ஸுத்தந்திகது³கமாதிகத்த²வண்ணனா

ஸுத்தந்திகது³கேஸு வேதே³தி, விவிதே⁴ன வா ஆகாரேன ஜானாதீதி விஜ்ஜா, விபஸ்ஸனாஞாணமனோமயித்³தி⁴ச²அபி⁴ஞ்ஞாவஸப்பவத்தா பஞ்ஞா, தஸ்மிம் விஜ்ஜாபா⁴கே³ விஜ்ஜாகோட்டா²ஸே விஜ்ஜாஸபா⁴வே வத்தந்தீதி விஜ்ஜாபா⁴கி³னோ. தா ஏவ விஜ்ஜா, தம் வா விஜ்ஜம் ஸம்பயோக³வஸேன ப⁴ஜந்தீதிபி விஜ்ஜாபா⁴கி³னோ, அட்ட²வித⁴விஜ்ஜாஸம்பயுத்தத⁴ம்மா. தாஸு யா காசி ஏகா விஜ்ஜா விஜ்ஜா, ஸேஸா விஜ்ஜாபா⁴கி³னோதி ஏவம் விஜ்ஜாபி விஜ்ஜாஸம்பயுத்தத⁴ம்மாபி விஜ்ஜாபா⁴கி³னோத்வேவ வேதி³தப்³பா³, இத⁴ பன விஜ்ஜாஸம்பயுத்தா த⁴ம்மாவ அதி⁴ப்பேதா. ந விஜானாதீதி அவிஜ்ஜா, சதுஸச்சச்சா²த³கவஸேன சதுப்³பி³தோ⁴ மோஹோ, தஸ்மிம் அவிஜ்ஜாபா⁴கே³ அவிஜ்ஜாகோட்டா²ஸே அவிஜ்ஜாஸபா⁴வே வத்தந்தீதி அவிஜ்ஜாபா⁴கி³னோ. தா ஏவ அவிஜ்ஜா, தம் வா அவிஜ்ஜம் ஸம்பயோக³வஸேன ப⁴ஜந்தீதிபி அவிஜ்ஜாபா⁴கி³னோ, அவிஜ்ஜாஸம்பயுத்தத⁴ம்மா. ஏவம் அவிஜ்ஜாபி அவிஜ்ஜாஸம்பயுத்தத⁴ம்மாபி அவிஜ்ஜாபா⁴கி³னோத்வேவ வேதி³தப்³பா³, இத⁴ பன அவிஜ்ஜாஸம்பயுத்தத⁴ம்மாவ அதி⁴ப்பேதா.

தத்த² அரஹத்தமக்³க³சித்தம், பஞ்ஞாவிரஹிததம்ஸம்பயுத்தா ச விஜ்ஜாபா⁴கி³னோ ச ஞாணஸம்பயுத்தகாமாவசரஜவனானி, ஞாணவிரஹிததம்ஸம்பயுத்தா ச விபஸ்ஸனாபா⁴வேன பவத்தியம் விஜ்ஜாபா⁴கி³னோ, அஞ்ஞதா³ ந வத்தப்³பா³. ரூபாவசரசதுத்த²ஜ்ஜா²னிகஜவனசித்தானி, பஞ்ஞாவிரஹிததம்ஸம்பயுத்தா ச மனோமயித்³தி⁴பா⁴வேன ச பஞ்சாபி⁴ஞ்ஞாபா⁴வேன ச பவத்தியம் விஜ்ஜாபா⁴கி³னோ, அஞ்ஞதா³ ந வத்தப்³பா³. தத்த² த்³வாத³ஸாகுஸலசித்தானி, அவிஜ்ஜாவிரஹிததம்ஸம்பயுத்தா ச அவிஜ்ஜாபா⁴கி³னோவ, இத⁴ பன அவிஜ்ஜா, ஸேஸசித்தரூபனிப்³பா³னானி ச ந வத்தப்³பா³வ. சேதஸிகேஸு பன மோஹஅப்பமஞ்ஞா ந வத்தப்³பா³வ, ஸேஸா குஸலாப்³யாகதா ஸியா விஜ்ஜாபா⁴கி³னோ, ஸியா ந வத்தப்³பா³, திஜாதிகா த்³விதா⁴பி ந வத்தப்³பா³ ச. ஸேஸம் ஸுவிஞ்ஞேய்யமேவ. பட²மம்.

புன அனஜ்ஜோ²த்த²ரணவஸேன கிலேஸந்த⁴காரம் வித்³த⁴ம்ஸேதும் அஸமத்த²தாய விஜ்ஜு உபமா ஏதேஸந்தி விஜ்ஜூபமா, ஆதி³தோ தீஸு மக்³கே³ஸு ஞாணம்வ. நிஸ்ஸேஸம் வித்³த⁴ம்ஸனஸமத்த²தாய வஜிரம் உபமா ஏதேஸந்தி வஜிரூபமா, அரஹத்தமக்³கே³ ஞாணம். யதா² ஹி மேக⁴ந்த⁴காரே மக்³க³படிபன்னஸ்ஸ படிச்சா²த³னஅந்த⁴காரம் வித⁴மித்வா விஜ்ஜுயா உப்பன்னக்க²ணே சாதுதி³ஸா மக்³கா³ பாகடா ஹோந்தி, விஜ்ஜுயா நிருத்³தா⁴ய புன அந்த⁴காரோ ஓத்த²ரித்வா மக்³க³ம் படிச்சா²தே³தி, ஏவம் விபஸ்ஸனாயானிகஸ்ஸ யதா²ஸகம் ஸச்சச்சா²த³ககிலேஸந்த⁴காரம் வித⁴மித்வா தீஸு மக்³கே³ஸு யதா²க்கமம் உப்பன்னேஸு சத்தாரி ஸச்சானி பாகடானி ஹோந்தி, தேஸு நிருத்³தே⁴ஸு புன அவஸிட்ட²கிலேஸந்த⁴காரோ சதுஸச்சம் படிச்சா²தே³தி, தஸ்மா தீஸு மக்³கே³ஸு பஞ்ஞா விஜ்ஜூபமா வுத்தா. யதா² பன வஜிரஸ்ஸ அபே⁴ஜ்ஜோ பாஸாணோ நாம நத்தி², தஞ்ச நிஸ்ஸேஸதோ வஜிரம் கே²பேதி, வஜிரேன ச க³தமக்³கே³ பாஸாணஸ்ஸ புன பாகதிகபா⁴வோ நத்தி², ஏவம் அரஹத்தமக்³க³ஞாணஸ்ஸ அவஜ்ஜ²கிலேஸோ நாம நத்தி², தஞ்ச நிஸ்ஸேஸதோ அரஹத்தமக்³க³ஞாணம் கே²பேதி, தேன ச கே²பிதே கிலேஸே அவஸிட்ட²கிலேஸாபா⁴வதோ தஸ்ஸ புன பச்சுதா³வத்தனம் நாம நத்தி², தஸ்மா சதுத்த²மக்³கே³ பஞ்ஞா வஜிரூபமா வுத்தா. பஞ்ஞா ஏவ ஹேத்த² ஸியா விஜ்ஜூபமா, ஸியா ந வத்தப்³பா³ ச ஹோதி. ஸேஸசேதஸிகசித்தரூபனிப்³பா³னானி பன ஸப்³பா³னி ந வத்தப்³பா³னேவ. து³தியம்.

பா³லேஸு டி²தத்தா, யத்த² டி²தா தது³பசாரேன பா³லா, பா³லகரத்தா வா பா³லா, த்³வாத³ஸாகுஸலசித்தானி. இத⁴ பன அஹிரிகஞ்ச அனோத்தப்பஞ்ச பா³லா நாம. பண்டி³தேஸு டி²தத்தா பண்டி³தா, பண்டி³தகரத்தா வா பண்டி³தா, ஏகவீஸதி குஸலசித்தானி. இத⁴ பன ஹிரீ ச ஓத்தப்பஞ்ச பண்டி³தா நாம. ஸேஸசித்தரூபனிப்³பா³னானி ந வத்தப்³பா³னி. ஸேஸம் ஸுவிஞ்ஞேய்யமேவ. ததியம்.

கண்ஹாதி காளகா, சித்தஸ்ஸ அபப⁴ஸ்ஸரபா⁴வகரணா. ஸுக்காதி ஓதா³தா, பப⁴ஸ்ஸரபா⁴வகரணா. ஸேஸம் ஸப்³ப³ம் பா³லது³கஸதி³ஸமேவ. சதுத்த²ம்.

இத⁴ சேவ ஸம்பராயே ச தபேந்தீதி தபனீயா. ந தபனீயா அதபனீயா. ஸேஸம் பா³லது³கஸதி³ஸமேவ. பஞ்சமம்.

‘‘ஸிரிவட்³ட⁴கோ த⁴னவட்³ட⁴கோ’’திஆத³யோ விய வசனமத்தமேவ அதி⁴காரம் கத்வா பவத்தா அதி⁴வசனா நாம. நாமதே⁴ய்யந்தி தேஸம் தேஸம் த⁴ம்மானம் நாமானி. தானி சதுப்³பி³தா⁴னி ஸாமஞ்ஞனாமம் கு³ணனாமம் கித்திமனாமம் ஓபபாதிகனாமந்தி. தத்த² பட²மகப்பிகேஸு மஹாஜனேன ஸம்மன்னித்வா ட²பிதத்தா ‘‘மஹாஸம்மதோ’’தி ரஞ்ஞோ நாமந்தி ஏவரூபம் ஸாமஞ்ஞனாமம் நாம. ‘‘த⁴ம்மகதி²கோ பம்ஸுகூலிகோ காளோ ரஸ்ஸோ’’தி ஏவரூபம் கு³ணதோ ஆக³தம், ‘‘ப⁴க³வா அரஹம் ஸம்மாஸம்பு³த்³தோ⁴’’திஆதீ³னிபி ததா²க³தஸ்ஸ அனேகானி நாமஸதானி கு³ணனாமம் நாம. யம் பன ஜாதஸ்ஸ குமாரஸ்ஸ ஞாதகா கப்பேத்வா பகப்பேத்வா ‘‘அயம் அஸுகோ நாமா’’தி நாமம் கரோந்தி, இத³ம் கித்திமனாமம் நாம. யா பன புரிமபஞ்ஞத்தி அபரபஞ்ஞத்தியம் நிபததி, ஸேய்யதி²த³ம் – புரிமகப்பேபி சந்தோ³ சந்தோ³ ஏவ, ஏதரஹிபி அனாக³தேபி சந்தோ³ ஏவ. ததா² ‘‘ஸூரியோ ஸமுத்³தோ³ பத²வீ ரூபம் வேத³னா ஸஞ்ஞா ஸங்கா²ரா விஞ்ஞாணம் நிப்³பா³ன’’ந்திஏவமாதி³ ஓபபாதிகனாமம் நாம. தானி புன விஜ்ஜமானபஞ்ஞத்தி அவிஜ்ஜமானபஞ்ஞத்தி விஜ்ஜமானேனஅவிஜ்ஜமானபஞ்ஞத்தி அவிஜ்ஜமானேனவிஜ்ஜமானபஞ்ஞத்தி விஜ்ஜமானேனவிஜ்ஜமானபஞ்ஞத்தி அவிஜ்ஜமானேனஅவிஜ்ஜமானபஞ்ஞத்தீதி ஏவம் நாமபஞ்ஞத்திவஸேன ச²ப்³பி³தா⁴னி ஹோந்தி.

தத்த² பரமத்த²தோ உபலப்³ப⁴மானா யதா²வுத்தத்³வாஸத்ததிவிதா⁴ நாமரூபத⁴ம்மா விஜ்ஜமானா நாம, தேஸம் பகாரேஹி ஞாபனதோ பஞ்ஞத்தி விஜ்ஜமானபஞ்ஞத்தி நாம, ‘‘சித்தம் ப²ஸ்ஸோ பத²வீ ரூபம் நிப்³பா³ன’’ந்திஆத³யோ பரமத்த²வாசகா ஸத்³தா³. உபாதி³ன்னனாமரூபத⁴ம்மே பன உபாதா³ய பஞ்ஞத்தா ஸத்தபுக்³க³லஇத்தி²புரிஸதே³வமனுஸ்ஸதிரச்சா²னாதி³பே⁴தா³, அனுபாதி³ன்னரூபத⁴ம்மே உபாதா³ய பஞ்ஞத்தா பூ⁴மிபப்³ப³தருக்க²ஸகடசந்த³ஸூரியனக்க²த்ததி³ஸாகாலகஸிணாதி³பே⁴தா³ ச பரமத்த²தோ அனுபலப்³ப⁴மானா அவிஜ்ஜமானா நாம, தேஸம் பஞ்ஞத்தி அவிஜ்ஜமானபஞ்ஞத்தி நாம. ததா² ‘‘அத்தா பூ⁴மீ’’திஆத³யோ அத்த²பஞ்ஞத்திவாசகா ஸத்³தா³ ச சித்தஸந்ததிவண்ணுபக³ந்திஆதி³ விஜ்ஜமானத்த²வாசகா ஸத்³தா³ விஜ்ஜமானேனஅவிஜ்ஜமானபஞ்ஞத்தி நாம. ‘‘புரிஸஸ்ஸ சித்தம், மேக⁴வண்ணோ’’திஆதீ³ஸு அவிஜ்ஜமானேனவிஜ்ஜமானபஞ்ஞத்தி நாம. ‘‘சித்தலஹுதா பத²வீக³ந்தோ⁴’’திஆதி³ விஜ்ஜமானேனவிஜ்ஜமானபஞ்ஞத்தி நாம. ‘‘மனுஸ்ஸஸரீரம் ருக்க²ஸாகா²’’திஆதி³ அவிஜ்ஜமானேனஅவிஜ்ஜமானபஞ்ஞத்தி நாம. ஏவம் ச²ப்³பி³தா⁴பி சேதா அதி⁴ப்பாயம் விஞ்ஞாபேதுகாமதாசித்தஸமுட்டா²பிதஸவிஞ்ஞத்திஸத்³தா³னுஸாரேன ஞாதஸங்கேதஸ்ஸ ஸோதவிஞ்ஞாணவீதி²அனந்தரம் உப்பன்னேஹி மனோத்³வாரிகவிஞ்ஞாணேஹி ‘‘இமஸ்ஸேத³ம் நாம’’ந்தி அனேகஸத்³தே³ஸு ஏகத்தமாரோபேத்வா வவத்தா²பிதா அத்தா²பி⁴முக²ம் நமனதோ பகாரேஹி அத்த²ஸ்ஸ ஞாபனதோ ‘‘நாமபஞ்ஞத்தீ’’தி வுச்சந்தி, தேஸம் அதி⁴வசனானம் பதா² அத்தா² அதி⁴வசனபதா², ஸம்முதிபரமத்த²பே⁴தா³ ஸப்³பே³ த⁴ம்மா ஸத்³த³வசனீயஸபா⁴வா. ச²ட்ட²ம்.

இதோ பரம் த்³வே து³கா அதி⁴வசனது³கஸதி³ஸாவ, கேவலம் பத³த்த²மத்தமேவ விஸேஸோ. தத்த² அபி⁴ஸங்க²ரோந்தீதி ஸங்கா²ராதி ஏவம் நித்³தா⁴ரேத்வா ஸஹேதுகம் கத்வா வுச்சமானா நிருத்தி நாம, ‘‘தக்கோ விதக்கோ ஸங்கப்போ’’தி ஏவம் தேன தேன பகாரேன ஞாபனதோ பஞ்ஞத்தி நாம, யதா²வுத்தனாமபஞ்ஞத்தியோவ. ந ஹி அதி⁴வசனனிருத்திபஞ்ஞத்தீஸு அத்த²தோ கோசிபி பே⁴தோ³ அத்தி², நிப்³ப³த்தினிமித்தபே⁴த³த³ஸ்ஸனத்த²ம் பன நேஸம் விபா⁴கே³ன பத³த்தோ² த³ஸ்ஸிதோ. இமேஸு ச தீஸு து³கேஸு பஞ்ஞத்திஸஹிதா ஸப்³பே³ த⁴ம்மா லப்³ப⁴ந்தி, அனந்தரே நாமரூபது³கே பஞ்ஞத்திரஹிதாதி இமே சத்தாரோ து³கா இமேஸு ஸுத்தந்திகது³கேஸு நிப்பதே³ஸா, ஸேஸா பன அட்ட²திம்ஸாபி ஸப்பதே³ஸாதி வேதி³தப்³பா³. ஸத்தமட்ட²மானி.

நாமகரணட்டே²ன, நமனட்டே²ன, நாமனட்டே²ன ச நாமம், அரூபக்க²ந்த⁴னிப்³பா³னானி. தானி ஹி ஸப்³ப³தா³பி வேத³னா ஸஞ்ஞா ஸங்கா²ரா விஞ்ஞாணம் நிப்³பா³னந்தி ஓபபாதிகனாமவஸேன அத்தனோ நாமம் கரோந்தாவ பவத்தந்தி சந்த³ஸூரியாத³யோ விய. ந ஹி தேஸம் ஸாமஞ்ஞகு³ணகித்திமவஸேன நாமகரணகிச்சம் அத்தீ²தி. ஏவம் நாமகரணட்டே²ன நாமம் வேதி³தப்³ப³ம். ஆரம்மணாபி⁴முக²ம் பன நமனட்டே²ன, அஞ்ஞமஞ்ஞம் தத்த² நாமனட்டே²ன ச சத்தாரோ அரூபக்க²ந்தா⁴வ நாமம். நிப்³பா³னம் பன ஆரம்மணாதி⁴பதிபச்சயதாய அத்தனி அனவஜ்ஜத⁴ம்மானம் நாமனட்டே²னேவ நாமம் வேதி³தப்³ப³ம். ருப்பனட்டே²ன ரூபம், ரூபக்க²ந்தோ⁴. நவமம்.

அவிஜ்ஜாதி து³க்கா²தி³படிச்சா²த³கோ ஸப்³போ³ மோஹோ. ப⁴வதண்ஹாதி ப⁴வபத்த²னாவஸேன பவத்தோ லோபோ⁴. ததா² அப்பவத்தோ பனேத்த² லோபோ⁴, ஸேஸசேதஸிகசித்தரூபனிப்³பா³னானி ச ந வத்தப்³பா³னி. இதோ பரம் பன ஏவம் நவத்தப்³ப³விபா⁴க³ம் அத³ஸ்ஸேத்வா பத³த்த²ஸரூபமத்தமேவ த³ஸ்ஸயிஸ்ஸாம, த³ஸ்ஸிதாவஸேஸா ந வத்தப்³பா³தி க³ஹேதப்³பா³. த³ஸமம்.

ப⁴வோ வுச்சதி ஸஸ்ஸதம். ‘‘ப⁴விஸ்ஸதி அத்தா ச லோகோ சா’’தி ஸஸ்ஸதவஸேன உப்பஜ்ஜனகதி³ட்டி² ப⁴வதி³ட்டி² நாம. விப⁴வோ வுச்சதி உச்சே²தோ³. ‘‘ந ப⁴விஸ்ஸதி அத்தா ச லோகோ சா’’தி உச்சே²த³வஸேன உப்பஜ்ஜனகதி³ட்டி² விப⁴வதி³ட்டி² நாம. உப⁴யேனாபி மிச்சா²தி³ட்டி² க³ஹிதா. ததா² அனந்தரேஸுபி தீஸு து³கேஸு. ஏகாத³ஸமம்.

க²ந்த⁴பஞ்சகம் ‘‘அத்தா ச லோகோ சா’’தி க³ஹேத்வா ‘‘ஸஸ்ஸதோ அத்தா ச லோகோ சா’’தி பவத்தா தி³ட்டி² ஸஸ்ஸததி³ட்டி² நாம. ததா² ‘‘உச்சி²ஜ்ஜிஸ்ஸதீ’’தி பவத்தா தி³ட்டி² உச்சே²த³தி³ட்டி² நாம. ‘‘அந்தவா’’தி பவத்தா அந்தவாதி³ட்டி² நாம. ‘‘அனந்தவா’’தி பவத்தா அனந்தவாதி³ட்டி² நாம. புப்³ப³ந்தம் அனுக³தா ப்³ரஹ்மஜாலே வுத்தனயேன அதீதகோட்டா²ஸம் ஆரம்மணம் கத்வா பவத்தா அட்டா²ரஸவிதா⁴ புப்³ப³ந்தானுதி³ட்டி² நாம. அபரந்தம் அனுக³தா தத்தே²வ ஆக³தனயேன அனாக³தகோட்டா²ஸம் ஆரம்மணம் கத்வா பவத்தா சதுசத்தாலீஸவிதா⁴ அபரந்தானுதி³ட்டி² நாம. அயமேத்த² ஸங்கே²போ, வித்தா²ரோ பன ப்³ரஹ்மஜாலே (தீ³. நி. 1.28), தத³ட்ட²கதா²ய (தீ³. நி. அட்ட². 1.28) ச வேதி³தப்³போ³. த்³வாத³ஸமதேரஸமசுத்³த³ஸமானி.

அஹிரிகது³கம், ஹிரிது³கஞ்ச ஸுவிஞ்ஞேய்யமேவ. பஞ்சத³ஸமஸோளஸமானி.

து³க்க²ம் வசோ ஏதஸ்மிம் விப்படிகூலகா³ஹிம்ஹி விபச்சனீகஸாதே அனாத³ரே புக்³க³லேதி து³ப்³ப³சோ, ஸஹத⁴ம்மிகம் த³ஸ்ஸேத்வா ஓவதி³யமானே அனாத³ரகாரகோ புக்³க³லோ, தஸ்ஸ கம்மம் தோ³வசஸ்ஸம், தஸ்ஸ பா⁴வோ தோ³வசஸ்ஸதா, அனாத³ரவஸேன பவத்தா த்³வே படிக⁴சித்தா, தம்ஸம்பயுத்தா ச. பாபா அஸ்ஸத்³தா⁴த³யோ புக்³க³லா ஏதஸ்ஸ மித்தாதி பாபமித்தோ, தஸ்ஸ பா⁴வோ பாபமித்ததா, பாபபுக்³க³லேஸு த³ள்ஹப⁴த்திவஸேன, காயசித்தேஹி தம்ஸேவனாதன்னின்னதாவஸேன ச பவத்தானி அட்ட² லோப⁴சித்தானி. ஸத்தரஸமம்.

ஸோவசஸ்ஸதா, கல்யாணமித்ததா ச வுத்தபடிபக்க²வஸேன வேதி³தப்³பா³. அத்த²தோ பன ததா²பவத்தானி ஸஹேதுககாமாவசரகுஸலகிரியசித்தானி. அட்டா²ரஸமம்.

பஞ்சஸு, ஸத்தஸு வா ஆபத்தீஸு குஸலபா⁴வோ ஆபத்திகுஸலதா, ஸஹ வத்து²னா தாஸம் ஆபத்தீனம் ஆபஜ்ஜனபரிச்சே²த³ஜானனவஸேன பவத்தா காமாவசரஜவனபஞ்ஞா. ஆபத்தீஹி வுட்டா²னே குஸலபா⁴வோ ஆபத்திவுட்டா²னகுஸலதா, வுட்டா²னவிதா⁴னேன ஸத்³தி⁴ம் ஆபத்திவுட்டா²னபரிச்சே²த³ஜானனவஸேன பவத்தா யதா²வுத்தசித்தஸம்பயுத்தபஞ்ஞாவ. ஏகூனவீஸதிமம்.

ஸமாபஜ்ஜிதப்³ப³தோ ஸமாபத்தி, தாஸு லோகியலோகுத்தராஸு ஸவிதக்கஸவிசாராதீ³ஸு ஸமாபத்தீஸு குஸலதா ஸமாபத்திகுஸலதா, ஸஹ பரிகம்மேன அப்பனாபரிச்சே²த³ஜானனவஸேன பவத்தா பஞ்ஞா. ஸமாபத்தீஹி வுட்டா²னே குஸலபா⁴வோ ஸமாபத்திவுட்டா²னகுஸலதா, யதா²பரிச்சி²ன்னகாலேயேவ தாஹி வுட்டா²னகபஞ்ஞா காமாவசரஜவனபஞ்ஞாவ. வீஸதிமம்.

அட்டா²ரஸஸு தா⁴தூஸு குஸலபா⁴வோ தா⁴துகுஸலதா, ஸவனதா⁴ரணபடிவேத⁴பச்சவேக்க²ணபஞ்ஞா. தாஸஞ்ஞேவ தா⁴தூனம் மனஸிகாரே குஸலபா⁴வோ மனஸிகாரகுஸலதா, தாஸம் ஸம்மஸனபடிவேத⁴பச்சவேக்க²ணபஞ்ஞா. ஏஸ நயோ ஆயதனகுஸலதாயபி. தத்த² ஹி ஸவனதா⁴ரணபச்சவேக்க²ணா காமாவசராவ, படிவேதோ⁴ லோகுத்தரோவ, ஸம்மஸனம் காமாவசரலோகுத்தரம். அஞ்ஞமஞ்ஞம் படிச்ச ஸஹிதம் ப²லம் உப்பாதே³தீதி படிச்சஸமுப்பாதோ³, அவிஜ்ஜாதீ³ஹி நித்³தி³ட்டோ² பச்சயஸமூஹோ, தஸ்மிம் த்³வாத³ஸங்கே³ அனுலோமபடிச்சஸமுப்பாதே³ குஸலபா⁴வோ படிச்சஸமுப்பாத³குஸலதா, ‘‘இமினா பச்சயேன இத³ம் ஹோதீ’’தி ஜானனவஸேன பவத்தா லோகியஜவனபஞ்ஞாவ. ஏகவீஸதிமத்³வாவீஸதிமானி.

திட்ட²தி ஏத்த² ப²லம் ததா³யத்தவுத்திதாயாதி டா²னம், காரணம், தஸ்மிம் டா²னே குஸலதா டா²னகுஸலதா. ந டா²னே குஸலதா அட்டா²னகுஸலதா. தேவீஸதிமம்.

உஜுபா⁴வோ அஜ்ஜவோ. முது³பா⁴வோ மத்³த³வோ. காயசித்துஜுகதாமுது³கதாத்³வயம். சதுவீஸதிமம்.

அதி⁴வாஸனஸங்கா²தா க²மனம் க²ந்தி, ததா²பவத்தகாமாவசரஜவனானி. பாபதோ ஸுட்டு² ஓரதோ விரதோதி ஸோரதோ, தஸ்ஸ பா⁴வோ ஸோரச்சம். காயவசீமனோஸம்வரஸீலஸங்கா²தானி லோகியலோகுத்தரஜவனானி. பஞ்சவீஸதிமம்.

ஸம்மோத³கபியவாதி³தாஸங்கா²தோ ஸகி²லபா⁴வோ ஸாக²ல்யம், யதா² பரேஹி ஸத்³தி⁴ம் அத்தனோ சி²த்³த³ம் விவரம் ந ஹோதி, ஏவம் த⁴ம்மாமிஸேஹி படிஸந்த²ரணம் படிச்சா²த³னம் படிஸந்தா²ரோ. ஆக³ந்துகஸ்ஸ ஹி பச்சுக்³க³மனபத்தசீவரபடிக்³க³ஹணஆஸனதா³னபீ³ஜனபாத³தோ⁴வனமக்க²னாதி³னா, பானீயேன ஆபுச்ச²னேன, காலே ஆக³தஸ்ஸ யாகு³ஆதீ³னம், விகாலே பானகாதீ³னஞ்ச தா³னேன, புனதி³வஸே பிண்டா³ய சரணட்டா²னத³ஸ்ஸனபவேஸனனிக்க²மனகாலாரோசனாதி³னா ச பப்³ப³ஜிதா, க³ஹட்டா²னஞ்ச வினயே ஆக³தனயேன யதா²னுரூபம் ஆமிஸபடிஸந்தா²ரோ காதப்³போ³. ஆக³ந்துகம் பன உபஸங்கமித்வா ‘‘தும்ஹே கதரபா⁴ணகா’’தி அபுச்சி²த்வா ‘‘ஆசரியுபஜ்ஜா²யா வோ கதரம் க³ந்த²ம் வளஞ்ஜேந்தீ’’தி புச்சி²த்வா தஸ்ஸ விஸயே பஞ்ஹபுச்ச²னேன ஸசே ந ஸக்கோதி, ஸயம் கதே²த்வா தா³னேன, த⁴ம்மகத²னபஞ்ஹவிஸ்ஸஜ்ஜனகம்மட்டா²னகத²னகுக்குச்சதி³ட்டி²வினோத³னாதி³னா, பரிவாஸாதி³வினயகம்மகரணேன, பப்³பா³ஜனஉபஸம்பதா³தி³னா ச த⁴ம்மபடிஸந்தா²ரோ காதப்³போ³. அயமேத்த² ஸங்கே²போ, வித்தா²ரதோ பனாயம் ஸத்³தி⁴ம் ஆனிஸம்ஸதீ³பகவத்தூ²ஹி அட்ட²ஸாலினியம் (த⁴. ஸ. அட்ட². 1351) ஞாதப்³போ³. ஏதஸ்மிம் து³விதே⁴ படிஸந்தா²ரே குஸலபா⁴வோ படிஸந்தா²ரகுஸலதா, ததா²பவத்தகாமாவசரஜவனானி ஏவ. ச²ப்³பீ³ஸதிமம்.

இந்த்³ரியேஸு மனச்ச²ட்டே²ஸு ஆபாத²க³தரூபாதீ³ஸு ஆரம்மணேஸு நிமித்தக³ஹணாதி³னா இந்த்³ரியஸம்வரபே⁴த³ஸங்கா²தோ அகு³த்தத்³வாரபா⁴வோ இந்த்³ரியேஸு அகு³த்தத்³வாரதா. படிக்³க³ஹணபரிபோ⁴க³வஸேன போ⁴ஜனே மத்தம் அஜானனபா⁴வோ போ⁴ஜனே அமத்தஞ்ஞுதா, ததா²பவத்தஅகுஸலசித்தானி. ஸத்தவீஸதிமம்.

அனந்தரது³கேபி வுத்தபடிபக்க²வஸேன காமாவசரஸஹேதுககுஸலகிரியசித்தானி வேதி³தப்³பா³னி. அட்ட²வீஸதிமம்.

ஸதிவிப்பவாஸஸங்கா²தோ முட்ட²ஸதிபா⁴வோ முட்ட²ஸ்ஸச்சம், ஸப்³பே³ அகுஸலா த⁴ம்மா, அஸம்பஜானனபா⁴வோ அஸம்பஜஞ்ஞம், மோஹோ. ஏகூனதிம்ஸதிமம்.

அனந்தரது³கே சதுபூ⁴மிகா ஸதிபஞ்ஞாவ வுத்தா. திம்ஸதிமம்.

அப்படிஸங்கா²னே அப்படிவானஸங்கா²தே அகம்பியட்டே²ன யோனிஸோத³ஸ்ஸனஸங்கா²தம் படிஸங்கா²னமேவ ப³லந்தி படிஸங்கா²னப³லம், காமாவசரபஞ்ஞாவ. ஸத்தபோ³ஜ்ஜ²ங்கா³தி³பா⁴வனாவஸேன பவத்தா சதுபூ⁴மகத⁴ம்மா பா⁴வனாப³லம். ஏகதிம்ஸதிமம்.

பச்சனீகத⁴ம்மே ஸமேதீதி ஸமதோ², ஸோ திவிதோ⁴ சித்தஸமதோ² அதி⁴கரணஸமதோ² ஸப்³ப³ஸங்கா²ரஸமதோ²தி. தத்த² ச புப்³ப³பா⁴கா³ஸு அட்ட²ஸமாபத்தீஸு ஏகக்³க³தா சித்தஸமதோ² நாம, ஸம்முகா²வினயாதி³ ஸத்தவிதோ⁴ அதி⁴கரணஸமதோ² நாம, நிப்³பா³னம் ஸப்³ப³ஸங்கா²ரஸமதோ² நாம. இத⁴ பன சதுபூ⁴மகோ ஸமாதி⁴ அதி⁴ப்பேதோ. அனிச்சாதி³வஸேன விவிதே⁴னாகாரேன பஸ்ஸதீதி விபஸ்ஸனா, லோகியலோகுத்தரா விபஸ்ஸனாபஞ்ஞாவ. பா³த்திம்ஸதிமம்.

ஸமதோ²வ தம் ஆகாரம் க³ஹேத்வா புன பவத்தேதப்³ப³ஸ்ஸ ஸமத²ஸ்ஸ நிமித்தந்தி ஸமத²னிமித்தம். பக்³கா³ஹனிமித்தேபி ஏஸேவ நயோ. சதுபூ⁴மகஸமாதி⁴வீரியானி ஏவ. தேத்திம்ஸதிமம்.

அனந்தரது³கேபி வீரியஸமாதீ⁴ ஏவ வுத்தா. சதுத்திம்ஸதிமம்.

ஸீலவினாஸிகா அஸம்வரஸங்கா²தா ஸீலஸ்ஸ விபத்தீதி ஸீலவிபத்தி, ததா²பவத்தா அகுஸலத⁴ம்மா. ஸம்மாதி³ட்டி²யா விபத்தி தி³ட்டி²விபத்தி, மிச்சா²தி³ட்டி² ஏவ. பஞ்சதிம்ஸதிமம்.

ஸோரச்சமேவ ஸீலஸ்ஸ ஸம்பாத³னதோ ஸீலபரிபூரணதோ ஸீலஸ்ஸ ஸம்பதா³தி ஸீலஸம்பதா³. தி³ட்டி²பாரிபூரிபூ⁴தம் ஞாணமேவ தி³ட்டி²யா ஸம்பதா³தி தி³ட்டி²ஸம்பதா³. சதுபூ⁴மகா ஸீலபஞ்ஞாவ. ததா² அனந்தரது³கேபி. ச²த்திம்ஸதிமம்.

விஸுத்³தி⁴பா⁴வம் ஸம்பத்தா ஸீலஸங்கா²தா ஸீலஸ்ஸ விஸுத்³தி⁴ ஸீலவிஸுத்³தி⁴. நிப்³பா³னஸங்கா²தம் விஸுத்³தி⁴ம் பாபேதும் ஸமத்தா² த³ஸ்ஸனஸங்கா²தா தி³ட்டி²யா விஸுத்³தி⁴ தி³ட்டி²விஸுத்³தி⁴. ஸத்தத்திம்ஸதிமம்.

கம்மஸ்ஸகதாஸச்சானுலோமிகமக்³க³ப²லஸம்பயுத்தபஞ்ஞா தி³ட்டி² விஸுத்³தி⁴ நாம. யதா²தி³ட்டி²ஸ்ஸ தத³னுரூபம் பதா⁴னம் யதா²தி³ட்டி²ஸ்ஸ ச பதா⁴னம் நாம. அட்ட²திம்ஸதிமம்.

ஸம்வேக³ஜனகானி ஜாதிஜராப்³யாதி⁴மரணஸங்கா²தானி காரணானி ஸம்வேஜனீயட்டா²னானி நாம, தேஸு ஜாதிஆதி³படிச்சஸமுப்பன்னப⁴யஸங்கா²தம் ஸம்விஜனம் ஸம்வேகோ³ நாம, ததா²பவத்தகுஸலாதி³ ஏவ. ஏவம் ஸம்வேக³ஜாதஸ்ஸ யோனிஸோ உபாயேன பதா⁴னம் ஸம்விக்³க³ஸ்ஸ யோனிஸோ பதா⁴னம், லோகியலோகுத்தரவீரியமேவ. ஏகூனசத்தாலீஸதிமம்.

குஸலத⁴ம்மபூரணே அஸந்துட்டி²பா⁴வோ அஸந்துட்டி²தா. யோ பன தா³னம் த³த்வா ததோ தேன அஸந்துட்டோ² ஹுத்வா ஸரணக³மனம் ஆகங்க²தி, ததோ பஞ்சஸீலாதி³ம், பப்³ப³ஜ்ஜம், பு³த்³த⁴வசனானம் உக்³க³ண்ஹனம், ஸமத²விபஸ்ஸனம், ததோ தேனாபி அஸந்துட்டோ² அனுக்கமேன அரஹத்தம் க³ண்ஹாதி, அயம் அஸந்துட்டி²தா குஸலேஸு த⁴ம்மேஸு. அதி⁴குஸலத⁴ம்மானம் பா⁴வனாய உக்கண்ட²மானோ பதா⁴னம் படிவாபேதி நிவத்தாபேதீதி படிவானி, ந படிவானி அப்படிவானி, தஸ்ஸ ப⁴வோ அப்படிவானிதா. அரஹத்தம் அப்பத்வா பதா⁴னஸ்மிம் அனிவத்தனதா அனோஸக்கனதா, ததா²பவத்தலோகியலோகுத்தரகுஸலா த⁴ம்மா. சத்தாலீஸதிமம்.

விஜானனதோ விஜ்ஜா, புப்³பே³னிவாஸசுதூபபாதஆஸவக்க²யஞாணானி. விமுச்சனதோ விமுத்தி, அட்ட² ஸமாபத்தியோ, நிப்³பா³னஞ்ச. அட்ட² ஸமாபத்தியோ ஹி ஆரம்மணே அதி⁴முச்சனதோ, ஸயம் விக்க²ம்பி⁴தகிலேஸேஹி விமுச்சனட்டே²ன ச விமுத்தீதி வுத்தா, நிப்³பா³னம் பன ஸப்³ப³கிலேஸேஹி அச்சந்தவிமுச்சனட்டே²ன. ஏகசத்தாலீஸதிமம்.

கிலேஸக்க²யகரேஸு சதூஸு அரியமக்³கே³ஸு ஞாணம் க²யே ஞாணம் நாம. படிஸந்தி⁴வஸேன அனுப்பாத³பூ⁴தே தம்தம்மக்³க³வஜ்ஜ²கிலேஸானம் அனுப்பாத³பரியோஸானே உப்பன்னஅரியப²லே ஞாணம் அனுப்பாதே³ ஞாணம் நாம. ஸேஸம் ஸப்³ப³த்த² ஸுவிஞ்ஞேய்யமேவ. த்³வாசத்தாலீஸதிமம்.

ஸுத்தந்திகது³கமாதிகத்த²வண்ணனா நிட்டி²தா.

மோஹவிச்சே²த³னியா அபி⁴த⁴ம்மமாதிகத்த²வண்ணனாய

த⁴ம்மஸங்க³ணீமாதிகத்த²வண்ணனா நிட்டி²தா.