அபி⁴த⁴ம்மது³கமாதிகத்த²வண்ணனா

து³கமாதிகாய பன ஹேட்டா² அனாக³தபத³த்த²வண்ணனம்யேவ கரிஸ்ஸாம. ஹேதுகோ³ச்ச²கே தாவ ஹேதூ த⁴ம்மாதி ஏத்த² ஹேதுஹேது பச்சயஹேது உத்தமஹேது ஸாதா⁴ரணஹேதூதி சதுப்³பி³தா⁴ ஹேதூ. தத்த² அலோபா⁴த³யோ ச² த⁴ம்மா ஹேதுஹேதூ நாம, உபாதா³ரூபாதீ³னம் மஹாபூ⁴தாத³யோ பச்சயஹேதூ நாம, விபாகுப்பத்தியம் குஸலாகுஸலம், இட்டா²னிட்டா²ரம்மணஞ்ச உத்தமஹேதூ நாம, ஸங்கா²ராதீ³னம் அவிஜ்ஜாத³யோ ஸாதா⁴ரணஹேதூ நாம. இத⁴ பன ஹேதுஹேது அதி⁴ப்பேதோ. ஹேதூ த⁴ம்மாதி மூலட்டே²ன ஹேதுஸங்கா²தா த⁴ம்மா, ‘‘ஹேதுத⁴ம்மா’’திபி பாடோ², ஸோயேவத்தோ². ந ஹேதூதி தேஸஞ்ஞேவ படிக்கே²பவசனம்.

தத்த² அலோபோ⁴ அதோ³ஸோ அமோஹோதி குஸலாப்³யாகதா தயோ, லோபோ⁴ தோ³ஸோ மோஹோதி அகுஸலா தயோ சாதி இமே ச² த⁴ம்மா ஹேதூ நாம. இமே ட²பேத்வா அவஸேஸா சேதஸிகா, ஸப்³பா³னி ச சித்தானி, ரூபனிப்³பா³னானி சாதி இமே த⁴ம்மா ந ஹேதூ நாம, இத³ஞ்ச நிப்பதே³ஸது³கந்தி வேதி³தப்³ப³ம். ஹேதுது³கம் பட²மம்.

ஸம்பயோக³தோ பவத்தேன ஸஹ ஹேதுனாதி ஸஹேதுகா. ததே²வ பவத்தோ நத்தி² ஏதேஸம் ஹேதூதி அஹேதுகா.

தத்த² அஹேதுகசித்தவஜ்ஜிதானி ஏகஸத்ததி சித்தானி ஸஹேதுகா நாம. தேஸு த்³வே மோஹமூலானி மோஹேனேவ ஸஹேதுகானி, அட்ட² லோப⁴மூலானி லோப⁴மோஹேஹி த்³வீஹி, த்³வே தோ³ஸமூலானி தோ³ஸமோஹேஹி, த்³வாத³ஸ ஞாணவிப்பயுத்தகுஸலாப்³யாகதானி அலோபா⁴தோ³ஸேஹி, ஸேஸானி ஸத்தசத்தாலீஸ அலோபா⁴தீ³ஹி தீஹிபி ஸஹேதுகானீதி, மோஹமூலேஸு பன மோஹோ, த்³விபஞ்சவிஞ்ஞாணம், மனோதா⁴து, ஸந்தீரணத்தயம், வோட்ட²ப்³ப³னம், ஹஸிதுப்பாத³கானி அட்டா²ரஸ சித்தானி, ரூபனிப்³பா³னானி சாதி இமே த⁴ம்மா அஹேதுகா நாம. சேதஸிகேஸு பன லோப⁴தோ³ஸா, விசிகிச்சா² ச மோஹேனேவ ஸஹேதுகா, தி³ட்டி²மானோ லோப⁴மோஹேஹி த்³வீஹி, இஸ்ஸாமச்ச²ரியகுக்குச்சானி தோ³ஸமோஹேஹி, மோஹோ பன ஸியா லோபே⁴ன, ஸியா தோ³ஸேனாதி த்³வீஹி ஸஹேதுகோபி மோஹமூலேஸு அஹேதுகோபி, தி²னமித்³தா⁴னி ஸியா லோப⁴மோஹேஹி, ஸியா தோ³ஸமோஹேஹீதி தீஹிபி ஸஹேதுகானி, அஹிரிகானோத்தப்பஉத்³த⁴ச்சானி ததா² ச கேவலமோஹேன ச, அமோஹோ பன அலோபா⁴தோ³ஸேஹேவ த்³வீஹி, அலோபோ⁴ ஸியா அதோ³ஸாமோஹேஹி, ஸியா அதோ³ஸேனாதி த்³வீஹி, அதோ³ஸோ ஸியா அலோபா⁴மோஹேஹி, ஸியா அலோபே⁴னாதி த்³வீஹி, ஸேஸா பன த்³வாவீஸதி குஸலாப்³யாகதா ஸியா தீஹி, ஸியா த்³வீஹிபி ஹேதூஹி ஸஹேதுகா, ச²ந்தோ³ பன யதா²யோக³ம் தீஹி, பீதிதோ³ஸவஜ்ஜிதேஹி பஞ்சஹி ஸியா ஸஹேதுகாபி அஹேதுகாபி, ஸேஸா ஏகாத³ஸ திஜாதிகா ச²ஹி ஹேதூஹி ஸஹேதுகாபி அஹேதுகாபி, வேத³னா சேத்த² தோ³மனஸ்ஸபூ⁴தா த்³விஹேதுகாவ, ஸோமனஸ்ஸஉபேக்கா² யதா²யோக³ம் தோ³ஸவஜ்ஜிதேஹி பஞ்சஹி ஸஹேதுகாபி அஹேதுகாபி, ஸுக²து³க்க²பூ⁴தா அஹேதுகாவ, இத³ஞ்ச நிப்பதே³ஸது³கந்தி. து³தியம்.

ஏகுப்பாதா³தி³தாய ஹேதுனா ஸம்பயுத்தாதி ஹேதுஸம்பயுத்தா. ஹேதுனா விப்பயுத்தாதி ஹேதுவிப்பயுத்தா. அயம் ஹேதுஸம்பயுத்தது³கோ அனந்தரே வுத்தஸஹேதுகது³கேன அத்த²தோ நின்னானாகரணோ. ஸஹேதுகது³கோ ஏவ ஹி ப⁴க³வதா தே³ஸனாவிலாஸேன, ததா² பு³ஜ்ஜ²னகபுக்³க³லானம் வா அஜ்ஜா²ஸயவஸேன ஹேதுஸம்பயுத்தது³கபா⁴வேனாபி வுத்தோ. ஏவம் உபரிபி ஸமானத்த²து³கானம் வசனே காரணம் வேதி³தப்³ப³ம். ததியம்.

சதுத்தா²த³யோ பன யஸ்மா பட²மது³கது³தியததியது³கேஸு பட²மபதே³ன யோஜேத்வா த்³வே து³கா, பட²மது³கே ச பச்சி²மபத³ம் து³தியது³கேன யோஜேத்வா ஏகம் து³கந்தி தயோ து³கா தே³ஸிதா, தஸ்மா தேஸம் பத³த்தோ² வுத்தனயோவ.

தத்த² ச யதே²வ ‘‘ஹேதூ சேவ த⁴ம்மா ஸஹேதுகா ச, ஸஹேதுகா சேவ த⁴ம்மா ந ச ஹேதூ’’தி அயம் து³கோ ஸம்ப⁴வதி, ததா² ‘‘ஹேதூ சேவ த⁴ம்மா அஹேதுகா ச, அஹேதுகா சேவ த⁴ம்மா ந ச ஹேதூ’’தி அயம்பி ஸம்ப⁴வதி. இமினா நயேன ஹேதுஸம்பயுத்தது³கேன யோஜனாயபி ஏகோ லப்³ப⁴தி. யதா² ச ‘‘ந ஹேதூ கோ² பன த⁴ம்மா ஸஹேதுகாபி, அஹேதுகாபீ’’தி அயம் லப்³ப⁴தி, ததா² ‘‘ஹேதூ கோ² பன த⁴ம்மா ஸஹேதுகாபி, அஹேதுகாபீ’’தி அயம்பி. யதா² சேத்த² ஸஹேதுகது³கே த்³வே து³கா, ஏவம் ஹேதுஸம்பயுத்தது³கேபி ‘‘ந ஹேதூ கோ² பன த⁴ம்மா ஹேதுஸம்பயுத்தாபி, ஹேதுவிப்பயுத்தாபீ’’தி ச ‘‘ஹேதூ கோ² பன த⁴ம்மா ஹேதுஸம்பயுத்தாபி, ஹேதுவிப்பயுத்தாபீ’’தி ச த்³வே து³கா லப்³ப⁴ந்தீதி அபரேபி பஞ்ச து³கா ஹேதுகோ³ச்ச²கே யோஜேதும் ஸக்கா. தே பன ப⁴க³வதா வுத்தானுஸாரேனேவ ஸக்கா ஞாதுந்தி ச²ஸு ஏவ ஸங்க³ஹிதாதி வேதி³தப்³பா³. தத்த² யே தாவ ஏகஸ்மிம் சித்தே த்³வே தயோ ஹேதூ ஏகதோ உப்பஜ்ஜந்தி, தே ஹேதூ சேவ அஞ்ஞோஞ்ஞாபேக்கா²ய ஸஹேதுகா ச நாம. ஸஹேதுகசித்தேஸு பன ஹேதும் ட²பேத்வா ஸேஸா சித்தசேதஸிகா த⁴ம்மா ஸஹேதுகா சேவ ந ச ஹேதூ நாம. இமஸ்மிம் து³கே ஸப்³பே³ அஹேதுகத⁴ம்மா ந வத்தப்³பா³. சேதஸிகேஸு பன ஹேதுவஜ்ஜிதா அகுஸலா சேவ குஸலாப்³யாகதா ச, ச²ந்தோ³ ச ஸஹேதுகோ சேவ ந ஹேது ஏவ, ஸேஸா திஜாதிகா, ததா² நவத்தப்³பா³ ச, மோஹோ பன ஹேது சேவ ஸஹேதுகோ ச நவத்தப்³போ³ ச. சதுத்த²ம்.

அனந்தரது³கோபி இமினா து³கேன ஸப்³ப³தா²பி ஸதி³ஸோவாதி. பஞ்சமம்.

ஸஹேதுகசித்தேஸு ஹேதுவஜ்ஜிதா சித்தசேதஸிகா த⁴ம்மா நஹேதூ ஸஹேதூ நாம, அஹேதுகசித்தரூபனிப்³பா³னானி நஹேதூ அஹேதுகா நாம. இமஸ்மிம் பன து³கே ச² ஹேதூ ந வத்தப்³பா³. ஸேஸம் ஸுவிஞ்ஞேய்யமேவாதி. ச²ட்ட²ம்.

ஹேதுகோ³ச்ச²கம் நிட்டி²தம்.

ஸத்தஸு சூளந்தரது³கேஸு அத்தனோ நிப்பா²த³கேன ஸஹ பச்சயேனாதி ஸப்பச்சயா, சித்தசேதஸிகரூபானி. நத்தி² ஏதேஸம் உப்பாதே³ வா டி²தியம் வா பச்சயோ அஹுத்வா ப⁴வனஸ்ஸேவாபா⁴வாதி அப்பச்சயா, நிப்³பா³னமேவ. தே³ஸனாய பனேத்த² பரமதாய ஸோதபதிதவஸேன ப³ஹுவசனனித்³தே³ஸோ கதோ. ஏவம் ஸனித³ஸ்ஸனாதீ³ஸுபி. இத³ஞ்ச இதோ பரானி ச² ச நிப்பதே³ஸது³கானீதி வேதி³தப்³பா³னி. ததோ பரஞ்ச யத்த² ‘‘இமே ந வத்தப்³பா³’’தி ந வக்கா²ம, தம் நிப்பதே³ஸந்தி க³ஹேதப்³ப³ம். ஸப்பச்சயது³கம்.

பச்சயேஹி ஸமாக³ந்த்வா கதாதி ஸங்க²தா. ந ஸங்க²தாதி அஸங்க²தா. இத³ஞ்ச ஸப்³ப³தா² ஸப்பச்சயது³கஸதி³ஸமேவ. ஸப்பச்சயஸங்க²தஉப⁴யது³கம் ஸப்³ப³தா² ஸதி³ஸமேவ. ஸங்க²தது³கம்.

ரூபாயதனம் ஸனித³ஸ்ஸனம் நாம. ஸேஸரூபசித்தசேதஸிகனிப்³பா³னானி அனித³ஸ்ஸனா நாம. ஸனித³ஸ்ஸனது³கம்.

பஸாத³விஸயரூபானி த்³வாத³ஸ ஸப்படிகா⁴ நாம. ஸேஸரூபசித்தசேதஸிகனிப்³பா³னானி அப்படிகா⁴ நாம. ஸப்படிக⁴து³கம்.

அவினிப்³போ⁴க³வஸேன ரூபம் ஏதேஸம் அத்தீ²தி ரூபினோ, ருப்பனலக்க²ணம் வா ரூபம், தம் ஏதேஸம் அத்தீ²தி ரூபினோ, பூ⁴தோபாதா³யரூபமேவ. ந ரூபினோ அரூபினோ, சித்தசேதஸிகனிப்³பா³னானி. ரூபிது³கம்.

லோகோ வுச்சதி லுஜ்ஜனபலுஜ்ஜனட்டே²ன வட்டம், தஸ்மிம் பரியாபன்னபா⁴வேன லோகே நியுத்தாதி லோகியா, பஞ்சுபாதா³னக்க²ந்தா⁴. ததோ லோகதோ தத்த² அபரியாபன்னபா⁴வேன உத்திண்ணாதி லோகுத்தரா, அரியமக்³க³ப²லனிப்³பா³னானி. சேதஸிகேஸு பனேத்த² யம் வத்தப்³ப³ம், தம் அஸேக²த்திகே வுத்தனயேன வேதி³தப்³ப³ம். லோகியது³கம்.

கேனசி விஞ்ஞேய்யாதி சக்கு²விஞ்ஞாணாதீ³ஸு கேனசி ஏகேன சக்கு²விஞ்ஞாணேன வா ஸோதவிஞ்ஞாணாதி³னா வா விஜானிதப்³பா³. கேனசி ந விஞ்ஞேய்யாதி தேனேவ சக்கு²விஞ்ஞாணேன வா ஸோதவிஞ்ஞாணாதி³னா வா ந கேனசி விஜானிதப்³பா³னி. ஏவம் ஹி ஸதி த்³வின்னம்பி பதா³னம் அத்த²னானத்ததோ து³கோ ஹோதி. பத³பா⁴ஜனீயஸ்மிம்பி ‘‘யே தே த⁴ம்மா சக்கு²விஞ்ஞேய்யா, ந தே த⁴ம்மா ஸோதவிஞ்ஞேய்யா’’தி (த⁴. ஸ. 1101) ஏத்தகம் ஏகது³கந்தி அக்³க³ஹேத்வா ‘‘யே தே த⁴ம்மா சக்கு²விஞ்ஞேய்யா, ந தே த⁴ம்மா ஸோதவிஞ்ஞேய்யா, யே வா பன தே த⁴ம்மா ஸோதவிஞ்ஞேய்யா, ந தே த⁴ம்மா சக்கு²விஞ்ஞேய்யா’’தி (த⁴. ஸ. 1101) அயமேகோ து³கோதி வேதி³தப்³போ³. தஸ்ஸ பன ரூபம் சக்கு²விஞ்ஞேய்யம், ஸத்³தோ³ ந சக்கு²விஞ்ஞேய்யோதி அயமத்தோ². ஏவம் ஸேஸேஸுபி து³கபரிச்சே²தோ³ ஞாதப்³போ³. தத்த² ரூபாயதனம் சக்கு²னா வா சக்கு²விஞ்ஞாணேன வா விஞ்ஞேய்யம் நாம. ஸேஸரூபாரூபத⁴ம்மா தேனேவ சக்கு²னா வா சக்கு²விஞ்ஞாணேன வா கேனசி நவிஞ்ஞேய்யா. ஏவம் ஸோதகா⁴னஜிவ்ஹாகாயதப்³பி³ஞ்ஞாணமூலிகாஸுபி சதூஸு யோஜனாஸு விபா⁴கோ³ யதா²னுரூபம் ஞாதப்³போ³. ரூபாத³யோ பன பஞ்சவிஸயா மனோதா⁴துத்தயேன கேனசி விஞ்ஞேய்யா. ஸேஸரூபாரூபத⁴ம்மா தேனேவ மனோதா⁴துத்தயேன கேனசி நவிஞ்ஞேய்யா. கிஞ்சாபி ஸாமஞ்ஞதோ மனோவிஞ்ஞாணேன அவிஞ்ஞேய்யஸ்ஸ அபா⁴வதோ பாளியம் மனோவிஞ்ஞாணவிஞ்ஞேய்யவஸேன து³கோ ந வுத்தோ, ததா²பி விஸேஸதோ வத்தப்³போ³வ. ததா² ஹி ச²ப்³பி³தா⁴பி காமாவசரத⁴ம்மா காமாவசரவிபாகாதி³னா மனோவிஞ்ஞாணேன கேனசி விஞ்ஞேய்யா, ரூபாரூபாவசரலோகுத்தரபஞ்ஞத்தியோ தேனேவ கேனசி நவிஞ்ஞேய்யா. ததா² காமரூபாரூபாவசரபஞ்ஞத்தியோ அகுஸலாதி³னா கேனசி விஞ்ஞேய்யா, லோகுத்தரா தேனேவ கேனசி நவிஞ்ஞேய்யா. ததா² நிப்³பா³னம் லோகுத்தரேன கேனசி விஞ்ஞேய்யம், ஸேஸலோகியலோகுத்தரா தேனேவ கேனசி நவிஞ்ஞேய்யாதி இமினா நயேன ரூபாரூபாவசராதி³பே⁴தே³ன மனோவிஞ்ஞாணேன கேனசி விஞ்ஞேய்யாவிஞ்ஞேய்யத⁴ம்மா யதா²யோக³ம் யோஜேதப்³பா³. ஏவம் ஸப்³பே³ த⁴ம்மா கேனசி விஞ்ஞேய்யா, கேனசி ந விஞ்ஞேய்யா நாம. இமஸ்மிஞ்ச து³கே பஞ்ஞத்தியோபி லப்³ப⁴ந்தீதி வேதி³தப்³பா³தி. கேனசிவிஞ்ஞேய்யது³கம்.

சூளந்தரது³கா நிட்டி²தா.

ஆஸவகோ³ச்ச²கே ஆஸமந்ததோ ஸவந்தீதி ஆஸவா, சக்கு²தோபி…பே… மனதோபி ஸவந்தி, பவத்தந்தீதி வுத்தம் ஹோதி. த⁴ம்மதோ யாவகோ³த்ரபு⁴ம், ஓகாஸதோ யாவப⁴வக்³கா³ ஸவந்தீதி வா ஆஸவா, ஏதே த⁴ம்மே, ஏதஞ்ச ஓகாஸம் அந்தோகரித்வா பவத்தந்தீதி அத்தோ². அந்தோகரணத்தோ² ஹி அயம் ஆ-காரோ. சிரபாரிவாஸியட்டே²ன மதி³ராதி³ஆஸவா வியாதிபி ஆஸவா. யதி³ ச சிரபாரிவாஸியட்டே²ன ஆஸவா, ஏதே ஏவ ப⁴விதும் அரஹந்தி. அனாதி³த்தா ஆயதம் வா ஸம்ஸாரது³க்க²ம் ஸவந்தி பஸவந்தீதிபி ஆஸவா. ததோ அஞ்ஞே நோ ஆஸவா நாம.

தத்த² காமாஸவோ ப⁴வாஸவோ தி³ட்டா²ஸவோ அவிஜ்ஜாஸவோதி இமே சத்தாரோ ஆஸவா நாம. தத்த² அட்ட²ஸு லோப⁴ஸஹக³தசித்தேஸு உப்பன்னோ ஸப்³போ³பி லோபோ⁴ காமாஸவோ நாம. அட்ட²ஸாலினியம் பன ‘‘பஞ்சகாமகு³ணிகோ ராகோ³ காமாஸவோ’’தி (த⁴. ஸ. அட்ட². 1102) ச, ‘‘தி³ட்டி²ஸஹஜாதோ ராகோ³ காமாஸவோ ந ஹோதி, தி³ட்டி²ராகோ³ நாம ஹோதீ’’தி (த⁴. ஸ. அட்ட². 1105) ச, ‘‘யோ ப்³ரஹ்மானம் விமானகப்பருக்கா²ப⁴ரணேஸு ச²ந்த³ராகோ³ உப்பஜ்ஜதி, ஸோ காமாஸவோ ந ஹோதி பஞ்சகாமகு³ணிகஸ்ஸ ராக³ஸ்ஸ இதே⁴வ பஹீனத்தா’’தி ச வுத்தம். பாளியம் பன ‘‘காமாஸவோ அட்ட²ஸு லோப⁴ஸஹக³தேஸு சித்துப்பாதே³ஸு உப்பஜ்ஜதீ’’தி (த⁴. ஸ. 1465) ச, ‘‘காமாஸவம் படிச்ச தி³ட்டா²ஸவோ அவிஜ்ஜாஸவோ’’தி (பட்டா². 3.3.1) ச வுத்தத்தா ப⁴வாஸவம் ட²பேத்வா அவஸேஸோ ஸப்³போ³பி லோபோ⁴ காமாஸவோதி பஞ்ஞாயதி தி³ட்டி²ஸம்பயுத்தராக³ஸ்ஸ, ப்³ரஹ்மானம் வத்தா²ப⁴ரணாதீ³ஸு ராக³ஸ்ஸ ச ப⁴வாஸவத்தாபா⁴வா. தி³ட்டி²விப்பயுத்தராகோ³ ஏவ ஹி ரூபாரூபப⁴வபத்த²னாவஸேன பவத்தியம் ப⁴வாஸவோ ஹோதி ‘‘ரூபதா⁴துயா அரூபதா⁴துயா ஏத்த² ப⁴வராகா³னுஸயோ அனுஸேதீ’’திஆதி³வசனதோ (யம. 2.அனுஸயயமக.2), ந ச காமாஸவப⁴வாஸவவினிமுத்தோ லோபோ⁴ அத்தி². யதி³ ஸியா, ‘‘லோபோ⁴ ஸியா ஆஸவோ, ஸியா நோ ஆஸவோ’’தி பாளியம் வத்தப்³போ³ ப⁴வேய்ய, ‘‘தி³ட்டி²விப்பயுத்தலோபே⁴ன ஸம்பயுத்தோ அவிஜ்ஜாஸவோ ஸியா ஆஸவஸம்பயுத்தோ, ஸியா ஆஸவவிப்பயுத்தோ’’தி ச வத்தப்³போ³ ஸியா. பத³பா⁴ஜனீயே ச காமாஸவனித்³தே³ஸே ஆக³தஸ்ஸ ‘‘காமேஸு காமச்ச²ந்தோ³’’தி (த⁴. ஸ. 1103) இமஸ்ஸ பத³ஸ்ஸ அட்ட²ஸாலினியம் ‘‘பஞ்சகாமகு³ணேஸு காமச்ச²ந்தோ³’’தி (த⁴. ஸ. அ. 1103) அத்தோ² வுத்தோ, தஸ்ஸ பன பத³ஸ்ஸ வத்து²காமேஸு கிலேஸகாமோதிபி அத்த²யோஜனா ஸக்கா காதும் தேபு⁴மகஸ்ஸ த⁴ம்மஸ்ஸ வத்து²காமத்தா, தத்த² ஸப்³ப³த்த² ராக³ஸ்ஸ ச கிலேஸகாமத்தா. வுத்தம் ஹேதம் த⁴ம்மஸேனாபதினா மஹானித்³தே³ஸே –

‘‘கதமே வத்து²காமா? மனாபிகா ரூபா…பே… ஸப்³பே³பி காமாவசரா த⁴ம்மா, ஸப்³பே³பி ரூபாவசரா த⁴ம்மா, ஸப்³பே³பி அரூபாவசரா த⁴ம்மா…பே… இமே வுச்சந்தி வத்து²காமா.

‘‘கதமே கிலேஸகாமா? ச²ந்தோ³ காமோ ராகோ³ காமோ…பே… யோ காமேஸு காமச்ச²ந்தோ³ காமராகோ³ காமனந்தீ³ காமதண்ஹா காமஸ்னேஹோ காமபரிளாஹோ காமமுச்சா² காமஜ்ஜோ²ஸானம் காமோகோ⁴ காமயோகோ³ காமுபாதா³னம் காமச்ச²ந்த³னீவரணம்…பே… இமே வுச்சந்தி கிலேஸகாமா’’தி (மஹானி. 1).

அபிசேத்த² ‘‘காமோகோ⁴ காமயோகோ³’’திஆதி³னா கிலேஸகாமஸ்ஸ காமோகா⁴தி³பா⁴வம் வத³தா த⁴ம்மஸேனாபதினா வத்து²காமத்தவிஸயஸ்ஸ ராக³ஸ்ஸ ஆஸவாதி³பா⁴வோ அனுஞ்ஞாதோ, ந பஞ்சகஆமகு³ணிகஸ்ஸேவ ராக³ஸ்ஸ. ந ச ஓகா⁴ஸவேஸு கோசி விஸேஸோ அத்தி². அட்ட²ஸாலினியம்பி ஹி உபாதா³னகோ³ச்ச²கஸ்ஸ பத³பா⁴ஜனீயே ‘‘காமேஸு காமச்ச²ந்தோ³’’தி (த⁴. ஸ. 1220) இமஸ்ஸ ‘‘வத்து²காமேஸு காமச்ச²ந்தோ³’’தி (த⁴. ஸ. அ. 1220) அயமேவத்தோ² வுத்தோ. ததோ அஞ்ஞேஸு ஹேதுக³ந்த²கிலேஸகோ³ச்ச²கேஸு லோப⁴ஸ்ஸேவ அனவஸேஸபரியாதா³னம் வுத்தம், ந இதரகோ³ச்ச²கேஸு. தேஸு ச லோப⁴ஸ்ஸ பாளிஅனுஸாரதோ ஓலோகியமானே கிலேஸகாமமத்தகோ. அனவஸேஸலோப⁴பரியாதா³னம் பஞ்ஞாயதி. வீமம்ஸித்வா க³ஹேதப்³ப³ம்.

சதூஸு பன தி³ட்டி²க³தவிப்பயுத்தசித்தேஸு உப்பன்னோ ரூபாரூபப⁴வேஸு ச²ந்த³ராக³பா⁴வேன, காமஜ்ஜோ²ஸானனிகந்திபா⁴வேன ச பவத்தோ லோபோ⁴ ப⁴வாஸவோ நாம. அட்ட²ஸாலினியம் பன ‘‘ஸஸ்ஸததி³ட்டி²ஸஹஜாதோ ராகோ³ ப⁴வாஸவோ’’தி (த⁴. ஸ. அட்ட². 1102) வுத்தம். பாளியம் பன ‘‘ப⁴வாஸவோ சதூஸு தி³ட்டி²க³தவிப்பயுத்தலோப⁴ஸஹக³தேஸூ’’தி (த⁴. ஸ. 1465) நியமிதத்தா ந ஸக்கா க³ஹேதும், அதி⁴ப்பாயோ பன க³வேஸிதப்³போ³. த்³வாஸட்டி²பபே⁴தா³ ஸப்³பா³பி தி³ட்டி² தி³ட்டா²ஸவோ நாம. அட்ட²வத்து²கோ ஸப்³போ³பி மோஹோ அவிஜ்ஜாஸவோ நாம. தேஸு தி³ட்டா²ஸவோ பட²மேன மக்³கே³ன பஹீயதி, காமாஸவோ சதூஹிபீதி வத்தும் யுத்தம், ‘‘ததியேனா’’தி பன வுத்தம். ப⁴வாஸவோ, அவிஜ்ஜாஸவோ ச சதுத்தே²ன பஹீயதி. இமேஸஞ்ச காமாஸவப⁴வாஸவானம் லோப⁴ஸபா⁴வத்தா ஸபா⁴வதோ தயோ த⁴ம்மா விபா⁴க³தோ சத்தாரோ ஆஸவா நாம ஜாதா. இமே ட²பேத்வா ஸேஸா லோகியலோகுத்தரா ஸப்³பே³ த⁴ம்மா நோ ஆஸவா நாம. ஆஸவது³கம் பட²மம்.

அத்தானம் ஆரம்மணம் கத்வா பவத்தேஹி ஸஹ ஆஸவேஹீதி ஸாஸவா, ஸப்³பே³ லோகியத⁴ம்மா. ஏவம் பவத்தமானா நத்தி² ஏதேஸம் ஆஸவாதி அனாஸவா, நவ லோகுத்தரத⁴ம்மாவ. சேதஸிகா பனேத்த² லோகியது³கே வுத்தஸதி³ஸாவ. ஸாஸவது³கம் து³தியம்.

ததியாதீ³னம் சதுன்னம் து³கானம் பத³த்தோ² வுத்தனயோவ. ஸேஸமேத்த² ஹேதுகோ³ச்ச²கே வுத்தனயேன வேதி³தப்³ப³ம். அயம் பன விஸேஸோ – யதா² தத்த² ‘‘ந ஹேதூ கோ² பன த⁴ம்மா ஸஹேதுகாபி, அஹேதுகாபீ’’தி அயம் ஓஸானது³கோ பட²மது³கே து³தியபத³ம் து³தியது³கேன யோஜேத்வா வுத்தோ, ஏவமித⁴ ‘‘நோ ஆஸவா கோ² பன த⁴ம்மா ஸாஸவாபி, அனாஸவாபீ’’தி ந வுத்தோ. அயஞ்ச தத்த² தத்த² வுத்தனயேன இஹ ஸங்க³ஹிதோதி வேதி³தப்³போ³. யதா² சேத்த², ஏவம் ஸஞ்ஞோஜனகோ³ச்ச²காதீ³ஸுபி யதா²னுரூபம் ஞாதப்³ப³ம்.

தத்த² த்³வாத³ஸ அகுஸலசித்துப்பாதா³ ஆஸவஸம்பயுத்தா நாம. தோ³ஸமோஹமூலசித்தேஸு மோஹோ, குஸலாப்³யாகதசித்தரூபனிப்³பா³னானி ச ஆஸவவிப்பயுத்தா நாம. சேதஸிகேஸு பன மோஹம் ட²பேத்வா ஸேஸா அகுஸலா ஆஸவஸம்பயுத்தாவ, மோஹோ பன திஜாதிகோ ச த்³விதா⁴பி ஹோதி, ஸேஸா ஆஸவவிப்பயுத்தா ஏவாதி. ததியம்.

சத்தாரோ ஆஸவா ஆஸவா சேவ ஸாஸவா ச நாம. தத³வஸேஸா லோகியத⁴ம்மா ஸாஸவா சேவ நோ ச ஆஸவா நாம. இத⁴ பன லோகுத்தரா ந வத்தப்³பா³. சேதஸிகேஸு பன ஆஸவாதி வுத்தேஹி ஸேஸா அகுஸலா, கருணாமுதி³தா ச ஸாஸவா சேவ நோ ச ஆஸவா ஏவ, ஸேஸா ததா² ச ந வத்தப்³பா³ ச. சதுத்த²ம்.

யே பன லோப⁴மூலேஸு லோப⁴மோஹா, லோப⁴தி³ட்டி²மோஹோ சாதி த்³வே தயோ ஏகதோ கத்வா உப்பஜ்ஜந்தி, தே ஆஸவா சேவ ஆஸவஸம்பயுத்தா ச நாம. த்³வாத³ஸ அகுஸலசித்தானி சேவ ஆஸவவஜ்ஜிதா தம்ஸம்பயுத்தா ச ஆஸவஸம்பயுத்தா சேவ நோ ச ஆஸவா நாம. இத⁴ பன ஆஸவவிப்பயுத்தா ந வத்தப்³பா³. சேதஸிகேஸு பன ஆஸவவஜ்ஜிதா அகுஸலா ஆஸவஸம்பயுத்தா சேவ நோ ச ஆஸவா ஏவ, மோஹோ ஸியா ஆஸவோ சேவ ஆஸவஸம்பயுத்தோ ச, ஸியா ந வத்தப்³போ³, திஜாதிகா ஸியா ஆஸவஸம்பயுத்தா சேவ நோ ச ஆஸவா, ஸியா ந வத்தப்³பா³, குஸலாப்³யாகதா ந வத்தப்³பா³வ. ஸேஸம் ஸுவிஞ்ஞேய்யமேவ. பஞ்சமம்.

லோகுத்தரவஜ்ஜிதா ஆஸவவிப்பயுத்தா ஸாஸவா நாம. லோகுத்தரா ஆஸவவிப்பயுத்தா அனாஸவா நாம. இத⁴ பன ஆஸவஸம்பயுத்தா ந வத்தப்³பா³வ. சேதஸிகேஸு பன கருணாமுதி³தா ஆஸவவிப்பயுத்தா ஸாஸவா ஏவ, மோஹோ ததா² ச ந வத்தப்³போ³ ச, ஸேஸகுஸலாப்³யாகதா த்³விதா⁴பி ஹோந்தி, திஜாதிகா த்³விதா⁴பி ந வத்தப்³பா³வ, மோஹவஜ்ஜிதா பன அகுஸலா ந வத்தப்³பா³வ. ச²ட்ட²ம்.

ஆஸவகோ³ச்ச²கம் நிட்டி²தம்.

ஸம்யோஜனகோ³ச்ச²கே யஸ்ஸ ஸம்விஜ்ஜந்தி, தம் புக்³க³லம் வட்டஸ்மிம் ஸம்யோஜேந்தி ப³ந்த⁴ந்தீதி ஸம்யோஜனா. ததோ அஞ்ஞே நோ ஸம்யோஜனா.

தத்த² காமராக³ஸம்யோஜனம் ப⁴வராக³படிக⁴மானதி³ட்டி²விசிகிச்சா²ஸீலப்³ப³தபராமாஸஇஸ்ஸாமச்ச²ரியஅவிஜ்ஜாஸம்யோஜனந்தி இமே த³ஸ த⁴ம்மா ஸம்யோஜனா நாம. தேஸு காமப⁴வதி³ட்டி²அவிஜ்ஜாஸம்யோஜனானி ஆஸவகோ³ச்ச²கே வுத்தனயானேவ. ‘‘அனத்த²ம் மே அசரி, சரதி, சரிஸ்ஸதி, பியஸ்ஸ மே அனத்த²ம் அசரி, சரதி, சரிஸ்ஸதி, அப்பியஸ்ஸ மே அத்த²ம் அசரி, சரதி, சரிஸ்ஸதீ’’தி (த⁴. ஸ. 1066) ஏவம் வுத்தேஹி நவஹி ஆகாரேஹி ஸத்தேஸு, அட்டா²னகோபவஸேன ஸங்கா²ரேஸு ச உப்பஜ்ஜமானோ ஸப்³போ³பி தோ³ஸோ படிக⁴ஸம்யோஜனம் நாம.

‘‘ஸேய்யோஹமஸ்மி, ஸதி³ஸோஹமஸ்மி, ஹீனோஹமஸ்மீ’’தி ஏவம் தீஹி ஆகாரேஹி பவத்தோ ஸப்³போ³ மானோ மானஸம்யோஜனம் நாம. தத்த² ஸேய்யஸ்ஸேவ ஸதோ புக்³க³லஸ்ஸ ‘‘ஸேய்யோஹமஸ்மி, ஸதி³ஸோ, ஹீனோ’’தி ச திதா⁴ மானோ உப்பஜ்ஜதி, ததா² ஸதி³ஸஹீனானம்பி. தத்த² ஸேய்யஸ்ஸ ஸேய்யமானோவ யாதா²வமானோ. ததா² ஸதி³ஸஸ்ஸ ஸதி³ஸமானோ, ஹீனஸ்ஸ ஹீனமானோ ச. திண்ணம்பி இதரே த்³வே த்³வே மானா அயாதா²வமானாதி ஞாதப்³பா³.

ஸத்து²த⁴ம்மஸங்க⁴ஸிக்கா²ஸு, புப்³ப³ந்தாபரந்ததது³ப⁴யபடிச்சஸமுப்பன்னேஸு ச கங்க²தாவஸேன பவத்தா ஸப்³பா³பி விசிகிச்சா² விசிகிச்சா²ஸம்யோஜனம் நாம.

கோ³ஸீலகோ³வதாதீ³ஹி ஸுத்³தீ⁴தி க³ஹணாகாரப்பவத்தா தி³ட்டி² ஏவ ஸீலப்³ப³தபராமாஸஸம்யோஜனம் நாம.

தத³வஸேஸா தி³ட்டி² தி³ட்டி²ஸம்யோஜனந்தி க³ஹேதப்³ப³ம்.

பரலாப⁴ஸக்காரக³ருகாரமானனவந்த³னபூஜனாதீ³ஸு அஸஹனாகாரேன பவத்தா இஸ்ஸா இஸ்ஸாஸம்யோஜனம் நாம. ஆவாஸமச்ச²ரியம் குலலாப⁴வண்ணத⁴ம்மமச்ச²ரியந்தி பஞ்சவித⁴ம் மச்ச²ரியம் மச்ச²ரியஸம்யோஜனம் நாம. ஸகலாராமேபி ஹி பரிவேணோவரகாதீ³ஸு வா வஸந்தோ தத்த² அஞ்ஞஸ்ஸ வத்தஸம்பன்னஸ்ஸ பேஸலஸ்ஸ பி⁴க்கு²னோ ஆக³மனம் ந இச்ச²தி, ஆக³தஸ்ஸாபி கி²ப்பம் க³மனஞ்ஞேவ இச்ச²தி, இத³ம் ஆவாஸமச்ச²ரியம் நாம. ப⁴ண்ட³னகாரகாதீ³னம் பன தத்த² வாஸம் அனிச்ச²தோ ஆவாஸமச்ச²ரியம் நாம ந ஹோதி.

அத்தனோ பன உபட்டா²ககுலே வா ஞாதிகுலே வா அஞ்ஞஸ்ஸ பேஸலஸ்ஸ உபஸங்கமனம் அனிச்ச²தோ குலமச்ச²ரியம் ஹோதி, பாபபுக்³க³லஸ்ஸ அனிச்ச²தோ பன ந ஹோதி. ஸோ ஹி தேஸம் பஸாத³பே⁴தா³ய படிபஜ்ஜதீதி.

அத்தனா லப⁴னட்டா²னே சதுபச்சயம் லப⁴ந்தே ஸீலவந்தே தி³ஸ்வா ‘‘மா லப⁴ந்தூ’’தி சிந்தேந்தஸ்ஸ லாப⁴மச்ச²ரியம் ஹோதி. யோ பன ஸத்³தா⁴தே³ய்யம் வினிபாதேதி, பூதிபா⁴வம்பி க³ச்ச²ந்தம் அஞ்ஞஸ்ஸ ந தே³தி, தம் லப⁴ந்தம் தி³ஸ்வா ‘‘ஸசே இமம் அஞ்ஞோ ஸீலவா லபே⁴ய்ய, பரிபோ⁴க³ம் க³ச்சே²ய்யா’’தி சிந்தேந்தஸ்ஸ மச்ச²ரியம் நாம நத்தி².

வண்ணோ நாம அத்தனா ஸதி³ஸோ ஸரீரவண்ணோபி கு³ணவண்ணோபி. தத்த² ‘‘ரூபவா பாஸாதி³கோ’’தி பரஸ்ஸ ஸரீரவண்ணம், ‘‘ஸீலவா, து⁴தவா’’திஆதி³னா கு³ணவண்ணஞ்ச அத்தனோ வண்ணப⁴ணனட்டா²னே வுச்சமானம் அஸஹந்தஸ்ஸ து³வித⁴ம் வண்ணமச்ச²ரியம் நாம ஹோதி, அபேஸலம் பன விபன்னம் பஸம்ஸித்வா பரிஸாஸு உபத்த²ம்பே⁴ந்தம் தி³ஸ்வா பாபக³ரஹிதாய அஸஹந்தஸ்ஸ ந ஹோதி.

த⁴ம்மோதி பரியத்தியேவ, ந படிவேதோ⁴ அரியானம் தத்த² மச்ச²ரியாபா⁴வா. பரியத்திம் பன கு³ள்ஹக³ந்த²ம் அஞ்ஞேஸம் அகதே²துகாமஸ்ஸ த⁴ம்மமச்ச²ரியம் நாம ஹோதி, த⁴ம்மானுக்³க³ஹேன பன லோலஸ்ஸ, காலேன ஸமணோ, காலேன நிக³ண்டா²தி³ ச ஹுத்வா விசரந்தஸ்ஸ பவேணிஆக³தம் தந்திம் ‘‘ஸண்ஹஸுகு²மம் த⁴ம்மந்தரம் பி⁴ந்தி³த்வா ஆலுளிஸ்ஸதி, அம்ஹாகம் ஸமயம் பி⁴ந்தி³ஸ்ஸதீ’’தி ச ந தே³ந்தஸ்ஸ, புக்³க³லானுக்³க³ஹேன வா பகதியா ஸட²ஸ்ஸ மாயாவினோ ‘‘ஸண்ஹஸுகு²மத⁴ம்மம் உக்³க³ண்ஹித்வா அஞ்ஞம் ப்³யாகரித்வா நஸ்ஸிஸ்ஸதீ’’தி ந தே³ந்தஸ்ஸ ச த⁴ம்மமச்ச²ரியம் ந ஹோதி. யதா² ச பி⁴க்கூ²னம், ஏவம் க³ஹட்டா²னம்பி பஞ்சவித⁴ம் மச்ச²ரியம் யதா²னுரூபம் ஞாதப்³ப³ம். ஸங்கே²பதோ பன க³ஹட்ட²பப்³ப³ஜிதானம் அத்தஸம்பத்தினிகூ³ஹனலக்க²ணம் மச்ச²ரியம் நாமாதி க³ஹேதப்³ப³ம்.

இமேஸு ச ஸம்யோஜனேஸு தி³ட்டி²விசிகிச்சா²ஸீலப்³ப³தபராமாஸஇஸ்ஸாமச்ச²ரியானி ஸோதாபத்திமக்³கே³ன பஹீயந்தி, படிகோ⁴ அனாகா³மிமக்³கே³ன, காமராகோ³ சதூஹிபீதி வத்தப்³ப³ம், ‘‘ததியேனா’’தி பன வுத்தம். மானப⁴வராக³அவிஜ்ஜா அரஹத்தமக்³கே³ன. தத்த² ச அயாதா²வமானோ பட²மமக்³கே³ன பஹீயதீதி த³ட்ட²ப்³போ³, இமேஸம் காமராக³ப⁴வராகா³னம் லோப⁴ஸபா⁴வத்தா தி³ட்டி²ஸீலப்³ப³தபராமாஸானம் மிச்சா²தி³ட்டி²ஸபா⁴வத்தா ஸபா⁴வதோ அட்டே²வ த⁴ம்மா த³ஸ ஸம்யோஜனா நாம ஜாதா. இமே த³ஸ ட²பேத்வா ஸேஸா லோகியலோகுத்தரத⁴ம்மா நோ ஸம்யோஜனா நாம. ஸேஸம் ஆஸவது³கஸதி³ஸம். ஸம்யோஜனது³கம் பட²மம்.

ஆரம்மணபா⁴வம் உபக³ந்த்வா ஸம்யோஜனஸம்வட்³ட⁴னேன ஸம்யோஜனானம் ஹிதாதி ஸம்யோஜனியா, ஸாஸவத⁴ம்மா ஏவ. ததா² நீவரணியாதி ஏத்தா²பி. ந ஸம்யோஜனியா அஸம்யோஜனியா, அனாஸவா. ஸேஸம் ஸாஸவது³கஸதி³ஸமேவ. து³தியம்.

ததியாத³யோபி ஆஸவகோ³ச்ச²கே ததியாதி³ஸதி³ஸா ஏவ, விஸேஸமத்தமேவேத்த² வக்கா²ம. தத்த² ஹி த்³வாத³ஸாகுஸலசித்தானி ஸம்யோஜனஸம்பயுத்தா நாம, உத்³த⁴ச்சஸஹக³தோ மோஹோ, ஸேஸசித்தரூபனிப்³பா³னானி ஸம்யோஜனவிப்பயுத்தா நாம. ஸேஸம் ஸமமேவ. ததியம்.

த³ஸ ஸம்யோஜனானி ஸம்யோஜனா சேவ ஸம்யோஜனியா ச நாம. தத³வஸேஸலோகியத⁴ம்மா ஸம்யோஜனியா சேவ நோ ச ஸம்யோஜனா நாம. ஸேஸம் ஸுவிஞ்ஞேய்யமேவ. சதுத்த²ம்.

யே பன உத்³த⁴ச்சவிரஹிதேஸு ஏகாத³ஸஸு அகுஸலசித்தேஸு விசிகிச்சா²மோஹா தோ³ஸமோஹா தோ³ஸஇஸ்ஸாமோஹா தோ³ஸமச்ச²ரியமோஹா லோப⁴மானமோஹா லோப⁴தி³ட்டி²மோஹா சாதி த்³வே தயோ ஏகதோ உப்பஜ்ஜந்தி, தே ஸம்யோஜனா சேவ ஸம்யோஜனஸம்பயுத்தா ச நாம. த்³வாத³ஸாகுஸலசித்தானி சேவ ஸம்யோஜனவஜ்ஜிததம்ஸம்பயுத்தா ச ஸம்யோஜனஸம்பயுத்தா சேவ நோ ச ஸம்யோஜனா நாம. ஸேஸமித⁴ அனந்தரது³கஞ்ச ஆஸவகோ³ச்ச²கே பஞ்சமச²ட்ட²து³கஸதி³ஸமேவ. கேவலம் ஆஸவபத³ட்டா²னே ஸம்யோஜனபத³மேவ விஸேஸோ. பஞ்சமச²ட்ட²து³கானி.

ஸம்யோஜனகோ³ச்ச²கம் நிட்டி²தம்.

க³ந்த²கோ³ச்ச²கே யஸ்ஸ ஸம்விஜ்ஜந்தி, தம் சுதிபடிஸந்தி⁴வஸேன வட்டஸ்மிம் க³ந்தே²ந்தி க⁴டேந்தீதி க³ந்தா². ததோ அஞ்ஞே நோ க³ந்தா².

தத்த² அபி⁴ஜ்ஜா²காயக³ந்தோ², ப்³யாபாதோ³, ஸீலப்³ப³தபராமாஸோ, இத³ம்ஸச்சாபி⁴னிவேஸோ காயக³ந்தோ²தி இமே சத்தாரோ த⁴ம்மா க³ந்தா² நாம. தத்த² அபி⁴ஜ்ஜா² ஏவ நாமகாயம் வுத்தனயேன க³ந்தே²தீதி அபி⁴ஜ்ஜா²காயக³ந்தோ². ஏவம் ஸேஸேஸுபி. ஸப்³ப³ஞ்ஞுபா⁴ஸிதம்பி படிக்கி²பித்வா ‘‘ஸஸ்ஸதோ லோகோ, இத³மேவ ஸச்சம், மோக⁴மஞ்ஞ’’ந்தி இமினா ஆகாரேன அபி⁴னிவிஸனதோ ஸீலப்³ப³தபராமாஸவிரஹிதா ஸப்³பா³பி தி³ட்டி² இத³ம்ஸச்சாபி⁴னிவேஸோ நாம. ஸேஸா வுத்தத்தா²வ. இமேஸு ச பச்சி²மா த்³வே க³ந்தா² பட²மேன மக்³கே³ன பஹீயந்தி, ப்³யாபாதோ³ ததியேன, அபி⁴ஜ்ஜா² சதூஹிபி. இமே ச ஸபா⁴வதோ தயோ த⁴ம்மா சத்தாரோ க³ந்தா² நாம ஜாதா. இமே பன ட²பேத்வா ஸேஸா ஸப்³பே³ த⁴ம்மா நோ க³ந்தா² நாம. க³ந்த²து³கம் பட²மம்.

ஆரம்மணகரணவஸேன க³ந்தே²ஹி க³ந்தி²தப்³பா³தி க³ந்த²னியா. ந க³ந்த²னியா அக³ந்த²னியா. ஸேஸம் ஸாஸவது³கஸதி³ஸமேவ. து³தியம்.

மோஹமூலவஜ்ஜிதானி த³ஸ அகுஸலசித்தானி, தி³ட்டி²விப்பயுத்தசித்தேஸு லோப⁴ம், தோ³ஸமூலேஸு ச தோ³ஸம் ட²பேத்வா தம்ஸம்பயுத்தா ச க³ந்த²ஸம்பயுத்தா நாம. யதா²வுத்தோ லோபோ⁴, தோ³ஸோ, மோஹமூலானி, குஸலாப்³யாகதானி சித்தானி, ரூபனிப்³பா³னானி ச க³ந்த²விப்பயுத்தா நாம. சேதஸிகேஸு பன தி³ட்டி²மானஇஸ்ஸாமச்ச²ரியகுக்குச்சதி²னமித்³தா⁴னி க³ந்த²ஸம்பயுத்தா ஏவ. தோ³ஸவிசிகிச்சா², குஸலாப்³யாகதா ச க³ந்த²விப்பயுத்தா ஏவ, ஸேஸா த்³விதா⁴பி ஹோந்தி. ததியம்.

சத்தாரோ க³ந்தா² க³ந்தா² சேவ க³ந்த²னியா ச நாம. தத³வஸேஸா லோகியா க³ந்த²னியா சேவ நோ ச க³ந்தா² நாம. ததா² சேதஸிகேஸு க³ந்த²வஜ்ஜிதா அகுஸலா, அப்பமஞ்ஞா ச, ஸேஸா சேதஸிகா பன ததா² ச ந வத்தப்³பா³ ச, இத⁴ பன லோகுத்தரா ந வத்தப்³பா³. சதுத்த²ம்.

தி³ட்டி² க³ந்தா²சேவ க³ந்த²ஸம்பயுத்தா ச நாம. லோபோ⁴ ததா² ச ந வத்தப்³போ³ ச, க³ந்த²ஸம்பயுத்தேஸு க³ந்தே² ட²பேத்வா ஸேஸா க³ந்த²ஸம்பயுத்தா சேவ நோ ச க³ந்தா² நாம. இத⁴ பன க³ந்த²விப்பயுத்தா ந வத்தப்³பா³. சேதஸிகேஸு பன மானஇஸ்ஸாமச்ச²ரியகுக்குச்சதி²னமித்³தா⁴னி க³ந்த²ஸம்பயுத்தா சேவ நோ ச க³ந்தா² ஏவ, மோஹாஹிரிகானோத்தப்பஉத்³த⁴ச்சானி திஜாதிகா ச ஸியா, ததா² நவத்தப்³பா³ ச, ஸேஸா ந வத்தப்³பா³. ஸேஸம் ஸுவிஞ்ஞேய்யமேவ. பஞ்சமம்.

லோகுத்தரவஜ்ஜிதா க³ந்த²விப்பயுத்தா க³ந்த²னியா நாம. லோகுத்தரா பன க³ந்த²விப்பயுத்தா அக³ந்த²னியா நாம. இத⁴ பன க³ந்த²ஸம்பயுத்தா ந வத்தப்³பா³. சேதஸிகேஸு பன தோ³ஸோ விசிகிச்சா² கருணா முதி³தா க³ந்த²விப்பயுத்தா க³ந்த²னியா ஏவ, மோஹாஹிரிகானோத்தப்பஉத்³த⁴ச்சலோபா⁴ ததா² ந வத்தப்³பா³ ச, ஸேஸா குஸலாப்³யாகதா த்³விதா⁴பி ஹோந்தி, திஜாதிகா பன த்³விதா⁴பி ந வத்தப்³பா³ ச, ஸேஸா அகுஸலாபி ந வத்தப்³பா³ ச. ச²ட்ட²ம்.

க³ந்த²கோ³ச்ச²கம் நிட்டி²தம்.

ஓக⁴யோக³கோ³ச்ச²கானி ஸப்³ப³தா² ஆஸவகோ³ச்ச²கஸதி³ஸானி. பத³த்த²மத்தமேவ, ஹேத்த² நாமமத்தஞ்ச விஸேஸோ. தத்த² யஸ்ஸ ஸம்விஜ்ஜந்தி, தம் வட்டஸ்மிம் ஓஹனந்தி ஓஸீதா³பேந்தீதி ஓகா⁴. ஆரம்மணம் கத்வா அதிக்கமனீயதோ ஓகே⁴ஹி அதிக்கமிதப்³பா³தி ஓக⁴னியா. ததா² யோக³னியாதி ஏத்தா²பி. வட்டஸ்மிம் யோஜேந்தீதி யோகா³. ஸேஸம் தாதி³ஸமேவ.

ஓக⁴யோக³கோ³ச்ச²கானி நிட்டி²தானி.

நீவரணகோ³ச்ச²கே சித்தம் நீவரந்தி பரியோனந்த⁴ந்தீதி நீவரணா. தத்த² காமச்ச²ந்த³னீவரணம் ப்³யாபாத³னீவரணம் தி²னமித்³த⁴னீவரணம் உத்³த⁴ச்சகுக்குச்சனீவரணம் விசிகிச்சா²னீவரணம் அவிஜ்ஜானீவரணந்தி இமே ச² நீவரணா நாம. தத்த² தி²னந்தி ஸப்பிபிண்டோ³ விய அவிப்பா²ரிகதாய சித்தஸ்ஸ க⁴னபா⁴வோ, த²த்³த⁴தாதி அத்தோ². மேத⁴தீதி மித்³த⁴ம், அகம்மஞ்ஞபா⁴வோ, பசலாயிகபா⁴வகரோதி அத்தோ². இத³ஞ்ச ஸேக²புது²ஜ்ஜனானம் நித்³தா³ய புப்³ப³பா⁴கே³, அபரபா⁴கே³ ச பசலாயனஹேதுகம் உப்பஜ்ஜதி, ந நித்³தோ³க்கமனகாலே. கீ²ணாஸவானம்பி ஹி கரஜகாயஸ்ஸ து³ப்³ப³லபா⁴வேன அஸம்மிஸ்ஸப⁴வங்க³ஸந்ததிவஸேன நித்³தோ³க்கமனம் ஹோதி, தம் பன தேஸம் தி²னமித்³த⁴ஹேதுகம் ந ஹோதி, இதரேஸமேவ ஹோதி.

கேசி பன ரூபமேவ ‘‘மித்³த⁴’’ந்தி வத³ந்தி, தம் ந யுத்தம், ‘‘தி²னமித்³த⁴னீவரணம் அவிஜ்ஜானீவரணேன நீவரணஞ்சேவ நீவரணஸம்பயுத்தஞ்சா’’தி அரூபத⁴ம்மேஹி ஸம்பயோக³வசனதோ அரூபமேவ. அகுஸலஞ்ச ‘‘தி²னமித்³த⁴னீவரணஸ்ஸ பஹீனத்தா’’திஆதி³பஹானவசனதோ. அகுஸலா ஏவ ஹி பஹாதப்³பா³, தஸ்மா ஆருப்பேபி சேதம் உப்பஜ்ஜதி. ‘‘நீவரணம் த⁴ம்மம் படிச்ச நீவரணோ த⁴ம்மோ உப்பஜ்ஜதி ந புரேஜாதபச்சயா’’தி (பட்டா². 3.8.8) ஏதஸ்ஸ விப⁴ங்கே³ ‘‘ஆருப்பே காமச்ச²ந்த³னீவரணம் படிச்ச தி²னமித்³த⁴உத்³த⁴ச்சஅவிஜ்ஜானீவரண’’ந்தி (பட்டா². 3.8.8) ஸப்³ப³ம் வித்தா²ரேதப்³ப³ம். ‘‘ஸோப்பம் பசலாயிகா’’தி (த⁴. ஸ. 1163) பத³பா⁴ஜனீயே பனஸ்ஸ ப²லூபசாரேன வுத்தந்தி வேதி³தப்³ப³ம். தி²னம் மித்³த⁴ஞ்சாதி இத³ம் த்³வயம் நீவரணட்டா²னே ஏகனீவரணம் வுத்தம், ததா² உத்³த⁴ச்சகுக்குச்சஞ்சாதி இத³ம் த்³வயம். தத்த² குக்குச்சந்தி ‘‘அகதம் வத மே கல்யாணம், கதம் பாப’’ந்திஆதி³னா உப்பஜ்ஜமானோ விப்படிஸாரோ. தேனேவஸ்ஸ பத³பா⁴ஜனீயே ‘‘சேதஸோ விப்படிஸாரோ மனோவிலேகோ²’’தி ச வுத்தம். ‘‘அகப்பியே கப்பியஸஞ்ஞிதா’’திஆதி³ பன குக்குச்சமூலத³ஸ்ஸனத்த²ம். ஏவம்ஸஞ்ஞிதாய ஹி கதே வீதிக்கமே பச்சா² ‘‘து³ட்டு² மயா கத’’ந்தி ஸுதி³ன்னாதீ³னம் விய விப்படிஸாரோ உப்பஜ்ஜதி. யம் பன வினயே ‘‘அத² கோ² ஆயஸ்மா ஸாரிபுத்தோ…பே… குக்குச்சாயந்தோ ந படிக்³க³ஹேஸீ’’தி (பாசி. 204) குக்குச்சம் ஆக³தம், தம் நீவரணகுக்குச்சம். ந ஹி அரஹதோ நீவரணம் அத்தி², நீவரணவதிரூபகம் பன ‘‘கப்பதி, ந கப்பதீ’’தி வீமம்ஸனஸங்கா²தம் வினயகுக்குச்சம் நாமேதந்தி வேதி³தப்³ப³ம். ஸேஸனீவரணானி வுத்தத்தா²னி ஏவ. இமேஸு ச குக்குச்சவிசிகிச்சா² பட²மேன மக்³கே³ன பஹீயந்தி, ப்³யாபாதோ³ ததியேன, தி²னமித்³து⁴த்³த⁴ச்சாவிஜ்ஜா சதுத்தே²ன, காமச்ச²ந்தோ³ சதூஹிபீதி வத்தப்³ப³ம், ‘‘ததியேனா’’தி பன வுத்தம். இமே ச ஸபா⁴வதோ அட்ட² த⁴ம்மா ச² நீவரணா நாம ஜாதா, இமே பன ட²பேத்வா ஸேஸா நோ நீவரணா நாம. நீவரணது³கம் பட²மம்.

து³தியம் ஸாஸவது³கஸதி³ஸமேவ. த்³வாத³ஸ அகுஸலசித்தானி நீவரணஸம்பயுத்தா நாம. ஸேஸசித்தரூபனிப்³பா³னானி நீவரணவிப்பயுத்தா நாம. சேதஸிகேஸு அகுஸலா நீவரணஸம்பயுத்தாவ, குஸலாப்³யாகதா நீவரணவிப்பயுத்தாவ, ஸேஸா த்³விதா⁴பி ஹோந்தி. ததியம்.

ச² நீவரணா நீவரணா சேவ நீவரணியா ச நாம. ஸேஸா லோகியா நீவரணியா சேவ நோ ச நீவரணா நாம. லோகுத்தரா ந வத்தப்³பா³. ஸேஸம் ஆஸவகோ³ச்ச²கே சதுத்த²ஸதி³ஸமேவ. சதுத்த²ம்.

ச² நீவரணா நீவரணா சேவ நீவரணஸம்பயுத்தா ச நாம. தத³ஞ்ஞே நீவரணஸம்பயுத்தா பன நீவரணஸம்பயுத்தா சேவ நோ ச நீவரணா நாம. ததா² சேதஸிகேஸு நீவரணவிரஹிதா அகுஸலா, திஜாதிகா பன ததா² ச ந வத்தப்³பா³ ச, குஸலாப்³யாகதா ந வத்தப்³பா³வ. இத⁴ பன நீவரணவிப்பயுத்தா ஸப்³பே³ ந வத்தப்³பா³. பஞ்சமம்.

லோகுத்தரவஜ்ஜிதா நீவரணவிப்பயுத்தா நீவரணியா நாம. லோகுத்தரா நீவரணவிப்பயுத்தா அனீவரணியா நாம. இத⁴ பன நீவரணஸம்பயுத்தா ந வத்தப்³பா³. சேதஸிகேஸு பன கருணாமுதி³தா நீவரணவிப்பயுத்தா நீவரணியாவ, குஸலாப்³யாகதா த்³விதா⁴பி ஹோந்தி, திஜாதிகா ததா² ச ந வத்தப்³பா³ ச, அகுஸலா பன ந வத்தப்³பா³வ. ச²ட்ட²ம்.

நீவரணகோ³ச்ச²கம் நிட்டி²தம்.

பராமாஸகோ³ச்ச²கே த⁴ம்மானம் யதா²பூ⁴தம் அனிச்சாதி³ஆகாரம் அதிக்கமித்வா ‘‘நிச்ச’’ந்திஆதி³வஸேன பவத்தமானா பரதோ ஆமஸந்தீதி பராமாஸா. மிச்சா²தி³ட்டி². ப³ஹுவசனனித்³தே³ஸே காரணம் வுத்தமேவ. தத³ஞ்ஞே ஸப்³பே³ த⁴ம்மா நோ பராமாஸா நாம. பராமாஸது³கம் பட²மம்.

பராமாஸேஹி ஆரம்மணகரணவஸேன பராமட்ட²த்தா பராமட்டா². ஸேஸம் ஆஸவது³கஸதி³ஸமேவ. து³தியம்.

தி³ட்டி²ஸம்பயுத்தசித்தேஸு தி³ட்டி²விரஹிதா த⁴ம்மா பராமாஸஸம்பயுத்தா நாம. ஸேஸசித்தரூபனிப்³பா³னானி பராமாஸவிப்பயுத்தா நாம. இத⁴ பன தி³ட்டி² ந வத்தப்³பா³, ஸேஸசேதஸிகேஸு பன மானதோ³ஸஇஸ்ஸாமச்ச²ரியகுக்குச்சவிசிகிச்சா², குஸலாப்³யாகதா ச பராமாஸவிப்பயுத்தா ஏவ, ஸேஸா த்³விதா⁴பி ஹோந்தி. ததியம்.

தி³ட்டி² ஏவ பராமாஸா சேவ பராமட்டா² ச நாம. ஸேஸலோகியா பராமட்டா² சேவ நோ ச பராமாஸா நாம. இத⁴ பன லோகுத்தரா ந வத்தப்³பா³. ஸேஸம் ஸுவிஞ்ஞேய்யமேவ. சதுத்த²ம்.

இமஸ்மிம் பன கோ³ச்ச²கே ‘‘பராமாஸா சேவ த⁴ம்மா பராமாஸஸம்பயுத்தா சா’’தி அயம் து³கோ ந லப்³ப⁴தி. ந ஹி தி³ட்டி² தி³ட்டி²யா ஸம்பயுஜ்ஜதி. பச்சி²மது³கே லோகுத்தரவஜ்ஜிதா பராமாஸவிப்பயுத்தா பராமட்டா² நாம. லோகுத்தரா பராமாஸவிப்பயுத்தா அபராமட்டா² நாம. இத⁴ பன பராமாஸோ, தம்ஸம்பயுத்தா ச ந வத்தப்³பா³. ஸேஸம் வுத்தனயமேவ.

பராமாஸகோ³ச்ச²கம் நிட்டி²தம்.

மஹந்தரது³கேஸு ஆரம்மணம் அக்³க³ஹேத்வா அப்பவத்திதோ ஸஹ ஆரம்மணேனாதி ஸாரம்மணா, சித்தசேதஸிகா. நத்தி² ஆரம்மணமேதேஸந்தி அனாரம்மணா, ரூபனிப்³பா³னானி. ஸாரம்மணது³கம்.

சிந்தனட்டே²ன சித்தம், சித்ததாய வா சித்தம். தம் ஹி வத்து²த்³வாராரம்மணகிச்சாதி³பே⁴த³தோ, அதீதாதி³பே⁴த³தோ ச அத்தனோ விசித்ததாய சித்தந்தி வுச்சதி சித்தகரணதாய வா. லோகஸ்மிம் ஹி சித்தகம்மதோ உத்தரிதரம் சித்தம் நாம நத்தி², தஸ்மிம்பி சரணம் நாம சித்தம் அதிசித்தம் ஹோதி. யம் வா பனஞ்ஞம்பி லோகே ஸிப்பஜாதம், ஸப்³ப³ம் தம் சித்தேனேவ கரீயதி. ஏவம் தஸ்ஸ தஸ்ஸ சித்தஸ்ஸ நிப்பா²த³கம் சித்தம்பி ததே²வ சித்தம் ஹோதி. யதா² சிந்திதஸ்ஸ வா அனவஸேஸஸ்ஸ அனிப்ப²ஜ்ஜனதோ ததோபி சித்தமேவ சித்ததரம், ததா² யதே³தம் தே³வமனுஸ்ஸனிரயதிரச்சா²னபே⁴தா³ஸு க³தீஸு குஸலாகுஸலகம்மனானத்தம், தேன தாஸு க³தீஸு அபத³த்³விபதா³தி³உச்சத்தனீசத்தாதி³னானத்தம், தஸ்மிம் தஸ்மிம் அத்தபா⁴வே தீ³க⁴ரஸ்ஸதூ²லாதூ²லஸுவண்ணது³ப்³ப³ண்ணாதி³லாபா⁴லாபா⁴தி³ சாதி ஏவமாதி³ அஜ்ஜ²த்தம் சித்தம், ப³ஹித்³தா⁴ ச பத²வீபப்³ப³ததிணருக்க²லதாதி³தே³வப்³ரஹ்மவிமானகப்பருக்கா²தி³பூ⁴தம் கம்மபச்சயம் சித்தம், தம்பி சித்தேனேவ கதம், ததோ சித்தமேவ சித்ததரம் சிந்திதனியாமேன ஸப்³பா³காரஸ்ஸ அஸம்ப⁴வதோ. ஏவம் சிந்தனட்டே²ன, சித்தவிசித்தட்டே²ன, சித்தகரணட்டே²ன ச ‘‘சித்த’’ந்தி விஞ்ஞாணம் வேதி³தப்³ப³ம், ததே³வ விஞ்ஞாணம் சித்தம் நாம. சேதஸிகரூபனிப்³பா³னானி நோ சித்தா நாம. சித்தது³கம்.

அவிப்பயோக³வஸேன சேதஸி நியுத்தா சேதஸிகா, ப²ஸ்ஸாத³யோ த்³விபஞ்ஞாஸ த⁴ம்மா. சித்தரூபனிப்³பா³னானி அசேதஸிகா நாம. சேதஸிகது³கம்.

சேதஸிகா ஏவ சித்தஸம்பயுத்தா நாம. ரூபனிப்³பா³னானி சித்தவிப்பயுத்தா நாம, இத⁴ பன சித்தம் ந வத்தப்³ப³ம். சித்தஸம்பயுத்தது³கம்.

நிரந்தரபா⁴வூபக³மனதாய உப்பாத³தோ யாவ ப⁴ங்கா³சித்தேன ஸம்ஸட்டா²தி சித்தஸம்ஸட்டா². ஏகதோ வத்தமானாபி நிரந்தரபா⁴வம் அனுபக³மனதாய சித்தேன விஸம்ஸட்டா²தி சித்தவிஸம்ஸட்டா². ஸேஸம் அனந்தரது³கஸதி³ஸமேவ. சித்தஸம்ஸட்ட²து³கம்.

ஸமுட்ட²ஹந்தி ஏதேனாதி ஸமுட்டா²னம், சித்தம் ஸமுட்டா²னம் ஏதேஸந்தி சித்தஸமுட்டா²னா, சேதஸிகானி சேவ சித்தஜரூபகலாபா ச. சித்தம், பன அசித்தஜரூபகலாபா, நிப்³பா³னஞ்ச நோ சித்தஸமுட்டா²னா நாம. சித்தஸமுட்டா²னது³கம்.

ஸஹ ப⁴வந்தீதி ஸஹபு⁴னோ, சித்தேன ஸஹபு⁴னோ சித்தஸஹபு⁴னோ, சேதஸிகானி சேவ காயவசீவிஞ்ஞத்தியோ ச. சித்தம், பன விஞ்ஞத்திவஜ்ஜிதரூபனிப்³பா³னானி ச நோ சித்தஸஹபு⁴னோ நாம. சித்தஸஹபு⁴து³கம்.

அனுபரிவத்தந்தீதி அனுபரிவத்தினோ, கிம் அனுபரிவத்தந்தி? சித்தம், சித்தஸ்ஸ அனுபரிவத்தினோ சித்தானுபரிவத்தினோ. ஸேஸம் அனந்தரது³கஸதி³ஸமேவ. சித்தானுபரிவத்திது³கம்.

இதோ பரே பன தயோ து³கா சேதஸிகது³கஸதி³ஸாவ, கேவலம் பத³த்த²மத்தமேவ விஸேஸோ. தத்த² சித்தஸம்ஸட்டா² ச தே சித்தஸமுட்டா²னா ஏவ சாதி சித்தஸம்ஸட்ட²ஸமுட்டா²னா. சித்தஸம்ஸட்டா² ச தே சித்தஸமுட்டா²னா ச சித்தஸஹபு⁴னோ ஏவ சாதி சித்தஸம்ஸட்ட²ஸமுட்டா²னஸஹபு⁴னோ, சித்தஸம்ஸட்டா² ச தே சித்தஸமுட்டா²னா ச சித்தானுபரிவத்தினோ ஏவ சாதி சித்தஸம்ஸட்ட²ஸமுட்டா²னானுபரிவத்தினோ. ஸேஸம் ஸுவிஞ்ஞேய்யமேவ.

தத³னந்தரே பன அஜ்ஜ²த்திகது³கே அஜ்ஜ²த்தஜ்ஜ²த்தம் அஜ்ஜ²த்தத்திகே வுத்தவஸேன அஜ்ஜ²த்தாவ அஜ்ஜ²த்திகா. பஸாத³ரூபசித்தஸங்கா²தானி ச² அஜ்ஜ²த்திகானி ஆயதனானி. ததோ ப³ஹிபூ⁴தா பா³ஹிரா. ஸேஸரூபசேதஸிகனிப்³பா³னபஞ்ஞத்திஸங்கா²தானி ச² பா³ஹிராயதனானி, இத⁴ பன பஞ்ஞத்தியோபி லப்³ப⁴ந்தி. அஜ்ஜ²த்திகது³கம்.

உபாதி³யந்தேவ பூ⁴தானி, ந பூ⁴தா விய உபாதி³யந்தீதி உபாதா³, சதுவீஸதி உபாதா³ரூபானி ஏவ. ந உபாதி³யந்தீதி நோ உபாதா³, சதுமஹாபூ⁴தசித்தசேதஸிகனிப்³பா³னானி. உபாதா³து³கம்.

த்³வத்திம்ஸ லோகியவிபாகசித்தானி, கம்மஜரூபஞ்ச உபாதி³ன்னா நாம. ஸேஸலோகியலோகுத்தரானி, நிப்³பா³னஞ்ச அனுபாதி³ன்னா நாம. ஸேஸம் உபாதி³ன்னுபாதா³னியத்திகே வுத்தானுஸாரேன ஞாதப்³ப³ம். உபாதி³ன்னது³கம்.

மஹந்தரது³கா நிட்டி²தா.

உபாதா³னகோ³ச்ச²கேபு⁴ஸம் ஆதி³யந்தீதி உபாதா³னா, த³ள்ஹக்³கா³ஹம் க³ண்ஹந்தீதி அத்தோ². த³ள்ஹத்தோ² ஹி ஏத்த² உப-ஸத்³தோ³ ‘‘உபாயாஸோ’’திஆதீ³ஸு விய. ததோ அஞ்ஞே நோ உபாதா³னா. தத்த² காமுபாதா³னம் தி³ட்டு²பாதா³னம் ஸீலப்³ப³துபாதா³னம் அத்தவாது³பாதா³னந்தி இமே உபாதா³னா நாம. தத்த² வத்து²காமேஸு உப்பன்னோ கிலேஸகாமோவ வுத்தனயேன உபாதா³னந்தி காமுபாதா³னம். ஏவம் ஸேஸேஸுபி. தத்த² வீஸதிவத்து²கா ஸக்காயதி³ட்டி² அத்தவாது³பாதா³னம் நாம. ஸேஸானி புப்³பே³ வுத்தானேவ. பச்சி²மானி பனேத்த² தீணி உபாதா³னானி ததா²பவத்ததி³ட்டி² ஏவ. தானி ச பட²மேன மக்³கே³ன பஹீயந்தி, காமுபாதா³னம் சதூஹிபி. இமே ச ஸபா⁴வதோ த்³வே த⁴ம்மா விபா⁴க³தோ சதுருபாதா³னா நாம ஜாதா. இமே பன ட²பேத்வா ஸேஸா ஸப்³பே³ த⁴ம்மா நோ உபாதா³னா நாம. உபாதா³னது³கம் பட²மம்.

உபாதா³னியது³கோ ஸம்யோஜனியது³கஸதி³ஸோவ. து³தியம்.

அட்ட²லோப⁴ஸஹக³தசித்தானி, தம்ஸம்பயுத்தேஸு தி³ட்டி²விப்பயுத்தலோப⁴ம் ட²பேத்வா ஸேஸா ச உபாதா³னஸம்பயுத்தா நாம. தி³ட்டி²விப்பயுத்தலோப⁴தோ³ஸமோஹமூலானி, குஸலாப்³யாகதானி ச சித்தானி, ரூபனிப்³பா³னானி ச உபாதா³னவிப்பயுத்தா நாம. சேதஸிகேஸு பன தி³ட்டி²மானா உபாதா³னஸம்பயுத்தாவ, தோ³ஸஇஸ்ஸாமச்ச²ரியகுக்குச்சவிசிகிச்சா², குஸலாப்³யாகதா ச உபாதா³னவிப்பயுத்தா ஏவ. ஸேஸா து³விதா⁴பி ஹோந்தி. ததியம்.

சத்தாரி உபாதா³னானி உபாதா³னா சேவ உபாதா³னியா ச நாம. தத³வஸேஸா லோகியா உபாதா³னியா சேவ நோச உபாதா³னா நாம. இத⁴ பன லோகுத்தரா ந வத்தப்³பா³. ஸேஸம் வுத்தனயமேவ. சதுத்த²ம்.

பஞ்சமச²ட்ட²து³கா பாட²தோ க³ந்த²கோ³ச்ச²கே பஞ்சமச²ட்ட²து³கஸதி³ஸாவ, கேவலம் பஞ்சமது³கே ‘‘சேதஸிகேஸு மானோ உபாதா³னஸம்பயுத்தோ சேவ நோ ச உபாதா³னோ ஏவ, மோஹாஹிரிகானோத்தப்பஉத்³த⁴ச்சதி²னமித்³தா⁴னி திஜாதிகானி ததா² ச ந வத்தப்³பா³ சா’’தி இத³ஞ்ச, ச²ட்ட²து³கே ‘‘சேதஸிகேஸு தோ³ஸஇஸ்ஸாமச்ச²ரியகுக்குச்சவிசிகிச்சா² அப்பமஞ்ஞா உபாதா³னவிப்பயுத்தா உபாதா³னியா ஏவ, மோஹாஹிரிகானோத்தப்பஉத்³த⁴ச்சலோப⁴தி²னமித்³தா⁴னி ததா² ச ந வத்தப்³பா³னி சா’’தி ஏத்தகமேவ பாட²தோ விஸேஸோ, அத்த²தோ பன நாமமத்தகோவ விஸேஸோ. ஸேஸோ ஸுவிஞ்ஞேய்யோவ. பஞ்சமச²ட்டா²னி.

உபாதா³னகோ³ச்ச²கம் நிட்டி²தம்.

கிலேஸகோ³ச்ச²கே ஸம்கிலிட்ட²த்திகே வுத்தனயேன பத³த்தோ² வேதி³தப்³போ³. லோபோ⁴ தோ³ஸோ மோஹோ மானோ தி³ட்டி² விசிகிச்சா² தி²னம் உத்³த⁴ச்சம் அஹிரிகம் அனோத்தப்பந்தி இமே த³ஸ த⁴ம்மா கிலேஸா நாம. இமே ச வுத்தத்தா² ஏவ, இத⁴ பன லோபோ⁴, ஹேதுக³ந்த²னீவரணஉபாதா³னகோ³ச்ச²கேஸு லோபோ⁴ ச நிப்பதே³ஸதோ சதுமக்³க³வஜ்ஜோ²பி ஏகேனேவ கோட்டா²ஸேன டி²தோ, ஸேஸகோ³ச்ச²கேஸு ஸோ ஸப்³போ³பி லோபோ⁴ ‘‘காமாஸவோ ப⁴வாஸவோ’’திஆதி³னா த்³வே த்³வே கோட்டா²ஸா ஹுத்வா டி²தோ, இமினா பன அட்ட²கதா²வசனேனாபி ப⁴வாஸவாதி³ப்³யதிரித்தோ ஸப்³போ³ சதுமக்³க³வஜ்ஜோ²பி ராகோ³ காமாஸவாதீ³ஸு ஸங்க³ஹிதோ. காமச்ச²ந்த³னீவரணம் பன ப⁴வராகோ³பி ந பஞ்சகாமகு³ணிகராக³மத்தோவாதி பஞ்ஞாயதி, ‘‘ஆருப்பே காமச்ச²ந்த³னீவரணம் படிச்ச தி²னமித்³த⁴னீவரண’’ந்திஆதி³பாளிதோ (பட்டா². 3.8.8) சேதம் த³ட்ட²ப்³ப³ம் பஞ்சகாமகு³ணிகராக³ஸ்ஸ ரூபாரூபபூ⁴மீஸு அனுப்பஜ்ஜனதோ. இமேஸு ச கிலேஸேஸு தி³ட்டி²விசிகிச்சா² பட²மேன மக்³கே³ன பஹீயந்தி, தோ³ஸோ ததியேன, லோபா⁴த³யோ சதூஹிபி. இமே பன த³ஸ த⁴ம்மே ட²பேத்வா ஸேஸா நோ கிலேஸா நாம. கிலேஸது³கம் பட²மம்.

ஸம்கிலேஸிகது³கோ ஸாஸவது³கஸதி³ஸோவ. து³தியம்.

ஸம்கிலிட்ட²து³கோ, கிலேஸஸம்பயுத்தது³கோ சாதி த்³வேபி ஸமானத்தா²வ. தே ச நீவரணகோ³ச்ச²கே ததியது³கஸதி³ஸாவ. ததியசதுத்தா²னி.

த³ஸ கிலேஸா கிலேஸா சேவ ஸம்கிலேஸிகா ச நாம. ஸேஸா லோகியத⁴ம்மா ஸம்கிலேஸிகா சேவ நோ ச கிலேஸா நாம. இத⁴ பன லோகுத்தரா ந வத்தப்³பா³. ஸேஸம் நீவரணகோ³ச்ச²கே சதுத்த²து³கஸதி³ஸமேவ. பஞ்சமம்.

ச²ட்ட²ஸத்தமது³கானிபி அஞ்ஞமஞ்ஞம் ஸமானத்தா²னேவ. தானி ச²ட்ட²ஸத்தமானி நீவரணகோ³ச்ச²கே யதா²க்கமம் பாட²தோ பஞ்சமச²ட்ட²து³கஸதி³ஸானி, அத்த²தோ பன நாமமத்தகோவ விஸேஸோ. ஸேஸோ ஸுவிஞ்ஞேய்யோ. ச²ட்ட²ஸத்தமஅட்ட²மானி.

கிலேஸகோ³ச்ச²கம் நிட்டி²தம்.

பிட்டி²து³கேஸு ஆதி³தோ சத்தாரோ து³கா த³ஸ்ஸனேனபஹாதப்³ப³த்திகே, த³ஸ்ஸனேனபஹாதப்³ப³ஹேதுகே ச வுத்தனயேன வேதி³தப்³பா³. கேவலம் பன தத்த² பட²மத்திகே வுத்தேஸு த³ஸ்ஸனேனபஹாதப்³பே³ த⁴ம்மே ட²பேத்வா ஸேஸா இத⁴ பட²மது³கஸ்ஸ து³தியபதே³ த³ஸ்ஸனேனபஹாதப்³பே³ஸு பவிஸந்தி, பா⁴வனாயபஹாதப்³பே³ ட²பேத்வா ஸேஸா இத⁴ து³தியது³கே நபா⁴வனாயபஹாதப்³பே³ஸு பவிஸந்தி. தத்த² ச து³தியத்திகே வுத்தேஸு த³ஸ்ஸனேனபஹாதப்³ப³ஹேதுகே ட²பேத்வா ஸேஸா இத⁴ ததியது³கே நத³ஸ்ஸனேனபஹாதப்³ப³ஹேதுகே, பா⁴வனாயபஹாதப்³ப³ஹேதுகே ச ட²பேத்வா ஸேஸா இத⁴ சதுத்த²து³கே நபா⁴வனாயபஹாதப்³ப³ஹேதுகேஸு பவிஸந்தி.

பத³த்தோ² ச த³ஸ்ஸனேன பஹாதப்³போ³ ஹேது ஏதேஸம் அத்தீ²தி த³ஸ்ஸனேனபஹாதப்³ப³ஹேதுகா. ஏவம் பா⁴வனாயபஹாதப்³ப³ஹேதுகாதி ஏத்தா²பி அத்தோ² வேதி³தப்³போ³. ஏவம் ஹி ஸதி அஹேதுகானம் அக்³க³ஹணம் ஸியாதி ஏத்தகமேவ விஸேஸோ. திகத்³வயமேவ ஹி ப⁴க³வா தே³ஸனாவிலாஸேன சத்தாரோ து³கே கத்வா தே³ஸேஸி. ஸேஸம் தாதி³ஸமேவ. சத்தாரோ து³கா நிட்டி²தா.

பஞ்சபஞ்ஞாஸஸவிதக்கசித்தேஸு விதக்கவிரஹிதா சித்தசேதஸிகா த⁴ம்மா ஸவிதக்கா நாம. விதக்கோ, பன ஸேஸசித்தரூபனிப்³பா³னானி ச அவிதக்கா நாம. பஞ்சமம்.

ச²ஸட்டி²யா ஸவிசாரசித்தேஸு விசாரவிரஹிதா த⁴ம்மா ஸவிசாரா நாம. விசாரோ, பன ஸேஸசித்தரூபனிப்³பா³னானி ச அவிசாரா நாம. ஸேஸம் இத⁴, அனந்தரே வுத்தது³கே ச விதக்கத்திகே வுத்தானுஸாரேன ஞாதப்³ப³ம். ச²ட்ட²ம்.

இதோ பரேஸு ஸப்பீதிகது³கோ, பீதிஸஹக³தது³கோ ச ஸமானத்தா²வ, தே ச ஸுக²ஸஹக³தஉபேக்கா²ஸஹக³தது³கா சாதி சத்தாரோபி து³கா பீதித்திகே வுத்தனயாவ. கேவலம் பனேதேஸம் து³கானம் பட²மம் பத³ம் தத்த² பவிஸதி, பீதித்திகே இதரீதரபத³த்³வயஸங்க³ஹிதா, அஸங்க³ஹிதா ச ஸப்³பே³ அத்தா² ஹேட்டா² வுத்தனயேனேத்த² து³கானம் து³தியபதே³ஸு அத்த²தோ ஸங்க³ஹிதா, இமே ச நிப்பதே³ஸது³காதி அயமேவ விஸேஸோ. ஸத்தமஅட்ட²மனவமத³ஸமா.

தத³னந்தரேஸு காமாவசராதி ஏத்த² ‘‘ஹேட்ட²தோ அவீசினிரயம் பரியந்தம் கரித்வா உபரிதோ பரனிம்மிதவஸவத்தீ தே³வே அந்தோ கரித்வா யம் தஸ்மிம் அந்தரே ஏத்தா²வசரா ஏத்த² பரியாபன்னா’’தி ஏவம் (த⁴. ஸ. 1287) பாளியம் பரிச்சி²ன்னானம் சதுன்னம் அபாயானம், மனுஸ்ஸானம், ச²ன்னம் தே³வலோகானஞ்ச வஸேன ஓகாஸதோ ஏகாத³ஸவிதோ⁴ காமப⁴வோ ‘‘காமோ’’தி வுச்சதி உத்தரபத³லோபேன யதா² ‘‘ரூபூபபத்தியா’’திஆதீ³ஸு ரூபப⁴வோ ‘‘ரூப’’ந்தி. தஸ்மிம் காமே அவசரந்தி பவத்தந்தீதி காமாவசரா. யேபு⁴ய்யதோ சேதம் வுத்தம் ரூபாரூபேஸு சேதேஸஞ்ச இத⁴ பவத்திதோ ‘‘த²லசரா’’திஆதீ³ஸு விய. காமப⁴வஸங்கா²தே வா காமே படிஸந்தி⁴ம் அவசாரேந்தீதிபி காமாவசரா, குஸலாகுஸலானி. உத்³த⁴ச்சஸஹக³தசித்தம் பன அப்³யாகதசித்தஸதி³ஸம். ததா³யத்ததாய, ஆரம்மணகரணவஸேன வா கிலேஸகாமோ ஏத்த² அவசரதீதிபி காமாவசரம். காமஞ்சேஸ ரூபாரூபாவசரத⁴ம்மேஸுபி அவசரதி, ருள்ஹிதோ பன ‘‘வத³தீதி வச்சோ²’’திஆதீ³ஸு விய இமே ஏவ ‘‘காமாவசரா’’தி வுச்சந்தி. அபிச காமதண்ஹா ரூபதண்ஹா அரூபதண்ஹாதி ஏத்த² வுத்தகாமதண்ஹாஸங்கா²தோ காமோ ஏத்த² அவசரதீதிபி காமாவசரா. ஏவம் ப்³ரஹ்மானம் விமானாப⁴ரணாதீ³ஸு ச²ந்த³ராக³ஸ்ஸாபி காமதண்ஹாபா⁴வோ ஸித்³தோ⁴, ரூபதண்ஹாவிஸயானம்பி ச ப்³ரஹ்மானம் கம்மஜரூபாதீ³னம் காமதண்ஹாயபி விஸயதாய காமாவசரதா ஸித்³தா⁴ ஹோதி. ந ரூபாரூபாவசரானம் தத³பா⁴வதோ தத³ஞ்ஞே ந காமாவசரா. இமினா நயேன ரூபாவசராதி³து³கானம்பி பத³த்தோ² யதா²ரஹம் ஞாதப்³போ³. தத்த² சதுபஞ்ஞாஸ காமாவசரசித்தானி, ஸப்³ப³ஞ்ச ரூபம் காமாவசரா நாம. ஸேஸசித்தனிப்³பா³னானி ந காமாவசரா நாம. சேதஸிகேஸு வத்தப்³ப³ம் பரியாபன்னது³கே ஏவ ஆவி ப⁴விஸ்ஸதி. ஏகாத³ஸமம்.

பன்னரஸ ரூபாவசரசித்தானி ரூபாவசரா நாம. ஸேஸசித்தரூபனிப்³பா³னானி ந ரூபாவசரா நாம. த்³வாத³ஸமம்.

த்³வாத³ஸ அரூபாவசரசித்தானி அரூபாவசரா நாம. ஸேஸசித்தரூபனிப்³பா³னானி ந அரூபாவசரா நாம. தேரஸமம்.

தேபூ⁴மகவட்டே பரியாபன்னா அந்தோக³தா⁴தி பரியாபன்னா, லோகியத⁴ம்மாவ. தத்த² ந பரியாபன்னாதி அபரியாபன்னா, லோகுத்தரா. சேதஸிகேஸு பன காமாவசராதி³து³கானம் சதுன்னம்பி ஸாதா⁴ரணோ வினிச்ச²யோ ஏவம் வேதி³தப்³போ³ – அகுஸலசேதஸிகா காமாவசராவ, அப்பமஞ்ஞா காமரூபாவசரா, விரதியோ பன காமாவசரபரியாபன்னா, விதக்கவிசாரபீதியோ பன காமரூபாவசரபரியாபன்னா, ஸேஸா சதுபூ⁴மகாதி. சுத்³த³ஸமம்.

வட்டமூலம் சி²ந்த³ந்தா நிப்³பா³னம் ஆரம்மணம் கத்வா வட்டதோ நீயந்தீதி நிய்யானிகா, சத்தாரி லோகுத்தரமக்³க³சித்தானி. இமினா லக்க²ணேன ந நிய்யந்தீதி அனிய்யானிகா, ஸேஸசித்தரூபனிப்³பா³னானி. ஸேஸம் ஸுவிஞ்ஞேய்யமேவ. பஞ்சத³ஸமம்.

சுதியா வா அத்தனோ வா பவத்தியா அனந்தரம் ப²லதா³னே நியதத்தா நியதா, மிச்ச²த்தனியதா, ஸம்மத்தனியதா ச. ததா² அனியதத்தா அனியதா, ஸேஸத⁴ம்மா. ஸேஸம் வுத்தனயமேவ. ஸோளஸமம்.

அஞ்ஞே த⁴ம்மே உத்தரந்தி அதிக்கமந்தீதி உத்தரா, அத்தானம் உத்தரிதும் ஸமத்தே²ஹி ஸஹ உத்தரேஹீதி ஸஉத்தரா, லோகியாவ. நத்தி² ஏதேஸம் உத்தராதி அனுத்தரா, லோகுத்தரா. ஸத்தரஸமம்.

ரணந்தி கந்த³ந்தி ஏதேஹீதி ரணா, யேஹி அபி⁴பூ⁴தா ஸத்தா நானப்பகாரதோ பரிதே³வந்தி, தேஸம் அகுஸலமூலானம் ஏதம் அதி⁴வசனம், தேஹி ஸம்பயோக³வஸேன, பஹானேகட்ட²தாவஸேன ச ஸஹ ரணேஹீதி ஸரணா. ஏதேனாகாரேன நத்தி² ஏதேஸம் ரணாதி அரணா.

தத்த² த்³வாத³ஸ அகுஸலசித்தானி ஸரணா நாம. ஸரணத⁴ம்மேஸு சேத்த² லோப⁴தோ³ஸமோஹா ரணா சேவ ஸரணா ச, தேஸு லோப⁴தோ³ஸா மோஹேனேவ ஸம்பயோக³தோ ஸரணா, ததா² விசிகிச்சு²த்³த⁴ச்சஸஹக³தசித்தம், தம்ஸம்பயுத்தா ச. மோஹோ பன தேஸு ஸம்பயோக³தோ ஸரணோ, தி³ட்டி²ஸம்பயுத்தராகே³ன, பன ப⁴வராகே³ன ச ரணபூ⁴தேன பஹானேகட்ட²தாவஸேனேவ ஸரணோ. லோப⁴தோ³ஸமோஹமூலஸம்பயுத்தேஸு பன மோஹோ லோபே⁴ன சேவ தோ³ஸேன ச, ஸேஸா லோப⁴மோஹேன சேவ தோ³ஸமோஹேன ச ஸம்பயோக³தோ ஸரணாதி வேதி³தப்³பா³. ஸப்³பா³னி குஸலாப்³யாகதசித்தானி, ரூபனிப்³பா³னானி ச அரணா நாம. சேதஸிகேஸு பன அகுஸலா ஸரணாவ, குஸலாப்³யாகதா அரணாவ, திஜாதிகா பன த்³விதா⁴பி ஹோந்தீதி. அட்டா²ரஸமம்.

பிட்டி²து³கா நிட்டி²தா.

அபி⁴த⁴ம்மது³கமாதிகத்த²வண்ணனா நிட்டி²தா.