1. மஹாபுரிஸஸுத்தம்

377. ஸாவத்தி²னிதா³னம். அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸாரிபுத்தோ ப⁴க³வந்தம் ஏதத³வோச – ‘‘‘மஹாபுரிஸோ, மஹாபுரிஸோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, மஹாபுரிஸோ ஹோதீ’’தி? ‘‘விமுத்தசித்தத்தா க்²வாஹம், ஸாரிபுத்த, ‘மஹாபுரிஸோ’தி வதா³மி. அவிமுத்தசித்தத்தா ‘நோ மஹாபுரிஸோ’தி வதா³மி’’.

‘‘கத²ஞ்ச, ஸாரிபுத்த, விமுத்தசித்தோ ஹோதி? இத⁴, ஸாரிபுத்த, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ காயே காயானுபஸ்ஸினோ விஹரதோ சித்தம் விரஜ்ஜதி, விமுச்சதி அனுபாதா³ய ஆஸவேஹி. வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ த⁴ம்மேஸு த⁴ம்மானுபஸ்ஸினோ விஹரதோ சித்தம் விரஜ்ஜதி, விமுச்சதி அனுபாதா³ய ஆஸவேஹி. ஏவம் கோ², ஸாரிபுத்த, விமுத்தசித்தோ ஹோதி. விமுத்தசித்தத்தா க்²வாஹம், ஸாரிபுத்த, ‘மஹாபுரிஸோ’தி வதா³மி. அவிமுத்தசித்தத்தா ‘நோ மஹாபுரிஸோ’தி வதா³மீ’’தி. பட²மம்.