5. வப்பஸுத்தவண்ணனா

195. பஞ்சமே பிஹிதத்தாதி அகுஸலஸ்ஸ பவேஸனத்³வாரம் பித³ஹித்வா டி²தத்தா. காயேன ஸம்வரிதப்³ப³ஞ்ஹி அபிஹிதேன த்³வாரேன பவத்தனகம் பாபத⁴ம்மம் ஸம்வரித்வா டி²தோ காயேன ஸம்வுதோ நாம. க²யவிராகே³னாதி அச்சந்தக²யஸங்கா²தேன விரஜ்ஜனேன, அனுப்பாத³னிரோதே⁴னாதி அத்தோ². கிம் விஜ்ஜா புப்³பே³ உப்பன்னாதி? உப⁴யமேதம் ந வத்தப்³ப³ம். பஹானாபி⁴ஸமயபா⁴வனாபி⁴ஸமயானம் அபி⁴ன்னகாலத்தா பதீ³புஜ்ஜலனேன அந்த⁴காரம் விய விஜ்ஜுப்பாதே³ன அவிஜ்ஜா நிருத்³தா⁴வ ஹோதி, வத்தப்³ப³ம் வா ஹேதுப²லத்தமுபசாரவஸேன. யதா² ஹி பதீ³புஜ்ஜலனஹேதுகோ அந்த⁴காரவிக³மோ, ஏவம் விஜ்ஜுப்பாத³ஹேதுகோ அவிஜ்ஜானிரோதோ⁴. ஹேதுப²லத⁴ம்மா ச ஸமானகாலாபி புப்³பா³பரகாலா விய வோஹரீயந்தி யதா² ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி (ம. நி. 1.400; 3.421, 425, 426; ஸம். நி. 2.43-44; 2.4.60; கதா². 465, 467) பச்சயாதா³னுப்பஜ்ஜனகிரியா. சித்தஸ்ஸ காயஸ்ஸ ச விஹனனதோ விகா⁴தோ, து³க்க²ம். பரித³ஹனதோ பரிளாஹோ.

நிச்சவிஹாராதி ஸப்³ப³தா³ பவத்தனகவிஹாரா. ட²பேத்வா ஹி ஸமாபத்திவேலம் ப⁴வங்க³வேலஞ்ச கீ²ணாஸவா இமினா ச²ளங்கு³பேக்கா²விஹாரேன ஸப்³ப³காலம் விஹரந்தி. சக்கு²னா ரூபம் தி³ஸ்வாதி சக்கு²விஞ்ஞாணேன ரூபம் தி³ஸ்வா. சக்கு²னா ரூபம் தி³ஸ்வாதி ஹி நிஸ்ஸயவோஹாரேன வுத்தம். ஸஸம்பா⁴ரகதா² ஹேஸா யதா² ‘‘த⁴னுனா விஜ்ஜ²தீ’’தி, தஸ்மா நிஸ்ஸயஸீஸேன நிஸ்ஸிதஸ்ஸ க³ஹணம் த³ட்ட²ப்³ப³ம். ராக³வஸேன ந ஸோமனஸ்ஸஜாதோ ஹோதீதி கே³ஹஸிதபேமவஸேனபி ஜவனக்க²ணே ஸோமனஸ்ஸஜாதோ ந ஹோதி மக்³கே³ன ஸமுச்சி²ன்னத்தா, ந தோ³மனஸ்ஸஜாதோ பஸாத³ஞ்ஞத²த்தவஸேனபி. உபேக்க²கோ மஜ்ஜ²த்தோ ஹுத்வா விஹரதீதி அஸமபேக்க²னேன மோஹம் அனுப்பாதே³ந்தோ ஞாணுபேக்கா²வஸேனேவ உபேக்க²கோ விஹரதி மஜ்ஜ²த்தோ. கீ²ணாஸவோ ஹி இட்டே²பி அனிட்டே²பி மஜ்ஜ²த்தேபி ஆரம்மணே யோ அஸமபேக்க²னேன ஸமஸமா அயோனிஸோக³ஹணே அகீ²ணாஸவானம் மோஹோ உப்பஜ்ஜதி, தம் அனுப்பாதே³ந்தோ மக்³கே³னேவ தஸ்ஸ ஸமுக்³கா⁴திதத்தா ஞாணுபேக்கா²வஸேனேவ உபேக்க²கோ விஹரதி, அயஞ்சஸ்ஸ படிபத்தி ஸதிவேபுல்லபத்தியா பஞ்ஞாவேபுல்லபத்தியா சாதி வுத்தம் ‘‘ஸதிஸம்பஜஞ்ஞபரிக்³க³ஹிதாயா’’தி.

ஏத்த² ச ‘‘ச²ஸு த்³வாரேஸு உபேக்க²கோ விஹரதீ’’தி இமினா ச²ளங்கு³பேக்கா² கதி²தா. ‘‘ஸம்பஜானோ’’தி வசனதோ பன சத்தாரி ஞாணஸம்பயுத்தசித்தானி லப்³ப⁴ந்தி தேஹி வினா ஸம்பஜானதாய அஸம்ப⁴வதோ. ‘‘ஸததவிஹாரா’’தி வசனதோ அட்ட²பி மஹாகிரியசித்தானி லப்³ப⁴ந்தி ஞாணுப்பத்திபச்சயரஹிதகாலேபி பவத்திஜோதனதோ. ‘‘அரஜ்ஜந்தோ அது³ஸ்ஸந்தோ’’தி வசனதோ ஹஸிதுப்பாத³வோட்ட²ப்³ப³னேஹி ஸத்³தி⁴ம் த³ஸ சித்தானி லப்³ப⁴ந்தி. அரஜ்ஜனாது³ஸ்ஸனவஸேன பவத்தி ஹி தேஸம்பி ஸாதா⁴ரணாதி. நனு சேத்த² ‘‘உபேக்க²கோ விஹரதீ’’தி ச²ளங்கு³பேக்கா²வஸேன இமேஸம் ஸததவிஹாரானம் ஆக³தத்தா ஸோமனஸ்ஸம் கத²ம் லப்³ப⁴தீதி? ஆஸேவனதோதி. கிஞ்சாபி ஹி கீ²ணாஸவோ இட்டா²னிட்டே²பி ஆரம்மணே மஜ்ஜ²த்தே விய ப³ஹுலம் உபேக்க²கோ விஹரதி அத்தனோ பரிஸுத்³த⁴ப்பகதிபா⁴வாவிஜஹனதோ, கதா³சி பன ததா² சேதோபி⁴ஸங்கா²ரபா⁴வே யம் தம் ஸபா⁴வதோ இட்ட²ம் ஆரம்மணம், தஸ்ஸ யாதா²வதோ ஸபா⁴வக்³க³ஹணவஸேனபி அரஹதோ சித்தம் ஸோமனஸ்ஸஸஹக³தம் ஹுத்வா பவத்ததேவ, தஞ்ச கோ² புப்³பா³ஸேவனவஸேன.

காயோதி (ஸம். நி. டீ. 2.2.51) பஞ்சத்³வாரகாயோ, ஸோ அந்தோ அவஸானம் ஏதிஸ்ஸாதி காயந்திகா, தம் காயந்திகம். தேனாஹ – ‘‘யாவ பஞ்சத்³வாரகாயோ பவத்ததி, தாவ பவத்த’’ந்தி. ஜீவிதந்திகந்தி ஏத்தா²பி ஏஸேவ நயோ. பச்சா² உப்பஜ்ஜித்வாதி ஏதஸ்மிம் அத்தபா⁴வே மனோத்³வாரிகவேத³னாதோ பச்சா² உப்பஜ்ஜித்வா ததோ பட²மம் நிருஜ்ஜ²தி, ததோ ஏவ அத்த²ஸித்³த⁴மத்த²ம் ஸரூபேனேவ த³ஸ்ஸேதும் ‘‘மனோத்³வாரிகவேத³னா பட²மம் உப்பஜ்ஜித்வா பச்சா² நிருஜ்ஜ²தீ’’தி வுத்தம். இதா³னி தமேவ ஸங்கே²பேன வுத்தம் விவரிதும் ‘‘ஸா ஹீ’’திஆதி³மாஹ. யாவ தேத்திம்ஸவஸ்ஸானி பட²மவயோ. பஞ்ஞாஸவஸ்ஸகாலேதி பட²மவயதோ யாவ பஞ்ஞாஸவஸ்ஸகாலா, தாவ. டி²தா ஹோதீதி வட்³டி⁴ஹானியோ அனுபக³ந்த்வா ஸமரூபேனேவ டி²தா ஹோதி. மந்தா³தி முது³கா அதிகி²ணா. ததா³தி அஸீதினவுதிவஸ்ஸகாலே வத³ந்தேபி ததா²சிரபரிசிதேபீதி அதி⁴ப்பாயோ. ப⁴க்³கா³தி தேஜோப⁴க்³கே³ன ப⁴க்³கா³ து³ப்³ப³ண்ணா. ஹத³யகோடிம்யேவாதி சக்கா²தி³வத்தூ²ஸு அப்பவத்தித்வா தேஸம் ஆதி³அந்தகோடிபூ⁴தம் ஹத³யவத்து²ம்யேவ. தாவாதி யாவ வேத³னா வத்ததி, தாவ.

வாபியாதி மஹாதளாகேன. பஞ்சஉத³கமக்³க³ஸம்பன்னந்தி பஞ்சஹி உத³கஸ்ஸ பவிஸனனிக்க²மனமக்³கே³ஹி யுத்தம். ததோ ததோ விஸ்ஸந்த³மானம் ஸப்³ப³ஸோ புண்ணத்தா. பட²மம் தே³வே வஸ்ஸந்தேதிஆதி³ உபமாஸம்ஸந்த³னம். இமம் வேத³னம் ஸந்தா⁴யாதி இமம் யதா²வுத்தம் பரியோஸானப்பத்தம் மனோத்³வாரிகவேத³னம் ஸந்தா⁴ய.

காயஸ்ஸ பே⁴தா³தி அத்தபா⁴வஸ்ஸ வினாஸனதோ. பரதோ அக³ந்த்வாதி பரலோகவஸேன அக³ந்த்வா. வேத³னானம் ஸீதிபா⁴வோ நாம ஸங்கா²ரத³ரத²பரிளாஹாபா⁴வோ. ஸோ பனாயம் ஸப்³ப³ஸோ அப்பவத்திவஸேனேவாதி ஆஹ ‘‘அப்பவத்தனத⁴ம்மானி ப⁴விஸ்ஸந்தீ’’தி.

அத்தபா⁴வம் நாஸேதுகாமஸ்ஸ த³ள்ஹம் உப்பன்னம் ஸம்வேக³ஞாணம் ஸந்தா⁴யாஹ ‘‘குதா³லோ விய பஞ்ஞா’’தி. ததோ நிப்³ப³த்திதஜ்ஜா²னஸமாதி⁴ம் ஸந்தா⁴ய ‘‘பிடகம் விய ஸமாதீ⁴’’தி. தன்னிஸ்ஸாய பவத்தேதப்³ப³விபஸ்ஸனாரம்ப⁴ஞாணம் ஸந்தா⁴ய ‘‘க²னித்தி விய விபஸ்ஸனா’’தி ச வுத்தம். ஸேஸமேத்த² உத்தானமேவ.

வப்பஸுத்தவண்ணனா நிட்டி²தா.