10. விப⁴ங்க³ஸுத்தம்

406. ‘‘ஸதிபட்டா²னஞ்ச வோ, பி⁴க்க²வே, தே³ஸேஸ்ஸாமி ஸதிபட்டா²னபா⁴வனஞ்ச ஸதிபட்டா²னபா⁴வனாகா³மினிஞ்ச படிபத³ம். தம் ஸுணாத²’’. ‘‘கதமஞ்ச, பி⁴க்க²வே, ஸதிபட்டா²னம்? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு வேத³னானுபஸ்ஸீ விஹரதி…பே… சித்தே சித்தானுபஸ்ஸீ விஹரதி…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். இத³ம் வுச்சதி, பி⁴க்க²வே, ஸதிபட்டா²னம்’’.

‘‘கதமா ச, பி⁴க்க²வே, ஸதிபட்டா²னபா⁴வனா? இத⁴, பி⁴க்க²வே, பி⁴க்கு² ஸமுத³யத⁴ம்மானுபஸ்ஸீ காயஸ்மிம் விஹரதி, வயத⁴ம்மானுபஸ்ஸீ காயஸ்மிம் விஹரதி, ஸமுத³யவயத⁴ம்மானுபஸ்ஸீ காயஸ்மிம் விஹரதி, ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். ஸமுத³யத⁴ம்மானுபஸ்ஸீ வேத³னாஸு விஹரதி…பே… ஸமுத³யத⁴ம்மானுபஸ்ஸீ சித்தே விஹரதி… ஸமுத³யத⁴ம்மானுபஸ்ஸீ த⁴ம்மேஸு விஹரதி, வயத⁴ம்மானுபஸ்ஸீ த⁴ம்மேஸு விஹரதி, ஸமுத³யவயத⁴ம்மானுபஸ்ஸீ த⁴ம்மேஸு விஹரதி, ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். அயம் வுச்சதி, பி⁴க்க²வே, ஸதிபட்டா²னபா⁴வனா.

‘‘கதமா ச, பி⁴க்க²வே, ஸதிபட்டா²னபா⁴வனாகா³மினீ படிபதா³? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴. அயம் வுச்சதி, பி⁴க்க²வே, ஸதிபட்டா²னபா⁴வனாகா³மினீ படிபதா³’’தி. த³ஸமம்.

அனனுஸ்ஸுதவக்³கோ³ சதுத்தோ².

தஸ்ஸுத்³தா³னம் –

அனனுஸ்ஸுதம் விராகோ³, விரத்³தோ⁴ பா⁴வனா ஸதி;

அஞ்ஞா ச²ந்த³ம் பரிஞ்ஞாய, பா⁴வனா விப⁴ங்கே³ன சாதி.