8. ஸூத³ஸுத்தம்

374. ‘‘ஸேய்யதா²பி, பி⁴க்க²வே, பா³லோ அப்³யத்தோ அகுஸலோ ஸூதோ³ ராஜானம் வா ராஜமஹாமத்தம் வா [ராஜமஹாமத்தானம் வா (ஸீ.)] நானச்சயேஹி ஸூபேஹி பச்சுபட்டி²தோ அஸ்ஸ – அம்பி³லக்³கே³ஹிபி, தித்தகக்³கே³ஹிபி, கடுகக்³கே³ஹிபி, மது⁴ரக்³கே³ஹிபி, கா²ரிகேஹிபி, அகா²ரிகேஹிபி, லோணிகேஹிபி, அலோணிகேஹிபி.

‘‘ஸ கோ² ஸோ, பி⁴க்க²வே, பா³லோ அப்³யத்தோ அகுஸலோ ஸூதோ³ ஸகஸ்ஸ ப⁴த்து நிமித்தம் ந உக்³க³ண்ஹாதி – ‘இத³ம் வா மே அஜ்ஜ ப⁴த்து ஸூபேய்யம் ருச்சதி, இமஸ்ஸ வா அபி⁴ஹரதி, இமஸ்ஸ வா ப³ஹும் க³ண்ஹாதி, இமஸ்ஸ வா வண்ணம் பா⁴ஸதி. அம்பி³லக்³க³ம் வா மே அஜ்ஜ ப⁴த்து ஸூபேய்யம் ருச்சதி, அம்பி³லக்³க³ஸ்ஸ வா அபி⁴ஹரதி, அம்பி³லக்³க³ஸ்ஸ வா ப³ஹும் க³ண்ஹாதி, அம்பி³லக்³க³ஸ்ஸ வா வண்ணம் பா⁴ஸதி. தித்தகக்³க³ம் வா மே அஜ்ஜ… கடுகக்³க³ம் வா மே அஜ்ஜ… மது⁴ரக்³க³ம் வா மே அஜ்ஜ… கா²ரிகம் வா மே அஜ்ஜ… அகா²ரிகம் வா மே அஜ்ஜ… லோணிகம் வா மே அஜ்ஜ… அலோணிகம் வா மே அஜ்ஜ ப⁴த்து ஸூபேய்யம் ருச்சதி, அலோணிகஸ்ஸ வா அபி⁴ஹரதி, அலோணிகஸ்ஸ வா ப³ஹும் க³ண்ஹாதி, அலோணிகஸ்ஸ வா வண்ணம் பா⁴ஸதீ’’’தி.

‘‘ஸ கோ² ஸோ, பி⁴க்க²வே, பா³லோ அப்³யத்தோ அகுஸலோ ஸூதோ³ ந சேவ லாபீ⁴ ஹோதி அச்சா²த³னஸ்ஸ, ந லாபீ⁴ வேதனஸ்ஸ, ந லாபீ⁴ அபி⁴ஹாரானம். தம் கிஸ்ஸ ஹேது? ததா² ஹி ஸோ, பி⁴க்க²வே, பா³லோ அப்³யத்தோ அகுஸலோ ஸூதோ³ ஸகஸ்ஸ ப⁴த்து நிமித்தம் ந உக்³க³ண்ஹாதி. ஏவமேவ கோ², பி⁴க்க²வே, இதே⁴கச்சோ பா³லோ அப்³யத்தோ அகுஸலோ பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ காயே காயானுபஸ்ஸினோ விஹரதோ சித்தம் ந ஸமாதி⁴யதி, உபக்கிலேஸா ந பஹீயந்தி. ஸோ தம் நிமித்தம் ந உக்³க³ண்ஹாதி. வேத³னாஸு வேத³னானுபஸ்ஸீ விஹரதி…பே… சித்தே சித்தானுபஸ்ஸீ விஹரதி …பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ த⁴ம்மேஸு த⁴ம்மானுபஸ்ஸினோ விஹரதோ சித்தம் ந ஸமாதி⁴யதி, உபக்கிலேஸா ந பஹீயந்தி. ஸோ தம் நிமித்தம் ந உக்³க³ண்ஹாதி.

‘‘ஸ கோ² ஸோ, பி⁴க்க²வே, பா³லோ அப்³யத்தோ அகுஸலோ பி⁴க்கு² ந சேவ லாபீ⁴ ஹோதி தி³ட்டே²வ த⁴ம்மே ஸுக²விஹாரானம், ந லாபீ⁴ ஸதிஸம்பஜஞ்ஞஸ்ஸ. தம் கிஸ்ஸ ஹேது? ததா² ஹி ஸோ, பி⁴க்க²வே, பா³லோ அப்³யத்தோ அகுஸலோ பி⁴க்கு² ஸகஸ்ஸ சித்தஸ்ஸ நிமித்தம் ந உக்³க³ண்ஹாதி.

‘‘ஸேய்யதா²பி, பி⁴க்க²வே, பண்டி³தோ ப்³யத்தோ குஸலோ ஸூதோ³ ராஜானம் வா ராஜமஹாமத்தம் வா நானச்சயேஹி ஸூபேஹி பச்சுபட்டி²தோ அஸ்ஸ – அம்பி³லக்³கே³ஹிபி, தித்தகக்³கே³ஹிபி, கடுகக்³கே³ஹிபி, மது⁴ரக்³கே³ஹிபி, கா²ரிகேஹிபி, அகா²ரிகேஹிபி, லோணிகேஹிபி, அலோணிகேஹிபி.

‘‘ஸ கோ² ஸோ, பி⁴க்க²வே, பண்டி³தோ ப்³யத்தோ குஸலோ ஸூதோ³ ஸகஸ்ஸ ப⁴த்து நிமித்தம் உக்³க³ண்ஹாதி – ‘இத³ம் வா மே அஜ்ஜ ப⁴த்து ஸூபேய்யம் ருச்சதி, இமஸ்ஸ வா அபி⁴ஹரதி, இமஸ்ஸ வா ப³ஹும் க³ண்ஹாதி, இமஸ்ஸ வா வண்ணம் பா⁴ஸதி. அம்பி³லக்³க³ம் வா மே அஜ்ஜ ப⁴த்து ஸூபேய்யம் ருச்சதி, அம்பி³லக்³க³ஸ்ஸ வா அபி⁴ஹரதி, அம்பி³லக்³க³ஸ்ஸ வா ப³ஹும் க³ண்ஹாதி, அம்பி³லக்³க³ஸ்ஸ வா வண்ணம் பா⁴ஸதி. தித்தகக்³க³ம் வா மே அஜ்ஜ… கடுகக்³க³ம் வா மே அஜ்ஜ… மது⁴ரக்³க³ம் வா மே அஜ்ஜ… கா²ரிகம் வா மே அஜ்ஜ… அகா²ரிகம் வா மே அஜ்ஜ… லோணிகம் வா மே அஜ்ஜ… அலோணிகம் வா மே அஜ்ஜ ப⁴த்து ஸூபேய்யம் ருச்சதி, அலோணிகஸ்ஸ வா அபி⁴ஹரதி, அலோணிகஸ்ஸ வா ப³ஹும் க³ண்ஹாதி, அலோணிகஸ்ஸ வா வண்ணம் பா⁴ஸதீ’’’தி.

‘‘ஸ கோ² ஸோ, பி⁴க்க²வே, பண்டி³தோ ப்³யத்தோ குஸலோ ஸூதோ³ லாபீ⁴ சேவ ஹோதி அச்சா²த³னஸ்ஸ, லாபீ⁴ வேதனஸ்ஸ, லாபீ⁴ அபி⁴ஹாரானம். தம் கிஸ்ஸ ஹேது? ததா² ஹி ஸோ, பி⁴க்க²வே, பண்டி³தோ ப்³யத்தோ குஸலோ ஸூதோ³ ஸகஸ்ஸ ப⁴த்து நிமித்தம் உக்³க³ண்ஹாதி. ஏவமேவ கோ², பி⁴க்க²வே, இதே⁴கச்சோ பண்டி³தோ ப்³யத்தோ குஸலோ பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ காயே காயானுபஸ்ஸினோ விஹரதோ சித்தம் ஸமாதி⁴யதி, உபக்கிலேஸா பஹீயந்தி. ஸோ தம் நிமித்தம் உக்³க³ண்ஹாதி. வேத³னாஸு வேத³னானுபஸ்ஸீ விஹரதி…பே… சித்தே சித்தானுபஸ்ஸீ விஹரதி…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ த⁴ம்மேஸு த⁴ம்மானுபஸ்ஸினோ விஹரதோ சித்தம் ஸமாதி⁴யதி, உபக்கிலேஸா பஹீயந்தி. ஸோ தம் நிமித்தம் உக்³க³ண்ஹாதி.

‘‘ஸ கோ² ஸோ, பி⁴க்க²வே, பண்டி³தோ ப்³யத்தோ குஸலோ பி⁴க்கு² லாபீ⁴ சேவ ஹோதி தி³ட்டே²வ த⁴ம்மே ஸுக²விஹாரானம், லாபீ⁴ ஹோதி ஸதிஸம்பஜஞ்ஞஸ்ஸ. தம் கிஸ்ஸ ஹேது? ததா² ஹி ஸோ, பி⁴க்க²வே, பண்டி³தோ ப்³யத்தோ குஸலோ பி⁴க்கு² ஸகஸ்ஸ சித்தஸ்ஸ நிமித்தம் உக்³க³ண்ஹாதீ’’தி. அட்ட²மம்.