7-10. து³தியஸிக்கா²ஸுத்தாதி³வண்ணனா

88-91. ஸத்தமே குலா குலம் க³மனகோதி குலதோ குலம் க³ச்ச²ந்தோ. த்³வே வா தயோ வா ப⁴வேதி தே³வமனுஸ்ஸவஸேன த்³வே வா தயோ வா ப⁴வே. மிஸ்ஸகப⁴வவஸேன ஹேதம் வுத்தம். தே³ஸனாமத்தமேவ சேதம் ‘‘த்³வே வா தீணி வா’’தி. யாவ ச²ட்ட²ப⁴வா ஸம்ஸரந்தோபி கோலம்கோலோவ ஹோதி. தேனேவாஹ ‘‘அயஞ்ஹி த்³வே வா ப⁴வே…பே… ஏவமேத்த² விகப்போ த³ட்ட²ப்³போ³’’தி. உளாரகுலவசனோ வா ஏத்த² குலஸத்³தோ³, குலதோ குலம் க³ச்ச²தீதி கோலம்கோலோ. ஸோதாபத்திப²லஸச்சி²கிரியதோ பட்டா²ய ஹி நீசகுலே உப்பத்தி நாம நத்தி², மஹாபோ⁴க³குலேஸு ஏவ நிப்³ப³த்ததீதி அத்தோ². கேவலோ ஹி குலஸத்³தோ³ மஹாகுலமேவ வத³தி ‘‘குலபுத்தோ’’திஆதீ³ஸு விய. ஏகபீ³ஜீதி ஏத்த² க²ந்த⁴பீ³ஜம் நாம கதி²தம், க²ந்த⁴பீ³ஜந்தி ச படிஸந்தி⁴விஞ்ஞாணம் வுச்சதி. யஸ்ஸ ஹி ஸோதாபன்னஸ்ஸ ஏகம் க²ந்த⁴பீ³ஜம் அத்தி², ஏகம் ப⁴வக்³க³ஹணம், ஸோ ஏகபீ³ஜீ நாம. தேனாஹ ‘‘ஏகஸ்ஸேவ ப⁴வஸ்ஸ பீ³ஜம் ஏதஸ்ஸ அத்தீ²தி ஏகபீ³ஜீ’’தி. ‘‘மானுஸகம் ப⁴வ’’ந்தி இத³ம் பனேத்த² தே³ஸனாமத்தமேவ, ‘‘தே³வப⁴வம் நிப்³ப³த்தேதீ’’திபி பன வத்தும் வட்டதியேவ.

உத்³த⁴ம்வாஹிபா⁴வேன உத்³த⁴மஸ்ஸ தண்ஹாஸோதம் வட்டஸோதம் வாதி உத்³த⁴ம்ஸோதோ, உத்³த⁴ம் வா க³ந்த்வா படிலபி⁴தப்³ப³தோ உத்³த⁴மஸ்ஸ மக்³க³ஸோதந்தி உத்³த⁴ம்ஸோதோ. படிஸந்தி⁴வஸேன அகனிட்ட²ப⁴வம் க³ச்ச²தீதி அகனிட்ட²கா³மீ. யத்த² கத்த²சீதி அவிஹாதீ³ஸு யத்த² கத்த²சி. ஸப்பயோகே³னாதி விபஸ்ஸனாஞாணாபி⁴ஸங்கா²ரஸங்கா²தேன பயோகே³ன ஸஹ, மஹதா விபஸ்ஸனாபயோகே³னாதி அத்தோ². உபஹச்சாதி ஏதஸ்ஸ உபக³ந்த்வாதி அத்தோ². தேன வேமஜ்ஜா²திக்கமோ காலகிரியாபக³மனஞ்ச ஸங்க³ஹிதம் ஹோதி, தஸ்மா ஆயுவேமஜ்ஜ²ம் அதிக்கமித்வா பரினிப்³பா³யந்தோ உபஹச்சபரினிப்³பா³யீ நாம ஹோதீதி ஆஹ ‘‘யோ பன கப்பஸஹஸ்ஸாயுகேஸு அவிஹேஸூ’’திஆதி³. ஸோ திவிதோ⁴ ஹோதீதி ஞாணஸ்ஸ திக்க²மஜ்ஜ²முது³பா⁴வேன திவிதோ⁴ ஹோதி. தேனாஹ ‘‘கப்பஸஹஸ்ஸாயுகேஸூ’’திஆதி³.

ஸத்³தா⁴து⁴ரேன அபி⁴னிவிஸித்வாதி ‘‘ஸசே ஸத்³தா⁴ய ஸக்கா நிப்³ப³த்தேதும், நிப்³ப³த்தேஸ்ஸாமி லோகுத்தரமக்³க³’’ந்தி ஏவம் ஸத்³தா⁴து⁴ரவஸேன அபி⁴னிவிஸித்வா விபஸ்ஸனம் பட்ட²பேத்வா. பஞ்ஞாது⁴ரேன அபி⁴னிவிட்டோ²தி ‘‘ஸசே பஞ்ஞாய ஸக்கா, நிப்³ப³த்தேஸ்ஸாமி லோகுத்தரமக்³க³’’ந்தி ஏவம் பஞ்ஞாது⁴ரம் கத்வா அபி⁴னிவிட்டோ². யதா²வுத்தமேவ அட்ட²வித⁴த்தம் கோலம்கோலஸத்தக்க²த்துபரமேஸு அதிதி³ஸந்தோ ‘‘ததா² கோலம்கோலா ஸத்தக்க²த்துபரமா சா’’தி ஆஹ. வுத்தனயேனேவ அட்ட² கோலம்கோலா, அட்ட² ஸத்தக்க²த்துபரமாதி வுத்தம் ஹோதி.

தத்த² ஸத்தக்க²த்தும் பரமா ப⁴வூபபத்தி அத்தபா⁴வக்³க³ஹணம் அஸ்ஸ, ததோ பரம் அட்ட²மம் ப⁴வம் நாதி³யதீதி ஸத்தக்க²த்துபரமோ. ப⁴க³வதா க³ஹிதனாமவஸேனேவ சேதானி அரியாய ஜாதியா ஜாதானம் தேஸம் நாமானி ஜாதானி குமாரானம் மாதாபிதூஹி க³ஹிதனாமானி விய. ஏத்தகஞ்ஹி டா²னம் க³தோ ஏகபீ³ஜீ நாம ஹோதி, ஏத்தகம் கோலம்கோலோ, ஏத்தகம் ஸத்தக்க²த்துபரமோதி ப⁴க³வதா ஏதேஸம் நாமம் க³ஹிதம். நியமதோ பன அயம் ஏகபீ³ஜீ, அயம் கோலம்கோலோ, அயம் ஸத்தக்க²த்துபரமோதி நத்தி². கோ பன நேஸம் ஏதம் பபே⁴த³ம் நியமேதீதி? கேசி தாவ தே²ரா ‘‘புப்³ப³ஹேது நியமேதீ’’தி வத³ந்தி, கேசி பட²மமக்³கோ³, கேசி உபரி தயோ மக்³கா³, கேசி திண்ணம் மக்³கா³னம் விபஸ்ஸனாதி.

தத்த² ‘‘புப்³ப³ஹேது நியமேதீ’’தி வாதே³ பட²மமக்³க³ஸ்ஸ உபனிஸ்ஸயோ கதோ நாம ஹோதி, ‘‘உபரி தயோ மக்³கா³ நிருபனிஸ்ஸயா உப்பன்னா’’தி வசனம் ஆபஜ்ஜதி. ‘‘பட²மமக்³கோ³ நியமேஹீ’’தி வாதே³ உபரி திண்ணம் மக்³கா³னம் நிரத்த²கதா ஆபஜ்ஜதி. ‘‘உபரி தயோ மக்³கா³ நியமேந்தீ’’தி வாதே³ பட²மமக்³கே³ அனுப்பன்னேயேவ உபரி தயோ மக்³கா³ உப்பன்னாதி ஆபஜ்ஜதீதி. ‘‘திண்ணம் மக்³கா³னம் விபஸ்ஸனா நியமேதீ’’தி வாதோ³ பன யுஜ்ஜதி. ஸசே ஹி உபரி திண்ணம் மக்³கா³னம் விபஸ்ஸனா ப³லவதீ ஹோதி, ஏகபீ³ஜீ நாம ஹோதி, ததோ மந்த³தராய கோலம்கோலோ, ததோ மந்த³தராய ஸத்தக்க²த்துபரமோதி.

ஏகச்சோ ஹி ஸோதாபன்னோ வட்டஜ்ஜா²ஸயோ ஹோதி வட்டாபி⁴ரதோ, புனப்புனம் வட்டஸ்மிம்யேவ சரதி ஸந்தி³ஸ்ஸதி. அனாத²பிண்டி³கோ ஸேட்டி², விஸாகா² உபாஸிகா, சூளரத²மஹாரதா² தே³வபுத்தா, அனேகவண்ணோ தே³வபுத்தோ, ஸக்கோ தே³வராஜா, நாக³த³த்தோ தே³வபுத்தோதி இமே ஹி ஏத்தகா ஜனா வட்டஜ்ஜா²ஸயா வட்டாபி⁴ரதா ஆதி³தோ பட்டா²ய ச² தே³வலோகே ஸோதே⁴த்வா அகனிட்டே² ட²த்வா பரினிப்³பா³யிஸ்ஸந்தி, இமே இத⁴ ந க³ஹிதா. ந கேவலஞ்சிமேவ, யோபி மனுஸ்ஸேஸுயேவ ஸத்தக்க²த்தும் ஸம்ஸரித்வா அரஹத்தம் பாபுணாதி, யோபி தே³வலோகே நிப்³ப³த்தோ தே³வேஸுயேவ ஸத்தக்க²த்தும் அபராபரம் ஸம்ஸரித்வா அரஹத்தம் பாபுணாதி. இமேபி இத⁴ ந க³ஹிதா, காலேன தே³வே, காலேன மனுஸ்ஸே ஸம்ஸரித்வா பன அரஹத்தம் பாபுணந்தோவ இத⁴ க³ஹிதோ, தஸ்மா ‘‘ஸத்தக்க²த்துபரமோ’’தி இத³ம் இத⁴ட்ட²கவோகிண்ணப⁴வூபபத்திகஸுக்க²விபஸ்ஸகஸ்ஸ நாமம் கதி²தந்தி வேதி³தப்³ப³ம்.

‘‘ஸகிதே³வ இமம் லோகம் ஆக³ந்த்வா’’தி (பு. ப. 34) வசனதோ பஞ்சஸு ஸகதா³கா³மீஸு சத்தாரோ வஜ்ஜேத்வா ஏகோவ க³ஹிதோ. ஏகச்சோ ஹி இத⁴ ஸகதா³கா³மிப²லம் பத்வா இதே⁴வ பரினிப்³பா³யதி, ஏகச்சோ இத⁴ பத்வா தே³வலோகே பரினிப்³பா³யதி, ஏகச்சோ தே³வலோகே பத்வா தத்தே²வ பரினிப்³பா³யதி, ஏகச்சோ தே³வலோகே பத்வா இதூ⁴பபஜ்ஜித்வா பரினிப்³பா³யதி. இமே சத்தாரோபி இத⁴ ந க³ஹிதா. யோ பன இத⁴ பத்வா தே³வலோகே யாவதாயுகம் வஸித்வா புன இதூ⁴பபஜ்ஜித்வா பரினிப்³பா³யிஸ்ஸதி, அயம் ஏகோவ இத⁴ க³ஹிதோதி வேதி³தப்³போ³.

இதா³னி தஸ்ஸ பபே⁴த³ம் த³ஸ்ஸேந்தோ ‘‘தீஸு பன விமோக்கே²ஸூ’’திஆதி³மாஹ. இமஸ்ஸ பன ஸகதா³கா³மினோ ஏகபீ³ஜினா ஸத்³தி⁴ம் கிம் நானாகரணந்தி? ஏகபீ³ஜிஸ்ஸ ஏகாவ படிஸந்தி⁴, ஸகதா³கா³மிஸ்ஸ த்³வே படிஸந்தி⁴யோ, இத³ம் தேஸம் நானாகரணம். ஸுஞ்ஞதவிமோக்கே²ன விமுத்தகீ²ணாஸவோ படிபதா³வஸேன சதுப்³பி³தோ⁴ ஹோதி, ததா² அனிமித்தஅப்பணிஹிதவிமோக்கே²ஹீதி ஏவம் த்³வாத³ஸ அரஹந்தா ஹோந்தீதி ஆஹ ‘‘யதா² பன ஸகதா³கா³மினோ, ததே²வ அரஹந்தோ த்³வாத³ஸ வேதி³தப்³பா³’’தி. அட்ட²மனவமத³ஸமானி உத்தானத்தா²னேவ.

து³தியஸிக்கா²ஸுத்தாதி³வண்ணனா நிட்டி²தா.