7. மக்கடஸுத்தம்

373. ‘‘அத்தி², பி⁴க்க²வே, ஹிமவதோ பப்³ப³தராஜஸ்ஸ து³க்³கா³ விஸமா தே³ஸா, யத்த² நேவ மக்கடானம் சாரீ ந மனுஸ்ஸானம். அத்தி², பி⁴க்க²வே, ஹிமவதோ பப்³ப³தராஜஸ்ஸ து³க்³கா³ விஸமா தே³ஸா, யத்த² மக்கடானஞ்ஹி கோ² சாரீ, ந மனுஸ்ஸானம். அத்தி², பி⁴க்க²வே, ஹிமவதோ பப்³ப³தராஜஸ்ஸ ஸமா பூ⁴மிபா⁴கா³ ரமணீயா, யத்த² மக்கடானஞ்சேவ சாரீ மனுஸ்ஸானஞ்ச. தத்ர, பி⁴க்க²வே, லுத்³தா³ மக்கடவீதீ²ஸு லேபம் ஓட்³டே³ந்தி மக்கடானம் பா³த⁴னாய.

‘‘தத்ர, பி⁴க்க²வே, யே தே மக்கடா அபா³லஜாதிகா அலோலஜாதிகா, தே தம் லேபம் தி³ஸ்வா ஆரகா பரிவஜ்ஜந்தி. யோ பன ஸோ ஹோதி மக்கடோ பா³லஜாதிகோ லோலஜாதிகோ, ஸோ தம் லேபம் உபஸங்கமித்வா ஹத்தே²ன க³ண்ஹாதி. ஸோ தத்த² ப³ஜ்ஜ²தி. ‘ஹத்த²ம் மோசேஸ்ஸாமீ’தி து³தியேன ஹத்தே²ன க³ண்ஹாதி. ஸோ தத்த² ப³ஜ்ஜ²தி. ‘உபோ⁴ ஹத்தே² மோசேஸ்ஸாமீ’தி பாதே³ன க³ண்ஹாதி. ஸோ தத்த² ப³ஜ்ஜ²தி. ‘உபோ⁴ ஹத்தே² மோசேஸ்ஸாமி பாத³ஞ்சா’தி து³தியேன பாதே³ன க³ண்ஹாதி. ஸோ தத்த² ப³ஜ்ஜ²தி. ‘உபோ⁴ ஹத்தே² மோசேஸ்ஸாமி பாதே³ சா’தி துண்டே³ன க³ண்ஹாதி. ஸோ தத்த² ப³ஜ்ஜ²தி. ஏவஞ்ஹி ஸோ, பி⁴க்க²வே, மக்கடோ பஞ்சோட்³டி³தோ து²னம் ஸேதி அனயம் ஆபன்னோ ப்³யஸனம் ஆபன்னோ யதா²காமகரணீயோ லுத்³த³ஸ்ஸ. தமேனம், பி⁴க்க²வே, லுத்³தோ³ விஜ்ஜி²த்வா தஸ்மிம்யேவ கட்ட²கதங்கா³ரே [தஸ்மிம்யேவ மக்கடம் உத்³த⁴ரித்வா (ஸீ. ஸ்யா.)] அவஸ்ஸஜ்ஜேத்வா யேன காமம் பக்கமதி. ஏவம் ஸோ தம், பி⁴க்க²வே, ஹோதி யோ அகோ³சரே சரதி பரவிஸயே.

‘‘தஸ்மாதிஹ, பி⁴க்க²வே, மா அகோ³சரே சரித்த² பரவிஸயே. அகோ³சரே, பி⁴க்க²வே, சரதம் பரவிஸயே லச்ச²தி மாரோ ஓதாரம், லச்ச²தி மாரோ ஆரம்மணம். கோ ச, பி⁴க்க²வே, பி⁴க்கு²னோ அகோ³சரோ பரவிஸயோ? யதி³த³ம் – பஞ்ச காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா, ஸோதவிஞ்ஞேய்யா ஸத்³தா³…பே… கா⁴னவிஞ்ஞேய்யா க³ந்தா⁴… ஜிவ்ஹாவிஞ்ஞேய்யா ரஸா… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா. அயம், பி⁴க்க²வே, பி⁴க்கு²னோ அகோ³சரோ பரவிஸயோ.

‘‘கோ³சரே, பி⁴க்க²வே, சரத² ஸகே பேத்திகே விஸயே. கோ³சரே, பி⁴க்க²வே, சரதம் ஸகே பேத்திகே விஸயே ந லச்ச²தி மாரோ ஓதாரம், ந லச்ச²தி மாரோ ஆரம்மணம். கோ ச, பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோ? யதி³த³ம் – சத்தாரோ ஸதிபட்டா²னா. கதமே சத்தாரோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். அயம், பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோ’’தி. ஸத்தமம்.