7. மல்லிகாதே³வீஸுத்தவண்ணனா

197. ஸத்தமே அப்பேஸக்கா²தி அப்பானுபா⁴வா. ஸா பன அப்பேஸக்க²தா ஆதி⁴பதேய்யஸம்பத்தியா பரிவாரஸம்பத்தியா ச அபா⁴வேன பாகடா ஹோதி. தத்த² பரிவாரஸம்பத்தியா அபா⁴வம் த³ஸ்ஸேந்தோ ‘‘அப்பபரிவாரா’’தி ஆஹ. இஸ்ஸராதி ஆதி⁴பதேய்யஸம்வத்தனகம்மப³லேன ஈஸனஸீலா. ஸா பனஸ்ஸா இஸ்ஸரதா விப⁴வஸம்பத்திபச்சயா பாகடா ஜாதாதி அட்³ட⁴தாபரியாயபா⁴வேன வத³ந்தோ ‘‘அட்³டா⁴தி இஸ்ஸரா’’தி ஆஹ. மஹந்தம் த⁴னமேதிஸ்ஸா பூ⁴மிக³தஞ்சேவ வளஞ்ஜனகஞ்சாதி மஹத்³த⁴னா. இத⁴ பன வளஞ்ஜனகேனேவ த⁴னேன மஹத்³த⁴னதம் த³ஸ்ஸேந்தோ ‘‘வளஞ்ஜனகத⁴னேன மஹத்³த⁴னா’’தி ஆஹ. ஈஸதீதி ஈஸா, அபி⁴பூ⁴தி அத்தோ². மஹதீ ஈஸா மஹேஸா, ஸுப்பதிட்டி²தமஹேஸதாய பன பரேஹி மஹேஸோதி அக்கா²தப்³ப³தாய மஹேஸக்கா². யஸ்மா பன ஸோ மஹேஸக்கா²பா⁴வோ ஆதி⁴பதேய்யபரிவாரஸம்பத்தியா விஞ்ஞாயதி, தஸ்மா ‘‘மஹாபரிவாரா’’தி வுத்தம்.

ஸண்டா²னபாரிபூரியா அதி⁴கம் ரூபமஸ்ஸாதி அபி⁴ரூபா. ஸண்டா²னபாரிபூரியாதி ச ஹத்த²பாதா³தி³ஸரீராவயவானம் ஸுஸண்டி²ததாயாதி அத்தோ². அவயவபாரிபூரியா ஹி ஸமுதா³யபாரிபூரிஸித்³தி⁴. ரூபந்தி ச ஸரீரம் ‘‘ரூபவந்தேவ ஸங்க்²யம் க³ச்ச²தீ’’திஆதீ³ஸு விய. த³ஸ்ஸனயுத்தாதி ஸுரூபபா⁴வேன பஸ்ஸிதப்³ப³யுத்தா, தி³ஸ்ஸமானா சக்கூ²னி பியாயதீதி அஞ்ஞகிச்சவிக்கே²பம் ஹித்வாபி த³ட்ட²ப்³பா³தி வுத்தம் ஹோதி. தி³ஸ்ஸமானாவ ஸோமனஸ்ஸவஸேன சித்தம் பஸாதே³தீதி பாஸாதி³கா. தேனாஹ ‘‘த³ஸ்ஸனேன பாஸாதி³கா’’தி. போக்க²ரதாதி வுச்சதி ஸுந்த³ரபா⁴வோ, வண்ணஸ்ஸ போக்க²ரதா வண்ணபோக்க²ரதா, தாய வண்ணஸம்பத்தியாதி அத்தோ². போராணா பன போக்க²ரந்தி ஸரீரம் வத³ந்தி, வண்ணம் வண்ணமேவ. தேஸம் மதேன வண்ணஞ்ச போக்க²ரஞ்ச வண்ணபோக்க²ரானி, தேஸம் பா⁴வோ வண்ணபோக்க²ரதா. இதி பரமாய வண்ணபோக்க²ரதாயாதி உத்தமபரிஸுத்³தே⁴ன வண்ணேன சேவ ஸரீரஸண்டா²னஸம்பத்தியா சாதி அத்தோ² த³ட்ட²ப்³போ³. தேனேவாஹ ‘‘வண்ணேன சேவ ஸரீரஸண்டா²னேன சா’’தி. தத்த² வண்ணேனாதி வண்ணதா⁴துயா. ஸரீரம் நாம ஸன்னிவேஸவிஸிட்டோ² கரசரணகீ³வாஸீஸாதி³அவயவஸமுதா³யோ, ஸோ ச ஸண்டா²னமுகே²ன க³ய்ஹதீதி ஆஹ ‘‘ஸரீரஸண்டா²னேனா’’தி.

அபி⁴ஸஜ்ஜதீதி குஜ்ஜ²னவஸேனேவ குடிலகண்டகோ விய தஸ்மிம் தஸ்மிம் ஸமுட்டா²னே மகரத³ந்தோ விய லக³தி. யஞ்ஹி கோத⁴ஸ்ஸ உப்பத்திட்டா²னபூ⁴தே ஆரம்மணே உபனாஹஸ்ஸ பச்சயபூ⁴தம் குஜ்ஜ²னவஸேன அபி⁴ஸஜ்ஜனம், தம் இதா⁴தி⁴ப்பேதம், ந லுப்³ப⁴னவஸேன. குப்பதீதிஆதீ³ஸு புப்³பு³ப்பத்தி கோபோ, ததோ ப³லவதரோ ப்³யாபாதோ³ லத்³தா⁴ஸேவனதாய சித்தஸ்ஸ ப்³யாபஜ்ஜனதோ. ஸாதிஸயம் லத்³தா⁴ஸேவனதாய ததோ ப்³யாபாத³தோபி ப³லவதரா பச்சத்தி²கபா⁴வேன தா²மப்பத்தி பதித்தி²யனா. அன்னம் பானந்திஆதீ³ஸு அதீ³யதோ அன்னம், கா²த³னீயம் போ⁴ஜனீயஞ்ச. பாதப்³யதோ பானம், யம்கிஞ்சி பானம். வஸிதப்³ப³தோ அச்சா²தே³தப்³ப³தோ வத்த²ம், நிவாஸனபாவுரணம். யந்தி தேனாதி யானம், ச²த்துபாஹனவய்ஹஸிவிகாதி³ யம்கிஞ்சி க³மனபச்சயம். ச²த்தம்பி ஹி வஸ்ஸாதபது³க்க²னிவாரணேன மக்³க³க³மனஸாத⁴னந்தி கத்வா ‘‘யான’’ந்தி வுச்சதி. மாலந்தி யம்கிஞ்சி ஸுமனமாலாதி³புப்ப²ம். க³ந்த⁴ந்தி யம்கிஞ்சி சந்த³னாதி³விலேபனம்.

மல்லிகாதே³வீஸுத்தவண்ணனா நிட்டி²தா.