(9) 4. ஸமணவக்³கோ³

1-5. ஸமணஸுத்தாதி³வண்ணனா

82-86. சதுத்த²ஸ்ஸ பட²மே ஸம்மா ஆதா³னம் க³ஹணம் ஸமாதா³னந்தி ஆஹ ‘‘ஸமாதா³னம் வுச்சதி க³ஹண’’ந்தி. அதி⁴கம் விஸிட்ட²ம் ஸீலந்தி அதி⁴ஸீலம். லோகியஸீலஸ்ஸ அதி⁴ஸீலபா⁴வோ பரியாயேனாதி நிப்பரியாயமேவ தம் த³ஸ்ஸேதும் ‘‘அபிச ஸப்³ப³ம்பி லோகியஸீல’’ந்திஆதி³ வுத்தம். ஸிக்கி²தப்³ப³தோதி ஆஸேவிதப்³ப³தோ. பஞ்சபி த³ஸபி வா ஸீலானி ஸீலம் நாம, பாதிமோக்க²ஸம்வரோ அதி⁴ஸீலம் நாம அனவஸேஸகாயிகசேதஸிகஸம்வரபா⁴வதோ மக்³க³ஸீலஸ்ஸ பத³ட்டா²னபா⁴வதோ ச. அட்ட² ஸமாபத்தியோ சித்தம், விபஸ்ஸனாபாத³கஜ்ஜா²னம் அதி⁴சித்தம் மக்³க³ஸமாதி⁴ஸ்ஸ அதி⁴ட்டா²னபா⁴வதோ. கம்மஸ்ஸகதஞாணம் பஞ்ஞா, விபஸ்ஸனா அதி⁴பஞ்ஞா மக்³க³பஞ்ஞாய அதி⁴ட்டா²னபா⁴வதோ. அபிச நிப்³பா³னம் பத்த²யந்தேன ஸமாதி³ன்னம் பஞ்சஸீலம் த³ஸஸீலம்பி அதி⁴ஸீலமேவ நிப்³பா³னாதி⁴க³மஸ்ஸ பச்சயபா⁴வதோ. நிப்³பா³னம் பத்த²யந்தேன ஸமாபன்னா அட்ட² ஸமாபத்தியோபி அதி⁴சித்தமேவ.

‘‘கல்யாணகாரீ கல்யாணம், பாபகாரீ ச பாபகம்;

அனுபோ⁴தி த்³வயமேதம், அனுப³ந்த⁴ஞ்ஹி காரண’’ந்தி. –

ஏவம் அதீதே அனாக³தே ச வட்டமூலகது³க்க²ஸல்லக்க²ணவஸேன ஸம்வேக³வத்து²தாய விமுத்திஆகங்கா²ய பச்சயபூ⁴தா கம்மஸ்ஸகதபஞ்ஞாபி அதி⁴பஞ்ஞாதி வத³ந்தி. து³தியததியசதுத்த²பஞ்சமானி உத்தானத்தா²னேவ.

ஸமணஸுத்தாதி³வண்ணனா நிட்டி²தா.

6. பட²மஸிக்கா²ஸுத்தவண்ணனா

87. ச²ட்டே² ஸமத்தகாரீதி அனூனேன பரிபூரேன ஆகாரேன ஸமன்னாக³தோ. ஸிக்கா²பதா³னம் கு²த்³தா³னுகு²த்³த³கத்தம் அபேக்கா²ஸித்³த⁴ந்தி ஆஹ ‘‘தத்ராபி ஸங்கா⁴தி³ஸேஸம் கு²த்³த³க’’ந்திஆதி³. அங்கு³த்தரமஹானிகாயவளஞ்ஜனகஆசரியாதி அங்கு³த்தரனிகாயம் பரிஹரந்தா ஆசரியா, அங்கு³த்தரபா⁴ணகாதி வுத்தம் ஹோதி. லோகவஜ்ஜம் நாபஜ்ஜதி லோகவஜ்ஜஸிக்கா²பதா³னம் வீதிக்கமஸாத⁴கஸ்ஸ கிலேஸக³ஹனஸ்ஸ ஸப்³ப³ஸோ பஹீனத்தா. பண்ணத்திவஜ்ஜமேவ ஆபஜ்ஜதி பண்ணத்திவீதிக்கமம் வா அஜானதோபி ஆபத்திஸம்ப⁴வதோ. சித்தேன ஆபஜ்ஜந்தோ ரூபியப்படிக்³க³ஹணம் ஆபஜ்ஜதீதி உபனிக்கி²த்தஸாதி³யேன ஆபஜ்ஜதி.

ப்³ரஹ்மசரியஸ்ஸ ஆதி³பூ⁴தானி ஆதி³ப்³ரஹ்மசரியானி, தானி ஏவ ஆதி³ப்³ரஹ்மசரியகானி யதா² ‘‘வினயோ ஏவ வேனயிகோ’’தி ஆஹ ‘‘மக்³க³ப்³ரஹ்மசரியஸ்ஸா’’திஆதி³. சத்தாரி மஹாஸீலஸிக்கா²பதா³னீதி சத்தாரி பாராஜிகானி ஸந்தா⁴ய வத³தி. படிபக்க²த⁴ம்மானம் அனவஸேஸதோ ஸவனதோ பக்³க⁴ரணதோ ஸோதோ, அரியமக்³கோ³தி ஆஹ ‘‘ஸோதஸங்கா²தேன மக்³கே³னா’’தி. வினிபாதேதி விரூபம் ஸது³க்க²ம் ஸஉபாயாஸம் நிபாதேதீதி வினிபாதோ, அபாயது³க்கே² கி²பனகோ. த⁴ம்மோதி ஸபா⁴வோ. நாஸ்ஸ வினிபாதோ த⁴ம்மோதி அவினிபாதத⁴ம்மோ, ந அத்தானம் அபாயேஸு வினிபாதனஸபா⁴வோதி வுத்தம் ஹோதி. கஸ்மா? யே த⁴ம்மா அபாயக³மனீயா, தேஸம் பஹீனத்தா. தேனாஹ ‘‘அவினிபாதத⁴ம்மோதி சதூஸு அபாயேஸு அபதனஸபா⁴வோ’’தி. தத்த² அபதனஸபா⁴வோதி அனுப்பஜ்ஜனஸபா⁴வோ. ஸோதாபத்திமக்³க³னியாமேன நியதோதி உபரிமக்³கா³தி⁴க³மஸ்ஸ அவஸ்ஸம்பா⁴வீபா⁴வதோ நியதோ. தேனேவாஹ ‘‘ஸம்போ³தி⁴பராயணோ’’தி. ஹேட்டி²மந்ததோ ஸத்தமப⁴வதோ உபரி அனுப்பஜ்ஜனத⁴ம்மதாய வா நியதோ. ஸம்பு³ஜ்ஜ²தீதி ஸம்போ³தி⁴, அரியமக்³கோ³. ஸோ பன பட²மமக்³க³ஸ்ஸ அதி⁴க³தத்தா அவஸிட்டோ² ச அதி⁴க³ந்தப்³ப³பா⁴வேன இச்சி²தப்³போ³தி உபரிமக்³க³த்தயஸங்கா²தா ஸம்போ³தி⁴ பரம் அயனம் பரா க³தி அஸ்ஸாதி ஸம்போ³தி⁴பராயணோ. தேனாஹ ‘‘உபரிமக்³க³த்தயஸம்போ³தி⁴பராயணோ’’தி.

தனுபா⁴வாதி பரியுட்டா²னமந்த³தாய ச கதா³சி கரஹசி உப்பத்தியா ச தனுபா⁴வேன. தனுத்தஞ்ஹி த்³வீஹி காரணேஹி வேதி³தப்³ப³ம் அதி⁴ச்சுப்பத்தியா ச பரியுட்டா²னமந்த³தாய ச. ஸகதா³கா³மிஸ்ஸ ஹி வட்டானுஸாரிமஹாஜனஸ்ஸ விய கிலேஸா அபி⁴ண்ஹம் ந உப்பஜ்ஜந்தி, கதா³சி கரஹசி உப்பஜ்ஜந்தி விரளாகாரா ஹுத்வா விரளவாபிதே கே²த்தே அங்குரா விய. உப்பஜ்ஜமானாபி ச வட்டானுஸாரிமஹாஜனஸ்ஸேவ மத்³த³ந்தா ப²ரந்தா சா²தே³ந்தா அந்த⁴காரம் கரோந்தா ந உப்பஜ்ஜந்தி, மந்த³மந்தா³ உப்பஜ்ஜந்தி தனுகாகாரா ஹுத்வா அப்³ப⁴படலமிவ மக்கி²காபத்தமிவ ச. தத்த² கேசி தே²ரா ப⁴ணந்தி ‘‘ஸகதா³கா³மிஸ்ஸ கிலேஸா கிஞ்சாபி சிரேன உப்பஜ்ஜந்தி, ப³ஹலாவ உப்பஜ்ஜந்தி. ததா² ஹிஸ்ஸ புத்தா ச தீ⁴தரோ ச தி³ஸ்ஸந்தீ’’தி. ஏதம் பன அப்பமாணம். புத்ததீ⁴தரோ ஹி அங்க³பச்சங்க³பராமஸனமத்தேனபி ஹோந்தீதி. த்³வீஹியேவ காரணேஹிஸ்ஸ கிலேஸானம் தனுத்தம் வேதி³தப்³ப³ம் அதி⁴ச்சுப்பத்தியா ச பரியுட்டா²னமந்த³தாய சாதி.

ஹேட்டா²பா⁴கி³யானந்தி ஏத்த² ஹேட்டா²தி மஹக்³க³தபூ⁴மிதோ ஹேட்டா², காமபூ⁴மியந்தி அத்தோ². தேஸம் பச்சயபா⁴வேன ஹேட்டா²பா⁴க³ஸ்ஸ ஹிதாதி ஹேட்டா²பா⁴கி³யா, தேஸம் ஹேட்டா²பா⁴கி³யானம், ஹேட்டா²பா⁴க³ஸ்ஸ காமப⁴வஸ்ஸ பச்சயபா⁴வேன க³ஹிதானந்தி அத்தோ². ஸம்யோஜேந்தி ப³ந்த⁴ந்தி க²ந்த⁴க³திப⁴வாதீ³ஹி க²ந்த⁴க³திப⁴வாத³யோ, கம்மம் வா ப²லேனாதி ஸம்யோஜனானீதி ஆஹ ‘‘ஸம்யோஜனானந்தி ப³ந்த⁴னான’’ந்தி. அஸமுச்சி²ன்னராகா³தி³கஸ்ஸ ஹி ஏதரஹி க²ந்தா⁴தீ³னம் ஆயதிம் க²ந்தா⁴தீ³ஹி ஸம்ப³ந்தோ⁴, ஸமுச்சி²ன்னராகா³தி³கஸ்ஸ பன தம் நத்தி², கதானம்பி கம்மானம் அஸமத்த²பா⁴வாபத்திதோ ராகா³தீ³னம் அன்வயதோ ப்³யதிரேகதோ ச ஸம்யோஜனட்டோ² ஸித்³தோ⁴. பரிக்க²யேனாதி ஸமுச்சே²தே³ன.

ஓபபாதிகோதி உபபாதிகயோனிகோ உபபதனே ஸாது⁴காரீ. ஸேஸயோனிபடிக்கே²பவசனமேதம். தேன க³ப்³ப⁴வாஸது³க்கா²பா⁴வமாஹ. தத்த² பரினிப்³பா³யீதி இமினா ஸேஸது³க்கா²பா⁴வம். தத்த² பரினிப்³பா³யிதா சஸ்ஸ காமலோகே க²ந்த⁴பீ³ஜஸ்ஸ அபுனாக³மனவஸேனேவாதி த³ஸ்ஸேதும் ‘‘அனாவத்தித⁴ம்மோ’’தி வுத்தம். உபரியேவாதி ப்³ரஹ்மலோகேயேவ. அனாவத்தித⁴ம்மோதி ததோ ப்³ரஹ்மலோகா புனப்புனம் படிஸந்தி⁴வஸேன ந ஆவத்தனத⁴ம்மோ. தேனாஹ ‘‘யோனிக³திவஸேன அனாக³மனத⁴ம்மோ’’தி.

பதே³ஸம் பதே³ஸகாரீ ஆராதே⁴தீதி ஸீலக்க²ந்தா⁴தீ³னம் பாரிபூரியா ஏகதே³ஸபூ⁴தம் ஹேட்டி²மமக்³க³த்தயம் பதே³ஸோ, தம் கரோந்தோ பதே³ஸம் ஏகதே³ஸபூ⁴தம் ஹேட்டி²மம் ப²லத்தயமேவ ஆராதே⁴தி, நிப்பா²தே³தீதி அத்தோ². தேனாஹ ‘‘பதே³ஸகாரீ புக்³க³லோ நாம ஸோதாபன்னோ’’திஆதி³. பரிபூரம் பரிபூரகாரீதி ஸீலக்க²ந்தா⁴தீ³ஹி ஸத்³தி⁴ந்த்³ரியாதீ³ஹி ச பரிதோ பூரணேன பரிபூரஸங்கா²தம் அரஹத்தமக்³க³ம் கரோந்தோ நிப்³ப³த்தேந்தோ பரிபூரம் அரஹத்தப²லம் ஆராதே⁴தி, நிப்பா²தே³தீதி அத்தோ². தேனாஹ ‘‘பரிபூரகாரீ நாம அரஹா’’திஆதி³.

பட²மஸிக்கா²ஸுத்தவண்ணனா நிட்டி²தா.

7-10. து³தியஸிக்கா²ஸுத்தாதி³வண்ணனா

88-91. ஸத்தமே குலா குலம் க³மனகோதி குலதோ குலம் க³ச்ச²ந்தோ. த்³வே வா தயோ வா ப⁴வேதி தே³வமனுஸ்ஸவஸேன த்³வே வா தயோ வா ப⁴வே. மிஸ்ஸகப⁴வவஸேன ஹேதம் வுத்தம். தே³ஸனாமத்தமேவ சேதம் ‘‘த்³வே வா தீணி வா’’தி. யாவ ச²ட்ட²ப⁴வா ஸம்ஸரந்தோபி கோலம்கோலோவ ஹோதி. தேனேவாஹ ‘‘அயஞ்ஹி த்³வே வா ப⁴வே…பே… ஏவமேத்த² விகப்போ த³ட்ட²ப்³போ³’’தி. உளாரகுலவசனோ வா ஏத்த² குலஸத்³தோ³, குலதோ குலம் க³ச்ச²தீதி கோலம்கோலோ. ஸோதாபத்திப²லஸச்சி²கிரியதோ பட்டா²ய ஹி நீசகுலே உப்பத்தி நாம நத்தி², மஹாபோ⁴க³குலேஸு ஏவ நிப்³ப³த்ததீதி அத்தோ². கேவலோ ஹி குலஸத்³தோ³ மஹாகுலமேவ வத³தி ‘‘குலபுத்தோ’’திஆதீ³ஸு விய. ஏகபீ³ஜீதி ஏத்த² க²ந்த⁴பீ³ஜம் நாம கதி²தம், க²ந்த⁴பீ³ஜந்தி ச படிஸந்தி⁴விஞ்ஞாணம் வுச்சதி. யஸ்ஸ ஹி ஸோதாபன்னஸ்ஸ ஏகம் க²ந்த⁴பீ³ஜம் அத்தி², ஏகம் ப⁴வக்³க³ஹணம், ஸோ ஏகபீ³ஜீ நாம. தேனாஹ ‘‘ஏகஸ்ஸேவ ப⁴வஸ்ஸ பீ³ஜம் ஏதஸ்ஸ அத்தீ²தி ஏகபீ³ஜீ’’தி. ‘‘மானுஸகம் ப⁴வ’’ந்தி இத³ம் பனேத்த² தே³ஸனாமத்தமேவ, ‘‘தே³வப⁴வம் நிப்³ப³த்தேதீ’’திபி பன வத்தும் வட்டதியேவ.

உத்³த⁴ம்வாஹிபா⁴வேன உத்³த⁴மஸ்ஸ தண்ஹாஸோதம் வட்டஸோதம் வாதி உத்³த⁴ம்ஸோதோ, உத்³த⁴ம் வா க³ந்த்வா படிலபி⁴தப்³ப³தோ உத்³த⁴மஸ்ஸ மக்³க³ஸோதந்தி உத்³த⁴ம்ஸோதோ. படிஸந்தி⁴வஸேன அகனிட்ட²ப⁴வம் க³ச்ச²தீதி அகனிட்ட²கா³மீ. யத்த² கத்த²சீதி அவிஹாதீ³ஸு யத்த² கத்த²சி. ஸப்பயோகே³னாதி விபஸ்ஸனாஞாணாபி⁴ஸங்கா²ரஸங்கா²தேன பயோகே³ன ஸஹ, மஹதா விபஸ்ஸனாபயோகே³னாதி அத்தோ². உபஹச்சாதி ஏதஸ்ஸ உபக³ந்த்வாதி அத்தோ². தேன வேமஜ்ஜா²திக்கமோ காலகிரியாபக³மனஞ்ச ஸங்க³ஹிதம் ஹோதி, தஸ்மா ஆயுவேமஜ்ஜ²ம் அதிக்கமித்வா பரினிப்³பா³யந்தோ உபஹச்சபரினிப்³பா³யீ நாம ஹோதீதி ஆஹ ‘‘யோ பன கப்பஸஹஸ்ஸாயுகேஸு அவிஹேஸூ’’திஆதி³. ஸோ திவிதோ⁴ ஹோதீதி ஞாணஸ்ஸ திக்க²மஜ்ஜ²முது³பா⁴வேன திவிதோ⁴ ஹோதி. தேனாஹ ‘‘கப்பஸஹஸ்ஸாயுகேஸூ’’திஆதி³.

ஸத்³தா⁴து⁴ரேன அபி⁴னிவிஸித்வாதி ‘‘ஸசே ஸத்³தா⁴ய ஸக்கா நிப்³ப³த்தேதும், நிப்³ப³த்தேஸ்ஸாமி லோகுத்தரமக்³க³’’ந்தி ஏவம் ஸத்³தா⁴து⁴ரவஸேன அபி⁴னிவிஸித்வா விபஸ்ஸனம் பட்ட²பேத்வா. பஞ்ஞாது⁴ரேன அபி⁴னிவிட்டோ²தி ‘‘ஸசே பஞ்ஞாய ஸக்கா, நிப்³ப³த்தேஸ்ஸாமி லோகுத்தரமக்³க³’’ந்தி ஏவம் பஞ்ஞாது⁴ரம் கத்வா அபி⁴னிவிட்டோ². யதா²வுத்தமேவ அட்ட²வித⁴த்தம் கோலம்கோலஸத்தக்க²த்துபரமேஸு அதிதி³ஸந்தோ ‘‘ததா² கோலம்கோலா ஸத்தக்க²த்துபரமா சா’’தி ஆஹ. வுத்தனயேனேவ அட்ட² கோலம்கோலா, அட்ட² ஸத்தக்க²த்துபரமாதி வுத்தம் ஹோதி.

தத்த² ஸத்தக்க²த்தும் பரமா ப⁴வூபபத்தி அத்தபா⁴வக்³க³ஹணம் அஸ்ஸ, ததோ பரம் அட்ட²மம் ப⁴வம் நாதி³யதீதி ஸத்தக்க²த்துபரமோ. ப⁴க³வதா க³ஹிதனாமவஸேனேவ சேதானி அரியாய ஜாதியா ஜாதானம் தேஸம் நாமானி ஜாதானி குமாரானம் மாதாபிதூஹி க³ஹிதனாமானி விய. ஏத்தகஞ்ஹி டா²னம் க³தோ ஏகபீ³ஜீ நாம ஹோதி, ஏத்தகம் கோலம்கோலோ, ஏத்தகம் ஸத்தக்க²த்துபரமோதி ப⁴க³வதா ஏதேஸம் நாமம் க³ஹிதம். நியமதோ பன அயம் ஏகபீ³ஜீ, அயம் கோலம்கோலோ, அயம் ஸத்தக்க²த்துபரமோதி நத்தி². கோ பன நேஸம் ஏதம் பபே⁴த³ம் நியமேதீதி? கேசி தாவ தே²ரா ‘‘புப்³ப³ஹேது நியமேதீ’’தி வத³ந்தி, கேசி பட²மமக்³கோ³, கேசி உபரி தயோ மக்³கா³, கேசி திண்ணம் மக்³கா³னம் விபஸ்ஸனாதி.

தத்த² ‘‘புப்³ப³ஹேது நியமேதீ’’தி வாதே³ பட²மமக்³க³ஸ்ஸ உபனிஸ்ஸயோ கதோ நாம ஹோதி, ‘‘உபரி தயோ மக்³கா³ நிருபனிஸ்ஸயா உப்பன்னா’’தி வசனம் ஆபஜ்ஜதி. ‘‘பட²மமக்³கோ³ நியமேஹீ’’தி வாதே³ உபரி திண்ணம் மக்³கா³னம் நிரத்த²கதா ஆபஜ்ஜதி. ‘‘உபரி தயோ மக்³கா³ நியமேந்தீ’’தி வாதே³ பட²மமக்³கே³ அனுப்பன்னேயேவ உபரி தயோ மக்³கா³ உப்பன்னாதி ஆபஜ்ஜதீதி. ‘‘திண்ணம் மக்³கா³னம் விபஸ்ஸனா நியமேதீ’’தி வாதோ³ பன யுஜ்ஜதி. ஸசே ஹி உபரி திண்ணம் மக்³கா³னம் விபஸ்ஸனா ப³லவதீ ஹோதி, ஏகபீ³ஜீ நாம ஹோதி, ததோ மந்த³தராய கோலம்கோலோ, ததோ மந்த³தராய ஸத்தக்க²த்துபரமோதி.

ஏகச்சோ ஹி ஸோதாபன்னோ வட்டஜ்ஜா²ஸயோ ஹோதி வட்டாபி⁴ரதோ, புனப்புனம் வட்டஸ்மிம்யேவ சரதி ஸந்தி³ஸ்ஸதி. அனாத²பிண்டி³கோ ஸேட்டி², விஸாகா² உபாஸிகா, சூளரத²மஹாரதா² தே³வபுத்தா, அனேகவண்ணோ தே³வபுத்தோ, ஸக்கோ தே³வராஜா, நாக³த³த்தோ தே³வபுத்தோதி இமே ஹி ஏத்தகா ஜனா வட்டஜ்ஜா²ஸயா வட்டாபி⁴ரதா ஆதி³தோ பட்டா²ய ச² தே³வலோகே ஸோதே⁴த்வா அகனிட்டே² ட²த்வா பரினிப்³பா³யிஸ்ஸந்தி, இமே இத⁴ ந க³ஹிதா. ந கேவலஞ்சிமேவ, யோபி மனுஸ்ஸேஸுயேவ ஸத்தக்க²த்தும் ஸம்ஸரித்வா அரஹத்தம் பாபுணாதி, யோபி தே³வலோகே நிப்³ப³த்தோ தே³வேஸுயேவ ஸத்தக்க²த்தும் அபராபரம் ஸம்ஸரித்வா அரஹத்தம் பாபுணாதி. இமேபி இத⁴ ந க³ஹிதா, காலேன தே³வே, காலேன மனுஸ்ஸே ஸம்ஸரித்வா பன அரஹத்தம் பாபுணந்தோவ இத⁴ க³ஹிதோ, தஸ்மா ‘‘ஸத்தக்க²த்துபரமோ’’தி இத³ம் இத⁴ட்ட²கவோகிண்ணப⁴வூபபத்திகஸுக்க²விபஸ்ஸகஸ்ஸ நாமம் கதி²தந்தி வேதி³தப்³ப³ம்.

‘‘ஸகிதே³வ இமம் லோகம் ஆக³ந்த்வா’’தி (பு. ப. 34) வசனதோ பஞ்சஸு ஸகதா³கா³மீஸு சத்தாரோ வஜ்ஜேத்வா ஏகோவ க³ஹிதோ. ஏகச்சோ ஹி இத⁴ ஸகதா³கா³மிப²லம் பத்வா இதே⁴வ பரினிப்³பா³யதி, ஏகச்சோ இத⁴ பத்வா தே³வலோகே பரினிப்³பா³யதி, ஏகச்சோ தே³வலோகே பத்வா தத்தே²வ பரினிப்³பா³யதி, ஏகச்சோ தே³வலோகே பத்வா இதூ⁴பபஜ்ஜித்வா பரினிப்³பா³யதி. இமே சத்தாரோபி இத⁴ ந க³ஹிதா. யோ பன இத⁴ பத்வா தே³வலோகே யாவதாயுகம் வஸித்வா புன இதூ⁴பபஜ்ஜித்வா பரினிப்³பா³யிஸ்ஸதி, அயம் ஏகோவ இத⁴ க³ஹிதோதி வேதி³தப்³போ³.

இதா³னி தஸ்ஸ பபே⁴த³ம் த³ஸ்ஸேந்தோ ‘‘தீஸு பன விமோக்கே²ஸூ’’திஆதி³மாஹ. இமஸ்ஸ பன ஸகதா³கா³மினோ ஏகபீ³ஜினா ஸத்³தி⁴ம் கிம் நானாகரணந்தி? ஏகபீ³ஜிஸ்ஸ ஏகாவ படிஸந்தி⁴, ஸகதா³கா³மிஸ்ஸ த்³வே படிஸந்தி⁴யோ, இத³ம் தேஸம் நானாகரணம். ஸுஞ்ஞதவிமோக்கே²ன விமுத்தகீ²ணாஸவோ படிபதா³வஸேன சதுப்³பி³தோ⁴ ஹோதி, ததா² அனிமித்தஅப்பணிஹிதவிமோக்கே²ஹீதி ஏவம் த்³வாத³ஸ அரஹந்தா ஹோந்தீதி ஆஹ ‘‘யதா² பன ஸகதா³கா³மினோ, ததே²வ அரஹந்தோ த்³வாத³ஸ வேதி³தப்³பா³’’தி. அட்ட²மனவமத³ஸமானி உத்தானத்தா²னேவ.

து³தியஸிக்கா²ஸுத்தாதி³வண்ணனா நிட்டி²தா.

11. ஸங்கவாஸுத்தவண்ணனா

92. ஏகாத³ஸமே விஹாரபடிப³த்³த⁴னவகம்மாதி³பா⁴ரம் ஹரதி பவத்தேதீதி பா⁴ரஹாரோ. தேனேவாஹ ‘‘நவே ஆவாஸே ஸமுட்டா²பேதி, புராணே படிஜக்³க³தீ’’தி. ஸிக்கி²தப்³ப³தோ ஸிக்கா², பஜ்ஜிதப்³ப³தோ, பஜ்ஜந்தி ஏதேஹீதி வா பதா³னி, ஸிக்கா²யேவ பதா³னி ஸிக்கா²பதா³னீதி ஆஹ ‘‘ஸிக்கா²ஸங்கா²தேஹி பதே³ஹீ’’தி. த³ஸ்ஸேதீதி பச்சக்க²தோ த³ஸ்ஸேதி, ஹத்தா²மலகம் விய பாகடே விபூ⁴தே கத்வா விபா⁴வேதி. க³ண்ஹாபேதீதி தே த⁴ம்மே மனஸா அனுபக்கி²தே தி³ட்டி²யா ஸுப்படிவித்³தே⁴ காரேந்தோ உக்³க³ண்ஹாபேதி. ஸமுஸ்ஸாஹேதீதி ஸமாதி⁴ம்ஹி உஸ்ஸாஹம் ஜனேதி. படிலத்³த⁴கு³ணேஹீதி தாய தே³ஸனாய தன்னிஸ்ஸயபச்சத்தபுரிஸகாரேன ச தேஸம் படிவித்³த⁴கு³ணேஹி. வோதா³பேதீதி தேஸம் சித்தஸந்தானம் அஸ்ஸத்³தி⁴யாதி³கிலேஸமலாபக³மனேன பப⁴ஸ்ஸரம் கரோதி. ஸண்ஹம் ஸண்ஹம் கதே²தீதி அதிவிய ஸுகு²மம் கத்வா கதே²தி.

அச்சயனம் ஸாது⁴மரியாத³ம் மத்³தி³த்வா வீதிக்கமனம் அச்சயோதி ஆஹ ‘‘அபராதோ⁴’’தி. அச்சேதி அதிக்கமதி ஏதேனாதி வா அச்சயோ, வீதிக்கமஸ்ஸ பவத்தனகோ அகுஸலத⁴ம்மோ. ஸோ ஏவ அபரஜ்ஜ²தி ஏதேனாதி அபராதோ⁴. ஸோ ஹி அபரஜ்ஜ²ந்தம் புரிஸம் அதி⁴ப⁴வித்வா பவத்ததி. தேனாஹ ‘‘அதிக்கம்ம அதி⁴ப⁴வித்வா பவத்தோ’’தி. படிக்³க³ண்ஹாதூதி அதி⁴வாஸனவஸேன ஸம்படிச்ச²தூதி அத்தோ²தி ஆஹ ‘‘க²மதூ’’தி. ஸதே³வகேன லோகேன நிஸ்ஸரணந்தி அரணீயதோ அரியோ, ததா²க³தோதி ஆஹ ‘‘அரியஸ்ஸ வினயேதி பு³த்³த⁴ஸ்ஸ ப⁴க³வதோ ஸாஸனே’’தி. புக்³க³லாதி⁴ட்டா²னம் கரோந்தோதி காமம் ‘‘வுத்³தி⁴ ஹேஸா’’தி த⁴ம்மாதி⁴ட்டா²னவஸேன வாக்யம் ஆரத்³த⁴ம், ததா²பி தே³ஸனம் பன புக்³க³லாதி⁴ட்டா²னம் கரோந்தோ ‘‘ஸம்வரம் ஆபஜ்ஜதீ’’தி ஆஹாதி யோஜனா.

ஸங்கவாஸுத்தவண்ணனா நிட்டி²தா.

ஸமணவக்³க³வண்ணனா நிட்டி²தா.