10. பி⁴க்கு²னுபஸ்ஸயஸுத்தம்

376. அத² கோ² ஆயஸ்மா ஆனந்தோ³ புப்³ப³ண்ஹஸமயம் நிவாஸேத்வா பத்தசீவரமாதா³ய யேன அஞ்ஞதரோ பி⁴க்கு²னுபஸ்ஸயோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஸம்ப³ஹுலா பி⁴க்கு²னியோ யேனாயஸ்மா ஆனந்தோ³ தேனுபஸங்கமிம்ஸு; உபஸங்கமித்வா ஆயஸ்மந்தம் ஆனந்த³ம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தா பி⁴க்கு²னியோ ஆயஸ்மந்தம் ஆனந்த³ம் ஏதத³வோசும் –

‘‘இத⁴, ப⁴ந்தே ஆனந்த³, ஸம்ப³ஹுலா பி⁴க்கு²னியோ சதூஸு ஸதிபட்டா²னேஸு ஸுப்பதிட்டி²தசித்தா [ஸுபட்டி²தசித்தா (ஸீ. பீ. க.)] விஹரந்தியோ உளாரம் புப்³பே³னாபரம் விஸேஸம் ஸஞ்ஜானந்தீ’’தி [ஸம்பஜானந்தீதி (க.)]. ‘‘ஏவமேதம், ப⁴கி³னியோ, ஏவமேதம், ப⁴கி³னியோ! யோ ஹி கோசி, ப⁴கி³னியோ, பி⁴க்கு² வா பி⁴க்கு²னீ வா சதூஸு ஸதிபட்டா²னேஸு ஸுப்பதிட்டி²தசித்தோ விஹரதி, தஸ்ஸேதம் பாடிகங்க²ம் – ‘உளாரம் புப்³பே³னாபரம் விஸேஸம் ஸஞ்ஜானிஸ்ஸதீ’’’தி.

அத² கோ² ஆயஸ்மா ஆனந்தோ³ தா பி⁴க்கு²னியோ த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி. அத² கோ² ஆயஸ்மா ஆனந்தோ³ ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ யேன ப⁴க³வா தேனுபஸங்கமிம்; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம். ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச –

‘‘இதா⁴ஹம், ப⁴ந்தே, புப்³ப³ண்ஹஸமயம் நிவாஸேத்வா பத்தசீவரமாதா³ய யேன அஞ்ஞதரோ பி⁴க்கு²னுபஸ்ஸயோ தேனுபஸங்கமிம்; உபஸங்கமித்வா பஞ்ஞத்தே ஆஸனே நிஸீதி³ம். அத² கோ², ப⁴ந்தே, ஸம்ப³ஹுலா பி⁴க்கு²னியோ யேனாஹம் தேனுபஸங்கமிம்ஸு; உபஸங்கமித்வா மம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ², ப⁴ந்தே, தா பி⁴க்கு²னியோ மம் ஏதத³வோசும் – ‘இத⁴, ப⁴ந்தே ஆனந்த³, ஸம்ப³ஹுலா பி⁴க்கு²னியோ சதூஸு ஸதிபட்டா²னேஸு ஸுப்பதிட்டி²தசித்தா விஹரந்தியோ உளாரம் புப்³பே³னாபரம் விஸேஸம் ஸஞ்ஜானந்தீ’தி. ஏவம் வுத்தாஹம், ப⁴ந்தே, தா பி⁴க்கு²னியோ ஏதத³வோசம் – ‘ஏவமேதம், ப⁴கி³னியோ, ஏவமேதம், ப⁴கி³னியோ! யோ ஹி கோசி, ப⁴கி³னியோ, பி⁴க்கு² வா பி⁴க்கு²னீ வா சதூஸு ஸதிபட்டா²னேஸு ஸுப்பதிட்டி²தசித்தோ விஹரதி, தஸ்ஸேதம் பாடிகங்க²ம் – உளாரம் புப்³பே³னாபரம் விஸேஸம் ஸஞ்ஜானிஸ்ஸதீ’’’தி.

‘‘ஏவமேதம், ஆனந்த³, ஏவமேதம், ஆனந்த³! யோ ஹி கோசி, ஆனந்த³, பி⁴க்கு² வா பி⁴க்கு²னீ வா சதூஸு ஸதிபட்டா²னேஸு ஸுப்பதிட்டி²தசித்தோ விஹரதி, தஸ்ஸேதம் பாடிகங்க²ம் – ‘உளாரம் புப்³பே³னாபரம் விஸேஸம் ஸஞ்ஜானிஸ்ஸதி’’’ [ஸஞ்ஜானிஸ்ஸதீதி (ப³ஹூஸு)].

‘‘கதமேஸு சதூஸு? இதா⁴னந்த³, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ காயே காயானுபஸ்ஸினோ விஹரதோ காயாரம்மணோ வா உப்பஜ்ஜதி காயஸ்மிம் பரிளாஹோ, சேதஸோ வா லீனத்தம், ப³ஹித்³தா⁴ வா சித்தம் விக்கி²பதி. தேனானந்த³ [தேனஹானந்த³ (ஸீ.)], பி⁴க்கு²னா கிஸ்மிஞ்சிதே³வ பஸாத³னீயே நிமித்தே சித்தம் பணித³ஹிதப்³ப³ம். தஸ்ஸ கிஸ்மிஞ்சிதே³வ பஸாத³னீயே நிமித்தே சித்தம் பணித³ஹதோ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி [வேதி³யதி (ஸீ.)]. ஸுகி²னோ சித்தம் ஸமாதி⁴யதி. ஸோ இதி படிஸஞ்சிக்க²தி – ‘யஸ்ஸ க்²வாஹம் அத்தா²ய சித்தம் பணித³ஹிம், ஸோ மே அத்தோ² அபி⁴னிப்ப²ன்னோ. ஹந்த³, தா³னி படிஸம்ஹராமீ’தி. ஸோ படிஸம்ஹரதி சேவ ந ச விதக்கேதி ந ச விசாரேதி. ‘அவிதக்கோம்ஹி அவிசாரோ, அஜ்ஜ²த்தம் ஸதிமா ஸுக²மஸ்மீ’தி பஜானாதி’’.

‘‘புன சபரம், ஆனந்த³, பி⁴க்கு² வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ த⁴ம்மேஸு த⁴ம்மானுபஸ்ஸினோ விஹரதோ த⁴ம்மாரம்மணோ வா உப்பஜ்ஜதி காயஸ்மிம் பரிளாஹோ, சேதஸோ வா லீனத்தம், ப³ஹித்³தா⁴ வா சித்தம் விக்கி²பதி. தேனானந்த³, பி⁴க்கு²னா கிஸ்மிஞ்சிதே³வ பஸாத³னீயே நிமித்தே சித்தம் பணித³ஹிதப்³ப³ம். தஸ்ஸ கிஸ்மிஞ்சிதே³வ பஸாத³னீயே நிமித்தே சித்தம் பணித³ஹதோ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. ஸோ இதி படிஸஞ்சிக்க²தி – ‘யஸ்ஸ க்²வாஹம் அத்தா²ய சித்தம் பணித³ஹிம், ஸோ மே அத்தோ² அபி⁴னிப்ப²ன்னோ. ஹந்த³, தா³னி படிஸம்ஹராமீ’தி. ஸோ படிஸம்ஹரதி சேவ ந ச விதக்கேதி ந ச விசாரேதி. ‘அவிதக்கோம்ஹி அவிசாரோ, அஜ்ஜ²த்தம் ஸதிமா ஸுக²மஸ்மீ’தி பஜானாதி. ஏவம் கோ², ஆனந்த³, பணிதா⁴ய பா⁴வனா ஹோதி.

‘‘கத²ஞ்சானந்த³, அப்பணிதா⁴ய பா⁴வனா ஹோதி? ப³ஹித்³தா⁴, ஆனந்த³, பி⁴க்கு² சித்தம் அப்பணிதா⁴ய ‘அப்பணிஹிதம் மே ப³ஹித்³தா⁴ சித்த’ந்தி பஜானாதி. அத² பச்சா²புரே ‘அஸம்கி²த்தம் விமுத்தம் அப்பணிஹித’ந்தி பஜானாதி. அத² ச பன ‘காயே காயானுபஸ்ஸீ விஹராமி ஆதாபீ ஸம்பஜானோ ஸதிமா ஸுக²மஸ்மீ’தி பஜானாதி. ப³ஹித்³தா⁴, ஆனந்த³, பி⁴க்கு² சித்தம் அப்பணிதா⁴ய ‘அப்பணிஹிதம் மே ப³ஹித்³தா⁴ சித்த’ந்தி பஜானாதி. அத² பச்சா²புரே ‘அஸம்கி²த்தம் விமுத்தம் அப்பணிஹித’ந்தி பஜானாதி. அத² ச பன ‘வேத³னாஸு வேத³னானுபஸ்ஸீ விஹராமி ஆதாபீ ஸம்பஜானோ ஸதிமா ஸுக²மஸ்மீ’தி பஜானாதி. ப³ஹித்³தா⁴, ஆனந்த³, பி⁴க்கு² சித்தம் அப்பணிதா⁴ய ‘அப்பணிஹிதம் மே ப³ஹித்³தா⁴ சித்த’ந்தி பஜானாதி. அத² பச்சா²புரே ‘அஸம்கி²த்தம் விமுத்தம் அப்பணிஹித’ந்தி பஜானாதி. அத² ச பன ‘சித்தே சித்தானுபஸ்ஸீ விஹராமி ஆதாபீ ஸம்பஜானோ ஸதிமா ஸுக²மஸ்மீ’தி பஜானாதி. ப³ஹித்³தா⁴, ஆனந்த³, பி⁴க்கு² சித்தம் அப்பணிதா⁴ய ‘அப்பணிஹிதம் மே ப³ஹித்³தா⁴ சித்த’ந்தி பஜானாதி. அத² பச்சா²புரே ‘அஸம்கி²த்தம் விமுத்தம் அப்பணிஹித’ந்தி பஜானாதி. அத² ச பன ‘த⁴ம்மேஸு த⁴ம்மானுபஸ்ஸீ விஹராமி ஆதாபீ ஸம்பஜானோ ஸதிமா ஸுக²மஸ்மீ’தி பஜானாதி. ஏவம் கோ², ஆனந்த³, அப்பணிதா⁴ய பா⁴வனா ஹோதி.

‘‘இதி கோ², ஆனந்த³, தே³ஸிதா மயா பணிதா⁴ய பா⁴வனா, தே³ஸிதா அப்பணிதா⁴ய பா⁴வனா. யம், ஆனந்த³, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, ஆனந்த³, ருக்க²மூலானி, ஏதானி ஸுஞ்ஞாகா³ரானி! ஜா²யதா²னந்த³, மா பமாத³த்த²; மா பச்சா² விப்படிஸாரினோ அஹுவத்த²! அயம் வோ அம்ஹாகம் அனுஸாஸனீ’’தி.

இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதம் அபி⁴னந்தீ³தி. த³ஸமம்.

அம்ப³பாலிவக்³கோ³ பட²மோ.

தஸ்ஸுத்³தா³னம் –

அம்ப³பாலி ஸதோ பி⁴க்கு², ஸாலா குஸலராஸி ச;

ஸகுணக்³தி⁴ மக்கடோ ஸூதோ³, கி³லானோ பி⁴க்கு²னுபஸ்ஸயோதி.