தோ⁴ அஹு க²ந்திவாதோ³;

ந ஹி ஸாது⁴யம் உத்தமபுக்³க³லஸ்ஸ,

ஸரீரபா⁴கே³ ஸியா ஸம்பஹாரோ.

‘‘ஸப்³பே³வ போ⁴ந்தோ ஸஹிதா ஸமக்³கா³,

ஸம்மோத³மானா கரோமட்ட²பா⁴கே³;

வித்தா²ரிகா ஹோந்து தி³ஸாஸு தூ²பா,

ப³ஹூ ஜனா சக்கு²மதோ பஸன்னா’’தி. (தீ³. நி. 2.237) –

இமம் கா³தா²த்³வயம் வத்வா தம் கலஹம் வூபஸமேத்வா தா⁴துயோ அட்ட²தா⁴ பா⁴ஜேத்வா அதா³ஸி, தம் ஸந்தா⁴யேதம் வுத்தம் ‘‘ஸகலஜம்பு³தீ³பே உப்பன்னம் மஹாகலஹம் வூபஸமேத்வா தா⁴துயோ பா⁴ஜேஸ்ஸதீ’’தி. லக்க²ணசக்கானீதி த்³வீஸு பாத³தலேஸு த்³வே லக்க²ணசக்கானி.

ஆஸவேனாதி கம்மகிலேஸகாரணேன ஆஸவேன. ஏத்த² ஹி தேபூ⁴மகஞ்ச கம்மம், அவஸேஸா ச அகுஸலா த⁴ம்மா ‘‘ஆஸவா’’தி வுத்தா. தே³வூபபத்தீதி தே³வேஸு உப்பத்தி நிப்³ப³த்தி. ஏத்த² ச யக்க²க³ந்த⁴ப்³ப³தாய வினிமுத்தா ஸப்³பே³ தே³வா தே³வக்³க³ஹணேன க³ஹிதா. க³ந்த⁴ப்³போ³ வா விஹங்க³மோ ஆகாஸசாரீ. அஹந்தி விப⁴த்திவிபரிணாமேன யோஜேதப்³ப³ம்.

தோ³ணஸுத்தவண்ணனா நிட்டி²தா.

7. அபரிஹானியஸுத்தவண்ணனா

37. ஸத்தமே நிப்³பா³னஸந்திகேயேவ சரதீதி கிலேஸனிப்³பா³னஸ்ஸ அனுபாதா³பரினிப்³பா³னஸ்ஸ ச ஸந்திகேயேவ சரதி ‘‘ந சிரஸ்ஸேவ அதி⁴க³மிஸ்ஸதீ’’தி கத்வா. கா³தா²ய அப்பமாத³ரதோதி ஸமத²விபஸ்ஸனாய அப்பமஜ்ஜனே ரதோ அபி⁴ரதோ, அப்பமாதே³னேவ ரத்திந்தி³வம் வீதினாமேந்தோதி அத்தோ². பமாத³ம் ப⁴யதோ பஸ்ஸந்தோதி நிரயூபபத்திஆதி³ப⁴யஹேதுதோ பமாத³ம் ப⁴யதோ பஸ்ஸந்தோ. அப⁴ப்³போ³ பரிஹானாயாதி ஸோ ஏவரூபோ ஸமத²விபஸ்ஸனாத⁴ம்மேஹி மக்³க³ப²லேஹி வா பரிஹானாய அப⁴ப்³போ³. ஸமத²விபஸ்ஸனாதோ ஹி ஸம்பத்ததோ ந பரிஹாயதி, இதரானி ச அப்பத்தானி பாபுணாதீதி.

அபரிஹானியஸுத்தவண்ணனா நிட்டி²தா.

8. பதிலீனஸுத்தவண்ணனா

38. அட்ட²மே அந்தவா லோகோதி ஏகபஸ்ஸேன வட்³டி⁴தம் கஸிணனிமித்தம் ‘‘லோகோ’’தி கா³ஹேன வா தக்கேன வா உப்பன்னதி³ட்டி². லாபீ⁴ ஹி ஜா²னசக்கு²னா பஸ்ஸித்வா க³ண்ஹாதி, இதரோ தக்கமத்தேன. அனந்தவாதி ஸமந்ததோ வட்³டி⁴தம் அப்பமாணம் கஸிணனிமித்தம் ‘‘லோகோ’’தி கா³ஹேன வா தக்கேன வா உப்பன்னதி³ட்டி². தம் ஜீவம் தம் ஸரீரந்தி ஜீவோ ஸரீரஞ்ச ஏகமேவ வத்தூ²தி உப்பன்னதி³ட்டி². விஸ்ஸட்டா²னீதி ஸகபரிச்சஜனவஸேன நிஸ்ஸட்டா²னி. வந்தானீதி இத³ம் புன அனாதி³யனபா⁴வத³ஸ்ஸனவஸேன வுத்தம். சத்தம்பி ஹி கேசி க³ண்ஹந்தி, நயித³மேவந்தி த³ஸ்ஸனத்த²ம் ‘‘வந்தானீ’’தி வுத்தம். ந ஹி யம் யேன வந்தம், ந ஸோ தம் புன ஆதீ³யதி. வந்தம்பி கிஞ்சி ஸஸந்ததிலக்³க³ம் ஸியா, நயித³மேவந்தி த³ஸ்ஸனத்த²ம் ‘‘முத்தானீ’’தி வுத்தம். தேனேவாஹ ‘‘சி²ன்னப³ந்த⁴னானி கதானீ’’தி, ஸந்ததிதோ வினிமோசனவஸேன சி²ன்னப³ந்த⁴னானி கதானீதி அத்தோ². முத்தம்பி கிஞ்சி முத்தப³ந்த⁴னம் விய ப²லம் குஹிஞ்சி திட்ட²தி, ந ஏவமித³ந்தி த³ஸ்ஸனத்த²ம் ‘‘பஹீனானீ’’தி வுத்தம். யதா² கிஞ்சி து³ன்னிஸ்ஸட்ட²ம் புன ஆதா³ய ஸம்மதே³வ நிஸ்ஸட்ட²ம் ‘‘படினிஸ்ஸட்ட²’’ந்தி வுச்சதி, ஏவம் விபஸ்ஸனாய நிஸ்ஸட்டா²னி ஆதி³ன்னஸதி³ஸானி மக்³கே³ன பஹீனானி படினிஸ்ஸட்டா²னி நாம ஹோந்தீதி த³ஸ்ஸனத்த²ம் ‘‘படினிஸ்ஸட்டா²னீ’’தி வுத்தம். தேனேவாஹ ‘‘யதா² ந புன சித்தம் ஆரோஹந்தி, ஏவம் படினிஸ்ஸஜ்ஜிதானீ’’தி.

காமேஸனாதி காமானம் ஏஸனா, காமஸங்கா²தா வா ஏஸனா காமேஸனா. வுத்தஞ்ஹேதம் ‘‘தத்த² கதமா காமேஸனா? யோ காமேஸு காமச்ச²ந்தோ³ காமராகோ³ காமனந்தீ³ காமபிபாஸா காமமுச்சா² காமஜ்ஜோ²ஸானம், அயம் வுச்சதி காமேஸனா’’தி, தஸ்மா காமராகோ³ ‘‘காமேஸனா’’தி வேதி³தப்³போ³. தேனேவாஹ ‘‘காமேஸனா…பே… அனாகா³மிமக்³கே³ன பஹீனா’’தி. ப⁴வானம் ஏஸனா ப⁴வேஸனா. வுத்தம்பி சேதம் ‘‘தத்த² கதமா ப⁴வேஸனா? யோ ப⁴வேஸு ப⁴வச்ச²ந்தோ³…பே… ப⁴வஜ்ஜோ²ஸானம், அயம் வுச்சதி ப⁴வேஸனா’’தி, தஸ்மா ப⁴வேஸனராகோ³ ரூபாரூபப⁴வபத்த²னாதி வேதி³தப்³போ³. தேனேவாஹ ‘‘ப⁴வேஸனா பன அரஹத்தமக்³கே³ன பஹீயதீ’’தி.

ப்³ரஹ்மசரியஸ்ஸ ஏஸனா ப்³ரஹ்மசரியேஸனா. ஸா ச மக்³க³ப்³ரஹ்மசரியஸ்ஸ, தி³ட்டி²க³திகஸம்மதப்³ரஹ்மசரியஸ்ஸ ச க³வேஸனவஸேன த்³விப்பகாராதி ஆஹ ‘‘ப்³ரஹ்மசரியம் ஏஸிஸ்ஸாமீ’’திஆதி³. தி³ட்டி²க³திகஸம்மதஸ்ஸ ப்³ரஹ்மசரியஸ்ஸ ஏஸனாபி ஹி ப்³ரஹ்மசரியேஸனாதி வுச்சதி. வுத்தம்பி சேதம் –

‘‘தத்த² கதமா ப்³ரஹ்மசரியேஸனா? ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தம் ஜீவம் தம் ஸரீரந்தி வா, அஞ்ஞம் ஜீவம் அஞ்ஞம் ஸரீரந்தி வா, ஹோதி ததா²க³தோ பரம் மரணாதி வா, ந ஹோதி ததா²க³தோ பரம் மரணாதி வா, ஹோதி ச ந ச ஹோதி ததா²க³தோ பரம் மரணாதி வா, நேவ ஹோதி ந ந ஹோதி ததா²க³தோ பரம் மரணாதி வா, யா ஏவரூபா தி³ட்டி² தி³ட்டி²க³தம் தி³ட்டி²க³ஹனம் தி³ட்டி²கந்தாரம் தி³ட்டி²விஸூகாயிகம் தி³ட்டி²விப்ப²ந்தி³தம் தி³ட்டி²ஸம்யோஜனம் கா³ஹோ பதிட்டா²ஹோ அபி⁴னிவேஸோ பராமாஸோ கும்மக்³கோ³ மிச்சா²பதோ² மிச்ச²த்தம் தித்தா²யதனம் விபரியேஸக்³கா³ஹோ, அயம் வுச்சதி ப்³ரஹ்மசரியேஸனா’’தி (விப⁴. 919).

தஸ்மா தி³ட்டி²க³திகஸம்மதஸ்ஸ ப்³ரஹ்மசரியஸ்ஸ ஏஸனா தி³ட்ட²ப்³ரஹ்மசரியேஸனாதி வேதி³தப்³பா³. தேனேவாஹ ‘‘தி³ட்டி²ப்³ரஹ்மசரியேஸனா பன ஸோதாபத்திமக்³கே³னேவ படிப்பஸ்ஸம்ப⁴தீ’’தி. ஏத்தாவதா ச ராக³தி³ட்டி²யோ ஏஸனாதி த³ஸ்ஸிதம் ஹோதி. ந கேவலஞ்ச ராக³தி³ட்டி²யோ ஏவ ஏஸனா, ததே³கட்ட²ம் கம்மம்பி. வுத்தம்பி சேதம் –

‘‘தத்த² கதமா காமேஸனா? காமராகோ³ ததே³கட்ட²ம் அகுஸலம் காயகம்மம் வசீகம்மம் மனோகம்மம், அயம் வுச்சதி காமேஸனா. தத்த² கதமா ப⁴வேஸனா? ப⁴வராகோ³ ததே³கட்ட²ம் அகுஸலம் காயகம்மம் வசீகம்மம் மனோகம்மம், அயம் வுச்சதி ப⁴வேஸனா. தத்த² கதமா ப்³ரஹ்மசரியேஸனா? அந்தக்³கா³ஹிகா தி³ட்டி² ததே³கட்ட²ம் அகுஸலம் காயகம்மம் வசீகம்மம் மனோகம்மம், அயம் வுச்சதி ப்³ரஹ்மசரியேஸனா’’தி (விப⁴. 919).

நவவித⁴மானோதி ‘‘ஸேய்யஸ்ஸ ஸேய்யோஹமஸ்மீ’’திஆதி³னா (ஸம். நி. 4.108; த⁴. ஸ. 1121; விப⁴. 866; மஹானி. 21) ஆக³தோ நவவித⁴மானோ.

‘‘காமேஸனா’’திஆதி³கா³தா²ய பன ப்³ரஹ்மசரியேஸனா ஸஹாதி ப்³ரஹ்மசரியேஸனாய ஸத்³தி⁴ம். விப⁴த்திலோபேன ஹி அயம் நித்³தே³ஸோ. கரணத்தே² வா ஏதம் பச்சத்தவசனம். இத³ம் வுத்தம் ஹோதி ‘‘ப்³ரஹ்மசரியேஸனாய ஸத்³தி⁴ம் காமேஸனா ப⁴வேஸனாதி திஸ்ஸோ ஏஸனா’’தி. தாஸு ப்³ரஹ்மசரியேஸனம் ஸரூபதோ த³ஸ்ஸேதும் ‘‘இதிஸச்சபராமாஸோ, தி³ட்டி²ட்டா²னா ஸமுஸ்ஸயா’’தி வுத்தம். தஸ்ஸத்தோ² – இதி ஏவம் ஸச்சந்தி பராமாஸோ இதிஸச்சபராமாஸோ. இத³மேவ ஸச்சம் மோக⁴மஞ்ஞந்தி தி³ட்டி²யா பவத்திஆகாரம் த³ஸ்ஸேதி. தி³ட்டி²யோ ஏவ ஸப்³பா³னத்த²ஹேதுபா⁴வதோ தி³ட்டி²ட்டா²னா. வுத்தஞ்ஹேதம் – ‘‘மிச்சா²தி³ட்டி²பரமாஹம், பி⁴க்க²வே, வஜ்ஜம் வதா³மீ’’தி (அ. நி. 1.310). தா ஏவ ச உபரூபரி வுத்³தி⁴யா மானலோபா⁴தி³கிலேஸஸமுஸ்ஸயனேன வட்டது³க்க²ஸமுஸ்ஸயனேன ச ஸமுஸ்ஸயா, ‘‘இத³மேவ ஸச்சம் மோக⁴மஞ்ஞ’’ந்தி மிச்சா²பி⁴னிவிஸமானா ஸப்³பா³னத்த²ஹேதுகா கிலேஸது³க்கூ²பசயதோ ஹேதுபூ⁴தா ச தி³ட்டி²யோ ப்³ரஹ்மசரியேஸனாதி வுத்தம் ஹோதி. ஏதேன பவத்திஆகாரதோ நிப்³ப³த்திதோ ச ப்³ரஹ்மசரியேஸனா த³ஸ்ஸிதாதி வேதி³தப்³பா³.

ஸப்³ப³ராக³விரத்தஸ்ஸாதி ஸப்³பே³ஹி காமப⁴வராகே³ஹி விரத்தஸ்ஸ. ததோ ஏவ தண்ஹாக்க²யஸங்கா²தே நிப்³பா³னே விமுத்தத்தா தண்ஹாக்க²யவிமுத்தினோ அரஹதோ. ஏஸனா படினிஸ்ஸட்டா²தி காமேஸனா, ப⁴வேஸனா ஸப்³ப³ஸோ நிஸ்ஸட்டா² பஹீனா. தி³ட்டி²ட்டா²னா ஸமூஹதாதி ப்³ரஹ்மசரியேஸனாஸங்கா²தா தி³ட்டி²ட்டா²னா ச பட²மமக்³கே³னேவ ஸமுக்³கா⁴திதா. ஏவம்பி இமிஸ்ஸா கா³தா²ய அத்த²வண்ணனா வேதி³தப்³பா³. ஸேஸம் ஸுவிஞ்ஞேய்யமேவ.

பதிலீனஸுத்தவண்ணனா நிட்டி²தா.

9. உஜ்ஜயஸுத்தவண்ணனா

39. நவமே அனுகுலயஞ்ஞந்தி அனுகுலம் குலானுக்கமம் உபாதா³ய தா³தப்³ப³தா³னம். தேனாஹ ‘‘அம்ஹாகம்…பே… குலானுகுலவஸேன யஜிதப்³ப³’’ந்தி. வம்ஸபரம்பராய பச்சா² து³க்³க³தபுரிஸேஹி பதா³தப்³ப³தா³னம். ஏவரூபம் குலம் ஸீலவந்தே உத்³தி³ஸ்ஸ நிப³த்³த⁴தா³னம், தஸ்மிம் குலே த³லித்³தா³னிபி ந உபச்சி²ந்த³ந்தி. தத்ரித³ம் வத்து² – அனாத²பிண்டி³கஸ்ஸ க⁴ரே பஞ்ச ஸலாகப⁴த்தஸதானி தீ³யிம்ஸு. த³ந்தமயஸலாகானம் பஞ்சஸதானி அஹேஸும். அத² தம் குலம் அனுக்கமேன தா³லித்³தி³யேன அபி⁴பூ⁴தம். ஏகா தஸ்மிம் குலே தா³ரிகா ஏகஸலாகதோ உத்³த⁴ம் தா³தும் நாஸக்கி². ஸாபி பச்சா² ஸாதவாஹனம் ரட்ட²ம் க³ந்த்வா க²லம் ஸோதே⁴த்வா லத்³த⁴த⁴ஞ்ஞேன தம் ஸலாகம் அதா³ஸி. ஏகோ தே²ரோ ரஞ்ஞோ ஆரோசேஸி. ராஜா தம் ஆனேத்வா அக்³க³மஹேஸிட்டா²னே ட²பேஸி. ஸா ததோ பட்டா²ய புன பஞ்சபி ஸலாகஸதானி பவத்தேஸி.

அஸ்ஸமேத⁴ந்திஆதீ³ஸு போராணகராஜகாலே கிர ஸஸ்ஸமேத⁴ம், புரிஸமேத⁴ம், ஸம்மாபாஸம், வாசாபேய்யந்தி சத்தாரி ஸங்க³ஹவத்தூ²னி அஹேஸும், யேஹி ராஜானோ லோகம் ஸங்க³ண்ஹிம்ஸு. தத்த² நிப்ப²ன்னஸஸ்ஸதோ த³ஸமபா⁴க³க்³க³ஹணம் ஸஸ்ஸமேத⁴ம் நாம, ஸஸ்ஸஸம்பாத³னே மேதா⁴விதாதி அத்தோ². மஹாயோதா⁴னம் ச²மாஸிகப⁴த்தவேதனானுப்பதா³னம் புரிஸமேத⁴ம் நாம, புரிஸஸங்க³ண்ஹனே மேதா⁴விதாதி அத்தோ². த³லித்³த³மனுஸ்ஸானம் ஹத்தே² லேக²ம் க³ஹேத்வா தீணி வஸ்ஸானி வினா வட்³டி⁴யா ஸஹஸ்ஸத்³விஸஹஸ்ஸமத்தத⁴னானுப்பதா³னம் ஸம்மாபாஸம் நாம. தஞ்ஹி ஸம்மா மனுஸ்ஸே பாஸேதி ஹத³யே ப³ந்தி⁴த்வா விய ட²பேதி, தஸ்மா ஸம்மாபாஸந்தி வுச்சதி. ‘‘தாத, மாதுலா’’திஆதி³னா பன ஸண்ஹவாசாப⁴ணனம் வாசாபேய்யம் நாம, பேய்யவஜ்ஜம் பியவசனதாதி அத்தோ². ஏவம் சதூஹி வத்தூ²ஹி ஸங்க³ஹிதம் ரட்ட²ம் இத்³த⁴ஞ்சேவ ஹோதி பீ²தஞ்ச பஹூதஅன்னபானம் கே²மம் நிரப்³பு³த³ம், மனுஸ்ஸா முதா³ மோத³னா உரே புத்தே நச்சேந்தா அபாருதக⁴ரத்³வாரா விஹரந்தி. இத³ம் க⁴ரத்³வாரேஸு அக்³க³ளானம் அபா⁴வதோ நிரக்³க³ளந்தி வுச்சதி. அயம் போராணிகா பவேணீ. அபரபா⁴கே³ பன ஓக்காகராஜகாலே ப்³ராஹ்மணா இமானி சத்தாரி ஸங்க³ஹவத்தூ²னி இமஞ்ச ரட்ட²ஸம்பத்திம் பரிவத்தேந்தா உம்மூலம் கத்வா அஸ்ஸமேத⁴ம் புரிஸமேத⁴ந்திஆதி³கே பஞ்ச யஞ்ஞே நாம அகம்ஸு. வுத்தஞ்ஹேதம் ப⁴க³வதா ப்³ராஹ்மணத⁴ம்மியஸுத்தே –

‘‘தேஸம் ஆஸி விபல்லாஸோ, தி³ஸ்வான அணுதோ அணும்…பே…;

தே தத்த² மந்தே க³ந்தே²த்வா, ஓக்காகம் தது³பாக³மு’’ந்தி. (ஸு. நி. 301-304);

இதா³னி தேஹி பரிவத்தேத்வா ட²பிதமத்த²ம் த³ஸ்ஸேந்தோ ‘‘அஸ்ஸமேத⁴’’ந்திஆதி³மாஹ. தத்த² மேத⁴ந்தீதி வதே⁴ந்தி. த்³வீஹி பரியஞ்ஞேஹீதி மஹாயஞ்ஞஸ்ஸ புப்³ப³பா⁴கே³ பச்சா² ச பவத்தேதப்³பே³ஹி த்³வீஹி பரிவாரயஞ்ஞேஹி. ஸத்தனவுதிபஞ்சபஸுஸதகா⁴தபி⁴ம்ஸனஸ்ஸாதி ஸத்தனவுதாதி⁴கானம் பஞ்சன்னம் பஸுஸதானம் மாரணேன பே⁴ரவஸ்ஸ பாபபீ⁴ருகானம் ப⁴யாவஹஸ்ஸ. ததா² ஹி வத³ந்தி –

‘‘ச²ஸதானி நியுஜ்ஜந்தி, பஸூனம் மஜ்ஜி²மே ஹனி;

அஸ்ஸமேத⁴ஸ்ஸ யஞ்ஞஸ்ஸ, ஊனானி பஸூஹி தீஹீ’’தி. (ஸம். நி. டீ. 1.1.120);

ஸம்மந்தி யுக³ச்சி²த்³தே³ பக்கி²பிதப்³ப³த³ண்ட³கம். பாஸந்தீதி கி²பந்தி. ஸம்ஹாரிமேஹீதி ஸகடேஹி வஹிதப்³பே³ஹி. புப்³பே³ கிர ஏகோ ராஜா ஸம்மாபாஸம் யஜந்தோ ஸரஸ்ஸதினதி³தீரே பத²வியா விவரே தி³ன்னே நிமுக்³கோ³யேவ அஹோஸி, அந்த⁴பா³லப்³ராஹ்மணா க³தானுக³திக³தா ‘‘அயம் தஸ்ஸ ஸக்³க³க³மனமக்³கோ³’’தி ஸஞ்ஞாய தத்த² ஸம்மாபாஸயஞ்ஞம் பட்ட²பேந்தி. தேன வுத்தம் ‘‘நிமுக்³கோ³காஸதோ பபு⁴தீ’’தி. அயூபோ அப்பகதி³வஸோ யாகோ³, ஸயூபோ ப³ஹுதி³வஸம் நேய்யோ ஸத்ரயாகோ³தி. மந்தபதா³பி⁴ஸங்க²தானம் ஸப்பிமதூ⁴னம் வாஜமிதி ஸமஞ்ஞா. ஹிரஞ்ஞஸுவண்ணகோ³மஹிம்ஸாதி³ ஸத்தரஸகத³க்கி²ணஸ்ஸ. ஸாரக³ப்³ப⁴கோட்டா²கா³ராதீ³ஸு நத்தி² ஏத்த² அக்³க³ளந்தி நிரக்³க³ளோ. தத்த² கிர யஞ்ஞே அத்தனோ ஸாபதேய்யம் அனவஸேஸதோ அனிகூ³ஹித்வா நிய்யாதீயதி.

மஹாரம்பா⁴தி ப³ஹுபஸுகா⁴தகம்மா. அட்ட²கதா²யம் பன ‘‘விவிதா⁴ யத்த² ஹஞ்ஞரே’’தி வக்க²மானத்தா ‘‘மஹாகிச்சா மஹாகரணீயா’’தி பட²மோ அத்த²விகப்போ வுத்தோ. து³தியோ பன அத்த²விகப்போ ‘‘மஹாரம்பா⁴தி பபஞ்சவஸேன அஜேளகா’’திஆதி³ வுத்தந்தி அதி⁴ப்பாயேன ‘‘அபிசா’’திஆதி³னா ஆரத்³தோ⁴. நிராரம்பா⁴தி ஏத்தா²பி வுத்தனயேன அத்தோ² வேதி³தப்³போ³. நனு ச பாணாதிபாதாதி³அகுஸலகம்மஸ்ஸ அப்பமத்தகம்பி ப²லம் நுபலப்³ப⁴தி, தஸ்மா தஸ்ஸ நிப்ப²லபா⁴வம் அவத்வா ‘‘ந தே ஹோந்தி மஹப்ப²லா’’தி கஸ்மா வுத்தந்தி ஆஹ ‘‘நிரவஸேஸத்தே²’’திஆதி³. அனுக³தம் குலந்தி அனுகுலம், குலானுக³தந்தி அத்தோ². யே நிச்சப⁴த்தாதி³ம் புப்³ப³புரிஸேஹி பட்ட²பிதம் அபராபரம் அனுபச்சி²ந்த³ந்தா மனுஸ்ஸா த³த³ந்தி, தே அனுகுலம் யஜந்தி நாம. தேனேவாஹ ‘‘யே அஞ்ஞே அனுகுலம் யஜந்தீ’’திஆதி³.

உஜ்ஜயஸுத்தவண்ணனா நிட்டி²தா.

10. உதா³யிஸுத்தவண்ணனா

40. த³ஸமே பாணஸமாரம்ப⁴ரஹிதந்தி பாணகா⁴தரஹிதம். அப்³யாப³ஜ்ஜ²ம் ஸுக²ம் லோகம், பண்டி³தோ உபபஜ்ஜதீதி காமச்ச²ந்தா³தி³ப்³யாபாத³விரஹிதத்தா அப்³யாப³ஜ்ஜ²ம் நித்³து³க்க²ம். பரபீளாபா⁴வே பன வத்தப்³ப³ம் நத்தி². ஜா²னஸமாபத்திவஸேன ஸுக²ப³ஹுலத்தா ஸுக²ம் ஏகந்தஸுக²ம் ப்³ரஹ்மலோகம் ஜா²னபுஞ்ஞேன, இதரபுஞ்ஞேன பன தத³ஞ்ஞஸம்பத்திப⁴வஸங்கா²தம் ஸுக²ம் லோகம் பண்டி³தோ ஸப்பஞ்ஞோ உபேதி. ஸேஸம் உத்தானமேவ.

உதா³யிஸுத்தவண்ணனா நிட்டி²தா.

சக்கவக்³க³வண்ணனா நிட்டி²தா.