6. பட²மஸிக்கா²ஸுத்தவண்ணனா

87. ச²ட்டே² ஸமத்தகாரீதி அனூனேன பரிபூரேன ஆகாரேன ஸமன்னாக³தோ. ஸிக்கா²பதா³னம் கு²த்³தா³னுகு²த்³த³கத்தம் அபேக்கா²ஸித்³த⁴ந்தி ஆஹ ‘‘தத்ராபி ஸங்கா⁴தி³ஸேஸம் கு²த்³த³க’’ந்திஆதி³. அங்கு³த்தரமஹானிகாயவளஞ்ஜனகஆசரியாதி அங்கு³த்தரனிகாயம் பரிஹரந்தா ஆசரியா, அங்கு³த்தரபா⁴ணகாதி வுத்தம் ஹோதி. லோகவஜ்ஜம் நாபஜ்ஜதி லோகவஜ்ஜஸிக்கா²பதா³னம் வீதிக்கமஸாத⁴கஸ்ஸ கிலேஸக³ஹனஸ்ஸ ஸப்³ப³ஸோ பஹீனத்தா. பண்ணத்திவஜ்ஜமேவ ஆபஜ்ஜதி பண்ணத்திவீதிக்கமம் வா அஜானதோபி ஆபத்திஸம்ப⁴வதோ. சித்தேன ஆபஜ்ஜந்தோ ரூபியப்படிக்³க³ஹணம் ஆபஜ்ஜதீதி உபனிக்கி²த்தஸாதி³யேன ஆபஜ்ஜதி.

ப்³ரஹ்மசரியஸ்ஸ ஆதி³பூ⁴தானி ஆதி³ப்³ரஹ்மசரியானி, தானி ஏவ ஆதி³ப்³ரஹ்மசரியகானி யதா² ‘‘வினயோ ஏவ வேனயிகோ’’தி ஆஹ ‘‘மக்³க³ப்³ரஹ்மசரியஸ்ஸா’’திஆதி³. சத்தாரி மஹாஸீலஸிக்கா²பதா³னீதி சத்தாரி பாராஜிகானி ஸந்தா⁴ய வத³தி. படிபக்க²த⁴ம்மானம் அனவஸேஸதோ ஸவனதோ பக்³க⁴ரணதோ ஸோதோ, அரியமக்³கோ³தி ஆஹ ‘‘ஸோதஸங்கா²தேன மக்³கே³னா’’தி. வினிபாதேதி விரூபம் ஸது³க்க²ம் ஸஉபாயாஸம் நிபாதேதீதி வினிபாதோ, அபாயது³க்கே² கி²பனகோ. த⁴ம்மோதி ஸபா⁴வோ. நாஸ்ஸ வினிபாதோ த⁴ம்மோதி அவினிபாதத⁴ம்மோ, ந அத்தானம் அபாயேஸு வினிபாதனஸபா⁴வோதி வுத்தம் ஹோதி. கஸ்மா? யே த⁴ம்மா அபாயக³மனீயா, தேஸம் பஹீனத்தா. தேனாஹ ‘‘அவினிபாதத⁴ம்மோதி சதூஸு அபாயேஸு அபதனஸபா⁴வோ’’தி. தத்த² அபதனஸபா⁴வோதி அனுப்பஜ்ஜனஸபா⁴வோ. ஸோதாபத்திமக்³க³னியாமேன நியதோதி உபரிமக்³கா³தி⁴க³மஸ்ஸ அவஸ்ஸம்பா⁴வீபா⁴வதோ நியதோ. தேனேவாஹ ‘‘ஸம்போ³தி⁴பராயணோ’’தி. ஹேட்டி²மந்ததோ ஸத்தமப⁴வதோ உபரி அனுப்பஜ்ஜனத⁴ம்மதாய வா நியதோ. ஸம்பு³ஜ்ஜ²தீதி ஸம்போ³தி⁴, அரியமக்³கோ³. ஸோ பன பட²மமக்³க³ஸ்ஸ அதி⁴க³தத்தா அவஸிட்டோ² ச அதி⁴க³ந்தப்³ப³பா⁴வேன இச்சி²தப்³போ³தி உபரிமக்³க³த்தயஸங்கா²தா ஸம்போ³தி⁴ பரம் அயனம் பரா க³தி அஸ்ஸாதி ஸம்போ³தி⁴பராயணோ. தேனாஹ ‘‘உபரிமக்³க³த்தயஸம்போ³தி⁴பராயணோ’’தி.

தனுபா⁴வாதி பரியுட்டா²னமந்த³தாய ச கதா³சி கரஹசி உப்பத்தியா ச தனுபா⁴வேன. தனுத்தஞ்ஹி த்³வீஹி காரணேஹி வேதி³தப்³ப³ம் அதி⁴ச்சுப்பத்தியா ச பரியுட்டா²னமந்த³தாய ச. ஸகதா³கா³மிஸ்ஸ ஹி வட்டானுஸாரிமஹாஜனஸ்ஸ விய கிலேஸா அபி⁴ண்ஹம் ந உப்பஜ்ஜந்தி, கதா³சி கரஹசி உப்பஜ்ஜந்தி விரளாகாரா ஹுத்வா விரளவாபிதே கே²த்தே அங்குரா விய. உப்பஜ்ஜமானாபி ச வட்டானுஸாரிமஹாஜனஸ்ஸேவ மத்³த³ந்தா ப²ரந்தா சா²தே³ந்தா அந்த⁴காரம் கரோந்தா ந உப்பஜ்ஜந்தி, மந்த³மந்தா³ உப்பஜ்ஜந்தி தனுகாகாரா ஹுத்வா அப்³ப⁴படலமிவ மக்கி²காபத்தமிவ ச. தத்த² கேசி தே²ரா ப⁴ணந்தி ‘‘ஸகதா³கா³மிஸ்ஸ கிலேஸா கிஞ்சாபி சிரேன உப்பஜ்ஜந்தி, ப³ஹலாவ உப்பஜ்ஜந்தி. ததா² ஹிஸ்ஸ புத்தா ச தீ⁴தரோ ச தி³ஸ்ஸந்தீ’’தி. ஏதம் பன அப்பமாணம். புத்ததீ⁴தரோ ஹி அங்க³பச்சங்க³பராமஸனமத்தேனபி ஹோந்தீதி. த்³வீஹியேவ காரணேஹிஸ்ஸ கிலேஸானம் தனுத்தம் வேதி³தப்³ப³ம் அதி⁴ச்சுப்பத்தியா ச பரியுட்டா²னமந்த³தாய சாதி.

ஹேட்டா²பா⁴கி³யானந்தி ஏத்த² ஹேட்டா²தி மஹக்³க³தபூ⁴மிதோ ஹேட்டா², காமபூ⁴மியந்தி அத்தோ². தேஸம் பச்சயபா⁴வேன ஹேட்டா²பா⁴க³ஸ்ஸ ஹிதாதி ஹேட்டா²பா⁴கி³யா, தேஸம் ஹேட்டா²பா⁴கி³யானம், ஹேட்டா²பா⁴க³ஸ்ஸ காமப⁴வஸ்ஸ பச்சயபா⁴வேன க³ஹிதானந்தி அத்தோ². ஸம்யோஜேந்தி ப³ந்த⁴ந்தி க²ந்த⁴க³திப⁴வாதீ³ஹி க²ந்த⁴க³திப⁴வாத³யோ, கம்மம் வா ப²லேனாதி ஸம்யோஜனானீதி ஆஹ ‘‘ஸம்யோஜனானந்தி ப³ந்த⁴னான’’ந்தி. அஸமுச்சி²ன்னராகா³தி³கஸ்ஸ ஹி ஏதரஹி க²ந்தா⁴தீ³னம் ஆயதிம் க²ந்தா⁴தீ³ஹி ஸம்ப³ந்தோ⁴, ஸமுச்சி²ன்னராகா³தி³கஸ்ஸ பன தம் நத்தி², கதானம்பி கம்மானம் அஸமத்த²பா⁴வாபத்திதோ ராகா³தீ³னம் அன்வயதோ ப்³யதிரேகதோ ச ஸம்யோஜனட்டோ² ஸித்³தோ⁴. பரிக்க²யேனாதி ஸமுச்சே²தே³ன.

ஓபபாதிகோதி உபபாதிகயோனிகோ உபபதனே ஸாது⁴காரீ. ஸேஸயோனிபடிக்கே²பவசனமேதம். தேன க³ப்³ப⁴வாஸது³க்கா²பா⁴வமாஹ. தத்த² பரினிப்³பா³யீதி இமினா ஸேஸது³க்கா²பா⁴வம். தத்த² பரினிப்³பா³யிதா சஸ்ஸ காமலோகே க²ந்த⁴பீ³ஜஸ்ஸ அபுனாக³மனவஸேனேவாதி த³ஸ்ஸேதும் ‘‘அனாவத்தித⁴ம்மோ’’தி வுத்தம். உபரியேவாதி ப்³ரஹ்மலோகேயேவ. அனாவத்தித⁴ம்மோதி ததோ ப்³ரஹ்மலோகா புனப்புனம் படிஸந்தி⁴வஸேன ந ஆவத்தனத⁴ம்மோ. தேனாஹ ‘‘யோனிக³திவஸேன அனாக³மனத⁴ம்மோ’’தி.

பதே³ஸம் பதே³ஸகாரீ ஆராதே⁴தீதி ஸீலக்க²ந்தா⁴தீ³னம் பாரிபூரியா ஏகதே³ஸபூ⁴தம் ஹேட்டி²மமக்³க³த்தயம் பதே³ஸோ, தம் கரோந்தோ பதே³ஸம் ஏகதே³ஸபூ⁴தம் ஹேட்டி²மம் ப²லத்தயமேவ ஆராதே⁴தி, நிப்பா²தே³தீதி அத்தோ². தேனாஹ ‘‘பதே³ஸகாரீ புக்³க³லோ நாம ஸோதாபன்னோ’’திஆதி³. பரிபூரம் பரிபூரகாரீதி ஸீலக்க²ந்தா⁴தீ³ஹி ஸத்³தி⁴ந்த்³ரியாதீ³ஹி ச பரிதோ பூரணேன பரிபூரஸங்கா²தம் அரஹத்தமக்³க³ம் கரோந்தோ நிப்³ப³த்தேந்தோ பரிபூரம் அரஹத்தப²லம் ஆராதே⁴தி, நிப்பா²தே³தீதி அத்தோ². தேனாஹ ‘‘பரிபூரகாரீ நாம அரஹா’’திஆதி³.

பட²மஸிக்கா²ஸுத்தவண்ணனா நிட்டி²தா.