6. ஸாள்ஹஸுத்தவண்ணனா

196. ச²ட்டே² காயத³ள்ஹிப³ஹுலதம் தபதீதி தபோ, அத்தகிலமதா²னுயோக³வஸேன பவத்தம் வீரியம். தேன காயத³ள்ஹிப³ஹுலதானிமித்தஸ்ஸ பாபஸ்ஸ ஜிகு³ச்ச²னம் விரஜ்ஜனம் தபோஜிகு³ச்சா²தி ஆஹ ‘‘து³க்கரகாரிகஸங்கா²தேனா’’திஆதி³. தபோஜிகு³ச்ச²வாதா³திஆதீ³ஸு தபோஜிகு³ச்ச²ம் வத³ந்தி, மனஸாபி தமேவ ஸாரதோ க³ஹேத்வா விசரந்தி, காயேனபி தமேவ அல்லீனா நானப்பகாரம் அத்தகிலமதா²னுயோக³மனுயுத்தா விஹரந்தீதி அத்தோ². அபரிஸுத்³த⁴காயஸமாசாராதி அபரிஸுத்³தே⁴ன பாணாதிபாதாதி³னா காயஸமாசாரேன ஸமன்னாக³தா. அபரிஸுத்³த⁴வசீஸமாசாராதி அபரிஸுத்³தே⁴ன முஸாவாதா³தி³னா வசீஸமாசாரேன ஸமன்னாக³தா. அபரிஸுத்³த⁴மனோஸமாசாராதி அபரிஸுத்³தே⁴ன அபி⁴ஜ்ஜா²தி³னா மனோஸமாசாரேன ஸமன்னாக³தா. காமம் அகுஸலகாயஸமாசாரவசீஸமாசாரப்பவத்திகாலேபி அபி⁴ஜ்ஜா²த³யோ பவத்தந்தியேவ, ததா³ பன தே சேதனாபக்கி²கா வா அப்³போ³ஹாரிகா வாதி, மனோஸமாசாரவாரே ஏவ அபி⁴ஜ்ஜா²தி³வஸேன யோஜனா கதா. அத² வா த்³வாரந்தரே பவத்தானம் பாணாதிபாதாதீ³னம் வசீஸமாசாராதி³பா⁴வாபா⁴வோ விய த்³வாரந்தரே பவத்தானம்பி அபி⁴ஜ்ஜா²தீ³னம் காயஸமாசாராதி³பா⁴வோ அஸித்³தோ⁴, மனோஸமாசாரபா⁴வோ ஏவ பன ஸித்³தோ⁴தி கத்வா மனோஸமாசாரவாரே ஏவ அபி⁴ஜ்ஜா²த³யோ உத்³த⁴டா. ததா² ஹி வுத்தம் –

‘‘த்³வாரே சரந்தி கம்மானி, ந த்³வாரா த்³வாரசாரினோ;

தஸ்மா த்³வாரேஹி கம்மானி, அஞ்ஞமஞ்ஞம் வவத்தி²தா’’தி. (த⁴. ஸ. அட்ட². 1 காமாவசரகுஸலத்³வாரகதா²);

அபரிஸுத்³தா⁴ஜீவாதி அபரிஸுத்³தே⁴ன வேஜ்ஜகம்மதூ³தகம்மவட்³டி⁴யோகா³தி³னா ஏகவீஸதிஅனேஸனாபே⁴தே³ன ஆஜீவேன ஸமன்னாக³தா. இத³ஞ்ச ஸாஸனே பப்³ப³ஜிதானம்யேவ வஸேன வுத்தம், ‘‘யேபி தே ஸமணப்³ராஹ்மணா’’தி பன வசனதோ பா³ஹிரகவஸேன க³ஹட்ட²வஸேன ச யோஜனா வேதி³தப்³பா³. க³ஹட்டா²னம்பி ஹி ஜாதித⁴ம்மகுலத⁴ம்மதே³ஸத⁴ம்மவிலோமனவஸேன அஞ்ஞதா²பி மிச்சா²ஜீவோ லப்³ப⁴தேவ.

ஞாணத³ஸ்ஸனாயாதி ஏத்த² ஞாணத³ஸ்ஸனந்தி மக்³க³ஞாணம்பி வுச்சதி ப²லஞாணம்பி ஸப்³ப³ஞ்ஞுதஞ்ஞாணம்பி பச்சவேக்க²ணஞாணம்பி விபஸ்ஸனாஞாணம்பி. ‘‘கிம் நு கோ², ஆவுஸோ, ஞாணத³ஸ்ஸனவிஸுத்³த⁴த்த²ம் ப⁴க³வதி ப்³ரஹ்மசரியம் வுஸ்ஸதீ’’தி (ம. நி. 1.257) ஹி ஏத்த² மக்³க³ஞாணம் ‘‘ஞாணத³ஸ்ஸன’’ந்தி வுத்தம். ‘‘அயமஞ்ஞோ உத்தரிமனுஸ்ஸத⁴ம்மோ அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி (ம. நி. 1.328) ஏத்த² ப²லஞாணம். ‘‘ப⁴க³வதோபி கோ² ஞாணம் உத³பாதி³ ஸத்தாஹகாலகதோ ஆளாரோ காலாமோ’’தி (மஹாவ. 10) ஏத்த² ஸப்³ப³ஞ்ஞுதஞ்ஞாணம். ‘‘ஞாணஞ்ச பன மே த³ஸ்ஸனம் உத³பாதி³, அகுப்பா மே விமுத்தி, அயமந்திமா ஜாதீ’’தி (ஸம். நி. 5.1081; மஹாவ. 16; படி. ம. 2.30) ஏத்த² பச்சவேக்க²ணஞாணம். ‘‘ஞாணத³ஸ்ஸனாய சித்தம் அபி⁴னீஹரதீ’’தி (தீ³. நி. 1.234-235) ஏத்த² விபஸ்ஸனாஞாணம். இத⁴ பன ஞாணத³ஸ்ஸனாயாதி மக்³க³ஞாணம் ‘‘ஞாணத³ஸ்ஸன’’ந்தி வுத்தம். தேனாஹ ‘‘மக்³க³ஞாணஸங்கா²தாய த³ஸ்ஸனாயா’’தி. அவிராதி⁴தம் விஜ்ஜ²தீதி அவிராதி⁴தம் கத்வா விஜ்ஜ²தி. ஸேஸமேத்த² ஸுவிஞ்ஞேய்யமேவ.

ஸாள்ஹஸுத்தவண்ணனா நிட்டி²தா.